Ինֆոքոմ

Ի տարբերություն մյուսների՝ մենք 5 տարվա քրտնաջան աշխատանքի արդյունքներով ենք ներկայանում հասարակությանը․ Մամիկոն Ասլանյան

Ի տարբերություն մյուսների՝ մենք 5 տարվա քրտնաջան աշխատանքի արդյունքներով ենք ներկայանում հասարակությանը․ Մամիկոն Ասլանյան

Դեկտեմբերի 5-ին Լոռու մարզի Վանաձոր համայնքում կանցկացվեն ՏԻՄ ընտրություններ՝ համամասնական ընտրակարգով։ Այս ընտրություններին Վանաձորի նախկին քաղաքապետ Մամիկոն Ասլանյանը գլխավորում է նորաստեղծ «Մամիկոն Ասլանյան» դաշինքի նախընտրական ցուցակը։ Դաշինքը կազմված է «Ազատ դեմոկրատներ» և «Իմ հզոր հայրենիք» կուսակցություններից։ Թեեւ Մամիկոն Ասլանյանը 2016 թ․-ի Վանաձորի ՏԻՄ ընտրություններին առաջադրվել էր Հայաստանի Հանրապետական կուսակցության ցուցակով, նա այժմ անկուսակցական է։ Այս տարվա հոկտեմբերի 12-ին համայնքապետի պաշտոնում Մամիկոն Ասլանյանի լիազորությունները դադարեցվել էին․ վարչապետի որոշմամբ Վանաձոր համայնքի ղեկավարի պաշտոնակատար էր նշանակվել Վանիկ Օհանյանը (Օհանյանը Վանաձորի այս ընտրություններում «Քաղաքացիական պայմանագրի» ցուցակի երկրորդ համարն է)։ Ասլանյանը Infocom-ի հետ զրույցում ասաց, որ քարոզարշավը իրենց համար բնականոն հունով է ընթանում․ «Կան քաղաքական ուժեր, որ իրենց կոռեկտ չեն պահում վանաձորցիների նկատմամբ, բայց աշխատում ենք հարթել, աշխատում ենք առաջ շարժվել։ Ակնկալիքն, ինչպես բոլորի մոտ, հաջողության հասնելն է։ Ի տարբերություն մյուսների՝ մենք 5 տարվա քրտնաջան աշխատանքի արդյունքներով ենք ներկայանում հասարակությանը և հասարակությունից ակնկալում ենք մեր գնահատականը»։ Հարցին, թե ըստ Մամիկոն Ասլանյանի՝ ո՞ր քաղաքական ուժերը իրենց կոռեկտ չեն պահում, վերջինս պատասխանեց, որ իշխող ուժի մասին է խոսում․ «Ֆեյսբուքյան տիրույթում, լրատվամիջոցներում տեսած կլինեք, մարդկանց են գործից ազատում լայքերի համար, մարդկանց հետ շփումների համար, այլ թիմերի հետ համագործակցելու համար»։ Ասլանյանը նշեց նաև, որ քաղաքացիների հետ աշխատանքի միջոցով են փորձում նման երևույթների դեմ պայքարել․ «Մենք հակադարձում ենք, քաղաքացիներին հորդորում ենք չտրվել սադրանքների, որովհետև ամեն դեպքում վանաձորցին պետք է ընտրի համայնքի ապագա ղեկավարին, և նաև այն մարդկանց, աշխատանքային խմբին, ում ինքը վստահում է։ Ավելի շատ քաղաքացիների հետ աշխատանքով ենք անում, քան այլ դեբատների մեջ մտնելով»։ Համայնքապետի թեկնածուի դիտարկմամբ՝ Վանաձորում գլոբալ խնդիրներ կան, որոնք կարող են լուծվել մեծ ներդրումների միջոցով, կառավարության աջակցությամբ, որովհետև համայնքային բյուջեով հնարավոր չէ այդ հարցերը լուծել․ «Մասնավորապես տնակային ավան ունենք Վանաձորում, 84 բազմաբնակարան շենքեր ունենք, որոնք կամ պիտի ամրացվեն, կամ պետք է որոշվի դրանց հետագա ճակատագիրը։ Մնացած հարցերը, որոնք ավելի համայնքային լուծելիության տիրույթում են, դրանք հերթով լուծվում են, հերթականությամբ գնում ենք, առաջիկայում կլինի տրանսպորտային ցանցի վերազինում»։ Նա նաև ասաց, որ ներդրումների միջոցով են պատկերացնում տնակային ավանների խնդրի լուծումը։ Ասլանյանի համոզմամբ՝ իրենց առաջարկած լուծմամբ խնդիրը դանդաղ, բայց հաստատուն կերպով կլուծվի․ «Մենք ունենք տարածքներ, որտեղ գտնվում են այդ տնակային ավանները, ներդրումային մի ծրագրի միջոցով այդ տարածքը կտրամադրվի այլ ներդրումային ծրագրի, որի փոխարեն կկարողանանք լուծել տնակային ավանի խնդիրները»։ Վանաձորը ներառվել է համայնքների խոշորացման նախագծում և գտնվում է խոշորացման փուլում․ ըստ կառավարության ներկայացրած և ԱԺ-ում ընդունված այդ նախագծի՝ Վանաձոր քաղաքին են միանում նաև Գուգարք, Դարպաս, Շահումյան գյուղերը։ Ասլանյանը վստահեցրեց՝ լավատեղյակ է Վանաձորին միացող գյուղերի խնդիրներին․ «Դրանք մեզ կպած գյուղական համայնքներ են, բոլորի խնդիրներին գրեթե ամբողջությամբ ծանոթ եմ։ Այս պարագայում անհրաժեշտ է մուլտիմշակութային նոր տիրույթ ստեղծել, քանի որ Վանաձորը երբեք գյուղական բաղադրիչ չի ունեցել, պետք է աշխատենք, որ ոչ քաղաքը գյուղին կլանի, ոչ էլ գյուղը քաղաքին կլանի, որպեսզի մենք բազմաշերտ մշակույթ ստեղծենք, որ մեկը մյուսին լրացնեն, և երկուսն էլ համաչափորեն զարգանան»։ Իսկ թե ինչու Մամիկոն Ասլանյանը այս անգամ ընտրություններին չի մասնակցում ՀՀԿ ցուցակով, վերջինս այսպես պատասխանեց․ «Ինչով որ հարմար եմ գտել, դրանով էլ մասնակցում եմ»։ Նա վստահ է՝ վանաձորցիները ՏԻՄ ընտրություններն որոշում կկայացնեն՝ համեմատություն կատարելով և մի շարք հանգամանքներ հաշվի առնելով։ Վանաձորի ՏԻՄ ընտրություններին 10 քաղաքական ուժ է մասնակցելու՝  9 կուսակցություն և 1 դաշինք։ Հայաստանի աշխատավորական սոցիալիստական կուսակցությունը ընտրություններին մասնակցելու է Վանաձոր համայնքի ղեկավարի առաջին տեղակալ, Վանաձորի ավագանու անդամ Արկադի Փելեշյանի գլխավորությամբ, «Այլանս» առաջադիմական ցենտրիստական կուսակցությունը՝ ՀՀ էլեկտրական ցանցերի Դեբեդ մասնաճյուղի իրացման պետ Կարեն Էդարյանի գլխավորությամբ։ «Քաղաքացիական պայմանագիր» կուսակցության համայնքապետի թեկնածուն Լոռու ներկայիս մարզպետ Արամ Խաչատրյանն է։ «Հանրապետություն» կուսակցությունը մասնակցելու է Վազգեն Թորոսյանի գլխավորությամբ․ վերջինս չի աշխատում։ «Ապրելու երկիր» կուսակցության ցուցակն էլ գլխավորելու է Արտավազդ Ալավերդյանը, որը Վանաձորի «Դիետ» ՍՊԸ-ի գործադիր տնօրենն է։ «Լուսավոր Հայաստան» կուսակցության համայնքապետի թեկնածուն Հրանտ Այվազյանն է, ով 7-րդ գումարման Ազգային ժողովի «Լուսավոր Հայաստան» խմբակցության անդամ է եղել, հիմա դասախոսում է  Հայաստանի ազգային պոլիտեխնիկական համալսարանի Վանաձորի մասնաճյուղում։ «Հայրենիք» կուսակցությունը Վանաձորի ՏԻՄ ընտրություններին մասնակցելու է Վահե Դոխոյանի գլխավորությամբ, որը «Հայրենիք» զարգացման հիմնադրամի Լոռու մարզային  գրասենյակի ղեկավարն է։ «Բարգավաճ Հայաստանի» ցուցակը գլխավորելու է Էդգար Բոջուկյանը, ով չի աշխատում։  Վանաձորի նախկին քաղաքապետ Մամիկոն Ասլանյանը ընտրություններին մասնակցելու է  «Մամիկոն Ասլանյան» դաշինքով․ նա այժմ չի աշխատում։  Հայաստանի կոմունիստական կուսակցությունն էլ ընտրություններին մասնակցելու է ՀԿԿ կենտկոմի առաջին քարտուղար, Վանաձորի քաղաքային կազմակերպության առաջին քարտուղար Արկադի Ղուկասյանի գլխավորությամբ։ Լուսանկարը՝ Մամիկոն Ասլանյանի ֆեյսբուքյան էջից Նանե Ավետիսյան
11:05 - 29 նոյեմբերի, 2021
Ռուսաստանում «օմիկրոն» ենթատեսակը դեռ չի հայտնաբերվել․ «Ռոսպոտրեբնադզորը» հերքում է տարածվող լուրերը

Ռուսաստանում «օմիկրոն» ենթատեսակը դեռ չի հայտնաբերվել․ «Ռոսպոտրեբնադզորը» հերքում է տարածվող լուրերը

«Ռոսպոտրեբնադզորի տվյալներով նոյեմբերի 28-ի դրությամբ Ռուսաստանում կորոնավիրուսի «Օմիկրոն» ենթատեսակով վարակման ոչ մի դեպք, այդ թվում՝ արտերկրից վերադարձածների մոտ չի գրանցվել: Տեղեկությունը փոխանցում է «Ռիա նովոստի»-ն։ «Եգիպտոսի հետ կանոնավոր և չարտերային թռիչքներն իրականացվում են պլանային կարգով, զբոսաշրջիկները անհանգստանալու պատճառ չունեն»,- ասել է ՌԴ տուրօպերատորների ասոցիացիայի (ATOR) գործադիր տնօրեն Մայա Լոմիձեն։ Ավելի վաղ ռուս պաշտոնյա Վլադիմիր Կրուգլին հայտնել էր, որ Ռուսաստանում կորոնավիրուսի նոր հայտնաբերված «Օմիկրոն» ենթատեսակով վարակման դեպքեր են գրանցվել։  Նշենք, որ երեկ՝ նոյեմբերի 27-ին, ԱՀԿ-ն հայտնել է կորոնավիրուսային հիվանդության հարուցչի նոր ենթատեսակի՝ «Օմիկրոնի» մասին («B.1.1.529»)՝ սահմանելով այն որպես անհանգստություն առաջացնող: «B.1.1.529» վիրուսը մի շարք մուտացիաների արդյունքում կարող է ազդել օրգանիզմում սպիտակուցի պարունակության վրա, իսկ նման փոփոխությամբ ներկայիս պատվաստանյութերը կարող են այդքան էլ արդյունավետ չլինել։
20:49 - 28 նոյեմբերի, 2021
Ռուսաստանում կորոնավիրուսի «Օմիկրոն» ենթատեսակով վարակման դեպքեր են գրանցվել

