Այսօր Արցախը զրկված է իրեն պաշտպանելու հնարավորությունից, այդ առաքելությունը դրված է Հայաստանի վրա, ուզում եմ հավատալ, որ ՀՀ-ն այդ միսիան կիրականացնի․ Արկադի Ղուկասյան |news.am|
news.am: Ես համոզված եմ` այն ժողովուրդը, որը պատրաստ է պայքարել մինչեւ վերջ, նրան հնարավոր չէ հաղթել: Այս մասին այսօր` հոկտեմբերի 30-ին, Ստեփանակերտում լրագրողների հետ զրույցում ասաց Արցախի նախկին նախագահ Արկադի Ղուկասյանը:
«Այստեղ կան, իհարկե, դժվարություններ, որովհետեւ մենք չենք տեսնում հստակ դիրքորոշում Հայաստանի կողմից: Ակնհայտ է, որ Արցախը միայնակ չի կարող պայքարել ամբողջ աշխարհի դեմ եւ մենք ակնկալում ենք Հայաստանի, Սփյուռքի եւ մեր բարեկամ երկրների աջակցությունը մեր պայքարում»,- ասաց նա:
Անդրադառնալով Փաշինյանի այն հայտարարությանը, որ պատրաստ է Սոչիում խաղաղապահների տեղակայմանը ժամկետը երկարացնելու մասին փաստաթուղթ ստորագրել, Ղուկասյանն ասաց, որ մինչ այդ ուրիշ մտքեր են հնչել, եւ դա հաշվի առնելով՝ ինքը համոզված է, որ հստակ դիրքորոշում պետք է հնչի:
Նախկին նախագահն ասաց, որ իրենք չունեն հստակ ինֆորմացիա, թե ինչ են անելու ՀՀ իշխանությունները, միայն կարող են ենթադրել այդ մասին:
«Խոսքերն այս վերջին ժամանակահատվածում գրեթե արժեք չունեն, որովհետեւ խոսքերն ու մտքերը փոխվում են եւ մենք շատ հակասական հայտարարություններ ենք լսում, ինչը մտահոգիչ է: Այսօր Արցախը զրկված է պաշտպանել իրեն, այդ առաքելությունը դրված է Հայաստանի վրա եւ ես ուզում եմ հավատալ, որ Հայաստանը այդ միսիան կիրականացնի»,-ասաց նա:
Արկադի Ղուկասյանն ասաց, որ այսօր Ռուսաստանի խաղաղապահ ուժերն են պահում Արցախի անվտանգությունը, բայց դա չի նշանակում, որ Հայաստանն իր միսիան ավարտել է Արցախում. «Մեզ անհրաժեշտ է եւ Ռուսաստանի օգնությունը այս հարցում, եւ առաջին հերթին Հայաստանի օգնությունը, որովհետեւ ՌԴ-ն ինչքան էլ շահագրգռած լինի ապահովել Արցախի ժողովրդի անվտանգությունը, ունի իր շահերը, իր հարաբերությունները Թուրքիայի ու Ադրբեջանի հետ եւ որոշ հարցերում մենք տեսնում ենք վերապահումներ, բայց ինչ վերաբերում է Հայաստանին, Հայաստանը պետք է հստակ դիրքորոշում հայտնի»,-ասաց նա նշելով, որ մինչեւ հիմա իր համար պարզ չէ, թե ինչ դիրքորոշում ունի Նիկոլ Փաշինյանը:
20:43 - 30 հոկտեմբերի, 2022
