ԽՍՀՄ տարիների ենթակառուցվածքների վերականգնման մասին է խոսքը. Գրիգորյանը՝ ապաշրջափակման հարցով քննարկումների մասին |armenpress.am|
17:42 - 24 մարտի, 2021

ԽՍՀՄ տարիների ենթակառուցվածքների վերականգնման մասին է խոսքը. Գրիգորյանը՝ ապաշրջափակման հարցով քննարկումների մասին |armenpress.am|

armenpress.am: ՀՀ փոխվարչապետ Մհեր Գրիգորյանը մանրամասներ հայտնեց տարածաշրջանում բոլոր տնտեսական և տրանսպորտային կապերն ապաշրջափակելու նպատակով՝ Հայաստանի, Ռուսաստանի և Ադրբեջանի փոխվարչապետերի նախագահությամբ ստեղծված աշխատանքային խմբի քննարկումների վերաբերյալ: Փոխվարչապետն այս մասին խոսեց ԱԺ-ում կառավարության անդամների հետ հարց ու պատասխանին՝ անդրադառնալով «Իմ քայլը»-ի պատգամավոր Վիկտոր Ենգիբարյանի հարցին:

Փոխվարչապետ Մհեր Գրիգորյանն ասաց. «Կարծում եմ, որ առաջընթաց ունենք: Բայց այս պահին դեռևս իրականացվում են փորձագիտական բնույթի աշխատանքներ, որոնք շատ կարևոր են հարցին ճիշտ լուծումներ տալու համար»:

Փոխվարչապետերի մակարդակով աշխատանքային խումբը մի քանի նիստ արդեն անցկացրել է: Գործում են նաև 2 ենթախմբեր, որոնցից մեկը փորձագիտական աշխատանքներ է իրականացնում՝ զուտ ենթակառուցվածքների տեխնիկական բնույթի հետ կապված, մյուսը՝ իրավական, անվտանգային, մաքսային, ֆիտոսանիտարական և այլ հարցերի հետ կապված: Գրիգորյանի խոսքով՝ պլանավորել էին մի զեկույց ունենալ մինչև մարտի 1-ը, բայց դա հնարավոր չեղավ, քանի որ աշխատանքներն ու քննարկումները ցույց են տվել, որ կա հավելյալ փորձագիտական աշխատանքների անհրաժեշտություն:

Ենգիբարյանը անդրադառնալով կոնկրետ քննարկումներին՝ հետաքրքրվեց, թե ինչ ենթակառուցվածքների մասին է խոսքը գնում:

Փոխվարչապետն արձագանքեց. «Հիմնականում քննարկվում են երկաթգիծ, ավտոճանապարհ»:

Նրա վստահեցմամբ՝ ավելի վաղ «Կոմերսանտ»-ում հրապարակված քարտեզի մասին չէ խոսքը: «Ըստ էության, սովետական ժամանակվա գործող ենթակառուցվածքների վերականգնման մասին է խոսքը՝ բոլոր հնարավոր ուղղություններով»,-ասաց Գրիգորյանը:


Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter

Կարդալ նաև


comment.count (0)

Մեկնաբանել