Ռուսաստանում կորոնավիրուսի «Օմիկրոն» ենթատեսակով վարակման դեպքեր են գրանցվել

Ռուսաստանում կորոնավիրուսի նոր հայտնաբերված «Օմիկրոն» ենթատեսակով վարակման դեպքեր են գրանցվել։ Այս մասին հայտնում է «Ռիա նովոստի»-ն։ Ըստ ռուս պաշտոնյա Վլադիմիր Կրուգլիի՝ դրա տարածման աղբյուրը կարող են լինել ռուս զբոսաշրջիկները, որոնք այցելել էին Եգիպտոս։ Նշենք, որ երեկ՝ նոյեմբերի 27-ին, ԱՀԿ-ն հայտնել է կորոնավիրուսային հիվանդության հարուցչի նոր ենթատեսակի՝ «Օմիկրոնի» մասին («B.1.1.529»)՝ սահմանելով այն որպես անհանգստություն առաջացնող: «B.1.1.529» վիրուսը մի շարք մուտացիաների արդյունքում կարող է ազդել օրգանիզմում սպիտակուցի պարունակության վրա, իսկ նման փոփոխությամբ ներկայիս պատվաստանյութերը կարող են այդքան էլ արդյունավետ չլինել։ ԱՀԿ-ն նաև նշել է, որ այս շտամն ավելի արագ է տարածվում, քան իր նախորդները, ինչի մասին վկայում է Հարավային Աֆրիկայի փորձը: Հետևաբար, նոր շտամը կարող է վարակել  ավելի շատ մարդկանց՝ ներառյալ նրանց, ովքեր ապաքինվել են այլ շտամներից: [ՀՀ ԱՆ]
18:21 - 28 նոյեմբերի, 2021
ԱԳՆ-ն հստակ չի պատասխանում՝ Հայաստանը պաշտոնապես դիմե՞լ է ՌԴ-ին՝ 1997 թ․-ի պայմանագրով օգնություն ստանալու հարցով, թե ոչ

ԱԳՆ-ն հստակ չի պատասխանում՝ Հայաստանը պաշտոնապես դիմե՞լ է ՌԴ-ին՝ 1997 թ․-ի պայմանագրով օգնություն ստանալու հարցով, թե ոչ

ՀՀ արտաքին գործերի նախարարությունը հստակ չի պատասխանում՝ Հայաստանը պաշտոնապես դիմե՞լ է ՌԴ-ին՝ 1997 թ․-ի պայմանագրով օգնություն ստանալու հարցով, թե ոչ։ Այս տարվա նոյեմբերի 16-ին, երբ Հայաստանի արևելյան սահմանին իրավիճակը լարվել էր, Անվտանգության խորհրդի քարտուղար Արմեն Գրիգորյանը Հանրային հեռուստաընկերության «Լուրեր» հաղորդման ընթացքում հայտարարել էր, որ Հայաստանը դիմելու է ՌԴ-ին 1997 թ․-ի «ՀՀ-ի և ՌԴ-ի միջև բարեկամության, համագործակցության և փոխադարձ օգնության մասին» պայմանագրով։ «Քանի որ հարձակում եղել է Հայաստանի սուվերեն տարածքի վրա, ապա մենք դիմում ենք Ռուսաստանի Դաշնությանը Հայաստանի Հանրապետության և Ռուսաստանի Դաշնության միջև գոյություն ունեցող 1997 թ․-ի պայմանագրի շրջանակներում Հայաստանի տարածքային ամբողջականությունը պաշտպանելու կոչով, և համաձայնագրի շրջանակներում փոխադարձ պարտականությունները իրագործելու տրամաբանության շրջանակներում։ Սա բանավոր դիմում է, որը նաև գրավոր ընթացակարգ է ունենալու, բայց մենք ուզում ենք հանրությանը և մեր գործընկերներին տեղեկացնել, որ այսպիսի գործընթաց ենք սկսում»,-ասել էր Արմեն Գրիգորյանը։ Ավելի ուշ ՌԴ-ում ՀՀ դեսպան Վարդան Տողանյանը «ՏԱՍՍ»-ի հետ զրույցում հայտնել էր, որ Հայաստանը դեռևս պաշտոնապես չի դիմել ՌԴ-ին՝ վերը նշված պայմանագրով օգնություն ստանալու հարցով․ «Եթե խոսքը պաշտոնական դիմում-նամակի մասին է (խնդրանքով, որ Պայմանագրի համաձայն օգնություն ցուցաբերվի), ապա դեռ չեմ կարող հաստատել»։ Infocom-ը հարցում էր ուղարկել ՀՀ արտաքին գործերի նախարարություն՝ խնդրելով հստակեցնել՝ արդյոք Հայաստանը պաշտոնապես դիմե՞լ է Ռուսաստանի Դաշնությանը՝ 1997 թ․-ի պայմանագրով օգնություն ստանալու հարցով։ ԱԳՆ-ից հարցի վերաբերյալ հետևյալ պատասխանն ենք ստացել․ «Հայտնում ենք, որ Հայաստանի Հանրապետությունը անմիջական ու բազմամակարդակ կապի մեջ է դաշնակից Ռուսաստանի հետ։ Նոյեմբերի 16-ին և 21-ին հեռախոսազրույցներ են տեղի ունեցել ՀՀ վարչապետի և ՌԴ նախագահի միջև։ Հեռախոսազրույցներ են տեղի ունեցել նաև երկու երկրների պաշտպանության և արտաքին գործերի նախարարների միջև։ Կողմերը քննարկել են հնարավոր համատեղ քայլերը, որոնց իրականացումն ամրագրված է երկկողմ իրավապայմանագրային հենքով և համահունչ է դաշնակցային հարաբերություններին»։ Քանի որ այս պատասխանի արդյունքում մեզ համար շարունակում էր անհասկանալի մնալ, թե արդյոք Հայաստանը պաշտոնապես դիմե՞լ է ՌԴ-ին 1997 թ․-ի պայմանագրով օգնություն ստանալու հարցով, փորձել ենք նույն հարցի պատասխանը ստանալ նաև հեռախոսազանգի միջոցով, սակայն ԱԳՆ-ից մեր ստացած պատասխանին ոչինչ չեն  ավելացրել։  Նշենք, որ 1997 թ․-ի պայմանագրում գրավոր դիմելու ընթացակարգի վերաբերյալ որևէ դրույթ նշված չէ, այդ իսկ պատճառով ԱԳՆ-ին ուղղված մեր հարցման մեջ խնդրել էինք նաև ընթացակարգերի վերաբերյալ մանրամասներ հայտնել։ Պայմանագրի 2-րդ հոդվածում միայն խորհրդակցություններին վերաբերող դրույթ կա․ «Բարձր պայմանավորվող կողմերը միմյանց հետ սերտորեն կհամագործակցեն Հայաստանի Հանրապետության և Ռուսաստանի Դաշնության ինքնիշխանության ու տարածքային ամբողջականության պաշտպանության և անվտանգության ապահովման գործում: Նրանք անհապաղ կխորհրդակցեն ամեն անգամ, երբ նրանցից մեկի կարծիքով առաջացել է նրա վրա զինված հարձակման սպառնալիք` համատեղ պաշտպանության ապահովման և խաղաղության ու փոխադարձ անվտանգության պահպանման նպատակով: Այդ խորհրդակցությունների ընթացքում կորոշվեն այն օգնության անհրաժեշտությունը, ձևերն ու չափերը, որը ստեղծված իրավիճակը հաղթահարելու նպատակով կցուցաբերի մի Բարձր պայմանավորվող կողմը մյուս Բարձր պայմանավորվող կողմին»։ ՌԴ-ին գրավոր ընթացակարգով դիմելու վերաբերյալ հարցին նոյեմբերի 23-ի ֆեյսբուքյան ասուլիսի ընթացքում անդրադարձել էր նաև ՀՀ վարչապետ Նիկոլ Փաշինյանը․ «Ես չգիտեմ՝ այդ տեղեկությունը հրապարակվե՞լ է, թե՞ ոչ, բայց մենք մայիսի 12-ի իրադրության վերաբերյալ և՛ ՌԴ-ին, և՛ ՀԱՊԿ-ին դիմել ենք»։ Դիտարկմանը, որ խոսքը նոյեմբերի 16-ի իրադարձություններից հետո դիմելու մասին է, Փաշինյանն ասել էր․ «Նոյեմբերի 16-ի իրադրությունը մայիսի 12-ի իրադարձությունների շրջանակներում է տեղի ունենում, երբ ադրբեջանական զինուժը ներխուժել է ՀՀ տարածք: Եվ մենք շարունակում ենք մեր քննարկումները, և մենք գտնում ենք, որ պետք է Ադրբեջանի պահվածքի էֆֆեկտիվ միջազգային գնահատականի ուղիներ փնտրենք և գտնենք, և մենք այս առումով մեզ չենք սահմանափակելու, և Հայաստանը հետևողականորեն իր իրավունքները պաշտպանելու է բոլոր հնարավոր ատյաններում»։ Վարչապետի խոսքից կարելի է ենթադրել, որ ՀՀ-ն նոյեմբերի 16-ին և դրանից հետո չի դիմել ՌԴ-ին` 1997 թ․-ի պայմանագրով օգնություն խնդրելու նպատակով։ Այս դեպքում անհասկանալի է՝  ինչու ԱԳՆ-ն հստակ չի պատասխանում, թե արդյոք ՀՀ անվտանգության խորհրդի քարտուղարի հայտարարությունից հետո Հայաստանը դիմե՞լ է ՌԴ-ին՝ 1997 թ․-ի պայմանագրով օգնություն ստանալու հարցով, թե ոչ։ Նանե Ավետիսյան
20:17 - 27 նոյեմբերի, 2021
ԱՆ պատվաստանյութի ազգային պահեստում նոյեմբերի 24-ի դրությամբ նոյեմբերի 30-ին ավարտվող ժամկետով 48040 դեղաչափ «ԱստրաԶենեկա» է եղել

ԱՆ պատվաստանյութի ազգային պահեստում նոյեմբերի 24-ի դրությամբ նոյեմբերի 30-ին ավարտվող ժամկետով 48040 դեղաչափ «ԱստրաԶենեկա» է եղել

