Իրան

Իրանի Իսլամական Հանրապետությունն ինքնիշխան պետություն է Արևմտյան Ասիայում: Ավելի քան 83 միլիոն բնակչությամբ։ Իրանը աշխարհում բնակչության թվով 18-րդն է: 1.648.195 կմ քառակուսի տարածքով այն երկրորդ ամենախոշոր երկիրն է Մերձավոր Արևելքում և 17-րդը` աշխարհում: Իրանը հյուսիս արևմուտքում սահմանակից է Հայաստանին, Արցախին, Ադրբեջանին և Ադրբեջանի մաս կազմող Նախիջևանին, հյուսիսում Կասպից ծովին, հյուսիս արևելքում Թուրքմենստանին, արևելքում Աֆղանստանին և Պակիստանին, հարավում Պարսից ծոցին և Օմանի ծոցին, արևմուտքում Թուրքիային և Իրաքին :

Երկրի մայրաքաղաքը և խոշորագույն քաղաքը Թեհրանն է, որը համարվում է նաև երկրի մշակութային և տնտեսական կենտրոնը: Երկրի նախագահը Հասան Ռոհանին է, հոգևոր առաջնորդը Այաթոլլա Ալի Խամենեին է։

Շուրջ 365 կգ հերոինը Իրանից ՀՀ տարածքով նախատեսված էր տեղափոխել Արևմտյան Եվրոպա․ տարբեր երկրների քաղաքացիություններ ունեցող 6 անձ ձերբակալվել է․ ՊԵԿ

Պետական եկամուտների կոմիտեի մաքսանենգության դեմ պայքարի վարչության աշխատակիցները բացահայտել են թմրանյութի տեղափոխման բացառիկ դեպք: Այս մասին հայտնում են ՊԵԿ-ից։Երևանի մաքսային պահեստներից մեկում կատարված մաքսային հսկողության արդյունքում որպես խմորիչ հայտարարագրված 18600 կգ բեռի կազմում հայտնաբերվել է հերոինի առանձնապես խոշոր խմբաքանակ` 33 արկղ։ Փաթեթավորման հետ միասին շուրջ 365 կիլոգրամ կշռող հերոինի շուկայական արժեքը մոտ 45 մլն ԱՄՆ դոլար է: Սա 2014 թվականից հետո Հայաստանի իրավապահ մարմինների հայտնաբերած խոշորագույն դեպքն է, որն իր բնույթով աննախադեպ է ամբողջ տարածաշրջանում: Խմորիչի փաթեթավորմամբ հերոինն Իրանի Իսլամական Հանրապետությունից Հայաստանի տարածքով նախատեսված էր տեղափոխել Արևմտյան Եվրոպա: Հանցավոր սխեման բացահայտվել է լայնածավալ և բազմակողմանի վերլուծական աշխատանքների ու համալիր օպերատիվ-հետախուզական միջոցառումների արդյունքում: Ապօրինի թմրաշրջանառության դեմ պայքարում իրենց դերն են կատարում ՊԵԿ շնագիտական կենտրոնի կինոլոգներն ու ծառայողական շները, ովքեր նույնպես ներգրավվել են այս խոշոր դեպքի բացահայտման աշխատանքներում: Օպերատիվ-հետախուզական միջոցառումների անցկացման փուլում ակտիվ մասնակցություն են ունեցել նաև ՀՀ ոստիկանության և Ազգային անվտանգության ծառայության աշխատակիցները: Դեպքի առթիվ ՊԵԿ քննչական վարչությունում հարուցվել է քրեական գործ` ՀՀ քրեական օրենսգրքի 267.1 և 266 հոդվածների հատկանիշներով: Տարբեր քաղաքացիություններ ունեցող 6 անձ ձերբակալվել է։ ԱԱԾ հետ լայնածավալ օպերատիվ-հետախուզական միջոցառումների անցկացումը շարունակվում է` գործի հետ առնչություն ունեցող հնարավոր այլ անձանց շրջանակը պարզելու նպատակով: ՊԵԿ մաքսանենգության դեմ պայքարի վարչությունը հորդորում է քաղաքացիներին զերծ մնալ թմրանյութի տեղափոխման հանցավոր սխեմաներ կազմելուց և զգուշացնում` վարչությունը շուրջօրյա պայքարում է միջազգային ապօրինի թմրաշրջանառության դեմ` միշտ մեկ քայլ առաջ լինելով իրավախախտներից:

13:51 - 03 մարտի, 2021

ԱՄՆ-ն դեռ պատրաստ է հանդիպել Իրանի հետ և բանակցությունների ձևաչափի վերաբերյալ պայմաններ չի սահմանում․ Պետդեպ |tert.am|

tert.am: Միացյալ Նահանգները դեռ պատրաստ է հանդիպել Իրանի հետ, բայց չգիտի՝ ինչ պայմաններում պետք է անցկացվի հանդիպումը, երբ Թեհրանը մերժել է ԵՄ-ի համապատասխան առաջարկը: Այս մասին նախօրեին ճեպազրույցի ժամանակ հայտարարել է Պետդեպարտամենտի մամուլի ծառայության ղեկավար Նեդ Փրայսը։«Ինչպես առաջ, այնպես էլ հիմա պատրաստ ենք մասնակցել կառուցողական դիվանագիտությանը՝ միջուկային գործարքի պահանջների պահպանմանը փոխադարձ վերադարձի հասնելու համար»,- նշել է դիվանագետը։Փրայսի խոսքով՝ ԱՄՆ-ի վերադարձը գործարքին «չի կարող կայանալ առանց բոլոր կողմերի միջև մանրամասների քննարկման»:Նա նաև հավելել է, որ ԱՄՆ-ն «պատրաստ է հանդիպել Իրանի հետ»՝ Թեհրանի միջուկային ծրագրի շուրջ Գործողությունների համատեղ համապարփակ ծրագիրը քննարկելու համար՝ նշելով, որ «բանակցությունների ձևաչափի վերաբերյալ ԱՄՆ-ն պայմաններ չի սահմանում»։

10:12 - 02 մարտի, 2021

Թեհրանը մերժել է ԱՄՆ ներկայացուցիչների հետ միջուկային գործարքի հարցով քննարկում անցկացնելու ԵՄ առաջարկը |azatutyun.am|

azatutyun.am: Թեհրանը մերժել է Միացյալ Նահանգների ներկայացուցիչների հետ միջուկային գործարքի պայմանների հարցով ոչ պաշտոնական քննարկում անցկացնելու Եվրամիության առաջարկը: Այս մասին ասվում է Իրանի արտգործնախարարության տարածած հայտարարությունում։ Իրանի դիվանագիտական գերատեսչությունը պնդում է, որ Միացյալ Նահանգների նորընտիր նախագահ Ջո Բայդենը շարունակում է իր նախորդի քաղաքականությունը՝ գործադրելով Թեհրանի վրա առավելագույն ճնշում։ Սպիտակ տնից հայտարարել են, թե հիասթափված են Իրանի պատասխանից, միևնույն ժամանակ շեշտելով, որ շարունակում են դիվանագիտական ուղիներ փնտրել միջուկային գործարքի պայմանների պահպանմանը վերադառնալու ուղղությամբ։ Անցած փետրվարին Բրյուսելը Վաշինգտոնին և Թեհրանին առաջարկել է հանդիպել և քննարկել միջուկային գործարքը, որին Միացյալ Նահանգները Դոնալդ Թրամփի միակողմանի որոշմամբ այլևս մաս չի կազմում։ Խզելով Իրանի և գերտերությունների միջև կնքված պատմական համաձայնագիրը՝ Թրամփի վարչակազմը «նոր թափով վերականգնել» էր Թեհրանի դեմ սառեցված պատժամիջոցները, ինչպես նաև սպառնալով պատժել այն երկրներին և ընկերություններին, որոնք տնտեսական համագործակցություն կծավալեն Թեհրանի հետ:

14:25 - 01 մարտի, 2021

Թուրքիան ԱԳՆ է կանչել Իրանի դեսպանին՝ պաշտոնական բողոք արտահայտելու |azatutyun.am|

azatutyun.am: Թուրքիան Արտգործնախարարություն է կանչել Իրանի դեսպան Մոհամա Ֆերազմենդին՝ Անկարայի պաշտոնական բողոքն արտահայտելու։ Երկու երկրների հարաբերությունները սրվել են, երբ նախօրեին Իրաքում Իրանի դեսպան Իրաջ Մասջեդին դատապարտել է թուրքական բանակի ներխուժումը Իրաքի հյուսիսային շրջաններ և պնդել, թե Անկարան ոտնահարում է Իրաքի տարածքային ամբողջականությունը։ Իրանի դեսպանը նաև ասել էր, որ Թեհրանը կոչ է անում Թուրքիային դուրս բերել իր զորքերն Իրաքից և հարգել միջազգայնորեն ճանաչված սահմանները։ Ի պատասխան, «Անադոլու» գործակալության հաղորդմամբ, թուրք պաշտոնյաները ընդգծել են՝ Անկարան Թեհրանից աջակցություն է ակնկալում ահաբեկչության դեմ պայքարում և ոչ թե դիմակայություն։ Թուրքիայի զինուժը պնդում է, թե Իրաքի հյուսիսում ամրացած քուրդ գրոհայինները սպառնում են Թուրքիայի անվտանգությանն ու կայունությանը։

19:20 - 28 փետրվարի, 2021

Իրանի ԱԳՆ-ն Հայաստանում բոլոր կողմերին զսպվածության կոչ է արել |armeniasputnik.am|

armeniasputnik.am: Իրանի ԱԳՆ պաշտոնական ներկայացուցիչը հայտարարել է, որ Իրանում ուշադիր հետևում են Հայաստանում իրադարձությունների զարգացմանը։ Պաշտոնական Թեհրանը Հայաստանում բոլոր կողմերին կոչ է անում զերծ մնալ բռնությունից և զսպվածություն դրսևորել։ Նման հայտարարությամբ հանդես է եկել Իրանի ԱԳՆ պաշտոնական ներկայացուցիչ Սաիդ Հաթիբձադեն։ «Իրանի ԱԳՆ ներկայացուցիչը Հայաստանում բոլոր կողմերին զսպվածության և բռնությունից խուսափելու կոչ է արել», – ասվում է Իրանի ԱԳՆ մամուլի ծառայության հաղորդագրության մեջ։

22:00 - 25 փետրվարի, 2021

Իրանը փոխհատուցում է պահանջում ԱՄՆ-ից՝ միջուկային համաձայնագիրը միակողմանիորեն լքելու համար |azatutyun.am|

azatutyun.am: Պաշտոնական Թեհրանը մեկ անգամ ևս պնդում է, որ 2015 թվականին կնքված միջուկային համաձայնագիրը կարող է վերագործարկվել միայն Վաշինգտոնի կողմից սահմանված պատժամիջոցների վերացումից հետո։ «Մեղավոր կողմը պետք է վերադառնա բանակցությունների սեղանի շուրջ, վերսկսի գործընթացը և փոխհատուցի հասցված վնասը», - ՄԱԿ-ի հովանու ներքո Վիեննայում ընթացող Զինաթափման համաժողովի ընթացքում այսօր հայտարարել է Իրանի դեսպան Իսմայիլ Բաղեի Համանեն։ Իրանցի դիվանագետի խոսքով` Վաշինգտոնը նաև պետք է պարտավորվի, որ հետագայում այլևս միակողմանիորեն չի լքի Իրանի հետ կնքված միջազգային համաձայնագրերը։

20:33 - 24 փետրվարի, 2021

Օդանավում ուղևորներ չեն եղել, օդաչուները եղել են օտարերկրյա քաղաքացիներ. Քաղավիացիայի կոմիտեն հայտնում է նոր մանրամասներ

