ԵՄ

Եվրոպական միությունը (ԵՄ) իրավունքի քաղաքական համայնք է, որի նպատակն է Եվրոպայի երկրների ու ժողովուրդների ինտեգրման ու կառավարման գործառույթի կազմակերպումը: Հիմնվել է 1993 թվականի նոյեմբերի 1-ին, բաղկացած է եվրոպական 27 երկրներից։ ԵՄ կառույցներն են Եվրոպական խորհրդարանը, Եվրամիության խորհուրդը, Եվրոպական խորհուրդ, Եվրոպական խորհուրդ, Եվրամիության Արդարադատության դատարանը, Հաշիվների դատարանը, Եվրոպական կենտրոնական բանկը։

Լիսաբոնյան համաձայնագրի ընդունմամբ՝ Եվրոպական արտաքին գործերի ծառայության պատասխանատվության տակ անցան Եվրոպական միությունը և իր քաղաքացիներին ներկայացնող 140 պատվիրակությունները և գրասենյակները:

Հայաստանում Եվրոպական միության դեսպանն ու ԵՄ պատվիրակության ղեկավարն է Ն.Գ. Անդրեա Վիկտորին։

Շառլ Միշելը հեռախոսազրույց է ունեցել Նիկոլ Փաշինյանի հետ |factor.am|

factor.am: Եվրոպական խորհրդի նախագահ Շառլ Միշելը հեռախոսազրույց է ունեցել ՀՀ վարչապետ Նիկոլ Փաշինյանի հետ։ Այս մասին Միշելը տեղեկացրել է թվիթերյան գրառմամբ։ «Վարչապետ Նիկոլ Փաշինյանի հետ քննարկել ենք Հարավային Կովկասի կայուն, խաղաղ և բարգավաճ ապագան առաջ մղելուն ուղղված հետագա աշխատանքի հեռանկարները»,- գրել է նա։ Շառլ Միշելը նաև նշել է, որ ԵՄ-ն հավատարիմ է մնում Հայաստանին և Ադրբեջանին իրենց երկխոսության գործում աջակցելու հարցում։ ՀՀ վարչապետի աշխատակազմից հայտնում են, որ Նիկոլ Փաշինյանն ու Շառլ Միշելը քննարկել են Հայաստանի վարչապետի, Եվրոպական խորհրդի նախագահի եւ Ադրբեջանի նախագահի՝ ապրիլի 6-ին Բրյուսելում տեղի ունեցած հանդիպման ընթացքում ձեռք բերված պայմանավորվածությունների կատարման ընթացքին, տարածաշրջանում ստեղծված իրավիճակին, Հայաստան-ԵՄ հարաբերությունների օրակարգին վերաբերող մի շարք հարցեր: Շառլ Միշելը եւս մեկ անգամ ընդգծել է ԵՄ հանձնառությունը՝ նպաստելու Հայաստանի եւ Ադրբեջանի միջեւ երկխոսությանը:

20:21 - 22 ապրիլի, 2022

Պուտինի խոսքով՝ Զելենսկու հետ հանդիպման հավանականությունը կախված է բանակցությունների ելքից

Ռուսաստանի նախագահ Վլադիմիր Պուտինի և Ուկրաինայի նախագահ Վլադիմիր Զելենսկու շփումների հավանականությունը կախված է ռուս-ուկրաինական բանակցությունների արդյունքից։ Այս մասին ՌԴ առաջնորդն այսօր հայտարարել է Եվրախորհրդի նախագահ Շառլ Միշելի հետ զրույցի ընթացքում, գրում է ՏԱՍՍ-ը։ «Արձագանքելով Վլադիմիր Զելենսկու հետ ուղիղ շփում անցկացնելու Շառլ Միշելի կոչին՝ Ռուսաստանի նախագահը վերահաստատաել է իր հայտնի դիրքորոշումն այս հարցում՝ նշելով, որ այդ հավանականությունը, մասնավորապես, կախված է Ռուսաստանի և Ուկրաինայի ներկայացուցիչների միջև վարվող բանակցությունների հստակ արդյունքներից, որոնց ընթացքում ուկրաինական կողմն անհետևողականություն է դրսևորում և պատրաստ չէ փոխշահավետ լուծումներ փնտրել», - ասված է Կրեմլի մամուլի ծառայության հաղորդագրությունում։ Կողմերը քննարկել են նաև իրավիճակի զարգացումն Ուկրաինայում։ Նորա Վանյան