2021 թվականի նոյեմբերի 24-ի դրությամբ Առողջապահության նախարարության պատվաստանյութերի ազգային պահեստում առկա է եղել 48040 դեղաչափ «ԱստրաԶենեկա», որի ժամկետն ավարտվում է այս ամսվա վերջին՝ նոյեմբերի 30-ին։ Պահեստում առկա է եղել նաեւ 235 դեղաչափ «Կորոնավակ», որի ժամկետն ավարտվում է 2022թ.-ի մարտի 18-ին, ապա եւ 10178 դեղաչափ «Սպուտնիկ V» առաջին բաղադրիչ, 14460 դեղաչափ՝ երկրորդ բաղադրիչ, որոնց ժամկետն ավարտվում է 2022թ. փետրվարի 28-ին (պատվաստման առաջին փուլում ներարկում են Սպուտնիկ V-ի առաջին բաղադրիչը՝ 0.5մլ դեղաչափով, երկրորդ փուլում ներարկում են պատվաստանյութի երկրորդ բաղադրիչը՝ 0.5մլ դեղաչափով, երեք շաբաթ ընդմիջումով: Երկրորդ բաղադրիչի բաղադրությունն առաջինից տարբերվում է)։ Այս մասին Infocom-ին հայտնել են ՀՀ առողջապահության նախարարությունից։ Ինչպես ավելի վաղ հայտնել էինք՝ նոյեմբերի 16-ի դրությամբ, բացի վերը թվարկված պատվաստանյութերից, առկա են նաեւ «Սինոֆարմ» եւ «Մոդեռնա» պատվաստանյութերը։ Սրանց ժամկետները, սակայն, ավարտվում են ոչ թե մեկ, այլ մի քանի ամսաթվերի․ «Սինոֆարմինը»՝ 2023թ. հուլիսի 16-ին եւ սեպտեմբերի 10-ին, «Մոդեռնայինը»՝ 2021-ի նոյեմբերի 28-ին, դեկտեմբերի 27-ին, 2022թ. հունվարի 14-ին, հունվարի 22-ին, փետրվարի 14-ին, փետրվարի 27-ին եւ մարտի 5-ին։ Թե որ օրը որ պատվաստանյութից քանի դեղաչափի ժամկետ է ավարտվում, նախարարությունից մեր նախորդ հարցին չէին պատասխանել։ Հիվանդությունների վերահսկման եւ կանխարգելման ազգային կենտրոնից հարցին, թե ինչու չեն տրամադրվել այդ տվյալները, պատասխանել էին, որ պատվաստանյութերի բաշխումը դինամիկ գործընթաց է, տվյալներն անընդհատ փոփոխվող են, ուստի կոնկրետ օրվա դրությամբ տվյալ տալն անհնար է։ Մեր դիտարկմանը, որ անընդհատ փոփոխվող են նաեւ պատվաստումների թվերը, նաեւ այն տվյալները, թե որ պատվաստանյութով քանի անձ է պատվաստվել, ուրեմն՝ նման հաշվարկ անելն ինքնին անհնար չէ, կենտրոնից առաջարկել էին գրավոր հարցմամբ դիմել՝ պահեստում առկա պատվաստանյութերի թիվը տրամադրելու համար։ Ըստ կենտրոնի՝ թիվը բանավոր տրամադրել հնարավոր չէր, քանի որ պետք տվյալների հաշվարկի ու վերլուծության կարիք կա։ Այսինքն՝ Նախարարությունում առկա չէին տվյալներ, թե տվյալ պահի դրությամբ որ խմբաքանակից, որ օրը ժամկետից դուրս եկող քանի պատվաստանյութ է մնացել, քանիսը՝ սպառվել։ Մեր գրավոր հարցմանն ի պատասխան ԱՆ-ն այս անգամ տրամադրել է նոյեմբերի 24-ի դրությամբ ԱՆ պատվաստանյութերի ազգային պահեստում առկա պատվաստանյութերի դեղաչափերի պիտանելիության ժամկետները։ 2023 թ. հուլիսի 16-ի պիտանելիության ժամկետով «Սինոֆարմ» պահեստում այլեւս չկա, իսկ նույն թվականի սեպտեմբերի 10-ի պիտանելիության ժամկետով «Սինոֆարմից» պահեստում նոյեմբերի 24-ի դրությամբ 155862 դեղաչափ է մնացել։ Երկու օրից՝ նոյեմբերի 28-ին ավարտվող պիտանելիության ժամկետով «Մոդեռնայի» դեղաչափ եւս պահեստում չկա, իսկ այս տարվերեջին՝ դեկտեմբերի 27-ին ավարտվող պիտանելիության ժամկետով «Մոդեռնայից» պահեստում նոյեմբերի 24-ի դրությամբ դեռ 30780 դեղաչափ եղել է։ Եկող տարվա հունվարի 14-ի պիտանելիության ժամկետով «Մոդեռնայից» պահեստում եղել է 5000 դեղաչափ, հունվարի 22-ի պիտանելիության ժամկետով «Մոդեռնայից»՝ 17900 դեղաչափ, փետրվարի 14-ի պիտանելիության ժամկետով «Մոդեռնայից»՝ 236250 դեղաչափ, փետրվարի 27-ի պիտանելիության ժամկետով «Մոդեռնայից»՝ 150000 դեղաչափ։ 2022-ի մարտի 5-ի պիտանելիության ժամկետով «Մոդեռնայից» եղել է 11900 դեղաչափ։ Առողջապահության նախարարությունից պատվաստանյութերի ժամկետների եւ դեղաչափերի վերաբերյալ մեր հարցման պատասխանում հավելել են, որ կորոնավիրուսային հիվանդության (COVID-19) դեմ նշված պատվաստանյութերից առկա է նաեւ բժշկական օգնություն եւ սպասարկում իրականացնող կազմակերպություններում, որոնց քանակներն անընդհատ փոփոխվում են: Այս պահին հարց է առաջանում՝ նոյեմբերի վերջին ավարտվող ժամկետով «ԱստրաԶենեկա» պատվաստանյութի մի քանի հազար դեղաչափերը կհասցնեն սպառվել, թե ոչ։ Նշենք նաեւ, որ նախօրեին Լեհաստանի Հանրապետության Արտաքին գործերի նախարարությունը Հայաստանի Հանրապետության առողջապահության նախարարությանը նվիրաբերել է եւս 201.640 դեղաչափ AstraZeneca պատվաստանյութ: Թե նոյեմբերի 16-ի դրությամբ ՀՀ-ում պատվաստանյութերի քանի դեղաչափ է առկա եղել, որ պատվաստանյութով քանի անձ է պատվաստել, կարող եք կարդալ այստեղ։ Հայարփի Բաղդասարյան Լուսանկարը՝ Pexels հարթակից
18:15 - 27 նոյեմբերի, 2021
Եռյակ թշնամին իրականացնում է Սյունիքի և Ադրբեջանի զինված ուժերի շփման գծին հարակից տարածքների զավթման քաղաքականություն․ Ավետիսյան

Եռյակ թշնամին իրականացնում է Սյունիքի և Ադրբեջանի զինված ուժերի շփման գծին հարակից տարածքների զավթման քաղաքականություն․ Ավետիսյան

Այսօր՝ Ազատության հրապարակում «Ազգային-ժողովրդավարական բևեռ» համահայկական կուսակցության կազմակերպած հանրահավաքի ընթացքում, ԱԺԲ խորհրդի անդամ Վարուժան Ավետիսյանը հայտարարեց, որ Ռուսաստանը, Թուրքիան և Ադրբեջանը շարունակում են ՀՀ տարածքի և ինքնիշխանության հաշվին տարածաշրջանի ճարտարապետությունը վերաձևելու իրենց ռազմավարությունը։ «Նախորդ օրը Սոչիում կայացած Պուտին-Ալիև-Փաշինյան հանդիպումը, դրա արդյունքներն արձնագրած հայտարարությունը ևս մեկ ապացույց էր, որ ՀՀ Արցախի մարզը միասնաբար զավթելուց ու բաժանելուց հետո Ռուսաստանը, Թուրքիան և Ադրբեջանը շարունակում են ՀՀ տարածքի և ինքնիշխանության հաշվին տարածաշրջանի ճարտարապետությունը վերաձևելու իրենց ռազմավարությունը։ Ակնհայտ է, որ 44-օրյա պայմանավորված պատերազմի ու պլանավորված պարտության արդյունքներով ընդունված 2020 թ․-ի նոյեմբերի 9-ի հայտարարությունն այդ արդյունքներով ընդամենը մի նոր ստատուս-քվո հաստատելու մասին չէ, այլ սկիզբ է դնում ՀՀ-ի լուծարման և հայկական գործոնի վերացման ռուս-թուրքական վաղեմի ծրագրի իրագործման վերջին փուլին։ Իինչպես մեկ դար առաջ, Նժդեհի առաջնորդությամբ փրկված Սյունիքն է կանգնած այդ ծրագրի ճանապարհին»։ Ավետիսյանը ասաց՝ եռյակ թշնամին որպես աջակից ունենալով իր կամակատար երևանյան ռեժիմին և մոսկվահպատակ քաղաքական դասին, իրականացնում է Սյունիքի, ինչպես նաև Ադրբեջանի զինված ուժերի շփման գծին հարակից տարածքների զավթման քաղաքականություն․ «Պետք է արձանագրենք, որ եռյակ թշնամու այս ծրագիրը դեռևս կյանքի չի կոչվել երկու պատճառով․ ԱՄՆ գլխավորությամբ հետզհետե աճման ընթացքով իրականացվող արևմուտքի ռազմավարական զսպման և հայ ժողովրդի քաղաքական դիմադրության։ Ի դեպ, այս 2 հանգամանքի շնորհիվ է, որ երեկ՝ նոյեմբերի 26-ին Սոչիում ընդունված հայտարարությունն ուներ լղոզված բովանդակություն։ Եվ, առհասարակ, արևմուտքի ճնշման և հայ ժողովրդի դիմադրության շնորհիվ է, որ 2020 թ․-ի նոյեմբերի 9-ից առ այսօր դեռևս չի կնքվել Կարսի ու Ալեքսանդրապոլի խառնուրդ-պայմանագիրը, որ տապանաքար կլիներ հայոց պետականության գերեզմանին»։ Նա հիշեցրեց, որ ադրբեջանական զորքերը մեծ ուժերով կուտակված են Սյունիքի երկու կողմերում, իսկ կառավարությունը քայլեր չի ձեռնարկում՝ վտանգված գոտու բնակիչներին զինելու համար․ «Արևելյան կողմից շփման գծի ամբողջ երկայնքով պատրաստ են ներխուժելու, զավթելու և Սյունիքը կտրելու, մեր հայրենակիցներին ցեղասպանելու և բռնագաղթի ենթարկելու։ Սպառնալիքն իրական է և վերահաս։ Մինչդեռ Հայաստանի կառավարությունն, ըստ էության, մատը մատին չի տալիս խիստ հավանական այս աղետը կանխելու համար՝ փաստացի գործելով ի նպաստ թշնամու ծրագրի։ Նա ձախողում է զինված ուժերի միջոցով պաշտպանության ապահովումը, ինչպես նաև հրաժարվում է կազմակերպել, զինելու պատրաստել առնվազն Սյունիքի և մյուս վտանգված գոտու բնակչությանը»։ Վարուժան Ավետիսյանը հիշեցրեց, որ օրեր առաջ ԱԺԲ-ն ակցիա է իրականացրել Պաշտպանության նախարարության առաջ՝ պահանջելով զինել սահմանամերձ շրջաններում ապրող բնակիչներին, սակայն, նրա խոսքով, մինչ այժմ այդ ուղղությամբ ոչ մի քայլ չի կատարվել․ «Սյունիքի և մյուս վտանգված գոտու բնակչության կոտորածը կանխելու և թշնամու ներխուժումները խափանելու միակ ճանապարհը երկրի ներքին ուժերի ամբողջ ներքին ռեզերվի վերադասավորումն ու մոբիլիզացիան է, ինչը ենթադրում է հրաժարվել բոլոր երկրորդային ծախսերից, որի աղաղակող օրինակն է Ալեն Սիմոնյանի մանկական երազանքի իրականացման համար թանկարժեք ծառայողական մեքենայի գնումը, և բոլոր միջոցներն ուղղել պաշտպանական համակարգի հզորացմանն ու ժողովրդի ինքնապաշտպանության կազմակերպմանը»։ Նրա խոսքով՝ անհեթեթ են բոլոր մտայնությունները, թե առանց պետական կառավարման համակարգի հնարավոր կլինի կազմակերպել ժողովրդի ինքնապաշտպանությունը։ Ավետիսյանը ելույթի ավարտին վերահաստատեց ԱԺԲ-ի պահանջները վտանգված գոտու բնակիչներին զինելու և ինքնապաշտպանություն կազմակերպելու վերաբերյալ։  
16:52 - 27 նոյեմբերի, 2021
Ի շահ Վանաձորի և վանաձորցու՝ պատրաստ ենք համագործակցել յուրաքանչյուր պետական կառույցի հետ․ Վահե Դոխոյան

