Ադրբեջանցի «էկոակտիվիստներ»-ը հայտարարել են, որ այսօր՝ ժամը 18։00-ից, դադարեցնում են Լաչինի միջանցքում իրականացվող ակցիան։

Նշվում է, որ «էկոակտիվիստներ»-ը Շուշիի շրջանում հանդիպում են ունեցել Ադրբեջանի կառավարության ներկայացուցիչների հետ, որի ժամանակ կառավարության ներկայացուցիչները ներկայացրել են, որ «ապրիլի 23-ից պետական   սահմանային ծառայության ստորաբաժանումները անցակետ են տեղադրել Հայաստանի հետ սահմանին և, ըստ այդմ, սկզբունքորեն նոր իրավիճակ է ստեղծվել․ արդյունքում ակցիայի մասնակիցներին ևս մեկ անգամ առաջարկվել է դադարեցնել ակցիայի անցկացումը»։

«Էկոակտիվիստներ»-ի հայտարարության մեջ նշվում է, թե քանի որ իրենք մասամբ հասել են իրենց պահանջներին և նաև, հաշվի առնելով կառավարության ներկայացուցիչների կողմից բազմիցս հնչած դիմումները,  «էկոակտիվիստներ»-ը որոշել են ժամանակավորապես դադարեցնել բողոքի ակցիան։

Նշենք, որ «էկոակտիվիստների» հեռանալուց հետո էլ Արցախը կշարունակի շրջափակման մեջ մնալ, քանի որ ապրիլի 23-ին ադրբեջանական կողմը փակել է Արցախ-Հայաստան սահմանագծին գտնվող Հակարիի կամուրջը, որը ՌԴ խաղաղապահ զորակազմի պատասխանատվության տիրույթում է՝ «Լաչինի միջանցք»-ում, այնտեղ անցակետ տեղադրել։

Հիշեցնենք նաև, որ 2022թ․ դեկտեմբերի 12-ից Ադրբեջանը փակել էր Արցախը ՀՀ-ին կապող Լաչինի միջանցքը, ինչի հետևանքով շրջափակման մեջ էր հայտնվել Արցախի 120 000 բնակիչ, այդ թվում՝ 30 000 երեխա։