Կառավարությունը այսօրվա նիստի ընթացքում  պահուստային ֆոնդից արտակարգ իրավիճակների նախարարությանը ավելի քան 157 միլիոն դրամ 157 միլիոն դրամ հատկացրեց արտակարգ իրավիճակների նախարարությանը՝ երկրաշարժից տուժած Թուրքիա և Սիրիա ուղարկված հումանիտար օգնության ծախսերի փոխհատուցման նպատակով:

Այնուհետև ԱԳ նախարար Արարատ Միրզոյանը ամփոփեց երեկ Թուրքիա կատարած այցը, ինչից հետո վարչապետ Նիկոլ Փաշինյանը հայտարարեց՝ անընդունելի է համարում իրենց հասցեին հնչող քննադատությունները. «Չեմ կարող պատկերացնել որևէ իրավիճակ, երբ ընդամենը դռնից այն կողմ միլիոնավոր մարդիկ աջակցության կարիք ունեն բնական աղետի պարագայում, և որևէ մեկը կարող է անտարբեր մնալ, դա բացարաձակապես անընդունելի է որևէ հիմանվորմամբ և որևէ պատճառաբանությամբ»:

Փաշինյանը հիշեցրեց՝ բազմիցս ընդգծել են տարածաշրջանում հարաբերությունների որակը փոխելու տեսլականը. «Ցավում եմ, որ նման որոշակի մթնոլորտային փոփոխություն տեղի է ունենում այսպիսի աննախադեպ աղետի պայմաններում, բայց երևի նաև օբյեկտիվորեն մարդկային ողբերգությունը մարդկանց միմյանց համար ավելի հասկանալի է դարձնում: Գուցե դա նաև օբյեկտիվ իրականություն է: Հույս ունեմ, որ իսկապես սա կարող է մի նոր ելակետ դառնալ տարածաշրջանում հարաբերությունների հաստատման, Հայաստանի և Թուրքիայի միջև հարաբերությունների հաստատման համար»:

Գործադիրի ղեկավարն ընդգծեց նաև, որ Սիրիայի ուղղությամբ աշխատանքները նույնպես շատ կարևոր է համարում. «Օբյեկտիվ և սուբյեկտիվ բազմաթիվ հանգամանքներ կային, որոնք Սիրիային հումանիտար օգնությունը պակաս հասանելի էին դարձնում: Պիտի արձանագրեմ, որ Հայաստանը առաջին երկրներից էր, որ որոշում կայացրեց և հումանիտար օգնություն ուղարկեց Սիրիա: Մենք պլանավորում էինք նաև ԱԳ նախարարի այցը Սիրիայի Արաբարական Հանրապետություն, և նաև եթե մեր Սիրիայի գործընկերները դեմ չլինեն, մենք առաջիկայում նման այց կկատարենք, և կարծում եմ՝ Սփյուռքի գործերի գլխավոր հանձնակատարը պետք է այց կատաի Սիրիա, որպեսզի մեր զորակցությունը արտահայտվի»:

Փաշինյանը նաև նշեց, որ Սիրիա մեկնած հայ փրկարարները արդեն վերադարձել են հայրենիք, իսկ Թուրքիա մեկնած փրկարարները այսօր ցամաքային ճանապարհով կվերադառնան:

Հիշեցնենք, որ Հայաստանի արտաքին գործերի նախարար Արարատ Միրզոյանի գլխավորած պատվիրակությունը փետրվարի 15-ին գտնվում էր Թուրքիայի մայրաքաղաք Անկարայում: Անկարայում տեղի է ունենցել Հայաստանի և Թուրքիայի ԱԳ նախարարներ Արարատ Միրզոյանի ու Մևլութ Չավուշօղլուի առանձնազրույցը, որին հաջորդել է ընդլայնված կազմով հանդիպումը, ինչից հետո նախարարները հանդես են եկել հայտարարություններով: