21:27 - 18 դեկտեմբերի, 2020
Հայաստանի 5 մարզում մեկնարկել է սոցիալական պաշտպանության ոլորտի եռամյա ծրագիր
Արարատի, Արմավիրի, Կոտայքի, Շիրակի և Լոռու մարզեր 11 հազարից ավելի խոցելի անձանց համար կընդլայնվեն սոցիալական տարաբնույթ ծառայություններից և սոցաջակցության նպաստներից օգտվելու հնարավորությունները։
ՀՀ աշխատանքի և սոցիալական հարցերի նախարարությունը Հայաստանի սոցիալական աշխատողների ասոցիացիայի հետ համատեղ մեկնարկել է սոցիալական պաշտպանության ոլորտի նոր՝ եռամյա ծրագիր Հայաստանի 5 մարզի համար։
Շահառու ընտանիքների համար հնարավորություն կստեղծվի ինքնուրույն հաղթահարել եկամտի աղբյուր ունենալուն խոչընդոտող խնդիրները, ազատ աշխատաշուկայում որոնել նոր հնարավորություններ, վերամասնագիտանալ և զարգացնել սեփական ձեռնարկատիրական հմտությունները։
«Մեկնարկվում է մի ծրագիր, որի ձևաչափն ինքնին խոսում է և՛ քաղաքականությունների ուղղվածության, և՛ իրականացման մոտեցումների, այն է՝ բազմակողմ համագործակցության մասին։ Ծրագրի իրականացման առանցքում տեղական մասնագիտական ներուժն է՝ Հայաստանի սոցիալական աշխատողների համայնքը։ Ակնհայտ է, որ ՀՀ կառավարությունը որդեգրել է քաղաքացու սոցիալական ակտիվացման, սոցիալական ներառման և ինքնաբավ կենսապահովման քաղաքականությունների առաջնահերթությունները»,- մեկնարկի պաշտոնական արարողության ժամանակ ասել է ՀՀ աշխատանքի և սոցիալական հարցերի նախարարի տեղակալ Աննա Ժամակոչյանը։
Նախարարի խորհրդական Աստղիկ Մինասյանը հանդիպման մասնակիցներին ներկայացրել է ծրագրի ամբողջական մոտեցումներն ու առաջնահերթությունները, վերջնական արդյունքին հասնելու նախապայմանները։
Ծրագրով նախատեսվում է սոցիալական բազմաբնույթ ծառայությունների տրամադրում ընտանեկան նպաստի համակարգում գրանցված, այդ համակարգից դուրս մնացած ընտանիքներին, հզորացնել նրանց հետ աշխատող սոցիալական ծառայությունների աշխատակիցների կարողությունները։
«Հայաստանում սոցիալական ներառման և ինքնաբավ կենսապահովման միջոցառումների խթանում» ծրագրի փորձագետներն ընդգծել են. հետպատերազմյան իրողությունները՝ իրենց սոցիալ-տնտեսական հետևանքներով, ավելի մեծ մարտահրավերներ են ստեղծել հասարակության և պետական ինստիտուտների համար:
Միջազգային գործընկերները ևս կարևորել են մեկնարկվող ծրագրի անհրաժեշտությունը, որը խթանելու է հասարակության անապահով մարդկանց կյանքի որակի բարելավումն ու բարեկեցության մակարդակի բարձրացումը։
Ծրագիրը ֆինանսավորվում է Ճապոնիայի կառավարության կողմից՝ Ճապոնիայի սոցիալական զարգացման հիմնադրամի (JSDF) միջոցով, և իրականացվում է Համաշխարհային բանկի համակարգման ներքո։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)