Ուկրաինա

Ուկրաինան գտնվում է Արևելյան Եվրոպայում։ Այն հյուսիսից և հյուսիս-արևելքից սահմանակից է Ռուսաստանին, հյուսիս արևմուտքից՝ Բելառուսին, արևմուտքից՝ Լեհաստանին, Սլովակիային և Հունգարիային, հարավ արևմուտքից՝ Մոլդովային, հարավից և հարավ-արևելքից համապատասխանաբար Սև ծովին և Ազովի ծովին։

Այն 603,628 կմ² ցուցանիշով Եվրոպային հարակից երկրների մեջ Ռուսաստանի Դաշնությունից հետո երկրորդն է իր տարածքով։ Գործող նախագահը Վլադիմիր Զելենսկին է։

ՆԱՏՕ-ի դաշնակիցները կհանդիպեն՝ քննարկելու ՌԴ ագրեսիվ գործողությունների հետեւանքները․ Ստոլտենբերգ

ՆԱՏՕ-ի գլխավոր քարտուղար Յենս Ստոլտենբերգը դատապարտում է Ուկրաինայի վրա Ռուսաստանի «անխոհեմ և չհրահրված հարձակումը, որը վտանգում է անհաշիվ քաղաքացական անձանց կյանքեր»։ «Մեկ անգամ ևս, չնայած մեր պարբերական զգուշացումներին և դիվանագիտությունում ներգրավվելու անդադրում ջանքերին, Ռուսաստանն ընտրեց ինքնիշխան և անկախ երկրի դեմ ագրեսիայի ուղին», - ասված է Ստոլտենբերգի հայտարարությունում, որը հրապարակված է Հյուսիսատլանտյան դաշինքի պաշտոնական կայքէջում։ «Սա միջազգային իրավունքի լուրջ խախտում է և լուրջ վտանգ եվրատլանտյան անվտանգությանը։ Կոչ եմ անում Ռուսաստանին անհապաղ դադարեցնել ռազմական գործողությունները և հարգել Ուկրաինայի ինքնիշխանությունն ու տարածքային ամբողջականությունը։ ՆԱՏՕ-ի դաշնակիցները կհանդիպեն՝ քննարկելու Ռուսաստանի ագրեսիվ գործողությունների հետեւանքները։ Մենք աջակցում ենք Ուկրաինայի ժողովրդին այս սարսափելի պահին։ ՆԱՏՕ-ն կանի հնարավոր ամեն բան՝ պաշտպանելու բոլոր դաշնակիցներին», ասվում է հայտարարության մեջ։

11:33 - 24 փետրվարի, 2022

ՌԴ ՊՆ-ն պնդում է, որ ուկրաինական սահմանապահ ծառայության զինծառայողները որևէ դիմադրություն ցույց չեն տալիս ռուսական ստորաբաժանումներին |armenpress.am|

armenpress.am: Ռուսաստանի պաշտպանության նախարարությունը վստահեցնում է, որ Ուկրաինայի սահմանապահ ծառայության զինծառայողները որևէ դիմադրություն ցույց չեն տալիս ռուսական ստորաբաժանումներին: Այս մասին հաղորդագրություն է տարածել ՌԴ պաշտպանության նախարարությունը: ՌԴ ՊՆ-ն վստահեցնում է, որ Ուկրաինայի զինված ուժերի հակաօդային պաշտպանության միջոցները չեզոքացված են: Ռուսաստանի պաշտպանական գերատեսչությունից հայտնում են նաև, որ շարքից հանվել են նաև Ուկրաինայի զինված ուժերի ավիաբազաների ռազմական ենթակառուցվածքները:

10:33 - 24 փետրվարի, 2022

Ուկրաինայում ՀՀ դեսպանությունը մշտական կապի մեջ է գտնվում ՀՀ քաղաքացիների հետ. հեռախոսահամարներ են հրապարակվել

Ուկրաինայում ՀՀ դեսպանությունը ողջ կազմով աշխատում է և մշտական կապի մեջ է գտնվում ՀՀ քաղաքացիների հետ։ Այս մասին հայտարարություն է տեղադրված դեսպանության ֆեյսբուքյան էջում: Նշված են նաեւ հեռախոսահամարները. +380442349005 +380671090506 +380689602524 +380685000782

