Իլհամ Ալիև

Ալիևը կարծում է, որ Ադրբեջանն ու Հայաստանը մի քանի ամսվա ընթացքում կարող են խաղաղության պայմանագիր ստորագրել |factor.am|

factor.am: Ադրբեջանի նախագահ Իլհամ Ալիևը հայտարարել է, որ Ադրբեջանն ու Հայաստանը մի քանի ամսվա ընթացքում կարող են պատրաստել և ստորագրել խաղաղության պայմանագիր: «Կարծում եմ, որ մենք կարող ենք մի քանի ամսվա ընթացքում ավարտել աշխատանքը և խաղաղության պայմանագիր ստորագրել»,- Interfax-ի փոխանցմամբ՝ հայտարարել է Ալիևը իտալական Il Sole 24 Ore թերթին տված հարցազրույցում: Ալիևը Հայաստանի վարչապետ Նիկոլ Փաշինյանի հետ Բրյուսելում օգոստոսի 31-ին Եվրախորհրդի ղեկավար Շառլ Միշելի միջնորդությամբ կայացած բանակցությունների ամենակարևոր արդյունքներից մեկն է համարել Ադրբեջանի արտաքին գործերի նախարարների հանդիպման պայմանավորվածությունը՝ խաղաղ համաձայնագրի շուրջ բանակցություններ սկսելու նպատակով: Ալիևի խոսքով՝ խաղաղության պայմանագիրը կառուցվելու է հինգ հիմնական սկզբունքների վրա։ Նա պնդում է, որ հայկական կողմն ընդունել է դրանք։

20:14 - 03 սեպտեմբերի, 2022

Հայաստանի և Ադրբեջանի միջև «խաղաղության պայմանագիրը» հիմնված է լինելու Բաքվի առաջարկած և Երևանի կողմից ընդունված 5 սկզբունքների վրա․ Ալիև |tert.am|

tert.am: Ադրբեջանի նախագահ Իլհամ Ալիևը հայտարարել է, որ Ադրբեջանի և Հայաստանի արտգործնախարարները գործնական բանակցությունները «խաղաղության պայմանագրի» շուրջ հիմնված են լինելու Բաքվի առաջարկած և Երևանի կողմից ընդունված հինգ սկզբունքների վրա․ հայտնում է Interfax.az-ը։ «Այս հինգ սկզբունքները ներառում են երկու երկրների տարածքային ամբողջականության ճանաչումը, տարածքային պահանջներից փոխադարձ հրաժարումը, ուժի կամ ուժի սպառնալիքի չկիրառումը, սահմանների սահմանազատումը և հաղորդակցությունների բացումը։ Այս սկզբունքներն առաջարկվել են Հայաստանին Ադրբեջանի կողմից։ Հայաստանի վարչապետն ընդունել է դրանք։ Դա վերահաստատվել է նաև երկու օր առաջ Բրյուսելում մեր հանդիպման ժամանակ»,- Իտալիայում լրագրողներին ասել է Ալիևը։

21:44 - 02 սեպտեմբերի, 2022

Բրյուսելում քննարկումը հեշտ չի եղել, հնարավոր լուծումներն ակնհայտ չեն․ Նիկոլ Փաշինյան |civilnet.am|

civilnet.am: Օգոստոսի 31-ին Բրյուսելում տեղի ունեցած քննարկումը հեշտ չի եղել, բայց պետք է հետևողականորեն աշխատենք խաղաղության օրակարգը կյանքի կոչելու ուղղությամբ։ Այս մասին կառավարության այսօրվա՝ սեպտեմբերի 1-ի նիստին հայտարարել է վարչապետ Նիկոլ Փաշինյանը։ «Հասկանալի է, որ քննարկումը ծավալուն է եղել, հեշտ չէ, բայց ես ուզում եմ արձանագրել, որ մեր նպատակադրումները շարունակում են մնալ և պետք է շարունակեն մնալ այնպիսին, ինչի մասին ես հայտարարել եմ իմ հրապարակային ելույթներում։ ՀՀ կառավարությունը որդեգրել է խաղաղության օրակարգը և այստեղ էլ մեզ վճռականություն է անհրաժեշտ այդ օրակարգը կյանքի կոչելու համար։ Մենք պետք է բոլորս հասկանանք, որ դա հեշտ չէ, պարզ չէ և հնարավոր լուծումներն էլ ակնհայտ չեն, մենք պետք է շարունակենք հետևողական աշխատել»,- ասել է նա։ Փաշինյանի կարծիքով՝ անհրաժեշտ է օր առաջ տարածաշրջանում հաստատել տևական և համապարփակ խաղաղություն․ «մենք պետք է ավելի ու ավելի շատ կենտրոնանք այս խնդրի լուծման վրա»։ «Հանդիպումից չկան այլ մանրամասներ հաղորդելու համար, որովհետև այն ինչը պայմանավորվել ենք, համառոտ ներկայացված է։ Հետագայում եթե կլինեն մանրամասներ, առաջարկներ կամ թեմաներ, որոնք այնքան հասունացած կլինեն, որ անհրաժեշտ լինի քննարկել կառավարությունում, հանրության, քաղաքական ուժերի հետ, մենք դա անպայման կանենք»,- նշել է վարչապետը։

