ՀՀ Գլխավոր դատախազություն

«Սա քաղաքական պայքար չէ, մենք այստեղ ենք մեր երեխաների համար»․ զոհված և անհետ կորած զինծառայողների ծնողները Դատախազության դիմաց են |tert.am|

tert.am: Սա քաղաքական պայքար չէ, մենք այստեղ եկել ենք մեր երեխաների համար։ Այս մասին այսօր Գլխավոր դատախազության դիմաց բողոքի ակցիայի ժամանակ ասաց զոհված զինծառայողի ծնողը․«Այստեղ ո՛չ Սերժ Սարգսյան կա, ո՛չ Ռոբերտ Քոչարյան կա, ո՛չ Արթուր Վնաեցյան կա։ Ես այստեղ եկել եմ իմ Նարեկի ու 5000 Նարեկի համար, թող գան այստեղ։ Ով ցանկանում է, թող գնա Հրապարակ, ոչ չի ասում՝ թող չգնա, բայց այստեղ թող գան։ Մարտակերտում 28 երեխան կորավ, այդ 28 երեխայի ծնողներից միայն ես եմ այստեղ, այդ ինչպես եղավ, որ սուրճի ապարատը հասցրին առան ու փախան, բայց երեխաներին չհասցրեցին փրկել»,ասաց զոհված զինծառայող Նարեկի հայրը։ Հարցին, թե ճանաչո՞ւմ է 27 զոհերի ծնողներին, ակցիայի մասնակից ծնողն ասաց․«Ինչպե՞ս չէ, ես կապ ունեմ իրենց հետ, իրենց որդիների շիրիմներին եմ այցելում, իմ տղան Եռաբլուրում չէ, իմ տղան գյուղում է, բայց Եռաբլուրում շատերն են։ Իրենց ծնողներն էլ Երևանում ապրող են, ես մարզից գալիս, հասնում եմ այստեղ իմ երեխայի համար, իրենք երկու ոտ չե՞ն կարողանում գան։ Սա քաղաքական պայքար չէ, մի գնացեք Հրապարակ, եկեք Դատախազության դիմաց, եկեք այստեղ վրաններ խփենք, ու մնանք, մեզ ոչ ոք չի կարող ձեռք տալ, այդքանն եմ ուզում ասել»։

15:24 - 30 ապրիլի, 2022

Անհետ կորած զինծառայողների ծնողները հանդիպել են Նիկոլ Փաշինյանի հետ |news.am|

news.am: Զոհված ու անհետ կորած զինծառայողների ծնողներն այսօր՝ ապրիլի 29-ին, հանդիպել են վարչապետ Նիկոլ Փաշինյանի հետ։ Ծնողների խումբը դեռ ամիսներ առաջ է պայմանավորվել հանդիպել վարչապետի հետ, միայն այսօր է հանդիպումը կայացել։ «Մեր տղաների հարցով գործը նախաքննական փուլում է։ Մենք ուզում էինք բարձրաձայնել ավելի բարձր ատյանում՝ վարչապետի մոտ: Էդ մարդն էլ կանչել էր դատախազին, համապատասխան քննչական մարմիններին, նորից մեր հուզող հարցը բարձրացրել ենք, ասել ենք՝ թող ձեր անմիջական հսկողության տակ լինի»,- լրագրողներին պատմեց ծնողներից մեկը: «Հրամանատարի անփութության պատճառով մենք կորցրել ենք մեր երեխեքին, այդ հարցով էինք վարչապետի մոտ։ Վարչապետը բացարձակ ոչ մի բան չասաց, երևի թե, տեղյակ էլ չէր գործից: Քանի որ գործը նախաքննական փուլում է, ասաց՝ թող քննությունը ընթանա: Հիմա ասեկոսեներ է գնում, որ բախտակից ծնողների մեջ պառակտում կա: Ես պաշտոնապես հայտարարում եմ, եթե կան կասկածողներ, թող գան իմ դեմը կանգնեն ասեն: Ո՞նց կարող է նույն ցավի տեր մարդկանց մեջ պառակտում լինի, դա բացառվում է»,-ասաց նա՝ հավելելով, որ հանդիպումը տևել է 2-ից 3 ժամ: «Անհետ կորած զինծառայողների ծնողները վարչապետից հարցնում էին, ասում էին՝ ո՞ւր են մեր երեխեքը, ե՞րբ են տուն գալու, ասում է՝ «չեմ կարա ասեմ»: Առավել երկար խոսեցին անհետ կորած զինվորների ծնողները»»,- նշեց հանդիպմանը մասնակից ծնողը։

18:11 - 29 ապրիլի, 2022

Զոհվածների ծնողները փակել են Վազգեն Սարգսյան փողոցը․ հանդիպում են պահանջում Արթուր Դավթյանի հետ |news.am|

news.am: 44-օրյա պատերազմում զոհված զինծառայողների ծնողները փակել են Վազգեն Սարգսյան փողոցը և հանդիպում են պահանջում Գլխավոր դատախազ Արթուր Դավթյանի հետ։ Նրանք նշում են, որ փակ են պահելու փողոցն այնքան ժամանակ, քանի դեռ Դատախազը չի հանդիպել իրենց հետ։ Արդեն 2 ժամից ավել է ծնողները գտնվում են Դատախազության շենքի դիմաց։ Այնտեղ են նաև «Հայաստան» դաշինքի պատգամավորներ Արթուր Ղազինյանը, Արամ Վարդևանյանը։ Դատախազությունց առաջարկ է եղել, որ Արթուր Ղազինյանը բարձրանա Դատախազություն՝ ծնողների պահանջները քննարկելու, սակայն ծնողները մերժել են առաջարկը՝ նշելով, որ իրենք են ցանկանում հանդիպել դատախազի հետ։ Նշենք, որ ծնողները պահանջում են արդար քննություն իրականացնել և վարչապետ Նիկոլ Փաշինյանին ներգրավվել որպես մեղադրյալ։ Ավելի վաղ գլխավոր դատախազությունից ծնողներին տեղեկացրել էին, որ կոնկրետ վարչապետի մասով միջնորդությունն ուղարկվել է Հակակոռուպցիոն կոմիտե և հինգ օր հետո միայն պարզ կլինի, թե ինչ գործողություններ են կատարվելու։

16:33 - 29 ապրիլի, 2022

Աղվան Հովսեփյանը կշարունակի մնալ կալանավորված. վերաքննիչ բողոքը մերժվեց |factor.am|

factor.am: Վերաքննիչ քրեական դատարանը՝ դատավոր Ռուբիկ Մխիթարյանի նախագահությամբ, քիչ առաջ որոշում կայացրեց մերժել ՀՀ նախկին գլխավոր դատախազ, ՔԿ նախկին նախագահ Աղվան Հովսեփյանի կալանավորման ժամկետը ևս երկու ամսով երկարացնելու որոշման դեմ բողոքը։ Հովսեփյանի կալանքի ժամկետը կրկին երկարեցվել էր փետրվարի 28-ին։ Պաշտպանական թիմը հայտարարել էր, որ այս մասով հանցագործության մասին հաղորդում են ներկայացրել ՀՀ գլխավոր դատախազին՝ խնդրելով դատավորներ Դավիթ Արղամանյանի և Արմեն Դանիելյանի նկատմամբ քրեական հետապնդում հարուցելու և ազատությունից զրկելու համաձայնություն ստանալու խնդրանքով դիմել ՀՀ բարձրագույն դատական խորհրդին։ Դիմումի մասով մինչ օրս պատասխան չի ստացվել։ Հիշեցնենք՝ Աղվան Հովսեփյանին առնչվող քրեական գործի նախաքննությունն օրեր առաջ է ավարտվել։ Factor.am-ի հետ զրույցում Հակակոռուպցիոն կոմիտեից հայտնել էին, որ նախաքննությամբ ապացուցվել է՝ Հովսեփյանը պաշտոնավարման տարիներին օրինականացրել է ավելի քան 1 միլիարդ 300 միլիոն դրամ, մասնակցել է ձեռնարկատիրական գործունեություն իրականացնող մի շարք ընկերությունների կառավարմանը, ստացել առանձնապես խոշոր չափերով` 190 միլիոն դրամ կաշառք և խարդախությամբ հափշտակել է 800 միլիոն դրամի գույք։ «Ավելի քան 6 մլրդ 800 միլիոն դրամ եկամտի հանցավոր ծագումը թաքցնելու նպատակով Հովսեփյանը կառուցել է Բյուրականի առանձնատունը: Առանձնատունը նախկինում պատկանել է Նկարիչների միությանը։ Այն ունի 2 հա-ից ավելի տարածք, բազմաթիվ շինություններ: Ապօրինի ճանապարհով ստացած գումարներով Բյուրականում գտնվող առանձնատունը կառուցելու արդյունքում դրա արժեքը բարձրացել է, կազմում է 1 մլրդ դրամից ավելի: Բացի այդ՝ հանցավոր ճանապարհով ստացած գումարով Մաշտոցի պողոտայում ձեռք է բերվել 2 բնակարան, ավտոտնակ: Հովսեփյանը, նախկին «Երևան» հեռուստաընկերության սեփականատիրոջից տեղեկացված լինելով նրա շահերին առնչվող քրգործերի մասին, հովանավորչության համար որպես կաշառք պահանջել է 206 մլն դրամ արժեքով 50 բաժնետոմս, որը ստացել է որդուն նվիրաբերելու եղանակով»,- նշվում է նախաքննությամբ ձեռք բերված ապացույցներում։ Աղվան Հովսեփյանին մեղադրանք է առաջադրվել 6 հոդվածով, այդ թվում՝ ձեռնարկատիրական գործունեությանն ապօրինի մասնակցելու, առանձնապես խոշոր չափերով կաշառք ստանալու, հանցավոր ճանապարհով ստացած եկամուտն օրինականացնելու համար: Առաջադրված մեղադրանքները ՀՀ Քննչական կոմիտեի նախկին նախագահը չի ընդունում։

