Ադրբեջան

Ադրբեջանի փոխվարչապետը արձագանքել է հայ-ադրբեջանական սահմանին 3 անցակետ ստեղծելու մասին Հայաստանի առաջարկին

Ադրբեջանի հետ սահմանին 3 անցակետ ստեղծելու մասին Հայաստանի կառավարության առաջարկը համարում ենք 2020 թվականի նոյեմբերի 9-ի եռակողմ հայտարարության 9-րդ կետով ստանձնած պարտավորությունների կատարման իմիտացիա։ Այս մասին հայտարարել է Ադրբեջանի փոխվարչապետ Շահին Մուստաֆաեւը։ «Անցկացված մոնիտորինգի արդյունքներով՝ այդ կետերից ճանապարհները պիտանի չեն Նախիջևանի հետ տրանսպորտային կապի և միջազգային տարանցիկ փոխադրումների համար, ինչը կոմունիկացիաների վերականգնման նպատակներից մեկն է։ Բացի այդ, որպես կանոն, անցակետերը բացվում են կողմերի փոխադարձ համաձայնության հիման վրա․ Ադրբեջանի հետ այս հարցում պայմանավորվածություն չի եղել»,- ասել է Մուստաֆաեւը։ «Այսպիսիով, Ադրբեջանի արևմտյան շրջանների և Նախիջևանի տրանսպորտային հաղորդակցությանը վերաբերող 9-րդ կետի պայմանների չկատարման հիմնական պատճառը հանդիսանում է Հայաստանի դժկամությունը՝ ներկայացնել նույն մոնիթորինգի կողմից առաջարկված ավտոմոբիլային ճանապարհի օպտիմալ երթուղին»,- ասել է Ադրբեջանի փոխվարչապետը։ Հիշեցնենք, որ ՀՀ վարչապետ Նիկոլ Փաշինյանը հայտնել էր, որ Հայաստանը Ադրբեջանից սպասում է դրական արձագանքի՝ 3 անցակետի բացման վերաբերյալ։ Ավելի վաղ Հայաստանի ազգային անվտանգության ծառայությունը շրջանառության մեջ է դրել նախագիծ, որով առաջարկվում է անցակետեր ստեղծել հայ-ադրբեջանական սահմանի որոշ հատվածներում:

14:17 - 27 հոկտեմբերի, 2022

Պատգամավորը ներկայացրեց Սոչիում սպասվող եռակողմ հանդիպմանը հայկական կողմի օրակարգն ու ակնկալիքը |armenpress.am|

armenpress.am: Սոչիում հոկտեմբերի 31-ին նախատեսվող ՀՀ վարչապետ Նիկոլ Փաշինյանի, Ռուսաստանի նախագահ Վլադիմիր Պուտինի և Ադրբեջանի նախագահ Իլհամ Ալիևի եռակողմ հանդիպմանը հայկական կողմի օրակարգն է լինելու վերջին 1 տարվա ընթացքում տեղի ունեցած իրադարձությունների վերաբերյալ պարզաբանումներ ստանալը, ադրբեջանական ագրեսիայի վերաբերյալ խոսակցությունները, եռակողմ հայտարարությունների կատարման ընթացի վերլուծությունը: Այս մասին խորհրդարանական ճեպազրույցում ասաց իշխանական «Քաղաքացիական պայմանագիր» խմբակցության պատգամավոր Սարգիս Խանդանյանը: «Մեկ տարի է անցել այս ֆորմատով եռակողմ հանդիպումից հետո, և կարծում եմ՝ ժամացույցներն ուղղելու անհրաժեշտություն կա: Եվ հայկական կողմի օրակարգն այն հարցերի պարզաբանումն է, որոնք մինչև այս պահը՝ վերջին 1 տարվա ընթացքում, տեղի են ունեցել, մասնավորապես, ադրբեջանական վերջին ագրեսիան և դրա հետևանքները: Նաև նոյեմբերի 9-ի, հունվարի 11-ի և նախորդ տարվա նոյեմբերի հայտարարությունների կատարման ընթացքի վերլուծությունն է լինելու հայկական կողմի ակնկալիքը հանդիպումից»,-ասաց Խանդանյանը: Իսկ ադրբեջանական զորքերի դուրսբերումը Հայաստանից ՀՀ օրակարգն է ցանկացած հարթակում: Դա Հայաստանի համար կարմիր գիծ ու պահանջ է: Նույն խմբակցության պատգամավոր, ԱԺ պաշտպանության և անվտանգության հարցերի հանձնաժողովի նախագահ Անդրանիկ Քոչարյանն էլ ընդգծեց, որ ՀՀ ինքնիշխան տարածքից ադրբեջանական զորքերի դուրսբերումը ոչ թե պահանջ, այլ անհրաժեշտություն է: «Անկախ նրանից, թե բանակցություններն ինչ ընթացք կստանան, այն, ինչը պատկանում է Հայաստանի Հանրապետությանը, քննարկման նյութ չէ: Մեր ինքնիշխան տարածքում որևէ օտար զինվորի ներկայությունը երբևէ չի հանդուրժվելու, նրանք պետք է խաղաղ պայմաններում դուրս գան մեր տարածքից: Մնացած բոլոր դեպքերում դա պահպանելու է լարվածությունը մեր սահմանների վրա, իսկ դա ոչ ոքի լավ տեղ չի հասցնելու»,-ասաց Քոչարյանը: Անդրադառնալով բանակցություններից առաջ հայկական կողմի հնարավոր նախապայմանի վերաբերյալ հարցին՝ Արթուր Հովհաննիսյանն ասաց, որ առհասարակ որևէ բանակցություններում ցանկացած նախապայման, մանավանդ այս գերլարված իրավիճակում, նշանակելու է գործընթացների սառեցում և կանգնեցում, ինչը խիստ վտանգավոր է: Հայկական կողմը Հայաստանի սուվերեն տարածքից ադրբեջանական զորքերի դուրսբերման պահանջը հնարավոր հարթակներում ներկայացնում է: «Պահանջը ներկայացնում են նաև մեր միջազգային գործընկերները՝ շատ կոնկրետ և հասցեական: Եվ մենք հույս ունենք, որ ադրբեջանական ռազմաքաղաքական ղեկավարությունը վերջիվերջո զորքերը հետ կքաշի ելման դիրքեր: Եվ բանակցությունների գործընթացում այս պահանջները միմյանց հետ զուգահեռ են ընթանում: Մենք հույս ունենք, որ երբ գա մի պահ, երբ հնարավոր կլինի որևէ տեքստի շուրջ խոսել խաղաղության պայմանագրի վերաբերյալ և որևէ գործնական քայլի անցնել, այդ պահի դրությամբ ադրբեջանական զինված ուժերը դուրս կգան Հայաստանի սուվերեն տարածքից և կդադարեցնեն հայկական հողերի օկուպացիան»,-եզրափակեց պատգամավորը: Հայաստանի վարչապետ Նիկոլ Փաշինյանը հոկտեմբերի 26-ին ԱԺ-ում հաստատել էր Սոչիում Ռուսաստանի Դաշնության նախագահ Վլադիմիր Պուտինի և Ադրբեջանի նախագահ Իլհամ Ալիևի հետ եռակողմ ձևաչափով ակնկալվող հանդիպմանն իր մասնակցությունը։

