Վլադիմիր Զելենսկի

Վլադիմիր Ալեքսանդրովիչ Զելենսկին Ուկրաինայի նախագահ, քաղաքական գործիչ, շոումեն, արտիստ, կատակերգու, «Թաղամաս-95» ստուդիայի գեղարվեստական ղեկավար և մշտական առաջնորդ, պրոդյուսեր և սցենարիստ:

Ծնվել է 1978 թվականի հունվարի 25-ին Կրիվոյ Ռոգ քաղաքում:

1998-2003 թվականներին «95-րդ թաղամասը» ելույթ է ունեցել ՈւՀԱ-ի բարձրագույն լիգայում։ Եղել է Ուկրաինայի Հանրապետության կառավարության անդամ և «Ինտեր» հեռուստաալիքի գլխավոր պրոդյուսեր

2019 թվականի հունվարի 21-ին «Ժողովրդի ծառա» կուսակցությունն առաջարկել է Վլադիմիր Զելենսկու թեկնածությունը որպես նախագահ։ Ուկրաինայի նախագահական ընտրությունների երկու փուլերի հաղթել է։

Առնվազն 25 զոհ՝ ուկրաինական երկաթուղային կայարանը հրետակոծելու հետևանքով |azatutyun.am|

azatutyun.am: Առնվազն 25 մարդ է զոհվել, ևս երեք տասնյակ վիրավորներ կան չորեքշաբթի երեկոյան ռուսական ուժերի կողմից Ուկրաինայի Դնեպրոպետրովսկի մարզի Չապլինո երկաթուղային կայարանը հրետակոծելու հետևանքով։ Ուկրաինայի նախագահի աշխատակազմի ղեկավարի տեղակալ Կիրիլ Տիմոշենկոն հայտնել է, որ զոհվածների թվում երկու երեխա կա։ Ուկրաինայի արտգործնախարար Դմիտրի Կուլեբան հրետակոծված վայրի լուսանկար է հրապարակել։ «Ռուս ահաբեկիչները շարունակում են սպանել Ուկրաինայի խաղաղ բնակիչներին», - Թվիթերում գրել է Կուլեբան։ Ուկրաինայի նախագահ Վլադիմիր Զելենսկին, տեսակապով ելույթ ունենալով ՄԱԿ-ի Անվտանգության խորհրդի նիստում, ասել է, որ այդ պահին ստացված տեղեկատվության համաձայն՝ մարդատար չորս վագոններում հրդեհ է բռնկվել։ «Ահա թե ինչպես է Ռուսաստանը պատրաստվում ՄԱԿ-ի Անվտանգության խորհրդի նիստին»,- ասել է Զելենսկին։

13:37 - 25 օգոստոսի, 2022

Զելենսկին ուկրաինացիներին շնորհավորել է Անկախության օրվա առիթով. մենք փոխըմբռնում չենք փնտրի ահաբեկիչների հետ |news.am|