12:24 - 01 սեպտեմբերի, 2022

Կարևոր է երկու կողմերի բնակչությանը պատրաստել երկարաժամկետ կայուն խաղաղության. Միշելի հայտարարությունը՝ եռակողմ հանդիպումից հետո |tert.am|

tert.am: Եվրոպական խորհրդի նախագահ Շառլ Միշելը Բրյուսելում ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ եռակողմ հանդիպման ավարտին հանդես է եկել հայտարարությամբ։ Միշելը նշել է Ադրբեջանի կողմից հայ գերիների ազատ արձակման կարևորությունը։ ԵՄ նախագահը խոստացել է, որ ԵՄ-ն կշարունակի զբաղվել այդ հարցով։ Քննարկված հարցերից Միշելն առանձնացրել է սահմանազատման ու տրանսպորտային կապերի ապաշրջափակման վերաբերյալ քննարկումներում գրանցված առաջընթացները: «Այս բոլոր քննարկումներով ես կցանկանայի ընդգծել, որ կարևոր է երկու կողմերի բնակչությանը տանել և պատրաստել երկարաժամկետ կայուն խաղաղության։ Հանրային հաղորդագրություններն այս առումով չափազանց կարևոր են. նման զգայուն իրավիճակում հանրության մեջ ասված յուրաքանչյուր բառ ակնհայտորեն լսվում է մյուս կողմից և քննարկվում»,– ասված է ԵՄ նախագահի հայտարարության մեջ: Նրա խոսքով՝ կողմերը համաձայնել են առարկայական ջանքեր գործադրել երկու երկրների միջպետական հարաբերությունները կարգավորող խաղաղության պայմանագրի ուղղությամբ առաջ շարժվելու համար։ ԵՄ նախագահը վերահաստատել է ԵՄ պատրաստակամությունը հետագայում ևս աջակցելու երկարաժամկետ կայուն խաղաղության հաստատմանը: Շառլ Միշելն ասել է, որ ԵՄ-ն կշարունակի ջանքեր գործադրել տնտեսական զարգացման առաջխաղացման ուղղությամբ՝ ի շահ երկու երկրների և նրանց բնակչության:

20:38 - 31 օգոստոսի, 2022

Բրյուսելում քննարկվել են մի շարք հարցեր, այդ թվում՝ գերիների, Հայաստան-Ադրբեջան հարաբերությունների կարգավորմանը, ԼՂ հիմնախնդրին վերաբերող հարցեր

Օգոստոսի 31-ին Բրյուսելում, ԵՄ խորհրդի նախագահ Շառլ Միշելի միջնորդությամբ, տեղի է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը: Այս մասին հայտնում են ՀՀ կառավարությունից։ Քննարկվել են գերիների ազատ արձակմանը և անհետ կորածների ճակատագրի պարզաբանմանը, սահմանազատմանը և սահմանային անվտանգությանը, տարածաշրջանային ապաշրջափակմանը, Հայաստան-Ադրբեջան հարաբերությունների կարգավորմանը, Լեռնային Ղարաբաղի հիմնախնդրին վերաբերող հարցեր:Պայմանավորվածություն է ձեռք բերվել ԱԳ նախարարների մակարդակով շարունակել առարկայական բանակցությունները խաղաղության պայմանագրի նախագծի մշակման շուրջ: ԱԳ նախարարների հանդիպումը տեղի կունենա մեկ ամսվա ընթացքում:Սահմանազատման և սահմանային անվտանգության հարցերի հանձնաժողովի հաջորդ հանդիպումը տեղի կունենա Բրյուսելում՝ նոյեմբերին:Առաջնորդների ֆորմատով հաջորդ հանդիպումը տեղի կունենա նոյեմբերին:

19:34 - 31 օգոստոսի, 2022

Բրյուսելում ավարտվել է Փաշինյան-Միշել-Ալիև հանդիպումը

Բրյուսելում ավարտվել է Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի հանդիպումը: Այն տևել է մոտ չորս ժամ՝ փակ դռների հետևում։ Բանակցությունների արդյունքների մասին դեռևս մանրամասներ հայտնի չեն։

19:05 - 31 օգոստոսի, 2022

Բրյուսելում մեկնարկել է Նիկոլ Փաշինյանի, Շառլ Միշելի և Իլհամ Ալիևի հանդիպումը

Բրյուսելում մեկնարկել է Հայաստանի վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի նախագահ Իլհամ Ալիևի հանդիպումը: Այս մասին հայտնում են ՀՀ կառավարությունից։ Հիշեցնենք, որ երեկ Եվրոպական խորհրդի նախագահ Շառլ Միշելը Twitter-ի իր միկրոբլոգում տեղեկացրել էր, որ հեռախոսազրույցներ է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ:

15:41 - 31 օգոստոսի, 2022

Նիկոլ Փաշինյանն աշխատանքային այցով մեկնել է Բրյուսել

Վարչապետ Նիկոլ Փաշինյանն աշխատանքային այցով այսօր երեկոյան մեկնել է Բրյուսել։ Օգոստոսի 31-ին Բրյուսելում նախատեսվում է Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպումը:

18:53 - 30 օգոստոսի, 2022

Նիկոլ Փաշինյանն ու Շառլ Միշելը անդրադարձել են օգոստոսի 31-ին Իլհամ Ալիևի հետ կայալանիք եռակողմ հանդիպմանը

Վարչապետ Նիկոլ Փաշինյանը հեռախոսազրույց է ունեցել Եվրոպական խորհրդի նախագահ Շառլ Միշելի հետ: Այս մասին հայտում են ՀՀ վարչապետի աշխատակազմից։ Զրուցակիցներն անդրադարձել են օգոստոսի 31-ին Բրյուսելում նախատեսված Հայաստանի Հանրապետության վարչապետ Նիկոլ Փաշինյանի, Եվրոպական խորհրդի նախագահ Շառլ Միշելի և Ադրբեջանի Հանրապետության նախագահ Իլհամ Ալիևի եռակողմ հանդիպմանը: Կողմերը կարևորել են երկխոսության շարունակականությունն ու հույս հայտնել, որ բանակցությունները կլինեն արդյունավետ: Նիկոլ Փաշինյանը և Շառլ Միշելը քննարկել են նաև Հայաստան-ԵՄ երկկողմ օրակարգին վերաբերող հարցեր:

15:31 - 30 օգոստոսի, 2022

Շառլ Միշելը հայտնել է Նիկոլ Փաշինյանի և Իլհամ Ալիևի հետ հեռախոսազրույցների մասին |1lurer.am|

1lurer.am: Եվրոպական խորհրդի նախագահ Շառլ Միշելը Twitter-ի իր միկրոբլոգում տեղեկացրել է Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հետ հեռախոսազրույցների մասին: «Նախապատրաստական հեռախոսազանգեր նախագահ Ալիևի և վարչապետ Փաշինյանի հետ՝ Բրյուսելում վաղը կայանալիք չորրորդ հանդիպման նախօրեին»,- գրել է Միշելը: Հիշեցնենք, որ Բրյուսելում օգոստոսի 31-ին նախատեսվում է ՀՀ վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Եվրոպական խորհրդի նախագահ Շառլ Միշելի եռակողմ հանդիպումը:

14:39 - 30 օգոստոսի, 2022

Փաշինյան-Ալիև-Միշել հանդիպումից հետո կտարածվի հաղորդագրություն. վարչապետի աշխատակազմը՝ Հաջիևի հայտարարության մասին |armenpress.am|

armenpress.am: Բրյուսելում օգոստոսի 31-ին նախատեսված Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Եվրոպական խորհրդի նախագահ Շառլ Միշելի եռակողմ հանդիպման արդյունքների վերաբերյալ կտարածվի համապատասխան հաղորդագրություն: Այս մասին ասացին վարչապետի աշխատակազմի տեղեկատվության և հասարակայնության հետ կապերի վարչությունից, արձագանքելով Ադրբեջանի նախագահի օգնական Հիքմեթ Հաջիևի հայտարարությանը, որում նա նշել է, որ Բրյուսելում նախատեսվող եռակողմ հանդիպմանը նախատեսվում է համաձայնեցնել խաղաղության համաձայնագրի տեքստը նախապատրաստող խմբի ստեղծման հարցը: «Հանդիպման արդյունքների վերաբերյալ կտարածվի համապատասխան հաղորդագրություն, որտեղ կտրվի համապարփակ տեղեկատվություն քննարկված թեմաների շուրջ»,- ասացին վարչապետի աշխատակազմից: Հիշեցնենք, որ այսօր Ադրբեջանի նախագահի օգնական Հիքմեթ Հաջիևը հայտարարել էր Ադրբեջանի և Հայաստանի միջև բանակցությունների ուղղությունները։

15:10 - 27 օգոստոսի, 2022

Բրյուսելում տեղի կունենա Նիկոլ Փաշինյանի, Իլհամ Ալիևի և ԵՄ խորհրդի նախագահ Շառլ Միշելի հանդիպումը |pastinfo.am|

pastinfo.am: Օգոստոսի 31-ին Բրյուսելում տեղի կունենա Հայաստանի վարչապետ Նիկոլ Փաշինյանի, Ադրբեջանի նախագահ Իլհամ Ալիևի և Եվրոպայի խորհրդի նախագահ Շառլ Միշելի հանդիպումը: Այս մասին հայտնում է Վարչապետի աշխատակազմի տեղեկատվության և հասարակայնության հետ կապերի վարչություն պետ Արմեն Խաչատրյանը: Նրա փոխանցմամբ՝ հանդիպմանը կքննարկվեն այն նույն հարցերը, որոնք մինչ այս Բրյուսելում եղել են քննարկման առարկա:

13:19 - 25 օգոստոսի, 2022

Բաքուն և Նուր-Սուլթանը «գործակցությունը նոր մակարդակի կհասցնեն» |azatutyun.am|

azatutyun.am: Ադրբեջանի և Ղազախստանի միջև բարեկամական և եղբայրական հարաբերությունները նոր բարձր մակարդակի կհասնեն, Ղազախստանի նախագահ Կասիմ-Ժոմարտ Տոկաևի հետ հանդիպմանը հայտարարել է Ադրբեջանի նախագահ Իլհամ Ալիևը։ Պաշտոնական այցով առաջին անգամ Ադրբեջանում գտնվող Ղազախստանի նախագահն իր հերթին ասել է, որ այսօրվա բանակցությունների արդյունքում մի շարք փաստաթղթեր կստորագրվեն։ Վերջինս ևս համոզմունք է հայտնել, որ ղազախա-ադրբեւջանական հարաբերությունները, գործակցությունը նոր մակարդակի կհասցվեն։ Ղազախստանի նախագահը, ըստ ադրբեջանական «Թրենդ» գործակալության Իլհամ Ալիևին պարգևատրել է Ղազախստանի ամենաբարձ՝ «Ոսկե արծիվ» շքանշանով։

