Հասան Ռոհանի

Հասանովն իսրայելցի պաշտոնյայի հետ քննարկել է պաշտպանական համագործակցությունը |azatutyun.am|

azatutyun.am: Ադրբեջանի պաշտպանության նախարար Զաքիր Հասանովը հանդիպում է ունեցել պաշտոնական այցով Բաքվում գտնվող Իսրայելի պաշտպանության նախարարության գլխավոր տնօրեն Էյալ Զամիրի գլխավորած պատվիրակության հետ։ Պաշտոնյաները քննարկել են երկու երկրների միջև պաշտպանական համագործակցությունը։ Ադրբեջանական կողմի հաղորդագրության համաձայն՝ նախարար Հասանովը «գոհունակություն է հայտնել ադրբեջանա-իսրայելական հարաբերությունների ներկայիս բարձր մակարդակի կապակցությամբ», Զամիրն իր հերթին ընդգծել է «նման հանդիպումների և փոխայցելությունների կարևորությունը առկա համագործակցության հետագա ընդլայնման տեսանկյունից»։ Իսրայելցի պաշտոնյայի այցի նպատակների մասին այլ մանրամասներ չեն հաղորդվում։

20:59 - 18 սեպտեմբերի, 2023

Հասան Ռոհանին շնորհավորել է էբրահիմ Ռայիսիին Իրանի նախագահական ընտրություններում հաղթելու առթիվ |armenpress.am|

armenpress.am: Իրանի նախագահ Հասան Ռոհանին հանդիպել է նախագահի պաշտոնում իր փաստացի հետնորդ էբրահիմ Ռայիսիի հետ՝ շնորհավորելով նրան ընտրություններում տարած հաղթանակի կապակցությամբ: Վկայակոչելով «ՌԻԱ Նովոստի»-ին, հայտնել է պետության գործող նախագահի մամուլի քարտուղար Ալիռեզա Մոյեզին:

14:46 - 19 հունիսի, 2021

Ռոհանին շնորհավորական ուղերձ է հղել Ալիևին |tert.am|

tert.am: Իրանի նախագահ Հասան Ռոհանին Ադրբեջանի ազգային օրվա առթիվ շնորհավորական ուղերձ է հղել երկրի նախագահ Իլհամ Ալիևին՝ կարևորելով երկրների միջև հարաբերությունները և վստահություն հայտնելով, որ իրենք կզարգացնեն փոխգործակցությունը տարբեր ոլորտներում: Այս մասին հայտնում է «Թանսիմ» գործակալությունը։ «Որպես երկու բարեկամական հարևաններ՝ Իրանի Իսլամական Հանրապետությունն ու Ադրբեջանի Հանրապետությունը բարձր մակարդակով եղբայրական հարաբերություններ են ձևավորել Ադրբեջանի անկախությունից ի վեր՝ ապավինելով պատմական, մշակութային և կրոնական կապերին»,-ասվում է Ռոհանիի ուղերձում:

18:49 - 28 մայիսի, 2021

ԱՄՆ-ի պատժամիջոցների հետևանքով Իրանը չի ստացել 16,8 միլիոն չափաբաժին պատվաստանյութ․ Ռոհանի |tert.am|

tert.am: Այսօր Իրանի Իսլամական Հանրպետության նախագահ Հասան Ռոհանին հայտարարել է, որ Իրանը համաձայնության է եկել COVAX ծրագրի միջոցով կորոնավիրուսի դեմ 16,8 միլիոն դեղաչափ պատվաստանյութի գնման վերաբերյալ, սակայն Միացյալ Նահանգների կողմից Իրանի նկատմամբ սահմանված պատժամիջոցների հետևանքով գործընթացը ձախողվել է, հայտնում է ՏԱՍՍ լրատվական գործակալությունը՝ հղում տալով Իրանի պետական հեռուստաընկերությանը։«Եթե ամերիկյան պատժամիջոցները չլինեին, ապա COVAX ծրագրի միջոցով պատվաստանյութերը Իրանում կլինեին Իսֆանդ (ըստ իրանական օրացույցի փետրվարի 19-ից մինրև մարտի 20-ը) ամսվա ընթացքում և այսօր միլիոնավոր մարդիկ պատվաստված կլինեին», - ասել է Ռոհանին։

14:39 - 21 ապրիլի, 2021

«Սա իրանցի ժողովրդի հաղթանակն է»․ Ռոհանին մեկնաբանել է ԱՄՆ-ի` բանակցություններ վարելու պատրաստակամությունը |tert.am|

tert.am: Իրանի Իսլամական Հանրապետության նախագահ Հասան Ռոհանին ասել է, որ Իրանի միջուկային համաձայնագրի (Գործողությունների համատեղ համապարփակ ծրագիր) շուրջ 4+1 ձևաչափով (Ռուսաստան, Չինաստան, Մեծ Բրիտանիա, Ֆրանսիա և Գերմանիա) բանակցություններ վարել հնարավոր է այն դեպքում, երբ Միացյալ Նահանգները ցույց տա իր ազնվությունը, հայտնում է «Կոմերսանտ»-ը։Ռոհանին կարծում է, որ բանակցություններ վարելու ԱՄՆ-ի ցանկությունն Իրանի հաղթանակն է։ Ավելի վաղ Իրանի ԱԳՆ ղեկավարի տեղակալն ասել էր, որ Թեհրանը բանակցելու է բացառապես 4+1 խմբի երկրների հետ:«Երեկ կայացած հանդիպումից հետո ես միջազգային հարաբերություններում նոր էջ եմ բացել։ Եթե Միացյալ Նահանգները ցույց տա իր ազնվությունը, ապա մենք կարող ենք բանակցել 4+1 ձևաչափի շրջանակում», - կառավարության նիստում ասել է Ռոհանին և հավելել․ «Այսօր մենք այնպիսի իրավիճակում ենք գտնվում, երբ ԱՄՆ-ն արթնացել է բանակցությունների համար և մենք հաստատում ենք, որ պատրաստ ենք միջուկային համաձայնագրի սահմաններում մեր ստանձնած պարտավորություններին վերադառնալ՝ բոլոր պատժամիջոցները չեղյալ հայտարարելու դիմաց։ Միացյալ Նահանգները խոսում են ուղղակի կամ անուղղակի բանակցությունների պատրաստակամության մասին. սա Իրանի ժողովրդի հաղթանակն է»։Հիշեցնենք, որ ապրիլի 6-ին Վիեննայում սկսվել են Իրանի միջուկային համաձայնագիրը վերականգնելու ուղղությամբ տարվող աշխատանքները։

14:13 - 07 ապրիլի, 2021

Միացյալ Նահանգները կորցրել է «ոսկե հնարավորությունը». Հասան Ռոհանի |1lurer.am|

1lurer.am: Իրանի նախագահ Հասան Ռոհանին հայտարարել է, որ Միացյալ Նահանգների վարչակազմը ձախողել է միջուկային գործարքը վերակենդանացնելու հնարավորության օգտագործումը` փոխանցում է իրանական Mehr գործակալությունը: Իսլամական Հանրապետության ղեկավարի հավաստմամբ՝ միջուկային գործարքի հարցում Ջո Բայդենի վարչակազմը գործնական փորձառության պակաս ունի: Հասան Ռոհանին ասել է, որ եթե Միացյալ Նահանգները կասեցնի պատժամիջոցների կիրառումը, ապա Իրանը կվերադառնա իր պարտավորությունների կատարմանը, ինչից կշահեն ամբողջ աշխարհն ու տարածաշրջանը, սակայն ամերիկացիները չգիտակցեցին և չօգտագործեցին այս հնարավորությունը:

14:32 - 01 ապրիլի, 2021

Ռոհանին քննադատել է Իրանի նկատմամբ ԱՄՆ պատժամիջոցներն ու կոչ արել միջուկային համաձայնագրին վերադառնալու քայլեր անել |tert.am|

tert.am: Իրանի Իսլամական Հանրապետության նախագահ Հասան Ռոհանին, ելույթ ունենալով Տնտեսական համագործակցության կազմակերպության առցանց գագաթնաժողովի ընթացքում, դատապարտել է Իրանի նկատմամբ կիրառված ԱՄՆ պատժամիջոցները, հայտնում է Tehran Times–ը։«Ինչ վերաբերում է Իրանի իմաստությանն ու խորաթափանցությանը, միջուկային համաձայնագիրը մինչ այժմ գոյատևել է, չնայած այն հանգամանքին, որ Միացյալ Նահանգներն ընտրել է դրա ոչնչացումը: ԱՄՆ-ն, որպես համաձայնագիրը խախտած կողմ, պետք է վերացնի բոլոր պատժամիջոցները և գործնական քայլեր ձեռնարկի, որպեսզի կարողանա վերադառնալ միջուկային համաձայնագրին: Իրանի Իսլամական Հանրապետությունը գործողությանը պատասխանելու է գործողությամբ: Համաձայնագրին վերադառնալու ուղին պարզ է, եթե ԱՄՆ–ի կառավարությունը վճռական է տրամադրված, բանակցությունների կարիք չկա», – ասել է Ռոհանին:Անդրադառնալով Տնտեսական համագործակցության կազմակերպության գործունեությանը՝ Ռոհանին կարևորել է կազմակերպությանը դերը տարածաշրջանում և նշել, որ կազմակերպության շրջանակներում տնտեսական համագործակցության խթանման ուղղությամբ մեծ քայլեր են արվել և արձանագրվել են նշանակալի նվաճումներ։ Այնուամենայնիվ, ըստ Ռոհանիի, այդ նվաճումները չեն արդարացրել սպասելիքները։

12:08 - 06 մարտի, 2021

Թեհրանը մտադիր է ԵԱՏՄ-ում իր ներկայությունը մշտական դարձնել. Ռոհանի |armenpress.am|

armenpress.am: Իրանի նախագահ Հասան Ռոհանին հայտարարել է, որ Թեհրանը մտադիր է «ԵԱՏՄ-ում իր ներկայությունը մշտական դարձնել»: Այդ մասին հաղորդում է Irna գործակալությունը: «Այդ միություններին անդամակցելը շատ կարևոր է»,-ասել է Ռոհանին և ընդգծել, որ ԵԱՏՄ-ն արտահանման հարցում Իրանին շատ է աջակցել: Իրանի նախագահն ընդգծել է, որ ԵԱՏՄ-ին անդամակցելով Թեհրանը կկարողանա ակտիվ ներկայություն ապահովել տարածաշրջանում և տարածաշրջանից դուրս:

20:34 - 18 փետրվարի, 2021

Ռոհանիի համոզմամբ՝ միջուկային համաձայնագրի հարցում առաջին քայլը պետք է ԱՄՆ-ը կատարի |azatutyun.am|

azatutyun.am: Վաշինգտոնը պետք է վերադառնա 2015 թվականին կնքված միջուկային համաձայնագրի դրույթների լիարժեք կատարմանը։ Նախօրեին Թեհրանում կայացած դեսպանների հավաքի ժամանակ այս մասին հայտարարել է Իրանի նախագահ Հասան Ռոհանին։ «Կարծում եմ, որ որևէ կասկած չկա, թե ով պետք է առաջին քայլի նախաձեռնողը լինի։ Մենք չէինք, որ լքեցինք այս համաձայնագիրը, ուստի մենք չէ, որ պետք է առաջին քայլն անենք։ Այն երկիրը, որը երեք տարի առաջ լքել է այս համաձայնագիրը, դաժան վերաբերմունք է ցուցաբերել մեր երկրի հանդեպ, պարտավոր է առաջին քայլը կատարել։ Նման քայլի հետաձգման ամեն մի ժամը միջազգային իրավունքի նորմերի և կարգավորումների խախտում է», - հայտարարում էր Ռոհանին։

13:31 - 10 փետրվարի, 2021

Իրանը պատրաստ է միջուկային գործարքի կատարմանը վերադառնալ մյուսներից «մեկ ժամ» անց |armenpress.am|