19:02 - 22 ապրիլի, 2022

Պուտինն ու Միշելը քննարկել են Լեռնային Ղարաբաղի հարցը |azatutyun.am|

azatutyun.am: Այսօր հեռախոսազրույց են ունեցել Եվրոպական խորհրդի նախագահ Շառլ Միշելը և Ռուսաստանի նախագահ Վլադիմիր Պուտինը։ Ի թիվս այլ հարցերի, կողմերն անդրադարձել են նաև Լեռնային Ղարաբաղում անվտանգության ապահովմանը: «Անդրադարձ է կատարվել նաև Լեռնային Ղարաբաղում կայունության և անվտանգության ապահովման թեմային, այդ թվում՝ հաշվի առնելով վերջերս Վլադիմիր Պուտինի և Շառլ Միշելի շփումները Հայաստանի և Ադրբեջանի ղեկավարների հետ»,- հաղորդում է Կրեմլի մամլո ծառայությունը։ Հաղորդագրությունում նաև ասվում է․ «Վերահաստատվել է 2020 թվականի նոյեմբերի 9-ին, հունվարի 11-ին և 2021 թվականի նոյեմբերի 26-ին Հայաստանի, Ադրբեջանի և Ռուսաստանի միջև եռակողմ համաձայնագրերի հետևողական իրականացման հիմնարար կարևորությունը։ Այս համատեքստում Ռուսաստանի նախագահը տեղեկացրել է տնտեսական և տրանսպորտային կապերի վերականգնման ծրագրերի իրականացման, ինչպես նաև հայ-ադրբեջանական սահմանի սահմանազատման և երկու երկրների միջև խաղաղության պայմանագրի շուրջ բանակցությունների մեկնարկի ուղղությամբ ձեռնարկվող քայլերի մասին»։ Եվրոպական խորհրդի նախագահի գրասենյակը հեռախոսազրույցի մասին մանրամասներ առայժմ չի հաղորդում: Պաշտոնական Մոսկվան նախօրեին հայտարարել է, թե Բրյուսելը ուզում է Ռուսաստանից խլել միջնորդությունը հայ-ադրբեջանական հաշտեցման գործընթացում։

17:26 - 22 ապրիլի, 2022

Նիկոլ Փաշինյանն ընդունել է Տոյվո Կլաարին. կողմերն անդրադարձել են ԼՂ խնդրին, Հայաստանի և Ադրբեջանի միջև սահմանագծմանը և սահմանազատմանը