news.am: Ուկրաինայի նախագահ Վլադիմիր Զելենսկին Անկախության օրվա առիթով դիմել է ուկրաինացիներին։ Պետության ղեկավարն ընդգծել է, որ Ուկրաինան ամբողջական եւ անբաժանելի է, նրա քաղաքացիները փոխըմբռնում չեն փնտրի ահաբեկիչների հետ, իսկ ձեռքերը կբարձրացնեն միայն մեկ անգամ՝ տոնելով հաղթանակը նվաճողների դեմ։ «Թշնամին մտածում էր. մենք կդիմավորենք իրեն ծաղիկներով եւ շամպայնով։ Դրա փոխարեն ստացավ ծաղկեպսակներ եւ Մոլոտովի կոկտեյլներ։ Օվացիա էր սպասում, բայց «պայթյուններ» է լսում։ Օկուպանտը հավատում էր, որ մի քանի օրում շքերթով կանցնի մեր մայրաքաղաքի կենտրոնով։ Այսօր Կրեշչատիկում կարելի է տեսնել այդ «շքերթը»։ Ապացույց, որ թշնամական տեխնիկան կարող է հայտնվել Կիեւի կենտրոնում միայն այդ տեսքով։ Այրված, խարխլված եւ ոչնչացված»,- ասել է պետության ղեկավարն Անկախության օրվա առիթով արված տեսաուղերձում։ «Ի՞նչն է մեզ համար պատերազմի ավարտը։ Առաջ ասում էինք՝ խաղաղությունը։ Հիմա ասում ենք՝ հաղթանակը»,- ասել է նախագահը։ Նրա խոսքով՝ ուկրաինացիներն ահաբեկիչների հետ փոխըմբռնում չեն փնտրի։ Չնայած «հասկանում ենք ռուսերեն, որը եկել եք պաշտպանելու։ Եվ սպանել եք հազարավոր մարդկանց, որոնք եկել եք ազատագրելու»։ «Եվ մեզ համար անհամեմատ ավելի հասկանալի ու մոտ է Ջոնսոնը, որը խոսում է անգլերեն, քան մարդասպանները, բռնարարներն ու մարոդյորները, որոնք խոսում են ռուսերեն։ Եվ մենք չենք նստում բանակցությունների սեղանի շուրջ վախից, ատրճանակը քունքին դրված վիճակում։ Մեզ համար ամենաահավորը երկաթն է, ոչ թե հրթիռները, ինքնաթիռները, այլ շղթաները։ Ոչ թե խրամատները, այլ շղթաները»,- ասել է նախագահը։ Նրա խոսքով՝ «մենք ձեռքներս կբարձրացնենք միայն մեկ անգամ՝ երբ նշենք մեր հաղթանակը։ Ամբողջ Ուկրաինայով։ Որովհետեւ մենք մեր հողերը եւ մեր մարդկանց չենք վաճառում։ Մեզ համար Ուկրաինան ամբողջ Ուկրաինան է։ Բոլոր 25 շրջանները, առանց զիջումների կամ փոխզիջումների։ Մենք չգիտենք այդ բառերը, դրանք վերացվել են հրթիռներով փետրվարի 24-ին»։ Նախագահը նաեւ դիմել է ռուսաստանցիներին։ Նա պահանջել է ազատել ուկրաինական հողերը, որպեսզի դադարեցվեն զինվորների մահերը։ «Չեք ուզում, որ ձեր զինվորները մահանա՞ն։ Ազատեք մեր հողերը։ Չեք ուզում, որ ձեր մայրերը լաց լինե՞ն։ Ազատեք մեր հողերը։ Ահա այսպես պարզ եւ հասկանալի են մեր պայմանները»,- ասել է նա։

13:45 - 24 օգոստոսի, 2022

Էրդողանը Զելենսկիին առաջարկել է Պուտինի հետ հանդիպում կազմակերպել |factor.am|

factor.am: Ռեջեփ Թայիփ Էրդողանը հայտարարել է, որ Լվովում կայացած բանակցությունների ընթացքում Վլադիմիր Զելենսկիին առաջարկել է Թուրքիայում հանդիպել Ռուսաստանի առաջնորդ Վլադիմիր Պուտինի հետ։ Այս մասին գրում է ՌԻԱ Նովոստին։ Թուրքիայի ղեկավարի խոսքով՝ հանդիպման հիմնական թեման եղել է հակամարտությունը, որը շարունակվում է փետրվարից։ «Մենք պարոն Զելենսկիի հետ քննարկել ենք մեր երկկողմ հարաբերությունների բոլոր ասպեկտները: Ես կրկնեցի, որ մեր համերաշխությունը և աջակցությունը Ուկրաինայի տարածքային ամբողջականությանն ու ինքնիշխանությանը կշարունակվի: Ինչպես ես ասել եմ պարոն Պուտինին Սոչի կատարած այցի ժամանակ՝ պարոն Զելենսկիին հիշեցրի, որ մենք կարող ենք կազմակերպել նրանց հանդիպումը»,- նշել է Էրդողանը: Նրա խոսքով՝ եռակողմ հանդիպման ընթացքում (Էրդողան, Զելենսկի և ՄԱԿ-ի գլխավոր քարտուղար Անտոնիո Գուտերեշ) քննարկվել են քայլեր, որոնք կարող են ձեռնարկվել ուկրաինական հացահատիկի արտահանումը դյուրացնելու համար։

