Մևլութ Չավուշօղլու

Թուրքիայի և Ադրբեջանի արտգործնախարարները հեռախոսազրույց են անցկացրել |armenpress.am|

armenpress.am: Թուրքիայի արտգործնախարար Մևլութ Չավուշօղլուն և Ադրբեջանի արտգործնախարար Ջեյհուն Բայրամովը հեռախոսազրույց են անցկացրել: Այս մասին հայտնում է Թուրքիայի ԱԳՆ-ն: Հաղորդագրության համաձայն՝ զրույցի ընթացքում քննարկվել են երկկողմ հարաբերությունները և «Թյուրքական պետությունների կազմակերպության» շրջանակներում համագործակցության հետ կապված հարցեր։

16:04 - 11 հունվարի, 2023

Չավուշօղլուն հայտնել է Թուրքիայի և Սիրիայի ԱԳ նախարարների միջև բանակցությունների նախապատրաստման մասին |armenpress.am|

armenpress.am: Թուրքիայի արտաքին գործերի նախարար Մևլութ Չավուշօղլուն հայտնել է, որ Անկարան աշխատում է Մոսկվայի հետ Անկարայի և Դամասկոսի արտգործնախարարների միջև ծրագրված բանակցությունների ամսաթվի շուրջ։ Այս մասին հայտնում է թուրքական Sabah թերթը: «Ռուսաստանն առաջարկեց արտգործնախարարների հանդիպման ժամկետ, բայց դա մեզ հարմար չէր: Մենք աշխատում ենք ամսաթվերի նոր առաջարկների շուրջ։ Ես ասել եմ, որ եռակողմ հանդիպումները պետք է լավ նախապատրաստվեն, նրանք պետք է սկսեն կենտրոնանալ արդյունքների վրա: Դուք նշանակեք ամսաթիվը և որոշեք, թե ինչ քայլեր են ձեռնարկվելու մինչ այդ ամսաթիվը: Մենք կիրականացնենք նախապատրաստումը։ Հանդիպումներ կանցկացվեն փորձագետների մակարդակով»,-թերթի փոխանցմամբ՝ ասել է Չավուշօղլուն: «Անելիքներ կան հետախուզության կամ պաշտպանության նախարարների մակարդակով քննարկված հարցերը կոնկրետ քայլերի վերածելու ուղղությամբ։ Դրանք չեն լինելու մեկօրյա կամ տարբեր մակարդակներում անցկացվող մեկանգամյա հանդիպումներ: Չի կարելի ակնկալել, որ Սիրիայի վերաբերյալ բոլոր որոշումները կընդունվեն եռակողմ հանդիպման ժամանակ։ Այս ամենը քայլեր են առաջիկա ժամանակահատվածում զգայուն հարցերի շուրջ վստահության հաստատման և համագործակցության կոնկրետացման ուղղությամբ»,-հավելել է նա: Ռուսաստանի, Սիրիայի և Թուրքիայի պաշտպանության նախարարները Մոսկվայում եռակողմ բանակցություններ էին անցկացրել՝ քննարկելու սիրիական ճգնաժամի կարգավորման ուղիները: Մոսկվայում ռազմական գերատեսչությունների ղեկավարների բանակցությունները Անկարայի և Դամասկոսի միջև 11 տարվա ընթացքում առաջին պաշտոնական բանակցություններն էին:

17:54 - 03 հունվարի, 2023

Լավրովն ու Չավուշօղլուն հեռախոսազրույց են ունեցել

Դեկտեմբերի 31-ին հեռախոսազրույց է եղել ՌԴ ԱԳ նախարար Սերգեյ Լավրովի եւ Թուրքիայի ԱԳ նախարար Մեւլութ Չավուշօղլուի միջեւ։ Այս մասին հաղորդում է ՌԴ ԱԳՆ-ն։ «Նախարարները փոխանակվել են ամանորյա շնորհավորանքներով եւ քննարկել են արտաքին քաղաքական գերատեսչությունների համագործակցության ծրագրերը 2023թ․ին, այդ թվում՝ սիրիական կարգավորման վերաբերյալ քայլերի հետագա համակարգումը»,- ասված է հաղորդագրության մեջ։

