Վլադիմիր Զելենսկի

Վլադիմիր Ալեքսանդրովիչ Զելենսկին Ուկրաինայի նախագահ, քաղաքական գործիչ, շոումեն, արտիստ, կատակերգու, «Թաղամաս-95» ստուդիայի գեղարվեստական ղեկավար և մշտական առաջնորդ, պրոդյուսեր և սցենարիստ:

Ծնվել է 1978 թվականի հունվարի 25-ին Կրիվոյ Ռոգ քաղաքում:

1998-2003 թվականներին «95-րդ թաղամասը» ելույթ է ունեցել ՈւՀԱ-ի բարձրագույն լիգայում։ Եղել է Ուկրաինայի Հանրապետության կառավարության անդամ և «Ինտեր» հեռուստաալիքի գլխավոր պրոդյուսեր

2019 թվականի հունվարի 21-ին «Ժողովրդի ծառա» կուսակցությունն առաջարկել է Վլադիմիր Զելենսկու թեկնածությունը որպես նախագահ։ Ուկրաինայի նախագահական ընտրությունների երկու փուլերի հաղթել է։

Մենք կվերլուծենք, թե ինչ ենք լսել, և հետո կորոշենք ինչպես անցնել բանակցությունների երկրորդ փուլին․ Զելենսկի

Ուկրաինայի նախագահ Վլադիմիր Զելենսկին ասել է, որ վերլուծում է ռուսական պատվիրակության հետ երկուշաբթի օրը տեղի ունեցած բանակցությունները, որը 5 ժամ էր տևել։ Այս մասին հաղորդում է CNN-ը։ «Արդար բանակցություններ կարող են լինել, եթե մի կողմը մյուսին չի հարվածում հրթիռային հրետանիով։ Առայժմ մենք չունենք արդյունքը, որ կուզեինք ստանալ։ Ռուսաստանը հայտնեց իր դիրքորոշումը, իսկ մենք ներկայացրինք պատերազմը ավարտելու մասին մեր հակափաստարկները։ Մենք որոշ ազդակներ ստացանք։ Երբ մեր պատվիրակությունը վերադառնա Կիև, մենք կվերլուծենք, թե ինչ ենք լսել, և հետո կորոշենք ինչպես անցնել բանակցությունների երկրորդ փուլին»,- նշեց նա։ Հիշեցնենք, որ երեկ Բելառուսի Գոմելի մարզի տարածքում տեղի են ունեցել ռուսական և ուկրաինական կողմերի բանակցությունները։ Լուսանկարը՝ Ալեքսանդր Կրյաժև/Sputnik/AP

11:30 - 01 մարտի, 2022

Պետությունը, որը հանցագործություններ է կատարում խաղաղ բնակչության դեմ, չի կարող լինել ՄԱԿ ԱԽ անդամ․ Զելենսկի

Ուկրաինայի նախագահ Վլադիմիր Զելենսկին կոչ է արել ամբողջապես փակել օդային տարածքը ռուսական հրթիռների, ինքնաթիռների և ուղղաթիռների համար։ Այս մասին հայտնում է CNN-ը։«Հրթիռներով, ռումբերով և հրետանիով զինված չարիքը պետք է անհապաղ կանգնեցվի ու տնտեսապես ոչնչացվի՝ ցույց տալու համար, որ մարդկությունը ի վիճակի է պաշտպանել ինքն իրեն։ Անհրաժեշտ է դիտարկել օդային տարածքի փակումը ռուսական հրթիռների, ինքնաթիռների և ուղղաթիռների համար»։Նրա խոսքով՝ պետությունը, որը հանցագործություններ է կատարում խաղաղ բնակչության դեմ, չի կարող լինել ՄԱԿ-ի անվտանգության խորհրդի անդամ․ «Նման պետության համար պետք է փակվեն բոլոր նավահանգիստների, ջրանցքների օդանավակայանների մուտքերը։ Հիմա ռուսական ապրանքներ գնելը նշանակում է վճարել մարդկանց սպանության համար»։

10:33 - 01 մարտի, 2022

Յուրաքանչյուր հանցագործություն, որ իրականացնում են օկուպանտները, ավելի է միավորում մեզ և մեր միջազգային գործընկերներին․ Զելենսկի

