#armVote

2021 թվականի հունիսի 20-ին Հայաստանում կանխատեսվում են խորհրդարանական արտահերթ ընտրություններ:

2021 թվականի մարտի 18-ին ՀՀ վարչապետ Նիկոլ Փաշինյանը հայտարարեց, որ այս որոշումը կայացվել է ՀՀ նախագահի, «Իմ քայլը» խմբակցության, «Լուսավոր Հայաստան» խմբակցության ղեկավար Էդմոն Մարուքյանի ու «Բարգավաճ Հայաստան» խմբակցության ղեկավար Գագիկ Ծառուկյանի հետ քննարկումներից հետո։

ՀՀ Սահմանադրությունը սահմանում է, որ խորհրդարանական արտահերթ ընտրություններ անցկացնելու համար Ազգային ժողովը պետք է արձակվի, դրա համար վարչապետը պետք է հրաժարական ներկայացնի, որից հետո 2 շաբաթում 2 անգամ անընդմեջ չընտրվի նոր վարչապետ, այնուհետեւ ոչ շուտ, քան 30 եւ ոչ ուշ, քան 45 օր հետո նշանակվեն նոր ընտրություններ։

Այս գործընթացի համար վարչապետը հրաժարական է ներկայացրել 2021 թվականի ապրիլի 25-ին, եւ արդեն մեկ անգամ չի ընտրվել։ Վարչապետի ընտրության հարցով հաջորդ նիստը կգումարվի մայիսի 10-ին։

Քաղաքական մի շարք ուժեր կարեւորում են նախքան ընտրությունները Ընտրական օրենսգրքի փոփոխությունների ընդունումը։ Խորհրդարանական մեծամասնությունը հայտարարել էր, որ Օրենսգրքում փոփոխություններ անելու որոշում ունեն, դրանցից որոշներն արդեն ընդունվել են, մասնավորապես, ռեյտինգային ընտրակարգը վերացվել է։ ԸՕ փոփոխությունների մեծ փաթեթը դեռեւս ընդունված չէ։

ԱԺ արտահերթ ընտրություններ 2021․ քարոզարշավ․ օր 8

23:03- Ռուսաստանը չի եկել, որ 5 տարի հետո գնա Արցախից։ Եվ Ադրբեջանն էլ է հասկանում, որ ինքը հինգ տարի հետո չի կարողանա ասել՝ ոչ։ Եթե պլանավորում է ասել՝ ոչ, դա կարող է իր համար ունենալ շատ ծանր հետևանքներ։ Մենք փորձում ենք հասկացնել ժողովրդին, որ սրանք ընտրություններ չեն, սա պետության փրկության հատուկ օպերացիա է։ Որքան շատ ներկայացուցիչներ ունենան Ռուբերտ Քոչարյանն ու Նիկոլ Փաշինյանը նոր խորհրդարանում, այդքան մեծ է քաղաքացիական պատերազմի վտանգը։ [ՀԱԿ փոխնախագահ Լևոն Զուրաբյան] |hetq.am|22:45- Անհայտ անձինք ՄԻՊ անունից մոտենում են մարդկանց՝ հարցերով, թե քաղաքական որ ուժին կամ անձին են ձայն տալու: Այսօր պաշտպանի աշխատակազմ են ստացվել այդպիսի ահազանգեր։ Նշված անձինք կամ նրանց հարցումները որևէ առնչություն չունեն ՄԻՊ հաստատության հետ, առավել ևս Պաշտպանը նման իրավասություն չունի, առհասարակ: Այդ մարդիկ պարզապես խաբեությամբ օգտագործում են հաստատության հեղինակությունը: Ուստի, բոլորին կոչ ենք անում նման կեղծ հարցումների հանդիպելու դեպքում անտեսել դրանք կամ որևէ հարցի չպատասխանել: [ՀՀ ՄԻՊ]22:39- «Զարթոնք» ազգային քրիստոնեական կուսակցությունը քարոզարշավի շրջանակներում եղել է Շիրակի մարզում։ Կուսակցության անդամները այցը սկսել են մարզի սահմանամերձ գյուղերից և նշել, որ հատկապես կարևորում են սահմանամերձ բնակավայրերի խնդիրները։ Իսկ ընդհանրապես կուսակցության ծրագրերում առաջնային են պետականության, բանակի, եկեղեցու և ընտանիքի գաղափարները։ |shantnews.am|22:26- Հայաստանի Դեմոկրատական կուսակցությունը շարունակելու է իր ընտրարշավը և իր պայքարը խորհրդարան մտնելու համար։ Պարոն Արզաքանցյանը լինելու է իր համակիրների կողքին մինչև վերջ և հաղթանակի դեպքում կներկայացվի որպես երկրի վարչապետ: Ինչ վերաբերում է դատարանի որոշմանը, իրեն մերժել են, բայց կուսակցությանը հո չեն զրկել մասնակցելու ընտրություններին։ Գտնում ենք, որ դա ոչ լեգիտիմ որոշում է, քանի որ պարոն Արզաքանցյանին կարող էին հենց սկզբից դրա մասին տեղեկացնել, այլ ոչ թե որոշ ժամանակ անց։ [Արզաքանցյանի խոսնակ Տիգրան Հովհաննիսյան] |tert.am|22:11- Վերաքննիչ դատարանն այսօր մերժել է Հայաստանի Դեմոկրատական կուսակցության հայտը և ԿԸՀ որոշումը թողել ուժի մեջ, ինչը նշանակում է, որ Տիգրան Արզաքանցյանն ընտրություններին մասնակցել չի կարող։ Եթե վճիռը վերանայելու հնարավորություն լիներ, ապա դիմելու էինք Վերաքննիչ դատարան, սակայն նմանատիպ վճիռները բողոքարկման ենթակա չեն։ [Արզաքանցյանի փաստաբան Վահե Հովսեփյան] |tert.am|21:40- Նախընտրական քարոզարշավի 8-րդ օրը «Քաղաքացու որոշում» սոցիալ-դեմոկրատական կուսակցությունը տեղադրել է հարթակ և խոսափող Երևան քաղաքի տարբեր հատվածներում: Քաղաքացիներին հնարավորություն է տրվել կարդալ կուսակցության նախընտրական ծրագիրը, ուղղել հարցեր և խոսել մտահոգող խնդիրներից: Կուսակցության անդամները այնուհետև կպատասխանեն հարցերին ուղիղ եթերում: Հիմա, երբ լրահոսը ողողված է քաղաքական գործիչների հայտարարություններով, քաղաքացու խոսքը բացակայում է: Մենք որոշեցինք ՔՈ խոսափողը տրամադրել քաղաքացուն։ [ՔՈ ՍԴԿ]21:30- Հանրային հեռուստաընկերությունը հայտնում է, որ պատասխանատվություն չի կրում նախընտրական քարոզչության ժամանակ քաղաքական ուժերի կողմից տրամադրվող հոլովակների բովանդակության համար: Հանրայինն ամբողջությամբ կհեռարձակի կուսակցությունների, կուսակցությունների դաշինքների կողմից ներկայացվող հոլովակները՝ չուսումնասիրելով դրանցում առկա հնարավոր իրավական ռիսկերը: Այնուամենայնիվ, Առաջին ալիքը կոչ է անում քաղաքական ուժերին ձեռնպահ մնալ ատելության խոսքից՝ մաքուր պահելով Հանրայինի եթերը: 20:57- Մենք առաջարկում ենք ոչ թե ասել պայքարում ենք, այլ հստակ օրենսդրությունը փոխել, պարզեցնել, հստակեցնել, որ անգամ, եթե քո հարազատն ա էդ հանցանքը կատարել ցանկության դեպքում էլ չկարողանաս իրեն օգնել: Մենք պրոֆեսիոնալ, հզոր բանակի ստեղծմամբ ենք պատկերացնում անվտանգային խնդիրների լուծումը: Իմ նպատակը ոչ թե վարչապետ դառնալն է, այլ ռազմական գերատեսչությունը ղեկավարելն ու հզորացնելը: 18 տարեկան երեխան 1 տարի բանակում ուչեբկա ծառայի ու գնա իրենց տուն, ցանկության դեպքում, եթե իր կյանքը ցանկություն ունի բանակի հետ կապի, նա գալիս ա, պայմանագիր կնքում 6 ամիս նորից պարապում, նոր միայն ծառայում պայմանագրային: [«Ազատական» կուսակցության առաջնորդ Սամվել Բաբայան] |1lurer.am|20:25- «Ազատ Հայրենիք» դաշինքի թիմը ընտրարշավի շրջանակներում հուլիսի 14-ին այցելել է Եղվարդ, Բյուրեղավան, Արզնի և Աշտարակ քաղաքներ։ Նշված քաղաքներում քարոզչական երթերը զուգակցվում էին քաղաքացիների հետ երկխոսությամբ, պարզաբանումներ էին տրվում քաղաքացիներին հուզող հարցերին։19:50- Հունիսի 21-ից հետո Հայաստանում պետք է ձևավորվի միասնական կառավարություն՝ ընդդեմ մարտահրավերների, որոնք ավելի մեծ են, քան մեր հնարավորությունները: ԼՀԿ-ն մի կողմ է դրել բոլոր տարաձայնություններն այլ քաղաքական ուժերի հետ և կոչ է անում համախմբվել, իրականացնել