Վարչապետ Նիկոլ Փաշինյանն ընդունել է Հարավային Կովկասի ու Վրաստանի ճգնաժամի հարցերով Եվրոպական միության հատուկ ներկայացուցիչ Տոյվո Կլաարին: Հանդիպմանը ներկա է եղել նաև ՀՀ-ում ԵՄ պատվիրակության ղեկավար, դեսպան Անդրեա Վիկտորինը: Այս մասին հայտնում են ՀՀ վարչապետի աշխատակազմից։ Վարչապետը, կարևորելով Հայաստան-Եվրամիություն համագործակցությունը, բարձր է գնահատել Եվրոպական խորհրդի նախագահ Շառլ Միշելի՝ տարածաշրջանում կայունության հաստատմանը միտված ջանքերը, որոնք, միջազգային մյուս գործընկերների ջանքերի հետ համատեղ, նպաստում են տարածաշրջանային երկխոսությանը: Վերահաստատելով ՀՀ հանձնառությունը ժողովրդավարական բարեփոխումների օրակարգին՝ Նիկոլ Փաշինյանը նաև գոհունակություն է հայտնել ԵՄ Արևելյան գործընկերության ծրագրի տնտեսական և ներդրումային փաթեթի շրջանակում Հայաստանին 2.6 մլրդ եվրո հատկացնելու և մեր երկրում զարգացման ծրագրեր իրականացնելու կապակցությամբ: Տոյվո Կլաարը շնորհակալություն է հայտնել ՀՀ վարչապետին գնահատականների համար և վերահաստատել ՀՀ հետ գործընկերությունը խորացնելու, տարածաշրջանային խաղաղությանը միտված ջանքերը շարունակելու ԵՄ հանձնառությունը: Զրուցակիցները մտքեր են փոխանակել ԵԽ նախագահի, Հայաստանի վարչապետի և Ադրբեջանի նախագահի՝ ապրիլի 6-ին Բրյուսելում տեղի ունեցած հանդիպմանը ձեռք բերված պայմանավորվածությունների կատարման ընթացքի շուրջ: Արծարծվել են Լեռնային Ղարաբաղի խնդրին, Հայաստանի և Ադրբեջանի միջև սահմանագծմանը և սահմանազատմանը, տարածաշրջանի տնտեսական և տրանսպորտային ենթակառուցվածքների ապաշրջափակմանը վերաբերող հարցեր: Երկուստեք ընդգծվել է ԵԱՀԿ Մինսկի խմբի համանախագահության հովանու ներքո ԼՂ հիմնախնդրի համապարփակ կարգավորման անհրաժեշտությունը: Հանդիպմանը քննարկվել է ԱլԳ ներդրումային փաթեթով նախատեսված ծրագրերի իրականացման ընթացքը: Այս համատեքստում ՀՀ-ում ԵՄ պատվիրակության ղեկավար, դեսպան Անդրեա Վիկտորինը ներկայացրել է ընթացիկ աշխատանքները և առաջիկա անելիքները: Ծրագրերն ուղղված են Հայաստանում ժողովրդավարության ամրապնդմանը, տնտեսության խթանմանը, փոքր և միջին բիզնեսի, էներգետիկայի, ենթակառուցվածքների ոլորտների զարգացմանը:

16:16 - 22 ապրիլի, 2022

Արարատ Միրզոյանը և Տոյվո Կլաարն անդրադարձել են հայ ռազմագերիների և այլ պահվող անձանց հայրենադարձմանը

Ապրիլի 22-ին ՀՀ ԱԳ նախարար Արարատ Միրզոյանն ընդունել է Հարավային Կովկասում և Վրաստանի ճգնաժամի հարցերով ԵՄ հատուկ ներկայացուցիչ Տոյվո Կլաարի գլխավորած պատվիրակությանը: Այս մասին հայտնում են ՀՀ ԱԳՆ-ից։ Կողմերը քննարկել են ապրիլի 6-ի բրյուսելյան հանդիպման արդյունքում ձեռք բերված պայմանավորվածությունների իրականացման ընթացքը, տարածաշրջանի տնտեսական և տրանսպորտային ենթակառուցվածքների ապաշրջափակման հեռանկարները։ Հանդիպման ընթացքում հատուկ անդրադարձ է կատարվել առկա հումանիտար խնդիրներին, մասնավորապես՝ հայ ռազմագերիների և այլ պահվող անձանց հայրենադարձմանը։

14:56 - 22 ապրիլի, 2022

Արմեն Գրիգորյանը հանդիպել է Հարավային Կովկասում և Վրաստանում ճգնաժամի հարցերով ԵՄ Հատուկ ներկայացուցչին

Ապրիլի 21-ին ԱԽ քարտուղար Արմեն Գրիգորյանը հանդիպել է Հարավային Կովկասում և Վրաստանում ճգնաժամի հարցերով ԵՄ Հատուկ ներկայացուցիչ Տոյվո Կլաարին: Հանդիպմանը ներկա է եղել նաև ՀՀ-ում ԵՄ պատվիրակության ղեկավար, դեսպան Անդրեա Վիկտորինը: Այս մասին հայտնում է Անվտանգության խորհուրդը։ Հանդիպման ընթացքում զրուցակիցներն անդրադարձել են հայ-ադրբեջանական հարաբերությունների կարգավորմանը և այդ համատեքստում ԵՄ-ի տարածաշրջանային կայունության ամրապնդմանը միտված ջանքերին: Զրուցակիցները քննարկել են նաև տարածաշրջանային անվտանգային իրավիճակին առընչվող այլ հարցեր:

22:45 - 21 ապրիլի, 2022

Մհեր Գրիգորյանը և Տոյվո Կլաարը քննարկել են տարածաշրջանային տրանսպորտային ապաշրջափակման աշխատանքների ընթացքը

