ՌԴ - infocom.am

ՌԴ

Ռուսաստանը (պաշտոնական անվանումը՝ Ռուսաստանի Դաշնություն) միջմայրցամաքային պետություն Եվրասիայի հյուսիսարևմտյան հատվածում։ Տարածքի հիմնական մասը գտնվում է Հյուսիսային Ասիայում, իսկ որոշակի հատված՝ նաև Արևելյան Եվրոպայում: ՌԴ-ն աշխարհի խոշորագույն պետությունն է և զբաղեցնում է երկրագնդի ցամաքային տարածքի 1/8-ը։ Բնակչության թվով 9-րդն է աշխարհում․ ըստ 2018-ի մարդահամարի տվյալների՝ ավելի քան 144 մլն մարդ։ Երկրի ազգաբնակչության 77%-ը կենտրոնացված է արևմուտքում՝ եվրոպական հատվածում։

Մայրաքաղաքն է Մոսկվան։ Վերջինս համարվում է Եվրոպայի խոշորագույն քաղաքը, ինչպես նաև խոշորագույններից մեկն ամբողջ աշխարհում։ ՌԴ նշանավոր քաղաքներից են նաև Սանկտ Պետերբուրգը, Նովոսիբիրսկը, Եկատերինբուրգը և Նիժնի Նովգորոդը։ Պետական լեզուն ռուսերենն է։ Խոշոր ազգային փոքրամասնություններն են թաթարները, ուկրաինացիները, բաշկիրները, հայերը, չուվաշները, չեչենները և այլն։

Ռուսաստանը նախագահական կառավարմամբ դաշնային հանրապետություն է, որտեղ նախագահը՝ պետության, իսկ վարչապետը՝ կառավարության ղեկավարն է։ ՌԴ գործող նախագահն է Վլադիմիր Պուտինը, վարչապետը՝ Միխայիլ Միշուստինը։

Քույրերին պաշտպանելիս, մենք մեզ ենք պաշտպանում․ ցույց Ռուսաստանի դեսպանատան դիմաց |epress.am|