բոլոր լավ ծրագրերը: Ըստ մեր պատկերացումների՝ քաղաքական գործիչները պետք է մնան խորհրդարանում, իսկ պրոֆեսիոնալները գնան կառավարություն: Հենց այդ պրոֆեսիոնալ մարդկանց կառավարությունն էլ երկիրը դուրս կբերի վատ վիճակից: [Էդմոն Մարուքյանը՝ Գավառում] |hetq.am|19:02- Կան ուժեր, որոնք ոչ միայն չեն ուրախացել, այլև տխրել են այդ կապակցությամբ ու այս քանի օրն ինչ բամբասանք ասես տարածում են: Վերջին ամենաթարմ բամբասանքն այն է, որ իբր մենք Ռուսաստանի մեր գործընկերներից թաքցրել ենք ականապատ դաշտերի քարտեզները: Դա կատարյալ անհեթեթություն է: Մինչ այս մենք ադրբեջանական կողմին ականապատ քարտեզներ փոխանցել ենք, դա արել ենք մեր ռուս գործընկերների միջոցով: Այնպես չէ, որ ունեցած բոլոր քարտեզները վերադարձրել են: Տրվել է մի փոքր մասը՝ գերիների վերադարձին ի պատասխան: Խոսքը չի գնում այն հատվածի քարտեզների մասին, որոնք բաժանում են Հայաստանին ու Ադրբեջանին: Խոսքն այն տարածքների մասին է, որոնք ցավալի իրադարձություններով պայմանավորված գտնվում են ադրբեջանցիների թիկունքում: [Նիկոլ Փաշինյան] |armenpress.am|18։03- Չկա Ռուսաստան և Արևմուտք, կա Ռուսաստան և Թուրքիա։ Արևմուտքը տարածաշրջանում ներկայացված է Թուրքիայով․ դա կատարյալ ապուշություն է, երբ հայակական քաղաքական էսթաբլիշմենթը թույլ է տալիս իրեն այդպես մտածել։ Այն, ինչ անում է Թուրքիան, արևմուտքն է։ Իհարկե, Ֆրանսիան կարող է մեկ-մեկ ռևերանսներ անել, բայց դա ոչինչ չի նշանակում։ [«Ազատություն» կուսակցության վարչապետի թեկնածու Հրանտ Բագրատյան] 17։42- Հայաստանին այս վիճակի բերել են տարիներ շարունակ Հայաստանի միջոցները գրպանող, Հայաստանի հեղինակությունը գցող, Հայաստանի պետական բոլոր ինստիտուտները թուլացնող իշխանությունները` իրար հաջորդող բոլորը, չեմ առանձնացնում։ Անկախությունից ի վեր մենք թուլացել ենք: Եթե կարողանայինք մեր կարողությունները ճիշտ օգտագործել, եթե կարողանայինք ֆունկցիոնալ պետություն ունենալ, ֆունկցիոնալ բանակ ունենալ, այս իրավիճակին չէինք հասնի։ Սա հեղափոխության արդյունքը չէ, սա երկար տարիներ մեր սխալ ապրելու արդյունքն է։ [«Ինքնիշխան Հայաստան» կուսակցության նախագահ Դավիթ Սանասարյան] 17։41- Գժի նման սուր չեմ թափահարելու, զբաղվելու եմ կոնկրետ բանակաշինությամբ։ Նախ և առաջ մեր տարածք անցնող ցանկացած հակառակորդ, և հատկապես ադրբեջանցի, պարզապես կսպանվի, եթե անցնի մեր տարածք։ Ո՞րն է մեր տարածքը, Նիկոլ Փաշինյանը պարզապես խաբում է մարդկանց, երբ ասում է, որ դեմարկացիա, դելիմիտացիա չկա։ Ո՛չ, սահման կա, դա հայակական ԽՍՀ և ադրբեջանական ԽՍՀ միջև սահմանն Է։ Այլ հարց է, որ այս սահմանին դելիմիտացի և դեմարկացիա չկա, բայց դա չի նշանակում, որ սահման չկա։ [«Ազատություն» կուսակցության վարչապետի թեկնածու Հրանտ Բագրատյան] 17:00- Մենք անկասկած անելու ենք ամեն ինչ՝ ատոմակայանի կյանքը երկարացնելու համար: Հասկանում ենք, որ այս քաղաքը կառուցվել է ատոմակայանի շուրջ։ Մեր ծրագրերն էներգետիկայում հետևյալն են․ մենք կարող ենք դառնալ էլեկտրաէներգիայի արտադրության հարթակ տարածաշրջանի համար, մենք ունենք ավելցուկ հզորություններ: Մեր էներգետիկ հզորությունները համենայնդեպս մինչև վերջերս մոտ 50 տոկոսով էին ծանրաբեռնված, ավելացել է