Իլհամ Ալիև

Բուդապեշտում կայացել են Հունգարիա-Ադրբեջան բարձր մակարդակի հանդիպումներ |1lurer.am|

1lurer.am: Այսօր Բուդապեշտում կայացել են բարձր մակարդակի բանակցություններ, որից հետո Ադրբեջանը և Հունգարիան ստորագրել են մի շարք միջկառավարական փաստաթղթեր: Հունգարիայի վարչապետ Վիկտոր Օրբանը և Ադրբեջանի նախագահ Իլհամ Ալիևը, մասնավորապես, ստորագրել են համատեղ հռչակագիր Ադրբեջանի և Հունգարիայի միջև ընդլայնված ռազմավարական գործընկերության մասին։ Բացի այդ, կողմերը ստորագրել են ևս 6 փաստաթուղթ, այդ թվում՝ համագործակցության արձանագրություն Ադրբեջանի արտաքին գործերի նախարարության և Հունգարիայի արտաքին գործերի ու առևտրի նախարարության միջև, փոխըմբռնման հուշագիր Ադրբեջանի էկոնոմիկայի և Հունգարիայի արտաքին գործերի ու առևտրի նախարարությունների միջև՝ բնական գազի ոլորտում համագործակցության վերաբերյալ:

18:54 - 30 հունվարի, 2023

Միայն ռազմական ուժը երբեք բավարար չի եղել տևական և համապարփակ խաղաղության հասնելու համար. Եգիպտոսի նախագահը հանդիպել է Ալիևին |armenpress.am|

armenpress.am: Եգիպտոսի Արաբական Հանրապետության նախագահ Աբդել Ֆաթահ էլ-Սիսին տարածաշրջանային այցի շրջանակում Ադրբեջանի նախագահ Ալիևի հետ հանդիպմանը քննարկել է Հարավային Կովկասում տիրող իրավիճակը, ընդգծել է խաղաղության հասնելու նպատակով՝ բանակցությունների կարևորությունը: Ինչպես տեղեկացնում են Եգիպտոսի նախագահի պաշտոնական կայքից, Ալիևի հետ բանակցությունների ընթացքում քննարկել են մի շարք միջազգային և տարածաշրջանային հարցեր՝ թե՛ Մերձավոր Արևելքում, թե՛ Հարավային Կովկասում: «Մենք հաստատեցինք երկխոսության ու բանակցությունների կարևորությունը և ողջախոհության ու իմաստության ձայնին առաջնահերթություն տալու կարևորությունը՝ նկատի ունենալով, որ միայն ռազմական ուժը երբեք բավարար չի եղել տևական, համապարփակ և արդար խաղաղության հասնելու համար», -նշել է Եգիպտոսի նախագահը: Նա ընդգծել է՝ պետք է բանակցել խաղաղության ճանապարհն ամբողջությամբ ավարտելու և ժողովուրդների համար ավելի լավ իրականության ու արժանապատիվ կյանքի հասնելու համար՝ հատկապես ներկա փուլում, երբ ժողովուրդների տառապանքները կրկնապատկվել են տնտեսական պատճառներով: Եգիպտոսի նախագահը տարածաշրջանային այցով հունվարի 28-ին ժամանել է Հայաստան:

23:10 - 28 հունվարի, 2023

«Խաղաղության պայմանագիրը պետք է ստորագրվի, այլապես ռիսկերը կմեծանան». Ալիեւ |azatutyun.am|

azatutyun.am: Ադրբեջանի նախագահ Իլհամ Ալիևը հայտարարել է, որ Բաքուն և Երևանը հարաբերությունների կարգավորման համար պետք է խաղաղության պայմանագիր ստորագրեն։ «Հայ - ադրբեջանական ղարաբաղյան հակամարտությունն ավարտվել է, այդ հակամարտությունն արդեն կարգավորվել է։ Ղարաբաղը մնում է Ադրբեջանի անբաժանելի մասը և միշտ կլինի այդպիսին», - պնդել է Ալիևը Եգիպտոսի նախագահ Աբդել Ֆաթթահ Ալ-Սիսիի հետ բանակցություններին հաջորդած ելույթում։ «Բայց խաղաղությունը դեռ ձեռք չի բերվել։ Խաղաղության պայմանագիրը, որը կստորագրվի Ադրբեջանի և Հայաստանի միջև, կհանգեցնի խաղաղության ձեռքբերման։ Մենք մեր հստակ առաջարկներ ենք արել, և չնայած բոլոր տառապանքներին, բոլոր ավերածություններին, մենք դեռ հավատում ենք, որ խաղաղության պայմանագիր պետք է ստորագրվի։ Հակառակ դեպքում ռիսկերը մեր տարածաշրջանում կարող են մեծանալ», - հայտարարել է Ադրբեջանի նախագահը։

17:18 - 28 հունվարի, 2023

Ադրբեջանը ծրագրում է տարհանել Թեհրանում իր դեսպանատան աշխատակիցներին․ Ադրբեջանի ԱԳՆ խոսնակ

Ինչպես արդեն հայտնել ենք, այսօր առավոտյան՝ ժամը 08:30-ի սահմաններում, հարձակում է տեղի ունեցել Իրանում Ադրբեջանի դեսպանատան վրա։ Հարձակման հետևանքով սպանվել է դեսպանատան անվտանգության ծառայության պետը, ևս երկու մարդ վիրավոր է։ Թեհրանի ոստիկանապետը հայտնել է, դեսպանատուն ներխուժած անձը ձերբակալվել է։ Նրա խոսքով՝ հարձակվողը դեսպանատուն է մտել իր երկու անչափահաս երեխաների հետ։ Միևնույն ժամանակ ադրբեջանական լրատվամիջոցները հրապարակում են դեսպանատան բակի տեսախցիկների տեսագրությունները, որտեղ երևում է, որ անձը մեքենայից իջնում և ներս է մտնում միայնակ, շենքի ներսի տեսագրություններում նույնպես անձը միայնակ է։ TRT Haber-ը հայտնում է, որ Ադրբեջանի ԱԳՆ խոսնակ Այհան Հաջիզադեն դեպքի առթիվ հանդես է եկել հայտարարությամբ՝ նշելով, որ Ադրբեջանի կառավարությունը ծրագրում է կարճ ժամանակում տարհանել Թեհրանում Բաքվի դեսպանատան իր աշխատակիցներին․ «Մենք դատապարտում ենք այս հարձակումը և պահանջում, որպեսզի որքան հնարավոր է շուտ պարզվեն այս հարձակման հեղինակներն ու հրահրողները։ Միաժամանակ ցանկանում ենք ընդգծել, որ Իրանը պետք է նախազգուշական միջոցներ ձեռնարկեր մեր դեսպանատան վրա ցանկացած հարձակման դեմ։ Իրանը պետք է կանխատեսեր այս հարձակումը: Ցավոք, դա չի իրականացվել»,- ասել է ԱԳՆ խոսնակը։ ԱԳՆ խոսնակը նաև նշել է՝ «մեր կարծիքով՝ հարձակման պատասխանատվությունը կրում է իրանական կողմը»։ «Վերջին ամիսներին իրանական լրատվամիջոցներում և գրասենյակներում հակաադրբեջանական արշավ է իրականացվում։ Մենք կարծում ենք, որ այդ արշավն է հարձակումների պատճառ դարձել։ Իրանական կողմը պետք է միջոցներ ձեռնարկի Իրանում Ադրբեջանի դեմ արշավի դեմ»,- ընդգծել է ԱԳՆ խոսնակը։ Ադրբեջանի նախագահ Իլհամ Ալիևը նույնպես դատապարել է դեսպանատան վրա հարձակումը՝ որակելով այն «ահաբեկչություն»․ «Մենք պահանջում ենք, որ այս ահաբեկչությունը հնարավորինս արագ հետաքննվի և մեղավորները պատասխանատվության ենթարկվեն։ Դիվանագիտական ներկայացուցչությունների վրա ահաբեկչական հարձակումներն անընդունելի են» - թվիթերյան իր միկրոբլոգում գրել է Իլհամ Ալիևը։

14:26 - 27 հունվարի, 2023

Բլինկենն Ալիևին հորդորել է ապաշրջափակել Լաչինի միջանցքը առևտրային երթևեկության համար |armenpress.am|

armenpress.am: ԱՄՆ պետքարտուղար Էնթոնի Բլինկենն Ադրբեջանի նախագահ Իլհամ Ալիևի հետ հեռախոսազրույցում նրան հորդորել է անհապաղ ապաշրջափակել Լաչինի միջանցքը առևտրային փոխադրումների համար: Այս մասին հաղորդագրություն է տարածել պետդեպարտամենտը: Նա ընդգծել է, որ Լաչինի միջանցքում հումանիտար ճգնաժամի վտանգը խաթարում է Հայաստանի և Ադրբեջանի միջև խաղաղության հեռանկարները։ Պետքարտուղարը կոչ է արել Ալիևին կրկնապատկել ջանքերը Հայաստանի հետ երկկողմ խաղաղ բանակցություններում։ Նա նաև բարձրաձայնել է Ադրբեջանում մարդու իրավունքների վերաբերյալ մտահոգությունները:

21:15 - 23 հունվարի, 2023

Ալիևը հայտարարել է, թե Երևանը չի պատասխանել խաղաղության համաձայնագիր ստորագրելու Բաքվի առաջարկին |news.am|

news.am: Ադրբեջանի նախագահ Իլհամ Ալիեւը հայտարարել է, որ Երեւանը չի պատասխանել խաղաղության համաձայնագիր ստորագրելու Բաքվի առաջարկին։ Այս մասին հայտնում է TACC-ը։ Ելույթ ունենալով Դավոսի Համաշխարհային տնտեսական ֆորումի «Եվրասիական Միջին միջանցք. ճանապարհից դեպի մայրուղի» թեմայով պանելային նիստում՝ Ալիեւը մեղադրել է Հայաստանին այն բանում, որ նա «մերժել է» Երեւան-Թբիլիսի-Բաքու համագործակցության եռակողմ ձեւաչափ սկսելու առաջարկը։ «Կոմիսար Խանը ակնարկեց այստեղ Հայաստանի բացակայության մասին։ Նա ասաց, որ ներկա են Հարավային Կովկասի երկու երկրներ, բայց դրանք առնվազն երեքն են։ Ես գիտեմ, թե ում նկատի ուներ: Բայց ինչո՞ւ Հայաստանը չկա։ Որովհետեւ Հայաստանը մերժել է համագործակցության եռակողմ ձեւաչափ սկսելու Վրաստանի հետ մեր առաջարկը... Ես բարձր եմ գնահատում իմ ընկեր Իրակլի Ղարիբաշվիլիի ջանքերը, որը կազմակերպեց Ադրբեջանի եւ Հայաստանի արտգործնախարարների հանդիպումը, որին միացավ վրացի գործընկերը։ Մեր առաջարկն էր Վրաստանում կազմակերպել առաջնորդների հանդիպում, քանի որ Վրաստանը պատմականորեն միշտ եղել է այն վայրը, որտեղ հանդիպել են բոլոր հարեւանները։ Բայց Հայաստանը պատրաստ չէ դրան։ Սա հնարավոր ռիսկերից մեկն է։ Եթե կովկասյան երեք երկրները միավորեն իրենց ջանքերը էներգետիկայի, տրանսպորտի, անվտանգության, կայունության, սահմանների սահմանազատման ոլորտում, ապա տարածաշրջանը շատ ավելի անվտանգ կդառնա»,- հայտարարել է Ալիեւը։

10:02 - 20 հունվարի, 2023

Առավելագույն ճնշում գործադրել Ադրբեջանի նախագահի վրա»,- ասում են ԱՄՆ մի շարք կոնգրեսականներ |amerikayidzayn.com|

amerikayidzayn.com: Կոնգրեսի հայկական հանձնախմբի համանախագահները Բայդենի վարչակազմին կոչ են անում քննարկել արտակարգ իրավիճակում օդային փոխադրումը Լեռնային Ղարաբաղ և պատժամիջոցներ կիրառել Ադրբեջանի իշխանությունների նկատմամբ: ԱՄՆ պետքարտուղար Էնթոնի Բլինքենին և ԱՄՆ ՄԶԳ ադմինիստրատոր Սամանթա Փաուերին ուղղված նամակում, Կոնգրեսի հայկական հանձնախմբի համանախագահներ Ֆրենկ Փալոնը, Գաս Բիլիրակիսը, Ադամ Շիֆը, Դեյվիդ Վալադաոն և Աննա Էշուն նշում են. «Լաչինի միջանցքի վերաբացման ներկա միջազգային ռազմավարությունը պարզապես չի աշխատում: Ալիևի ռեժիմը կանխամտածված քայլեր է ձեռնարկում բնիկ հայ բնակչությանը Արցախից հեռացնելու և նրանց նախնիների երկրում ազատ, ժողովրդավարական և արժանապատիվ ապրելու հնարավորությունից զրկելու համար՝ էթնիկ զտումների հստակ նշան, որը չի կարելի անտեսել»։ Նամակում նաև ասված է. «Լաչինի միջանցքի վերաբացման ներկա միջազգային ռազմավարությունը պարզապես չի գործում։ Չնայած շրջափակման և անմեղ քաղաքացիների վրա ունեցած ողբերգական ազդեցության հստակ փաստագրված ապացույցներին, նախագահ Ալիևը շարունակում է ստել ԱՄՆ-ին և միջազգային հանրությանը` հայտարարելով, որ շրջափակում չկա: Տագնապալի է նաև այն, որ Ալիևը հայտարարել է, թե Արցախից մեկնելու ճանապարհը բաց է բոլոր նրանց համար, ովքեր չեն ցանկանում դառնալ Ադրբեջանի քաղաքացի։ Ալիևի ռեժիմը կանխամտածված քայլեր է ձեռնարկում բնիկ հայ բնակչությանը Արցախից հեռացնելու և նրանց նախնիների երկրում ազատ, ժողովրդավարական և արժանապատիվ ապրելու հնարավորությունից զրկելու համար: Մինչդեռ տարածաշրջանում տեղակայված ռուս խաղաղապահները քիչ բան են արել միջանցքը փակող ադրբեջանցիներին ցրելու կամ իրավիճակը թուլացնելու համար»։ Ավելի մանրամասն` amerikayidzayn.com-ում։

09:58 - 20 հունվարի, 2023

ԱՄՆ-ն ցանկանում է վերականգնել կառուցողական երկխոսությունը Հայաստանի և Ադրբեջանի միջև. Փրայս |1lurer.am|

1lurer.am: ԱՄՆ պետքարտուղարության պաշտոնական ներկայացուցիչ Նեդ Փրայսը ճեպազրույցի ընթացքում անդրադարձել է պետքարտուղար Էնթոնի Բլինքենի և վարչապետ Նիկոլ Փաշինյանի հեռախոսազրույցին: Նա նշել է, որ առաջիկա օրերին ակնկալվում է նաև Բլինքենի հեռախոսազրույցը Ադրբեջանի նախագահ Իլհամ Ալիևի հետ: Հիշեցնելով նախորդ տարի ԱՄՆ միջնորդությամբ անցկացված հանդիպումների մասին՝ Փրայսը նշել է. «Պատրաստվում ենք անել այն, ինչ առավել օգտակար է: Իհարկե, վերջին ժամանակներս տեսնում ենք հետընթաց, երբ խոսքը վերաբերում է Լեռնային Ղարաբաղին: Մենք ցանկանում ենք, որ կառուցողական երկխոսությունը վերականգնվի: Պատրաստ ենք երկկողմ համագործակցության: Պատրաստ ենք գործակցել գործընկերների, կողմերի կամ ԵԱՀԿ-ի միջոցով, կամ անել դա եռակողմ, ինչպես արել ենք նախկինում»: Անդրադառնալով դեսպան Ֆիլիպ Ռիքերի պաշտոնաթողությանը՝ պետքարտուղարության խոսնակը նշել է, որ գերատեսչությունում կան մի շարք անհատներ, որոնք խորապես ներգրավված են գործընթացում, այդ թվում՝ պետքարտուղար Բլինքենը: «Սա նրա անձնական առաջնահերթությունն է։ Բայց մարդիկ, ինչպիսիք են Թորիա Նուլանդը, Քերըն Դոնֆրիդը, Եվրոպայի և Եվրասիայի գործերի բյուրոյի մի շարք բարձրաստիճան պաշտոնյաներ, խորապես ներգրավված կլինեն դրանում»,- նշել է պաշտոնյան: Փրայսը նաև հավելել է, որ հանդիպման անցկացումը երկրների ղեկավարների կամ արտգործնախարարների մակարդակով կորոշեն կողմերը:

12:18 - 19 հունվարի, 2023

Ըստ Փաշինյանի՝ Ալիևի հայտարարությունները էսկալացիա ստեղծելու նպատակ ունեն

Կարծում եմ՝ մեր միջազգային շփումները ցույց են տալիս, որ միջազգային հանրության ընկալումը Լաչինի իրավիճակի նկատմամբ մեծանում է։ Այս մասին խորհրդարանում ԱԺ-կառավարություն հարցուպատասխանի ժամանակ հայտարարեց ՀՀ վարչապետ Նիկոլ Փաշինյանը։ Անդրադառնալով Ադրբեջանի նախագահ Իլհամ Ալիևի՝ վերջին ասուլիսին հնչեցրած մտքերին՝ Փաշինյանը կարծիք հայտնեց, որ այդ հայտարարությունները որոշակի պրովոկացիոն բնույթ ունեն, դրանք էսկալացիա ստեղծելու նպատակ ունեն։ «Եվ այդ հայտարարություններին մեր ճիշտ արձագանքն է, որ պետք է տարածաշրջանում կայունության որոշակի գործոն հանդիսանա։ Մենք, ըստ էության, շատ հստակ ենք հայտարարում, որ Պրագայի մեր պայմանավորվածությունների հիման վրա մենք պատրաստ ենք գնալ խաղաղության պայմանագրիստորագրման և այդ հայտարարությունները, ըստ էության, հակասում են առաջին հերթին ձեռք բերված պայմանավորվածություններին»։ Նիկոլ Փաշինյանը նշեց, որ ասում է՝ միջազգային հանրության ընկալումը կարծես թե մեծանում է, որովհետև մարդկանց համար համար ակնհայտ է դառնում, որ և Լաչինի միջանցքի մասով, և այդ հայտարարությունները ուղիղ խախտում են Ադրբեջանի իսկ կողմից ստանձնած միջազգային պարտավորությունները․ «Այսինքն՝ էս իրավիճակներն են, որ կարծում եմ, պետք է մեծացնեն միջազգային հանրության ընկալումը։ Իսկ տարածաշրջանում իրավիճակը կայուն պահելու լավագույն տարբերակը բանակցային ու քաղաքական ճանապարհներով լուծումների գնալն է, և ինչպես մենք ստանձնել ենք այդ պատավորությունը, մենք պատրաստ ենք նաև շարունակել»։ Նրա խոսքով՝ միջազգային հանրությունն էլ արձանագրում է, որ Լաչինի միջանցքի շրջափակումը և Ադրբեջանի ագրեսիվ հայտարարությունները նոր խոչընդոտներ են ստեղծում խաղաղության գործընթացի համար․ «Հարց․ իսկ ով ասաց, որ դա չի Ադրբեջանի ուզածը, հեռահար նպատակը, որ նաև այդ կարգի սադրիչ հայտարարություններով և հնարավոր ռեակցիաներ էլ օգտագործելով ամբողջությամբ վիժեցնի խաղաղության գործընթացը»։

17:17 - 18 հունվարի, 2023

Ադրբեջանի նախագահը զարգացնում է կեղծ թեզեր՝ փորձելով ստեղծել ռազմական ագրեսիայի արհեստական հիմքեր Հայաստանի ու Արցախի նկատմամբ. «Թաթոյան» հիմնադրամ

Ադրբեջանի նախագահը 2023 թ. հունվարի 10-ի ելույթով զարգացնում է կեղծ թեզեր. պատմական ու իրավական փաստերի բացահայտ կեղծումով Հայաստանի Հանրապետության տարածքներն անվանում է «արևմտյան Ադրբեջան» և դրա հետ կապված նշում «արևմտյան ադրբեջանցիներ»: Այս մասին հաղորդագրություն է տարածել «Թաթոյան» հիմնադրամը: Ադրբեջանի նախագահն այդ ելույթով բորբոքում է հայատյացություն ու թշնամանք, նա կեղծ փաստերով փորձում է ստեղծել նաև ռազմական ագրեսիայի արհեստական հիմքեր Հայաստանի ու Արցախի նկատմամբ: Պետական սահմանների դելիմիտացիայի հարցերում Հայաստանին ու հայ ժողովրդին բացահայտ սպառնում է ռազմական ագրեսիայով, պատերազմով՝ փաստերի կեղծումով: Ադրբեջանի նախագահը բացահայտ խոսում է ուժի ու սպառնալիքի լեզվով, օգտագործում է այնպիսի բառեր ու արտահայտություններ, որոնք նսեմացնում են ամբողջ հայ ժողովրդի, Հայաստանի ու Արցախի ամբողջ բնակչության արժանապատվությունը, ահաբեկող բնույթի են: Ակնհայտ են նրա ինչպես այս, այնպես էլ՝ նախորդ ելույթներում ֆաշիզմի դրսևորումները, որով նա ընդգծում է մի ժողովրդի՝ ադրբեջանական ժողովրդի առավելությունները հայ ժողովրդի նկատմամբ, բորբոքում ատելություն ու այս պայմաններում հետո խոսում է խաղաղությունից»,- նշված է հաղորդագրության մեջ: Ադրբեջանի նախագահի ելույթների այդ հատվածներն առանձնացվել են և պաշտոնական նամակներով Իրավունքի և արդարության կենտրոն «Թաթոյան» հիմնադրամի կողմից ուղարկվել են ԵԱՀԿ, ՄԱԿ-ի Ռասայական խտրականության վերացման կոմիտե, ԵԽ-ի Ռասիզմի և անհանդուրժողականության դեմ հանձնաժողով, ՄԱԿ-ի և ԵԽ-ի մարդու իրավունքների հանձնակատարներին և միջազգային այլ մարմինների։

10:50 - 17 հունվարի, 2023

Ալիևը շարունակում է խաբել միջազգային հանրությանը․ Ֆրանկ Փալոնեն՝ Լաչինի միջանցքի արգելափակման մասին |factor.am|