12:36 - 27 հոկտեմբերի, 2022

ԵՄ դիտորդներն ուղևորվել են հայ - ադրբեջանական սահման՝ պարեկություն իրականացնելու

Հայաստանում ԵՄ դիտորդները մեկնել են իրենց առաջին պարեկությանը։ Առաջիկա երկու ամսում ԵՄ դիտորդական առաքելությունը կիրականացնի սահմանի հայկական կողմում տիրող իրավիճակի մոնիթորինգ՝ վստահություն ձևավորելու, ինչպես նաև սահմանային հանձնաժողովների աշխատանքին նպաստելու համար։ Այս մասին տեղեկացնում է Եվրամիության արտաքին քաղաքականության և անվտանգության հարցերով բարձր ներկայացուցիչ Ժոզեպ Բորելի ղեկավարությամբ գործող ծառայությունը՝ ԵՄ անվտանգության պաշտպանությունը։ Հիշեցնենք, որ հոկտեմբերի 6-ին Պրահայում տեղի է ունեցել Նիկոլ Փաշինյանի, Իլհամ Ալիևի, Էմանուել Մակրոնի և Շառլ Միշելի քառակողմ հանդիպումը։ Հանդիպման արդյունքներով ընդունվել է հայտարարություն։ Ըստ հայտարարության՝ Հայաստանն ու Ադրբեջանը ճանաչում են միմյանց տարածքային ամբողջականությունն ու ինքնիշխանությունը, Հայաստանն իր համաձայնությունն է հայտնել՝ խրախուսելու ԵՄ քաղաքացիական առաքելությունը Ադրբեջանի հետ սահմանի երկայնքով: Առաքելության նպատակը կլինի վստահության կառուցումը, և իր զեկույցների միջոցով, սահմանային հանձնաժողովներին աջակցելը։

11:15 - 27 հոկտեմբերի, 2022

Երեւանի եւ Բաքվի միջեւ ուղիղ երկխոսությունը խնդիրների լուծման եւ կայուն խաղաղության հասնելու բանալին է. պետդեպ |news.am|

news.am: Երեւանի եւ Բաքվի միջեւ ուղիղ երկխոսությունը խնդիրների լուծման եւ կայուն խաղաղության հասնելու բանալին է։ Այս մասին ասել է պետդեպարտամենտի ներկայացուցիչ Վեդանտ Փատելը։ Նա հիշեցրել է, որ պետքարտուղար Էնթոնի Բլինքենը հայտարարել էր, որ ԱՄՆ-ը կողմնակից է Հայաստանի եւ Ադրբեջանի միջեւ խաղաղ բանակցություններին։ «Մենք երկու ղեկավարներին կոչ ենք արել հանդիպել ցանկացած ձեւաչափով, որն առավել օգտակար կլինի նրանց համար։ Մեր տեսակետն այն է, որ ուղիղ երկխոսությունն է խնդիրների լուծման եւ կայուն խաղաղության հասնելու բանալին։ Չկա ԱՄՆ-ից ավելի կողմնակից Հարավային Կովկասի երեք երկրների ինքնիշխանությանն ու անկախությանը, ինչպես նաեւ Հայաստանի, Ադրբեջանի եւ Վրաստանի անկախության վերականգնմանը Խորհրդային Միության փլուզումից հետո 1991թ., երաշխավորելով այդ երկրներից յուրաքանչյուրին հավատարիմ մնալ սեփական արտաքին քաղաքական շահերին եւ ինքնիշխանությանը»,- նշել է նա։