15:33 - 29 ապրիլի, 2022

Բորիս Բախշիյանն ազատ կարձակվի. ԱԱԾ-ն նրա կալանքի ժամկետը երկարացնելու միջնորդություն չի ներկայացրել |hetq.am|

hetq.am: Սյունիքի մարզի ընդհանուր իրավասության դատարանի դատավոր Բորիս Բախշիյանին կալանքի տակ պահելու ժամկետը երկարացնելու մասին միջնորդություն դատարան չի ներկայացվել: Այս մասին հայտնել են Ազգային անվտանգության ծառայության քննչական դեպարտամենտից: Բորիս Բախշիյանը կալանավորվել է 2022 թվականի փետրվարի 7-ին՝ երկու ամիս ժամկետով, որից հետո կալանքի ժամկետը երկարացվել է ևս մեկ ամսով, այսինքն՝ մինչև մայիսի 7-ը: Քրեական դատավարության օրենսգրքի 139-րդ հոդվածի 1-ին մասի համաձայն՝ «մեղադրյալին կալանքի տակ պահելու ժամկետը երկարացնելու անհրաժեշտության դեպքում քննիչը, դատախազը, ոչ ուշ, քան կալանքի տակ պահելու ժամկետը լրանալուց 10 օր առաջ, պետք է դատարան ներկայացնեն պատճառաբանված միջնորդություն»: Տվյալ դեպքում ստացվում է, որ ապրիլի 27-ը օրենքով սահմանված վերջին օրն էր, որ ԱԱԾ-ն կարող էր դատավորի կալանքի ժամկետը երկարացնելու միջնորդություն ներկայացնել, ինչը չի արվել: Սա նշանակում է, որ կալանքի ժամկետը լրանալու օրը՝ մայիսի 7-ին, երեք ամիս կալանքի տակ մնալուց հետո Բախշիյանն ազատ կարձակվի: Հիշեցնենք, որ դատավորը մեղադրվում է իր վարույթում գտնված գործերից մեկով մեղադրյալին ակնհայտ ապօրինի կալանավորելու մեջ, որն անզգուշությամբ առաջացրել է ծանր հետևանք: Խոսքը Քաջարանի համայնքապետ Մանվել Փարամազյանի գործով մեղադրյալ Նվեր Մկրտչյանի մասին է: Վերջինս չի ներկայացել գործով նշանակված դատական նիստին: Մկրտչյանի պաշտպանը նիստից առաջ դատարան գրություն է ուղարկել այն մասին, որ ինքն անհետաձգելի քննչական գործողության մասնակցելու պատճառով նիստին ներկայանալ չի կարող, իսկ պաշտպանյալն առանց իրեն չի ցանկանում մասնակցել նիստին: Առավել մանրամասն՝ hetq.am-ում

20:20 - 28 ապրիլի, 2022

Շարունակվում է զոհված զինծառայողների, անհետ կորածների ծնողների ակցիան․ մասնակիցները պատրաստվում են վրաններ տեղադրել Դատախազության շենքի դիմաց |factor.am|

factor.am: Շարունակվում է զոհված զինծառայողների, անհետ կորածների ծնողների ու հարազատների ակցիան: Նրանք Գլխավոր դատախազության դիմաց հավաքվել են ՝պարզելու, թե ինչ իրավական ընթացք է ստանալու Նիկոլ Փաշինյանի ելույթը: Նշենք, որ ակցիայի մասնակիցների հետ հանդիպմանը Գլխավոր դատախազի գլխավոր խորհրդական Գոռ Աբրահամյանը նշեց, որ Նիկոլ Փաշինյանին որպես մեղադրյալ ներգրավելու միջնորդությունն ուղարկվել է Հակակոռուպցիոն կոմիտե: Ակցիայի ընթացքում վիճաբանություն սկսվեց ակցիայի մասնակիցների միջև։ 44-օրյա պատերազմում զոհված զինծառայող Աբգար Նազարյանի հայրը՝ ԱԺ պատգամավոր Գեղամ Նազարյանը ակցիայի մասնակիցներին կոչ արեց էմոցիաները զսպել. «Եթե ինչ-որ մեկը մտածում է, որ գոռալով ու խփելով մեր խնդիրը կլուծվի, չարաչար սխալվում է»: Լրագրողների հետ զրույցում ակցիայի մասնակիցներից մեկը հայտարարեց, որ պատրաստվում են վրաններ տեղադրել Դատախազության շենքի դիմաց: «Այստեղ կմնանք այնքան, մինչև որ երկրի դատական համակարգի ղեկավարները կկայացնեն բարոյական որոշում, որ պետք է մեր տղաների արյան համար դավաճանները պատասխան տան»,- նշեց զոհված զինծառայողի հայրը:

16:54 - 27 ապրիլի, 2022

ԴԱՀԿ նախկին պետ Միհրան Պողոսյանին և նրա ընտանիքին պատկանող գույքի վրա արգելանք է կիրառվել |armenpress.am|

armenpress.am: ԴԱՀԿ նախկին պետ Միհրան Պողոսյանը, նրա կինը և դուստրը հրավիրվել են Գլխավոր դատախազության ապօրինի ծագում ունեցող գույքի բռնագանձման գործերով վարչություն: Այս մասինտեղեկանում ենք պաշտոնական հայտարարությունների «Azdarar.am» կայքից: Գլխավոր դատախազության՝ ապօրինի ծագում ունեցող գույքի բռնագանձման գործերով վարչության կողմից հայցի նախնական ապահովման միջոցներ կիրառելու նպատակով ներկայացված միջնորդությունների հիման վրա, դատարանի որոշմամբ այդ անձանց գույքերի նկատմամբ կիրառվել է արգելանք։ Նշվում է, որ ԴԱՀԿ նախկին պետ Միհրան Պողոսյանին և նրա ընտանիքի անդամներին առաջարկվում է մայիսի 11-ին ներկայանալ Գլխավոր դատախազության ապօրինի ծագում ունեցող գույքի բռնագանձման գործերով վարչություն:

16:37 - 27 ապրիլի, 2022

Արցախյան պատերազմում զոհված զինծառայողների ծնողների ներկայացրած պահանջների համար իրավական ընթացակարգ է ապահովվել

