Սահման

Էսկալացիայի ռիսկը առկա է, պետք է անենք քայլեր, որ բանը մեծ գործողություններին չհասնի. փոխնախարարը՝ կուտակումների մասին |news.am|

news.am: Կուտակումների մասին տեղեկատվությունը հայտնել է նաեւ ՊՆ-ն եւ ավելորդ լարումից, մյուս բաներից խուսափելու համար ցանկալի է հետեւել պաշտոնական տեղեկատվությանը, մենք ամեն ինչ հրապարակում ենք: Այս մասին այսօր՝ սեպտեմբերի 11-ին, ԱԺ-ում լրագրողների հետ զրույցում նշեց ՊՆ փոխնախարար Արման Սարգսյանը: Դիտարկմանը, որ տեսանյութեր կան, որ հակառակորդը հարձակողական զենքեր է կուտակում սահմանին, փոխնախարարն ասաց. «Ես մասնագիտական առումով չասեմ, այնտեղ պարզ երեւում է, եւ հրետնային միջոցներ են կարծես թե, մի շարք ռազմական տեխնիկա է: Այդ մասին խոսվել է: Ավելորդ չեմ ցանկանում եւս մեկ անգամ դրա մասին խոսել: Միայն կհորդորեմ մեր տեղեկատվությանը հետեւք, մենք պարբերաբար որոշակի սրումների կամ ընդհուպ փոքր հրաձգային զենքից կրակի դեպքում անմիջապես տեղեկատվություն տրամադրում ենք: ՊՆ-ն իր իրավասության շրջանակներում, բնականաբար, քայլեր ձեռնարկում է տարածաշրջանում իրավիճակը չապակայունացնելու եւ ընդհանուր իրավիճակի վրա որեւէ կերպ բացասական ազդեցություն չունենալու իմաստով: Մեր տարածաշրջանն այնպիսին է, որ էսկալացիայի ռիսկը առկա է, սակայն մենք, որպես պետություն պետք է ձեռնարկենք քայլեր, որպեսզի բանը էսկալցիային, առհասարակ, ռազմական մեծ գործողություններին չհասնի»:

11:50 - 11 սեպտեմբերի, 2023

ՀՀ ՊՆ-ն դարձյալ հերքում է ադրբեջանական կողմի հաղորդագրությունը

Հայաստանի Հանրապետության պաշտպանության նախարարությունը դարձյալ հերքում է ադրբեջանական կողմի պաշտոնական հաղորդագրությունը։ «Ադրբեջանի պաշտպանության նախարարության տարածած հաղորդագրությունն այն մասին, թե սեպտեմբերի 9-ին` ժամը 03։55-ի սահմաններում, ՀՀ ԶՈՒ ստորաբաժանումներն իբր կրակ են բացել սահմանագոտու հարավարևմտյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը»,- հայտնում են ՀՀ ՊՆ-ից։

10:29 - 09 սեպտեմբերի, 2023

Ադրբեջանի ՊՆ-ն շարունակում է ապատեղեկատվություն տարածել

Ադրբեջանի պաշտպանության նախարարության հաղորդագրությունն այն մասին, թե սեպտեմբերի 8-ին` ժամը 13։35-ից 13։45-ն ընկած ժամանակահատվածում, ՀՀ ԶՈՒ ստորաբաժանումներն իբր կրակ են բացել սահմանագոտու հարավարևմտյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը: Այս մասին հայտնում են ՀՀ ՊՆ-ից։

15:32 - 08 սեպտեմբերի, 2023

Ֆեյք լուր. Ֆրանսիայի դեսպանը՝ ՀՀ սահմանամերձ շրջաններ չայցելելու զգուշացման վերաբերյալ |hy.armradio.am|

hy.armradio.am: ՀՀ-ում Ֆրանսիայի դեսպան Օլիվյե Դըկոտինյին հերքել է համացանցում տարածվող այն տեղեկատվությունը, թե Ֆրանսիայի դեսպանությունը զգուշացնում է իր քաղաքացիներին չայցելել ՀՀ սահմանամերձ շրջաններ, մասնավորապես՝ Սյունիք և Վարդենիս: Նա X սոցիալական ցանցի իր էջում գրել է․ «Ֆեյք լուր․ մեր ճամփորդական խորհրդատուն Հայաստանի համար չի թարմացվել 2023 թվականի հուլիսի 18-ից»։