լրացուցիչ հզորություն՝ Հրազդանի 5-րդ բլոկը, որը լիարժեք չի շահագործվում մեկ պատճառով․ Իրանի հետ կապող էլեկտրական գիծը չկառուցվեց, հիմա շինարարությունը նոր-նոր փորձում են առաջ տանել։ [Ռոբերտ Քոչարյանը՝ Մեծամորում քարոզարշավի ժամանակ] |armenpress.am| 16:41- Նկատում ենք, որ արդեն Երևանում ՀԱԿ ընտրարշավը լուրջ արդյունքներ է տվել։ Գյումրիում և Վանաձորում տեսնում ենք, որ ժողովուրդը կարծես ուզում է դուրս գալ Նիկոլ-Ռոբերտ երկընտրանքից, որովհետև այդ երկընտրանքը Հայաստանը որևէ տեղ չի տանում։ Տեսնում ենք, որ աստիճանաբար ժողովուրդը թեքվում է դեպի Հայ ազգային կոնգրես և սրտին ավելի մոտ է ընդունում այն գաղափարը, որ երկրի կայունացման լավագույն կառավարիչը կարող է լինել պետության առաջին նախագահ Լևոն Տեր-Պետրոսյանը։ [ՀԱԿ պատգամավորի թեկնածու Լևոն Զուրաբյան] |hetq.am| 16։35- «Պատիվ ունեմ» դաշինքի ցուցակը գլխավորող Արթուր Վանեցյանը և ՀՀԿ նախագահ Սերժ Սարգսյանը թիմակիցների ուղեկցությամբ համատեղ հանդիպումներ են ունենում մարզի բնակավայրերում: Հանդիպումների շարքը մեկնարկել է Վանաձորից: Լոռեցիների հետ շփումների ժամանակ նրանք ներկայացնում են «Պատիվ ունեմ» դաշինքի ծրագիրը, ճգնաժամում գտնվող և բազում մարտահրավերների առջև կանգնած մեր պետության համար այս ծանր իրավիճակում պարտադրված խորհրդարանական արտահերթ ընտրություններին մասնակցելու՝ դաշինքի դրդապատճառներն ու նպատակը, ստեղծված իրավիճակից երկիրը դուրս բերելու իրենց ծրագրային լուծումները: Դաշինքի ցուցակի երկրորդ համար Տարոն Մարգարյանը մայրաքաղաքի տարբեր վարչական շրջաններում ամենօրյա բակային հանդիպումներ է ունենում երևանցիների հետ: [«Պատիվ ունեմ» դաշինք] 16։29- Ընկել ենք երկու քարի արանք։ Մյուս չարիքն էլ այն է, որ Մարտի 1-ի գլխավոր ամբաստանյալը, քրեական աշխարհի հայրը, տեսե՞լ եք քրեական աշխարհը ինչպես է ոգևորվել, ինչ մեթոդների են դիմում, քանի տեղ են շտաբ բացում։ Ո՞ւր է գալիս Ռոբերտ Քոչարյանը․ որպեսզի վրեժ լուծի Նիկոլ Փաշինյանից, որ իրեն ԱԱԾ-ի պատդվալում պահել է, այլ մոտիվացիա չունի։ Մեկը հանցագործ թիմով, մեկը անհավասարկշռությամբ այս երկիրը ծվատելու են։ [ՀԱԿ պատգամավորի թեկնածու Արամ Մանուկյան՝ Կոտայքում քարոզարշավի ժամանակ] 15։51- Բոլոր քաղաքական ուժերը գալիս են, սիրուն խոստումներ են տալիս, կենացներ, լավ, մեծ հայրենիք առաջարկում։ Մեկը Սևրի դաշնագիրն է, մյուսը՝ Կուրն է, մեկը Կիրովաբադում թեյ է խմում, մեկը Ստամբուլը արյան ծով է սարքում։ 27-ի մեջ մեկ քաղաքական ուժ կա, որ դառը ճշմարտությունն է ասում․․․ Գիտենալով հանդերձ, որ դառը խոսքը, դառը ճշմարտությունը ականջի համար հաճելի չէ, բայց մենք մեր նկատմամբ ազնիվ ենք։ Ազնիվ ենք նաև ձեր և բոլորի նկատմամբ, և պարտավորված ենք ասել դառը ճշմարտությունը։ [ՀԱԿ պատգամավորի թեկնածու Արամ Մանուկյանը՝ Կոտայքի մարզում քարոզարշավի ժամանակ] 15։30- Այսօր Հանրային ՀԸ-ից զանգ է եկել (նախընտրական բանավեճը - խմբ․) բոյկոտող կուսակցություններին, որով ապատեղեկատվություն են տարածել, թե բոյկոտող կուսակցությունների մեծ մասը համաձայնել են մասնակցել բանավեճին և մնում են միայն իրենք։ Անձամբ զանգել եմ բոլոր 9 կուսակցությունների առաջին համարներին և ստացել հավաստիացում, որ իրենք շարունակում