Ուկրաինայի նախագահ Վլադիմիր Զելենսկին հայտարարել է, որ ռուսական զորքերի յուրաքանչյուր հանցագործություն ավելի է միավորում Ուկրաինայի քաղաքացիներին և նրա միջազգային գործընկերներին։ Այս մասին հայտնում է ukrinform.net-ը։ «Ուկրաինացիները աշխարհին ցույց տվեցին, թե ով ենք մենք։ Ռուսաստանը ցույց տվեց, թե ինչ է դարձել։ Ռուսական ներխուժման հետևանքով չորս օրվա ընթացքում 16 ուկրաինացի երեխա է սպանվել։ Յուրաքանչյուր հանցագործություն, յուրաքանչյուր գնդակոծություն, որ իրականացնում են օկուպանտները, ավելի են միավորում մեզ և մեր միջազգային գործընկերներին»,-ասել է Ուկրաինայի նախագահը։

14:10 - 28 փետրվարի, 2022

Մարտական գործողությունների փորձ ունեցող ուկրաինացիները կազատվեն կալանքից․ Զելենսկի

Մարտական գործողությունների փորձ ունեցող ուկրաինացիները կազատվեն կալանքից, բոլոր պատժամիջոցները հանվում են։ Այս մասին, ինչպես հաղորդում է ՏԱՍՍ-ը․ այսօրվա ուղերձի ընթացքում հայտարարել է Ուկրաինայի նախագահ Վլադիմիր Զելենսկին։ «Բարոյական տեսանկյունից ոչ սովորական որոշում է կայացվել։ Ռազմական դրության պայմաններում մարտական փորձ ունեցող ուկրաինացիները կազատվեն կալանքից և կկարողանան քավել իրենց մեղքը»։

13:56 - 28 փետրվարի, 2022

Զելենսկին նշել է, որ չի հավատում ռուս-ուկրաինական բանակցությունների արդյունքներին

Ալեքսանդր Լուկաշենկոն ինձ խնդրեց, որ Ուկրաինայի և Ռուսաստանի պատվիրակությունները հանդիպեն Պրիպյատ գետի մոտ։ Այս մասին իր ուղերձի ժամանակ հայտարարեց Ուկրաինայի նախագահ Վլադիմիր Զելենսկին։ «Շեշտում եմ՝ առանց որևէ նախապայմանների։ Անկեղծ կասեմ․ ես այնքան էլ չեմ հավատում այդ հանդիպման արդյունքներին, բայց թող կայանա։ Որ հետո Ուկրաինայի ոչ մի քաղաքացի կասկած չունենա, որ ես՝ որպես նախագահ, պատերազմը կանգնեցնելու փորձ չեմ արել, երբ անգամ փոքր հնարավորություն է եղել։ Եվ քանի դեռ մեր տղաներն այնտեղ են, նախագահը, գրասենյակի ղեկավարը, վարչապետը, բանակը, գլխավոր հրամանատարը այստեղ են։ Մենք բոլորս կպաշտպանենք մեր պետությունն ու սահմանները»,- ասել է նա։ Ավելի վաղ Ուկրաինայի ԱԳ նախարարը հայտնել էր, որ Բելառուսի նախագահ Ալեքսանդր Լուկաշենկոն Ուկրաինայի նախագահ Վլադիմիր Զելենսկուն վստահեցրել է, որ Բելառուսի ռազմական ուժերը չեն օգտագործվի Ուկրաինայի դեմ։

21:07 - 27 փետրվարի, 2022

Լուկաշենկոն վստահեցրել է, որ Բելառուսի ռազմական ուժերը չեն օգտագործվի Ուկրաինայի դեմ․ Կուլեբա

Բելառուսի նախագահ Ալեքսանդր Լուկաշենկոն Ուկրաինայի նախագահ Վլադիմիր Զելենսկուն վստահեցրել է, որ Բելառուսի ռազմական ուժերը չեն օգտագործվի Ուկրաինայի դեմ։ «Բանակցությունների ավարտից մինչև այս պահը նախագահ Լուկաշենկոն վստահեցրել է Զելենսկուն, որ Բելառուսի ռազմական ուժերը չեն օգտագործվի Ուկրաինայի դեմ»,- ճեպազրույցում ասել է Ուկրաինայի արտաքին գործերի նախարար Դմիտրի Կուլեբան, փոխանցում է Ukrinform-ը։ «Սա արդեն ձեռքբերում է, և մեզ մնում է հուսալ, որ Ալեքսանդր Լուկաշենկոն կպահի իր խոսքը», - ասել է նախարարը։ Ուկրաինայի նախագահ Վլադիմիր Զելենսկին ավելի վաղ հայտարարել էր, որ բանակցություններ է վարել Ալեքսանդր Լուկաշենկոյի հետ։