Ի շահ Վանաձորի և վանաձորցու՝ պատրաստ ենք համագործակցել յուրաքանչյուր պետական կառույցի հետ․ Վահե Դոխոյան

Վանաձորում դեկտեմբերի 5-ին կանցկացվեն ՏԻՄ ընտրություններ՝ համամասնական ընտրակարգով։ «Հայրենիք» կուսակցության նախընտրական ցուցակը գլխավորում է «Հայրենիք» զարգացման հիմադրամի Լոռու մարզային գրասենյակի ղեկավար Վահե Դոխոյանը։ Վերջինս Infocom-ի հետ զրույցում ասաց, որ քարոզարշավն ընթանում է հանդարտ և հավասարակշռված․ «Ինչպես և մնացած բոլորը, մենք ակնկալում ենք, որ քաղաքապետը լինելու է մեր թիմից»։ Անդրադառնալով Վանաձորի՝ առաջնահերթ լուծում պահանջող խնդիրներին՝ Դոխոյանը նշեց՝ հաշվարկել են, որ համայնքի բյուջեն տարեկան կազմում է 2.5 միլիոն դոլար, իսկ այդ բյուջեով, նրա խոսքով, դժվար կլինի շոշափելի արդյունքների հասնել։ Այդ իսկ պատճառով փորձելու են ներդրումների միջոցով տարբեր ծրագրեր իրականացնել։ Այս պահին, ըստ Դոխոյանի, 4 այսպիսի ծրագիր ունեն, ներդրողների հետ արդեն պայմանավորվածություններ են ձեռք բերել․ «Մենք Թթուջուր տարածքից մինչև Մայմեխ սարի ստորոտ կառուցելու ենք ճոպանուղի, որը մոտ 2.5 միլիոն դոլարանոց ծրագիր է։ Տնակային ավանի հետ կապված ունենք մեր լուծման տարբերակը․ բանակցել ենք մեկ ներդրողի հետ, որը կառուցելու է 2 բազմաբնակարան շենք, տեղափոխելու ենք 330 ընտանիքների այդ շենք, իսկ այդ տնակային ավանը, որը տեղակայված է վանաձորցիներին հայտնի «Նաբերեժնի» հատվածում, այդտեղ ներդրողը կառուցելու է ատրակցիոններ, տուրիստական տարբեր ինֆրաստրուկտուրաներ։ Մենք ոչ թե ուղիղ բարտեր ենք անում մեր առաջարկը, այսինքն՝ տալիս ենք իրենց տարածք, որպեսզի բիզնես դնեն, դրա փոխարեն երկու շենք կառուցեն այդտեղ, այլ  կարևորն այն է, որ այդ մարդը մեզ է վստահում ու Վանաձորում այդ ծրագիրն իրականացնում է»։ Հաջորդ ծրագրով, համայնքապետի թեկնածուի խոսքով, նախատեսվում է Լոռու մարզում առողջության վերականգնման կենտրոն կառուցել․ «Օգտագործելու ենք մանկատան նախկին շենքը։ Մենք ֆրանսիական երկու ընկերության հետ ունենք պայմանավորվածություն, որ տրամադրելու են սարքավորումներ, բուժսարքավորումներ, մահճակալներ, և անհրաժեշտ մյուս սարքավորումները, որպեսզի կառուցենք առողջության վերականգնողական կենտրոն։ Ունենք «Ոչ մի բակ՝ առանց խաղահրապարակի» ծրագիր, սա էլ մի քանի փուլով ենք անելու։ Նախ անելու ենք խոշոր թաղամասերում, այնուհետև գուցե յուրաքանչյուր թաղամասում էլ կկառուցենք։ Մենք փորձ ունենք, արդեն 2 խաղահրապարակ կառուցել ենք Վանաձորում։ Նույն ներդրողը շատ ոգևորվել է, և պայմանավորվածություն ենք ձեռք բերել շարունակել այս ծրագիրը»։ Նա նաև վստահեցրեց, որ մանրամասնորեն ուսումնասիրել են Վանաձորի բոլոր խնդիրները՝ ըստ թաղամասերի․ «Անգիր գիտենք՝ որ շենքում կա վերելակի խնդիր, որ շենքում կա կոյուղու խնդիր, տանիքների խնդիր, այսինքն՝ բնակֆոնդի պահպանման խնդիր ունենք լուծելու։ Սա էլ, կարծում եմ, հետագայի հարց է, որ աստիճանաբար պետք է լուծենք։ Չենք ուզում փուչ խոստումներ տալ, որ գալու ենք առաջիկա մեկ տարում ամեն ինչ անենք,  բայց գիտենք խնդիրների մասին և կարծում եմ՝ երբ մարդիկ կտեսնեն, որ այս 4 ծրագրերը, որոնց մասին խոսեցի, ստացվում են, կհայտնվեն նաև նոր ներդրողներ, նաև պետական միջոցներով կլուծենք քաղաքի խնդիրները»։ Հարցին՝ արդյոք կիրակակացնե՞ն ներդրումային 4 ծրագրերը, եթե ավագանիում մեծամասնություն չունենան, Դոխոյանն ասաց, որ որոշ ծրագրեր իրականացնելու համար  իրենց պետք է ունենալ քաղաքային իշխանություն, սակայն որոշ ծրագրեր էլ իրականացնելու են՝ անկախ ընտրությունների արդյունքներից։ Համայնքապետի թեկնածուն նաև ասաց, որ պատրաստ են ի շահ Վանաձորի համագործակցել յուրաքանչյուր իշխանության հետ․ «Մենք պատրաստվում ենք ՏԻՄ ընտրություններին, ավագանին գործելու է 5 տարի, 5 տարվա ընթացքում Հայաստանում կարող է փոխվել իշխանություն, կարող է փոխվել մի քանի անգամ։ Իմ համար ու իմ թիմի համար ամենակարևորը Վանաձորի ու վանաձորցու շահն է, և այս իմաստով մենք, իհարկե, պատրաստ ենք համագործակցել ցանկացած պետական կառույցի հետ, որը կծառայի ի շահ Վանաձորի և վանաձորցու»։ Վանաձորը ներառվել է համայնքների խոշորացման նախագծում և այժմ խոշորացման փուլում է․ ըստ կառավարության ներկայացրած և ԱԺ-ում ընդունված այդ նախագծի՝ Վանաձոր քաղաքին են միանում Գուգարք, Դարպաս, Շահումյան գյուղերը։ Դոխոյանը վստահեցրեց՝ ծանոթ են Վանաձորին միացող 3 գյուղերի խնդրիներին, և նպատակ ունեն այդ գյուղերում զարկ տալ գյուղատնտեսությանը․ «Այս 3 համայնքները Վանաձորի հետ միշտ սերտ կապվածություն են ունեցել, կարելի է ասել, որ համարվել են Վանաձորին կից շատ մեծ թաղամասեր։ Այստեղ համադրումը պետք է շատ նուրբ տանենք ու զարկ տանք գյուղատնտեսությանը, բայց գյուղատնտեսության այն պահանջները բավարարենք, որոնք ունի այսօրվա զարգացող աշխարհը, և նաև կարողանանք ինտեգրել քաղաքային համայնքին»։ Դոխոյանի համոզմամբ՝ անհրաժեշտ է զարգացնել նաև ագրոտուրիզմը․  «Այսօր զբոսաշրջիկներին չեն հետաքրրքում ճոխ հյուրանոցները, այլ ավելի շատ հետաքրքրում է, որ մոտ լինեն բնությանը, բնական արտադրանքին։ Մենք ունենք փայլուն հնարավորություն՝ հաշվի առնելով նաև Լոռու մարզի հարուստ բնությունը, կարծում եմ՝ մեր մոտ դա ևս կստացվի»։ Նրա խոսքով՝ իրենց թիմը երիտասարդ է, նեղ քաղաքականացված չէ, թիմում կան ոլորտային մասնագետներ՝ բժիշկներ, երիտադարության, սպորտի, մշակույթի, բիզնեսի ներկայացուցիչներ, որոնք կարող են օգնել՝ ծրագրերը իրականացնելու հարցում։  Վանաձորի ՏԻՄ ընտրություններին 10 քաղաքական ուժ է մասնակցելու՝  9 կուսակցություն և 1 դաշինք։ Հայաստանի աշխատավորական սոցիալիստական կուսակցությունը ընտրություններին մասնակցում է Վանաձոր համայնքի ղեկավարի առաջին տեղակալ, Վանաձորի ավագանու անդամ Արկադի Փելեշյանի գլխավորությամբ, «Այլանս» առաջադիմական ցենտրիստական կուսակցությունը մասնակցում է ՀՀ էլեկտրական ցանցերի Դեբեդ մասնաճյուղի իրացման պետ Կարեն Էդարյանի գլխավորությամբ։ «Քաղաքացիական պայմանագիր» կուսակցության համայնքապետի թեկնածուն Լոռու ներկայիս մարզպետ Արամ Խաչատրյանն է։ «Հանրապետություն» կուսակցությունը մասնակցելու է Վազգեն Թորոսյանի գլխավորությամբ․ վերջինս չի աշխատում, «Ապրելու երկիր» կուսակցության ցուցակն էլ գլխավորում է Արտավազդ Ալավերդյանը, որը Վանաձորի «Դիետ» ՍՊԸ-ի գործադիր տնօրենն է։ «Լուսավոր Հայաստան» կուսակցության ցուցակը գլխավորելու է Հրանտ Այվազյանը, որը 7-րդ գումարման Ազգային ժողովի «Լուսավոր Հայաստան» խմբակցության անդամ է եղել, հիմա դասախոսում է  Հայաստանի ազգային պոլիտեխնիկական համալսարանի Վանաձորի մասնաճյուղում։ «Հայրենիք» կուսակցությունը Վանաձորի ՏԻՄ ընտրություններին մասնակցելու է Վահե Դոխոյանի գլխավորությամբ, որը «Հայրենիք» զարգացման հիմնադրամի Լոռու մարզային  գրասենյակի ղեկավարն է։ «Բարգավաճ Հայաստանի» ցուցակը գլխավորելու է  Էդգար Բոջուկյանը, ով չի աշխատում։  Վանաձորի նախկին քաղաքապետ Մամիկոն Ասլանյանը ընտրություններին մասնակցելու է  «Մամիկոն Ասլանյան» դաշինքով․ նա այժմ չի աշխատում։  Հայաստանի կոմունիստական կուսակցությունն էլ ընտրություններին մասնակցելու է ՀԿԿ կենտկոմի առաջին քարտուղար, Վանաձորի քաղաքային կազմակերպության առաջին քարտուղար Արկադի Ղուկասյանի գլխավորությամբ։   Լուսանկարը՝ Վահե Դոխոյանի ֆեյսբուքյան էջից    Նանե Ավետիսյան
15:23 - 25 նոյեմբերի, 2021
Հայաստան-Իրան 3-րդ էլեկրահաղորդման գծի շինարարական աշխատանքների ավարտը 2022-ի վերջին է նախատեսվում․ ծրագրի իրականացման առաջընթացը 71 % է կազմում