epress.am: Հունիսի 24-ին միջազգային սոլիդարության ակցիայի շրջանակներում մի քանի տասնյակ մարդիկ բողոքի ցույցի էին դուրս եկել Հայաստանում Ռուսաստանի դեսպանատան մոտ՝ իրենց աջակցությունը հայտնելու Մոսկվայում հոր սպանության մեջ մեղադրվող Խաչատուրյան քույրերին։ Ցուցարարների պահանջն է՝ ազատել Անգելինա, Քրիստինա և Մարիա Խաչատուրյաններին, նրանց դեմ հարուցված քրեական գործը վերաորակավորել որպես ինքնապաշտպանություն։Ցույցի մասնակիցները պաստառներ էին բերել՝ «Մենք Խաչատուրյան քույրերն ենք․ Ազատություն Խաչատուրյան քույրերին», «8-20 տարի անպատժելիության և պետության անգործության համա՞ր», «Ինքնապաշտպանությունը հանցագործություն չէ», «Երեխաները չպիտի դառնան ընտանեկան բռնության զոհ։ Բռնությունը արդարացում չունի։ Ես Խաչատուրյան քույր եմ։», «Պահանջում ենք ընտանեկան բռնության մասին օրենք», «Կանայք հրաժարվում են մեռնել» գրառումներով։Ցուցարարներից երկուսին հարվածելուց հետո ոստիկաննությունը ակցիայի վայրից բերման ենթարկեց երկու քաղաքացիների՝ տարեց մի կնոջ, ով ցույցի ողջ ընթացքում վիրավորանքներ էր հնչեցնում ցուցարարների և Խաչատուրյան քույրերի հասցեին և հարցազրույցներ տալիս իր շուրջը հավաքված լրագրողներին, և մի տղամարդու, ով միացավ նրան վերջում։ Ոստիկանական բաժանմունք հրավիրվեցին նաև հարձակման ենթարկված ցուցարարները։ Հիշեցնենք, որ Խաչատուրյան քույրերին, ովքեր մեղադրվում են հոր՝ Միխայիլ Խաչատուրյանի սպանության մեջ,, հունիսի 13-14-ին վերջնական մեղադրանք է առաջադրվել․ նրանց մեղսագրվում է Ռուսաստանի քրեական օրենսգրքի 105 հոդվածի 8-րդ կետով նախատեսված հանցանքը, այն է՝ խմբակային սպանություն միտումնավոր դիտավորությամբ, որը ենթադրում է 8-ից 20 տարի ազատազրկում։ Այսինքն՝ քրեական գործի նախնական որակավորումը մնացել է անփոփոխ․ քույրերի փաստաբաններն ու մեծաթիվ աջակիցները լիահույս էին, որ քննչական մարմինը՝ հաշվի առնելով նախաքննության ընթացքում ի հայտ եկած բազմաթիվ փաստերը, կփոխի հոդվածը առնվազն «ինքնապաշտպանության սահմանազանցման»։ Արդյունքում փոխվեց միայն հանցագործության դրդապատճառը, որն այժմ պաշտոնապես ձևակերպված է որպես «անձնական թշնամանք՝ պայմանավորված հոր կողմից դուստրերին պատճառված երկարատև ֆիզիկական և հոգեբանական տանջանքներով»։Փաստացի, Խաչատուրյան քույրերի հարևանների, համադասարանցիների, դպրոցի աշխատակիցների, մոր և եղբոր վկայությունները՝ մշտական բնույթ կրող սպառնալիքների, բռնությունների և խոշտանգումների մասին, ինչպես նաև դատաբժշկական փորձաքննությունները, որոնք հաստատեցին հոր կողմից սեռական շահագործման և սեռական բռնությունների ենթարկվելու մասին քույրերի վկայությունները, ի վերջո՝ փորձաքննությունները, որոնք հաստատեցին հոր կախվածությունը ծանր թմրանյութերից և հոգեմետ դեղերից, տեղեկությունները քրեական աշխարհի հետ սպանվածի կապերի մասին, ինչպես նաև՝ պետական ծառայողի՝ հատուկ ծառայությունների աշխատակցի կեղծ վկայականները, որոնք հայտնաբերվեցին Միխայիլ Խաչատուրյանի տանը և որոնցով, ըստ դպրոցի աշխատակիցների, նա լռեցնում և կասեցնում էր բոլոր ահազանգների և դիմումների ընթացքը, ինչպես նաև վկայություններն առ այն, որ տարիներ շարունակ քույրերը օգնություն են խնդրել ծանոթներից, անցանոթներից, դպրոցի աշխատողներից, իսկ նրանց մայրը՝ նաև ոստիկանությունից, բայց բոլոր դեպքերում հայտնվել են պետական և հանրային պաշտպանությունից դուրս, անգամ հոգեբուժական եզրակացությունները քույրերի հոգեկան անկայությունյան և քույրերից ամենափոքրի՝ Մարիայի, անգիտակից լինելու մասին, ամեն դեպքում, հիմք չդարձան գործի վերաորակավորման համար։ Աղջիկները դատվելու են քրեական օրենսգրքի ամենածանր հոդվածներից մեկով։ Նախաքննությունը հայտարարվել է ավարտված, գործի նյութերը սեղմ ժամկետներում կփոխանցվեն դատարան։Ռուսաստանում ի աջակցություն Խաչատուրյան քույրերի օրեր շարունակ բողոքի ցույցեր և պիկետներ են տեղի ունենում․ մարդիկ դուրս են գալիս փողոց նույն պահանջներով՝ փոխել քրեական գործի որակավորումը, բացառել քույրերի կալանավորումը, ընտանեկան բռնության մասին օրենք ընդունել։ Սոցիալական ցանցերում սկսվել է «Մենք Խաչատուրյան քույրերն ենք» խորագրով արշավ, որը հղվում է վերջերս Ռուսաստանում ի աջակցություն հետաքննող լրագրող Իվան Գոլունովի բարձրացած բողոքի ալիքին, որի շնորհիվ կասեցվեց նրա նկատմամբ շինծու քրեական հետապնդումը։ Երևանում այսօր տեղի ունեցած բողոքի ցույցը, ըստ մասնակիցների, մաս է կազմում այս արշավի։

