Ինֆոքոմ

Վրաստանը ցավում է Հայաստանի և Ադրբեջանի միջև վտանգավոր էսկալացիայի համար․ Սալոմե Զուրաբիշվիլի

Վրաստանը ցավում է մեր երկու հարևանների և բարեկամների՝ Հայաստանի և Ադրբեջանի միջև վտանգավոր էսկալացիայի համար։ Այս մասին թվիթերյան իր էջում գրառում է կատարել Վրաստանի նախագահ Սալոմե Զուրաբիշվիլին։ «Խաղաղ Կովկասը ճանապարհ է դեպի ավելի ուժեղ, զարգացած և անկախ տարածաշրջան, որից կշահի մեր բնակչության ապագան»,- նշված է գրառման մեջ։

15:30 - 15 սեպտեմբերի, 2022

Մեր ընդդիմադիր ընկերները իմ մասնագիտական փորձառության, քաղաքական կողմնորոշումների հետ կապված մեղադրանքներ են բարդում ինձ վրա․ այսօր կարող էին այդ հարցերն ուղղել ինձ

Սահմանադրական դատարանի դատավորի թեկնածու Սեդա Սաֆարյանը Ազգային ժողովում ունեցած եզրափակիչ ելույթի ժամանակ անդրադարձավ ընդդիմադիր խմբակցությունների պատգամավորների բացակայությանը․ «Ես այս մարդկանց, մեր ընդդիմադիր գործընկերների հետ տարիներով առնչվել եմ և երևի ամենալավը գիտեմ, թե իրենք որ քրեական գործերով և ինչ են արել, ինչպես են արել, ուր են հասցրել մարդկանց, և քանի որ ես ՍԴ գնում եմ օրենքի գերակայություն ապահովելու համար, ես մի բանի վրա ուզում եմ կանգ առնել։ Մեր ընդդիմադիր ընկերները ամեն տեղ, ամեն ինչից խոսում են, հատկապես իմ մասնագիտական փորձառությունից, քաղաքական կողմնորոշումների հետ կապված մեղադրանքներ են բարդում իմ վրա։ Կարող էին այսօր լինել դահլիճում ու ինձ այդ հարցերն ուղղել, բայց ոչ։ Շատ ավելի հարմար է պատերի տակ բամբասել, պատասխաններ չստանալ, իրավունքը այլաձևել։ Դու իրավունքից խոսես իրենք քաղաքականությունից խոսեն ու քեզ վերագրեն քաղաքական մոտեցումները»։Սաֆարյանն ասաց՝ այն մարդիկ, ովքեր իր հետ Սահմանադրությունից պետք է խոսեին, դատարանի դահլիճում չէին կարող 1 տարի 8 ամիս Սահմանադրության 3-4 հոդվածի վերլուծությամբ զբաղվել ու առաջ չգնալ․ «Այն մարդիկ, ովքեր անմեղության կանխավարկածի մասին պիտի հարցնեին, չէին կարող իրենց մեդիաներով անձիք, ովքեր դատապարատված չեն, նրանց վերաբերյալ գեղարվեստական ֆիլմեր նկարեն, ու ամեն ինչ անեն, որ դատավորները նրանց դատեն»։Սաֆարյանն ասաց՝ ընդդիմադիրները փորձել են ՍԴ արժանապատվությունը կապել այսօրվա իրավիճակների հետ, բայց ՍԴ-ին իրենք են վիրավորել տարիներ շարունակ։ ՍԴ դատավորի թեկնածուն նշեց, որ ՍԴ-ն իրականացնում է իրավունքի քաղաքականության կամ դատական քաղաքականություն, լուծում սոցիալական վեճեր և իրավապարտադիր մեկնաբանման ենթարկում գործող օրենսդրությունը․ «ՍԴ-ն ապահովում է իր բացառիկ իրավասությանը վերաապահված այլ հարցերով պետական քաղաքականության իրականացումը։Դատական իշխանությունը խստիվ արգելում է զբաղվել կուսակացական գործունեությամբ, իր գործունեությունը պայմանավորվեոլվ անհատական և խմբային շահերով։ Հետևաբար պետք է տարանջատել քաղաքականությունը որպես պետության գործառույթ և կուսակցական և խմբակային գործունեությունը՝ որպես անձի վարք, որը հակոտնյա է դատավորի կոչմանը»։ Նա ընդգծեց՝ հարցին անդրադառնալը կարևոր է համարում, որովհետև դատավորները հաճախ անհարկի կաշկանդվում են հանրային նշանակությամբ դատական գործերը քննելիս և խուսափում են արտադատարանական հարթակում կարծիք հայտնելուց որևէ էական հարցի վերաբերյալ։ «Պահպանելով դատավորների էթիկայի կանոնները՝ դատական իշխանության ներկայացուցիչները պարտավոր են դրսևորել մասնագիտական սկզբունքայնություն և քաղաքացիական խիզախություն՝ պահպանելով անգամ պաշտոնական սահմանափակումները, նրանք պետք է բարձրացնեն մասնագիտական կարծիքը հասարակությանը հուզող իրավական խնդիրների վերաբերյալ»։ Սաֆարյանն ասաց՝ մասնագիտական գործունեության ընթացքում եկել է մի շարք հիմնարար հետևությունների․ «Չի կարելի հետապնդել արդարությանը, այն զսպանակի նման կարող է սեղմվել, բայց մի օր ընդարձակվել ու շառաչուն ապտակ հասցնել ոչ միայն հետապնդողին, այլ բոլորիս։ Պետությունը ուժեղ է, երբ ուժեղ է, երբ ուժեղ ու իրավատեր է իր քաղաքացին, ուժը առանց իրավունքի մերկ է ու բիրտ, ուժն իրավունքով անկասելի է, հետևապես պետք չէ ընկնել մի ծայրահեղությունից մյուս, ուժն է ծնում իրավունք, թե իրավունքը՝ ուժ։ Իրավունքը բերում է ուժ անհատին, պետությանը, իսկ այդ ուժը կայուն ու երաշխավարոված իրավունք ազգից մինչև ոցիալական խմբեր ու քաղաքացիներ, Սահմանադրությունը խոսք չէ, այն պետութթյան կայուն զարգացման գավականն է»։ Սեդա Սաֆարյանը նաև շնորհակալություն հայտնեց բոլորին իրեն աջակցելու համար, նաև կառավարությանը ու Նիկոլ Փաշինյանին՝ այդ պաշտոնում նրան նշանակելու համար։