Հայաստանի Հանրապետության քաղաքացիական ավիացիայի կոմիտեն նոր մանրամասներ է ներկայացրել հայկական գրանցմամբ օդանավի առևանգման մասին լուրերի վերաբերյալ: ՀՀ քաղաքացիական ավիացիայի կոմիտեի հաղորդագրությունը՝ ստորև. «Հարգելի քաղաքացիներ, հաշվի առնելով հանրության մոտ առաջացած մի շարք հարցերը, Քաղաքացիական ավիացիայի կոմիտեն հայտնում է, որ նշված օդանավում ուղևորներ չեն եղել, իսկ օդաչուներն եղել են օտարերկրյա քաղաքացիներ: Թռիչքը կրել է տեխնիկական բնույթ, վայրէջքի մասին տեղեկատվությունը քննության փուլում է: Չարտոնված թռիչքուղու և չարտոնված վայրէջքի վերաբերյալ Կոմիտեում ընթանում է քննություն: Ելնելով քննության շահերից՝ Կոմիտեն կտեղեկացնի վերջնական արդյունքների մասին, քննության ավարտից հետո»,- ասված է հաղորդագրության մեջ:

16:19 - 23 փետրվարի, 2021

ԱՄՆ-ն չի կարող մասնակցել իրանական միջուկային ծրագրի հարցով բանակցություններին, քանի դեռ չի վերացրել պատժամիջոցները. Իրանի ԱԳՆ |tert.am|

tert.am: ԱՄՆ-ն իրավունք չունի ներկա լինել իրանական միջուկային ծրագրի մասնակիցների բանակցություններին, քանի դեռ չի չեղարկել Իրանի դեմ սահմանված պատժամիջոցները: ТАСС գործակալության փոխանցմամբ՝ այս մասին երկուշաբթի կայացած ասուլիսում հայտարարել է Իրանի ԱԳՆ պաշտոնական ներկայացուցիչ Սաիդ Ղաթիբզադեն:«Ներկա պահին ԱՄՆ-ն միջուկային գործարքի մասնակից չի հանդիսանում, որպեսզի մասնակցի Գործողությունների համատեղ համապարփակ ծրագրի հարցով նիստերին»,- ասել է դիվանագետը՝ հավելելով, որ քանի դեռ ԱՄՆ-ն չի վերացրել պատժամիջոցները, չի կարող ներկա գտնվել միջուկային գործարքի հարցով բանակցություններին:

14:49 - 22 փետրվարի, 2021

ԱՄՆ-ը չի կարող ներկա լինել ԳՀՀՊ-ի շուրջը բանակցություններին, մինչեւ չչեղարկի պատժամիջոցները. Իրանի ԱԳՆ |armenpress.am|

armenpress.am: ԱՄՆ-ն իրավունք չունի ներկա լինելու միջուկային գործարքի շուրջը համաձայնագրի մասնակիցների բանակացություններին, մինչեւ չչեղակի Իրանի նկատմամբ պատժամիջոցները: Փետրվարի 22-ին կայացած մամուլի ասուլիսում այդ մասին հայտարարել Է Իրանի արտգործնախարարության պաշտոնական ներկայացուցիչ Սայիդ Խաթիբզադեն: «Այս պահին ԱՄՆ-ը միջուկային գործարքի մասնակց չԷ, որպեսզի մասնակցի Գործողությունների համատեղ համապարփակ պլանի շուրջը նիստերին (ԳՀՀՊ)»,- ասել Է նա: Դիվանագետը հավելել Է, որ «մինչեւ ԱՄՆ-ը չվերացնի (Թեհրանի նկատմամբ) պատժամիջոցները, չի կարող ներկա լիենլ միջուկային գործարքի շուրջը բանակցություններին»: Փետրվարի 18-ին Պետդեպարտամենտի մամուլի ծառայության ղեկավար Նեդ Փրայսը հայտարարել Էր, թե Միացյալ Նահանգները պատրաստ Է Եվրամիության հրավերով մասնակցելու Իրանի եւ «5 + 1» ձեւաչափի մյուս մասնակիցների հետ (Ռուսաստան, Մեծ Բրիտանիա, Չինաստան, Ֆրանսիա, եւ Գերմանիա) իրանական միջուկային ծրագրի շուրջը բանակցություններին:

13:02 - 22 փետրվարի, 2021

Իրանի և ՄԱԳԱՏԷ-ի հայտարարությունը՝ միջուկային համալիրներում ստուգումների կապակցությամբ |1lurer.am|

1lurer.am: ՄԱԳԱՏԷ-ի գլխավոր քարտուղարի՝ Թեհրան կատարած այցի ավարտին կողմերը հրապարակել են համատեղ հայտարարություն՝ Իրանի միջուկային համալիրներում գործակալության տեսուչների ստուգումներ իրականացնելու գործընթացի վերաբերյալ: Այդ մասին հայտնել է Pars Today-ը: Գործակալության կայքում հրապարակված հայտարարության մեջ ասվում է, որ ՄԱԳԱՏԷ-ն և Իրանի միջուկային էներգիայի կազմակերպությունը վերահաստատել են հարաբերություններում փոխվստահության առկայությունը, որի հիման վրա 2020 թ. օգոստոսի 26-ին հրապարակվել էր համատեղ հայտարարություն: Իրանի և ՄԱԳԱՏԷ-ի համատեղ հայտարարության մեջ ասվում է. «Իսլամական խորհրդարանում ընդունված՝ «Պատժամիջոցների չեղարկման» մասին օրենքի իրագործման շրջանակներում ԻԻՀ կառավարությունը ՄԱԳԱՏԷ-ին տեղեկացրել է, որ 2021 թ. փետրվարի 23-ից դադարեցնում է ՀԳՀԾ-ի շրջանակներում կամավոր գործողությունների իրականացումը»: Հայտարարության մեջ ասված է, որ Իրանը, ինչպես նախկինում, շարունակելու է Երաշխիքային համաձայնագրի գործադրումն առանց սահմանափակումների: Կողմերի միջև ստորագրվել է տեխնիկական համաձայնագիր, որը գործակալությանը հնարավորություն է տալիս ևս երեք ամիս շարունակել մոնիտորինգը (համաձայն կցված տեխնիկական ցուցակի): 2020 թ. դեկտեմբերի 1-ին Իրանի իսլամական խորհրդարանը հաստատեց «Պատժամիջոցների չեղարկման մասին» օրենքը, որը կառավարությանը պարտավորեցնում է օրենքի հաստատումից հետո երկու ամսվա ընթացքում, ՀԳՀԾ-ի 26 և 36 կետերի համաձայն, դադարեցնել Լրացուցիչ արձանագրությունների գործադրումը:

10:57 - 22 փետրվարի, 2021

Բայդենը չի փոխել քաղաքականությունը Իրանի նկատմամբ. Զարիֆ |tert.am|

tert.am: ԱՄՆ նախագահ Ջո Բայդենը չի փոխել իր նախորդի քաղաքականությունը Թեհրանի նկատմամբ: Այս մասին հայտարարել է Իրանի արտգործնախարար Մոհամադ Ջավադ Զարիֆը, գրում է «ՌԻԱ Նովոստի» գործակալությունը: «Ոչինչ չի փոխվել: Բայդենն ասում է, որ Թրամփի առավելագույն ճնշման քաղաքականությունը պարզվել է, որ առավելագույն ձախողման քաղաքականություն է: Սակայն նրանք չեն փոխել իրենց քաղաքականությունը: Խնդիրն այն է, որ ԱՄՆ-ն կախվածություն ունի պատժամիջոցներից»,-ասել է Զարիֆը: «Մեզ գործողություններ են պետք, ոչ թե խոստումներ: Մենք ուզում ենք վարքի փոփոխություն տեսնել, որպեսզի Դոնալդ Թրամփի օրոք սկսված ապօրինությունները չկրկնվեն»,-հավելել է նախարարը: Ըստ նրա, «բոլորի կողմից միջուկային գործարքի իրենց պարտավորությունների մասի կատարումից հետո» տեղի կունենան նաև բանակցություններ ԱՄՆ-ի մասնակցությամբ միջուկային գործարքի շուրջ, բայց դրանք չեն վերաբերվի համաձայնագրի փոփոխություններին կամ գործարքի նոր դրույթներին՝ տարածաշրջանային խնդիրներ և իրանական հրթիռային ծրագիր: «Այնուամենայնիվ, մենք կքննարկենք, թե ինչպես ապահովել, որ ԱՄՆ գործողությունները (գործարքից դուրս գալը և պատժամիջոցների վերականգնումը) այլևս չկրկնվեն, ինչպես խուսափել դրանից»,-ասել է Զարիֆը:

15:59 - 21 փետրվարի, 2021

Հույս ունեմ, որ Իրանի միջուկային գործարքի ուղղությամբ առաջիկայում դրական տեղաշարժեր կլինեն. ԱՄՆ-ում ՌԴ դեսպան |tert.am|

tert.am: ԱՄՆ-ում ՌԴ դեսպան Անատոլի Անտոնովը հույս ունի, որ Իրանի միջուկային գործարքի ուղղությամբ առաջիկայում դրական տեղաշարժեր կլինեն, հաղորդում է ТАСС-ը: «Բայդենը հայտարարել է, որ պատրաստվում է վերադառնալ միջուկային գործարքին: Դեռ այդքան էլ հստակ չէ՝ ինչպես դա տեղի կունենա, բայց գլխավորն այն է, որ դա հայտարարվել է: Սա բազմակողմ փոխազդեցություն է, և մենք պատրաստ ենք դրան: Հույս ունեմ, որ մոտակա ժամանակներում այս ուղղությամբ դրական տեղաշարժ կլինի»,- հայտարարել է դեսպանը: «Լատինական Ամերիկայի հարցում տարաձայնություններ շատ ենք ունեցել և, հավանաբար, դրանք պահպանվում են, բայց նրանց հետ այս առումով շարունակելու ենք երկխոսել»,- ասել է Անտոնովը:

10:17 - 21 փետրվարի, 2021

Իրանի օդուժը գաղտնազերծել է «Բահման» նորագույն ռադարային համակարգը |tert.am|

tert.am: Իրանի օդուժը շաբաթ ներկայացրել է հայրենական արտադրության երկու նորագույն սարքավորում՝ «Բահրան» անունն ստացած ռադարային համակարգը և «Նեժաթ» շարժական աշխատասենյակը: ««Բահրան» ռադարային համակարգի յուրահատկություններից մեկն այն է, որ այն պասիվ է, ինչը թույլ է տալիս թշնամական օդանավերն ու անօդաչուները նկատել և որսալ առանց չափազանց մոտենալու»,- «Մեհր» գործակալության փոխանցմամբ, այս մասին ասել է իրանցի օդային ուժերի հրամանատար, բրիգադային գեներալ Ալիռեզա Սաբահիֆարդին: «Նաժաթ» շարժական համալիրը նախատեսված է ճգնաժամային իրավիճակներում գործարկելու համար, ինչպես օրինակ ջրհեղեղի, երկրաշարժի:

20:58 - 20 փետրվարի, 2021

Ցանկացած երկրի վերադարձ միջուկային համաձայնագիր անվավեր է առանց Իրանի հաստատման. ՄԱԿ-ում Իրանի դեսպան |1lurer.am|

1lurer.am: ՄԱԿ-ում Իրանի դեսպան և մշտական ներկայացուցիչը հայտարարել է, որ Իրանի միջուկային համաձայնագիր ցանկացած երկրի վերադարձ անվավեր կդիտվի առանց պաշտոնական Թեհրանի հաստատման՝ փոխանցում է Mehr գործակալությունը: «Օբամայի նախագահության տարիներին միջուկային գործարքի համակարգողին զեկույցներ ենք ուղարկել՝ բողոքելով այդ ժամանակ ԱՄՆ-ի գործողությունների դեմ՝ իր ստանձնած պարտավորությունների դեմ: Այժմ նրանք մեր նկատմամբ երեք տեսակի պատժամիջոցներ են կիրառում: Եթե դրանցից ոչ մեկը չի հանվում, ապա ԱՄՆ-ի վերադարձը միջուկային գործարք անիմաստ է: Իմաստ չունի ասել՝ պատրաստ եմ վերադառնալ համաձայնագիր, եթե պատժամիջոցների կիրառումը գործնականում չի դադարեցվելու»,- հայտարարել է Մաջիդ Թախթ-Ռավանչին:

17:17 - 20 փետրվարի, 2021

Թեհրանը մտադիր է ԵԱՏՄ-ում իր ներկայությունը մշտական դարձնել. Ռոհանի |armenpress.am|

armenpress.am: Իրանի նախագահ Հասան Ռոհանին հայտարարել է, որ Թեհրանը մտադիր է «ԵԱՏՄ-ում իր ներկայությունը մշտական դարձնել»: Այդ մասին հաղորդում է Irna գործակալությունը: «Այդ միություններին անդամակցելը շատ կարևոր է»,-ասել է Ռոհանին և ընդգծել, որ ԵԱՏՄ-ն արտահանման հարցում Իրանին շատ է աջակցել: Իրանի նախագահն ընդգծել է, որ ԵԱՏՄ-ին անդամակցելով Թեհրանը կկարողանա ակտիվ ներկայություն ապահովել տարածաշրջանում և տարածաշրջանից դուրս:

20:34 - 18 փետրվարի, 2021

Իրանը չի կարող ձեռնպահ մնալ Արցախի հարցում դիրքորոշում արտահայտելուց. Արարատ Միրզոյան

ՀՀ Ազգային ժողովի նախագահ Արարատ Միրզոյանը փետրվարի 18-ին ընդունել է Հայաստանում ԻԻՀ արտակարգ եւ լիազոր դեսպան Աբբաս Զոհուրիին: Այս մասին հայտնեցին ՀՀ ԱԺ լրատվության և հաղորդակցության հետ կապերի վարչությունից։ Ողջունելով հյուրին՝ ԱԺ նախագահը նշել է, որ Իրանին դիտարկում է որպես բարեկամ երկիր եւ վստահելի գործընկեր: Անդրադարձ կատարելով արցախյան հակամարտությանը՝ Արարատ Միրզոյանը նշել է, որ կրակի դադարեցման մասին նոյեմբերի 9-ին ստորագրված եռակողմ հայտարարությունից հետո անհրաժեշտ է կյանքի կոչել ամրագրված պայմանավորվածությունները: Որպես առաջնահերթություն օր առաջ իրականացնել ռազմագերիների եւ այլ գերեվարված անձանց շուտափույթ փոխանակումը «բոլորը բոլորի դիմաց» սկզբունքով: Խորհրդարանի խոսնակը նաեւ հավելել է, որ հակամարտությունը չի կարող վերջնականապես լուծված համարվել, քանի դեռ ԵԱՀԿ Մինսկի խմբի համանախագահության ձեւաչափում չի կարգավորվել Լեռնային Ղարաբաղի կարգավիճակի հարցը՝ արցախահայերի ինքնորոշման իրավունքը: Արարատ Միրզոյանն ընդգծել է, որ Իրանը չի կարող ձեռնպահ մնալ Արցախի հարցում դիրքորոշում արտահայտելուց՝ հաշվի առնելով նաեւ տարածաշրջանային այլ պետությունների ակտիվ ներգրավվածությունն ի օգուտ ադրբեջանական կողմի թե՛ ռազմական գործողությունների փուլում, թե՛ դրան հաջորդած ժամանակահատվածում: Դեսպան Զոհուրին հայտնել է, որ իրանական կողմը ողջունում է Արցախում կրակի դադարեցման մասին համաձայնության ձեռքբերումը եւ վերահաստատել է ԱԳ նախարար Զարիֆի նախկինում հնչեցրած տեսակետն առ այն, որ ռազմագերիների վերադարձի խնդիրը պիտի շուտափույթ լուծում ստանա: Հանդիպման ընթացքում կողմերը քննարկել են միջխորհրդարանական կապերն առավել աշխուժացնելու, երկու երկրների միջեւ տնտեսական հարաբերությունների ակտիվացման եւ հատկապես Սյունիքում համատեղ տնտեսական գործունեության ծավալման վերաբերյալ մի շարք հարցեր:

16:11 - 18 փետրվարի, 2021