Սոցցանցերում հայտնված փաստաթղթերը անվտանգության սպառնալիք են ոչ միայն ԱՄՆ-ի, այլև դաշնակիցների համար․ Պենտագոն
|lragir.am|
lragir.am: Պենտագոնը դեռևս գնահատում է գաղտնի տեղեկատվության վերջին արտահոսքի չափը, այդ թվում՝ Ուկրաինայի մոտալուտ հակահարձակման վերաբերյալ: «Մենք դեռ հետաքննում ենք, թե ինչպես դա կարող էր տեղի ունենալ և որքան է խնդրի մասշտաբը», - երկուշաբթի ասել է պաշտպանության նախարարի հանրային կապերի գծով օգնական Քրիս Միգերը:
Պաշտպանության նախարար Լլոյդ Օսթինը, արտահոսքի մասին հայտնի դառնալու հաջորդ օրը, սկսեց ամենօրյա հանդիպումներ ունենալ բարձրաստիճան զինվորականների և պետական պաշտոնյաների հետ՝ իրավիճակը գնահատելու համար, ասել է նա:
Նախարարությունն ընդունում է, որ արտահոսքը անվտանգության լուրջ խնդիր է ստեղծում ոչ միայն Միացյալ Նահանգների, այլև նրա դաշնակիցների համար։ Մտավախություն կա նաև, որ հրապարակված փաստաթղթերից կարող է պարզվել, թե որքան ակտիվ են ամերիկացիները լրտեսել իրենց դաշնակիցներին։
Անցած հանգստյան օրերին ամերիկացիներն արդեն մի շարք հանդիպումներ են անցկացրել այս արտահոսքից տուժած դաշնակիցների և գործընկերների հետ։
Ինչպես լրագրողներին ճեպազրույցում ասել է Պենտագոնի մեկ այլ պաշտոնյա Ջոն Քիրբին, զինվորականները մանրակրկիտ ուսումնասիրում են, թե ինչպես և ում են փոխանցվել արտահոսքի մեջ պարունակվող գաղտնի տեղեկատվությունը, քանի որ, դատելով հրապարակված փաստաթղթերի ձևաչափից, դրանք կարող են լինել հատուկ պատրաստված ճեպազրույցները ղեկավարության համար, գրում է BBC-ն։
CNN-ի հաղորդմամբ, Պենտագոնի տվյալների արտահոսքի պատճառով հրապարակվել է մի փաստաթուղթ, որը վկայում է այն մասին, որ ԱՄՆ-ն գաղտնալսել է Ուկրաինայի նախագահ Վլադիմիր Զելենսկու հեռախոսազրույցները։
ԱՄՆ հետախուզության զեկույցում, որի աղբյուրը ազդանշանային հետախուզությունն է, ասվում է, որ Զելենսկին փետրվարի վերջին «առաջարկել է անօդաչուներով հարվածներ հասցնել Ռոստովի մարզում ռուս զինվորականների կուտակումներին», քանի որ Ուկրաինան չունի հեռահար զենք, որը կարող է այդքան հեռու հասնել:
10:03 - 11 ապրիլի, 2023