15:22 - 15 սեպտեմբերի, 2022

Մենք ունենք վարչապետի մի քանի թեկնածուներ․ Ագնեսա Խամոյան

15:18 - 15 սեպտեմբերի, 2022

Նիկոլին փրկելու ժամը չէ, հայրենիքը փրկելու ժամն է․ Գեղամ Մանուկյանը՝ ՔՊ-ականներին

12:11 - 15 սեպտեմբերի, 2022

Օլաֆ Շոլցը Հայաստանին ու Ադրբեջանին կոչ է արել հակամարտությունը կարգավորել բանակցությունների միջոցով

Գերմանիայի կանցլեր Օլաֆ Շոլցը Հայաստանին ու Ադրբեջանին կոչ է արել հրաժարվել հետագա ռազմական գործողություններից և հակամարտությունը կարգավորել բանակցությունների միջոցով։ Այս մասին հայտնում է Deutsche Welle-ն։ Վրաստանի վարչապետ Իրակլի Ղարիբաշվիլին պաշտոմական այցով ժամանել Գերմանիա։ Վերջինս և կանցլեր Շոլցը հանդիպում են ունեցել, որից հետո հանդես են եկել մամուլի ասուլիսով։ «Պատասխանելով Լեռնային Ղարաբաղի շուրջ իրավիճակի սրման մասին հարցին՝ Շոլցը հակամարտությունն անվանել է «անիմաստ» և կոչ արել Հայաստանին ու Ադրբեջանին հրաժարվել հետագա ռազմական գործողություններից և հակամարտությունը լուծել բանակցությունների միջոցով»,- փոխանցում է Deutsche Welle-ն։ Նշենք, սակայն, որ այս անգամ ռազմական գործողություններ են տեղի ունենում ոչ թե Արցախի Հանրապետությունում, այլ ՀՀ ինքիշխան տարածում։ Ադրբեջանը սեպտեմբերի լույս 13-ի գիշերը պատերազմ է սկսել Հայաստանի դեմ՝ դիրքային առաջխաղացման փորձեր անելով և հայկական տարածքներ օկուպացնելով։ Հակառակորդի թիրախում են նաև քաղաքացիական ենթակառուցվածքները։

12:00 - 15 սեպտեմբերի, 2022

Հեռախոսազրույց են ունեցել Ադրբեջանի ու Թուրքիայի պաշտպանության նախարարներ Զաքիր Հասանովը և Հուլուսի Աքարը

Ադրբեջանի պաշտպանության նախարար Զաքիր Հասանովը և Թուրքիայի ազգային պաշտպանության նախարար Հուլուսի Աքարը ևս մեկ հեռախոսազրույց են ունեցել։ Այս մասին հայտնում են Ադրբեջանի ՊՆ-ից, փոխանցում է haqqin.az-ը։ Ադրբեջանի ՊՆ հաղորդագրության մեջ նշվում է, որ «զրույցի ընթացքում Հասանովը թուրք նախարարին մանրամասն տեղեկացրել է ադրբեջանա-հայկական պետական սահմանին ներկա օպերատիվ իրավիճակի մասին և նշել, որ հայկական զինված ուժերի բոլոր սադրանքները վճռականորեն ճնշվել են»։ «Իր հերթին Հուլուսի Աքարն ընդգծել է, որ Թուրքիայի զինված ուժերը մշտապես բարոյական աջակցություն են ցուցաբերում ադրբեջանական բանակին։ Հեռախոսազրույցի ընթացքում մտքերի հանգամանալից փոխանակում է տեղի ունեցել հայ-ադրբեջանական պետական սահմանին տիրող իրավիճակի շուրջ»,- ասվում է ադրբեջանական գերատեսչության հաղորդագրության մեջ։