09:41 - 08 սեպտեմբերի, 2023

Հայաստանն ԱՄՆ վաղեմի գործընկերն է, այս զորավարժությունն էլ առաջինը չէ. դեսպանատուն |azatutyun.am|

18:42 - 07 սեպտեմբերի, 2023

ԵՄ առաքելությունը ընդլայնել է իր պարեկային գործունեությունը սահմանային տարածքներում՝ դիտարկելու ցանկացած ռազմական զարգացում

Հայաստանում ԵՄ դիտորդական առաքելությունը ընդլայնել է իր պարեկային գործունեությունը Գեղարքունիքի և Սյունիքի մարզերի հայ-ադրեբջանական սահմանային տարածքներում՝ դիտարկելու ցանկացած ռազմական զարգացում։ Այս մասին ասված է Հայաստանում ԵՄ դիտորդական առաքելության X-ի (Twitter) էջում։ «Տեղում մեր ներկայության միջոցով մենք նպատակ ունենք նպաստել լարվածության թուլացմանը և ԵՄ-ին իրավիճակի մասին անաչառ զեկուցմանը»,- նշված է հաղորդագրության մեջ։

17:34 - 07 սեպտեմբերի, 2023

ԵՄ դիտորդական առաքելության կանադացի անդամների ժամանման ժամկետները հայտնի չեն |hetq.am|

hetq.am: 2023-ի հուլիսին հայտնի դարձավ, որ Կանադան կմիանա Հայաստանում Եվրոպական միության դիտորդական առաքելությանը, որի նպատակը հայ-ադրբեջանական սահմանին պարեկության իրականացումն ու Բրյուսելի համար սահմանին առկա իրավիճակի վերաբերյալ զեկույցների պատրաստումն է։ Եվրոպական կողմը փոխանցել էր, որ Օտտավան է ցանկություն հայտնել միանալու առաքելությանը։ Կանադական կողմի այս նախաձեռնությունը ողջունել էր նաև ՀՀ արտաքին գործերի նախարարությունը՝ նշելով, որ դա կարևոր ներդրում կլինի Հարավային Կովկասում կայունության և խաղաղության ամրապնդման համար։ Civilnet-ի հարցմանը ի պատասխան Հայաստանում ԵՄ առաքելությունից հայտնել էին, որ դիտորդական առաքելությանը Կանադայից կմիանա երկու քաղաքացիական փորձագետ։ «Հետքի» հարցմանն ի պատասխան, սակայն, ՀՀ արտաքին գործերի նախարարությունը նշել են, որ Կանադայի ներկայացուցիչները դեռևս Հայաստան չեն ժամանել։ «Այդ առնչությամբ հստակ ժամկետներ առկա չեն»,- ասված է ՀՀ արտաքին քաղաքական գերատեսչության պատասխանում։ Շարունակությունը՝ hetq.am-ում

09:43 - 07 սեպտեմբերի, 2023

Ադրբեջանի ԶՈՒ-ն կրակ է բացել Նորաբակի հայկական դիրքերի ուղղությամբ. ՊՆ

Սեպտեմբերի 7-ին՝ ժամը 01:35-ի սահմաններում, Ադրբեջանի ԶՈՒ ստորաբաժանումները հրաձգային զենքից կրակ են բացել Նորաբակի (Գեղարքունիքի մարզ) հատվածում տեղակայված հայկական դիրքերի ուղղությամբ: Այս մասին հայտնում են ՀՀ ՊՆ-ից:

08:51 - 07 սեպտեմբերի, 2023

ՀՀ ԶՈՒ ստորաբաժանումները կրակ չեն բացել ադրբեջանական դիրքերի ուղղությամբ. ՊՆ

Ադրբեջանի պաշտպանության նախարարության տարածած հաղորդագրությունն այն մասին, թե ՀՀ ԶՈՒ ստորաբաժանումները սեպտեմբերի 6-ին՝ ժամը 23:10-ի սահմաններում, իբր կրակ են բացել սահմանագոտու արևելյան հատվածում տեղակայված ադրբեջանական դիրքերի ուղղությամբ, չի համապատասխանում իրականությանը: Այդ մասին հայտնում են ՀՀ ՊՆ-ից։