16:30 - 19 օգոստոսի, 2022

«Զապորոժիեին հասցվող ցանկացած հնարավոր վնաս ինքնասպանություն է»․ ինչ են քննարկել ՄԱԿ-ի, Թուրքիայի ու Ուկրաինայի առաջնորդները

ՄԱԿ-ի գլխավոր քարտուղար Անտոնիո Գուտերեշը հայտարարել է, որ «խիստ անհանգստացած է» Ուկրաինայի հարավում գտնվող Զապորոժիե ատոմակայանի մոտ տեղի ունեցած մարտերի կապակցությամբ: Այս մասին նա ասել է Լվովում Ուկրաինայի նախագահ Վլադիմիր Զելենսկու և Թուրքիայի առաջնորդ Ռեջեփ Թայիփ Էրդողանի հետ հանդիպման ժամանակ, փոխանցում է BBC-ն։ «Զապորոժիեին հասցվող ցանկացած հնարավոր վնաս ինքնասպանություն է»,- նախազգուշացրել է Գուտերեշը: Սա նրա ու Զելենսկու առաջին հանդիպումն էր ապրիլյան հանդիպումից ի վեր, երբ այցի ընթացքում հրթիռակոծվել էր Կիևը։ Էրդողանը լրագրողների հետ զրույցում վերահաստատել է ՄԱԿ-ի գլխավոր քարտուղարի մտահոգությունները՝ ասելով, որ անհանգստացած է ատոմակայանում «հերթական չեռնոբիլյան» աղետի վտանգի առնչությամբ: Նշենք, որ վերջին շաբաթների ընթացքում ԱԷԿ-ի շրջակայքը, որը Ռուսաստանը գրավել էր մարտ ամսին, ենթարկվել է ծանր հրետակոծության․ Կիևը և Մոսկվան միմյանց են մեղադրում հարձակումների համար: Եռակողմ հանդիպումից առաջ Զելենսկին քննադատել է ռուսական «կանխամտածված» հարձակումները էլեկտրակայանի վրա։ Մոսկվան մեղադրվում է օբյեկտը ռազմական բազայի վերածելու մեջ․ երեք առաջնորդներն էլ ռուսական կողմին կոչ են արել հնարավորինս շուտ ապառազմականացնելու գոտին: Reuters-ի փոխանցմամբ հանդիպման ընթացքում կողմերը նաև քննարկել են պատերազմին վերջ տալու ուղիները։ Թուրքիայի նախագահ Թայիփ Էրդողանը ասել է, որ ինքը, Գուտերեշը և Զելենսկին քննարկել են, թե ինչպես կարող են օգտագործել վերջին դրական մթնոլորտը Ռուսաստանի հետ խաղաղ բանակցությունները վերսկսելու համար, որոնք տեղի են ունեցել մարտին Ստամբուլում։ Հիշեցնենք, որ ՄԱԿ-ի և Թուրքիայի միջնորդությամբ Ռուսաստանն ու Ուկրաինան հուլիսին համաձայնություն են ձեռք բերել, որով ՌԴ-ն վերացրել է ուկրաինական հացահատիկի արգելափակումը․ արտահանումը վերսկսվել է օգոստոսի սկզբին: «Անձամբ ես շարունակում եմ հավատալ, որ պատերազմն ի վերջո կավարտվի բանակցությունների սեղանի շուրջ։ Զելենսկին և Գուտերեշն էլ այս հարցում համակարծիք են»,- ասել է Էրդողանը։ Ռուսական կողմից հանդիպման վերբերյալ արձագանք դեռևս չկա։

10:45 - 19 օգոստոսի, 2022

Լվովում ավարտվել է Զելենսկու, Էրդողանի և Գուտերեշի եռակողմ հանդիպումը |1lurer.am|