factor.am: ԱՄՆ Կոնգրեսի հայկական հարցերով հանձնաժողովի համանախագահ Ֆրանկ Փալոնեն իր թվիթերյան էջում անդրադարձել է Ադրբեջանի կողմից Լաչինի միջանցքի արգելափակմանը՝ հայտարարելով, որ Ալիևը շարունակում է խաբել միջազգային հանրությանը։ «Ալիևը շարունակում է խաբել միջազգային հանրությանը Լաչինի միջանցքի մեկամսյա շրջափակման մասին։ Հստակ ապացույցներ կան, որ դա հումանիտար ճգնաժամ է առաջացնում Արցախում՝ արգելափակելով կարևոր սննդամթերքի և բժշկական պարագաների հասանելիությունը խաղաղ բնակիչներին»,- գրել է նա՝ կիսվելով հունվարի 10-ին Ալիևի արած հայտարարությունների մասին հոդվածով։ 2022թ․ դեկտեմբերի 12-ից Ադրբեջանը փակել է Արցախը ՀՀ-ին կապող Լաչինի միջանցքը, ինչի հետևանքով շրջափակման մեջ է հայտնվել Արցախի 120 000 բնակիչ, այդ թվում՝ 30 000 երեխա։ 1100 քաղաքացիական անձ, այդ թվում՝ 270 անչափահաս, չի կարողանում ՀՀ-ից վերադառնալ Արցախ։ Շրջափակման պատճառով ՀՀ-ից ամեն օր 400 տոննա սննդամթերք ու դեղորայք հնարավոր չի լինում հասցնել Արցախ, ինչի հետևանքով առկա է սննդի, դեղորայքի պակաս: 350 հիվանդ չի կարողանում բուժում ստանալ ՀՀ-ում: 13 երեխա նորածնային և վերակենդանացման բաժանմունքներում է, 13 բուժառու՝ վերակենդանացման բաժանմունքում․ 6-ը ծայրահեղ ծանր վիճակում են։ Այս օրերի ընթացքում շտապ բուժօգնության կարիք ունեցող 17 հայ և 4 օտարերկրացի է միայն Կարմիր խաչի միջնորդությամբ տեղափոխվել ՀՀ, իսկ Արցախում բուժօգնության կարիք ունեցող և ծանր վիճակում գտնվող հիվանդներից մեկը մահացել է: Հունվարի 10-ի վթարի պատճառով Արցախի էլեկտրամատակարարումն իրականացվում է տեղական սահմանափակ ռեսուրսի միջոցով։

11:34 - 12 հունվարի, 2023

Ալիևի երեկվա հայտարարությունը պետական մակարդակով իրականացվող էթնիկ զտումների մաքուր խոստովանություն էր․ Էդմոն Մարուքյան

Ալիևի երեկվա հայտարարությունը՝ Լաչինի միջանցքի շրջափակման վերաբերյալ, պետական մակարդակով իրականացվող էթնիկ զտումների մաքուր խոստովանություն էր։ Այս մասին իր թվիթերյան էջում գրել է ՀՀ հատուկ հանձնարարություններով դեսպան Էդմոն Մարուքյանը։ «Նա (Իլհամ Ալիևը՝ խմբ․) ասաց, որ ճանապարհը բաց է նրանց համար, ովքեր չեն ցանկանում լինել Ադրբեջանի քաղաքացի։ Նրանք կարող են մեկնել մեքենաներով կամ ռուս խաղաղապահների ավտոբուսներով»,- գրել է Մարուքյանը։ Հիշեցնենք, որ երեկ Ալիևը պատասխանել է լրագրողների հարցերին, որոնց թվում էր նաև Լաչինի միջանցքի վերաբերյալ հարցը, ինչին ի պատասխան՝ Ալիևը նշել է, թե ոչ մի բլոկադա էլ չկա․ «Ովքեր չեն ուզում լինել մեր քաղաքացիները, ճանապարհը փակ չէ, այն բաց է․ կարող են հեռանալ։ Մենք նրանց չենք խանգարի, կա՛մ ինքնուրույն կարող են հեռանալ, կա՛մ ռուս խաղաղապահների մեքենաներով կամ ավտոբուսներով։ Ճանապարհը բաց է»։ 2022 թվականի դեկտեմբերի 12-ից Ադրբեջանը փակել է Արցախը Հայաստանին կապող Լաչինի միջանցքը, ինչի հետևանքով շրջափակման մեջ է հայտնվել Արցախի 120 000 բնակիչ, այդ թվում՝ 30 000 երեխա։ 1100 քաղաքացիական անձ, այդ թվում՝ 270 անչափահաս, չի կարողանում Հայաստանից վերադառնալ Արցախ։ Շրջափակման պատճառով Հայաստանից ամեն օր 400 տոննա սննդամթերք ու դեղորայք հնարավոր չի լինում հասցնել Արցախ, ինչի հետևանքով առկա է սննդի, դեղորայքի պակաս: 350 հիվանդ չի կարողանում բուժում ստանալ Հայաստանում: 13 երեխա գտնվում է նորածնային և վերակենդանացման բաժանմունքներում, 13 բուժառու՝ վերակենդանացման բաժանմունքում․ 6-ը ծայրահեղ ծանր վիճակում են։ Այս օրերի ընթացքում շտապ բուժօգնության կարիք ունեցող 17 հայ և 4 օտարերկրացի է միայն Կարմիր խաչի միջնորդությամբ տեղափոխվել Հայաստան, իսկ Արցախում բուժօգնության կարիք ունեցող և ծանր վիճակում գտնվող հիվանդներից մեկը մահացել է: Արցախը շրջափակման մեջ է։

13:55 - 11 հունվարի, 2023

Ալիևը պնդում է, որ Հայաստանը փորձում է Ղարաբաղի թեման մտցնել հնարավոր խաղաղության պայմանագրի մեջ