Հայաստան-Իրան 3-րդ էլեկրահաղորդման գծի շինարարական աշխատանքների ավարտը 2022-ի վերջին է նախատեսվում․ ծրագրի իրականացման առաջընթացը 71 % է կազմում

2019 թվականին նոր Հայաստանի մասին 100 փաստեր ներկայացնելիս ՀՀ վարչապետ Նիկոլ Փաշինյանը հայտարարեց, որ մեծ թափ է հաղորդվել դեռեւս 2006թ. մեկնարկած Հայաստան-Իրան 3-րդ էլեկրահաղորդման գծի շինարարական աշխատանքներին, ինչի շնորհիվ 2018թ. վեց ամսվա արդյունքներով, Փաշինյանի խոսքով, կատարվել են մոտավորապես նույն քանակի աշխատանքներ, ինչ նախորդ 12 տարվա ընթացքում: 2019-ի հուլիսին էլ «Ազատություն» ռադիոկայանին տված հարցազրույցի ժամանակ ՀՀ փոխվարչապետ Մհեր Գրիգորյանը հայտնեց, որ Իրան կատարած այցի եւ միջկառավարական հանձնաժողովի 16-րդ նիստի ընթացքում իրանական կողմի հետ պայմանավորվածություն են ձեռք բերել էլեկտրահաղորդման 3-րդ գծի շինարարությունը 18 ամսվա ընթացքում ավարտելու մասին։ Շինաշխատանքները, սակայն, կավարտվեն 2022-ի վերջին։ Բանն այն է, որ, Տարածքային կառավարման եւ ենթակառուցվածքների նախարարության պնդմամբ, 2020-2021թթ․ ընթացքում ծրագրի առաջընթացին Covid-19 համաճարակով, ապա եւ տարածաշրջանային իրավիճակով եւ բեռնափոխադրումների իրականացման բարդություններով պայմնավորված խոչընդոտներ են եղել։ Հայաստան-Իրան էլեկտրահաղորդման այս գծի շինարարական աշխատանքներն իրականացվում են «Իրան-Հայաստան 400 կՎ լարման էլեկտրահաղորդման օդային գծի եւ համապատասխան ենթակայանի կառուցում» ծրագրով: Դրա ընդհանուր արժեքը կազմում է 107.9 մլն. եվրո, որի 85%-ի ֆինանսավորումն իրականացվում է Իրանի արտահանման եւ զարգացման բանկի վարկային միջոցներով, իսկ 15%-ը' «SUNIR International FZE» ընկերության փոխառության միջոցներով։ Ծրագրի շրջանակներում «Բարձրավոլտ էլեկտրացանցեր» ՓԲ ընկերության կողմից իրականացված ծախսերի ընդհանուր գումարը կազմում է շուրջ 272 մլն դրամ, որը ներառում է հողերի ձեռքբերումը, վնասների փոխհատուցումը, չափագրման եւ բրոքերական ծառայությունների ձեռքբերումը եւ այլն: Infocom-ը ՀՀ տարածքային կառավարման եւ ենթակառուցվածքների նախարարությունից հետաքրքրվել է՝ ինչ փուլում են Հայաստան-Իրան 3-րդ էլեկրահաղորդման գծի շինարարական աշխատանքներն այս պահին: Ըստ մեր ստացած պատասխանի՝ այս ծրագրի շրջանակներում 710 հենարաններից մոնտաժվել է 488-ը, բետոնացվել է 640 հիմք: 710 հենարաններից ՀՀ է ներմուծվել 625-ը, ամբողջությամբ ներմուծվել են ամպրոպապաշտպան ճոպանը եւ օպտիկամանրաթելային մալուխը: Ընդհանուր 268 կմ-ից կատարվել են շուրջ 70 կմ հաղորդալարերի մոնտաժման եւ լարաձգման աշխատանքներ։ Ծրագրի մաս կազմող «Նորավան» ենթակայանում, ըստ ՏԿԵՆ-ի տրամադրած տեղեկությունների, գրեթե ավարտվել են բարձր լարման սարքավորումների հիմքերի եւ 220 կՎ ԲԲՍ հատվածի մալուխային խրամուղիների բետոնացման, ինչպես նաեւ շենք-շինությունների եւ սարքավորումների կոնստրուկցիաների մոնտաժման աշխատանքները․ «Ընթացքում են շենք-շինությունների, պարսպապատման, հողի հարթեցման եւ 400 կՎ ԲԲՍ հատվածի մալուխային խրամուղիների բետոնացման աշխատանքները: «Նորավան» ենթակայանի բարձր լարման սարքավորումներն ամբողջությամբ ներմուծվել են»,- ասված է մեր հարցման պատասխանում: Ըստ էության, ծրագրի շրջանակներում աշխատանքների իրականացման առաջընթացը կազմում է շուրջ 71 %: 2019 թվականին Թեհրանում Իրանի նախագահ Հասան Ռոհանիի հետ բանակցություններից հետո Նիկոլ Փաշինյանն ուշագրավ հայտարարություն էր արել՝ նշելով, որ Հայաստանը պատրաստ է Իրանի հետ տարանցման համագործակցություն ծավալել եւ լինել իրանական գազի տարանցիկ երկիր: Էներգետիկ միջանցքի ստեղծումը, Փաշինյանի խոսքով, նույնպես կարեւոր նշանակություն ունի թե երկկողմ, թե տարածաշրջանային առումով, թե ավելի ընդարձակ առումով: Նա հայտնել էր, որ այս հարցերի լուծման համար քաղաքական կամքը կա, եւ հույս էր հայտնել, որ բանակցություններում գործնականացման պրոցեսը հաջողությամբ կիրականացվի:  Հայարփի Բաղդասարյան Լուսանկարը՝ Pexels հարթակից
13:00 - 25 նոյեմբերի, 2021
Տարեսկզբից մինչեւ հոկտեմբերի 20-ը ՀՀ ոստիկանությունը դիմակ չդնելու համար 1462 արձանագություն է կազմել

Տարեսկզբից մինչեւ հոկտեմբերի 20-ը ՀՀ ոստիկանությունը դիմակ չդնելու համար 1462 արձանագություն է կազմել

Այս ամսվա սկզբից՝ նոյեմբերի 1-ից, դիմակ դնելը դարձյալ պարտադիր է ոչ միայն փակ, այլ նաեւ բաց տարածքներում՝ համաձայն ՀՀ առողջապահության նախարարի 2020 թվականի սեպտեմբերի 11-ի թիվ 23-Ն հրամանում կատարված փոփոխության։ Բացառություններ, իհարկե, կան, դրանց կարող եք ծանոթանալ այստեղ։ Զուգահեռաբար իրար կողքի պտտվում են քննադատությունները, թե դիմակ չդնելու տուգանքներն անտրամաբանական են, մյուս կողմից էլ, որ ոստիկանները պատշաճ չեն կատարում իրենց պարտականությունները՝ անտեսելով իրենց կողքին շրջող անդիմակ մարդկանց։ 2021թ. հունվարի 1-ից մինչեւ հոկտեմբերի 20-ը անհատական պաշտպանության միջոցների կիրառման կանոնները խախտելու համար ՀՀ ոստիկանությունն ընդամենը 1462 արձանագություն է կազմել։ Այս մասին Infocom-ի հարցմանն ի պատասխան՝ հայտնել են գերատեսչությունից։ Այդ 1462 արձանագրություններից տուգանքի դեռեւս 696 որոշում է կայացվել։ Արձանագրություններից միայն 13-ն է չեղարկվել։ 2021թ. հունվարի 1-ից մինչեւ հոկտեմբերի 20-ը անհատական պաշտպանության միջոցների կիրառման կանոնները խախտելու համար տուգանված միայն 12 քաղաքացի է վճարել տուգանքը։ Իսկ ահա տուգանքի 696 որոշումներով ՀՀ ոստիկանություն ներկայացվել է միայն 2 վարչական բողոք, որոնք, ինչպես մեր հարցմանն ի պատասխան հայտնել են Ոստիկանությունից, դեռեւս ընթացքի մեջ են: Հավելենք, որ բաց տարածքներում դիմակ դնելն այս տարվա հունիսից պարտադիր չէր, սակայն կարգը խստացվեց նոյեմբերից՝ պայմանավորված համավարակի տարածման տեմպերով։ Հայարփի Բաղդասարյան Գլխավոր լուսանկարը՝ cottonbro-ի, Pexels հարթակից
12:46 - 25 նոյեմբերի, 2021
ՀՀ կառավարությունը Արցախի Հանրապետության կառավարությանը 13 մլրդ 533 մլն դրամի միջպետական վարկ կտրամադրի