10:22 - 24 փետրվարի, 2022

Օդեսայում ռուսական զորքերի վայրէջքի մասին տեղեկությունները չեն համապատասխանում իրականությանը․ Ուկրաինայի ԶՈՒ գլխավոր շտաբ

«Այսօր՝ փետրվարի 24-ին, առավոտյան ժամը 05։00-ից, Ռուսաստանի Դաշնության զինված ուժերը սկսել են ինտենսիվհրետակոծություն են սկսել արևելյան մեր ստորաբաժանումների ուղղությամբ, նաև հրթիռային հարվածներ և ռմբակոծություններ են իրականացրել Բորիսպիլի, Օզեռնոյեի, Կուլբակինի, Չուգուևի, Կրամատորսկի, Չոռնոբաևկայի օդանավակայանների ուղղությամբ»,- այս մասին նշվում է Ուկրաինայի զինված ուժերի Գլխավոր շտաբի զեկույցում։ Ըստ զեկույցի՝ ռուսական կողմը սկսել է նաև Ուկրաինայի տարածքի ու բնակավայրերի հրետակոծությունը։ «Ուկրաինայի զինված ուժերի ռազմաօդային ուժերը հետ են մղում հակառակորդի օդային հարձակումը։ Պետական պաշտպանության ուժերը գտնվում են լիարժեք մարտական պատրաստության մեջ, գրավել և պահում են պաշտպանական դիրքեր։ Իրավիճակը վերահսկելի է»,- նշված է զեկույցում։ Ընդգծվում է նաև, որ Օդեսայում ռուսական զորքերի վայրէջքի մասին տեղեկությունները չեն համապատասխանում իրականությանը։ Մեկ այլ հաղորդագրության մեջ նշվում է, որ Դոնբասի տարածքում խոցվել է հակառակորդի 5 ինքնաթիռ և 1 ուղղաթիռ։

10:10 - 24 փետրվարի, 2022

Պետական սահմանը հարձակման է ենթարկվել ռուսական զորքերի կողմից՝ Բելառուսի աջակցությամբ․ Ուկրաինայի պետական սահմանապահ ծառայություն

Ուկրաինայի պետական սահմանապահ ծառայությունը հայտարարություն է տարածել, որն ամբողջությամբ ներկայացնում ենք ստորև․ «Առավոտյան ժամը 5.00-ի սահմաններում Ռուսաստանի Դաշնության և Բելառուսի Հանրապետության հետ Ուկրաինայի պետական սահմանը հարձակման է ենթարկվել ռուսական զորքերի կողմից՝ Բելառուսի աջակցությամբ: Սահմանապահ ստորաբաժանումների, սահմանապահ պարեկների և անցակետերի վրա հարձակումներն իրականացվում են հրետանու, ծանր տեխնիկայի և հրետանային զինատեսակների կիրառմամբ։ Դեպքերը տեղի են ունենում Լուգանսկի, Սումիի, Խարկովի, Չեռնիգովի և Ժիտոմիրի մարզերում։ Բացի այդ, հարձակումը տեղի է ունենում նաև Ղրիմի Ինքնավար Հանրապետությունից։Արձանագրվում է նաեւ հակառակորդի դիվերսիոն-հետախուզական խմբերի աշխատանքը։ Կախված սահմանին տիրող իրավիճակից՝ սահմանապահները Ուկրաինայի զինված ուժերի և Ուկրաինայի ազգային գվարդիայի հետ միասին կրակում են հակառակորդի ուղղությամբ։ Սահմանապահների շրջանում վիրավորների մասին տեղեկությունները ճշտվում են»։

09:48 - 24 փետրվարի, 2022

Որոշվում է Եվրոպայի և աշխարհի ապագան․ Ուկրաինայի ԱԳ նախարարը հինգ հիմնական գործողություններ է նշել