1lurer.am: Լվովում ավարտվել է Ուկրաինայի նախագահ Վոլոդիմիր Զելենսկու, Թուրքիայի նախագահ Ռեջեփ Թայիփ Էրդողանի և ՄԱԿ-ի գլխավոր քարտուղար Անտոնիու Գուտերեշի հանդիպումը: Եռակողմ հանդիպումը տևել է մոտ 40 րոպե: Այն սկսվել էր Էրդողանի և Զելենսկու՝ երկու ժամ տևած բանակցություններից անմիջապես հետո: Ավելի վաղ ՄԱԿ-ի գլխավոր քարտուղարի ներկայացուցիչ Ստեֆան Դյուժարիկը նշել էր, որ Ուկրաինայի և Թուրքիայի ղեկավարների հետ Գուտերեշի հանդիպման հիմնական թեման կլինեն պարենի արտահանման վերաբերյալ համաձայնագրերի իրագործումը, ինչպես նաև Զապորոժիեի ԱԷԿ-ում տիրող իրավիճակը:

20:43 - 18 օգոստոսի, 2022

Զելենսկին ու Գուտերեշը քննարկել են Զապորոժիեի ատոմակայանի շուրջ իրավիճակը |1lurer.am|

1lurer.am: Ուկրաինայի նախագահ Վոլոդիմիր Զելենսկին հայտարարել է, որ Լվովում ՄԱԿ-ի գլխավոր քարտուղար Անտոնիու Գուտերեշի հետ հանդիպմանը քննարկել է Զապորոժիեի ատոմակայանի շուրջ ստեղծված իրավիճակը: «ՄԱԿ-ը պետք է ապահովի այդ ռազմավարական օբյեկտի անվտանգությունը»,- գրել է Զելենսկին Telegram-ի իր ալիքում՝ հավելելով, որ ԱԷԿ-ը պետք է ապառազմականացվի, և դրա տարածքից պետք է դուրս բերվեն ռուսական զորքերը: Զելենսկին ու Գուտերեշը պայմանավորվել են շարունակել համակարգումը հացահատիկային նախաձեռնության շուրջ։

19:28 - 18 օգոստոսի, 2022

Հռոմի պապն աջակցում է մեզ․ Վլադիմիր Զելենսկի |azatutyun.am|

azatutyun.am: Ուկրաինայի նախագահ Վլադիմիր Զելենսկին պնդում է, որ Կաթոլիկ եկեղեցու հովվապետ Ֆրանցիսկոսը աջակցում է Ռուսաստանի դեմ ուկրաինացիների պայքարին։ «Ես բանակցել եմ Հռոմի պապի հետ, երախտագիտություն եմ հայտնել նրան ուկրաինացիներին ցուցաբերած աջակցության համար։ Մենք քննարկել ենք, թե ինչ համատեղ ջանքեր կարող ենք ձեռնարկել մեր խաղաղությունը մեր երկիր վերադարձնելու համար։ Ես տեղեկացրել եմ հովվապետին ռազմաճակատում տիրող իրավիճակի, ինչպես նաև Ռուսաստանի կողմից ահաբեկչության ծավալների մեծացմանն ուղղված ջանքերի մասին։ Հռոմի պապը համաձայն էր ինձ հետ և իր աջակցությունը հայտնեց», - ուրբաթ երեկոյան հեռարձակված ամենօրյա ուղերձում ասում էր Վլադիմիր Զելենսկին։ Խոսելով ռուսաստանցիներին՝ ԵՄ մուտքի վիզաների տրամադրումն արգելելու հեռանկարի մասին՝ Զելենսկին գոհունակություն էր հայտնում, որ այդ գաղափարն արդեն իսկ քննարկվում է պաշտոնական մակարդակում։ Շարունակությունը՝ azatutyun․am կայքում