ՀՀ կառավարությունը Արցախի Հանրապետության կառավարությանը 13 մլրդ 533 մլն դրամի միջպետական վարկ կտրամադրի

ՀՀ կառավարությունն ընդունեց որոշում, որով Արցախի Հանրապետության կառավարությանը 13 մլրդ 533 մլն դրամի միջպետական վարկ կտրամադրվի։ Վարկից 6 մլրդ 500 մլն դրամ չափով պետք է օգտագործվի աշխատավարձերի եւ հավելավճարների վճարման համար, կենսաթոշակների համար՝ 1 մլրդ 226 մլն դրամ, նպաստների համար՝ 349 մլն, պետբյուջեից համայնքների բյուջեներին տրվող դոտացիաների համար՝ 492 մլն, էլէներգիայի, գազի մատակարարման, կապի ծառայությունների՝ բնակչության համար կատարվող սուբսիդավորման համար՝ 1 մլրդ 446 մլն դրամ, առողջապահության համար՝ 573 մլն դրամ չափով, եւ այդպես շարունակ։ Սա այս տարեվերջի վերջին հատկացումն է։ ՀՀ ֆինանսների նախարարը նախագծի զեկուցման ժամանակ ասաց, որ 2021-ի պետբյուջեով ի սկզբանե հաստատված էր 64,9 մլրդ դրամի հատկացում, որը մինչեւ հունիս ամբողջությամբ կատարված էր․ «Մենք 2021-ին, այս հատկացումը ներառյալ, ունենում ենք 199 մլրդ դրամի չափով հատկացում»,- նշեց նախարարը։
12:40 - 25 նոյեմբերի, 2021
Կառավարությունը թույլատրեց BMW 750 LI Xdrive դասի 90 մլն դրամ արժողությամբ ավտոմեքենա ձեռք բերել ԱԺ նախագահի համար

Կառավարությունը թույլատրեց BMW 750 LI Xdrive դասի 90 մլն դրամ արժողությամբ ավտոմեքենա ձեռք բերել ԱԺ նախագահի համար

ՀՀ կառավարությունն այսօրվա նիստում ընդունեց որոշում, որով թույլատրում է ՀՀ Ազգային ժողովին ձեռք բերել BMW 750Li xDrive LCI դասի մարդատար ավտոմեքենա։ Մեքենան ՀՀ ԱԺ նախագահի համար է․ այդ պաշտոնը զբաղեցնում է Ալեն Սիմոնյանը։  Նախագծով, մասնավորապես, առաջարկվում է ՀՀ Ազգային ժողովին 2021 թվականի պետական բյուջեով նախատեսված հատկացումների վերաբաշխման արդյունքում տնտեսված ֆինանսական միջոցներն ուղղել BMW 750Li xDrive LCI դասի ավտոմեքենայի ձեռքբերմանը։ Միաժամանակ առաջարկվում է ՀՀ Ազգային ժողովի նախագահի համար ծառայողական ավտոմեքենայի ձեռքբերումը իրականացնել պաշտոնական ներկայացուցչի ավտոսրահից․ կառավարության որոշման նախագծի հիմնավորման մեջ նշված է, որ պահանջը տվյալ պահի դրությամբ հրատապ է: Ավտոմեքենան ձեռք բերելու համար տրամադրվելու է 90 մլն դրամ։ «Միաժամանակ հայտնում ենք, որ ՀՀ ԱԺ աշխատակազմի կողմից իրականացվում է Ազգային ժողովի նախագահին սպասարկող (BMW 750Li 2011թ արտադրության) ծառայողական մեքենայի պետական գույքի կառավարման կոմիտեին հանձնելու գործընթացը, քանի որ նշված մեքենայի ընթացիկ տեխնիկական սպասարկումը դարձել է ծախսատար և նրա շահագործման ու պահպանման համար ֆինանսական միջոցների հատկացումները այլևս արդյունավետ և նպատակահարմար չեն»,- նշված է հիմնավորման մեջ։ Նախագիծը մշակել է ՀՀ Ազգային ժողովի աշխատակազմը: Այս նախագիծն ընդգրկված է կառավարության օրակարգի չզեկուցվող հարցերի փաթեթում։
12:17 - 25 նոյեմբերի, 2021
Կառավարությունը Սյունիքի մարզում առաջնահերթ լուծում պահանջող հիմնախնդիրների լուծման նպատակով հատկացրեց 400 մլն դրամ

Կառավարությունը Սյունիքի մարզում առաջնահերթ լուծում պահանջող հիմնախնդիրների լուծման նպատակով հատկացրեց 400 մլն դրամ

Ինչպես հայտնի է՝ 2020թ․ սեպտեմբերի 27-ին Արցախի Հանրապետության դեմ Ադրբեջանի սանձազերած պատերազմական գործողությունների հետևանքով ՀՀ Սյունիքի մարզի մի շարք համայնքներ դարձել են սահմանամերձ։ Մարզի համայնքներում առկա են մի շարք սոցիալական և հրատապ խնդիրներ, որոնք ունեն առաջնահերթ լուծման կարիք։ Այս համատեքստում ՀՀ կառավարությունն այսօրվա նիստում ընդունեց որոշում, որով նախատեսվում է ՀՀ Սյունիքի մարզում առաջնահերթ լուծում պահանջող հիմնախնդիրների լուծման նպատակով ՀՀ Սյունիքի մարզի զարգացման և ներդրման հիմնադրամին ներկա պահին այս փուլի աշխատանքների իրականացման համար հատկացնել 400 մլն դրամ գումար՝ մարզային և համայնքային ենթակայության ենթակառուցվածքներում, ինչպես նաև բնակչության համար սոցիալական և կենսական նշանակություն ունեցող կարևորագույն և հրատապ ծրագրեր իրականացնելու համար: ՀՀ տարածքային կառավարման եւ ենթակառուցվածքների նախարար Գնել Սանոսյանը հիշեցրեց, որ այս նպատակների համար դեռեւս ապրիլին 500 մլն դրամ էր հատկացվել, սեպտեմբերին՝ 200 մլն դրամ, հիմա հերթական խմբաքանակի համար 400 մլն դրամ է անհրաժեշտ։  Կարգավորումը, ըստ կառավարության, նպատակ ունի ՀՀ Սյունիքի մարզի համայնքներում իրականացնել առաջնահերթ լուծում պահանջող ծրագրեր, որի արդյունքում լուծում կտրվի բնակչության և համայնքների սոցիալական նշանակություն ունեցող հիմնախնդիրներին: Մասնավորապես. 1. Պայմանով պարտքերի դիմաց` 105.9 մլն դրամ,2. Ճանապարհները փակվելու կապակցությամբ ձեռք է բերվել 3 հատ ՈՒԱԶ ավտոմեքենա, որի արժեքը կազմում է 22.2 մլն դրամ /1-ը տրամադրվել է ՀՀ ԱԻՆ ՓԾ–ին, 2-ը` Կապանի համայնքապետարանին/,3. Նախատեսվում է ձեռք բերել 43 հատ սենդվիչ պանելային շարժական տնակներ, որի արժեքը կկազմի 223.7 մլն դրամ (1 հատի արժեքը կազմում է շուրջ 5.2 մլն դրամ): /Զինված ուժերի կառույցներին՝ 7 հատ, ՀՀ ԱԻՆ ՓԾ–ին` 2 հատ, ՀՀ Ոստիկանության Սյունիքի մարզային վարչությանը՝ 3 հատ, ԱԱԾ-ին՝ 1 հատ, ՊՆ-ին՝ 30 հատ/,4. Կապան-Ճակատեն ճանապարհը փակ լինելու կապացությամբ նոյեմբերի 14-16-ը բնակչությանը տրամադրվել է վառելիք 6.5 մլն դրամ /13 տոննա դիզելային վառելիք/ և բնական գազ` 1.0 մլն դրամ,5. Նոյեմբերի 11-ին Բարձրավան – Շուռնուխ - Որոտան ճանապարհները փակվելու կապակցությամբ բնակչությանը տրամադրվում է հաց՝ օրական 2 անգամ /նոյեմբերի 22-ի դրությամբ փաստացի ծախսը կազմում է 0.8 մլն դրամ/,6. Ոռոգման և խմելու ջրի համակարգերի նախագծանախահաշվային փաստաթղթերի կազմում,7. Այլ հրատապ ծախսեր (սնունդ, անվադողեր, դեղ և այլն)։
12:04 - 25 նոյեմբերի, 2021
Վանաձորում առաջնային լուծում են պահանջում տարրական կենցաղային խնդիրները, որոնք կապված են քաղաքի առօրյայի հետ․ Արտավազդ Ալավերդյան

Վանաձորում առաջնային լուծում են պահանջում տարրական կենցաղային խնդիրները, որոնք կապված են քաղաքի առօրյայի հետ․ Արտավազդ Ալավերդյան