են բոյկոտել և Հանրային ՀԸ համապատասխան ներկայացուցիչը զբաղված է էժան մանիպուլյացիաներով։ [ՔՈ վարչապետի թեկնածու Սուրեն Սահակյան] 15։13- Ընտրակաշառքի դեպքերի առթիվ հարուցված և ՀՔԾ-ում քննվող քրգործերի շրջանակներում մեղադրանք է առաջադրվել 3 անձի (այդ թվում՝ Արմավիրի նախկին մարզպետ Ռուբեն Խլղաթյանին - խմբ․), որոնց բոլորի նկատմամբ որպես խափանման միջոց է ընտրվել կալանավորումը: Եվս 8 անձ ունի կասկածյալի կարգավիճակ: [ՀՔԾ] 14։59- Ամենալավ Կառավարությունն այն է, որին մարդիկ ամեն օր չեն հանդիպում, ամեն օր հանդիպելը նշանակում է, որ այդ Կառավարությունն ամեն օր մի խնդիր է ստեղծում և մարդիկ սկսում են հիշել, որ կա մարմին, որը պետք է այս կամ այն գործը անի ու չի անում, սա է իրականությունը: Լավ աշխատող Կառավարությունն այն է, որի մասին մարդիկ նույնիսկ չեն էլ լսում. ինչո՞ւ դու պիտի Կառավարության շենքի տեղն իմանաս, այս երեք տարիների ընթացքում Կառավարության շենքի դիմաց այնքան ակցիաներ են եղել, որ ոնց որ մեզ ամեն օր ասեն՝ կա Կառավարություն, կա Կառավարություն: [«Հայաստան» դաշինքի վարչապետի թեկնածու Ռոբերտ Քոչարյանը՝ Էջմիածնում քարոզարշավի ժամանակ] |tert.am| 14։37- «Ազգային ժողովրդավարական բևեռ» համահայկական կուսակցությունը քարոզարշավը կամփոփի Գյումրիում։ Հունիսի 18-ին՝ ժամը 19:00-ին, Գյումրու Թատերական հրապարակում տեղի կունենա ԱԺԲ-ի հանրահավաքը։ 14։01- Ես շատ բարձր եմ գնահատում մեր շանսերը՝ իշխանություն ձևավորելու։ Ես սոցիալական հարցումներին 100 տոկոսով չեմ վերաբերվում, բայց մենք տեսնում ենք բազմաթիվ սոցհարցումներ, որոնցով երևում է շեշտակի աճը մեր քարոզչության ընթացքում ձեռք բերած, ավելացող ռեյտինգի։ [«Պատիվ ունեմ» դաշինքի ներկայացուցիչ Արսեն Բաբայան] 13։58 - Հունիսի 12-ին ոստիկանության Նաիրիի բաժին հաղորդում էր ստացվել, որ Ազգային ժողովի արտահերթ ընտրություններին մասնակցող դաշինքներից մեկի՝ Քասախ համայնքի Մուշ թաղամասի շտաբի փակցրած նախընտրական պաստառներից մեկը պոկված և պատռված է։ Ձեռնարկված միջոցառումների շնորհիվ Նաիրիի ոստիկանները պարզել են, որ պաստառը պոկել և պատռել է Քասախ համայնքի Մուշ թաղամասի 51-ամյա բնակչուհին։ Նա հրավիրվել է ոստիկանություն և խոստովանել։ [ՀՀ ոստիկանություն] 13:47- Եթե մենք մեր անվտանգությունը որպես հայ չենք վերցնում մեր ձեռքը, չենք փորձում մեր հնարավորությունները ի սպաս դնել մեր անվտանգության սպասարկմանը, այլ ինչպես և այսօր արվում է, մեր անվտանգությունը տեսնում ենք մեզնից դուրս (հիմա դրա անունը ռուս կլինի, թե ինչ, բացարձակ կարևոր չի), մենք անվտանգ չենք և չենք լինելու, որովհետև կախված ենք լինելու ուրիշից, որը կորոշի՝ մեր անվտանգությունը լինի, թե չլինի, մենք ինչ չափի մեջ անվտանգ լինենք, կամ չլինենք։ Մենք մեր անվտանգությունը պետք է լուծենք մեր ինքնությունը ճանաչելով և մեր ինքնության միջոցով մեր անվտանգությանը տեր կանգնելով։ [«Ազգային օրակարգ» կուսակցության ցուցակի առաջին համար Արա Հակոբյան] 13:45- Մեր իրականության ամենամեծ պրոբլեմներից մեկը խոզակերպ իշխանությունն է, և 2018-ի հեղափոխությունը դրա համար է տեղի ունեցել, որ ՀՀ-ում խոզակերպ իշխանության էջը փակվի։ Ես պատահական չէի ասում, որ 2018-ին հեղափոխությունը հենված