Արսեն Թորոսյան

8-րդ գումարման Ազգային ժողովի «Քաղաքացիական պայմանագիր» խմբակցության պատգամավոր, «Քաղաքացիական պայմանագիր» կուսակցության վարչության անդամ։ Մասնագիտությամբ առողջապահության կազմակերպիչ է։

Ծնվել է 1982թ. հունիսի 21-ին։ 2005-2010 թվականներին եղել է Առողջության առաջնային պահպանման բարեփոխումների ծրագրի Ընտանեկան բժշկության և բուժօգնության որակի համակարգող։ 2010-2011 թվականներին հանդիսացել է ՀՀ ԱՆ տուբերկուլոզի դեմ պայքարի ազգային կենտրոնի Մոնիտորինգի և գնահատման բաժնի վարիչ և տնօրենի պաշտոնակատար: 2011-2015 և 2016-2018 թվականներին եղել է ՄԻԲՍ բժշկական ախտորոշիչ կենտրոնի տնօրեն։

Եղել է «Հիմա» քաղաքացիական նախաձեռնության անդամ։ 2018թ․ օգոստոսից անդամակցում է «Քաղաքացիական պայմանագիր» կուսակցությանը։ 2018 թվականի մայիսի 12-ին նշանակվել է ՀՀ առողջապահության նախարար։

2020 թվականի հունվարի 18-ին նշանակվել է ՀՀ վարչապետի աշխատակազմի ղեկավար։

2021թ. հունիսի 20-ին ԱԺ պատգամավոր է ընտրվել «Քաղաքացիական պայմանագիր» կուսակցության համապետական ընտրական ցուցակով:

Վայոց ձորի մարզը կապահովվի բարձրորակ ակնաբուժական ծառայություններով. Արսեն Թորոսյան

ՀՀ առողջապահության նախարար Արսեն Թորոսյան ֆեյսբուքյան իր էջում գրում է․ «Հայկական ակնաբուժական նախագծի հետ հանդիպման արդյունքներով որոշեցինք, որ նրանց 5-րդ մարզային կենտրոնը կբացվի Եղեգնաձոր քաղաքում և կապահովի Վայոց Ձորի մարզը բարձրորակ ակնաբուժական ծառայություններով, ներառյալ աչքի վիրահատությունները։ Նաև որոշեցինք, որ մասնագետների համատեղ այցելություններ կանենք Վայոց Ձորի սահմանամերձ գյուղեր՝ բնակիչներին տեղում ակնաբուժական և ստոմատոլոգիական բուժօգնություն ցույց տալու համար»։