«Կարծում եմ՝ Հայաստանի իշխանությունը բավարար ուժ ունի միայնակ պատասխանատվություն վերցնելու ու գնալու խաղաղության պայմանագրի ստորագրման»։ Այս մասին ասել է Ադրբեջանի նախագահ Իլհամ Ալիեւը այսօր կայացած մամուլի ասուլիսի ժամանակ՝ պատասխանելով հարցին, թե արդյո՞ք հայկական սփյուռքը կարող է խանգարել ՀՀ իշխանություններին վերոնշյալ հարցում։ Նա նշել է, թե ինքը հենց սկզբում էլ ասել է, որ խաղաղության պայմանագիրը սովորական փաստաթուղթ է, որն արտացոլում է բոլոր հիմնական սկզբունքները. «Ու խոսք չի կարող այնտեղ լինել մեր ներքին խնդիրների մասին, ու այն ամենի, ինչ կապված է Ղարաբաղի հետ»։ Ալիեւը հիշեցրել է Պրահայի ու Սոչիի հայտարարությունները, եւ որ «հայկական կողմն այդպիսով ճանաչել է Ադրբեջանի տարածքային ամբողջականությունն ու իմքնիշխանությունը». «Բայց ասելով A՝ նրանք (հայկական կողմը՝ խմբ.) չեն ցանկանում ասել B։ Նրանք փորձում են Ղարաբաղի թեման մտցնել հնարավոր խաղաղության պայմանագրի մեջ, ինչով էլ արգելափակում են այն (պայմանագրի կնքումը՝ խմբ.)»։ Ալիեւի խոսքով՝ «անթույլատրելի է» ՀՀ, ՌԴ ու Ադրբեջանի ԱԳ նախարարների եռակողմ համդիպման մասնակցության չեղարկումը։ Ըստ նրա՝ սահմանային ավելի վատ իրադրություններ են եղել, բայց հանդիպումները չեն չեղարկվել։ Հիշեցնենք, որ Մոսկվայում դեկտեմբերի 23-ին նախատեսված էր Հայաստանի, Ռուսաստանի և Ադրբեջանի արտաքին գործերի նախարարների հանդիպումը, սակայն հայկական կողմը ոչ թե ճէ չեղարկել է ԱԳ նախարարի այցը, այլ խնդրել է հետաձգել հանդիպումը, քանի որ այս պահին Հայաստանի ԱԳ նախարարի առաջնահերթությունը Լաչինի միջանցքի անխոչընդոտ վերագործարկման և Լեռնային Ղարաբաղում հումանիտար ճգնաժամի արդյունքում ստեղծված խնդիրների հասցեագրումն է։

20:04 - 10 հունվարի, 2023

Նոյեմբերի 9-ի հայտարարության մեջ «Զանգեզուրի միջանցք» բառը չկա, որովհետև դրանից հետո այդ տերմինը ներառեցի աշխարհաքաղաքական լեքսիկոնում. Ալիև |tert.am|

tert.am: Ադրբեջանի նախագահ Իլհամ Ալիևը այսօր տեղական հեռուստաալիքներին տված հարցազրույցում կրկին անդրադարձել է, այսպես կոչված, «Զանգեզուրի միջանցքին»: ««Զանգեզուրի միջանցք» ծրագիրը մեզ համար ոչ միայն տնտեսական և տրանսպորտային, այլև ռազմավարական ծրագիր է, այս նախագծի իրականացումը մեր բնական իրավունքն է»,- ասել է նա: Անդրադառնալով այն դիտարկումներին, որ 2020 թվականի նոյեմբերի 9/10-ի եռակողմ հայտարարության մեջ, այսպես կոչված, «Զանգեզուրի միջանցքի» մասին ոչինչ չկա, Ալիևը ասել է. «Ճիշտ է, այնտեղ «Զանգեզուրի միջանցք» բառ չկա, որովհետեւ դրանից հետո «Զանգեզուրի միջանցք» տերմինը ներառեցի աշխարհաքաղաքական լեքսիկոնում, ինչպես ասում են։ Սակայն այնտեղ հստակ նշված է, որ Ադրբեջանի արեւմտյան շրջանների եւ Նախիջեւանի Ինքնավար Հանրապետության միջեւ պետք է լինի տրանսպորտային կապ, եւ Հայաստանը պետք է դա ապահովի: Մեզ համար սա ռազմավարական նախագիծ է և ոչ միայն մեզ, այլ մի քանի հարևան երկրների և մեծ աշխարհագրության համար»:

19:20 - 10 հունվարի, 2023

Ալիեւը քաջալերանքի խոսքեր է հղել Արցախը 30 օր շրջափակման մեջ պահող ցուցարարներին ու կրկին պնդել, թե միջանցքը բաց է

