Զարուհի Բաթոյան

8-րդ գումարման Ազգային ժողովի «Քաղաքացիական պայմանագիր» խմբակցության պատգամավոր։

Աշխատանքի եւ սոցիալական հարցերի նախկին նախարար, «Քաղաքացիական պայմանագիր» կուսակցության անդամ։

Ծնվել է 1979թ. սեպտեմբերի 29-ին Երեւանում:

2008թ. ավարտել է ԵՊՀ ժուռնալիստիկայի ֆակուլտետի մագիստրատուրան:

2012թ.՝ «Mobility International USA» կազմակերպության «Կանանց առաջնորդության եւ հաշմանդամության ինստիտուտը (WILD)» (Օրեգոն, ԱՄՆ):

1999-2017թթ.՝ աշխատել է «Հույսի կամուրջ» հաշմանդամություն ունեցող երեխաների եւ երիտասարդների իրավունքների պաշտպանության հասարակական կազմակերպության «Արեւածաղիկ» մանկապատանեկան ամսաթերթի գլխավոր խմբագիր եւ հաշմանդամություն ունեցող անձանց շահերի պաշտպանության պատասխանատու: 2012-2018թթ.՝ «Զարտպրինտ»ՍՊԸ տնօրեն: Որպես հաշմանդամություն ունեցող անձանց իրավունքների հարցերով փորձագետ՝ համագործակցել է ՄԱԿ-ի զարգացման ծրագրի, «Հայկական կարիտաս» բարեսիրական հասարակական կազմակերպության, «Առաքելություն Արեւելք» դանիական մարդասիրական կազմակերպության հայաստանյան մասնաճյուղի, «ՕՔՍՖԱՄ» բրիտանական կազմակերպության հայաստանյան մասնաճյուղի եւ այլ կազմակերպությունների հետ: 2018-2019թթ. եղել է ՀՀ աշխատանքի եւ սոցիալական հարցերի նախարարի տեղակալ:

2019-2020թթ.՝ ՀՀ աշխատանքի եւ սոցիալական հարցերի նախարար:

2014-2018թթ. եղել է «Դիսըբիլիթի ինֆո» տեղեկատվական հասարակական կազմակերպության նախագահ: 2013-2017թթ.՝ «Հաշմանդամություն ունեցող անձանց շահերի պաշտպանության ազգային դաշինք» իրավաբանական անձանց միության նախագահ: 2017-2018թթ.՝ Երեւանի ավագանու «Ելք» խմբակցության անդամ:

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

Տանը կամ նախարարության իմ սենյակում սայլակ չեմ օգտագործում. Զարուհի Բաթոյան

Աշխատանքի և սոցիալական հարցերի նախարար Զարուհի Բաթոյանը ֆեյսբուքյան իր էջում գրել է.«Մարինա Խաչատրյանից տեղեկություն ստանալու հարցում եմ ստացել։ Որոշեցի հրապարակային պատասխանել իմ նախկին գործընկերոջը Տիկին Խաչատրյան,քայլելուս մասին հարցը դուք կարող էիք ինձ ուղղել այն ժամանակ, երբ ձեզ հետ մասնակցեցի նախընտրական ասուլիսին՝ դեռևս 2017 թվականին։ Այդ ժամանակ ես առանց սայլակի էի, ձեր կողքի աթոռին էի նստել, եթե հիշում եք։ Թեև արդեն պարզ է, որ այդ ժամանակ որևէ լուրջ դրդապատճառ չունեիք այդ հարցով հետաքրքրվելու համար, թեև Երևանի ավագանու նիստերին ինձ արդեն տեսնում էիք սայլակով տեղաշարժվելիս։Ամեն դեպքում ինձ դժվար չէ հիմա պատասխանել ձեզ այդքան հուզող հարցերին: Սայլակը և աջակցող մյուս սարքերը տեղաշարժման միջոց են, որոնք մարդը կարող է օգտագործել անընդհատ կամ որոշակի միջավայրում՝ ըստ անհրաժեշտության։ Տանը կամ նախարարության իմ սենյակում սայլակ չեմ օգտագործում, որովհետև ապահով միջավայրում կարողանում եմ տեղաշարժվել քայլելով։Ես 2012-ին մեկ տարվա ընթացքում երկու անգամ հասցրել էի կոտրել ոտքս և բարդ վիրահատություն տանել։ Կոտրվածքները ստացել էի վայր ընկնելու հետևանքով, որովհետև մանկուց մկանային ատրոֆիա ունեմ։ Դրանից հետո մասնագետները խորհուրդ տվեցին դրսում տեղաշարժվել սայլակով, որովհետև ամեն անգամ անզգույշ հարվածից կամ շարժումից վնասվելը կարող է ճակատագրական լինել։ Ասեմ ավելին, իմ վիճակը չի լավացել, հակառակը՝ վատացել է և գնալով վատանալու է, բայց դա չի նշանակում, որ իմ կարողությունները սահմանափակ են, որովհետև մարդկանց կարողությունների սահմանը ամեն օր կարելի է բացահայտել։Ոչ մի բուժում ու բուժական միջոցառում չեմ ստանում, որովհետև իմ առողջական խնդիրը բուժման ենթակա չէ։ Բայց խնդրում եմ, ինձ համար չանհանգստանալ, որովհետև ազատությունը, երջանկությունը և լիարժեքության զգացումը պայմանավորված չեն միայն դրանով։ Ասեմ ավելին, դա ինձ չի խանգարում, որ սիրեմ մարդկանց ու ներողամիտ լինեմ։Եվ որ ամենակարևորն է, պատրաստ եմ միշտ ոգեշնչելու, օգնելու և խրախուսել բոլոր նրանց, ովքեր որևէ դժվարություն կամ առողջական խնդիր ունեն։ Լավ եղեք և շարունակեք ուրախանալ ինձ համար»:

06:27 - 04 հունիսի, 2019

Հայտարարություն`Զ․ Բաթոյանի նկատմամբ խտրականության և ատելության խոսքի տարածման վերաբերյալ

Ներքոստորագրյալ կազմակերպությունները խիստ մտահոգված են վերջին շրջանում որոշ խմբերի և անհատների կողմից ՀՀ աշխատանքի և սոցիալական հարցերի նախարար Զարուհի Բաթոյանի նկատմամբ իրականացվող շարունակական և նպատակաուղղված թիրախավորմամբ և դատապարտում են հաշմանդամության և սեռի հիմքով խտրականության և ատելության հրահրումը:Աշխատանքի և սոցիալական հարցերի նախարարության ղեկավարի հանրային և անձնական գործունեությունից, խոսքից և մոտեցումներից առանձնացվում են երեխաների սեռական կրթության, հաշմանդամություն ունեցող անձանց անձնական կյանքի իրավունքի, հասարակության կրթության և առողջ հարաբերությունների վերաբերյալ արտահայտությունները և խեղաթյուրվում՝ արժեզրկող և մարդկային արժանապատվությունը նվաստացնող ոճով։ Զարուհի Բաթոյանի հանդեպ խտրականացնող և վտանգավոր խոսքի դրսևորումներն ուղեկցվում են անգամ վերջինիս հաշմանդամություն ունենալու փաստը կասկածի տակ դնելով, ինչը վկայում է սայլակով տեղաշարժվող անձանց տարբեր աստիճանի շարժունակություն ունենալու մասին պարզ գիտելիքների բացակայության կամ միտումնավոր անտեսման և վարկաբեկման մասին:Կնատյաց և սեռականացված բառապաշարով Տիկին Բաթոյանի թիրախավորումը վկայում է մեր երկրում սեռով և հաշմանդամությամբ պայմանավորված խտրականության խորը արմատավորված խնդրի և խտրականության դեմ ուղղած գործողությունների անբավարար մակարդակի մասին: Սակայն հարկ է նշել, որ այս և նմանատիպ ատելության քարոզարշավները որպես շղարշ են օգտագործվում քաղաքական նպատակների իրագործման համար: Այսպիսի քաղաքականությունը մերժելի է Հայաստանում և անընդունելի է ժողովրդավարական հասարակության մեջ, իսկ անձի արժանապատվությունը նվաստացնող և բարի համբավը արատավորող խոսքը պատժելի է օրենքով: Այս արշավը ուղղորդող խմբերի կողմից նման շեշտադրումների շահարկումն ինքնին վկայում է տիկին Բաթոյանի կողմից բարձրաձայնվող հարցերի վերաբերյալ հասարակության իրազեկման և կրթության կարիքի մասին։Ներքոստորագրյալներս մեր զորակցությունն ենք հայտնում Զարուհի Բաթոյանին և հաստատում մեր աջակցությունը Հայաստանում սոցիալական և աշխատանքային իրավունքների, հակախտրական պետական քաղաքականության և ներառական զարգացմանն ուղղված քայլերի իրագործման գործում:«Ագաթ» հաշմանդամություն ունեցող կանանց իրավունքների պաշտպանության կենտրոն ՀԿ«Աստղացոլք» ՀԿ«Զարգացման նախաձեռնություններ» սոցիալ-տնտեսական ՀԿԸնդդեմ կանանց նկատմամբ բռնության կոալիցիա«Իրական աշխարհ, իրական մարդիկ» ՀԿ«Իրավական նախաձեռնությունների կենտրոն» ՀԿ«Լիարժեք կյանք» ՀԿ«Լռության ձայն» ՀԿԽտրականության դեմ պայքարի և հանուն հավասարության կոալիցիա«Կանանց աջակցման կենտրոն» ՀԿ«Կանանց իրավունքների տուն» ՀԿ«Կանանց ռեսուրսային կենտրոն» ՀԿ«Հայկական ճամբար» ՀԿ«Հասարակություն առանց բռնության» ՀԿ«Հավասար իրավունքներ, հավասար հնարավորություններ» ՀԿՀելսինկյան քաղաքացիական ասամբլեայի Վանաձորի գրասենյակՄարդու իրավունքների տուն Երևան«Մարդու իրավունքների հետազոտությունների կենտրոն» ՀԿ«Մենք կարող ենք» ՀԿ«Նոր Սերունդ» մարդասիրական ՀԿ«Սեռական բռնության ճգնաժամային կենտրոն» ՀԿ«Սկարպ» ՀԿ«Փինք» իրավապաշտպան ՀԿՀայտարարությունը բաց է միանալու համար:

06:30 - 03 հունիսի, 2019

Հյուսիսային պողոտայում մանկատան սաների համար կազմակերպված դրամահավաքը խարդախություն է. նախարարությունը զգոնության կոչ է անում

ՀՀ աշխատանքի և սոցիալական հարցերի նախարարությունը հայտարարում է, որ պետության հոգածության տակ գտնվող հաստատությունների՝ մանկատների, ցերեկային կամ գիշերային խնամքի կենտրոնների և նախարարաության ենթակայության տակ գործող որևէ ՊՈԱԿ-ի կողմից դրամահավաք չի իրականացվել՝ ո՛չ համացանցում, ո՛չ փողոցներում: Այս մասին հայտարարություն է տարածել ՀՀ աշխատանքի և սոցիալական հարցերի նախարարության հասարակայնության հետ կապերի բաժինը:«Արձագանքելով մամուլում շրջանառվող լուրերին այն մասին, թե Գավառի մանկատան սաներին աջակցելու պատրվակով օրերս Հյուսիսային պողոտայում դրամահավաք է իրականացվել, հարկ ենք համարում պաշտոնապես հայտարարել, որ Աշխատանքի և սոցիալական հարցերի նախարարության ենթակայության տակ գործող որևէ ՊՈԱԿ-ի անունից կազմակերպվող դրամահավաքի նախաձեռնողները զբաղվում են խարդախությամբ՝ շահարկելով մանկատան սաների անունը:Հյուսիսային պողոտայում տեղի ունեցած դրամահավաքի առնչությամբ ՀՀ ոստիկանությունը տեղեկացրել է, որ մայիսի 27-ին` ժամը 22.00-ին, ոստիկանության աշխատակիցները Հյուսիսային պողոտայից ապօրինի համերգ կազմակերպելու համար բաժին են ներկայացրել մի քաղաքացու, որը նշված վայրում կազմակերպված համերգի հասույթը մանկատան երեխաներին հատկացնելու պատրվակով հավաքելուց հետո, խարդախությամբ տիրացել է գումարին: Այժմ հետաքննություն է ընթանում: Կոչ ենք անում քաղաքացիներին զգոն լինել և չտրվել խաբեության, իսկ նման նախաձեռնությունների մասին անմիջապես տեղյակ պահել ՀՀ աշխատանքի և սոցիալական հարցերի նախարարությանը՝ 114 թեժ գծի միջոցով, կամ ՀՀ ոստիկանությանը՝ 1-02 հեռախոսահամարով»,- ասված է հայտարարության մեջ:

07:24 - 30 մայիսի, 2019

Ընտանեկան բռնության կանխարգելման հարցում կառավարությունը լինելու է ոչ թե արձագանքող, այլ նախաձեռնող. Զարուհի Բաթոյան |tert.am|