09:31 - 27 հոկտեմբերի, 2022

Արցախի ժողովրդի իրավունքների անվտանգության խոստումներ տվող Ադրբեջանն արդեն 30 տարի փակ է պահում Ստեփանակերտի օդանավակայանը. Արցախի ՄԻՊ

17:53 - 26 հոկտեմբերի, 2022

Ես կցանկանամ, որ այն կնքվի մինչև այս տարեվերջ․ Փաշինյանը՝ խաղաղության պայմանագրի կնքման մասին

Ես ցանկանում եմ և կցանկանամ, որ այն կնքվի մինչև այս տարեվերջ։ Ինչքանով է դա իրատեսական․ ես այդ հարցին կպատասխանեմ հետևյալ կերպ։ Ես և Կառավարությունը բոլոր հնարավոր ջանքերը կգործադրենք, որ դա լինի իրատեսական։ Այս մասին ԱԺ հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ պատասխանելով «Քաղաքացիական պայմանագիր» կուսակցության պատգամավոր Լուսինե Բադալյանի հարցերին, թե հնարավո՞ր է, որ մինչև տարեվերջ խաղաղության պայմանագիր կնքվի և որքանո՞վ է այդ պայմանագիրը նշանակում բարեկամություն թշնամիների հետ։ «Կա մի կարևոր հանգամանք, որ մենք հույս ունենք, և դա կարևոր նրբություն է, որ մինչև խաղաղության պայմանագրի ստորագրումը ավարտված լինեն դելիմիտիացիայի աշխատանքները։ Ինչքանով է դա իրատեսական։ Եթե հաշվի առնենք, որ Պրհաայում մենք պայմանավորվածություն ենք ձեռք բերել, որ դա տեղի է ունենալու 1991թվականի սահմանների հիման վրա, դա կարող է լինել իրատեսական, որովհետև այդ սամանները, ըստ էության, հայտնի են։ Շատ կարևոր է նաև հետևյալ հանգամանքը․ ինչպես նախկինում նշել ենք, պետք է միջազգայնորեն տեսանելի երկխոսություն սկսվի ԼՂ-ի և Ադրբեջանի միջև, և սա շատ կարևոր հանգամանք է, և ԼՂ հայության իրավունքների և անվտանգության և պաշտպանության որոշակի տեսանելի մեխանիզմներ պետք է լինեն։ Շատ լավ կլինի և շատ գոհ կլինեմ, եթե մենք կարողանանք դա անել։ Մեր կողմից մենք պատրաստ ենք գործադրել առավելագույն ջանքերը, որ ձեր ասածը տեղի ունենա»,- ասաց Փաշինյանը։ Անդրադառնալով պատգամավորի՝ «բարեկամություն թշնամիների հետ» ձևակերպմանը, Փաշինյանը ասաց․ «Ձեր հարցի մեջ մի երանգ կար, թշնամանք, թշնամություն և այլն։ Ես այս ամբիոնից դեռևս նախորդ տարվա սկզբին եմ այդ հարցին պատասխանել, թշնամանքը և ընդհանրապես իրավիճակը պետք է կառավարվի, որովհետև եթե դա կառավարելի չէ, դա իր հետ կարող է բերել միայն վնաս։ Ավելի բարձր հայտարարություններ, ցավոք կամ բարեբախտաբար, ես չեմ կարող անել, բայց որ ամեն ինչը պետք է կառավարվի, այդ թվում՝ թշնամանքը, դա ինձ համար փաստ է»։ Փաշինյանը անդրադարձավ նաև երկրների՝ միմյանց տարածքային ամբողջականություն ճանաչելուն․ «Ինչպես ենք մեկնաբանում տարածքային ամբողջականություն ճանաչելը։ Մենք հղում ենք անում 1992 թ․-ի փետրվարին ՀՀ գերագույն խորհրդում վավերացված փաստաթղթի վրա։ Մենք հղում ենք անում մի փաստաթղթի, որը ՀՀ օրենսդրության մաս է։ Այսինքն՝ ՀՀ օրենք է։ Եվ այդ փաստաթուղթը ընդունվել է այն ժամանակ, երբ այսօրվա մի շարք պատգամավորներ եղել են ընդունող մարմինի անդամ, պատգամավոր։ Արցախի հետ կապված ես ասել եմ մի քանի անգամ, որ ԼՂ հարցի կարգավորման Մադրիդյան սկզբունքները ճանաչելով դա ճանաչած իշխանությունը Ղարաբաղը ճանաչել է Ադրբեջանի մաս։ Ես դրա մասին բավական ծավալուն ելույթ եմ ունեցել այս ամբիոնից և կետ կետ բացատրել եմ։ Ուշադրություն հրավիրեցի այն հանգամանքի վրա, որ այդ ելույթին որևէ բովանդակային պատասխան չի եղել, բայց իմ երկրորդ հայտարարությունից հետո վերանգրեր տեսա, բայց, ճիշտն ասած, չբացեցի, որովհետև ինչպես ասում են՝ արձագանքելու ժամանակը վաղուց անցել էր»,- նշեց վարչապետը։