06:36 - 27 հուլիսի, 2019

Նախատեսվում է անցկացնել դպրոցականների տեսողության լայնամասշտաբ սկրինինգ

Առողջապահության նախարար Արսեն Թորոսյանը հանդիպել է ԱՄՆ «Հայ ակնաբուժական նախագիծ» (ՀԱՆ) բարեգործական կազմակերպության և Լոս Անջելեսի մանկական հիվանդանոցի (ԼԱՄՀ) ղեկավար կազմերի հետ: ՀԱՆ-ը, ակնաբուժական ոլորտի լավագույն մասնագետների ներգրավմամբ, շուրջ 25 տարի է, ինչ ակնաբուժական բարձրորակ ծառայություններ է տրամադրում Հայաստանի բոլոր մարզերի քաղաքային ու գյուղական համայնքներում: Հյուրերը ներկայացրել են իրենց ընթացիկ և առաջիկա ծրագրերը, ինչպես նաև համատեղ նախաձեռնած առողջապահական տվյալների պահպանման և փոխանակման «Ավետիս» երեխաների առողջության խնամքի էլեկտրոնային հարթակը՝ իր առանձնահատկություններով և հնարավորություններով: «Ավետիս»-ը տրամադրում է տվյալների վիզուալիզացիա և վերլուծություն, հավաքագրում է տվյալներ առողջապահական ծառայություն տրամադրող ցանկացած վայրից ու աջակցում է և բժշկի աշխատանքին և պացիենտին: Այն մոդուլային համակարգ է, որը նախատեսված է սկսել հիմնական բաղադրիչներով, ապա՝ ժամանակի ընթացքում դրանք համալրել նորերով: Այս համակարգը սկզբնական փուլում ներկայացվում է որպես առողջապահական գործիք ակնաբուժության ոլորտում: Քննարկվել են նաև ՀԱՆ-ի կողմից պարբերաբար իրականացված դպրոցական ակնային սկրինինգների արդյունքները, որոնց ընթացքում ստուգվում է դպրոցականների տեսողությունը: Գործընկերները նշել են, նախատեսում են կրկին անցկացնել դպրոցականների տեսողության լայնամասշտաբ սկրինինգ՝ հանրապետության ողջ տարածքում` անհրաժեշտության դեպքում երեխաներին ուղեգրելով հետագա խորացված ակնային հետազոտությունների ու բուժման: ՀԱՆ-ի տնօրեն Նունե Եղիազարյանը ընդգծել է, որ Գեղարքունիքի մարզում կայանած աչքի շարժական հիվանդանոցը շարունակում է գործել: Նաև նշել է, որ «Ակնային առողջապահական համակարգի վերականգնում ՀՀ մարզերում» ծրագրի շրջանակում մարզային ակնաբուժական կենտրոններ են բացվել Իջևանում, Սպիտակում, Կապանում և Գյումրիում: Մինչև 2020 թվականը նախատեսում են 5-րդ կենտրոնը բացել Վայոց ձորում: Արսեն Թորոսյանը ողջունել ու դրական է գնահատել նրանց կատարած ահռելի աշխատանքը և շնորհակալություն հայտնել շարունակական համագործակցության համար:

14:50 - 26 հուլիսի, 2019

Դյուրացնելու ենք նաեւ պետպատվերի տրման կարգը. Շուրջ 500 բուժհաստատություններ այսուհետ ավելորդ թղթեր չեն լրացնի |news.am|

news.am։ Կառավարությունն այսօրվա՝ հուլիսի 25-ի իր նիստում հաստատեց «Պետության կողմից երաշխավորված անվճար բժշկական օգնություն և սպասարկում իրականացնող` առևտրային կազմակերպությունների ֆինանսատնտեսական հաշվետվության օրինակելի ձևը հաստատելու մասին» որոշման փոփոխությունները, որը պարզեցնում է ընթացակարգը:Առողջապահության նախարար Արսեն Թորոսյանը ներկայացնելով հարցը, ասաց. «Մենք մեզ հետ պայմանագրեր կնքած շուրջ 500 բժշկական հաստատությունների համար պարզեցնում ենք հաշվետվողականության պրոցեսը, որ նրանք ներկայացնում էին ամսական, եռամսյակային եւ տարեկան կտրվածքով:Պարզեցնում ենք եւ դարձնում ենք միայն մեկ հաշվետվություն, որն ամբողջական ու համապարփակ է: Սրանով մենք թույլ ենք տալիս, որ ամեն օր թուղթ չլրացնեն մեզ համար, հաճախ այնպիսի թղթեր, որոնք երբեւէ չեն օգտագործվել, տվյալներ, որոնց կարիքը չի էլ եղել»:Նա նաեւ տեղեկացրեց, որ եւս մեկ նախագիծ են պատրաստում, որով դյուրացնելու են նաեւ պետպատվերի տրամադրման կարգը. «Դա էլ բավականին երկարատեւ բյուրոկրատական քաշքշուկներով լի պրոցես է եղել: Աշնանը կընդունենք եւ հաջորդ տարվանից այդ պրոցեսն ավելի դյուրին կլինի:Մոտ 500 կազմակերպությունների համար էական բարելավում է լինելու»,-ընդգծեց նախարարը:

07:40 - 25 հուլիսի, 2019

«Ռուսաստանի Դաշնության հետ համագործակցությունը խոր հիմքեր ունի». Արսեն Թորոսյան

Առողջապահության նախարար Արսեն Թորոսյանը հանդիպել է Հայաստանի Հանրապետությունում Ռուսաստանի Դաշնության արտակարգ և լիազոր դեսպան Սերգեյ Կոպիրկինի հետ: Կողմերը քննարկել են համագործակցության ուղղությունները և հեռանկարները: Արսեն Թորոսյանը նշել է, որ Ռուսաստանի Դաշնության հետ համագործակցությունը խոր հիմքեր ունի և ընթանում է առողջապահության և բժշկագիտության բնագավառներում համագործակցության մասին համաձայնագրերի, ինչպես նաև գործող փոխըմբռնման հուշագրի շրջանակներում: Վարակիչ հիվանդությունների դեմ պայքարի միջոցառումներ, ՄԻԱՎ/ՁԻԱՀ-ի դեմ պայքարի գործում լաբորատոր սարքավորումների տրամադրում (որի շրջանակներում Ռուսաստանի Դաշնության կառավարությունը Հայաստանին նվիրաբերել է երկու շարժական բժշկական-ախտորոշիչ կենտրոն), հայ-ռուսական առողջապահական համաժողովներ, որոնց շնորհիվ փոխգործակցությունն ընդլայնվել է: Ակտիվ համագործակցություն է ընթանում նաև մոր և մանկան առողջության պահպանման ոլորտում: Սերգեյ Կոպիրկինը պատրաստակամություն է հայտնել, որ շարունակել սերտ համագործակցությունը առողջապահության ոլորտում:

10:15 - 12 հուլիսի, 2019

Հոմեոպաթիան կհանվի մասնագիտությունների ցանկից |panarmenian.net|

panarmenian.net։ ՀՀ առողջապահության նախարար Արսեն Թորոսյանն «Ազատություն» ռադիոկայանի հետ զրույցում հայտնել է, որ ՀՀ-ում հոմեոպաթիան հանվելու է մասնագիտությունների ցանկից: Նախարարը նշել է, որ այն շառլատանություն է, և «չի կարելի մարդկանց շաքար խմեցնելով առողջացնել»: «Հոմեոպաթիան հանվելու է նաև լիցենզիոն ցանկից, որ նման լիցենզիաներ չտրվեն: Այստեղ խնդիր է մնում արդեն իսկ տրված լիցենզիաները», - ասել է նախարարը:

07:44 - 12 հուլիսի, 2019

Կոչ եմ անում մասնակցել Մարտունիում կառուցվելիք բժշկական կենտրոնի վերաբերյալ հանրային քննարկմանը․ Արսեն Թորոսյան

ՀՀ Առողջապահության նախարար Արսեն Թորոսյանը ֆեյսբուքյան իր էջում գրում է․ «Կոչ եմ անում մասնակցել Մարտունիում կառուցվելիք բժշկական կենտրոնի վերաբերյալ հանրային քննարկմանը։ Ինչպես նաև տեղեկացնեմ, որ Մարտունու գործող բժշկական կենտրոնում աշնանը կբացվի հեմոդիալիզի նոր բաժանմունք, որտեղ կլինի 5 սարք, որոնք կսպասարկեն շուրջ 40 պացիենտի Մարտունու և մոտակա տարածաշրջանից։ Բժշկական կենտրոնի նոր մասնաշենքի կառուցումից հետո հեմոդիալիզի բաժանմունքը կտեղափոխվի այնտեղ։http://martuni.am/Pages/Home/Events.aspx?eID=518#ՀասանելիԱռողջապահություն#ՈրակյալԲուժօգնություն»

13:03 - 11 հուլիսի, 2019

Առաջարկում եմ պարտադիր դարձնենք գազաբալոնային համակարգերի ավտոմատ անջատման տեղադրումը բոլոր մեքենաների վրա․ Արսեն Թորոսյան