06:48 - 25 հունիսի, 2019

Ընտանեկան բռնությունից ինքնապաշտպանություն․ Խաչատուրյան քույրերի պատմությունը

Վերջին օրերին Ռուսաստանում ամենաքննարկվող թեման Խաչատուրյան քույրերի քրեական գործն է, որոնք սպանել են իրենց հորը։ Հունիսի 14-ին քրեական գործով մեղադրանք առաջադրվեց Քրիստինա, Անգելինա եւ Մարիա Խաչատուրյաններին՝ ՌԴ Քրեական օրենսգրքի 105-րդ «Խմբակային սպանություն միտումնավոր դիտավորությամբ» հոդվածով։ Այս դեպքում քրեական օրենսգիրքը նախատեսում է ազատազրկում 8-ից 20 տարի կամ ցմահ բանտարկություն, սակայն ցմահ ազատազրկումը Ռուսաստանում չի տարածվում կանանց վրա: Մեղադրանքի առաջադրումից հետո սոցցանցերում ֆլեշմոբ է սկսվել ի աջակցություն Խաչատուրյան քույրերի՝ Մարիայի, Քրիստինայի և Անգելինայի։ Change.org կայքում ստորագրահավաք է սկսվել՝ ի պաշտպանություն քույրերի, որտեղ կոչ են անում կասեցնել քույրերի նկատմամբ հարուցված քրեական գործը։ Ստորագրությունների թիվը այս պահին հասել է 50 868-ի։ Քույրերի պաշտպանությամբ են հանդես եկել մի շարք հայտնի անձինք, ակտիվիստներ, հրապարակախոսներ, գրողներ։ Նրանց թվում է նաև հայտնի գրող Նարինե Աբգարյանը , ով նշել է, որ աղջիկները տարիներ շարունակ ապրել են դժոխքում և մեղադրվում են այն բանի համար, որ թույլ չեն տվել, որ հայրն իրենց ոչնչացնի։ «Եթե օրենքը չունի ընտանեկան բռնությունից պաշտպանելու մասին ենթադրյալ հոդված, ապա այն պետք է շտապ ձեւակերպվի եւ ներկայացվի։ Եվ իր դաժանությամբ ու անարդարությամբ չլսված այդ պատմությունը պետք է դառնա դատական նախադեպ: Խաչատուրյան քույրերը պետք է ազատ արձակվեն: Այս գործից այլ ելք չկա»,- գրել է նա: Խաչատուրյան քույրերի պատմությունը ամբողջ Ռուսաստանում հայտնի դարձավ անցած տարվա ամռանը։ 2018 թվականի հուլիսի 27-ին Մոսկվայի շենքերից մեկի մուտքի մոտ հայտնաբերել էին հայազգի գործարար Միխայիլ Խաչատուրյանի դին։ Քննչական նյութերում նկարագրված է՝ «57-ամյա մի տղամարդ՝ պարանոցի եւ կրծքավանդակի շրջանում սուր կտրող ու ծակող գործիքով ստացված բազում վերքերով»: «Նովայա Գազետա» պարբերականը, հղում անելով գործի նյութերին, գրում է , որ հայրը հերթական անգամ պատժել է աղջիկներին, որովհետև «տանը ամեն ինչ իր տեղում չէ», «հատակին մազեր կան» և «բանկային քարտից պակասել է 14000 ռուբլի»։ Միխայիլ Խաչատուրյանը հերթով սենյակ է կանչել աղջիկներին, բարկացել և նրանց դեմքներին արցունքաբեր գազ է փչել։ Այնուհետև պառկել է իր բազմոցին և քնել։Ամենից շատ գազը լցվել է ավագ աղջկա՝ Քրիստինայի աչքերին և դեմքին։ Նա երկար ժամանակ սրտխառնոց է ունեցել և գտնվել