11:54 - 15 սեպտեմբերի, 2022

ՔՊ պատգամավորի պնդմամբ՝ օպերատիվ աշխատանք է տարվում ակցիայի մասնակից երիտասարդ տղաներին իդենտիֆիկացնելու և առաջնագիծ ուղարկելու ուղղությամբ

ՔՊ պատգամավոր Վահագն Ալեքսանյանը Հանրայինին տված հարցազրույցի ընթացքում, մեկնաբանելով գիշերը ԱԺ դիմաց ընթացող բողոքի ակցիան, նշեց, որ պետք է հասկանալ դեպքերի հաջորդականությունը։ Նրա պնդմամբ՝ երեկ առավոտվանից մեր ԶՈՒ-ն բավականին հաջող գործողություններ են կատարել և նրանց հաջողվել է մի քանի դիրք հետ վերցնել։ «Դրանից հետո ՀՀ վարչապետը գալիս է ԱԺ, անում է մի էսպիսի հայտարարություն․ «ՀՀ-ը միջանցմ իր տարածքից՝ 29 800 կմ-ց, ոչ մի միլիմետր հող չի զիջելու, ու մենք պատրաստ ենք ամեն մի միլիմետրի համար մեռնել»։ Էդ արտահայտությունից հետո մարդիկ՝ որոշակի խումբ, վերցնում կտրում է վարչապետի ելույթից մի կտոր, սկսում դա տարածել ու տիրաժավորել՝ փորձելով ներկայացնել, թե իբր ինչ-որ բան է ստորագրվել արդեն իսկ հետին թվում կամ ստորագրվելու էն պարագայում, երբ որ վարչապետն ասել է ուղիղ հակառակը, որ էն, ինչը հիմա քննարկվում է, մենք պատրաստ չենք ստորագրել ու չենք ստորագրելու, որովհետև չունենք վստահություն դրա նկատմամբ»,- ասաց պատգամավորը։ Ալեքսանյանը, մեկնաբանելով երեկ ԱԺ դիմաց տեղի ունեցած բողոքի ակցիան, գիշերը նշել է․ «Գործակալական որջերից, պադվալներից, գետնի տակերից դուրս են վազում ինչ-որ առողջ ուժեր, երիտասարդներ, որոնց, ի դեպ, օգտվելով եթերից, շնորհավորում եմ․ նրանք շահել են զինկոմի ուղեգիր: Նրանք էս պահի դրությամբ (սեպտեմբերի լույս 15-ի գիշերվա,- խմբ․), եթե չեմ սխալվում, ունեն մոտ 8 ժամ իրենց իրերը, բանը հավաքեն, որովհետև առավոտյան 9-ից, մենք չենք կարող մեզ թույլ տալ էդ ճոխությունը, որ նման մեծ ոգի ունեցող ռեսուրսը չգնա առաջնագիծ։ Պարոն Անդրանիկ Քոչարյանի հետ էի խոսում, ինքն էլ արդեն խոսել էր զինկոմի հետ․ էս ոգով, ուժեղ երիտասարդները (ակցիայի մասնակիցները,- խմբ․) վաղը առավոտվանից (սեպտեմբերի 15-ի,- խմբ․) կստանան արդեն իրենց ուղեգրերը ու կմեկնեն առաջնագիծ Ձեզ թվում ա, որ էդպիսի ոգով երիտասարդները պիտի մնան Երևանի կենտրոնո՞ւմ։ Տղերքը պայքարում են, որ Հանրապետությունը մնա անսասան, հողերը մնան։ Չօգնե՞նք մարդկանց։ Ես գիտեմ նաև, որ օպերատիվ աշխատանք է տարվում բոլորին (ացիայի մասնակից երիտասարդ տղաներին- խմբ․) իդենտիֆիկացնելու ուղղությամբ։»։ Պատասխանելով հարցին, թե արդյոք դա ընդդիմադիրների նկատմամբ ճնշում չէ, ասաց՝ ոչ։ Հիշեցնենք, որ ԱԺ-հարցուպատասխանին Նիկոլ Փաշինյանի հայտարարություններից հետո հարյուրավոր քաղաքացիներ հավաքվել էին ԱԺ շենքի դիմաց։ Խոսքը, մասնավորապես, Փաշինյանի հետևյալ հայտարարության մասին է․ «Ես ինձ վրա վերցրել եմ պատասխանատվություն գնալ ծանր որոշումների հանուն խաղաղության։ Բայց ծանր որոշումներ չի նշանակում ՀՀ պետական շահերին հակասող որոշումներ։ Մենք էդ որոշումներին պիտի գնանք՝ երաշխավորելու համար ՀՀ անվտանգությունը, տևական կայունությունը, խաղաղությունը։ Մենք չենք կարող էսօր վերնագրի ներքո գրել խաղաղության պայմանագիր, տակը ստորագրենք, որի արդյունքում 6 ամիս հետո նոր պատերազմ սկսվի։ Մենք ուզում ենք, որ ստորագրենք մի թուղթ, որի արդյունքում մեզ լիքը մարդ կքննադատի, կհայհոյի, դավաճան կասի, նույնիսկ կարող է ժողովուրդը որոշի մեզ իշխանությունից հեռացնել, էլի շնորհակալ կլինենք, եթե դրա արդյունքում ՀՀ-ն 29 800 կմ քառակուսի տարածքով ստանա տևական խաղաղություն և անվտանգություն։ Որոշումը, որը սա ապահովելու է, ես ստորագրելու եմ։ Ինձ չի հետաքրքրում՝ ինչ կլինի հետո ինձ հետ, ինձ հետաքրքրում է՝ ինչ կլինի Հայաստանի Հանրապետության հետ»։ Քաղաքացիները պահանջում էին Փաշինյանի հրաժարականը, և որ պատգամավորները իմպիչմենտ հայտնեն ՀՀ վարչապետին։ Երեկոյան ՔՊ պատգամավորները հերքում էին տարածվող լուրերը, թե որևէ փաստաթուղթ է ստորագրվելու, այնուհետև ինքը՝ Փաշինյանը, ֆեյսբուքյան ուղիղ եթերում պարզաբանեց իր ելույթը՝ կոչ անելով մանիպուլյացիաների չտրվելու․ «Իմ այսօրվա ասածը նշանակում է հետևյալը, որ մենք խաղաղության օրակարգ ենք որդեգրել, և դրա իրականացումը միայն մի կողմից չէ կախված՝ դա կախված է մի քանի կողմերից, որոնք դեր ունեն այս պրոցեսում։ Հայաստանը պատրաստ է խաղաղության օրակարգով առաջ շարժվել։ Մենք հրապարակային ասել ենք մեր դիրքորոշումները։ Խաղաղության պայմանագրի համար Ադրբեջանը ասել է կետեր, մենք ասել ենք, որ այդ կետերում մեզ համար անընդունելի ոչինչ չկա, բայց դրանք ամբողջական չեն և լրացրել ենք Ադրբեջանի կողմից ներկայացված օրակարգը, որը ներառում է նաև Լեռնային Ղարաբաղի ժողովրդի իրավունքները և սրանից բխող կարգավիճակը»։ Ընդդիմությունը, որի պատգամավորները ևս միացել էին ցուցարարներին, հայտարարեց, որ պետք է ևս 18 ստորագրություն՝ իմպիչմենտ հայտնելու համար։

10:08 - 15 սեպտեմբերի, 2022

Բողոքի ակցիայի մասնակիցներից մեկի պնդմամբ ընդդիմադիր 35 պատգամավոր ստորագրել է վարչապետի իմպիչմենտի փաստաթուղթը

ԱԺ դիմաց անցկացվող բողոքի ակցիայի մասնակիցներից մեկը հայտնեց․ «Խոսեցի Սեյրան Օհանյանի հետ։ Իրենք տեքստը 35 հոգով ստորագրել են, և հիմա պատգամավորներից մեկը գալու է այստեղ և կարդա իմպիչմենտի թղթի բովանդակությունը և այն պատգամավորների անունները, ովքեր ստորագրել են դրա տակ։ Վաղը ԱԺ նիստն է, և նրանք դա դրել են շրջանառության մեջ»։ Ավելի վաղ Էդգար Ղազարյանը հայտարարել էր, որ 35 հոգի պատրաստակամություն է հայտնել, բայց չի ստորագրել։ Իսկ Կարին Տոնոյանը, որն ավելի վաղ հայտնել էր Ալեն Սիմոնյանի տուն գնալու մասին, վերադառնալով հայտարարեց․ «Մենք գնացինք պատգամավորների տներ։ Այդ մարդիկ իրենց տներում չեն, պարզ է, որ այդ մարդիկ հիմա թաքնված են, մենք ապացուցեցինք, որ իրենք իրենց վախերի մեջ են»։

03:34 - 15 սեպտեմբերի, 2022

Պետք է պահանջել, որ ԱԺ պատգամավորները գան այստեղ և հայտարարեն, թե ով է վարչապետի թեկնածու․ Էդգար Ղազարյան

Էդգար Ղազարյանը ԱԺ դիմաց անցկացվող բողոքի ակցիայի ժամանակ հայտարարեց, որ խոսել է Իշխան Սաղաթելյանի հետ։ «Իրենք ասում են՝ մենք ստեղ ենք, գնացեք բերեք 18 պատգամավոր։ Պատգամավոր բերելու հարցում իրենք ունեն քսան անգամ ավելի լիազորություն, քան այստեղ կանգնած յուրաքանչյուր մեկը։ Ակնկալել, որ ՔՊ 18 պատգամավոր գալու է և որոշում կայացնի, ոչ մի երեխա դրան չի հավատում։ Պատգամավորները, բացի շենք մտնելուց, ուրիշ ոչինչ չեն արել, նրանք նույնիսկ լայվ են արել, որ ակնկալում են, որ ՔՊ պատգամավորները պիտի գան։ Կոնկրետ չեն զանգել ԱԺ նախագահին, որ գա ու ապահովի պատգամավորների ներկայությունը»,- նշեց նա։ Ղազարյանի խոսքով՝ ընդդիմադիր պագամավորներն իրարից տրբերվող տեղեկություն են իրենց տվել․ «Սեյրան Օհանյանն ասաց, որ կա 35 պատգամավորի ստորագրություն, իսկ Իշխան Սաղաթելյանը ասաց, որ պատրաստ են ստորագրել։ Ես հասկացա, որ չկա, բայց պատրաստ են։ Ինչո՞ւ նրանք չեն ստորագրում։ Որպեսզի վարչապետին անվստահություն հայտնեն, Սահմանադրության պահանջն է, որպեսզի իրենք առաջադրեն նոր վարչապետի թեկնածու։ Իրենք այդ թեկնածու չունեն, բայց պատգամավորներն են պարտավոր առաջադրել վարչապետի թեկնածու»։ Էդգար Ղազարյանի խոսքով՝ եթե ընդդիմադիրները առաջադրում վարչապետի թեկնածու, և իրեն էլ չեն առաջադրում, ստացվում է, որ նրանք գործընթացը չեն սկսում․ «Երկիրը անտերության է մատնված, փաստացի Նիկոլ Փաշինյանը իշխանություն չունի։ Պետք է պահանջել, որ ԱԺ պատգամավորները կարճ ժամանակ հետո գան այստեղ և հայտարարեն, թե ով է վարչապետի թեկնածու»։

03:06 - 15 սեպտեմբերի, 2022

Ընդդիմադիր պատգամավորները բողոքի ակցիայի մասնակիցների հորդորով մտել են ԱԺ

ԱԺ-ում շարունակվում է բողոքի ակցիան, ընդդիմադիր խմբակցությունների պատգամավորներն ԱԺ շենքի ներսում են։ 5165 շարժման անդամ Կարին Տոնոյանը ԱԺ դիմաց հայտարարեց․ «Ես դիմում եմ հայոց բանակին։ Մենք կարիք ենք ունենալու բանակի աջակցությանը։ Դիմում եմ բոլոր այն սպաներին, ովքեր հիմա անգամ զորակոչված են, որպեսզի հիմա հայտարարեն, որ սատարում են այս շարժմանը և մեզ հետ են»։ Նա հայտնեց, որ իր ձեռքին ՔՊ պատգամավորների հասցեներն են, ապա հնչեցրեց Ալեն Սիմոնյանի տան հասցեն և ասաց, որ այս պահին գնում են այնտեղ։ ՍԴ աշխատակազմի նախկին ղեկավար Էդգար Ղազարյանն էլ հայտարարեց, որ ընդդիմադիր խմբակցությունների պատգամավորները ներս են գնացել ԱԺ․ «Աժ-ում արդեն լույսերը վառվում են, պատգամավորներն արդեն ԱԺ-ում են։ Մնաք այստեղ՝ որպես աջակցություն արդեն շենքում գտնվող պատգամավորների, որպեսզի իրենք կազմակերպեն գործընթացը։ Հրավիրվելու են ԱԱԾ տնօրենն ու ոստիկանապետը, որոնք նույնպես ի պաշտոնե պարտավոր են ապահովել այս պահին հասարակության պահանջով ԱԺ բնական գործունեությունը»։ «Հայաստան» դաշինքի անդամ Սայաթ Շիրինյանն էլ դեմ արտահայտվեց ՔՊ-ական պատգամավորների տներ գնալուն․ «Դա նշանակում է մասնատել ժողովրդին և տալ ոստիկանի ձեռքը։ Մեր ուժը մեր միասնականության մեջ է, հենց այս հրապարակը պիտի մարդաշատ լինի»։ Հիշեցնենք, որ ակցիայի մասնակիցները պահանջում են անվստահություն հայտնել Նիկոլ Փաշինյանին։ Նրանք ՔՊ 18 պատգամավորի պահանջում են միանալ, որ անհրաժեշտ ստորագրությունները հավաքվեն, և անվստահություն հայտնելու գործընթացը սկսվի։

02:08 - 15 սեպտեմբերի, 2022

Հաջողության հասնելու համար պետք է ուղղորդել դեպի ՔՊ պատգամավորներ, ստանալ ևս 18 հոգու ստորագրություն Իշխան Սաղաթելյան

ԱԺ դիմաց ընթացող բողոքի ակցիայի ընթացքում ելույթ ունեցավ «Հայաստան» խմբակցության պատգամավոր Իշխան Սաղաթելյանը՝ նշելով, որ պատմական պահ է, օրհասական վիճակ է։ «Պետք են ճիշտ քայլերով գործողություններ։ Երկու ընդդիմադիր խմբակցությունների 35 պատգամավորներ պատրաստ են ստորագրել [վարչապետի] պաշտոնանկության տակ և սկսել գործընթաց։ Հաջողության հասնելու համար պետք է ուղղորդել դեպի ՔՊ պատգամավորներ, ստիպել, պարտադրել, ստանալ ևս 18 հոգու ստորագրություն, որպեսզի հասնենք պաշտոնանկության գործընթացին։ Քիչ հետո կհրապարակվեն հասցեներ։ Մենք եկել ենք՝ ասենք, որ ձեր կողքին ենք: Այսքան մարդու ներուժը և հնարավորությւոնը պետք է ճիշտ ուղղորդել, եթե ուզում եք գործընթացը հաղթական ավարտ ունենա, պետք է բերման ենթարկել 18 պատգամավորի և ունենալ այդ ստորագրությունը»,- հայտարարեց նա։ Հիշեցնենք, որ ԱԺ դիմաց բողոքի ակցիա է ընթանում, որի մասնակիցները պահանջում են պատգամավորներից վարչապետ Նիկոլ Փաշինյանին անվստահություն հայտնել։

01:33 - 15 սեպտեմբերի, 2022

Մեր խնդիրը պարտված իշխանություններին հեռացնելն է․ Սեյրան Օհանյան

«Հայաստան» խմբակցության ղեկավար Սեյրան Օհանյանի կարծիքով ռազմաքաղաքական իրավիճակի ոչ ճիշտ գնահատման արդյունքում է, որ Հայաստանը հայտնվել է բանակցային գործընթացից դուրս, այնուհետև՝ 2020 թվականին՝ պատերազմի մեջ։ Այս մասին Օհանյանը հայտարարեց ԱԺ շենքի դիմաց ընթացող բողոքի ակցիայի ընթացքում։ «Պատերազմի ընթացքում այս իշխանությունները ոչիչ չեն արել, որպեսզի ապահովեն խնդիրների կատարումը, հաղթական ելքը, թույլ են տվել, որ թշնամին մոտենա ՀՀ սահմաններին։ Ուզում եմ ընդգծել, որ ՀՀ սահմաններին մոտ մարտական գործողությունները կանգնեցնելուց հետո ոչ մի միջոց չի ձեռնարկվել, որպեսզի մեր սահմաններում ռազմավարական կարևոր կետերը, ճանապարհները, բարձունքները վերցնենք մեր հսկողության տակ, որպեսզի հետագայում հեշտ լինի մեր պաշտպանության իրականացումը»,- ասաց նա։ Սեյրան Օհանյանի խոսքով՝ իշխանությունները մոբիլիզացիա չեն իրականացրել՝ համալրելու բանակը, որպեսզի բանակի, սահմանապահ ծառայության անձնակազմը հերիքի ՀՀ ամբողջ սահմանին և Արցախում պաշտպանություն կազմակերպելու։ «Դրանից օգտվել է մեր թշնամին՝ թուրք-ադրբեջանական տանդեմը, սկսել են հարձակողական գործողություններ մի քանի անգամ և գրավել մարտավարական կարևոր կետեր»,- նշեց նա։ Անդրադառնալով Ադրբեջանի հարձակմանը՝ Սեյրան Օհանյանը նշեց․ «Սպետեմբերի 13-ի նրանց գործողությունները օղակի սեղմումն է ՀՀ շուրջը։ Դա ստիպելն է, որ ՀՀ-ը ճանապարհներ, միջանցք տրամադրի թուրք-ադրբեջանական տանդեմին։ Այդ օղակը օրըստօրե սեղմվում է։ Կարևոր հանցագործը, իհարկե, Ադրբեջանն է, բայց ՀՀ իշխանությունը, կարելի է ասել, ոչինչ չեն արել՝ Ադրբեջանի հանցագործությունները միջազգային հանրությանը ներկայացնելու համար»։ Սեյրան Օհանյանի խոսքով՝ «պարտված իշխանությունները և՛ ներսում, և՛ միջազգային հարթակներում կոմպլեկսավորված վիճակում են, այդ պատճառով նրանց վրա ճնշումները շարունակվում են»։ «Այդ ամենի մասին խոսում է այս իրավիճակը, և խոսում է նաև այն, որ կան պայմանավորվածություններ։ Կառավարության ղեկին նստած անձը, իմանալով, որ եթե ինչ-որ մի մերժում լինի, ապա հակառակորդը սկսելու է մարտական գործողություններ, ոչինչ չի արել դրան նախապատրաստվելու համար։ Այսինքն, մեր խնդիրը պարտված իշխանություններին հեռացնելն է, բանակցողին հեռացնելն է։ Վարչապետ Նիկոլ Փաշինյանին հեռացնելը մեր այսօրվա օրակարգն է»,- նշեց նա։ Հիշեցնենք, որ ԱԺ դիմաց բողոքի ակցիա է ընթանում, որի մասնակիցները պատգամավորներից պահանջում են վարչապետին անվստահություն հայտնել։

01:05 - 15 սեպտեմբերի, 2022

Բողոքի ակցիայի մասնակիցները 1 ժամ ժամանակ տվեցին ՔՊ պատգամավորներին՝ ԱԺ գալու և վարչապետին անվստահություն հայտնելու փաստաթուղթը ստորագրելու համար