16:29 - 13 օգոստոսի, 2022

Վլադիմիր Զելենսկին Արևմուտքին կոչ է արել արգելել ռուսաստանցիների մուտքը |hetq.am|

hetq.am: Ուկրաինայի նախագահ Վլադիմիր Զելենսկին Արևմուտքի երկրներին կոչ է արել մուտքի արգելք սահմանել ռուսական քաղաքացիություն ունեցող բոլոր անձանց համար։ Այդ մասին նա հայտարարել է The Washington Post-ին տված հարցազրույցում։ «Այդ ժամանակ նրանք կհասկանան։ Նրանք կասեն. «Դա (պատերազմը) մեզ հետ որևէ կապ չունի։ Ողջ բնակչությունը չի կարող պատասխանատվություն կրել, այդպես չէ՞»։ Կարող է։ Բնակչությունն ընտրել է այդ կառավարությանը և չի պայքարում դրա դեմ, չի վիճում նրանց հետ, չի բղավում նրա վրա»,- հայտարարել է Զելենսկին։ Նրա կարծիքով՝ «ամենակարևոր պատժամիջոցը սահմանների փակումն է, որովհետև ռուսաստանցիները խլում են օտար հողը»։ Զելենսկին նշել է, որ դա այն քիչ թվով միջոցներից մեկն է Ռուսաստանին կանգնեցնելու Ուկրաինայի տարածքի հետագա բռնազավթումից։ Զելենսկին նաև հայտարարել է, որ ռուսաստանցիները պետք է «ապրեն իրենց աշխարհում, քանի դեռ չեն փոխել իրենց փիլիսոփայությունը»։ Ուկրաինայի նախագահը պնդում է, որ Ռուսաստանի դեմ սահմանված պատժամիջոցները թույլ են՝ ի համեմատ մեկ տարով ՌԴ քաղաքացիների համար սահմանների փակման և ռուսական էներգակիրների գնման ամբողջական էմբարգոյի։ The Washington Post-ը գրում է՝ որոշ քննադատներ պնդում են, որ բոլոր ռուսաստանցիների համար մուտքի արգելքը անարդար է բոլոր այն անձանց նկատմամբ, որոնք լքել են Ռուսաստանը՝ Պուտինի վարչակարգի և Ուկրաինայի վրա հարձակման նրա որոշման հետ անհամաձայնության պատճառով։ «Միթե՞ դու չես ուզում այդ մեկուսացումը։ Դու ողջ աշխարհին ասում ես, որ նա պետք է ապրի քո կանոններով։ Այդ դեպքում գնա և ապրիր այնտեղ։ Դա միակ տարբերակն է ազդելու Պուտինի վրա»,- Ռուսաստանի քաղաքացիներին դիմելով՝ ասել է Ուկրաինայի նախագահը։ Վլադիմիր Զելենսկին Արևմուտքին կոչ է անում նոր պատժամիջոցներ սահմանել այն ֆոնին, երբ ռուսական իշխանությունների կողմից Զապորոժյեի «ղեկավար» նշանակված Եվգենի Բալիցկին հրամանագիր էր ստորագրել մարզի Ռուսաստանին «վերամիավորման» հանրաքվե անցկացնելու մասին։ Հանրաքվեի կոնկրետ օր, սակայն, չէր նշվել։

16:18 - 10 օգոստոսի, 2022

Ուկրաինան պետք է վերադարձնի այն ամենը, ինչ Ռուսաստանը ժամանակավորապես զավթել է. Զելենսկին դեմ է սառեցված հակամարտությանը |tert.am|

tert.am: Պատերազմից հետո Ուկրաինան պետք է վերականգնի այն ամենը, ինչ Ռուսաստանը ժամանակավորապես գրավել է: Բացի այդ, Ռուսաստանը պետք է պատժվի իր հանցագործությունների համար։ Այս մասին հայտարարել է Ուկրաինայի նախագահ Վլադիմիր Զելենսկին ժողովրդին ուղղված իր երեկոյան ուղերձում, գրում է dw.com-ը։«Ուկրաինայի դեմ ռուսական պատերազմից հետո չպետք է մնա հալվող կամ սառեցված հակամարտություն: Ուկրաինան պետք է վերադարձնի այն ամենը, ինչ Ռուսաստանը ժամանակավորապես զավթել է, իսկ ագրեսոր երկիրը պետք է պատժվի հանցագործությունների համար», - իր ուղերձում ընդգծել է Զելենսկին։Նրա խոսքով, «միայն ագրեսորի ակնհայտ պարտությունը, նրա զավթածի ակնհայտ կորուստը և արածի համար նրա միջազգային իրավական պատասխանատվությունը» կարող են կանխել նոր պատերազմը։