Աշխարհը պետք է անհապաղ գործի. որոշվում է Եվրոպայի և աշխարհի ապագան։ Այս մասին իր թվիթերյան էջում գրել է Ուկրաինայի ԱԳ նախարար Դմիտրի Կուլեբան՝ նշելով, ըստ նրա, հինգ գլխավոր գործողություններ. 1. Ռուսաստանի դեմ կործանարար պատժամիջոցներ անմիջապես, Ռուսաստանի անջատում SWIFT-ից2. Ռուսաստանի լիակատար մեկուսացում բոլոր ֆորմատներով3. Զենք և տեխնիկա Ուկրաինայի համար4. Ֆինանսական աջակցություն5. Մարդասիրական օգնություն Նշենք, որ այսօր վաղ առավոտյան ՌԴ նախագահ Վլադիմիր Պուտինը հայտնել է, որ Դաշնային խորհրդի թույլտվությամբ որոշել է իրականացնել հատուկ ռազմական գործողություն։ Այս պահին, ըստ Ուկրաինայի ԱԳ նախարարի, հարձակումներ են Ուկրաինայի քաղաքների վրա։ Զելենսկին հայտարարել է, որ Ուկրաինայի ողջ տարածքում մտցվում է ռազմական դրություն։

09:32 - 24 փետրվարի, 2022

Զելենսկին Ուկրաինայի տարածքում ռազմական դրություն է հայտարարել |armenpress.am|

armenpress.am: Ուկրաինայի նախագահ Վլադիմիր Զելենսկին ռազմական դրություն է հայտարարել երկրի ողջ տարածքում: Այս մասին նա հայտնել է «Տելեգրամ»-ի իր ալիքում տեղադրված տեղանյութում: «Մենք ռազմական դրություն ենք մտցնում երկրի ողջ տարածքում»,- հայտարարել է նա: Զելենսկին հայտնել է, որ Ուկրաինայի անվտանգության ու պաշտպանական համակարգերը աշխատում են: «Խուճապի մի մատնվեք, մենք ուժեղ ենք, մենք կհաղթենք»,- դիմելով քաղաքացիներին՝ ասել է Զելենսկին: Նա տեղեկացրել է, որ արդեն խոսել է ԱՄՆ նախագահ Ջո Բայդենի հետ և ամերիկյան կողմն արդեն միջազգային օգնություն է նախապատրաստում Ուկրաինայի համար: Փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հանդես էր եկել նոր ուղերձով՝ հայտնելով՝ Դոնբասում հատուկ ռազմական օպերացիա սկսելու որոշման մասին։ «Հանգամանքները մեզնից պահանջում են վճռական ու անյհապաղ գործողություններ: Դոնբասի ժողովրդական հանրապետությունները խնդրանքով դիմել են Ռուսաստանին: Դրա հետ կապված որոշում եմ ընդունել հատուկ ռազմական գործողություն իրականացնել»,- հայտարարել է Պուտինը ՌԴ քաղաքացիներին ուղղված հեռուստաուղերձում: Նա հավելել է, որ Ռուսաստանի պլանների մեջ չի մտնում Ուկրաինայի օկուպացումը, սակայն Ռուսաստանը կձգտի հասնել Ուկրաինայի ապառազմականացմանը։

09:12 - 24 փետրվարի, 2022

Պուտինն ընտրել է կանխամտածված պատերազմը, որը կբերի մարդկային աղետալի կորուստների և տառապանքների․ Բայդեն

ԱՄՆ նախագահ Ջո Բայդենը հանդես է եկել հայտարարությամբ․ «ԱՄՆ-ն և նրա դաշնակիցները միասնական և վճռական կերպով կպատասխանեն Ուկրաինայի վրա ռուսական ռազմական ուժերի չարդարացված հարձակմանը։ Նախագահ Պուտինն ընտրել է կանխամտածված պատերազմը, որը կբերի մարդկային աղետալի կորուստների և տառապանքների։ Միայն ՌԴ-ն է պատասխանատվություն կրում այս հարձակման հետևանքով մահերի և ավերածությունների համար: Աշխարհը պատասխանատվության կենթարկի Ռուսաստանին»,-նշել է Բայդենը։ Ինչպես հայտնում են Սպիտակ տնից, Բայդենը շուտով այս մասին կխոսի առավել մանրամասն։

08:47 - 24 փետրվարի, 2022

Հարձակումները խաղաղ ուկրաինական քաղաքների վրա շարունակվում են․ Ուկրաինայի ԱԳ նախարար