ԱԺ դիմաց ընթացքող բողոքի ակցիայի ժամանակ ելույթ ունեցավ «Հայաստան» խմբակցության պատգամավոր Արամ Վարդևանյանը՝ նշելով․ «Մենք ապահովելու ենք «առանց Նիկոլ Հայաստան»։ Ի՞նչ է պետք դրա համար. «Հայաստան» և «Պատիվ ունեմ» խմբակցությունների կողմից ստորագրությունները կան։ Չկա ՔՊ 18 պատգամավորի ստորագրություն։ ՔՊ պատգամավորները պետք է իմանան, որ այս ժողովուրդը չի գնալու, եթե այդ ստորագրությունները չլինեն»։ Բողոքի ակցիայի մասնակիցները 1 ժամ ժամանակ տվեցին ՔՊ պատգամավորներին՝ Ազգային ժողով գալու և վարչապետին անվստահություն հայտնելու փաստաթուղթը ստորագրելու համար։ Ակցիայի մասնակիցները ընդդիմադիր պատգամավորներից պահանջում են գալ, մտնել Աժ և վառել նիստերի դահլիճի լույսերը և ապահովել քվե։ Ավելի վաղ հայտնել էինք, որ ԱԺ դիմաց բողոքի ակցիա է տեղի ունենում, որին ներկա են նաև «Հայաստան» և «Պատիվ ունեմ» խմբակցությունների պատգամավորները։

00:44 - 15 սեպտեմբերի, 2022

Չկայացած հրադադար, տնտեսական հնարավոր հետևանքներ․ ի՞նչ է գրում միջազգային մամուլը հայ-ադրբեջանական պատերազմի մասին

20:37 - 14 սեպտեմբերի, 2022

Մեր հրապարակային խոսույթից դուրս մենք որևէ բան ո՛չ ասել ենք, ո՛չ արել ենք․ Փաշինյանն անդրադարձավ բանակցություններին տրված խոստումների մասին տեղեկություններին

Ինձ մի տեղեկանք են տվել այսօր, որ սոցցանցերում խոսույթ է շրջանառվում, թե ՀՀ վարչապետը բանակցությունների ընթացքում ինչ-որ բաներ է խոստացել, հիմա չի տալիս, և դրա համար են էս գործողությունները տեղի ունենում։ Այս մասին ԱԺ-կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ պատասխանելով ՔՊ պատգամավոր Արուսյակ Ջուլհակյանի հարցին, որը վերաբերում էր մեդիադաշտում տարածվող տեղեկություններին, և թե արդյոք կա գործիքակազմ դրա դիմաց առնելու համար։ Փաշինյանը նշեց, որ ՀՀ-ն ինչ խոստացել է կամ ինչ չի խոստացել, հրապարակային խոսույթի մեջ է եղել. «Մեր հրապարակային խոսույթից դուրս մենք որևէ բան ո՛չ ասել ենք, ո՛չ արել ենք»։ Անդրադառնալով 44-օրյա պատերազմի ժամանակ տարածված տեղեկություններին, օրինակ, ինչպես Ջուլհակյանը նշեց, որ Փաշինյանը հանձնարարել է դիրքը թողնել, գնալ, ՀՀ վարչապետը նաև ասաց, որ ԱԱԾ-ն զեկուցել է, որ 44-օրյա պատերազմի ժամանակ հրամայվել է, որ հակառակորդի կողմից գրավված, ապա հետ գրավված բարձունքը զինված ուժերը թողնեն ու հեռանան․ «Սրանք դրվագներ են, որ պետք է պարզաբանվեն»։ «Էն ժամանակ ասում էին, որ էս ա հանձնել իշխանությունը, էս ա որոշել։ Ես խոստացել եմ, որ կառավարությունը ամենաշահագրգիռն է, որ պատերազմական դրվագներն ի հայտ գան, ու երբ հիմա, որ ոմանք ձերբակալվում են, օրինակ Շուշիի դրվագով, պարզվում է, որ ենթադրենք, հազար ներողություն, Ղարաբաղի խորհրդարանի կեսը պաշտպանում է։ Հիմա Շուշին հանձնել են, թե չեն հաննձել։ Թե պետք է պարտադիր պարզվեր, որ ես եմ Շուշին հանձնել, որ բոլորն ասեին՝ ուռա, կեցցե արդարությունը», նշեց նա։ Արուսյակ Ջուլհակյանը կարծիք հայտնեց, որ բավարար խիստ չեն եղել 44-օրյա պատերազմի ընթացքում կեղծ տեղեկություններ տարածողների նկատմամբ, Փաշինյանը չհամաձայնեց այդ կարծիքի հետ։ Նա այս համատեքստում անդրադարձավ նաև ԱԱԾ սպաների միությանը․ «Դուք նամուս ունենաք, էսօր փողոց դուրս կգա՞ք։ Երկրի կեսը շպիոն է եղել ձեր պաշտոնավարման ընթացքում, դուք ՀԿ եք հիմնում։ Ձեր օրոք ՀՀ-ում ԱԱԾ չի եղել, խոպանչիների բրիգադ եք դուք եղել։ Ցավոք սրտի, նաև մեր ժամանակ նշանակվածների շրջանից։ Ձեզնով ԱԱԾ-ն պետք է զբաղվի, որովհետև շատ դեպքերում պետք է հասկանանք՝ դուք ամեն մեկդ քանի երկրի շպիոն եք»։