Փոխվարչապետ Մհեր Գրիգորյանն ընդունել է Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարին: Այս մասին հայտնում են ՀՀ կառավարությունից։ Հանդիպմանը ներկա էր նաև Հայաստանում ԵՄ պատվիրակության ղեկավար, դեսպան Անդրեա Վիկտորինը: Հանդիպման ընթացքում քննարկվել են Հայաստանի Հանրապետության վարչապետի, Ադրբեջանի Հանրապետության նախագահի և Ռուսաստանի Դաշնության նախագահի 2020 թվականի նոյեմբերի 9-ի հայտարարության 9-րդ կետի իրականացման՝ տարածաշրջանային տրանսպորտային ապաշրջափակման ուղղությամբ տարվող աշխատանքների ընթացքը: Փոխվարչապետը ներկայացրել է Հայաստանի Հանրապետության դիրքորոշումը՝ կարևորելով այս գործընթացը որպես տարածաշրջանում երկարատև խաղաղության և կայունության ամրապնդման երաշխիք: Քննարկվել են նաև Հայաստանի և Ադրբեջանի միջև սահմանների հարցերով երկկողմ հանձնաժողովի ստեղծման վերաբերյալ, ինչպես նաև 2021 թվականի դեկտեմբերի 14-ին Բրյուսելում կայացած եռակողմ հանդիպմանը երկաթուղու վերագործարկման վերաբերյալ ձեռք բերված պայմանավորվածությունների իրականացման ընթացքի հետ կապված հարցեր:

18:43 - 21 ապրիլի, 2022

Ալիևն ասել է, որ Ադրբեջանը պատրաստ է Հայաստանի հետ խաղաղության համաձայնագրի շուրջ բանակցությունների մեկնարկին

Ադրբեջանը պատրաստ է Հայաստանի հետ խաղաղության համաձայնագրի շուրջ բանակցությունների մեկնարկին։ Այս մասին, ինչպես գրում է ՏԱՍՍ-ը, հայտարարել է Ադրբեջանի նախագահ Իլհամ Ալիևը Հարավային Կովկասում և Վրաստանի ճգնաժամի հարցերով Եվրամիության հատուկ ներկայացուցիչ Տոյվո Կլաարի հետ Բաքվում կայացած հանդիպման ժամանակ։ «Կարծում եմ, որ պաշտոնական մեկնակետը կայացել է ապրիլի 6-ին Բրյուսելում (Հայաստանի վարչապետ Նիկոլ Փաշինյանի և Իլհամ Ալիևի հանդիպմանը ԵՄ նախագահ Շառլ Միշելի միջնորդությամբ – խմբ․)։ Այդ օրվանից մենք աշխատել ենք, աշխատել է արտգործնախարարությունը, իմ աշխատակազմը կապի մեջ է եղել ձեր թիմի հետ, և, ինչպես պայմանավորվել ենք, մենք պատրաստ ենք մեկնարկին», - ասել է Ալիևը։ Interfax.az-ի փոխանցմամբ՝ անդրադառնալով Ադրբեջանի կողմից Հայաստանին ներկայացված հինգ առաջարկներին՝ նա ասել է․ «Մենք դրական ենք գնահատում հայկական կողմի համապատասխան հայտարարություններն այս առնչությամբ։ Այժմ եկել է ժամանակը, որ երկու կողմերն ապացուցեն իրենց [մտադրությունների] լրջությունը բանակցությունների սեղանի շուրջ»։ Ալիևն ասել է, որ Բաքուն մեծ հույսեր է կապում Եվրամիության, հատկապես՝ դրա նախագահ Շառլ Միշելի ջանքերի հետ, «որն արդեն ակտիվորեն մասնակցում է այս գործընթացին»։ «Նա արդեն լավ ծանոթ է գործընթացին։ Կարծում եմ՝ սա շատ խոստումնալից միջավայր է ստեղծում հաջող բանակցությունների համար», - ասել է Ադրբեջանի նախագահը։ Նորա Վանյան

18:19 - 19 ապրիլի, 2022

Հունաստանը ռուսական նավթային լցանավ է ձերբակալել

Հունաստանը ռուսական նավթային լցանավ է ձերբակալել Եվբեա կղզու մերձակայքում՝ Մոսկվայի դեմ ԵՄ կիրառած պատժամիջոցների շրջանակում, գրում է Reuters-ը։ Սակայն նշվում է, որ նավթը, որը տեղափոխում էր լցանավը, չի առգրավվելու։ Այս ամիս ավելի վաղ ԵՄ-ն Ռուսաստանի դրոշի ներքո երթևեկող նավերին, որոշ բացառություններով, արգելել էր մուտք գործել իր անդամ երկրների նավահանգիստներ՝ Ռուսաստանի դեմ պատժամիջոցների նոր փաթեթի շրջանակում։ Ռուսական դրոշի ներքո երթևեկող «Պեգաս» նավի վրա 19 ռուսաստանցի նավաստի է եղել։ Ավելի վաղ լցանավը հայտարարել էր շարժիչի հետ կապված խնդիրների մասին։ Վատ եղանակային պայմանների պատճառով նավը կառանվել է Կարիստոս ծովախորշում, որտեղ էլ ձերբակալվել է։ Նորա Վանյան

15:17 - 19 ապրիլի, 2022

ԵՄ-ի կողմից Կիևին ավելի շատ զենք տալը չի նշանակում երկարացնել պատերազմը. Պետեր Ստանո |tert.am|

tert.am: Եվրամիության կողմից Ուկրաինային ավելի շատ զենք տրամադրելը ոչ թե պատերազմի երկարացում է նշանակում, այլ օգնություն՝ երկրի պաշտպանությանը։Այս մասին երեքշաբթի Բրյուսելում կայացած մամուլի ասուլիսում հայտարարել է ԵՄ արտաքին ծառայության ներկայացուցիչ Փիթեր Ստանոն, գրում է ՏԱՍՍ-ը։«Ավելի շատ զենք չի նշանակում ավելի շատ պատերազմ, այլ ավելի շատ կարողություն Ուկրաինայի համար՝ պաշտպանելու երկիրը, քաղաքացիներին»,- ասել է նա՝ պատասխանելով հարցին, թե ինչու է ԵՄ-ն երկարացնում պատերազմը՝ Ուկրաինային ավելի ու ավելի շատ զենք տրամադրելով, և արդյոք Բրյուսելը ինչ-որ բան անում է կռիվը դադարեցնելու համար:

15:13 - 19 ապրիլի, 2022

Շառլ Միշելը անդրադարձել է Փաշինյանի հետ հեռախոսազրույցին

Զրուցել եմ ՀՀ վարչապետ Նիկոլ Փաշինյանի հետ՝ հետամուտ լինելու Բրյուսելում մեր վերջին քննարկումներին: Այս մասին իր թվիթերյան միկրոբլոգում գրել է Եվրոպական խորհրդի նախագահ Շառլ Միշելը: Նա նշել է, որ ամբողջապես սատարում է Փաշինյանի, ինչպես նաև բոլոր ջանքերին` աջակցելու խաղաղ, կայուն և ապահով Հարավային Կովկասին: Նշենք, որ ՀՀ կառավարությունից երեկ հայտնել են, որ տեղի է ունեցել Նիկոլ Փաշինյանի հեռախոսազրույցը ԵՄ խորհրդի նախագահ Շառլ Միշելի հետ. «Մտքեր են փոխանակվել Բրյուսելում կայացած եռակողմ հանդիպման ընթացքում ձեռք բերված պայմանավորվածությունների կատարման ընթացքի, տարածաշրջանում ստեղծված իրավիճակի, Հայաստան-ԵՄ հարաբերությունների օրակարգի հարցերի մասին: Փաշինյանը եւ Միշելը քննարկել են նաեւ ԵՄ-ի՝ Հայաստանին 2.6 միլիարդ դոլար հատկացնելու պայմանավորվածության կատարման ընթացքը»: Լուսանկարը՝ ԵՄ խորհրդի կայքից

