12:44 - 09 ապրիլի, 2019
ԱԺ հանձնաժողովը դրական եզրակացություն տվեց թրաֆիքինգի ենթարկված երեխաներին միանվագ գումար հատկացնելու մասին նախագծին
ԱԺ մարդու իրավունքների և հանրային հարցերի մշտական հանձնաժողովում քննարկման է ներկայացվել «Մարդկանց թրաֆիքինգի և շահագործման ենթարկված անձանց նույնացման և աջակցության մասին» ՀՀ օրենքում փոփոխություններ և լրացումներ կատարելու մասին օրենքի նախագիծը։
Հիմնական զեկուցող Աշխատանքի և սոցիալական հարցերի նախարարի տեղակալ Սմբատ Սայանը նախ նշեց, որ նախագիծը նպատակաուղղված է ՀՀ կառավարության կողմից ստանձնած միջազգային պարտավորությունների և հանձնարարականների կատարմանը, մասնավորապես, ոլորտում երեխայի իրավունքների պաշտպանության մեխանիզմների բարելավմանը և գործող համակարգի արդյունավետության բարձրացմանը:
Նախագծով առաջարկված փոփոխություններն ու լրացումներն առնչվում են մարդկանց թրաֆիքինգի և շահագործման դեմ պայքարի բնագավառում նոր մեխանիզմների ներդրման, պետական և տարածքային կառավարման, տեղական ինքնակառավարման մարմինների միջև հարաբերությունների կարգավորման, առկա կառուցակարգերի ամրապնդման հարցերին:
Սմբատ Սայանի խոսքով՝ նշված օրենքում այսօր բացակայում են երեխաներին ուղղորդելու գործընթացը, իսկ այդ ուղղորդումն այն գործընթացն է, որի արդյունքում ապահովվում է սոցիալական աջակցություն թրաֆիքինգի ենթարկված անձի և այդ աջակցությունը տրամադրող կազմակերպության միջև։ Այդ համապատասխան ընթացակարգերի բացակայությունը որոշակի խնդիր էր առաջացնում, և նախաձեռնությամբ կարգավորում ենք խնդիրը։
Փոխնախարարն ասաց նաև, որ պետական բյուջեով կա ծրագիր, որի շրջանակում թրաֆիքինգի ենթարկված անձանց, որպես սոցիալական աջակցություն, նախատեսված է գումարային հատուցում, սակայն դա երեխաների համար նախատեսված չէ, ինչն իրավակիրառ պրակտիկայում խնդիրներ էր առաջացնում:
Ըստ նախագծի՝ հատուկ կատեգորիայի երեխա-զոհին ևս համապատասխան կետով սահմանվում է միանվագ դրամական փոխհատուցում՝ 250 000 դրամ։ Միանվագ դրամական փոխհատուցումը տրամադրվում է օրինական ներկայացուցչին նպատակային՝ հատուկ կատեգորիայի զոհի առաջնային կարիքները հոգալու համար:
Հավանական զոհերին, զոհերին և հատուկ կատեգորիայի զոհերին սույն օրենքով նախատեսված աջակցության տրամադրման կարգը և չափերը, ինչպես նաև աջակցության և պաշտպանության նպատակով հատուկ կատեգորիայի երեխա- զոհերի ուղղորդման ընթացակարգը սահմանվում է Հայաստանի Հանրապետության կառավարության որոշմամբ։
Նախագիծը դրվեց քվեարկության և ստացավ դրական եզրակացություն։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
comment.count (0)