19:52 - 27 փետրվարի, 2022

Լուկաշենկոն ստանձնել է Բելառուսի տարածքում տեղակայված բոլոր ինքնաթիռների պատասխանատվությունը՝ ուկրաինական պատվիրակության բանակցությունների ժամանակ․ Զելենսկի

Ուկրաինայի նախագահ Վլադիմիր Զելենսկի հեռախոսազրույց է ունեցել Բելառուսի նախագահ Ալեքսանդր Լուկաշենկոյի հետ։ Այս մասին Զելենսկին տելեգրամի իր ալիքում գրառում է կատարել։ «Ալեքսանդր Լուկաշենկոյի հետ զրույցի ընթացքում պայմանավորվեցինք, որ ուկրաինական պատվիրակությունը առանց նախապայմանների կհանդիպի ռուսական պատվիրակության հետ ուկրաինա-բելառուսական սահմանին՝ Պրիպյատ գետի մերձակայքում։ Լուկաշենկոն ստանձնել է Բելառուսի տարածքում տեղակայված բոլոր ինքնաթիռների, ուղղաթիռների և հրթիռների պատասխանատվությունը՝ ուկրաինական պատվիրակության բանակցությունների և վերադարձի ժամանակ»,- ասված է գրառման մեջ։

17:48 - 27 փետրվարի, 2022

Լուկաշենկոն հայտարարել է, որ Ուկրաինայում ոչ մի բելառուս զինվոր, ոչ մի փամփուշտ չկա

Բելառուսի նախագահ Ալեքսանդր Լուկաշենկոն հայտարարել է, որ Ուկրաինայում ոչ մի բելառուս զինվոր չկա։ «Ուկրաինայում ոչ մի բելառուս զինվոր, ոչ մի փամփուշտ չկա», - ասել է նա լրագրողների հետ զրույցում: Լուկաշենկոյի խոսքով՝ Ուկրաինայում բռնում ու ծեծում են ռուսներին ու բելառուսներին։ «Ուկրաինան կարծես թե մղում է Բելառուսին հատուկ գործողության՝ պաշտպանելու իր քաղաքացիներին», -ասել է նա՝ հավելելով, որ Մինսկն օգնում է ուկրաինական սահմանին վիրավորներին։ «Եթե մեզ մոտ լուրջ վնասվածքներով են գալիս, մենք բուժում ենք, իսկ ի՞նչ վատ բան կա»,- նշել է նա։ Լուկաշենկոն ասել է, որ մինչ այժմ «ոչ ոք չի ռմբակոծել Կիևը»։ «Թող Վլադիմիր Զելենսկին չստի, ոչ ոք չի ռմբակոծել Կիևը», - ասաց նա:

13:10 - 27 փետրվարի, 2022

Զելենսկին հայտնել է, որ պատրաստ են բանակցությունների ցանկացած այլ քաղաքում, բայց ոչ Մինսկում

Եթե ձեր տարածքից ագրեսիվ գործողություններ չլինեին, մենք կարող էինք բանակցություններ անցկացնել Մինսկում։ Մենք հիմա ասում ենք՝ Մինսկում ոչ։ Վարշավա, Ստամբուլ, Բաքու. մենք առաջարկել ենք այդ քաղաքները Ռուսաստանին բանակցությունների համար, և ցանկացած այլ քաղաք, որտեղից հրթիռներ չեն թռչում դեպի Ուկրաինա: Միայն այս կերպ բանակցությունները կարող են լինել ազնիվ և իսկապես վերջ տալ պատերազմին։ Այս մասին հայտարարեց Ուկրաինայի նախագահ Վլադիմիր Զելենսկին՝ անդրադառնալով Բելառուսում բանակցություններ անկացնելուն։ Զելենսկին իր ուղերձում դիմելով Բելառուսի ժողովրդին՝ ասաց․ «Այժմ շատ է խոսվում Ռուսաստանի և Ուկրաինայի միջև բանակցությունների մասին, որոնք կարող են վերջ տալ այս պատերազմին և վերականգնել խաղաղությունը բոլորիս համար: Նրանք հաճախ նշում են ձեր մայրաքաղաքը՝ Մինսկը, որպես այդ բանակցությունների հարթակ, որը մենք չենք ընտրել»,- ասել է Զելենսկին։ Ուկրաինայի նախագահի խոսքով՝ Բելառուսի տարածքից չորս օր առաջ «հրթիռներ, ինքնաթիռներ, ուղղաթիռներ և տեխնիկա են գնացել. «Նրանք հարվածել են մեր տներին, հարվածել են մեր կյանքին»։