11:28 - 19 ապրիլի, 2022

Թուրքիայի համար ԵՄ անդամակցությունը մնում է ռազմավարական նպատակ. Էրդողան |tert.am|

tert.am: Ուկրաինայում ստեղծված իրավիճակը ցույց է տվել Թուրքիայի կարևորությունը Եվրամիության (ԵՄ) համար, հայտարարել է Թուրքիայի նախագահ Ռեջեփ Թայիփ Էրդողանը։ Նրա խոսքով, Թուրքիան Եվրամիությունից կոնկրետ քայլեր է ակնկալում միությանը լիիրավ անդամակցության համար, գրում է kommersant.ru-ն։ «Վերջին իրադարձություններն Ուկրաինայի համատեքստում հստակ ցույց տվեցին Թուրքիայի կարևորությունը ՆԱՏՕ-ում։ Թուրքիայի համար ԵՄ անդամակցությունը մնում է ռազմավարական նպատակ. պատերազմի բացասական հետևանքները համաշխարհային մասշտաբով ցույց են տվել Թուրքիայի ռազմավարական նշանակությունը ԵՄ-ի համար, հատկապես անվտանգության և էներգետիկայի ոլորտում։ Ես ակնկալում եմ, որ ԵՄ-ն կոնկրետ և բովանդակալից քայլեր կձեռնարկի՝ հիմնված լիիրավ անդամակցության մեր հեռանկարի վրա», - ասել է Թուրքիայի նախագահն Անկարայում տարբեր երկրների դեսպանների հետ իֆթարի ժամանակ ունեցած ելույթի ժամանակ: Թուրքիան Եվրամիության ասոցացված անդամ է 1964 թվականից։ 1987 թվականին երկիրը միությանը միանալու հայտ է ներկայացրել։ ԵՄ-ին Թուրքիայի անդամակցության շուրջ բանակցային գործընթացը շարունակվում է 2005 թվականից։

10:21 - 19 ապրիլի, 2022

Տեղի է ունեցել Նիկոլ Փաշինյանի հեռախոսազրույցը ԵՄ խորհրդի նախագահ Շառլ Միշելի հետ

Տեղի է ունեցել վարչապետ Նիկոլ Փաշինյանի հեռախոսազրույցը ԵՄ խորհրդի նախագահ Շառլ Միշելի հետ: Այս մասին հայտնում են ՀՀ կառավարությունից։ Զրուցակիցները մտքեր են փոխանակել ԵՄ խորհրդի նախագահի, Հայաստանի վարչապետի եւ Ադրբեջանի նախագահի ապրիլի 6-ին Բրյուսելում տեղի ունեցած հանդիպման ընթացքում ձեռք բերված պայմանավորվածությունների կատարման ընթացքի, տարածաշրջանում ստեղծված իրավիճակի, Հայաստան-ԵՄ հարաբերությունների օրակարգի մի շարք հարցերի մասին: Փաշինյանը եւ Միշելը քննարկել են նաեւ ԵՄ-ի Արեւելյան գործընկերության տնտեսական եւ ներդրումային պլանի շրջանակներում Հայաստանին 2.6 միլիարդ դոլար հատկացնելու պայմանավորվածության կատարման ընթացքը, ընդգծել ներդրումային փաթեթով նախատեսված ծրագրերի արդյունավետ իրագործման կարեւորությունը: Շառլ Միշելը վերահաստատել է Հայաստանի համար նախատեսված ներդրումային ծրագիրը լիարժեք կերպով իրականացնելու ԵՄ հանձնառությունը եւ ընդգծել ծրագրերի գործնական իրագործման փուլը հնարավորինս արագ սկսելու կարեւորությունը:

22:06 - 18 ապրիլի, 2022

Ուկրաինան ակնկալում է հունիսին ԵՄ անդամի թեկնածուի կարգավիճակ ստանալ․ Անդրեյ Երմակ |factor.am|

factor.am: Ուկրաինան ակնկալում է ԵՄ անդամակցության թեկնածուի կարգավիճակ ստանալ այս տարվա հունիսին՝ Եվրոպական խորհրդի նիստից հետո։ Այս մասին հայտնել է Ուկրաինայի նախագահի աշխատակազմի ղեկավար Անդրեյ Երմակը, գրում է «Ինտերֆաքս Ուկրաինա»-ն։ «Մենք ակնկալում ենք ստանալ ԵՄ անդամ երկրի թեկնածուի կարգավիճակ հունիսին կայանալիք Եվրոպական խորհրդի նիստից հետո։ Այնուհետև պետք է սկսվեն անդամակցության շուրջ բանակցությունները, որոնք պետք է տեղի ունենան արագացված ընթացակարգով»,- գրել է Երմակը Telegram-ի իր ալիքում։ Նրա խոսքով՝ ԵՄ անդամի թեկնածուի կարգավիճակ ստանալու՝ Ուկրաինայի հնարավորությունների գնահատման հարցաշարի առաջին մասը լրացվել է մեկ շաբաթում և ուղարկվել Եվրահանձնաժողովին։ Ուկրաինայի նախագահի աշխատակազմի կայքում հրապարակված հաղորդագրության համաձայն՝ նախագահ Վլադիմիր Զելենսկին լրացված հարցաթերթիկը հանձնել է Ուկրաինայում Եվրամիության պատվիրակության ղեկավար Մատի Մաասիկասին։

