«Անկախ դիտորդ» դաշինքը նախընտրական քարոզչության ժամանակահատվածում քարոզչական պաստառի օգտագործման կարգի վերաբերյալ հայտարարություն է տարածել ֆեյսբուքյան էջում․
«Ահազանգ քարոզչական պաստառներ փակցնելու համար առանձնացված անվճար վահանակների տեղադրման հետ կապված։
Ստորև բերված նկարներում Անկախ Դաշինքի երկարաժամկետ դիտորդներն արձանագրել են Երևանում բազմաբնակարան շենքերի և հանրակրթական դպրոցների վրա պաստառների համար նախատեսված վահանակների փակցման բազմաթիվ դեպքեր, ինչը վկայում է օրենսգրքում եղած գերկարգավորման և բացերի շփոթեցնող ազդեցության մասին⁉️։
Նախընտրական քարոզչության ժամանակահատվածում քարոզչական պաստառի օգտագործման կարգի վերաբերյալ Ընտրական օրենսգրքի կարգավորումները (Հոդված 21, մաս 3) պարտավորեցնում են համայնքի ղեկավարին համայնքի տարածքում քարոզչական պաստառ, քարոզչական տպագիր և այլ նյութեր փակցնելու համար անվճար տեղեր առանձնացնել։
Միաժամանակ ընտրական օրեսնգիրքը սահմանում է, որ համայնքի ղեկավարը պարտավոր է համայնքի տարածքում առանձնացնել քարոզչական պաստառ, քարոզչական տպագիր և այլ նյութեր փակցնելու համար անվճար տեղեր, ինչից ուղղակիորեն բխում է, որ համայնքի ղեկավարի որոշմամբ առանձնացված տեղերը պետք է և կարող են լինել բացառապես համայնքին պատկանող տարածքներում և համայնքի օրինական օգտագործման տակ գտնվող գույքի վրա։
Ստացվում է, որ համայնքի ղեկավարը իրավասու չէ այլ անձանց պատկանող տարածքներում, բնակելի տների կամ բազմաբնակարան շենքերի վրա սահմանել քարոզչական պաստառ, քարոզչական տպագիր և այլ նյութեր փակցնելու համար անվճար տեղեր, այն հաշվառմամբ, որ դրանք ուղղակի համայնքապատկան չեն։
Հակառակ դեպքում ստացվում է, որ օրենսգիրքը արգելում է բազմաբնակարան շենքի վրա քարոզչական պաստառներ փակցնելը նույնիսկ ֆիզիկական անձանց թույլատվությամբ, բայց նույնիսկ բնակիչների անհամաձայնության դեպքում չի արգելում նույն գործողությունը, եթե պաստառի և բազմաբնակարան շենքի արանքում համայնքի ղեկավարի որոշմամբ տեղադրված է հատուկ վահանակ։
Հարկ է նշել, որ նույն հոդվածի 2-րդ մասում՝ ֆիզիկական անձանց համաձայնությամբ քարոզչական պաստառներ փակցնելու վերաբերյալ բացառություններն այնքան մանրամասն են, որ դառնում են անհարկի սահմանափակում։
Այնուամենայնիվ Երևան քաղաքում համայնքի ղեկավարի որոշմամբ առանձնացված տեղերի թվում բազմաթիվ են և բազմաբնակարան շենքերը, և հանրակրթական դպրոցներն ու դրանց հարակից տարածքները (հստակ չէ, թե արդյոք հարակից տարածք է օրինակ դպրոցի դարպասը)։
Դաշինքը հորդորում է Կենտրոնական Ընտրական Հանձնաժողովին և Երևանի քաղաքապետարանին վերանայել պաստառների տեղադրման վայրերը՝ ապահովելով օրենսգրքի պահանջների կատարումը։
Միաժամանակ Ընտրական օրենսգրքի հետագա փոփոխություններում անհրաժեշտ է քննարկել այնպիսի կարգավորումների սահմանումը, որոնք կօգնեն խուսափել արտահայտման ազատության անհարկի սահմանափակումներից»։
Հիշեցնենք, որ «Անկախ դիտորդ»-դաշինքը հավաքագրում է դիտորդներ և գործընկերներ, որոնք պատրաստ են համագործակցել կամավոր հիմունքներով սահմանադրական փոփոխությունների հանրաքվեին դիտորդություն անելու համար։
Մասնակցության հայտը՝ այստեղ։
comment.count (0)