11:50 - 27 փետրվարի, 2022

Զելենսկին ՄԱԿ գլխավոր քարտուղարին ասել է, որ ՌԴ-ին պետք է զրկել Անվտանգության խորհրդում քվեարկելու իրավունքից

Ուկրաինայի նախագահ Վլադիմիր Զելենսկին իր թվիթերյան էջում գրել է, որ զրուցել է ՄԱԿ գլխավոր քարտուղար Անտոնիո Գուտերեշի հետ։ «Ագրեսոր երկրին (Ռուսաստան- խմբ․) պետք է զրկել ՄԱԿ-ի Անվտանգության խորհրդում քվեարկելու իրավունքից, ՌԴ-ի գործողություններն ու հայտարարությունները որակել որպես Ուկրաինայի ժողովրդի ցեղասպանություն»,- գրել է Զելենսկին։ Նա նաև հավելել է, որ դիմել է ՄԱԿ գխավոր քարտուղարին, որ նրանք նաև օգնեն ռուս զինվորականների դիերը հանձնելու հարցում։

23:41 - 26 փետրվարի, 2022

Ուկրաինացի դիվանագետները շուրջօրյա աշխատում են, որ եվրոպական երկրները համաձայնության գան ՌԴ-ին SWIFT-ից հեռացնելու որոշման շուրջ․ Զելենսկի

Ուկրաինայի նախագահ Վլադիմիր Զելենսկին վերջին ուղերձի ժամանակ հայտարարել է, որ Ուկրաինացի դիվանագետները շուրջօրյա աշխատում են, որ եվրոպական երկրները համաձայնության գան Ռուսաստանին SWIFT համակարգից (Համաշխարհային միջբանկային ֆինանսական հեռահաղորդակցության կազմակերպություն) հեռացնելու որոշման շուրջ։ Այս մասին հայտնում է Ukrinform-ը։ «Կարծես թե Ուկրաինան հասել է ողջ քաղաքակիրթ աշխարհի անկեղծությանն ու ուշադրությանը։ Իսկ գործնական արդյունքը SWIFT-ն է: Ռուսաստանի Դաշնության համար այս բառի մեջ մեծ նշանակություն կա՝ անջատում համաշխարհային ֆինանսական քաղաքակրթությունից: Մեր դիվանագետները շուրջօրյա պայքարում են, որ Եվրոպայի բոլոր երկրները համաձայնության գան Ռուսաստանին միջազգային միջբանկային ցանցից կտրելու ուժեղ և արդար որոշման շուրջ»,- ասել է նա։ Զելենսկին հայտարարել է, որ դա Ռուսաստանի համար նշանակում է միլիարդավոր կորուստներ։ Նա ընդգծել է, որ դա կոնկրետ գին է Ուկրաինա ներխուժման համար։

23:20 - 26 փետրվարի, 2022

Ռուսական ռազմանավերի՝ դեպի Սև ծով անցնելու արգելքը և Ուկրաինային զգալի ռազմական ու հումանիտար աջակցությունն այսօր չափազանց կարևոր են Ուկրաինայի համար․ Զելենսկի

Վլադիմիր Զելենսկիմ թվիթերյան իր միկրոբլոգում գրում է․ «Շնորհակալ եմ իմ բարեկամ, Թուրքիայի նախագահ պարոն Էրդողանին և Թուրքիայի ժողովրդին ամուր աջակցության համար։ Ռուսական ռազմանավերի՝ դեպի Սև ծով անցնելու արգելքը և Ուկրաինային զգալի ռազմական ու հումանիտար աջակցությունն այսօր չափազանց կարևոր են։ Ուկրաինայի ժողովուրդը երբեք չի մոռանա դա», - Twitter-ում գրել է Զելենսկին։ Նշենք, որ Թուրքիան դեռևս պաշտոնապես այս մասին չի հայտարարել։ Ավելի ուշ Թուրքիայում ՌԴ դեսպանատունը հայտնել է, որ Ռուսական կողմը Անկարայից որևէ ծանուցում չի ստացել իր ռազմանավերի համար նեղուցները փակելու մասին։

17:42 - 26 փետրվարի, 2022