էր քրիստոնեական արժեքների վրա, և հենց այս համեմատությամբ կարելի է տեսնել այդ արժեքը։ Խոսքը ներքին բովանդակության և ժողովրդի հետ հարաբերությունների մասին է։ Մենք Հայաստանում հաստատել ենք քրիստոնյա իշխանություն, որովհետև մեր իշխանությունը հենվել է բազմաց ձայնի վրա, իսկ ձայն բազմաց՝ ձայն Աստծո։ [Նիկոլ Փաշինյանը՝ Արարատի մարզի Փոքր Վեդի համայնքում քարոզարշավի ժամանակ] |tert.am| 13։37- Իրենց քարոզչության ընթացքում իշխանությունը անդադար ատելություն է տարածում, խորացնում է այն ատելությունը, որը սկսվել է իրենց իշխանության գալու շրջանում։ Ամեն օր հասարակության մեջ ատելության նոր չափաբաժին է ներարկում, իմ համոզմամբ՝ շատ լավ հասկանալով, որ որևէ դեպքում հնարավորություն չունեն վերարտադրվելու, ցավոք, պետք է ասեմ, որ պատրաստվում են իրենց պարտությունը հաղթանակ ներկայացնելու։ Չեմ բացառում, որ իշխանությունը կարող է կանգնել, ասել, թե ընտրությունները կեղծել էին ընդդիմությունները։ Այս իշխանությունը պատրաստ է նույնիսկ այդ հիմարագույն մեթոդով իշխանությունը կրկին զավթել։ [«Պատիվ ունեմ» դաշինքի ներկայացուցիչ Արսեն Բաբայան] 13։21- Միջանցքների, ճանապարհների բացումը չենք ընդունում: Դա կնշանակի թուրքական աշխարհի միացում և որպես դրա հետևանք թուրքական տնտեսական էքսպանսիա Հայաստանում: Միջանցքների, ճանապարհների բացման արդյունքում՝ մի քանի միլիարդ դոլար կշպրտեն Հայաստանի կազմաքանդված տնտեսություն, ու ամբողջը կվերցնեն, Էրդողանի թեթեւ ձեռքով մեկ միլիոն մահմեդական կհայտնվի այստեղ, ու դրա ֆոնին ահասարսուռ արտագաղթ կլինի եւ վերջ, ու առանց ջանքների՝ մտնելու են Երեւան։ [«Ազգային օրակարգ» կուսակցության պատգամավորի թեկնածու Հայկ Փայտյան] |armtimes.com| 13։10- Նախընտրական քարոզարշավի շրջանակներում ՔՊ կուսակցության վարչապետի թեկնածու Նիկոլ Փաշինյանը շարունակում է հանիրավի մեղադրանքներ հնչեցնել Հայոց Եկեղեցու հասցեին։ Եկեղեցու և ազգային-հոգևոր արժեքների հանդեպ ներկա իշխանության վերաբերմունքը մեր ժողովրդին հայտնի է։ Այս համատեքստում պետք է դիտարկել վարչապետի պաշտոնակատարի կողմից Եկեղեցու և եկեղեցականների նկատմամբ դրսևորված վարքագիծը։ Հայոց Եկեղեցին, հակառակ ամեն տեսակ խոչընդոտի և իշխանությունների կեցվածքի, շարունակելու է անշեղորեն իրականացնել հոգեփրկչական և ազգապահպան իր առաքելությունը հայ ժողովրդի կյանքում։ [Մայր Աթոռ Սուրբ Էջմիածին] 13։01- Անհրաժեշտ է իրականացնել գույքագրում՝ հասկանալու համար, թե 30 տարվա ընթացքում ինչ է մնացել պետությունում։ Մսխել են այնքան հարստություն, որ ասելու չի։ Մենք պետք է ամբողջությամբ գույքագրումն անենք, քաղաքական և իրավական գնահատական տանք նախորդ իշխանությունների վարած քաղաքականությանը։ Ոչ միայն նրա համար, որ ոմանք պատժվեն, այլև նրա համար, եկող իշխանությունը իմանա, որ իրեն էլ է դա սպասվում։ [Հայաստանի դեմոկրատական կուսակցության նախագահ Արամ Սարգսյան] 12։58- Համոզված եմ, որ մոտակա հինգ տարվա մեջ մենք, իրագործելով և ալտերնատիվ ժամկետային ծառայություն առաջարկելով, կարողանալու ենք բանակի բարեփոխումները իրագործել էնպես, որ մարտունակությունը լինի բարձր աստիճանի, և անվտանգային բացեր չունենանք ընթացքում։ [«Միասնական հայրենիք» կուսակցության