2022թ. ապրիլի 26-ին ՀՀ գլխավոր դատախազությունում ստացվել է 2020թ. Ադրբեջանի կողմից սանձազերծված պատերազմի ընթացքում զոհված զինծառայողներին քրեական գործով որպես տուժող ճանաչելու վերաբերյալ զոհված զինծառայողների մի շարք ծնողների, հարազատների միջնորդությունը, որը բավարարվել է: Այս մասին հայտնում է ՀՀ գլխավոր դատախազությունը։ «Մասնավորապես, նկատի ունենալով, որ ՀՀ պաշտպանության նախարարության ռազմական վերահսկողության ծառայության նախկին պետ Մովսես Հակոբյանի հարցազրույցի հիման վրա ՀՀ ՀՔԾ-ում 2020թ. նոյեմբերի 21-ին ՀՀ քրեական օրենսգրքի 308-րդ հոդվածի 2-րդ մասով հարուցված, ինչպես նաև դրան միացված՝ Արա Զոհրաբյանի հաղորդման հիման վրա հարուցված քրեական գործով քննության առարկա են պատերազմից առաջ և դրա ընթացքում ՀՀ բարձրաստիճան պաշտոնատար անձանց կողմից հնարավոր կատարված այնպիսի արարքներ, որոնք բացասական նշանակություն են ունեցել զինված ուժերի մարտունակության հարցում և ազդել պատերազմի արդյունքի վրա, իսկ դատավարության մասնակից ճանաչելու վերաբերյալ ստացված պահանջի համաձայն՝ դրան կից ցուցակում նշված անձինք զոհվել են Արցախում տեղի ունեցած պատերազմի ընթացքում՝ քրեական վերոնշյալ գործով հսկողություն իրականացնող դատախազը գրավոր ցուցում է տվել վարույթն իրականացնող մարմնին (ՀՀ հակակոռուպցիոն կոմիտեի քննիչին) զոհված զինծառայողներին ճանաչել տուժող, իսկ պահանջ ներկայացրած նրանց ծնողներին, հարազատներին՝ տուժողի իրավահաջորդ: Բացի այդ, ապրիլի 26-ին ՀՀ գլխավոր դատախազությունում ստացվել է նաև առանձին պահանջ՝ 2020թ. արցախյան պատերազմի աղետալի հետևանքներին հանգեցրած պատճառների հանգամանքների վերաբերյալ ՀՀ հակակոռուպցիոն կոմիտեում միացված վարույթով քննվող վերոնշյալ քրեական գործով ՀՀ վարչապետ Նիկոլ Փաշինյանին ՀՀ քրեական օրենսգրքի 299-րդ հոդվածի 1-ին մասով, 308-րդ հոդվածի 2-րդ մասով և 309-րդ հոդվածի 3-րդ մասով որպես մեղադրյալ ներգրավելու վերաբերյալ: Հսկող դատախազի կողմից այս միջնորդությունն ուղարկվել է վերը նշված նույն գործով վարույթն իրականացնող քննիչին՝ ՀՀ քրեական դատավարության օրենսգրքի 102-րդ և 199-րդ հոդվածներով սահմանված կարգով քննարկելու նպատակով: ՀՀ դատախազությունը բոլոր միջոցները գործադրելու է՝ մասնավորապես 2020թ. աղետալի պատերազմին առնչվող քրեական գործերով դատավարության բոլոր մասնակիցների, այդ թվում նաև տուժողների և տուժողների իրավահաջորդների դատավարական իրավունքների լիարժեք իրացումը երաշխավորելու նպատակով, ինչի շրջանակներում մշտապես բաց է արդյունավետ հաղորդակցության համար: Միաժամանակ, հիշեցնում ենք, որ քրեական գործերի քննությունը, դրա օրինականության նկատմամբ դատախազական հսկողությունը, այդ շրջանակներում կայացվող դատավարական որոշումները կատարվում են բացառապես օրենքով սահմանված կարգով և չեն կարող կախված լինել հանրային գործընթացներից: Անթույլատրելի են իրավական դաշտից դուրս գտնվող ցանկացած գործոնով պայմանավորված՝ քննությունների ընթացի վրա ազդեցություն գործադրելու հրապարակային կոչերը: Դրանք չեն բխում իրավական պետության սահմանադրական հիմունքներից և քրեական արդարադատության շահերից»։

10:47 - 27 ապրիլի, 2022

Արթուր Դավթյանը դուրս եկավ դատախազության շենքից՝ զոհված զինծառայողների՝ բողոքի հավաք իրականացնող հարազատներին լսելու |news.am|