17:33 - 26 հոկտեմբերի, 2022

Ես հաստատել եմ իմ մասնակցությունը․ տեղեկություն չունեմ՝ ադրբեջանական կողմը հաստատել է մասնակցությունը, թե ոչ․ Փաշինյանը՝ Սոչիում կայանալիք հանդիպման մասին

ՀՀ վարչապետ Նիկոլ Փաշինյանը ԱԺ հարցուպատասխանի ժամանակ հաստատեց, որ առկա է հրավեր հոկտեմբերի 31-ին անկացնել եռակողմ հանդիպում․ «Այո, ՌԴ նախագահի կողմից առկա է հրավեր հոկտեմբերի 31-ին Սոչիում անցկացնել եռակողմ հանդիպում և ես հաստատել եմ իմ մասնակցությունը։ Տեղեկություն չունեմ՝ ադրբեջանական կողմը հաստատել է մասնակցությունը, թե ոչ»,- ասաց վարչապետը։ Նիկոլ Փաշինյանը անդրադարձավ նրան, թե ինչ ակնկալիքներ կան հանդիպումից․ «Վերջին անգամ այդ ֆորմատով եռակողմ հանդիպում տեղի է ունեցել նախորդ տարվա նոյեմբերին և կարծում եմ՝ ամենակարևոր ակնկալիքները կապված են այս ընթացքում տեղի ունեցած իրադարձությունների գնահատականին և մեկնաբանությանը։ Ընդ որում, ավելի հետ կարող եմ գնալ, հասնել մինչև 2020 թ․-ի նոյեմբերի 9-ի եռակողմ հայտարարություն։ Կարծում եմ՝ շատ կուտակված հարցեր կան, որոնց վերաբերյալ որոշակի մտքերի փոխանակում, պարզաբանումներ, հարցադրումներ պետք է հնչեն, և այդ հարցերի օրակարգը ձեզ հայտնի է՝ սկսած ԼՂ-ում կայունության և անվտանգության ապահովման գործով»,- ասաց Փաշինյանը։ Փաշինյանը հիշեցրեց, որ այս տարվա մարտին ադրբեջանական զինված ուժերը ներխուժել էին ՌԴ խաղաղպահների պատասխանատվության գոտի ու ասաց․ «Չեմ թաքցրել, որ մեզ համար այդքան էլ հասկանալի չէ խաղաղապահների կողմից արձագանքի բացակայությունը և, ըստ էության, ինչ միջոցներ են ձեռնարկվել այդ գործառույթները իրականացնելու համար։ Ի հեճուկս եռակողմ աշխատանքային խմբում ձեռքբերված պայմանավորվածությունների՝ ինչ-որ միջանցքների մասին հայտարարություններ են տեղի ունենում, ընդ որում՝ ոչ միայն ադրրբեջանական կողմից, ՌԴ-ում էլ անհասակնալի մարդիկ կան, ովքեր փորձում են այդ նարրատիվը զարգացնել, ի հեճուկս ՌԴ նախագահի կողմից արված հայտարարությունների, ստորագրած փաստաթղթերի և ի հեճուկս ՌԴ արտաքին գործերի նախարարության կողմից արված հայտարարությունների, ի հեճուկս ՌԴ փոխվարչապետի արած հայտարարությունների»,- ասաց Փաշինյանը։ Հարցին, թե արդյո՞ք Սոչիի հանդիպման համար կա հայտարարության նախագիծ, Փաշինյանն ասաց․ «Հայտարարության նախագիծ միշտ էլ լինում է, աշխատանք պետք է տարվի, այլ բան, թե վերջնական ընդունվածը ինչպիսին կլինի։ Անդրադառնալով նախորդ տարվա նոյեմբերի 26-ի հայտարարությանը՝ ուզում եմ ընդգծել հետևյալը և մի խոստովանություն անել․ նախորդ տարվա հայտարարության մեջ գրվում էր, որ կողմերը պայմանավորվեցին միջոցներ ձեռնարկել Հայաստան-Ադրբեջան սահմանին անվտանգության և կայունության մակարդակը բարձրացնելու վերաբերյալ, և գործը հասցնել սահմանագծման հանձնաժողովի աշխատանքների մեկնարկին։ Այն ժամանակ մենք, հայտարարության տեքստի վրա հիմնվելով, ասում էինք, որ նախ պետք է անվտանգության միջոցառումները, մեխանիզմները ստեղծել, հետո միայն խոսել դելմիտացիայի գործընթացի մեկնարկի մասին։ Այն ժամանակ մեր մի շարք գործընկերներ, այդ թվում՝ ՌԴ մեր գործընկերները, ասում էին, որ դելիմիտաիցիայի հանձնաժողովի գործունեությունը ինքնին անվտանգության մեխանիզմ կլինի։ Մենք այն ժամանակ չէինք կիսում այդ տեսակետը, բայց որոշեցինք ճկունություն ցուցաբերել՝ գործընթացը փակուղի չմտցնելու համար և գնալ այդ քայլին, բայց նաև դելիմիտացիայի հանձնաժողովի ձևավորումից հետո տեղի ունեցած սեպտեմբերի 13-ի ագրեսիան, և ինձ համար անհասկանալի է, որ այն գործընկերները, որ այն ժամանակ ասում էին, որ դելիմիտաիցայի հանձնաժողովի ձևավորումը անվտանգության մեխանիզմ է, սեպտեմբերի 13-ի ագրեսիայի նկատմամբ մինչև օրս հստակ քաղաքական դիրքորոշում չեն արտահայտել։ Սրանք հարցեր են, որ, իհարկե, պատրավտվում եմ քննարկել այդ թվում ՌԴ նախագահի հետ երկկողմ հանդիպման ֆորմատում»,- ընդգծեց Նիկոլ Փաշինյանը։