20:50 - 31 դեկտեմբերի, 2022

Լաչինի միջանցքի շուրջ զարգացումները Հայաստանի համար անկեղծության փորձություն են․ Չավուշօղլու |civilnet.am|

civilnet.am: «Լաչինի միջանցքի շուրջ զարգացումները Հայաստանի համար անկեղծության փորձություն են»,- դեկտեմբերի 29-ին հայտարարել է Թուրքիայի արտաքին գործերի նախարար Մևլութ Չավուշօղլուն՝ 2022-ի ամփոփիչ մամուլի ասուլիսին: Նա նկատի ունենալով Կաշենի հանքավայրի շուրջ ստեղծված իրավիճակը՝ ասել է․ «Անընդունելի են Ադրբեջանի տարածքներում հարստությունների շահագործման աշխատանքները»: Թուրքիայի արտաքին քաղաքական գերատեսչության ղեկավարի համոզմամբ՝ իրենք Ադրբեջանի հետ սերտ համագործակցությամբ շարունակում են համապատասխանեցնել Հայաստանի հետ հարաբերությունների կարգավորման գործընթացը․ «Ադրբեջանի հետ մեր հարաբերությունները ամենաբարձր մակարդակում են»,- շեշտել է թուրք պաշտոնյան: Դեկտեմբերի 12-ից Ադրբեջանը փակել է Արցախը Հայաստանին կապող Լաչինի միջանցքը, ինչի հետևանքով շրջափակման մեջ է հայտնվել Արցախի 120 000 բնակիչ, այդ թվում՝ 30 000 երեխա։ 1100 քաղաքացիական անձ, այդ թվում՝ 270 անչափահաս, չի կարողանում Հայաստանից վերադառնալ Արցախ։ Շրջափակման պատճառով ՀՀ-ից ամեն օր 400 տոննա սննդամթերք ու դեղորայք հնարավոր չի լինում հասցնել Արցախ, ինչի հետևանքով առկա է սննդի, դեղորայքի պակաս: ԿԽՄԿ միջնորդությամբ դեկտեմբերի 25-ին միայն մեկ անգամ 10 տոննա մարդասիրական բեռ՝ մանկական և այլ սնունդ, դեղորայք է տեղափոխվել ՀՀ-ից Արցախ։ Ըստ Արցախի ԱՆ-ի՝ դեղորայքը կարող է բավարարել 10 օրվա պահանջարկը։ 350 հիվանդ չի կարողանում բուժում ստանալ ՀՀ-ում: 21 հիվանդ, այդ թվում՝ երեխաներ, վերակենդանացման բաժանմունքում են: Այս օրերի ընթացքում շտապ բուժօգնության կարիք ունեցող 5 հայ և 4 օտարերկրացի է միայն ԿԽՄԿ միջնորդությամբ տեղափոխվել ՀՀ, իսկ Արցախում ծանր վիճակում գտնվող հիվանդներից մեկը մահացել է:

16:38 - 29 դեկտեմբերի, 2022

Բլինքենն ու Չավուշօղլուն հեռախոսային բանակցություններ են անցկացրել |factor.am|

factor.am: ԱՄՆ պետքարտուղար Էնթոնի Բլինքենը հեռախոսազրույց է ունեցել Թուրքիայի ԱԳ նախարար Մևլութ Չավուշօղլուի հետ։ ԱՄՆ Պետքարտուղարության հաղորդմամբ՝ Բլինքենը շնորհակալություն է հայտնել արտգործնախարարին իր կառավարության ջանքերի համար՝ ապահովելու ՄԱԿ-ի միջնորդությամբ Սևծովյան «հացահատիկային նախաձեռնության» շարունակությունը: «Կողմերն ընդգծել են ՆԱՏՕ-ի միասնականության կարևորությունը՝ հաջակցություն Ուկրաինայի պաշտպանության ընդդեմ Ռուսաստանի չհրահրված պատերազմի։ Պետքարտուղար Բլինքենը նաև իր մտահոգությունն է հայտնել Սիրիայում իրավիճակի շուրջ»,-ասվում է հաղորդագրության մեջ։

