Ուրբաթ կեսօրին Ստամբուլի հայկական Սուրբ Փրկիչ հիվանդանոցում վախճանված Պոլսո Հայոց պատրիարք Մեսրոպ արքեպիսկոպոս Մութաֆյանի հուղարկավորությունը տեղի կունենա առաջիկա կիրակի օրը Գումգափուի մայր եկեղեցում, հաղորդում է Պատրիարքարանի պաշտոնական էջը։
Մարտի 17-ին ժամը 10-ին կմեկնարկի հոգեհանգստի արարողությունը, այնուհետև Մութաֆյան Պատրիարքի աճյունը կամփոփվի Շիշլիի հայկական գերեզմանատանը։
Մարտի 9-ի երեկոյան Պատրիարքարանում Պոլսո Հայոց պատրիարքի ընդհանուր փոխանորդ Արամ Աթեշյանի նախագահությամբ տեղի ունեցած հոգևոր խորհրդի նիստի ժամանակ քննարկվել են հուղարկավորության հետ կապված մի շարք հարցեր։
Ըստ այդմ, որոշվել է մինչև ապրիլի 21-ը՝ Սուրբ Զատիկը, սուգ հայտարարել։ Հետաձգվել են համայնքային կառույցներում նախատեսված ոչ կրոնական բոլոր միջոցառումները։ Մինչև շաբաթ երեկո Պատրիարքարանում կընդունվեն ցավակցություններ, կբացվի սգո մատյան։ Իսկ հինգշաբթի և ուրբաթ օրերին մարդիկ հնարավորություն կունենան վերջին հրաժեշտը տալ Պոլսո Հայոց 84-րդ պատրիարք Մեսրոպ արքեպիսկոպոս Մութաֆյանին։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)