Սուրեն Թովմասյան

Սուրեն Թովմասյանը ՀՀ կադաստրի կոմիտեի ղեկավարն է 2019թ․ դեկտեմբերի 5-ից։ Ծնվել է 1986թ. հունվարի 2-ին Գեղարքունիքի մարզի Ծովինար գյուղում։ Տեխնիկական գիտությունների թեկնածու է, դոցենտ: 2004-2006թթ. ծառայել է ՀՀ զինված ուժերում:

2006–2010թթ. սովորել է Երեւանի Ճարտարապետության եւ շինարարության պետական համալսարան, «Արդյունաբերության եւ քաղաքացիական շինարարություն» ֆակուլտետում, ունի բակալավրի կոչում։
2010-2012թթ. սովորել է Երեւանի Ճարտարապետության եւ շինարարության պետական համալսարան, «Արդյունաբերության եւ քաղաքացիական շինարարություն» ֆակուլտետում՝ մագիստրոսի կոչումով։ 2012-2014թթ․՝ Ճարտարապետության եւ շինարարության Հայաստանի ազգային համալսարանում՝ գիտական աստիճանի հայցորդ

2008թ. աշխատել է Արթուն ՓԲԸ–ում՝ որպես գեոդեզիստի ասիստենտ, 2008-2010թթ.՝ Արփա-Սեւան ԲԲԸ–ում՝ որպես գեոդեզիստ, 2010-2013թվականներին աշխատել է ՃՇՀԱՀ–ում՝ որպես գեոդեզիստ, 2012թ.՝ «Ոռոգման համակարգերի հրատապ ծրագիր»–ում՝ որպես գեոդեզիստ, 2013թ.-ից առ այսօր Ինժեներական գեոդեզիայի ամբիոնում դասախոս է։
2013 թ. եղել է գեոզոդիստ «Ոռոգման համակարգերի հրատապ ծրագիր»–ում։
2014-2017թթ․՝ Տարածքային կառավարման նախարարությունում «Ջրային կոմիտե» ԾԻԳ–ում՝ որպես գեոդեզիստ-խորհրդատու, 2015-2016թթ․ դասախոսել է ԵՊՀ Իջեւանի մասնաճյուղում, 2015-2019թթ. եղել է գեոզոդիստ Գյուղատնտեսության նախարարության «Ջրային տնտեսություն» ԾԻԳ–ում, 09․2019-12․2019թթ․ աշխատել է Ճարտարապետության եւ շինարարության Հայաստանի ազգային համալսարանում՝ ինժեներական գեոդեզիայի ամբիոնի վարիչ, 05․12․2019թ․-ից Ճարտարապետության եւ շինարարության Հայաստանի ազգային համալսարանում եղել է ինժեներական գեոդեզիայի ամբիոնի վարիչ (հասարակական հիմունքներով)։
2019թ․-ի դեկտեմբերի 5-ին նշանակվել է Կադաստրի կոմիտեի ղեկավար։

Արբանյակի կողմից մատակարարվող տվյալները կարող են լուծել Կադաստրի կոմիտեի որոշ կարիքներ. Թովմասյան

Երկիր մոլորակի ուղեծիր դուրս բերված Հայաստանի առաջին տիեզերական արբանյակը կարող է լուծել նաև Կադաստրի կոմիտեի որոշ կարիքներ, սակայն կադաստրային քարտեզների ուղղման համար կշարունակեն օգտագործվել այլ տեխնոլոգիաներ: Այս մասին ասաց Կադաստրի կոմիտեի ղեկավար Սուրեն Թովմասյանն ԱԺ մշտական հանձնաժողովների համատեղ նիստում «Հայաստանի Հանրապետության 2021թ. պետական բյուջեի կատարման մասին» տարեկան հաշվետվության քննարկմանը: Պատգամավոր Բաբկեն Թունյանը նկատեց՝ նշվում է, որ արբանյակը պետք կգա նաև կադաստրային գործի մեջ, քարտեզագրման մեջ: «Արբանյակը թողարկվել է մի շարք պետական մարմինների կարիքները բավարարելու համար: Գլոբալ վերլուծությունների համար, այո, Կադաստրի կոմիտեի որոշ կարիքներ այդ արբանյակը և դրա կողմից մատակարարվող տվյալները կարող են լուծել: Բայց, երբ խորանում ենք ավելի նեղ մասնագիտական, կադաստրային քարտեզների ուղղման և համապատասխան ճշգրիտ սանտիմետրային կոորդինատների ստացման մասով, ապա աշխարհում լավագույն նկարը, որ այսօր հնարավոր է ստանալ այս պահի դրությամբ առանց այդ միջամտությունների, 30 սմ պիքսել ունեցող նկարներն են, որոնք ևս չեն ապահովում այն սանտիմետրային ճշտությունը, որով այսօր աշխարհի բոլոր կադաստրները վարվում են»,-ասաց Կադաստրի կոմիտեի ղեկավարը: Նա վստահեցրեց՝ մաքսիմալ փորձելու են օգտվել այդ արբանյակի կողմից մատակարարվելիք տվյալներից՝ գլոբալ վերլուծությունների, հողային ֆոնդերի համար: «Իսկ, եթե խոսքը վերաբերվի բուն կադաստրային քարտեզների ուղղման համար օգտագործվող նկարներին, ապա այս պարագայում մենք դեռևս շարունակելու ենք օգտվել այլ տեխնոլոգիաներից, օրինակ՝ ինքնաթիռով նկարահանման մեթոդիկայից, եթե դրա կարիքը հետագայում ունենանք»,-ասաց Թովմասյանը: Ինչ վերաբերում է արբանյակին, ապա նա ասաց, որ այդ տեխնոլոգիայի ներդրումն ու ստացումը կառավարության կողմից շատ ռազմավարական և կարևոր քայլ էր, որը ապահովելու է տարբեր մարմինների խնդիրների կարգավորումը: Արբանյակի առկայությունը նաև թույլ է տալու ավելի թարմացված տվյալներ ներբեռնել ազգային գեոպորտալ, որը կադաստրի կոմիտեն մոտ ապագայում գործարկելու է: «Գեոպորտալի բազային շերտերի մեջ ներառվում են հենց արբանյակային և օդային լուսանկարները: Եվ այդ արբանյակային լուսանկարների թարմացումն ազգային գեոպորտալում թույլ կտա մեր քաղաքացիներին ստանալ առժամանակյա ճշգրիտ տեղեկատվություն և տեսնել իրականությունն արդեն համակարգչի վրա»,-ասաց նա:

16:43 - 01 հունիսի, 2022