Արցախը, այսինքն՝ ամբողջ հայությունը, որքան էլ խոցված, իրավունք ունի՛ իրավունք ունենալու․ Բագրատ եպիսկոպոս Գալստանյանը
Մենք պետք է հրաժարվենք ոչ թե բարեկամներ ունենալուց, այլ պետք է հրաժարվենք մեր հույսը միայն մեր բարեկամների վրա դնելուց։ Այս մասին Ազատության հրապարակում ընդդիմության՝ հաջակցություն Արցախի հանրահավաքաի ժամանակ ասաց Տավուշի թեմի հոգեւոր առաջնորդ Բագրատ եպիսկոպոս Գալստանյանը։
«Դժբախտաբար, քաղաքական շահերը, երկակի ստանդարտները, հարաբերական բարոյականությունը ավելի ծանր են կշռում, քան ճշմարտությունը եւ արդարությունը, եւ շատ հաճախ որոշում են, թե որ ժողովուրդն իրավունք ունի իրավունք ունենալու։ Այսինքն՝ մենք այսօր իրավունք չունենք իրավունք ունենալու։ Հետեւաբար Արցախը, այսինքն՝ ամբողջ հայությունը, որքան էլ խոցված, իրավունք ունի՛ իրավունք ունենալու, որովհետեւ մեր երկրում ջրերից ավելի արյուն է ոռոգել։ Եւ այդ իրավունքն անբեկանելի է։ Արցախը երբեք չի լինելու թշնամական տերությունների կազմում։
Ես հավատում եմ մեր սեփական, հայկական, համազգային օրակարգին, թելադրող, եւ ոչ թելադրվող, պարտադրող, եւ ոչ պարտադրվող, ես հավատում եմ, որ հայոց եռագույնը պիտի վերստին ծածանվի Քարվաճառի լեռնալանջերին, Արաքսի հովիտներում, Շուշիի եւ Հադրութի բարձունքներում՝ որպես հայոց սահմանների պատվի եւ արժանապատվության վերականգնման եւ վերահաստատման նոր արշալույս։
Ես հավատում եմ հայոց բանակի փառքին ու պատվին, իր սխրանքներին եւ հերոսական կենսագրությանը, իր նկարագրին, իր էությանը, պատմությանը, ես հավատում եմ խաղաղությանը, որը արդարության եւ ճշմարտության ծնունդ է, հաղթանակող խաղաղությանն եմ հավատում»,- ասաց Սրբազանը եւ, ամփոփելով իր ելույթը, նշեց․ «Արցախը մենք ենք, եւ մենք ենք հաղթանակները կերտողները»։
15:53 - 05 նոյեմբերի, 2022