Ուկրաինայի ԱԳ նախարար Դմիտրի Կուլեբան Twitter-ի էջում գրառում է կատարել՝ նշելով, որ ՌԴ հարձակումները խաղաղ ուկրաինական քաղաքների վրա շարունակվում են: «Պուտինը պատերազմ է սանձազերծել Ուկրաինայի դեմ: Հարձակումները խաղաղ ուկրաինական քաղաքների վրա շարունակվում են: Սա նվաճողական պատերազմ է: Ուկրաինան կպաշտպանի իրեն և կհաղթի: Աշխարհը կարող է և պետք է կանգնեցնի Պուտինին: Գործելու ժամանակն է»,-նշել է նա։ Ուկրայինայի օդային տրանսպորտի պետական ծառայությունն էլ հայտնել է, որ Ուկրաինան փակում է օդային տարածքը։

08:38 - 24 փետրվարի, 2022

Պուտինը Դոնբասում հատուկ ռազմական օպերացիա անցկացնելու որոշում է ընդունել |armenpress.am|

armenpress.am: ՌԴ նախագահ Վլադիմիր Պուտինը հայտարարել է Դոնբասում հատուկ ռազմական օպերացիա սկսելու որոշման մասին։ Այս մասին հայտնում է «ՌԻԱ նովոստի»-ն։ Նա հայտնել է, որ Դոնբասի ազգային հանրապետությունները օգնության խնդրանքով դիմել են։ Դրա հետ կապված՝ ես որոշում եմ ընդունել հատուկ ռազմական օպերացիա անցկացնելու մասին»,- ասել է Պուտինը։ Նա հավելել է, որ Ռուսաստանի պլանների մեջ չի մտնում Ուկրաինայի օկուպացումը, սակայն Ռուսաստանը կձգտի հասնել Ուկրաինայի ապառազմականացմանը։

08:37 - 24 փետրվարի, 2022

Ուկրաինայի հարցով փետրվարի 24-ին ԵՄ արտակարգ նիստ կգումարվի |armenpress.am|

armenpress.am: Եվրամիության անդամ երկրների ու կառավարության ղեկավարները փետրվարի 24-ին արտահերթ գագաթնաժողով կգումարեն՝ կապված Ռուսաստանի կողմից Դոնեցկի և Լուգանսկի ժողովրդական հանրապետությունները ճանաչելու հետ: Այս մասին ասվում է Եվրախորհրդի նախագահ Շառլ Միշելի՝ ԵՄ անդամ 27 երկրների ղեկավարներին ուղղված նամակում: «Ռուսաստանի Դաշնության ագրեսիվ գործողությունները խախտում են միջազգային իրավունքը, Ուկրաինայի տարածքային ամբողջականությունն ու ինքնիշխանությունը: Դրանք նաև խաթարում են եվրոպական անվտանգությունը:Կարևոր է, որ մենք նախկինի պես լինենք միասնական ու վճռական և համատեղ հստակեցնենք մեր հավաքական մոտեցումն ու գործողությունները: Այդ իսկ պատճառով ցանկանում եմ ձեզ հրավիրել փետրվարի 24-ին Բրյուսելում կայանալիք Եվրախորհրդի հատուկ նիստին»,- ասվում է նամակում:

21:10 - 23 փետրվարի, 2022

ՌԴ դեսպանությունը հայտնել է Կանադայի պատժամիջոցներին պատասխանելու մասին |armenpress.am|

armenpress.am: Ռուսաստանը կպատասխանի պատժամիջոցներին, որոնք Կանադան հայտարարել է՝ կապված ՌԴ կողմից Լուգանսկի ու Դոնեցկի ժողովրդական հանրապետությունների ճանաչման հետ: Այս մասին հայտարարություն է արել Օտտավայում ՌԴ դեսպանությունը: «ՌԴ դեմ միակողմանի պատժամիջոցները, որոնք մտցրել է Կանադայի կառավարությունը, անօրինական են: Հետևելով փոխադարձության սկզբունքին՝ Ռուսաստանը կպատասխանի այս ոչ բարեկամական քայլին»,- ասվում է դեսպանության «Թվիթեր»-ի էջում արված հրապարակման մեջ:

20:47 - 23 փետրվարի, 2022

Էրդողանը Պուտինին հայտնել է, որ չի ընդունում Ռուսաստանի կողմից Դոնեցկի և Լուգանսկի ճանաչումը |armenpress.am|

armenpress.am: Ռուսաստանի Դաշնության նախագահ Վլադիմիր Պուտինը և Թուրքիայի նախագահ Ռեջեփ Թայիփ Էրդողանը հեռախոսազրույց են ունեցել՝ քննարկելով Ուկրաինայի շուրջ ստեղծված իրավիճակը: Կրեմլից հայտնել են, որ կողմերը փոխանակվել են Ռուսաստանի կողմից Դոնեցկի և Լուգանսկի Ժողովրդական Հանրապետությունների ճանաչմամբ պայմանավորված իրավիճակի շուրջ գնահատականներով: «Վլադիմիր Պուտինն ընդգծել է նման որոշում կայացնելու օբյեկտիվ անհրաժեշտությունը՝ Դոնբասում ուկրաինական իշխանությունների ագրեսիայի և Մինսկի համաձայնագրի պայմանները կատարելուց հրաժարվելու պայմաններում»,- ասվում է Կրեմլի տարածած հաղորդագրության մեջ: Թուրքիայի նախագահականից հայտնել են, որ հեռախոսազրույցի ընթացքում Էրդողանը Պուտինին հայտնել է, որ Անկարան չի ճանաչում Ռուսաստանի որոշումը՝ ճանաչելու երկու հանրապետությունները: «Նախագահ Էրդողանը նշել է, որ Թուրքիան չի ճանաչում քայլերը, որոնք հակասում են Ուկրաինայի ինքնիշխանությանն ու տարածքային ամբողջականությանը: Նա ընդգծել է, որ դա սկզբունքային դիրքորոշում է, իսկ արդյունքների պետք է հասնել Մինսկի համաձայնագրերի հիման վրա: Նախագահ Էրդողանն ընդգծել է, որ իրադրության լարումը, մասնավորապես ռազմական հակամարտությունը ոչ մեկին օգուտ չի տա»,- հայտնել են Թուրքիայի նախագահի լրատվական ծառայությունից: Էրդողանը տեղեկացրել է, որ առաջիկայում ակնկալում է Պուտինի այցը Թուրքիա: Կողմերը պայմանավորվել են շարունակելու շփումները տարբեր ձևաչափերով:

20:20 - 23 փետրվարի, 2022

Էրդողանն ու Ալիևը քննարկել են Հայաստանի հետ հարաբերություններն ու ռուս-ուկրաինական ճգնաժամը |factor.am|

factor.am: Թուրքիայի և Ադրբեջանի նախագահներ Ռեջեփ Թայիփ Էրդողանը և Իլհամ Ալիևը չորեքշաբթի հեռախոսազրույց են ունեցել, որի ընթացքում, մասնավորապես, քննարկվել է «Ռուսաստանի և Ուկրաինայի միջև ճգնաժամը», գրում է ՏԱՍՍ-ը։ «Բանակցությունների ընթացքում քննարկվել են Թուրքիայի և Ադրբեջանի միջև համագործակցության ամրապնդման հարցերը, ինչպես նաև տարածաշրջանային խնդիրները, հատկապես Հայաստանի հետ հարաբերությունները, ինչպես նաև ռուս-ուկրաինական ճգնաժամը»,- լրագրողներին հայտնել են Էրդողանի գրասենյակից։

18:50 - 23 փետրվարի, 2022

Ուկրաինան շնորհակալ է և դրական է գնահատում Հայաստանի դիրքորոշումը՝ Դոնեցկի ու Լուգանսկի ճանաչման վերաբերյալ |civilnet.am|