է միայնակ՝ այլ սենյակում։ Հոր քնելուց հետո մյուս երկու քույրերը որոշում են, որ այլևս չեն կարող հանդուրժել հոր բռնությունները և որոշում են հարձակվել նրա վրա մուրճով եւ դանակով: Առաջին հարվածները քույրերը հասցրել են վզին և գլխին, երբ հայրը դեռ քնած էր։ Չհասկանալով ինչ է կատարվում՝ Միխայիլ Խաչատուրյանը արթնանում է և բղավում։ Հոր ձայնը լսելով՝ Քրիստինան ներս է վազում և, երբ տեսնում է արյունը, մտածում է, որ հայրը քույրերին է հարվածում։ Նա վերցնում է գետնին ընկած արցունքաբեր գազը և փչում է հոր դեմքին և փախչում է սենյակից դուրս։ Հայրը բազմոցից վեր է կենում և վազում նրա հետևից։ Հոր հետևից վազում է միջնեկ քույրը՝ Անգելինան, և դանակով հարվածներ է հասցնում հոր կրծքավանդակին՝ սրտի մոտ։ Քույրերից մեկը ցանկացել է ամբողջ մեղքը վերցնել իր վրա, սակայն նրանք չեն հասցրել «բոլոր մանրամասները հաշվարկել» և որոշել է ամեն ինչ խոստովանել։ Օգոստոսի 2-ին 17, 18 և 19 տարեկան քույրերը սպանության կասկածանքով ձերբակալվում են։ Նրանք խոստովանում են մեղքը: Ինչպես ասվում է ՌԴ Քննչական կոմիտեի հաղորդագրության մեջ, հարցաքննության ժամանակ աղջիկները պատմել են, որ հոր հանդեպ «անձնական հակակրանք են ունեցել, քանի որ վերջինս տևական ժամանակ նրանց բարոյական տառապանքներ է պատճառել»: 3 ամիս անց Բասմանի շրջանի դատարանն ազատում է քույրերին քննչական մեկուսարանից, որտեղ նրանք 2 ամիս էին անցկացրել: Բոլորի հանդեպ կիրառվում է խափանման նոր միջոց՝ որոշակի գործողությունների արգելք, այդ թվում բջջային կապի և ինտերնետի կիրառման: Քույրերը մեղադրվում են նախնական պայմանավորվածությամբ կատարած սպանության մեջ, թեեւ պաշտպանական կողմը պնդում է, որ աղջիկները կանխամտածված չեն գործել եւ ծայրահեղ զգացմունքային վիճակում են եղել՝ հոր կողմից երկարատեւ ոտնձգությունների պատճառով: Գործի հրապարակային դառնալուց հետո հայտնի են դառնում ընտանեկան բռնության սարսափելի մանրամասներ: Աղջիկների մայրը , Աուրելիա Դունդուկը, պատմել է, որ ամուսինը ծեծել է նրան ամուսնական առաջին օրվանից և թույլ չի տվել տնից դուրս գալ։ «Ես մոտ 5 տարի փողոց դուրս չեկա: Փոքրս՝ Մարիամը, մեկ տարեկան էր, երբ նա քիչ թե շատ սկսեց ինձ թույլ տալ տնից դուրս գալ։ Ես նաև իրավունք չունեի խոսել հեռախոսով՝ առանց նրա թույլտվության», - ասել է մայրը։ Սպանությունից երեք տարի առաջ, բռնություններին չդիմանալով, մայրը հեռացել է տնից։ Մոր մեկնելուց հետո քույրերը մնացել են հոր մոտ։ «Նա մեզ ծեծի էր ենթարկում ամեն փոքր բանի համար։ Նրա պատկերացմամբ կինը ստրուկ է», - պատմում է