Ադրբեջանի նախագահ Իլհամ Ալիեւը մամուլի ասուլիսի ժամանակ կրկին պնդեց, թե Լաչինի միջանցքը բաց է։ Նրա խոսքով՝ միջանցքով մեկ ամսվա ընթացքում ռուս խաղաղապահների բեռնատար մեքենաներ են անցել, Կարմիր խաչի մեքենաներ են անցել։ Ալիեւը, խոսելով միջանցքում ադրբեջանական կողմի վերահսկողության մասին, ասաց, թե «այնպես չէ, որ իրենք նոր են վերահսկում միջանցքը»։ Նա պնդեց, որ ճանապարհով իրանական մեքենաներ էլ անցել, որոնց մի մասն, Ալիեւի պնդմամբ, ունեցել է հայկական պետհամարանիշ։ Ադրբեջանի նախագահը նաեւ նշեց, թե հայկական կողմը բլոակադայի մասին, իր պնդմամբ, «կեղծ» հայտարարություններ է անում եւ ուղղում դրանք միջազգային հանրությանը, ու ասաց, թե «Արցախում բլոկադա չկա»։ «Ովքեր չեն ուզում լինել մեր քաղաքացիները, ճանապարհը փակ չէ, այն բաց է․ կարող են հեռանալ։ Մենք նրանց չենք խանգարի, կա՛մ ինքնուրույն կարող են հեռանալ, կա՛մ ռուս խաղաղապահների մեքենաներով, ավտոբուսներով։ Ճանապարհը բաց է»,- ասաց նա։ Ալիեւը նաեւ ողջունեց ու քաջալերանքի խոսքեր հղեց արդեն 30 օր Լաչինի միջանցքը փակած «երիտասարդ բնապահպաններին»՝ ասելով, թե «նրանք պայքարում են իրեն իրավունքների համար», եւ որ «իրենց պահանջներն արդարացի են»։ 2022 թվականի դեկտեմբերի 12-ից Ադրբեջանը փակել է Արցախը Հայաստանին կապող Լաչինի միջանցքը, ինչի հետևանքով շրջափակման մեջ է հայտնվել Արցախի 120 000 բնակիչ, այդ թվում՝ 30 000 երեխա։ 1100 քաղաքացիական անձ, այդ թվում՝ 270 անչափահաս, չի կարողանում Հայաստանից վերադառնալ Արցախ։ Շրջափակման պատճառով Հայաստանից ամեն օր 400 տոննա սննդամթերք ու դեղորայք հնարավոր չի լինում հասցնել Արցախ, ինչի հետևանքով առկա է սննդի, դեղորայքի պակաս: 350 հիվանդ չի կարողանում բուժում ստանալ Հայաստանում: 13 երեխա գտնվում է նորածնային և վերակենդանացման բաժանմունքներում, 13 բուժառու՝ վերակենդանացման բաժանմունքում․ 6-ը ծայրահեղ ծանր վիճակում են։ Այս օրերի ընթացքում շտապ բուժօգնության կարիք ունեցող 13 հայ և 4 օտարերկրացի է միայն Կարմիր խաչի միջնորդությամբ տեղափոխվել Հայաստան, իսկ Արցախում բուժօգնության կարիք ունեցող և ծանր վիճակում գտնվող հիվանդներից մեկը մահացել է:

19:06 - 10 հունվարի, 2023

Ադրբեջանում աշխատանքային խումբ է ստեղծվել «Արևմտյան Ադրբեջան»-ում ապրած ադրբեջանցիների վերադարձի հետ կապված հարցերի համար․ Ալիև

Ադրբեջանում աշխատանքային խումբ է ձևավորվել, որի գործունեության շրջանակում լինելու են, այսպես կոչված, «Արևմտյան Ադրբեջան»-ում ապրած ադրբեջանցիների վերադարձի հետ կապված հարցերը։ Այս մասին մամուլի ասուլիսի շամանակ հայտարարեց Ադրբեջանի նախագահ Իլհամ Ալիևը։ Նշենք, որ Ադրբեջանի նախագահը տարբեր տարիների իր ելույթներում բազմիցս ասել է, թե իբր ներկայիս Հայաստանը «հինավուրց ադրբեջանական հող է»՝ հատկապես նշելով Սյունիքի, Երևանի, Սևանի մասին և ընդգծելով, որ այժմ դրանք «ադրբեջանական չեն պատմական անարդարության պատճառով»։ «Արևմտյան Ադրբեջան» ասելով՝ նա նկատի ունի Հայաստանի Հանրապետության տարածքը։ «Մենք աշխատանքներ ենք սկսել․ «Արևմտյան Ադրբեջան»-ից արտաքսվածները պետք է վերադառնան իրենց տներ։ Սրա հետ կապված աշխատանքային խումբ է ստեղծվել»,- նշեց Ալիևը։

17:45 - 10 հունվարի, 2023