civilnet.am: Հայաստանում Ուկրաինայի գործերի ժամանակավոր հավատարմատար Դենիս Ավտոնոմովը կարծում է, որ Ռուսաստանի կողմից Դոնեցկի ու Լուգանսկի ինքնահռչակ հանրապետությունների ճանաչումը «ոչինչ չարժե»։ Այդ մասին նա հայտարարեց փետրվարի 23-ին Հայաստանում Ուկրաինայի դեսպանությունում մամուլի ասուլիսի ժամանակ։ «Նրանց ճանաչումը ոչ մի արժեք չունի, նրանք կարող են ամեն ինչ ճանաչել»,- նշեց դիվանագետը։ Նա հիշեցրեց, որ շուրջ ութ տարի Ուկրաինան պատերազմում է Ռուսաստանի դեմ։ Անդրադառնալով շփման գծում տիրող իրավիճակին՝ Ավտոնոմովը հայտնեց, որ այն շարունակում է բարդ մնալ. «Շարունակվում են կրակոցները՝ Դոնբասի օկուպացիոն ուժերի կողմից։ Գրեթե ամեն օր մենք կորուստներ ունենք՝ զոհեր ու վիրավորներ»,- նշեց նա։ Ավտոնոմովի կարծիքով՝ Ռուսաստանի նախագահ Վլադիմիր Պուտինը միանձնյա է որոշումներ կայացնում. «Ուկրաինայի հետ կապված, ես միգուցե շատ մեծ ռիսկի եմ գնում այս բառերն ասելու համար, քանի որ հետագայում դրանք կարող են կոնտեքստից կտրվել ինչ-որ մեկի կողմից, նա (նկատի ունի Վլադիմիր Պուտինին – խմբ.) Գերմանիայի Ժողովրդավարական Հանրապետությունում է աշխատել ԿԳԲ-ի ղեկավարությամբ, կարծում եմ, որ նա շատ լավ ծանոթ է Ադոլֆ Հիտլերի «Իմ պայքարը» աշխատանքին, որի հիմնական ուղերձներից մեկն այն է, որ Ավստրիան հանրապետություն չէ, ու ազգը չի կարող բաժանվել, այսինքն՝ պարզապես կրկնություն է տեղի ունենում՝ «Ուկրաինան պետություն չէ, ազգը չի կարող բաժանվել»»,- նշեց դիվանագետը՝ հավելելով, որ Պուտինը փորձում է գնալ Հիտլերի ճանապարհով։ «Նա փորձում է կտորներ պոկել այնտեղ, որտեղ հնարավոր է, իսկ հետո սկսում է մեծ պատերազմ»,- նշեց դիվանագետը։ Ավտոնոմովը նաև գոհունակություն հայտնեց Հայաստանի դիրքորոշման համար՝ Դոնեցկի ու Լուգանսկի ճանաչման վերաբերյալ. «Մենք շատ շնորհակալ ենք Հայաստանին, և շատ դրական ենք գնահատում Հայաստանի դիրքորոշումը»։ Անդրադառնալով հարցին, թե ինչու Ուկրաինան չգնաց դիվանագիտական կապերի խզման Ռուսաստանի հետ, երբ 2014-ին Ղրիմը միացվեց այդ պետությանը, Ավտոնոմովը պատասխանեց, որ առ այսօր ՌԴ-ում բնակվում են բազմաթիվ ուկրաինացիներ, ու դիվանագիտական ծառայությունն այնտեղ է՝ նրանց աջակցելու համար։ Նա նաև հիշեցրեց, որ նախկինում ևս քննակվել է այդ հարցը։

18:16 - 23 փետրվարի, 2022

Ուկրաինայում արտակարգ դրություն է մտցվում |factor.am|

factor.am: Ուկրաինայում արտակարգ դրություն է մտցվում: Փետրվարի 23-ին Անվտանգության խորհրդի նիստից հետո այս մասին հայտարարել է երկրի Ազգային անվտանգության և պաշտպանության խորհրդի ղեկավար Ալեքսի Դանիլովը, գրում է korrespondent-ը։ Նա պարզաբանել է, որ արտակարգ դրություն է մտցվում բոլոր շրջաններում՝ բացառությամբ Դոնեցկի և Լուգանսկի շրջանների, քանի որ այդ ռեժիմն այնտեղ գործում է 2014 թվականից։ «Արտակարգ դրությունը գործնականում արմատական ազդեցություն չի ունենա մեր կյանքի վրա, իրավիճակը կմշակվի հնարավորինս ճիշտ»,- ասել է Դանիլովը։ Նա նաև թվարկել է արտակարգ միջոցառումները․ հասարակական կարգի պահպանության ուժեղացում, տրանսպորտի տեղաշարժի սահմանափակում և դրա ստուգում, քաղաքացիների փաստաթղթերի ստուգում։ Դանիլովի խոսքով՝ արտակարգ դրությունը կփոխվի՝ կախված որոշակի տարածքներից։ Ռուսաստանի և Բելառուսի հետ սահմանին կսահմանվի արտակարգ դրության խստացում։ Պաշտոնյան հայտնել է նաև, որ ռազմական դրություն մտցնելու մասին որոշումը դեռ չի կայացվել, զորահավաքի մասին որոշում նույնպես դեռ չկա։ Արտակարգ դրությունը նախատեսվում է մտցնել 30 օրով, որը կարող է երկարացվել մինչև 60 օր։

16:16 - 23 փետրվարի, 2022