ՀՀ առողջապահության նախարար Արսեն Թորոսյանը Կառավարության նիստի ժամանակ հանդես եկավ երկու առաջարկությամբ։«Առաջարկում եմ պարտադիր դարձնենք գազաբալոնային համակարգերի ավտոմատ անջատման տեղադրումը բոլոր մեքենաների վրա, հաշվի առնելով, որ հիմնականում գազով են երթևեկում ՀՀ-ում և հենց դրա պատճառով է եղել զոհերի մեծ մասը։ Այսինքն արագ այրվել են և չեն հասցրել տարհանել, նույնիսկ օգնություն ցուցաբերելն է դժվար եղել։ Եվ երկրորդը առաջարկում եմ բոլոր Վրաստան երթևեկող մեքենաներին սահմանային անցակետեր մտնելուց առաջ բոլորին անխտիր ստուգել գերբեռնվածության համար, քանի որ սահմանապահները դա չեն կարողանում տեսնել․ մարդիկ իջնում են և ոտքով են անցնում անցակետը և անձանց բեռնվածությունը ստուգել չի լինում։ Պարտադիր թող ստուգվեն բոլոր մեքենաները, գոնե վթարի պարագայում տուժածների քանակը քիչ կլինի»,- ասաց նա։ Նիկոլ Փաշինյանն արձագանքեց, որ հարցը կքննարկեն։

07:57 - 11 հուլիսի, 2019

Արսեն Թորոսյանն ընդունել է Իսրայելի Պետության արտակարգ և լիազոր դեսպան Էլիավ Բելոցերկովսկուն

Իսրայելի Պետության արտակարգ և լիազոր դեսպան Էլիավ Բելոցերկովսկին` պատվավոր հյուպատոս Աշոտ Շախմուրադյանի հետ ճանաչողական այց է կատարել առողջապահության նախարարություն` քննարկելու երկկողմ համագործակցության հեռանկարները նախարար Արսեն Թորոսյանի հետ:Ինչպես տեղեկացրեցին ՀՀ առողջապահության նախարարությունից, Էլիավ Բելոցերկովսկին ներկայացրել է մի շարք հարցեր կապված երկկողմ համագործակցության հնարավորությունների հետ, որոնք կկարողանան իրականացնել առողջապահության ոլորտում` Իսրայելի փորձի փոխանակման միջոցով: Կողմերը քննարկել են նաև երեխաների վերականգնման ոլորտում համագործակցության, Իսրայելում ուսուցման ֆինանսավորման աղբյուրների և զանգվածային արտակարգ իրավիճակների դեպքերի համար համատեղ ծրագրեր սկսելու վերաբերյալ հարցեր: Նախարարը շեշտել է, որ ծրագրերի համատեղ իրագործումը մեծապես կնպաստի Հայաստանի առողջապահության բնագավառի զարգացմանը նշված ուղղություններով և կօգնի ստեղծել փոխշահավետ համագործակցային կապեր:

06:00 - 11 հուլիսի, 2019

Խնդրում եմ խնայողաբար օգտագործել էլեկտրաէներգիան, որպեսզի կարևորագույն հաստատություններին այն բավականացնի․ Արսեն Թորոսյան

Առողջապահության նախարար Արսեն Թորոսյանը իր ֆեյսբուքյան էջում գրել է․ «Երկրում առկա է էլեկտրաէներգիայի լուրջ դեֆիցիտ, խնդրում եմ առավելագույնս խնայողաբար օգտագործել այն, որպեսզի կարևորագույն հաստատություններին այն բավականացնի։ Անջատեք ավելորդ լույսերը, օդափոխիչները և այլն»։

11:00 - 10 հուլիսի, 2019

Արսեն Թորոսյանը հանդիպել է «Դեղ արտադրողների միություն» հասարակական կազմակերպության ներկայացուցիչներին

Առողջապահության նախարար Արսեն Թորոսյանը հանդիպում-քննարկում է ունեցել «Դեղ արտադրողների միություն» հասարակական կազմակերպության տնօրենի և անդամ հանդիսացող դեղ արտադրող ընկերությունների հետ: Հանդիպմանը քննարկվել է դեղերի շրջանառության պետական կազմավորման ոլորտում փորձաքննությունների վճարների սահմանման հիմնահարցերը:Կողմերը ներկայացրել են իրենց մտահոգությունները դեղերի գրանցման և լավ ուսումնասիրված բժշկական կիրառություն ունեցող վերարտադրված դեղերի գրանցման ընթացակարգերի վերաբերյալ: Նախարար Արսեն Թորոսյանի կողմից հանձնարարվեց առողջապահության նախարարության դեղերի քաղաքականությունը մշակող և իրականացնող աշխատակիցներին պարբերաբար իրականացնել քննարկումներ, հանդիպումներ` վերջիններիս կողմից բարձրացված հարցերին և խնդիրներին լուծումներ տալու նպատակով:

10:55 - 09 հուլիսի, 2019

Վրաստանում ՃՏՊ-ում տուժածներից ևս մեկին ուղղաթիռով ՀՀ են տեղափոխում․ Արսեն Թորոսյան

Առողջապահության նախարար Արսեն Թորոսյանը ֆեյսբուքյան իր էջում գրում է․ «Եվս մեկ տուժած Թբիլիսիից տեղափոխվում է Երևան։ Մյուս երեխայի վիճակը մնում է ծայրահեղ ծանր, այս պահին դեռ չենք կարող տեղափոխել նրան»։

07:04 - 09 հուլիսի, 2019

Վտանգավո՞ր է Սևանա լճում լողալը. մեկնաբանում է առողջապահության նախարարը |shantnews.am|

shantnews.am: «Սևանա լճից վերցված նմուշների լաբորատոր արդյունքները դեռ հայտնի չեն, երբ հայտնի դառնա, մենք կիրազեկենք հանրությանը և համապատասխան միջոցներ կձեռնարկենք: Ողջ աշխարհում այս տարի գրանցվել է ամենաբարձր ջերմաստիճանը: Խնդիրն առկա է թե´ ծովերում, թե´ լճերում, նաև Սևանում»,- ասել է ՀՀ առողջապահության նախարար Արսեն Թորոսյանը «Ազատություն» ռադիոկայանի ֆեյսբուքյան ասուլիսի ընթացքում` անդրադառնալով Սևանա լճի «ծաղկման» խնդրին: Նախարարը նշել է, որ այս պահին չի կարող հորդորել լողալ կամ չլողալ Սևանա լճում, և, ամենայն հավանականությամբ, վաղը կամ մյուս օրը հայտնի կդառնան լաբորատոր փորձաքննության արդյունքները: Արսեն Թորոսյանը հիշեցրել է, որ ինքն անցած տարի լողացել է Սևանա լճի չկանաչած հատվածներում, իսկ այս տարի ամեն բան վերջնական պարզ կլինի փորձաքննությունից հետո:

16:17 - 08 հուլիսի, 2019

Վրաստանում վթարված մեքենան եղել է գերբեռնված, վարորդը քնել է․ Արսեն Թորոսյանը սահմռկեցուցիչ մանրամասներ է ներկայացնում

ՀՀ առողջապահության նախարար Արսեն Թորոսյանն իր ֆեյսբուքյան էջում գրել է․ Սահմռկեցուցիչ տեղեկատվություն պետք է տամ, թեկուզ նախնական։ Վրաստանում վթարված մեքենան Mercedes A Class է (նկարում)։ Մեքենայում եղել է 8 հոգի, այսինքն՝ 3-ով ավելի, քան թույլատրված է։ Նրանցից երկուսը, նախնական տվյալներով, երթևեկել են բեռնախցիկում։ Ճամփորդությունը եղել է գիշերով և վարորդը քնել է ղեկին՝ հարվածելով ճանապարհի բետոնից պատնեշներին։ Մնացածը գիտեք, հավաստի տեղեկատվության համար հետևեք պաշտոնական լրահոսին։ Չգիտեմ նույնիսկ ինչ կոչ անեմ մեր վարորդներին։ Մտածում եմ, հավանաբար, բոլոր վարորդական իրավունքները պետք է չեղարկել և բոլորից նորից շատ խիստ քննություն վերցնել։