15:54 - 23 դեկտեմբերի, 2022

Թուրքիան պատրաստ է երկխոսության Սիրիայի հետ, եթե երկրի իշխանությունները իրատեսական դիրքորոշում ցուցաբերեն. Չավուշօղլու |1lurer.am|

1lurer.am: Թուրքիայի արտգործնախարար Մևլութ Չավուշօղլուն հայտարարել է, որ Անկարան պատրաստ է երկխոսություն վարել Սիրիայի հետ, եթե Արաբական Հանրապետության իշխանությունները իրատեսական դիրքորոշում ցուցաբերեն։ «Պատրաստ ենք միասին աշխատել այնպիսի հարցերի շուրջ, ինչպիսիք են ահաբեկչության դեմ պայքարը և փախստականների վերադարձը»,- ասել է թուրք դիվանագետը։ Չավուշօղլուի խոսքով՝ Թուրքիան ներկայումս բանակցում է Սիրիայի հետ հատուկ ծառայությունների մակարդակով։ Ավելի վաղ Թուրքիայի նախագահ Ռեջեփ Թայիփ Էրդողանը հայտարարել էր նոյեմբերի 20-ին մեկնարկած օդային գործողությունից հետո Սիրիայի հյուսիսում ցամաքային գործողություն անցկացնելու մտադրության մասին։ Թուրքիայի պաշտպանության նախարարության տվյալով՝ թուրքական հարվածների հետևանքով ոչնչացվել են ահաբեկիչների հենակետեր, պահեստներ ու ապաստարաններ, հարյուրավոր զինյալներ։

13:52 - 13 դեկտեմբերի, 2022

Միրզոյան-Բայրամով-Չավուշօղլու եռակողմ հանդիպման մասին լուրերը չափազանցված են․ ԱԳՆ խոսնակը՝ ադրբեջանական լրատվամիջոցների հրապարակումների մասին

ՀՀ ԱԳՆ մամուլի քարտուղարը անդրադարձել է ադրբեջանական լրատվամիջոցների հրապարակումներին, թե ՀՀ, Ադրբեջանի և Թուրքիայի ԱԳ նախարարները ԵԱՀԿ նախարարակական գագաթաժողովի բացման արարողությունից առաջ հանդիպում են ունեցել։ «ՀՀ ԱԳ նախարար Միրզոյանի՝ Թուրքիայի և Ադրբեջանի ԱԳ նախարարների հետ «եռակողմ հանդիպումը» նույնքան կարելի է համարել քառակողմ, ինչ որ պահի հնգակողմ, այնուհետև այլ ձևաչափով եռակողմ և այսպես շարունակ։ Նկարում՝ նախքան ԵԱՀԿ նախարարակական գագաթաժողովի բացման արարողությունը Հայաստանի ԱԳ նախարարը, Ավստրիայի ԱԳ նախարարը, ԵՄ բարձր հանձնակատարը, Թուրքիայի ԱԳ նախարարը, Ադրբեջանի ԱԳ նախարարը քաղաքավարական կարճ զրույց են ունենում։ Ադրբեջանական լրատվամիջոցների հրապարակումները եռակողմ հանդիպման մասին չափազանցված են»,- ասված է Վահան Հունանյանի գրառման մեջ։

15:24 - 01 դեկտեմբերի, 2022

Ադրբեջանն ու Թուրքիան միշտ միասին են. Բայրամովը և Չավուշօղլուն քննարկել են տարածաշրջանային մի շարք հարցեր |1lurer.am|