16:38 - 26 հոկտեմբերի, 2022

Ալեն Սիմոնյանի կողմից հրապարակված՝ ադրբեջանական վերջին ագրեսիայի հետևանքով զոհվածների և անհետ կորածների թիվը շփոթմունքի արդյունք է. խոսնակ

Ալեն Սիմոնյանի կողմից հրապարակած ադրբեջանական վերջին ագրեսիայի հետևանքով զոհվածների և անհետ կորածների թիվը շփոթմունքի արդյունք է, այս մասին հայտնում է ԱԺ նախագահի խոսնակ Ծովինար Խաչատրյանը. «Հարգելի լրագրող գործընկերներ, ի պատասխան զանգերի, հայտնում եմ, որ այսօր ճեպազրույցին ՀՀ ԱԺ նախագահի կողմից հրապարակած ադրբեջանական վերջին ագրեսիայի հետևանքով զոհվածների և անհետ կորածների թիվը շփոթմունքի արդյունք է: Խնդրում եմ թիվը հրապարակելիս՝ հաշվի առնել պաշտոնական տվյալները: Հայցում եմ բոլորի ներողամտությունը: Շնորհակալ եմ համագործակցության համար»,-գրել է նա։ Նշենք, որ ԱԺ-ում ճեպազրույցի ընթացքում Ալեն Սիմոյնանը մասնավորապես նշել էր, որ սեպտեմբերի 13-ի ադրբեջանական ագրեսիայի հետևանքով հայկական կողմն ունի 240 զոհ: Նշենք, որ վերջին տվյալներով՝ ՀՀ ԱԽ հայտարարության համաձայն՝ Ադրբեջանական ագրեսիայի հետեւանքով զոհվածների եւ անհետ կորածների թիվը հասնում է 207-ի, այդ թվում՝ զոհվել է քաղաքացիական 3 անձ, 2 քաղաքացիական անձի գտնվելու վայրը համարվում է անհայտ, վիրավորվել է 293 զինծառայող, 7 քաղաքացիական անձ, գերեվարվել է 20 զինծառայող: Լուսանկարը՝ Ազգային ժողովի

13:18 - 26 հոկտեմբերի, 2022

Խոշոր վթար Բաքվի մայրուղային ջրատարում․ փողոցները հեղեղվել են |shantnews.am|

shantnews.am: Բաքվում վթար է տեղի ունեցել մայրաքաղաքի կենտրոնական ջրամբարները միացնող 1,4 հազար միլիմետր տրամագծով մայրուղային ջրատարի վրա, ինչի հետևանքով հեղեղվել են փողոցները, «ՌԻԱ Նովոստի»-ին հայտնել են Ադրբեջանի արտակարգ իրավիճակների նախարարության մամուլի ծառայությունից: «Ազերսու» ԲԲԸ-ի հասարակայնության հետ կապերի բաժնի ղեկավար Անար Ջաբրաիլայի խոսքով՝ դեպքի վայր են մեկնել Բաքվի ջրմուղի վարչության և Յասամալի շրջանի Ջրմուղ կոյուղու վարչության վթարային բրիգադներն ու հատուկ տեխնիկան: «Վթարը մասամբ առանց ջրի է թողել Բաքվի Յասամալի և Սաբաիլի շրջանները», - գրել է նա սոցիալական ցանցերում:

12:04 - 26 հոկտեմբերի, 2022

Հայաստանը և Ադրբեջանը պետք է որոշեն՝ Պուտինի հրավերն օգտակար է իրենց համար, թե ոչ․ ԱՄՆ Պետդեպ |tert.am|