12:02 - 07 հուլիսի, 2019

Վրաստանում հայկական մեքենա է վթարվել․ Արսեն Թորոսյան

Առողջապահության նախարար Արսեն Թորոսյանն իր ֆեյսբուքյան էջում գրել է․ «Վրաստանում հայկական մեքենա է վթարվել: Դեպքը տեղի է ունեցել Գորիի մոտակայքում: Ցավոք կան զոհեր և վիրավորներ: նախնական տվյալներով 3 մարդ զոհվել է, 5-ը տարբեր աստիճանի վնասվածքներով տեղափոխվել են մոտակա հիվանդանոց: Վիրավորներից երկուսի վիճակը ծանր է, վերջիններիս տեղափոխում են Թբիլիսիի հիվանդանոց: Կապի մեջ ենք մեր վրացի գործըներների հետ, արվում է ամեն ինչ` վերջիններիս կյանքերը փրկելու, ինչպես նաև Հայաստան տեղափոխելու համար։»

06:47 - 07 հուլիսի, 2019

Մարզերում կաթվածի ծրագիրը ևս պետք է ընդլայնվի. Արսեն Թորոսյան

Առողջապահության նախարար Արսեն Թորոսյանը մասնակցել է Հայաստանում գլխուղեղի կաթվածի բուժման և կառավարման համակարգող խորհրդի անդրանիկ նիստին, որտեղ ներկա էին խորհրդի նախագահ` «Էրեբունի» ԲԿ նյարդաբանության ծառայության ղեկավա Նունե Եղիազարյանը, Բոստոնի Բժշկական համալսարանի նյարդաբանության պրոֆեսոր Վիկեն Բաբիկյանը, Կանադայի Ալբերտայի համալսարանի նյարդավիրաբուժության դոցենտ Միքայել Սքոն Մուրաթօղլուն և մի շարք այլ մասնագետներ: Քննարկման հիմնական թեմաներն էր կաթվածի համապարփակ կենտրոնների հավատարմագրումը և ինսուլտային կազմակերպությունների դերը խնամքի հարցում: Առաջարկվել է Երևանում լրացուցիչ կաթվածի համապարփակ կենտրոններ ստեղծվեն` առավել արդյունավետության համար: Նիստին մանրամասն քննարկվել է բնակչությանը` պետության կողմից երաշխավորված անվճար բժշկական օգնության և սպասարկման շրջանակներում գլխուղեղի սուր և ենթասուր իշեմիկ կաթվածների թրոմբոլիտիկ բուժման և մեխանիկական թրոմէկտոմիայի ծրագիրը: Առողջապահության նախարար Արսեն Թորոսյանը հատուկ շեշտել է, որ ծրագիրը պետք է ընդլայնել նաև մարզերում և նշել, որ որևէ քաղաքացի չպետք է տուժի հեռավորության պատճառով: Ավարտելով նիստը` Արսեն Թորոսյանը Միքայել Սքոն Մուրաթօղլուին շնորհակալություն է հայտնել շարունակական բժշկական աջակցության և համագործակցության ու պարգևատրել Հայաստանի Հանրապետության առողջապահության նախարարության հուշամեդալով:

06:39 - 05 հուլիսի, 2019

Արսեն Թորոսյանը Հայաստանի 5-րդ Միջազգային բժշկական համագումարին անդրադարձել է Հայաստանի ու Արցախի առողջապահության համակարգին

ՀՀ առողջապահության նախարար Արսեն Թորոսյանը ֆեյսբուքյան իր էջում գրում է․ «Ելույթս Հայաստանի 5-րդ Միջազգային բժշկական համագումարին, որի կարգախոսն է` «Հայաստան-Սփյուռք-Արցախ՝ միաձուլում ի փառս առողջության»: Վերջին մեկ տարվա ընթացքում Հայաստանում շրջադարձային փոփոխություններ են եղել, որն իր դրական և շոշափելի ազդեցությունն է թողել թե ընդհանուր երկրի և թե մասնավորապես առողջապահության համակարգի զարգացման գործում: Վստահ եմ, որ մեզ կհաջողվի այսքան հզոր ներուժը նպատակաուղղել Հայաստանի ու Արցախի առողջապահության համակարգի ներդաշնակ և բազմակողմանի զարգացմանն ուղղված կոնկրետ ծրագրերի ստեղծմանն ու իրականացմանը»:

07:01 - 04 հուլիսի, 2019