1lurer.am: Լեհաստանում ԵԱՀԿ արտաքին գործերի նախարարների խորհրդի 29-րդ նիստի շրջանակում տեղի է ունեցել Ադրբեջանի և Թուրքիայի արտգործնախարարների հանդիպումը: Ջեյհուն Բայրամովը և Մևլութ Չավուշօղլուն քննարկել են տարածաշրջանային մի շարք հարցեր: Հանդիպումից հետո Բայրամովը Թվիթերի միկրոբլոգում գրել է, որ թուրք գործընկերոջ հետ անդրադարձել են նաև երկկողմ հետաքրքրության հարցերի: Նա ընդգծել է՝ Ադրբեջանն ու Թուրքիան միշտ միասին են՝ մեկ ազգ, երկու պետություն։ Չավուշօղլուն էլ հայտարարել է, թե ադրբեջանցի «եղբոր» հետ քննարկել են հետագա քայլերը։ «Անկարան և Բաքուն միշտ միասին են՝ ձեռք-ձեռքի տված»,- շեշտել է թուրք դիվանագետը։

12:41 - 01 դեկտեմբերի, 2022

Բայրամովն ու Չավուշօղլուն քննարկել են տարածաշրջանային հարցեր |1lurer.am|

1lurer.am: Ադրբեջանի և Թուրքիայի արտգործնախարարներ Ջեյհուն Բայրամովը և Մևլութ Չավուշօղլուն հեռախոսազրույց են ունեցել, անդրադարձել երկկողմ և տարածաշրջանային մի շարք հարցերի։ «Նախարարները քննարկել են նաև բազմակողմ հարթակներում Բաքվի, Անկարայի և թյուրքալեզու մյուս երկրների գործակցության հեռանկարները, ինչպես նաև Ադրբեջան-Թուրքիա ռազմավարական միությունը»,- ասված է Թուրքիայի ԱԳՆ հայտարարության մեջ:

12:29 - 29 նոյեմբերի, 2022

Արարատ Միրզոյանը ցավակցություն է հայտնել Թուրքիայի ԱԳ նախարարին Ստամբուլում տեղի ունեցած պայթյունի կապակցությամբ

ՀՀ ԱԳ նախարար Արարատ Միրզոյանը ցավակցություն է հայտնել Թուրքիայի ԱԳ նախարար Մևլութ Չավուշօղլուին Ստամբուլում տեղի ունեցած պայթյունի կապակցությամբ․ «Իմ անկեղծ ցավակցությունն եմ հայտնում Ստամբուլում տեղի ունեցած պայթյունի զոհերի ընտանիքներին, իսկ վիրավորներին մաղթում եմ շուտափույթ ապաքինում»,- թվիթերյան իր միկրոբլոգում գրել է ԱԳ նախարարը։ Նշենք, որ Թուրքիայի ԱԳ նախարար Մևլութ Չավուշօղլուն իր հերթին շնորհակալություն է հայտնել Արարատ Միրզոյանի ցավակցությունների համար։ Հիշեցնենք, որ հզոր պայթյուն է տեղի ունեցել Ստամբուլում՝ Իսթիքլալ փողոցում, որը զբոսաշրջային հայտնի ուղղություն է։ «Ահաբեկչության միջոցով Թուրքիային և թուրք ազգին վախեցնելու ջանքերը ինչպես նախկինում, այնպես էլ այսօր և վաղը չեն հասնի իրենց նպատակին»,- ուղիղ եթերում ասել էր Էրդողանը։ Տեղի ունեցած պայթյունը Թուրքիայի իշխանություններն համարում են ահաբեկչություն։ Երկրի ՆԳ նախարարը հայտնել է, որ այն իրականացրած անձը, որը ռումբը թողել էր փողոցում, ձերբակալվել է։ Ըստ նախարարի՝ նա կապ ունի Քրդական աշխատավորական կուսակցության հետ։

11:00 - 14 նոյեմբերի, 2022

Բլինքենն ու Չավուշօղլուն հեռախոսազրույց են ունեցել |factor.am|

factor.am: ԱՄՆ պետքարտուղար Էնթոնի Բլիքենը նախօրեին հեռախոսազրույց է ունեցել Թուրքիայի ԱԳ նախարար Մևլութ Չավուշօղլուի հետ։ ԱՄՆ պետքարտուղարության հաղորդմամբ՝ Բլինքենը շնորհակալություն է հայտնել Չավուշօղլուին Թուրքիայի ջանքերի համար՝ ապահովելու Սև ծովյան հացահատիկային գործարքի վերսկսումը, դրան Ռուսաստանի վերադարձի քաջալերումը։ «Պետքարտուղար Բլինքենն ու ԱԳ նախարար Չավուշօղլուն նաև քննարկել են ՆԱՏՕ-ի համակարգման ու միասնության շարունակական ուղիները Ուկրաինայի դեմ Ռուսաստանի պատերազմին ի պատասխան»,-ասվում է հաղորդագրության մեջ։Թուրքական կողմի տարածած հաղորդագրության մեջ նշվում է, որ նախարարները քննարկել են նաև ՆԱՏՕ-ին Շվեդիայի ու Ֆինլանդիայի անդամակցության, թուրքական F-16 կործանիչների արդիականացման հարցերը։

12:31 - 03 նոյեմբերի, 2022

Լավրովն ու Չավուշօղլուն քննարկել են «3+3» հարթակի շրջանակում հանդիպման նախապատրաստումը

Թուրքիայի արտգործնախարար Մևլութ Չավուշօղլուն հեռախոսազրույց է ունեցել իր ռուս գործընկեր Սերգեյ Լավրովի հետ։ Այս մասին ասվում է Թուրքիայի ԱԳՆ հաղորդագրության մեջ, հայտնում է թուրքական «Anadolu» գործակալությունը։ Հաղորդագրության համաձայն՝ կողմերը քննարկել են «հացահատիկային միջանցքի» շուրջ ստեղծված իրավիճակը։ Մտքեր են փոխանակվել է նաև Հարավային Կովկասում վերջին զարգացումների շուրջ։ Զրույցի ընթացքում նախարարներն անդրադարձել են Հայաստանի, Ադրբեջանի, Իրանի, Ռուսաստանի և Թուրքիայի մասնակցությամբ 3+3 ձևաչափով տարածաշրջանային համագործակցության հարթակի շրջանակներում հանդիպման նախապատրաստմանը։

15:45 - 01 նոյեմբերի, 2022

Աբդոլլահիանը և Չավուշօղլուն քննարկել են տարածաշրջանային ու միջազգային հարցեր |1lurer.am|

1lurer.am: Իրանի արտգործնախարար Հոսեյն Ամիր Աբդոլլահիանը հեռախոսազրույց է ունեցել Թուրքիայի արտգործնախարար Մևլյութ Չավուշօղլուի հետ: Պաշտոնյաները քննարկել են երկկողմ հետաքրքրություն ներկայացնող, տարածաշրջանային ու միջազգային հարցեր: Չավուշղօլուն ողջունել է Իրանի և Ադրբեջանի միջև երկխոսության գործընթացն ու ընդգծել, որ երկու երկրները Թուրքիայի բարեկամներն են՝ հայտնել է IRNA գործակալությունը: Նա նաև դատապարտել է Շիրազում տեղի ունեցած ահաբեկչությունը և նշել, որ Անկարան ահաբեկչության դեմ պայքարում Իրանի կողքին է եղել և կլինի:

11:42 - 01 նոյեմբերի, 2022

Լավրովն ու Չավուշօղլուն քննարկել են Հարավային Կովկասում կայունացմանն աջակցելու քայլերը |1lurer.am|