15:25 - 24 օգոստոսի, 2022

Ղազախստանի նախագահ Կասիմ-Ժոմարտ Տոկաևը ժամանել է Ադրբեջան |hetq.am|

hetq.am: Ղազախստանի նախագահ Կասիմ-Ժոմարտ Տոկաևը չորեքշաբթի օրը՝ օգոստոսի 24-ի առավոտյան, պաշտոնական այցով ժամանել է Ադրբեջանի մայրաքաղաք Բաքու, որտեղ բանակցություններ կընթանան այդ երկրի նախագահ Իլհամ Ալիևի հետ։ Այդ մասին ՏԱՍՍ գործակալության փոխանցմամբ հայտնում է Ղազախստանի նախագահի մամուլի ծառայությունը։ Նշվում է, որ օդանավակայանում Տոկաևին դիմավորել են Ադրբեջանի վարչապետի առաջին տեղակալ Յաղուբ Էյուբովը և արտաքին գործերի նախարարի տեղակալ Խալաֆ Խալաֆովը։ «Այցի ընթացքում նախատեսված են նեղ և ընդլայնված ձևաչափերով բանակցություններ Ղազախստանի և Ադրբեջանի նախագահների միջև։ Սպասվում է, որ երկրների ղեկավարները կդիտարկեն երկկողմ համագործակցության բազմաբնույթ հարցերի լայն շրջանակ»,- նշվում է հաղորդագրության մեջ։ Երկու երկրների ղեկավարների միջև բանակցությունների արդյունքում նախատեսվում է մի քանի համաձայնագրերի ստորագրում։ Ադրբեջանի նախագահական պալատում մեկնարկել է Տոկաևի դիմավորման պաշտոնական արարողությունը, որից հետո կայացել է նախագահների պատվիրակությունների ներկայացման արարողությունը։

11:56 - 24 օգոստոսի, 2022

Ալիևը խոստացել է շահավետ պայմաններով էլեկտրաէներգիա տրամադրել Սերբիային. Վուչիչ |azatutyun.am|

azatutyun.am: Ադրբեջանի նախագահը խոստացել է շահավետ պայմաններով էլեկտրաէներգիա տրամադրել Սերբիային, հայտարարել է այդ երկրի նախագահ Ալեքսանդր Վուչիչը Իլհամ Ալիևի հետ երեկ կայացած հեռախոսազրույցից հետո։ Վուչիչը ադրբեջանցի գործընկերոջը հրավիրել է Սերբիա՝ նոր թափ հաղորդելու երկկողմ համագործակցությանը, հատկապես էլեկտրաէներգիայի ու գյուղատնտեսության ոլորտներում։ Ըստ պաշտոնական հաղորդագրության, կողմերը վերստին աջակցություն են հայտնել միմյանց տարածքային ամբողջականությանը և ընդգծել, որ Ադրբեջանի և Սերբիայի միջև հարաբերությունները հասել են ռազմավարական գործընկերության մակարդակի:

15:27 - 22 օգոստոսի, 2022

Արցախի համար Ադրբեջանի կազմում ցանկացած կարգավիճակ անընդունելի է․ Դավիթ Բաբայան

Արցախի արտգործնախարար Դավիթ Բաբայանը ֆեյսբուքյան իր էջում գրել է․ «Ադրբեջանի նախագահ Իլհամ Ալիևը երեկ իր հարցազրույցում ասել է, որ Ադրբեջանի կազմում Ղարաբաղում ապրող հայերը չեն ունենա ոչ կարգավիճակ, ոչ անկախություն, ոչ էլ հատուկ արտոնություններ։ Լավ, ի՞նչ կարելի է ասել այստեղ։ Մանրամասների մեջ խորանալու իմաստ չկա։ Միայն ասեմ հետեւյալը: Դե, նախ ուզում եմ շնորհակալություն հայտնել Ալիևին անկեղծության համար։ Իրոք, ոչ Ադրբեջանը, ոչ էլ նրա ղեկավարությունը երբևէ չեն թաքցրել Արցախի վերաբերյալ իրենց ծրագրերը: Երկրորդը, իսկապես, Ղարաբաղը Ադրբեջանի կազմում ոչինչ չի ունենա, քանի որ ինքը Ղարաբաղը չի լինի։ Բացի այդ, Արցախի համար Ադրբեջանի կազմում ցանկացած կարգավիճակ անընդունելի է։ Ինչպե՞ս կարող էին հրեաները գոնե ինչ-որ վարչական-տարածքային կարգավիճակ ունենալ նացիստական Գերմանիայում»: Երեկ Ալիեւն ասել է, թե «Ղարաբաղում ապրող հայերը պետք է հասկանան, որ իրենց ապագան կախված է միայն ադրբեջանական հասարակությանը ինտեգրվելուց։ Նրանք չեն ունենա ո՛չ կարգավիճակ, ո՛չ անկախություն, ո՛չ հատուկ արտոնություններ»։

11:54 - 13 օգոստոսի, 2022