21:43 - 18 ապրիլի, 2022

Ուկրաինան ակնկալում է ԵՄ անդամի թեկնածու երկրի կարգավիճակ ստանալ հունիսի 23-24-ը |azatutyun.am|

azatutyun.am: Ուկրաինան ավարտել է հարցաթերթիկի լրացումը, որը կդառնա Եվրամիությանը երկրի անդամակցության վերաբերյալ որոշում կայացնելու մեկնարկային կետը։ Այս մասին հայտարարել է Ուկրաինայի նախագահի գրասենյակի ղեկավարի տեղակալ Իգոր Ժովկվան։ Եվրահանձնաժողովի նախագահ Ուրսուլա ֆոն դեր Լեյենը հարցաշարը հանձնել էր նախագահ Վլադիմիր Զելենսկուն ապրիլի 8-ին Կիև այցի ժամանակ՝ խոստանալով արագացնել ԵՄ-ին անդամակցելու Ուկրաինայի դիմումի քննարկումը։ «Այսօր ես կարող եմ հայտնել, որ փաստաթուղթը ձևակերպվել է ուկրաինական կողմից, մենք սպասում ենք հանձնարարականի, այնուհետև գնդակը կլինի Եվրամիության դաշտում», - ասել է Ժովկվան երեկ ուկրաինական հեռուստատեսությանը տված հարցազրույցում։ Նա պարզաբանել է, որ Եվրահանձնաժողովը պետք է հանձնարարականներ տա Եվրամիությանն Ուկրաինայի անդամակցության չափանիշներին համապատասխանելու վերաբերյալ։ Իգոր Ժովկվան հավելել է, որ Ուկրաինան ակնկալում է Եվրամիության անդամի թեկնածու երկրի կարգավիճակ ստանալ Եվրոպական խորհրդի հաջորդ նիստի ժամանակ, որը նախատեսված է հունիսի 23-24-ը։ «Հետագայում մեզ անհրաժեշտ կլինի սկսել անդամակցության բանակցությունները։ Եվ դրանց ավարտից հետո արդեն կարելի է խոսել ԵՄ-ին Ուկրաինայի լիիրավ անդամակցության մասին»,- ասել է Ժովկվան։

12:22 - 18 ապրիլի, 2022

ԵՄ-ն Ուկրաինային ևս 50 մլն եվրո հումանիտար օգնություն է հատկացրել |factor.am|

factor.am: Եվրամիությունը ևս 50 մլն եվրո հումանիտար ֆինանսավորում է հատկացնում ի պաշտպանություն այն մարդկանց, որոնք տուժել են Ուկրաինայի դեմ Ռուսաստանի պատերազմից: Այս մասին հայտնել է Եվրահանձնաժողովի մամուլի ծառայությունը ապրիլի 17-ին։ 45 մլն եվրո է նախատեսված Ուկրաինայում հումանիտար նախագծերի համար, 5 մլն եվրո՝ Մոլդովայում։ Ճգնաժամային կառավարման հարցերով եվրահանձնակատար Յանեզ Լենարչիչն ընդգծել է, որ նոր օգնությունը կօգնի մարդկանց, որոնք զրկված են առողջապահության, ջրի և էլեկտրականության հասանելիությունից, ինչպես նաև նրանց, ովքեր ստիպված են եղել փախչել՝ ամեն ինչ թողնելով ետևում: Այսպիսով, ԵՄ-ի մարդասիրական օգնության ընդհանուր ծավալը հասել է 143 մլն եվրոյի:

19:40 - 17 ապրիլի, 2022