1lurer.am: Ռուսաստանի և Թուրքիայի արտաքին գործերի նախարարներ Սերգեյ Լավրովը և Մևլութ Չավուշօղլուն հեռախոսազրույց են ունեցել, քննարկել են Հարավային Կովկասում կայունացմանն աջակցելու քայլերը: «Կողմերը քննարկել են հոկտեմբերի 29-ին Ուկրաինայի կողմից Սևաստոպոլ քաղաքում ռազմական նավերի և քաղաքացիական նավերի դեմ իրականացված ահաբեկչական գործողության շուրջ ստեղծված իրավիճակը»,- հայտնել են ՌԴ ԱԳՆ մամուլի ծառայությունից: Լավրովը նշել է, որ անհրաժեշտ է երաշխավորել Ռուսաստանի դեմ ռազմական գործողություններ իրականացնելու համար Ուկրաինայի կողմից մարդասիրական միջանցքի և Ուկրաինական նավահանգիստների չօգտագործումը:

11:06 - 01 նոյեմբերի, 2022

Չավուշօղլուն դժգոհել է Հայաստան ԵԱՀԿ առաքելության այցից |factor.am|

factor.am: Թուրքիայի ԱԳ նախարար Մևլութ Չավուշօղլուն քննադատել է ԵԱՀԿ-ի՝ Հայաստան առաքելություն ուղարկելու որոշումը, գրում է Անադոլու գործակալությունը։ Մերսինում ելույթ ունենալիս, նա նշել է, որ ԵԱՀԿ-ն իրեն դրսևորել է որպես «խնդիրների չլուծման կենտրոն», իսկ վերջին որոշումը Հայաստանի մասով, իբր, հակասում է հենց կազմակերպության պահանջներին ու մադատին։ «Սեփական դիրքորոշումը պարտադրելու փորձը և ստատուս քվոյի ձևավորումն անընդունելի է»,- դժգոհել է Չավուշօղլուն։ «Տարիների ընթացքում նրանք պարզապես ձգձգեցին գործընթացը: Իսկ այսօր առաքելություն կամ դիտորդներ ուղարկելիս փորձում են անտեսել Ադրբեջանի դիրքորոշումը։ Հայաստանին աջակցելու ցանկություն կա», -ասել է նա։ Հիշեցնենք՝ ՀՀ կառավարության հրավերով այսօր Հայաստան է ժամանում ԵԱՀԿ կարիքների գնահատման թիմը։

13:16 - 21 հոկտեմբերի, 2022

Հայաստանի արտգործնախարարը պատրաստ է հանդիպել Թուրքիայի ԱԳ նախարարի հետ |armenpress.am|

armenpress.am: Հայաստանի արտաքին գործերի նախարար Արարատ Միրզոյանը պատրաստակամ է հանդիպել Թուրքիայի ԱԳ նախարար Մևլութ Չավուշօղլուի հետ: Միրզոյանն այս մասին ասաց ճեպազրույցում՝ անդրադառնալով դիտարկմանը, թե Թուրքիայի ԱԳ նախարար Չավուշօղլուն պատրաստակամություն է հայտնել հանդիպել ՀՀ ԱԳ նախարարի հետ: «Մենք շահագրգռված ենք երկխոսության հաջող ավարտով: Որևէ հանդիպում, որը կօգնի հասնել այդ հաջող ավարտին, իհարկե, կարող է տեղի ունենալ: Ես երբեք դեմ չեմ եղել այդպիսի հանդիպմանը»,-ասաց Միրզոյանը: ՀՀ ԱԳ նախարարն ընդգծեց, որ, սակայն, այդ հանդիպումների ընթացքում կողմերը պետք է անկեղծորեն և լուրջ քայլեր ձեռնարկեն երկրների միջև դիվանագիտական հարաբերությունների հաստատման և սահմանի բացման ուղղությամբ: «Ես կրկնում եմ՝ պատրաստ եմ այդպիսի հանդիպման, հուսով եմ՝ այդպիսի հանդիպումն ի վերջո շոշափելի արդյունքներ կգրանցի, եթե տեղի ունենա»,-եզրափակեց Միրզոյանը:

17:16 - 18 հոկտեմբերի, 2022