ղեկավար Մհեր Տերտերյան] 12։29- Ճամբարակ քաղաքում հանդիպեցինք մեր դիրքապահ տղաներին, որոնց հետ մայիս ամսին «Ինքնիշխան Հայաստան» կուսակցության անդամները շուրջ երկու շաբաթ գտնվել են առաջնագծում: [«Ինքնիշխան Հայաստան» կուսակցություն] 12։27- Մենք ամեն գնով ձևավորելու ենք եռամիասնությունը՝ Հայաստան, Արցախ, Սփյուռք, որովհետև եթե ազգը նորից չվերամիավորվի և չհամախմբվի, մենք միշտ պարտություն ենք կրելու։ Միավորված հայը անպարտելի է, իսկ պառակտված հայը դատապարտված է։ Հայաստան, Արցախ, Սփյուռք եռամիասնությունը գլխավոր խնդիրն է, որը պետք է իրականացնենք։ [Հայաստանի դեմոկրատական կուսակցության նախագահ Արամ Սարգսյան] 11։58- Պետք է արագորեն վերականգնել մեր անվտանգության համակարգը, հաստատել հանդուրժողականություն և հանգստություն, արտաքին քաղաքական հարաբերություններում ունենալ կանխատեսելի և վստահելի գործընկերոջ համբավ, իրականացնել արդյունավետ հակաճգնաժամային քայլեր՝ բարեկեցիկ կյանքի նախադրյալներ ստեղծելու համար, վերագործարկել պետական արդյունավետ կառավարման համակարգը, վերանայել սփյուռքի հետ հարաբերությունները՝ լոկ օգնողից այն վերածելով լիարժեք գործընկերոջ ու հայկական շահի լոբբիստական կենտրոնի: [Կարեն Կարապետյան] 11:36- Տիգրան Արզաքանցյանը դատի է տվել ԿԸՀ-ին: Նա դիմել է Վարչական դատարան՝ պահանջելով անվավեր ճանաչել Կենտրոնական ընտրական հանձնաժողովի որոշումը, որով ԿԸՀ-ն Արզաքանցյանի գրանցումն ընտրություններին անվավեր էր ճանաչել: Հայցն արդեն վարույթ է ընդունվել: |armtimes.com| 11:27- Ժողովուրդն էլ է դժգոհ, մենք էլ: Դրա պատճառն այն է եղել, որ մենք պարտավոր ենք զգացել հավատարիմ լինել մեր տված խոստումին: Մենք 2018-ին երբ հեղափոխություն ենք արել, ասել ենք՝ սա սիրո և համերաշխության հեղափոխություն է, կադրային ջարդ չի լինելու: Հեղափոխության արդյունքում մենք ստացել ենք թավշե մանդատ, բայց մենք հասկանում ենք նաև, որ այդ մանդատի ժամկետն ավարտվեց։ [ՔՊ կուսակցության վարչապետի թեկնածու Նիկոլ Փաշինյանը՝ Այնթապում քարոզարշավի ժամանակ] |armenpress.am| 11:05- Վարչական դատարանը երկրորդ անգամ անվավեր է ճանաչել ԿԸՀ որոշումը՝ «Հայաստան» դաշինքի պատգամավորության թեկնածու Ռոբերտ Քոչարյանի «Կյանք և ազատություն» գրքի պատկերով և «Հայաստանը կառուցելիս» գրառմամբ պաստառը քարոզչության հետ ասոցացվող ճանաչելու մասին: |hetq.am| 10։54- Ես կարծում եմ, որ ընտրություններից հետո, օրակարգը, որը մենք ենք ներկայացնում, եթե կյանքի կոչվի, ապա ռազմագերիների խնդիրը շատ արագ կարող է լուծվել։ Այդ խնդիրը կարող է լուծվել, եթե երկրի ներսում մենք մեր խնդիրները լուծենք և արտաքին ճակատում ուժեղանանք։ Եվ ոչ մի պարագայում ռազմագերիների վերադարձը մեր ներքաղաքական կյանքում չշահարկվի, սա շատ կարևոր է։ Երևի ամեն ինչ կարելի է շահարկել, բայց ոչ, մարդուն գերությունից ազատելը չպետք է շահարկվի։ [ԼՀԿ վարչապետի թեկնածու Էդմոն Մարուքյան] 10։10- Բոլոր քաղաքացիներին, որոնք դեմ են թշնամության մթնոլորտին, բոլոր նրանց, ովքեր պատրաստվում են կողք կողքի ապրել ընտրություններից հետո, բոլոր նրանց, ովքեր չեն գնալու և ժողովրդին չեն տանելու եղբայրասպանության, կոչ ենք անում լռության օրը անցկացնել միասին, քայլել երթով բոլոր