tert.am։ Ընտանեկան բռնության կանխարգելման, բռնության ենթարկված անձանց աջակցության ուղղությամբ իրականացվող գործողություններում կառավարությունը ոչ թե արձագանքող, այլ նախաձեռնող է լինելու: Այս մասին այսօր՝ մայիսի 27-ին, «Ընտանեկան բռնությունը Հայաստանում. մարտահրավերներ և հնարավորություններ» խորագրով համաժողովին հայտարարեց ՀՀ աշխատանքի և սոցիալական հարցերի նախարար Զարուհի Բաթոյանը: «Կարծում եմ՝ բավականին շատ անելիք կա Հայաստանում ընտանեկան բռնության կանխարգելման, բռնության ենթարկված անձանց աջակցության և խնդիրների լուծման ուղղությամբ: Այս իմաստով շատ կարևոր է բոլոր գործընկերների համագործակցությունը, առաջին հերթին միջգերատեսչական համագործակցությունն եմ կարևորում, որովհետև սա միայն մեկ կառույցի խնդիր չէ: Չկա այնպիսի երկիր, նույնիսկ եվրոպական զարգացած երկրներում, չկա այնպիսի հասարակություն, որտեղ նման խնդիր չլինի: Ընտանեկան բռնությունը խնդիր է բոլոր հասարակությունների համար: Պետությունը չի կարող աչք փակել և անտեսել այս խնդիրը»,- նշեց նախարարը:Զարուհի Բաթոյանը նաև կարևորում է պետական աջակցության ծավալների մեծացումը՝ բռնության ենթարկված անձանց աջակցության տրամադրման, ինչպես նաև կանխարգելման ծրագրերի իրականացման առումով: Ըստ նրա՝ այսօր ՀՀ-ում ընտանեկան բռնության կանխարգելման հարցում դրական տեղաշարժ կա՝ հանրային իրազեկվածության բարձրացման և հավասարության գիտակցության առումով. «Հանրային կրթությունը, հանրային իրազեկությունը կարևոր է, մենք պետք է ավելի շատ խոսենք մեր քաղաքացիների հետ, որպեսզի կարողանանք ճանապարհներ գտնել բռնությունը վերացնելու, անհատ քաղաքացիների երջանկությունն ապահովելու, ընտանեկան համերաշխությունն ապահովելու նպատակով»:Ավելին՝ tert.am

08:07 - 27 մայիսի, 2019

Ոստիկանությունը պետք է ցուցաբերի առանձնակի զգոնություն` բացառելու որևէ խտրականություն Հաշմանդամություն ունեցող անձանց իրավունքներն իրացնելիս. Զարուհի Բաթոյան

Հայաստանի «Խուլերի միավորում» հասարակական կազմակերպությունը անկախ հասարակական միավորում է, և որևէ պետական մարմինի, այդ թվում` ԱՍՀՆ ենթակայությամբ չի գործում։ Այս մասին Ֆեյսբուքի իր էջում գրել է Աշխատանքի և Սոցիալական հարցերի նախարար Զարուհի Բաթոյանը։ «Ես որպես նախարարի տեղակալ 2018-ին հանդիպել եմ վիճող կողմերի հետ, որոնք բարձրացնում էին ՀԿ ղեկավարի լեգիտիմության և միավորման շենքի տնօրինման հարցը, հայտնել եմ մեր պատրաստակամությունը իրավական հարցերում խորհրդատվական աջակցություն տրամադրելու հարցում։ Ինչ վերաբերում է այսօրվա միջադեպին, ապա հիշեցնեմ, որ հաշմանդամություն ունեցող անձինք, ինչպես ՀՀ բոլոր քաղաքացիները իրավունք ունեն բողոքներ, ակցիաներ և անհնազանդության գործողություններ իրականացնել Հայաստանում։ Ուստի կոչ եմ անում ՀՀ ոստիկանությանը միջոցներ ձեռնարկել ապահովելու համար հաշմանդամություն ունեցող անձանց` մյուսների հետ հավասար հիմունքներով մարդու իրավունքներից և հիմնարար ազատություններից օգտվելն ու դրանց կիրառումը: Լսողության խնդիր ունեցող քաղաքացիները, այդ թվում` բերման ենթարկված անձինք պետք է ունենան անհրաժեշտ պայմաններ իրենց իրավունքները պաշտպանելու համար, իսկ ՀՀ ոստիկանությունը պարտավոր է ապահովել հայերեն ժեստերի լեզվի թարգմանություն խուլ քաղաքացիների հետ հաղորդակցվելու համար։ Ոստիկանությունը պետք է ցուցաբերի առանձնակի զգոնություն` բացառելու որևէ խտրականություն Հաշմանդամություն ունեցող անձանց իրավունքների մասին կոնվենցիայով սահմանված իրավունքներն իրացնելիս: Մտահոգություններս փոխանցել եմ նաև Ոստիկանության պետ պարոն Օսիպյանի հետ հեռախոսազրույցի ընթացքում»,-գրել է Բաթոյանը։ Հիշեցնենք, որ ավելի վաղ միջադեպ էր տեղի ունեցել «Խուլ ու համրերի» միավորում հասարակական կազմակերպության դիմաց։

15:19 - 21 մայիսի, 2019