09:46 - 09 օգոստոսի, 2022

Էրդողանը Պուտինին ու Զելենսկիին երկխոսելու նպատակով կրկին հրավիրել է Թուրքիա |armenpress.am|

armenpress.am: Թուրքիայի նախագահ Ռեջեփ Թայիփ Էրդողանը հայտնել է, որ Սոչիում Ռուսաստանի նախագահ Վլադիմիր Պուտինի հետ հանդիպմանը նրան կրկին առաջարկել է Թուրքիայում հանդիպել Ուկրաինայի նախագահ Վլադիմիր Զելենսկիի հետ: Այս մասին հայտնում է TRT Haber-ը: «Ի սկզբանե ասել եմ, որ Ուկրաինայի պատերազմից շահող կողմ չի լինելու: Չնայած տեղում առկա դժվարություններին, ես նաև վստահորեն հավատում եմ, որ ճգնաժամը կարգավորվելու է բանակցությունների սեղանի շուրջ: Եվս մեկ անգամ հիշեցրի Պուտինին, որ մենք կարող ենք ընդունել նրա ու Զելենսկիի հանդիպումը»,- օդանավում լրագրողների հետ զրույցում հայտնել է Էրդողանը: Նա տեղեկացրել է, որ շարունակելու են զարգացնել երկխոսությունը Ռուսաստանի հետ բոլոր ոլորտներում՝ «հանուն տարածաշրջանային ու գլոբալ խաղաղության»:

15:07 - 06 օգոստոսի, 2022

Ուկրաինան պատրաստ է սկսել հացահատիկի առաքումները. Զելենսկի |azatutyun.am|

azatutyun.am: Վլադիմիր Զելենսկին հայտարարում է՝ Ուկրաինան պատրաստ է սկսել հացահատիկի առաքումները։ «Մենք պատրաստ ենք ուկրաինական հացահատիկի առաքումներին։ Մեզ համար կարևոր է մնալ համաշխարհային պարենային անվտանգության երաշխավոր։ Մինչ ինչ-որ մեկը Սև ծովն արգելափակելով այլ պետություններից կյանքեր է խլում, մենք ապրելու հնարավորություն ենք տալիս», - Օդեսայի նավահանգիստ այցելության ընթացքում հայտարարել է Ուկրաինայի նախագահը: «Հենց թուրքական կողմը և ՄԱԿ-ը ազդանշան տան, որ պատրաստ են ընդունել բեռները, ամեն ինչ կսկսվի։ Կարծում՝ եմ այսօր-վաղը կսկսվի», - ասել է Զելենսկին: Մեկ շաբաթ առաջ Կիևն ու Մոսկվան համաձայնագիր են ստորագրել սևծովյան նավահանգիստներում արգելափակված ուկրաինական հացահատիկի անվտանգ դուրսբերման վերաբերյալ: Գործարքի համաձայն, ուկրաինական հացահատիկն արտահանվելու է Սև ծովով երեք՝ Օդեսայի, Չերնոմորսկի և Յուժնիյ նավահանգիստներից, նավերն անցնելու են նախապես համաձայնեցված անվտանգ միջանցքներով: Նավահանգիստներում հացահատիկի բեռնմանը կհետևեն ՄԱԿ-ի, Թուրքիայի և Ուկրաինայի ներկայացուցիչները։