08:49 - 07 սեպտեմբերի, 2023

ԱԽ քարտուղարը դիվանագիտական ներկայացուցչությունների ղեկավարներին տեղեկացրել է ԼՂ շփման գծի և սահմանի երկայնքով Ադրբեջանի ԶՈՒ-ի կուտակումների մասին

Սեպտեմբերի 6-ին ՀՀ անվտանգության խորհրդի քարտուղար Արմեն Գրիգորյանը հանդիպել է Հայաստանում հավատարմագրված դիվանագիտական ներկայացուցչությունների ղեկավարների հետ: Այս մասին հայտնում են ՀՀ անվտանգության խորհրդից: ԱԽ քարտուղարը դիվանագիտական ներկայացուցչությունների ղեկավարներին մանրամասներ է ներկայացրել Լեռնային Ղարաբաղի շփման գծի, ինչպես նաև Հայաստան-Ադրբեջան սահմանի երկայնքով ադրբեջանական զինուժի կուտակումների վերաբերյալ: Քարտուղարը ներկայացուցչությունների ղեկավարների ուշադրությանն է նաև արժանացրել Լեռնային Ղարաբաղում օրըստօրե խորացող հումանիտար ճգնաժամը: Ա. Գրիգորյանն ընդգծել է միջազգային գործընկերների կողմից ջանքերի գործադրման կարևորությունը՝ Ադրբեջանի հնարավոր ագրեսիան կանխելու նպատակով։

17:53 - 06 սեպտեմբերի, 2023

ՀՀ-ում հավատարմագրված օտարերկրյա ռազմական կցորդներին և ներկայացուցիչներին ներկայացվել է հայ-ադրբեջանական սահմանին ստեղծված օպերատիվ իրավիճակը

Սեպտեմբերի 6-ին ՊՆ վարչական համալիրում տեղի է ունեցել ճեպազրույց Հայաստանի Հանրապետությունում հավատարմագրված օտարերկրյա ռազմական կցորդների և ներկայացուցիչների հետ։ Այս մասին հայտնում են ՀՀ ՊՆ-ից։ Ճեպազրույցի ընթացքում ՊՆ պաշտպանական քաղաքականության և միջազգային համագործակցության վարչության պետ Լևոն Այվազյանը ռազմական կցորդներին է ներկայացրել վերջին օրերի ընթացքում հայ-ադրբեջանական սահմանին ստեղծված օպերատիվ իրավիճակը, պատասխանել է հետաքրքրող հարցերին։ Նշվել է, որ ՀՀ զինված ուժերն իրենց պարտականությունների շրջանակներում ձեռնարկում են բոլոր անհրաժեշտ քայլերը` իրավիճակի հետագա սրացում թույլ չտալու համար։

12:26 - 06 սեպտեմբերի, 2023

Ադրբեջանի ԶՈՒ ստորաբաժանումները կրակ են բացել Կութի հատվածի հայկական դիրքերի ուղղությամբ. ՊՆ

Սեպտեմբերի 5-ին՝ ժամը 00:05-00:20-ն ընկած ժամանակահատվածում, Ադրբեջանի ԶՈՒ ստորաբաժանումները հրաձգային զենքից կրակ են բացել Կութի (Գեղարքունիքի մարզ) հատվածում տեղակայված հայկական դիրքերի ուղղությամբ: Այս մասին հայտնում են ՀՀ ՊՆ-ից:

08:50 - 05 սեպտեմբերի, 2023

ԼՂ հայության իրավունքներն ու անվտանգությունը պետք է ապահովված լինեն. ՀՀ վարչապետ |1lurer.am|