Վանաձոր համայնքում այս տարվա դեկտեմբերի 5-ին կանցկացվեն ՏԻՄ ընտրություններ՝ համամասնական ընտրակարգով։ «Ապրելու երկիր» կուսակցության նախընտրական ցուցակը գլխավորում է «Դիետ» ՍՊԸ-ի գործադիր տնօրեն Արտավազդ Ալավերդյանը։ Նրա դիտարկմամբ՝ Վանաձորում առաջնահերթ լուծում պահանջող խնդիրները հիմնականում կենցաղային բնույթի են․ «Տարրական կենցաղային խնդիրները դարձել են առաջնային։ Կցանկանայի, որ մեր խնդիրները լինեին զարգացմանը միտված պրոյեկտներ, որոնք պետք է իրականացնենք, բայց այսօր հրատապ են բոլոր տարրական կենցաղային խնդիրները՝ կապված քաղաքի առօրյայի հետ՝ աղբահանություն, ճանապարհներ, փողոցային առևտուր, տնակային ավաններ։ Չեմ կարող ինչ-որ հերթականություն դնել՝ ասելով, որ այս խնդիրը առաջինն է, մյուսը ընկնում է հետ»։ Համայնքապետի թեկնածուն վստահեցնում է, որ տնակային ավանների խնդրին լավ ծանոթ են, պատկերացնում են խնդրի լուծումը, սակայն այս պահին չեն ցանկանում մանրամասներ հրապարակել իրենց պատկերացրած լուծման վերաբերյալ․ «Ունենք հստակ ծրագիր, որը բացարձակապես չի նմանվում նախկին 30 տարիների ընթացքում տրված խոստումներին կամ մոտեցմանը։ Այն հողը, որի վրա դրված են այդ տնակները, և որոնք քաղաքային ֆոնդին են պատկանում, ոչ մեկը չի կարողանալու օտարել՝ առաջնայնությունը չտալով մարդկանց, որոնք 30 տարի այնտեղ են բնակվում։ Մարդիկ մի օր չեն քնելու, արթնանան ու տեսնեն, որ այդ հողը մի գործարարի են տվել, որն այդտեղ բիզնես կամ ինչ-որ պահեստներ է հիմնում»։ Նրա խոսքով՝ տնակներում ապրում են մարդիկ, որոնք տարբեր հանգամանքների բերումով են հայտնվել այնտեղ, ուստի այս հարցում տարբեր մոտեցումներ են ցուցաբերելու․ «Կան մարդիկ, որոնց դեպքում պետության կողմից օրենքով և բարոյապես կացարանի հարց լուծելը մի քիչ խնդրահարույց է, որովհետև մարդկանց տուն տվել են շատ վաղուց, տասնյակ տարիներ առաջ․ երկրաշարժի պատճառով այդ մարդիկ տնից զրկված են եղել, մարդկանց տունը տվել են, մարդիկ այդ տունը վաճառել են, նորից եկել են տնակում են ապրում, ասում են՝ մի հատ էլ տվեք։ Մենք ունենք տնակներում ապրող մարդկանց սեգմենտներ, դրանք բազմաթիվ են: Մյուս խումբը առհասարակ Վանաձոր եկել է 15-20 տարի առաջ, գնել է այդ տնակը, և այդտեղ է բնակվում։ Նրանք նույնպես մեր համաքաղաքացիներն են, սրան ուրիշ մոտեցում է լինելու։ Մարդիկ տուն ունենալու են, բայց թե ինչպես, ես դա չեմ բարձրաձայնելու, որովհետև երբ որոշակի կետերի լուծումները արտահայտում ենք, մարդկանց ծրագրերում դա կրկնվում է՝ մինչ այդ չլինելով»։ Աղբահանության խնդրի լուծման վերաբերյալ էլ Ալավերդյանն անիրատեսական է համարում քաղաքական մրցակիցների՝ աղբի վերամշակման գործարան կառուցելու վերաբերյալ ծրագրերը․ «Կարծում եմ՝ մարդիկ լավ չեն պատկերացնում, որ այսօր նման բան շրջանառելը մի քիչ իրատեսական չի։ Եթե 5 տարվա ընթացքում թե՛ կառավարություն, թե՛ քաղաքային իշխանությունը՝ մարզպետի գլխավորությամբ, այդ խնդրին առնչվում են ամեն օր ու նույնիսկ մեկ աղբարկղ չեն փոխել, մեկ աղբատար մեքենա ձեռք չեն բերել, ինչպե՞ս են խոսում նույն բյուջեի սահմաններում աղբի վերամշակման գործարան ստեղծելու մասին։ Մենք պատկերացնում ենք հակառակ ձևով․ մեր քաղաքում մի քանի ընկերություններ են իրականացնում աղբահանությունը։ Հսկայական գումարը, որ բյուջեից տրվում է այդ գործառույթը կատարելու համար, փոշիացվում է։ Չեմ ցանկանա բարեխղճության մասով ինչ-որ բաներ խոսել,  դա, իհարկե, քննարկման թեմա է, բայց այդ ամբողջ բյուջեն  բաժանվում է 5 կամ 4 մասի, ամենքի մասնաբաժինը լինում է 25%, որը բավականին քիչ է, որպեսզի մարդը կարողանա ձեռք բերել նոր մեքենա»։ Մեր զրուցակիցը հավելում է, որ իրավիճակն այլ կլինի, եթե մի քանի ընկերության փոխարեն աղբահանությունը կատարի մեկ խոշոր ընկերություն․ «Եթե գործ ունենանք խոշոր և կարող ընկերության հետ, այդ ժամանակ շահույթը ավելի մեծ է լինելու (իհարկե, տույժ տուգանքների մասին չենք մոռանալու, որովհետև եթե 2-րդ, 3-րդ անգամ քաղաքացին բողոք ունեցավ ու այդ հարցը շատ արագ չշտկվեց, այդ մարդը ունենալու է ֆինանսական լուրջ խնդիրներ) և տրամաբանորեն իմաստ է ունենալու ներդրում կատարել աղբահանության հետ կապված տեխնիկական հարցերի մեջ, որը բերելու է նման ընկերության կապիտալի մեծացմանը։ Իսկ հիմա, կոպիտ ասած, իրար մեջ «փայ-փայ» են արել, ո՞ւմ է հետաքրքրում, թե արդյունքում ինչ ենք ստանալու»։   Վանաձորը ներառվել է համայնքների խոշորացման նախագծում և գտնվում է խոշորացման փուլում․ ըստ կառավարության ներկայացրած և ԱԺ-ում ընդունված այդ նախագծի՝ Վանաձոր քաղաքին են միանում նաև Գուգարք, Դարպաս, Շահումյան գյուղերը։ Ալավերդյանը նշում է, որ ուսումնասիրել են Վանաձորին միացող գյուղերի խնդիրները․ «Խնդիրները կապված են թեկուզև տրանսպորտի հետ, որքանով մենք շփվել ենք, մարդիկ դեմ էին խոշորացմանը, իրենց ոչ ոք չի հարցրել։ Գյուղական համայնքի հողերը, ֆոնդերը տարբեր կատեգորիաներ ունեն ու ունեն խոտհարքի կատեգորիա։ Մեկը խոտհարք է, մեկը արոտավայր է, հիմա մտնելու է քաղաքի մեջ, ինչպե՞ս է լինելու, գյուղացիների համար դա մեծ հարց է։ Իրենք գյուղի բնակիչ են ու ուզում են գյուղում բնակվել, մարդիկ իրենց հացը վաստակում են գյուղական աշխատանքի միջոցով ու վատ էլ չեն ապրում»։   Նա ընդգծում է, որ իրենք նոր են դարձել քաղաքական թիմ. թիմի անդամների ճնշող մեծամասնությունը քաղաքականությամբ չի զբաղվել, բայց իրենց ոլորտներում կայացած մարդիկ են․ «Մենք ոչ մի ձևաչափով, ոչ մի տիպի կապերով կաշկանդված չենք, և դա ապացուցում է մեր քարոզարշավը և քարոզարշավի ոճը, և ամենակարևորը՝ մենք անկեղծ ենք»։ Վանաձորի ՏԻՄ ընտրություններին 10 քաղաքական ուժ է մասնակցելու՝  9 կուսակցություն և 1 դաշինք։ Հայաստանի աշխատավորական սոցիալիստական կուսակցությունը ընտրություններին մասնակցելու է Վանաձոր համայնքի ղեկավարի առաջին տեղակալ, Վանաձորի ավագանու անդամ Արկադի Փելեշյանի գլխավորությամբ, «Այլանս» առաջադիմական ցենտրիստական կուսակցությունը՝ ՀՀ էլեկտրական ցանցերի Դեբեդ մասնաճյուղի իրացման պետ Կարեն Էդարյանի գլխավորությամբ։ «Քաղաքացիական պայմանագիր» կուսակցության համայնքապետի թեկնածուն Լոռու ներկայիս մարզպետ Արամ Խաչատրյանն է։ «Հանրապետություն» կուսակցությունը մասնակցելու է Վազգեն Թորոսյանի գլխավորությամբ․ վերջինս չի աշխատում։ «Ապրելու երկիր» կուսակցության ցուցակն էլ գլխավորելու է Արտավազդ Ալավերդյանը, որը Վանաձորի «Դիետ» ՍՊԸ-ի գործադիր տնօրենն է։ «Լուսավոր Հայաստան» կուսակցության համայնքապետի թեկնածուն Հրանտ Այվազյանն է, ով 7-րդ գումարման Ազգային ժողովի «Լուսավոր Հայաստան» խմբակցության անդամ է եղել, հիմա դասախոսում է  Հայաստանի ազգային պոլիտեխնիկական համալսարանի Վանաձորի մասնաճյուղում։ «Հայրենիք» կուսակցությունը Վանաձորի ՏԻՄ ընտրություններին մասնակցելու է Վահե Դոխոյանի գլխավորությամբ, որը «Հայրենիք» զարգացման հիմնադրամի Լոռու մարզային  գրասենյակի ղեկավարն է։ «Բարգավաճ Հայաստանի» ցուցակը գլխավորելու է Էդգար Բոջուկյանը, ով չի աշխատում։  Վանաձորի նախկին քաղաքապետ Մամիկոն Ասլանյանը ընտրություններին մասնակցելու է  «Մամիկոն Ասլանյան» դաշինքով․ նա այժմ չի աշխատում։  Հայաստանի կոմունիստական կուսակցությունն էլ ընտրություններին մասնակցելու է ՀԿԿ կենտկոմի առաջին քարտուղար, Վանաձորի քաղաքային կազմակերպության առաջին քարտուղար Արկադի Ղուկասյանի գլխավորությամբ։   Նանե Ավետիսյան
18:08 - 24 նոյեմբերի, 2021
Վանաձորում առաջնային են սոցիալ-տնտեսական խնդիրները․ դրանք հնարավոր է լուծել աշխատատեղերի միջոցով․ Անդրանիկ Ղուկասյան

Վանաձորում առաջնային են սոցիալ-տնտեսական խնդիրները․ դրանք հնարավոր է լուծել աշխատատեղերի միջոցով․ Անդրանիկ Ղուկասյան