16:13 - 29 հուլիսի, 2022

Ավստրիայի, Սլովակիայի եւ Չեխիայի ԱԳՆ ղեկավարները չհայտարարված այցով ժամանել են Կիեւ |armenpress.am|

armenpress.am: Ավստրիայի արտաքին գործերի նախարար Ալեքսանդեր Շալենբերգը նախապես չհայտարարված այցով ժամանել է Կիեւ, որտեղ կհանդիպի Ուկրաինայի նախագահ Վլադիմիր Զելենսկիի հետ: Հուլիսի 20-ն այդ մասին հայտնել է Puls 24 հեռուստաալիքը։ Հեռուստաաալքի տվյալներով՝ Շալենբերգի հետ Ուկրաինա են ժամանել Սլովակիայի արտաքին գործերի նախարար Իվան Կորոչոկը եւ Չեխիայի արտաքին գործերի նախարարության ղեկավար Յան Լիպավսկին: Նախարարների ծրագրում նշված է հանդիպում Ուկրաինայի վարչապետ Դենիս Շմիգալի եւ Ուկրաինայի ԱԳՆ ղեկավար Դմիտրի Կուլեբայի հետ: Այլ տեղեկատվություն հեռուստաալիքը չի հայտնել, հաղորդել է ՏԱՍՍ-ը:

12:35 - 20 հուլիսի, 2022

Զելենսկին գնահատել է Բելառուսի՝ ուկրաինական կոնֆլիկտում ներքաշվելու հավանականությունը |armenpress.am|

armenpress.am: Ուկրաինայի նախագահ Վլադիմիր Զելենսկին հույս է հայտնել, որ Բելառուսը չի դառնա ուկրաինական հակամարտության կողմ, սակայն խոստովանում է, որ այդ երկրին կարող են ներքաշվել դրա մեջ։ Այս մասին Զելենսկին ասել է «The Economist»-ի կառավարական կլոր սեղանի առցանց ելույթի ժամանակ։ «Մենք կարծում ենք, որ Բելառուսը չի խառնվի այս պատերազմին, բայց սադրանքներ կան ու կլինեն։ Բելառուսը ներքաշվելու սպառնալիքի տակ է»,- ասել է Զելենսկին՝ ընդգծելով, որ Կիևը պատրաստվում է իրադարձությունների նման զարգացման։ Ավելի վաղ Բելառուսի նախագահ Ալեքսանդր Լուկաշենկոն հայտարարել էր, որ իր ռուս գործընկեր Վլադիմիր Պուտինը երբեք իրեն չի խնդրել մասնակցել Ուկրաինայում ռազմական գործողություններին։

15:46 - 05 հուլիսի, 2022

Վաղը նորություններ կլինեն. Ուկրաինայի եվրաինտեգրումը հնարավոր չէ կանգնեցնել. Զելենսկի |tert.am|

tert.am: Առաջիկայում պետք է «նորություններ» սպասել Եվրամիությանը Ուկրաինայի անդամակցության բանակցությունների թեմայով։ Այս մասին հինգշաբթի՝ հունիսի 30-ին, իր տեսաուղերձում հայտնել է Ուկրաինայի նախագահ Վլադիմիր Զելենսկին։«Մեր առաջնահերթությունը, սա կլինի մեր պետության բոլոր ներկայացուցիչների առաջադրանքը. ամեն ինչ պետք է արվի որքան հնարավոր է շուտ, որպեսզի նախապատրաստվի անդամակցության շուրջ բանակցությունների մեկնարկը: Պաշտոնյաները, պատգամավորները, դիվանագետները պետք է աշխատեն այդ հարցի շուրջ օրը 24 ժամ, յոթ օր: Ի դեպ, վաղը նորություններ կլինեն այս թեմայով, ուկրաինական եվրաինտեգրումը հնարավոր չէ կանգնեցնել»,- ասել է նա։