1lurer.am: Մեր դիրքորոշումը հստակ է, որ ԼՂ հայության իրավունքներն ու անվտանգությունը պետք է ապահովված լինեն, և երաշխիքներ լինեն: Այս մասին իտալական La Repubblica պարբերականին տված հարցազրույցում նշել է ՀՀ վարչապետ Նիկոլ Փաշինյանը: Հարցին` որն է երաշխիքը, որ ԼՂ նկատմամբ վերահսկողություն հաստատելով` Ադրբեջանը տարածքային նկրտումներ չի ունենա ՀՀ նկատմամբ, Փաշինյանը պատասխանել է. «Եթե խաղաղության պայմանագիրը այդպիսի երաշխիքներ չունենա իր մեջ, այդ պայմանագիրը կլինի անիմաստ . սա է պատճառը, որ ցանկանում ենք ունենալ այնպիսի պայմանագիր, որը ձեր ասած երաշխիքը կտա: Մյուս կողմից` ԼՂ հայության իրավունքների ու անվտանգության հասցեագրումը միջազգային մեխանիզմի շրջանակներում չափազանց կարևոր է` մեր տարածաշրջանում խաղաղության հասնելու առումով»:

23:06 - 02 սեպտեմբերի, 2023

Եթե ՀՀ-ն ու Ադրբեջանը չճանաչեն միմյանց տարածքային ամբողջականությունը Ալմաթիի հռչակագրի հիման վրա, նշանակում է՝ խաղաղություն երբեք չի լինի․ Փաշինյանի հարցազրույցը իտալական La Repubblica թերթին

Վարչապետ Փաշինյանի հարցազրույց է տվել իտալական La Repubblica թերթին։ Լրագրողի հարցին, թե որքանով է Հայաստանի ու Ադրբեջանի միջև խաղաղությունը տեսանելի, Փաշինյանն ասաց․ «Շատ դժվար է գնահատել․ սկզբից մենք արագ առաջ ընթացանք այն պատճառով, որ կենտրոնացել էինք այն հոդվածների վրա, որոնց շուրջ հակասությունները կարող էին այնքան մեծ չլինել, բայց ինչքան շատ հոդվածներ են համաձայնեցվում, չհամաձայնեցվածների մեջ մնում են առավել դժվար հոդվածները և դրանցից բխող հետևանքներով»։ Լրագրողը հարցրեց․ «Կարծում եք, թե ԼՂ վերահսկողությունը Ադրբեջանին հանձնե՞լն է այն գինը, որ պետք է վճարվի խաղաղության համար»։ Փաշինյանը նշեց՝ ԼՂ-ում իրավիճակը միշտ էլ հսկողության տակ են ունեցել ԼՂ իշխանությունները, համենայն դեպս 2018-ից հետո, այսօր էլ իրավիճակը վերահսկում են ԼՂ իշխանությունները, ու այնտեղ են նաև ռուս խաղաղապահները։ «Խոսքն ուրիշ բանի մասին է․ եթե ՀՀ-ն ու Ադրբեջանը փոխադարձաբար չճանաչեն միմյանց տարածքային ամբողջականությունը Ալմաթիի հռչակագրի հիման վրա, նշանակում է՝ խաղաղություն երբեք չի լինի»։

22:23 - 02 սեպտեմբերի, 2023

Ադրբեջանի ԶՈՒ-ն կրակ է բացել Նորաբակի հայկական դիրքերի ուղղությամբ․ ՀՀ ՊՆ

Ժամը 16:00-16:10-ն ընկած ժամանակահատվածում, Ադրբեջանի ԶՈՒ ստորաբաժանումները հրաձգային զենքերից կրակ են բացել Նորաբակի հատվածում տեղակայված հայկական դիրքերի ուղղությամբ: Այս մասին հայտնում են ՀՀ ՊՆ-ից։

19:02 - 02 սեպտեմբերի, 2023

Տեղեկությունները թե, իբր, Ադրբեջանի ԶՈւ ԱԹՍ հարվածից հայկական կողմն ունի զոհեր և վիրավորներ, կեղծ են․ ՊՆ

Ադրբեջանական ԶԼՄ-ներում շրջանառվող տեղեկություններն այն մասին, թե, իբր, Ադրբեջանի ԶՈՒ կիրառած ԱԹՍ հարվածի հետևանքով հայկական կողմն ունի զոհեր և վիրավորներ, չի համապատասխանում իրականությանը: Այս մասին ասվում է ՀՀ ՊՆ տեղեկատվության մեջ: Սեպտեմբերի 1-ին ադրբեջանական սադրանքի հետևանքով զոհվել են 3 և վիրավորվել 2 զինծառայողներ: Այլ կորուստների կամ տուժածների մասին տեղեկությունները կեղծիք են:

15:57 - 02 սեպտեմբերի, 2023