աղջիկներից մեկը։ Ֆիզիկական բռնությունից բացի քույրերը պատմում են նաև սեռական բռնության մասին։ Միջնեկ քույրը նշել է, որ իր նկատմամբ սեռական բռնությունները հոր կողմից սկսվել են 14 տարեկանում։ Հայրը հիմնականում սեռական բռնությունների է ենթարկել մեծ և միջնեկ աղջիկներին։ Քույրերը իրենց մորը չեն պատմել այդ մասին՝ վերջինիս չանհանգստացնելու համար։ Ավելի ուշ քննությունը պարզել է, որ Միխայիլ Խաչատուրյանը բռնի սեռական հարաբերություններ էր ունեցել դուստրերի հետ։ Փորձաքննության ժամանակ հայտնաբերվել են հոր և աղջիկներից մեկի ԴՆԹ հետքերը անկողնու վրա։ Քույրերի փաստաբան Ալեքսեյ Լիպցերը պատմել է, որ Միխայիլ Խաչատուրյանի դեմ քրգործ էր հարուցվել «մանկապղծության» «սեռակն բնույթի գործողությունների պարտադրման», «բռնաբարության» կամ «անչափահասների հանդեպ սեռական բնույթի գործողությունների» մեղադրանքով: Այս պահին մեղադրանքը տարածվում է ավագ և միջնեկ քույրերի վրա և նրանց սպառնում է 8-20 տարվա ազատազրկում։ Կրտսերն անմեղսունակ է ճանաչվել և ազատվել է քրեական պատասխանատվությունից։ «Մեղադրյալների գործողությունները գնահատելիս՝ հաշվի է առնվել, որ հանցագործության դրդապառճառը եղել է անձնական հակակրանքը, որը պայմանավորված էր այն հանգամանքով, որ հայրը տևական ժամանակ ֆիզիկական և հոգեկան տառապանքներ է պատճառել իր դուստրերին»,-ասվում է ՌԴ Քննչական կոմիտեի հայտարարության մեջ։ Քույրերի փաստաբանները նշում են, որ համաձայն չեն մեղադրանքի հետ։ «Աղջիկների գործողություններում որևէ պայմանավորված սպանություն չի եղել։ Եղել է մշտական բռնություն թե՛ ֆիզիկական, թե՛ սեռական։ Քրիստինան վազել է սենյակ՝ մտածելով, որ հայրը կրկին բռնության է ենթարկում քրոջը և փորձել է պղպեղը շփել երեսին։ Սակայն անգամ դա չի հաջողվել և դուրս է վազել։ Այդ մասին վկայում են քննության նյութերը և մյուս քրոջ վկայությունը։ Սակայն Քրիստինայի նկատմամբ քրեական հետապնդումը դադարեցնելու բողոքը մերժվեց»,- նշել է պաշտպան Ալեքսեյ Լիպցերը։ Փաստաբանի խոսքով, հաշվի առնելով այն փաստը, որ աղջիկները ենթարկվել են մշտական բռնության, նրանք պետք է ազատված լինեն քրեական պատասխանատվությունից եւ քրեական գործ հարուցվի Խաչատուրյանի դեմ: Քույրերի փաստաբանները երեկ բողոք են ներկայացրել նախաքննական մարմնի ղեկավար Ալեքսանդր Բաստրիկինի՝ մեղադրանքի վերջնական ձեւակերպման դեմ: Նրանք պահանջում են, որպեսզի գործը վերաձևակերպվի որպես ինքնապաշտպանություն աղջիկների կողմից կամ ընդհանրապես վերացվի նրանց նկատմամբ քրեական հետապնդումը։ Աստղիկ Գաուդյան

14:52 - 19 հունիսի, 2019