news.am: Դատախազության դիմաց բողոքի հավաք իրականացնող 44-օրյա պատերազմի ժամանակ զոհված զինծառայողների հարազատներին լսելու ու նրանց պահանջը հասկանալու համար գլխավոր դատախազ Արթուր Դավթյանը դուրս եկավ դատախազության շենքից: «Նազագույն խոսքը, որ կարող եմ ասել՝ խոնարհվում եմ բոլորիդ հերոս տղերքի շիրիմների առջեւ: Հազարավոր հերոս տղերք ենք կորցրել այս պտերազմում, տասնյակ հազարավորներն էլ հայրենասիրական ոչ պակաս մղումներով կանգնած են եղել առաջնագծում եւ ունեցել ենք պատերազմի այսպիսի ելք: Ես հասկացել եմ ձեր ցավը, ձեր վիշտը, դրա համար իջել եմ այստեղ: Բայց դուք տեսե՞լ եք, որ այսպիսի միջավայրում քրեական գործ քննվի: Սա քաղաքական գործունեություն իրականացնող մարմին չէ, որ պահի տակ հարցի պատասխան տա: Երբ խոսքը քրգործի մասին է, մենք գործ ունենք օրենքով նախատեսված իրավիճակների հետ»,-ծնողներին դիմելով՝ ասաց Արթուր Դավթյանը։ Նրա խոսքով, եթե խոսքը վերաբերում է մի քանի օր առաջ զոհված զինծառայողների ծնողների կողմից ներկայացրած հաղորդմանը, իրենք հրավիրել են ծնողներին եւ պարզաբանել, թե ինչ են արել: Գլխավոր դատախազը վստահեցրեց՝ դատախազական ներգործության ոչ մի միջոց չի ուշացել, այս պահին էլ դատախազական բոլոր հնարավոր գործիքակազմը կիրառվում է օբյեկտիվ քննություն իրականացնելու, վերջնական իրավական գնահատական տալու համար։ «Խնդիրն առաջացավ այն պահից, երբ վարչապետն ԱԺ ամբիոնից ձևակերպում արեց՝ որ «կարող էինք կանխել պատերազմը, որի հետևանքով մենք կունենայինք այս նույն վիճակը, իհարկե, առանց զոհերի»։ Այստեղից հարցադրում առաջացավ շատերի մոտ, որ միայն այս ձևակերպումը բավարար է, որպեսզի մեղադրանքի նկարագրություն ներկայացվի: իսկ ես հիմա հակառակն ասեմ, եթե առանց պաշտպանություն կազմակերպելու մեր հայրենիքից տարածքներ զիջվեին, նույն տրամաբանությամբ մեղադրանքի որոշում չէ՞ր գրվի»,- ասաց Ա. Դավթյանը։ Նա շարունակում էր իր խոսքը, սակայն ծնողներն արդեն նրան չէին լսում, իրենց հարցերն էին փորձում տալ։ Ա. Դավթյանն առաջարկեց հանդիպել 10 ծնողի հետ, հանգիստ իրավիճակում խոսեն, հարցեր տան, ինքն էլ պատասխանի։ Դատախազը շարունակեց. «Եթե պետք է իրար չլսենք, անիմաստ է մեր խոսակցությունը: Ես իջա, որպեսզի տեսնեք, որ չեմ խուսափում հարցերին պատասխանելուց։ Բայց նման պայմաններում անհնար է ստանալ հարցերի պատասխանները։ Ձեր պահանջի արդարացիությունը ոչ մի վայրկյան չի կարող վիճարկվել, եկել եք հասկանալու՝ այդ ուղղությամբ գործ արվում է, թե ոչ»,- ասաց Դավթյանը: «Չի արվում»,- արձագանքեցին զոհված զինծառայողների հարազատները։ Ծնողները չհամաձայնվեցին առանձին հանդիպել Արթուր Դավթյանի հետ։ Գլխավոր դատախազը հեռացավ, ակցիայի մասնակիցները պահանջեցին կալանավորել Նիկոլ Փաշինյանին։ «Նիկոլ դավաճան»՝ վանկարկում էին դատախազության դիմաց հավաքված զոհված զինծառայողների հարազատները։

18:02 - 26 ապրիլի, 2022

Փաշինյանը զանգվածային մարդասպանության մասին խոստովանություն է արել, պահանջելու ենք մեր հաղորդումը քննել առանձին․ զոհվածի ծնող |tert.am|

tert.am: Շառլ Ազնավուրի հրապարակից շարժվելու ենք Կառավարության շենքի մոտ, այդ ոճրագործներին նվեր ենք հանձնելու, ասելու ենք նրանց մասին այն, ինչ մտածում ենք, որից հետո շարժվելու ենք Դատախազություն՝ ներկայացնելու մյուս ծնողների կողմից ներկայացված փաստաթղթերը և ստորագրությունները, որոնք հավաքվել են ծնողների և հարազատների կողմից։ Այս մասին լրագրողների հետ զրույցում ասաց 44-օրյա պատերազմում զոհված, Ցորի զորամասի զինծառայողներից մեկի մորաքույրը՝ Անահիտ Մանասյանը։ «Մեզ կանչել են Դատախազություն, զրուցել ենք դատախազ Մուրադյանի հետ, մեզ ասաց, որ նույն անձի՝ Նիկոլ Փաշինյանի, վերաբերյալ ևս 4 հաղորդում է եղել հանցագործության մասին, դրանց ընթացք է տրվել և իրականացվում է քննություն։ Մեր ներկայացրած հաղորդումը նույնպես միանալու է այդ գործերին։ Մեզ համար սկբունքորեն անընդունելի է, որ մեր հաղորդումը քննվելու է մյուս հաղորդումների հետ նույն գործի շրջանակերում»,- ասաց Անահիտ Մանասյանը։ Ծնողները նշեցին, որ Փաշինյանի ելույթի մեջ կար զանգվածային սպանության մասին խոստովանություն և դիմելու են Հակակոռուպցիոն կոմիտե, որպեսզի գործը առանձնացվի և քննվի առանձին։ Հարցին՝ վստահություն կա՞, որ ներկա իշխանությունների օրոք պատշաճ քննություն կիրականցվի, Մանասյանը ասաց․ «Չի՛ կարելի բոլոր պետական կառույցների նկատմամբ անվստահություն հայտնել և ոչինչ չանել։ Հետևողական ենք լինելու, որ պատշաճ քննություն տարվի։ Գլխավոր լուսանկարը՝ Photolure-ի