Վանաձոր համայնքում այս տարվա դեկտեմբերի 5-ին կանցկացվեն ՏԻՄ ընտրություններ՝ համամասնական ընտրակարգով։ Հայաստանի կոմունիստական կուսակցությունը ընտրություններին մասնակցելու է ՀԿԿ Վանաձորի քաղաքային կոմիտեի առաջին քարտուղար Անդրանիկ Ղուկասյանի գլխավորությամբ։ Վերջինս Infocom-ի հետ զրույցում ասաց, որ ակտիվ քարոզարշավ են անցկացնում․ «Բուկլետներ ու թերթ ենք լույս ընծայել, համապատասխան տեղերում անցկացնում ենք  հանդիպումներ։ Մենք մեր քարոզչությունն ենք անում, ու տեսնենք, թե ընտրություններին համապատասխան արդյունքները ինչպիսին կլինեն»։ Համայնքապետի թեկնածուի խոսքով՝ Վանաձորում մի շարք կենցաղային խնդիրներ կան, սակայն հանդիպումների ժամանակ բնակիչները հիմնականում բարձրացնում են սոցիալ-տնտեսական վիճակի հարցը, և համայնքապետի թեկնածուն սոցիալ-տնտեսական խնդիրների լուծումն է համարում իրենց առաջնահերթությունը․ «Որպես գաղափարական կուսակցություն, որը դեմ է այս հասարակարգին, մեր առաջնահերթ խնդիրը նաև ժողովրդի կողմից առաջարկված սոցիալ-տնտեսական վիճակն է՝ ինչպես Հայաստանում, այնպես էլ Կիրովականում։ Ժողովուրդը հիասթափված է․ հիասթափված է նաև իշխանություններից, որովհետև ոչ մի սոցիալ-տնտեսական հարց չի լուծվում այսօր՝ հատկապես թոշակառուների հետ կապված։ Նրանք բողոքում են, որ ցածր է թոշակը ու չի բարձրացվում, որպեսզի թոշակառուները կարողանան իրենց մինիմալ պահանջները հոգալ։ Նաև առաջնահերթ խնդիր է բազմաբնակարան շենքերի տանիքների հարցը, աղբահանության հարցը, տրանսպորտի աշխատանքի հարցը։ Բայց մեր խնդիրը այն է, որ ժողովրդի սոցիալ-տնտեսական վիճակն է շատ ծանր»։ Սոցիալ-տնտեսական խնդիրների լուծումը, Ղուկասյանի պատկերացմամբ, կարող է լուծվել աշխատատեղերի միջոցով․ «Եթե աշխատատեղ է լինում, նշանակում է՝ մարդու սոցիալ-տնտեսական վիճակը լավանում է։ Մենք Կոմունիստական կուսակցության ռուս գործընկերների հետ ծրագիր ունենք։ Եթե հաջողվի, որ մեր քաղաքապետի թեկնածուն ընտրվի, կաշխատենք նաև համապատասխան կոմունիստ նահանգապետերի՝ գուբերնատորների հետ, փորձի փոխանակում լինի։ Միգուցե նրանց հետ ինչ-որ մի ձևով այնպես անենք, որ աշխատատեղեր բացվեն, արդյունաբերական կլինեն, ֆաբրիկաներ կլինեն, բայց համապատասխան ձևով նաև օգտակար կլինենք, թե չէ անընդհատ խոսում են ներդրումների մասին, ու այս ժողովուրդը չտեսավ ոչ մի ներդրում։ Ներդրումը միայն իշխանության համար է, ներդրումները ցանկացած իշխանություն իր համար է ապահովում, որպեսզի պարգևավճարներ տան իրենց, ինչ-ինչ ձևերով իրենց աշխատավարձերը բարձրացնեն, բայց ոչ մեկը չի մտածում, թե հասարակ ժողովուրդը ինչպես է ապրելու իր 30-40 հազար թոշակով»,- ասաց նա՝ հավելելով, որ Կոմունիստական կուսակցության ռուս գործընկերների հետ արդեն ունեն որոշակի պայմանավորվածություններ։  Նա նաև նշեց՝ Հայաստանում և Վանաձորում հասարակարգի փոփոխություն պետք է լինի․ «Կապիտալիստական սիստեմը անընդունելի է և 30 տարի բերել է նրան, որ այսօր այս վիճակն է, սոցիալական վիճակը շատ վատ է նաև Կիրովականում»։ Վանաձորը ներառվել է համայնքների խոշորացման նախագծում և գտնվում է խոշորացման փուլում․ ըստ կառավարության ներկայացրած և ԱԺ-ում ընդունված այդ նախագծի՝ Վանաձոր քաղաքին են միանում նաև Գուգարք, Դարպաս, Շահումյան գյուղերը։ Ղուկասյանը նշեց, որ սխալ է համարում համայնքի խոշորացումը՝ ընդգծելով, որ այդպիսով Վանաձորում առկա խնդիրներին միանալու են Վանաձորին միացող 3 գյուղերի խնդիրները․  «Պետք է խոշորացվի այն ժամանակ, երբ այդ քաղաքի սոցիալական վիճակը նորմալ է, այսօր Կիրովականը բազում խնդիրներ ունի, և դրանց գումարվում են Դարպասի, Շահումյանի, Գուգարքի խնդիրները։ Հարկավոր էր լուծել խնդիրները, նոր հետո միացնել, չնայած՝ ես համոզված եմ, որ միացումը ոչ թե ինչ-որ սոցիալ-տնտեսական հարց է, այլ զուտ քաղաքական, չեմ ուզում փակագծերը բացել, այստեղ կա համապատասխան տոկոսներ ստանալու խնդիր, իրենց թվում է, որ իշխանություններից կարող են համապատասխան տոկոսներ ստանալ, բայց չգիտեն, որ մենք հանդիպումներ ենք ունեցել գյուղերում, այնտեղ ավելի բարդ է իրավիճակը, քան քաղաքում»։ Անդրանիկ Ղուկասյանը վստահեցրեց՝ ընտրվելու պարագայում բարձրաձայնելու են ժողովրդին հուզող բոլոր հարցերը․ «Ովքեր ընտրվում են, պարտավոր են այդ հարցերը բարձրացնել, ուրիշ հարց է, թե իշխանությունները կլսեն, թե չեն լսի։ Եթե հաջողվի առավելագույն տոկոս հավաքել և կուսակցությունը ունենա իր քաղաքապետի թեկնածուն, այդ ժամանակ մեր պահանջները իշխանություններին ավելի մեծ կլինեն և մենք կկարողանանք այդ հարցերը բարձրացնել ամենաբարձր մակարդակներում։ Ժողովրդի շրջանում շատ մեծ ոգևորություն կա Կոմունիստական կուսակցության հանդեպ, որովհետև իրենք էլ են ասում՝ տեսել ենք, որ իշխանությունները փոխվել են, բայց ոչ մի առաջընթաց ժողովրդի սոցիալ-տնտեսական վիճակում չի եղել»։ Վանաձորի ՏԻՄ ընտրություններին 10 քաղաքական ուժ է մասնակցելու՝  9 կուսակցություն և 1 դաշինք։ Հայաստանի աշխատավորական սոցիալիստական կուսակցությունը ընտրություններին մասնակցում է Վանաձոր համայնքի ղեկավարի առաջին տեղակալ, Վանաձորի ավագանու անդամ Արկադի Փելեշյանի գլխավորությամբ, «Այլանս» առաջադիմական ցենտրիստական կուսակցությունը մասնակցում է ՀՀ էլեկտրական ցանցերի Դեբեդ մասնաճյուղի իրացման պետ Կարեն Էդարյանի գլխավորությամբ։ «Քաղաքացիական պայմանագիր» կուսակցության համայնքապետի թեկնածուն Լոռու ներկայիս մարզպետ Արամ Խաչատրյանն է։ «Հանրապետություն» կուսակցությունը մասնակցելու է Վազգեն Թորոսյանի գլխավորությամբ․ վերջինս չի աշխատում, «Ապրելու երկիր» կուսակցության ցուցակն էլ գլխավորում է Արտավազդ Ալավերդյանը, որը Վանաձորի «Դիետ» ՍՊԸ-ի գործադիր տնօրենն է։ «Լուսավոր Հայաստան» կուսակցության ցուցակը գլխավորելու է Հրանտ Այվազյանը, որը 7-րդ գումարման Ազգային ժողովի «Լուսավոր Հայաստան» խմբակցության անդամ է եղել, հիմա դասախոսում է  Հայաստանի ազգային պոլիտեխնիկական համալսարանի Վանաձորի մասնաճյուղում։ «Հայրենիք» կուսակցությունը Վանաձորի ՏԻՄ ընտրություններին մասնակցելու է Վահե Դոխոյանի գլխավորությամբ, որը «Հայրենիք» զարգացման հիմնադրամի Լոռու մարզային  գրասենյակի ղեկավարն է։ «Բարգավաճ Հայաստանի» ցուցակը գլխավորելու է  Էդգար Բոջուկյանը, որը չի աշխատում։  Վանաձորի նախկին քաղաքապետ Մամիկոն Ասլանյանը ընտրություններին մասնակցելու է  «Մամիկոն Ասլանյան» դաշինքով․ նա այժմ չի աշխատում։  Հայաստանի կոմունիստական կուսակցությունն էլ ընտրություններին մասնակցելու է ՀԿԿ Վանաձորի քաղաքային կոմիտեի առաջին քարտուղար Անդրանիկ Ղուկասյանի գլխավորությամբ։   Լուսանկարը՝ Հայաստանի կոմունիստական կուսակցության ֆեյսբուքյան պաշտոնական էջից   Նանե Ավետիսյան  
15:24 - 24 նոյեմբերի, 2021
Թուրքիայում պահանջում են կառավարության հրաժարականը թուրքական լիրայի արժեզրկման պատճառով

Թուրքիայում պահանջում են կառավարության հրաժարականը թուրքական լիրայի արժեզրկման պատճառով

Նոյեմբերի 23-ին Թուրքիայի մայրաքաղաք Անկարայում, ինչպես նաև Ստամբուլում ու մի շարք այլ քաղաքներում բողոքի ակցիաներ են տեղի ունեցել թուրքական լիրայի պատմական անկման պատճառով։ Այս մասին հայտնում է Duvar-ը։ Բողոքի ակցիա իրականացնող քաղաքացիները պահանջում են կառավարող «Արդարություն և զարգացում» կուսակցության (AKP) հրաժարականը: «ԱԶԿ հեռացե՛ք, այս երկիրը մերն է», «ԱԶԿ-ն՝ դեպի գերեզման, ժողովուրդը՝ իշխանության»․ նման վանկարկումներ էին անում ցուցարարները։ Ակցիային միացել են նաև շատ ուսանողներ։ Ստամբուլի թաղամասերից մեկում ոստիկանները կանխել են մի խմբի երթ։ Ոստիկանական բարիկադներ են տեղադրվել Թաքսիմ հրապարակում։ Թվիթերում օրվա ընթացքում ավելի քան 263,000 թվիթ է տարածվել, որտեղ օգտատերերը կոչ են անում կառավարությանը հրաժարական տալ տնտեսական ճգնաժամի ֆոնին: Հակառակ կողմում ավելի քան 300,000 թվիթ են տարածել ԱԶԿ-ի կողմնակիցները, որոնք գրում են. «Ես կանգնած եմ իմ պետության կողքին»: Նոյեմբերի 23-ին թուրքական լիրան արժեզրկվել է 15%-ով․ սա լիրայի պատմության երկրորդ վատթարագույն օրն է այն բանից հետո, երբ երկրի նախագահ Ռեջեփ Թայիփ Էրդողանը կողմ է հանդես եկել տոկոսադրույքների վերջին կտրուկ նվազումներին և խոստացել հաղթել իր՝ «անկախության համար տնտեսական պատերազմում»՝ չնայած մեծածավալ քննադատություններին։ Լիրայի արժեքը մեկ դոլարի դիմաց 13,45 է։ Այն այս տարի կորցրել է իր արժեքի 45%-ը՝ նախորդ շաբաթվա սկզբից գրանցելով գրեթե 26% անկում:
10:57 - 24 նոյեմբերի, 2021