10:20 - 01 հուլիսի, 2022

Զելենսկին ՆԱՏՕ-ին կոչ է արել ավելի շատ զենք տրամադրել Ուկրաինային

Ուկրաինայի նախագահ Վլադիմիր Զելենսկին դիմել է ՆԱՏՕ-ի անդամ երկրներին, որոնց ղեկավարները Մադրիդում մասնակցում են դաշինքի գագաթնաժողովին՝ կոչ անելով օգնել «դադարեցնել ուկրաինական խաղաղ քաղաքների դեմ Ռուսաստանի տեռորը» և Ուկրաինայի համար «տեղ գտնել» անվտանգության ընդհանուր տարածքում, հայտնում է «Ուկրաինսկայա պրավդա»-ն։ Իր ելույթում Զելենսկին նշել է, որ պատերազմը չպետք է ձգձգվի, այդ պատճառով էլ Ուկրաինային անհրաժեշտ է ավելի շատ զենք, մասնավորապես՝ ժամանակակից հրետանային միջոցներ տրամադրել։ Ուկրաինային նախագահը կոչ է արել նաև օգնել իր երկրին ոչ միայն զենքով, այլև ֆինանսական միջոցներով և պատժամիջոցներով՝ «Ռուսաստանի դեմ այնպիսի պատժամիջոցներով, որոնք վերջ կդնեն պատերազմը ֆինանսավորելու նրա ընդունակությանը»։ Նորա Վանյան

15:52 - 29 հունիսի, 2022

ՄԱԿ-ի ԱԽ վեց երկրներ դատապարտել են ՌԴ-ի հրթիռային հարվածները Ուկրաինայում քաղաքացիական օբյեկտներին․ Կիևը պահանջել է Մոսկվային հեռացնել կազմակերպությունից |factor.am|

factor.am: ՄԱԿ-ի Անվտանգության խորհրդի անդամ վեց երկրները, ինչպես նաև Ուկրաինայի մշտական ներկայացուցիչը համատեղ հայտարարություն են տարածել, որում «խստորեն դատապարտում են 2022 թվականի հունիսի 25-27-ն ընկած ժամանակահատվածում Ուկրաինայի տարածքում ռուսական հրթիռային հարվածների ուժեղացումը՝ ուղղված բնակելի տարածքներին և քաղաքացիական ենթակառուցվածքներին», փոխանցում է DW-ի ռուսական ծառայությունը։ Հունիսի 28-ին Անվտանգության խորհրդի արտահերթ նիստի մեկնարկից առաջ հրապարակված փաստաթղթում Ֆրանսիան, Իռլանդիան, Նորվեգիան, Մեծ Բրիտանիան, ԱՄՆ-ը և Ալբանիան Ռուսաստանից պահանջում են անհապաղ դադարեցնել ռազմական գործողությունները և դուրս բերել զորքերն Ուկրաինայից։ Ուկրաինայի նախագահ Վլադիմիր Զելենսկին տեսակապով դիմել է Անվտանգության խորհրդի նիստի մասնակիցներին, որը հրավիրվել էր հունիսի 27-ին Կրեմենչուկի առևտրի կենտրոնի վրա ռուսական կողմի հրթիռային հարձակման կապակցությամբ։ Մեղադրելով Ռուսաստանին «ամենօրյա հարձակումներ» իրականացնող «ահաբեկչական պետություն» դառնալու մեջ՝ նա կոչ է արել հեռացնել Մոսկվային ՄԱԿ-ից։ Կոչ անելով Ռուսաստանին հեռացնել ՄԱԿ-ից՝ Զելենսկին վկայակոչել է ՄԱԿ-ի կանոնադրության 6-րդ հոդվածը, որտեղ ասվում է, որ կազմակերպության անդամը, որը համառորեն խախտում է սույն կանոնադրության սկզբունքները, կարող է Գլխավոր վեհաժողովի կողմից հեռացվել կազմակերպությունից՝ Անվտանգության խորհրդի երաշխավորմամբ։ Ռուսաստանին բացառելը, սակայն, գրեթե անհնար է, քանի որ նա, որպես Անվտանգության խորհրդի մշտական անդամ, կկարողանա օգտագործել իր վետոյի իրավունքը՝ արգելափակելու նրան բացառելու ցանկացած փորձ։

10:55 - 29 հունիսի, 2022