15:10 - 26 ապրիլի, 2022

Oրենսդրական պահանջների խախտմամբ գնվել են որակական պահանջներին չհամապատասխանող և բարձր արժեքով վրաններ. մեղադրանք է առաջադրվել 5 անձի

11:23 - 26 ապրիլի, 2022

Գլխավոր դատախազը՝ Փաշինյան-Վանեցյան-Սասուն Խաչատրյան գաղտնալսման գործի մասին |factor.am|

factor.am: ՀՀ Ազգային ժողովում ընթացող ճեպազրույցի ընթացքում Գլխավոր դատախազ Արթուր Դավթյանը մանրամասներ հայտնեց Փաշինյան-Վանեցյան-Սասուն Խաչատրյան գաղտնալսման գործի մասին։ «Կոպիտ է հնչում՝ անկարող, բայց, այո, ցավոք, բոլոր այն քրեական գործերով, որոնցով մենք հանգամանքների լիարժեք բացահայտում չունենք, նաև դուք իրավունք ունեք այդպիսի գնահատական տալու»,- ասաց Արթուր Դավթյանը՝ պատասխանելով հարցին, թե ի վերջո ո՞վ էր գաղտնալսել ԱԱԾ նախկին տնօրեն Արթուր Վանեցյանի, ՀՔԾ նախկին պետ Սասուն Խաչատրյանի ու Նիկոլ Փաշինյանի խոսակցությունը, ինչո՞ւ իրավապահ համակարգն այդքան անկարող գտնվեց, որ չբացահայտեց այդ դեպքը։ Գլխավոր դատախազը նշեց, որ եթե այդ դեպքը բացահայտված լիներ, հրապարակային այդ մասին ասված կլիներ:

16:48 - 22 ապրիլի, 2022

Հանցագործությունները, բանակում մահվան դեպքերն ու կոռուպցիան 2021-ին. դատախազության թվերը |civilnet.am|

civilnet.am: 2021-ին գլխավոր դատախազության ապօրինի ծագում ունեցող գույքի բռնագանձման գործերով վարչության վարույթում առկա է եղել 279 ուսումնասիրություն, որոնք նախաձեռնվել են 2020-2021թթ․։ Ավարտված ուսումնասիրություններով բացահայտվել է ենթադրյալ ապօրինի ծագում ունեցող 94 անշարժ և 23 շարժական գույք, 23 ընկերությունում մասնակցություններ, ինչպես նաև ընդհանուր հաշվով ավելի քան 27 մլրդ դրամի չափով գումար։ Դատարան է ներկայացվել 3 հայցադիմում, որոնցով պահանջվում է հօգուտ Հայաստանի բռնագանձել 18 անշարժ ու 7 շարժական գույք, որոնց միջին շուկայական արժեքների հանրագումարը կազմում է 13 մլրդ դրամ, 3 իրավաբանական անձի մասնակցություն և շուրջ 6 մլրդ դրամի չափով գումար։ Հայցադիմումներն ընդունվել են վարույթ։ 2021-ին՝ նախորդող տարվա համեմատ, 91%-ով պակաս գումար է վերականգնվել բյուջե 2021-ին կոռուպցիոն բնույթի հանցագործությունների վերաբերյալ նախապատրաստվել է 1 409 նյութ (2020-ին՝ 1 810 նյութ), որոնցից 798-ով (2020-ին՝ 1 232) հարուցվել են քրեական գործեր։ Ըստ դատախազության՝ 2020-ի համեմատ, 2021-ին 401-ով կամ 22,2%-ով նվազել են կոռուպցիոն բնույթի դեպքերը, իսկ հարուցված քրեական գործերի քանակը՝ 35,2%-ով կամ 434-ով՝ կազմելով 798։ 2021-ին ավարտվել է կոռուպցիոն բնույթի 730 քրեական գործի վարույթ, որը նախորդող տարվա արդյունքից ընդամենը 2%-ով է շատ։ 2021-ին շուրջ 91%-ով կամ ավելի քան 4 մլրդ դրամով պակաս գումար է վերականգնվել բյուջե, քան 2020-ի ընթացքում (2020-ին` 4,5 մլրդ դրամ, իսկ 2021-ին՝ ընդամենը 400 մլն դրամ): Այլ կերպ ասած, 2021-ին ավարտված քրեական գործերով պատճառված վնասից վերականգնվել է 9%-ը, մինչդեռ 2020-ին՝ 71,4% տոկոսն էր։ Հանցագործության ընդհանուր դեպքերի աճ է արձանագրվել 2021-ին հանրապետությունում արձանագրվել է հանցագործությունների 30 245 դեպք (2020-ին՝ 26 468), որոնցից 16 438-ը՝ Երևանում։ Այսինքն՝ նախորդ տարվա համեմատդեպքերն աճել են 3 777-ով կամ 14,3%-ով։ Ըստ դատախազության՝ հանրապետությունում հանցագործությունների աճը հիմնականում պայմանավորվել է հասարակական անվտանգության և կարգի, բնակչության առողջության, սեփականության և տնտեսական գործունեության դեմ ուղղված հանցագործությունների դեպքերի աճով։ Էականորեն աճել են թմրամիջոցների մաքսանենգության (89,2%-ով), համակարգչային տեղեկատվության անվտանգության դեմ ուղղված (74,5%-ով), ապօրինի կամ կեղծ ձեռնարկատիրության (28%-ով) դեպքերը։ Նվազել է հրազենի գործադրմամբ կատարված հանցագործությունների թիվը․ 2021-ին արձանագրվել է 57 նման դեպք, մինչդեռ նախորդ տարի 83 էր, այսինքն՝ 26-ով կամ 31,3%-ով ավելի։ Շարունակությունը՝ civilnet.am-ում