tert.am: ԱՄՆ Պետդեպի խոսնակ Նեդ Փրայսը ճեպազրույցի ընթացքում լրագրողի խնդրանքով անդրադարձել է ՌԴ ԱԳՆ պաշտոնական ներկայացուցիչ Մարիա Զախարովայի հայտարարության առ այն, որ «Արևմուտքը զբաղված է ինքնագովազդով և փորձում է Ռուսաստանին դուրս մղել տարածաշրջանից»:«Նախ, մենք վիճարկում ենք մեր ջանքերի որպես ինքնագովազդ որակումը: Ոչ մի ինքնագովազդային բան չկա նրանում, որ փորձում ենք վերջ դնել տարիներ շարունակվող հակամարտություններին և տարիների բռնկումներին, որոնք հանգեցրել են բռնությունների և, ի վերջո, մահվան, ինչպես հայերի, այնպես էլ Ադրբեջանի քաղաքացիների շրջանում:Ինչպես ընդգծել է պետքարտուղարը, մենք հավատարիմ ենք Հայաստանի և Ադրբեջանի միջև խաղաղ բանակցություններին։ Մենք երկու ղեկավարներին էլ խրախուսել ենք հանդիպել այն ձևաչափով, որն առավել օգտակար է նրանց համար: Մենք կարծում ենք, որ ուղղակի երկխոսությունը առանցքային է խնդիրների լուծման և կայուն խաղաղության հասնելու համար»,- ասել է Փրայսը:Անդրադառնալով հոկտեմբերի 31-ին ՌԴ նախագահ Վլադիմիր Պուտինի հետ նախատեսված հանդիպմանը՝ Պետդեպի ներկայացուցիչն ասել է.«Ի վերջո, Հայաստանը և Ադրբեջանը պետք է որոշեն, թե արդյոք նախագահ Պուտինի հրավերն օգտակար կամ պիտանի կլինի նրանց համար կայուն խաղաղության ձգտման հարցում: 2008 թվականին Ռուսաստանի ներխուժումը Վրաստան և նրա շարունակական դաժան ներխուժումը Ուկրաինա ցույց են տալիս, որ Մոսկվան քիչ է հարգում իր հարևանի ինքնիշխանությունը և դժվար թե հուսալի, երկարաժամկետ գործընկեր լինի: Բայց, ի վերջո, սա կլինի մի որոշում, որը պետք է կայացնեն Հայաստանն ու Ադրբեջանը։

11:36 - 26 հոկտեմբերի, 2022

Ադրբեջանն ավելացնում է 2023թ․ պաշտպանության ու անվտանգության բյուջեն |factor.am|

factor.am: Ադրբեջանի իշխանությունները 2023 թվականի պետական բյուջեից պաշտպանության և ազգային անվտանգության ոլորտի ֆինանսավորումն ավելացնելու են 4,6 տոկոսով՝ հասցնելով 5 մլրդ 320,1 մլն մանաթի (ներկա փոխարժեքով՝ 3 մլրդ 129,5 մլն դոլար), գրում են ադրբեջանական լրատվամիջոցները։ Նշվում է, որ նման ծախսեր նախատեսված են Ադրբեջանի 2023 թվականի պետական բյուջեի նախագծով, որը ներկայացվել է Միլլի Մեջլիսին։ Ընդհանուր առմամբ, հաջորդ տարի պաշտպանությանն ու ազգային անվտանգությանը նախատեսվում է ուղղել ամբողջ բյուջետային ծախսերի 16 տոկոսը։ Պաշտպանության և ազգային անվտանգության ծախսերի կառուցվածքում 2023 թվականին պաշտպանության ոլորտի կարիքների համար նախատեսված է 2 միլիարդ 403,4 միլիոն մանաթ, ազգային անվտանգության՝ 364,2 միլիոն մանաթ, սահմանային ծառայության կարիքների համար՝ 470,8 միլիոն մանաթ։ Բացի այդ, հաջորդ տարի նախատեսվում է 2 մլրդ 70 մլն մանաթ (1,2 մլրդ դոլար) ուղղել անվտանգության ոլորտում հատուկ նշանակության ծրագրերի ու միջոցառումների իրականացմանը։ Մյուս ծախսերն ուղղվելու են այլ նպատակների։

15:32 - 25 հոկտեմբերի, 2022

Ինչ շահեր է հետապնդում ԵՄ-ը Բաքվի ու Երևանի խաղաղ գործընթացում. հայացք Բրյուսելից |amerikayidzayn.com|

14:37 - 25 հոկտեմբերի, 2022

Մոսկվայում Ադրբեջանի դեսպանատունը բողոքի նոտա է հղել ՌԴ ԱԳՆ |armenpress.am|

armenpress.am: Մոսկվայում Ադրբեջանի դեսպանատունը բողոքի նոտա է հղել ՌԴ ԱԳՆ՝ Առաջին ալիքով «Մեծ խաղ» հեռուստաշոուի թողարկման կապակցությամբ։ Այս մասին հայտնում է դեսպանատան մամուլի ծառայությունը։ Դեսպանատունը վրդովմունք է հայտնել «հակաադրբեջանական բացահայտ հարձակումների» առնչությամբ, որոնք, ըստ ադրբեջանցի դիվանագետների, հոկտեմբերի 20-ին և 21-ին հեռուստաշոուում դրսևորվել են ռուս քաղաքագետների և հայազգի փորձագետների կողմից։