19:03 - 14 սեպտեմբերի, 2022

Որոշումը, որի արդյունքում ՀՀ-ն 29 800 կմ քառակուսի տարածքով ստանա տևական խաղաղություն և անվտանգություն, ես ստորագրելու եմ

ԱԺ-հարցուպատասխանի ժամանակ ՔՊ պատգամավոր Հովիկ Աղազարյանը հարց ուղղեց, թե արդյո՞ք կնքվելիք խաղաղության պայմանագիրը չպետք է հաջորդի սահմանների ճշգրտմանը։ Սկզբում հարցին պատասխանեց արտգործնախարար Արարատ Միրզոյանը՝ նշելով, որ կարող է լինել խաղաղության կամ հարաբերությունների հաստատման, փոխադարձ ճանաչման պայմանագիր, որից բխեն տարբեր գործընթացներ, այդ թվում սահմանների սահմանազատման և սահմանագծման։ «Կարող է լինել և հակառակը՝ փաթեթային մոտեցմամբ՝ մի պայմանագրում բոլոր հարցերը՝ ամենայն մանրամասնությամբ, կարող են լինել նաև առանձին գործընթացներ՝ սահմանները սահմանազատվեն, կոմունիկացիաները որոշվեն, բացվեն, հետո լինի վերջնական պայմանագիրը։ Իմ կարծիքով կարելի է ճանաչման պայմանագիր ստորագրել, ամենաէական խնդիրները արձանագրել, և զուգահեռ գնան գործընթացներ, օրինակ՝ սահմանազատման գործընթացը»,- նշեց Միրզոյանը։ Այնուհետև Աղազարյանի հարցին անդրադարձավ նաև ՀՀ վարչապետ Նիկոլ Փաշինյանը՝ ընդգծելով, որ հարցը կարևոր է։ Նա նշեց` Ադրբեջանն ասում է եկեք փոխադարձաբար տարածքային ամբողջականությունը ճանաչենք, ասում ենք՝ համաձայն ենք. «Եթե Ադրբեջանն ասում է, որ էն տարածքները, որոնք իրենք ներխուժել են՝ Շորժա, Վերին Շորժա, դա ո՞ւմ տարածքային ամբողջականության մեջ է։ Եթե Ադրբեջան ասում է, որ իր տարածքն է, ապա մենք իր տարածքային ամբողջականությունը չենք ճանաչում, որովհետև դա մեր տարածքն է, դա վիճելի տարածք չէ։ Եթե իրենք դուրս կգան, կկանգնեն Սովետական Միության սահմանի վրա, կճանաչենք տարածքային ամբողջականությունը, դուրս չեն գա, չենք ճանաչի, սա քաղաքական դիրքորոշում է։ Սրա հիման վրա պատրաստ ենք գնալ խաղաղության պայմանագրի, դեմարկացիա, դելիմիտացիա անել։ Ադրբեջանը հիմա ասում է՝ եկեք դուք իմ տարածքային ամբողջականությունը ճանաչեք, ներառյալ այն տարածքենրը, որոնք ես ապօրինի օկուպացրել եմ, ճանաչեք իմ մաս, հետո դեմարկացիա դելիմիտացիայի շրջանում կարող է պարզվել, որ ՀՀ-ին պատկանող տարածքներ կան, որ ժամանակին տրվել են Ադրբեջանին, հետք կքննարկենք։ ՀԽՍՀ-ն ունի կոնկրետ տարածք, եթե Ադրբեջանը մեր Հանրապետության տարածքային ամբողջականոությունը ճանաչում է, ես հենց այսօր այդ հենքի վրա պատրաստ եմ գալ համաձայնության»։ «Ես ինձ վրա վերցրել եմ պատասխանատվություն գնալ ծանր որոշումների հանուն խաղաղության։ Բայց ծանր որոշումներ չի նշանակում ՀՀ պետական շահերին հակասող որոշումներ։ Մենք էդ որոշումներին պիտի գնանք՝ երաշխավորելու համար ՀՀ անվտանգությունը, տևական կայունությունը, խաղաղությունը։ Մենք չենք կարող էսօր վերնագրի ներքո գրել խաղաղության պայմանագիր, տակը ստորագրենք, որի արդյունքում 6 ամիս հետո նոր պատերազմ սկսվի։ Մենք ուզում ենք, որ ստորագրենք մի թուղթ, որի արդյունքում մեզ լիքը մարդ կքննադատի, կհայհոյի, դավաճան կասի, նույնիսկ կարող է ժողովուրդը որոշի մեզ իշխանությունից հեռացնել, էլի շնորհակալ կլինենք, եթե դրա արդյունքում ՀՀ-ն 29 800 կմ քառակուսի տարածքով ստանա տևական խաղաղություն և անվտանգություն։ Որոշումը, որը սա ապահովելու է, ես շատ այդ որոշումը ստորագրելու եմ։ Ինձ չի հետաքրքրում՝ ինչ կլինի հետո ինձ հետ, ինձ հետաքրքրում է՝ ինչ կլինի Հայաստանի Հանրապետության հետ», - նշեց Փաշինյանը։

18:43 - 14 սեպտեմբերի, 2022