15:13 - 22 ապրիլի, 2022

ԱԺ-ում Փաշինյանի հայտարարությունը հարուցված քրգործի շրջանակում քննության առարկա կդառնա․ մեզ ոչինչ չի կաշկանդում.Դավթյան |news.am|

14:31 - 22 ապրիլի, 2022

44-օրյա պատերազմին առնչվող գործերով քրեական հետապնդում է հարուցվել 800 անձի նկատմամբ. Դավթյան |armenpress.am|

12:56 - 22 ապրիլի, 2022

2022 թվականի առաջին եռամսյակում վերականգնվել է պետությանը հասցված 19 միլիարդ դրամի վնաս |armenpress.am|

armenpress.am: Դատախազության ավանդական առաջնահերթությունը շարունակում է մնալ կոռուպցիայի դեմ պայքարը: Ազգային ժողովի պետական-իրավական հարցերի մշտական հանձնաժողովի նիստի ժամանակ այս մասին ասաց ՀՀ գլխավոր դատախազ Արթուր Դավթյանը՝ ներկայացնելով Հայաստանի Հանրապետության դատախազության 2021 թվականի գործունեության մասին հաղորդումը: «2021 թվականի ընթացքում կոռուպցիոն բնույթի հանցագործություններ կատարելու համար քրեական հետապնդում է իրականացվել 1698 անձի նկատմամբ` նախորդ տարվա համեմատ մոտ 300-ով ավելի: Այդ 1698 անձանցից մոտ 600-ը հանդիսացել են պաշտոնատար անձ»,- ասաց Դավթյանը: Գլխավոր դատախազի խոսքով ընթացքում հաջողվել է քննությունն ավարտել և դատի տալ շուրջ 433 անձի կոռուպցիոն հանցագործություններ կատարելու համար: «Տարվա ավարտի դրությամբ ընթացիկ կոռուպցիոն բնույթի քրեական գործերով բացահայտված պետությանը պատճառված վնասը կազմել է 443 միլիարդ դրամ: Միայն 2021 թվականի ընթացքում փաստացի քննության փուլում վերականգնվել է 7 միլիարդ դրամի վնաս: Այս քրեական գործերի մեծամասնությունը բավականին երկար ժամանակ քննվող քրեական գործեր են: Ակնհայտ է, որ պետությանը պատճառված վնասի հաշվարկը, պարզումը, դրա պատշաճ ապացուցողական բազայով հիմնավորումը ժամանակատար գործընթաց է և որպես կանոն դա շատ հաճախ պայմանավորված է նաև հատուկ գիտելիքների կիրառմամբ, այսինքն` փորձաքննությունների նշանակմամբ, որն էլ բերում է քննության երկարատևության: Դրա համար մենք դեռևս 1-1.5 տարի առաջ հարուցված քրեական գործերով իրական արդյունքները տեսնում ենք շատ ավելի ուշ: Համեմատության համար նշեմ, որ միայն այս տարվա առաջին եռամսյակում ունենք 19 միլիարդ դրամի պետությանը պատճառված վնասի վերականգնում: Դա վկայությունն է նրա, որ ավելի վաղ հարուցված քրեական գործերը արդեն մոտենում են իրենց հանգուցալուծումներին»,- եզրափակեց Դավթյանը:

12:29 - 22 ապրիլի, 2022