13:48 - 25 հոկտեմբերի, 2022

Ես տեսնում եմ, որ Ռուսաստանն է միջանցքի խնդիր դրել, որ միջանցք ունենան իրենք Ադրբեջանի հետ. Գագիկ Մելքոնյան |news.am|

news.am: Ես ոչ մի լավ սպասելիք չունեմ Ռուսաստանում Փաշինյան-Ալիև-Պուտին հնարավոր հանդիպումից ու չգիտեմ՝ կլինի, թե չի լինի այդ հանդիպումը: Այս մասին այսօր՝ հոկտեմբերի 25-ին, ԱԺ-ում լրագրողների հետ զրույցում նշեց ԱԺ ՔՊ խմբակցության պատգամավոր, պաշտպանության նախկին փոխնախարար Գագիկ Մելքոնյանը։ Նշենք, որ եռակողմ հանդիպման մասին հայտնել է ՌԴ նախագահի մամուլի քարտուղար Դմիտրի Պեսկովը։ «Ո՞վ է ասել, որ լինելու է: Ձեզ են ասել Կրեմլից, մեզ ոչ մի բան չեն ասել: Եթե հանդիպում լիներ, Աստանայում կլիներ: Ինչո՞ւ չեղավ այդ հանդիպումը, չցանկացած, որ հանդիպումը տեղի ունենա: Այսինքն եթե Ռուսաստանի թագավորը ուզենար հանդիպում կազմակերպել այնտեղ, կկազմակերպեր, բայց չուզեցավ: Հիմա եթե պաշտոնական կհրավիրի, կտեսնենք: Սպասելիք չունեմ, որովհետև եթե դուք լսեիք Ալիևի վերջին հայտարարություններն Աստանայում, ասաց՝ եթե չլինի «միջանցքը», ես ուրիշ ձևով կվերցնեմ: Ոտքը ընկել էր այնտեղ, իրեն լավ էր զգում: Երբ գալիս է Բրյուսել, արդեն ուրիշ ձև է խոսում, մոտեցումներն ուրիշ են, Ռուսաստանում ուրիշ է, ոնց որ իր հայրենիքում լինի, ոնց որ ձուկը ջրում: Իսկ երբ գնում է Բրյուսել, գլուխը կախած, նստած է»,-ասաց Գագիկ մելքոնյանը: Նա համոզմունք հայտնեց, որ Ռուսաստանը կողմնապահություն է անում հայ-ադրբեջանական հարցերում. «Դուք չե՞ք զգացել դա: Ես Արևմուտքի կողմից Հայաստանի նկատմամբ ճնշումը չեմ տեսել: Ես տեսնում եմ, որ Ռուսաստանն է միջանցքի խնդիր դրել, որպեսզի միջանցք ունենան իրենք Ադրբեջանի հետ»: Նա նաև նշեց․ «Մենք ուզում ենք 1991 թվականի ԱՊՀ ստեղծման ժամանակ հաստատված սահմաններով ունենանք մեր երկիրը և խաղաղություն կնքվի. մենք գնում ենք դրան, զիջելու բան չունենք»։ «Խնդիրը դրված է, որ մինչև տարեվերջ խաղաղության պայմանագիր կնքենք, բայց դա կլինի, թե ոչ, ոչ ոք չգիտի: Խոշոր տերություններն են մեզ ասել, որ մինչև տարեվերջ պետք է կնքեք այդ պայմանագիրը: Բայց Լյուքսեմբուրգից հետո Ալիևը կանգնեց ու Աստանայում ասաց, որ Ռուսաստանն է դադարեցրել պատերազմը, սկսեց հոխորտալ, այս ամեն ինչից երևում է, որ մինչև տարեվերջ դժվար թե խաղաղության պայմանագիր կնքենք»,- ասաց նա: Գագիկ Մելքոնյանի խոսքով՝ մենք պետք է հասկանանք, որ մենք ենք կռվելու մեր երկրի համար, ոչ ոք չի գա էստեղ մեզ համար կռվի․ «Դրա համար պետք է մեր ժողովուրդը համախմբվի, և մենք կարողանանք մեր երկիրն այս վիճակից հանել»: Հարցին, թե որ առաջարկներն են ավելի բարենպաստ Հայաստանի համար՝ Արևմուտքի՞, թե՞ Ռուսաստանի, Մելքոնյանը պատասխանեց. «Բարենպաստն այն է, որ մենք կարողանանք թշնամուն դուրս քշենք մեր սահմաններից, կարողանանք մեր երկրի սահմանները պահենք: Այսօր արդեն միջազգային կառույցները ստիպում են Ադրբեջանին: Եվրոպացի դիտորդների արձանագրություններից է կախված, որ այդ գործողությունները պետք է կատարվեն: ԱՄՆ-ն, Ֆրանսիան ասել են, որ հետ գնացեք ձեր նախկին դիրքերը»:

13:32 - 25 հոկտեմբերի, 2022

Ադրբեջանը խոչընդոտում է հայ զինծառայողների դիերի որոնողական աշխատանքները իր օկուպացրած տարածքներում․ Փաշինյան

