13:29 - 23 փետրվարի, 2023
Սիրիայի ԱԳ նախարարը շնորհակալություն է հայտնել Հայաստանին դժվարին պայմաններում սիրիացի ժողովրդին զորակցելու համար
Ինչպես արդեն հայտնել էինք, ՀՀ ԱԳ նախարար Արարատ Միրզոյանի գլխավորած պատվիրակությունը ժամանել է Դամասկոս:
Օդանավակայանում նախարար Միրզոյանին դիմավորել է Սիրիայի ԱԳ նախարար Ֆեյսալ ալ-Միկդադը:
Սիրիայի ԱԳ նախարարը ողջունել Արարատ Միրզոյանին և նշել, որ ՀՀ ԱԳ նախարարի այցը տեղի է ունենում ճիշտ ժամանակին, և դա երկու երկրների միջև պատմական և ամուր հարաբերությունների արտահայտնումն է, որոնք շարունակաբար զարգանում են՝ ծառայելու երկու ժողովուրդների շահերին:
ՍԱՆԱ լրատվական գործակալության փոխանցմամբ՝ Սիրիայի ԱԳ նախարարը նաև շնորհակալություն է հայտնել Հայաստանին դժվարին պայմաններում սիրիացի ժողովրդին զորակցելու համար։
Նշենք, որ ՀՀ ԱԳ նախարար Արարատ Միրզոյանը մեկնել է Սիրիա՝ ավերիչ երկրարշարժից տուժած շրջաններին մարդասիրական օգնության երրորդ խմբաքանակը հասցնելու նպատակով։
ՀՀ ՆԳՆ Փրկարար ծառայությունից նշել էին, որ Հայաստանից երկրաշարժից տուժած Սիրիա է ուղարկվել մարդասիրական օգնության երրորդ խմբաքանակը՝ ավելի քան 32 տոննա քաշով:
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)