armenpress.am: Թեհրանը պատրաստ Է միջուկային գործարքի կատարմանը վերադառնալ «մեկ ժամ» անց, բայց սկզբում դա պետք Է անեն մյուսները: Այդ մասին հունվարի 27-ին հայտարարել Է Իրանի նախագահ Հասան Ռոհանին: «Մենք միշտ ասել ենք՝ վերադարձեք ձեր պարտավորություններին, արդեն մեկ ժամ անց մենք կվերադառնանք մեր բոլոր պարտավորություններին»,-ասել Է Ռոհանին՝ հանդես գալով կառավարության նիստում, որը ցուցադրվել Է իրանական հեռուստատեսությամբ: 2015 թվականին «վեցյակը (Մեծ Բրիտանիա, Գերմանիա, Չինաստան, Ռուսաստան, ԱՄՆ, Ֆրանիսա) եւ Իրանը հայտարարել են Գործողությունների համատեղ համափարփակ ծրագրի (ԳՀՀԾ) ձեռքբերման մասին: Համաձայնագիրը ենթադրում Էր պատժամիջոցների վերացում՝ Իրանի միջուկային ծրագրի սահմանափակման փոխարեն: Գործարքը նախնական տեսքով երեք տարվա կյանք Էլ չունեցավ. 2018 թվականի մայիսին ԱՄՆ-ը հայտարարեց միակողմանի կարգով դրանից դուրս գալու եւ Թեհրանի նկատմամբ խիստ պատժամիջոցները վերականգնելու մասին: Իրանը 2019 թվականին հայտարարեց համաձայնագրի շրջանակներում իր պարտավորությունների փուլային կրճատման մասին՝ հրաժարվելով միջուկային հետազոտությունների, ցենտրիֆուգների եւ ուրանի հարստացման մակարդակի սահմանափակումներից: Բացի այդ, դեկտեմբերին Իրանում հաստատվել Է «Պատժամիջոցների չեղարկման ռազմավարական միջոցը» օրենքը, որը կառավարությանը պարտադրում Է՝ կասեցնել միջուկային գործունեության՝ ՄԱԳԱՏԷ-ի ընդլայնված ստուգումները, զգալիորեն բարձրացնել ուրանի հարստացման մակարդակը, ինչպես նաեւ ցենտրիֆուգի հարստացման գործընթացում գործել միջուկային գործարքի դրույթներից դուրս: Հիմնական նպատակն Է՝ հասնել պատժամիջոցների եւ նավթի արտահանման սահմանափակումների չեղարկմանը եւ ֆինանսական գործողությունների իրագործմանը, հաղորդել Է ՌԻԱ Նովոստին:

12:42 - 27 հունվարի, 2021

Իրանի տնտեսական կապերը նոր փուլ են թևակոխում. Հասան Ռոհանի |tert.am|

tert.am: Իրանի նախագահ Հասան Ռոհանին կարևորել է տնտեսական պատերազմի պարտությունը, որն ԱՄՆ նախկին վարչակազմը նախաձեռնել էր Թեհրանի դեմ: Ինչպես փոխանցում է Tansim գործակալությունը, Ռոհանին հավելել է, որ Իսլամական Հանրապետության տնտեսական փոխգործակցությունը նոր փուլ է թևակոխում՝ արտահանումներիի ոլորտի բարելավմամբ: «ԱՄՆ նախկին նախագահ Դոնալդ Թրամփի՝ Իրանի դեմ վարած տնտեսական պատերազմի ձախողումը փոփոխել է Թեհրանի առևտրային գործընկերների դիրքորոշումները»,- ասել է Ռոհանին՝ շեշետելով, որ երկրի տնտեսական համագործակցությունը նոր փուլ է թևակոխում: Իրանի նախագահը նշել է, որ երկրի տնտեսական պայմանները բարելավվում են նավթի և ոչ միայն նավթի արտահանումների ծավալների աճի ֆոնին:

21:12 - 24 հունվարի, 2021

Ռոհանին նշել Է Իրանի կողմից միջուկային գործարքի պարտավորությունների կատարման պայմանը |armenpress.am|