Նիկոլ Փաշինյանը իր թվիթերյան միկրոբլոգում գրառում է կատարել՝ նշելով, որ Ադրբեջանը խոչընդոտում է հայ զինծառայողների դիերի որոնողական աշխատանքներին այն տարածքներում, որոնք օկուպացված են Ադրբեջանի կողմից։ «Սեպտեմբերի 14-ից սկսած՝ Ադրբեջանը տարբեր խոչընդոտներ է ստեղծում ադրբեջանական կողմի վերջին օկուպացիայի գոտում հայ զինծառայողների դիերի որոնողական աշխատանքների համար։ Սա հակահումանիստական և անընդունելի պահվածք է»,- նշել է Փաշինյանը։ Հիշեցնենք, որ ավելի վաղ ՀՀ վարչապետը իր թվիթերյան միկրոբլոգում անհետ կորածների թվեր թր հրապարակել․ «Լեռնային Ղարաբաղի առաջին պատերազմի հետևանքով 777 անհետ կորած հայ կա, 217-ը՝ ԼՂ 2-րդ պատերազմից, և 29 անհետ կորած հայ՝ սեպտեմբերի 13-ին Հայաստանի դեմ Ադրբեջանի ագրեսիայի հետևանքով։ Հուսով ենք՝ Ադրբեջանը կհամագործակցի մեր հայրենակիցների ճակատագիրը ճշտելու հարցում»։

13:17 - 25 հոկտեմբերի, 2022

Ըստ ՌԴ ԱԳՆ-ի՝ Արևմուտքը փորձում է Անդրկովկաս տեղափոխել «Ուկրաինայում մշակված առճակատման սխեմաները» |aravot.am|

aravot.am: Ռուսաստանի ԱԳՆ խոսնակ Մարիա Զախարովան հայտարարություն է տարածել՝ ի պատասխան լրատվամիջոցների խնդրանքի մեկնաբանելու հայ-ադրբեջանական հարաբերությունների կարգավորման շուրջ ընթացող զարգացումները: Հայտարարության մեջ ասվում է. «Մեզ չեն կարող չանհանգստացնել Անդրկովկասում թափ հավաքող տագնապալից միտումները, որտեղ Արևմուտքն ակնհայտորեն փորձում է տեղափոխել Ուկրաինայում մշակված առճակատման սխեմաները։ Տեսնում ենք՝ ինչ աննախադեպ ճնշման է դրսից ենթարկվում եղբայրական Հայաստանը: Մեր երկրների ու ժողովուրդների դարավոր կապերին վնաս հասցնելու ձգտումներում քայլեր են ձեռնարկվում տարածաշրջանում Ռուսաստանի քաղաքականությունը վարկաբեկելու ուղղությամբ։ Բազմաթիվ հիմնադրամներ, հասարակական կազմակերպություններ և լրատվամիջոցներ, որոնք գործում են Վաշինգտոնի և Բրյուսելի թելադրանքով, վրեժխնդիր կերպով ձգտում են հասարակության մեջ հակառուսական տրամադրություններ սերմանել»։ Զախարովան համոզմունք է հայտնել նաև, որ Մոսկվայի և Երևանի միջև վեճ գցելու արտաքին ուժերի փորձերը հաջողություն չեն ունենա․ «Մենք տրամադրված ենք ամրապնդելու Հայաստանի հետ ռազմավարական դաշինքը և բազմակողմ համագործակցությունը, ինչը թույլ կտա մեզ համատեղ հաղթահարել առկա մարտահրավերները»։ «Արևմուտքի անպարկեշտ և լկտի մոտեցումը կարելի է նկատել նաև հայ-ադրբեջանական հարաբերությունների կարգավորման հարցում: Հաշվի չի առնվում խնդրի ո՛չ տարածաշրջանային առանձնահատկությունը, ո՛չ էլ հատուկ զգայունությունը։ Վաշինգտոնի և Բրյուսելի իրական նպատակները ամենևին փոխզիջումային և հավասարակշռված լուծումների մշակումը չէ, այլ ինքնագովազդը և Ռուսաստանը Անդրկովկասից դուրս մղելը։ Մեր եռակողմ զարգացումները յուրացվում և աղավաղվում են: Հաճախակի են դարձել Եվրամիության, ԵԱՀԿ-ի և Ֆրանսիայի քողի տակ արևմտյան էմիսարների ժամանումները Հայաստան։ Առաջ են մղվում հապճեպ հորինված նախաձեռնություններ, որոնք հաշվի չեն առնում տարածաշրջանի ողջ բնակչության շահերը։ Սա հղի է հավասարակշռության խախտմամբ, որը ձեռք է բերվել դժվարին պայմաններում՝ Ռուսաստանի, Ադրբեջանի և Հայաստանի ղեկավարների 2020թ. նոյեմբերի 9-ի պայմանավորվածությունների հիման վրա։ Զուգահեռաբար շրջանառվում են անհիմն մեղադրանքներ, թե իբր Մոսկվան չի կատարում Հայաստանի նկատմամբ իր անվտանգության պարտավորությունները։ Այս կապակցությամբ ցանկանում ենք հիշեցնել, որ հենց մեր երկիրն էր, որ կանգնեցրեց պատերազմը 2020թ. նոյեմբերին, ուղարկեց խաղաղապահներ, որոնք խաղաղություն և կայունություն բերեցին տարածաշրջան և մինչ օրս վճռական ներդրում ունեն Բաքվի և Երևանի միջև զինված միջադեպերի կարգավորման գործում: Արտաքին ուժերի փորձերը՝ հասնելու ռուսական խաղաղապահ զորամիավորման դուրսբերմանը, ուղղված են Հարավային Կովկասի ապակայունացմանը»,- նշված է հայտարարության մեջ։ Առավել մանրամասն՝ aravot.am-ում

12:19 - 25 հոկտեմբերի, 2022