armenpress.am: Իրանը միջուկային գործարքի կատարմանը կվերադառնա, եթե ԱՄՆ-ի ընտրված նախագահ Ջո Բայդենը նույն բանն անի: Այդ մասին հունվարի 20-ին հայտարարել Է Իրանի նախագահ Հասան Ռոհանին: Ավելի վաղ ԱՄՆ-ի պետքարտուղարի պաշտոնի թեկնածու Էնթոնի Բլինքենը հայտարարել Էր, որ եթե Թեհրանն առաջինը վերադառնա իրանական միջուկային ծրագրի վերաբերյալ Գործողությունների համատեղ համապարփակ ծրագրի (ԳՀՀԾ) կատարմանը, ապա Վաշինգտոնը նույնպես պատրաստ Է վերադառնալ գործարքին, որպեսզի հետագայում հասնի ավելի երկարաժամկետ համաձայնագրի կնքման, որը կընդգրկեր նաեւ Թեհրանի հրթիռային ծրագիրը: «Մենք այն անձանցից, ովքեր այսօր իշխանություն կստանան Սպիտակ տանը, սպասում ենք օրենքի, պարտավորությունների կատարմանը եւ ջանքերին, եթե նրանք կարողանան ազատվել նախկին չորս տարվա բոլոր սեւ բծերից, թեեւ որոշներն ընդմիշտ կմնան պատմության մեջ: Նրանք պետք Է վերադառնան միջազգային նորմերին եւ բանաձեւերին, 2231 բանաձեւին (հավանություն Է տվել ԳՀՀԾ-ն): Իհարկե, եթե նրանք վերադառնան, մեր պատասխանը կլինի դրական»,-ասել Է Ռոհանին՝ հանդես գալով կառավարության նիստում: Նրա խոսքով՝ եթե ԱՄՆ-ը «գործնականում» դա ցույց տա, Իրանը կգործի իր բոլոր պարտավորություններին համապատասխան», հաղորդել Է ՌԻԱ Նովոստին:

14:16 - 20 հունվարի, 2021

Իրանն արգելում է Covid-19-ի պատվաստանյութերի ներմուծումը Մեծ Բրիտանիայից և ԱՄՆ-ից |1lurer.am|

1lurer.am: Օտարերկրյա ընկերություններին թույլ չի տրվի Covid-19-ի պատվաստանյութեր փորձարկել Իրանի ժողովրդի վրա՝ հայտարարել է նախագահ Հասան Ռոհանին: Ավելի վաղ երկրի գերագույն ղեկավարն արգելել էր Միացյալ Թագավորությունում և ԱՄՆ-ում արտադրվող պատվաստանյութերի կիրառումն Իրանում՝ ասելով, որ դրանք «բոլորովին անվստահելի են»: Այս մասին հայտնում է france24-ը: «Արտասահմանյան ընկերությունները ցանկանում էին մեզ պատվաստանյութեր տալ, որպեսզի դրանք փորձարկվեն Իրանի ժողովրդի վրա: Բայց առողջապահության նախարարությունը կանխեց դա»,- ասել է Ռոհանին հեռուստատեսային ելույթում՝ չնշելով ընկերությունների անուններն ու չներկայացնելով այլ մանրամասներ: «Մեր ժողովուրդը չի լինի փորձարկման օբյեկտ՝ պատվաստանյութեր արտադրող ընկերությունների համար»,- հավելել է Ռոհանին: «Մենք ձեռք կբերենք օտարերկրյա անվտանգ պատվաստանյութեր»: Արձագանքելով Իրանի գերագույն առաջնորդի արգելքին՝ Առողջապահության համաշխարհային կազմակերպության արտակարգ իրավիճակների տնօրեն Մայքլ Ռայանը շեշտել է, որ համաշխարհային կազմակերպությունը բազմիցս կոչեր է արել «չքաղաքականացնել վիրուսը»:

14:49 - 11 հունվարի, 2021

ԱՄՆ-ում տեղի ունեցած վերջին իրադարձությունները վկայում են արևմտյան ժողովրդավարության թուլության մասին. Ռոհանի |tert.am|

tert.am: ԱՄՆ նախագահ Դոնալդ Թրամփը նախագահության տարիներին իր երկիրը աղետի է հասցրել, հայտարարել է Իրանի նախագահ Հասան Ռոհանին՝ մեկնաբանելով Վաշինգտոնում տեղի ունեցող իրադարձությունները, գրում է Tasnim News Agency-ն։ «Այն, ինչ մենք տեսանք ԱՄՆ-ում անցյալ գիշեր և այսօր, ցույց տվեց, թե որքան թույլ է արևմտյան ժողովրդավարությունը և որքան թույլ է դրա հիմքերը։ Չնայած գիտության և արդյունաբերության ոլորտներում բոլոր հաջողություններին՝ մենք տեսել ենք, թե ինչ ազդեցություն ունի պոպուլիզմը այդ երկրներում»,- ասել է Իրանի նախագահը։ Ռոհանիի խոսքով՝ «պոպուլիստ Դոնալդ Թրամփը իշխանության գալով՝ վնաս հասցրեց իր սեփական երկրին»: «Նա արատավորել է իր երկրի հեղինակությունը։ Նա խարխլել է ամբողջ աշխարհի հետ ԱՄՆ-ի հարաբերությունները։ Մենք տեսանք՝ ինչ է լինում, երբ իշխանության է գալիս անառողջ մարդը, ինչ խնդիրներ է ստեղծում ինչպես իր երկրի, այնպես էլ ամբողջ աշխարհի համար», - հավելել է Իրանի նախագահը՝ հույս հայտնելով, որ «դա դաս կլինի ինչպես այլ երկրների, այնպես էլ ապագա ամերիկյան ղեկավարների համար»:

15:23 - 07 հունվարի, 2021

Թեհրանը կվերադառնա միջուկային գործարքի լիակատար պահպանմանը, եթե Բայդենն ամբողջությամբ կատարի դրանով ստանձնած իր պարտավորությունները. Ռոհանի |tert.am|

tert.am: Իրանի նախագահ Հասան Ռոհանին հայտարարել է, որ իր երկիրն առանց վարանելու կվերադառնա 2015 թվականի միջուկային գործարքի լիակատար պահպանմանը, եթե ԱՄՆ նորընտիր նախագահ Ջո Բայդենը որոշի կատարել իր պարտավորությունները, հաղորդում է Iran Press-ը։ Երկրի կառավարության ամենշաբաթյա նիստում Ռոհանին հայտարարել է, որ չնայած պատժամիջոցներին, կառավարությունը կարողացել է երկիրն արդյունավետորեն կառավարել։ «Չնայած պատժամիջոցներին, պատերազմին և COVID-ի բռնկմանը, մենք տնտեսական աճ ենք նկատում»,- ասել է նա։ Ռոհանին նաև նշել է, որ «եթե ԱՄՆ-ի նոր վարչակազմն ապաշխարի, հետևի օրենքի գերակայությանը և կատարի իր պարտավորությունները, Իրանը նույնպես կկատարի իր պարտավորությունները, իսկ եթե ոչ, ապա Իրանը չի խոնարհվի»։ Ավելի վաղ Բայդենը New York Times թերթին տված հարցազրույցում հաստատել էր ԱՄՆ-ին Իրանի միջուկային ծրագրի շուրջ Գործողությունների համատեղ համապարփակ ծրագրի (ԳՀՀԾ) ձևաչափ վերադարձնելու և այդ հարցի շուրջ Թեհրանի հետ հետագա բանակցություններ վարելու մտադրության մասին։

19:47 - 06 հունվարի, 2021

Իրանն ուրախ է ընտրություններում Թրամփի պարտությամբ․ Հասան Ռոհանի |hetq.am|

hetq.am: Իրանի նախագահ Հասան Ռոհանին ԱՄՆ նախագահ Դոնալդ Թրամփին անվանել է ահաբեկիչ և նշել, որ Իրանի Իսլամական Հանրապետությունն ուրախ է ընտրություններում նրա պարտությամբ։ Այդպիսի հայտարարություն Ռոհանին արել է այսօր՝ դեկտեմբերի 16-ին։ «Ոմանք ասում են, որ մենք ոգևորվել ենք Բայդենի իշխանության գալով։ Դա այդպես չէ, բայց մենք շատ ուրախ ենք, որ Թրամփը հեռացել է։ Այդ մարդը, որն իրականացրել է հանցագործություններ, սպանել մարդկանց, եղել է ահաբեկիչ: Նա նաև խոչընդոտում է Իրան պատվաստանյութի ներկրմանը»,- հայտարարել է Իրանի առաջնորդը։ Իրանի նախագահի ելույթը հեռարձակել է երկրի պետական հեռուստատեսությունը։ «Հուսանք՝ Բայդենի օգտին ԱՄՆ ժողովրդի ձայնը օրենքների պահպանման օգտին տրված ձայն է, այլ ոչ թե խախտելու։ Այդ ձայնը պարտավորությունների ստանձման, այլ ոչ թե դրանցից հրաժարվելու ձայնն է»,- ընդգծել է նա։

23:07 - 16 դեկտեմբերի, 2020