այն տեղերով, որոնք խորհրդանշում են մեր անխոհեմության պատճառով նահատակված մեր եղբայրների հիշատակը, և տալ միասնական ուղերձ, որ մենք չենք անի ոչինչ, որը դիմացինին կդրդի գնալ անդառնալի ճանապարհով, գնալ դեպի նոր աղետներ։ Այդ օրը մեզնից ոչ մեկը չի կիրառի կուսակցական որևէ սիմվոլ, որևէ կարգախոս կամ ընտրելու կոչ, որը կարող է ընկալվել նախընտրական քարոզչություն։ Երթը կմեկնարկի հունիսի 19-ին՝ ժամը 18։00-ին, Ազատության հրապարակից։ [«Քաղաքացու որոշում» ՍԴԿ] 09:20- Քարոզարշավ օր 8. քաղաքական ուժերը շարունակում են արշավներ իրականացնել ՀՀ մարզերում․ ժամանակացույցը՝ այստեղ։ |armenpress.am| ԱԺ արտահերթ ընտրություններ 2021․ քարոզարշավ․ օր 9 ԱԺ արտահերթ ընտրություններ 2021․ քարոզարշավ․ օր 7

23:03 - 14 հունիսի, 2021

Պատգամավորի թեկնածուների դրամական միջոցները․ մաս չորրորդ [«Բարգավաճ Հայաստան» կուսակցություն]

Կենտրոնական ընտրական հանձնաժողովում կուսակցությունների գրանցումից հետո վերջիններս ներկայացրել են հայտարարագրեր, որոնցում ներառված են ինչպես կուսակցությունների, այնպես էլ պատգամավորների թեկնածուների գույքի, եկամուտի և շահերի հայտարարագրերը։ Արդեն մի քանի օր է, ինչ մեկնարկել է նախընտրական քարոզչությունը, որը շարունակվելու է մինչև հունիսի 18-ը։ Հունիսի 20-ին կկայանան խորհրդարանական արտահերթ ընտրությունները։ Infocom-ն ուսումնասիրում է կուսակցությունների նախընտրական ցուցակներում ընդգրկված պատգամավորի թեկնածուների ներկայացրած հայտարարագրերը։ Արդեն ուսումնասիրել և ներկայացրել ենք «Քաղաքացիական պայմանագիր» կուսակցության, «Հայաստան» դաշինքի և «Պատիվ ունեմ» դաշինքի նախընտրական ցուցակում ընդգրկված պատգամավորի թեկնածուների հայտարարագրերը։ Այժմ ներկայացնում ենք «Բարգավաճ Հայաստան» կուսակցության պատգամավորի թեկնածուների գույքի, եկամտի և շահերի հայտարարագրերը։ «Բարգավաճ Հայաստան» կուսակցության վարչապետի թեկնածուն Գագիկ Ծառուկյանն է։ Վերջինս էլ հայտարարագրել է ամենաշատ դրամական միջոցները։ Հայտարարագրման պահին Ծառուկյանն ունեցել է 877մլն 300 հազար ՀՀ դրամ, 52մլն 850 հազար ԱՄՆ դոլար և 5 մլն 1400 եվրո, որն ընդհանուր դրամի վերածած կազմում է 31 մլրդ 205 մլն 921 հազար ՀՀ դրամ։ Բացի դրամական միջոցներից Գագիկ Ծառուկյանը հայտարարագրել է 25 անշարժ գույք, այդ թվում՝ 5 անհատական բնակելի տուն, 2 հողին ամրակցված այլ անշարժ գույք, 2 հասարակական նշանակության շինություն, 1 բնակարան, 1 ինքնակամ կառույց և 14 հողամաս։ Բացի անշարժ գույքից Ծառուկյանը հայտարարագրել է 14 շարժական գույք՝ «BMW X5 4.4», «Toyota, Land Cruiser Prado v6 4.0 I», «Jeep, Wrangler 4.0», «Rolls-Royce, Coupe Phantom 6.7», «Nissan, Patrol Safari 4.8», «Range Rover, sport 4.4», «Toyota, Tundra 5.7», «Mercedes-Benz, G-63 AMG», «BMW, X5 M 4.4», «Toyota, Land Cruiser 200 4.5 TD», «Rolls-Royce, Silver Spur 6.7», «Toyota, Land Cruiser 200 4.0», «Toyota, Land Cruiser 200 4.0», «Bentley, Bentayga», «Rolls-Royce, Cullinan 6.7», «BMW, X6 Xdrive 35i 3.0» և «Nissan, Patrol Safari 4.8»։ Ծառուկյանը հայտարարագրել է 8 մլն դրամը գերազանցող 43 թանկարժեք գույք, այդ թվում՝ 15 ննջարանի կահույք՝ 1 մլն 997 հազար 130 եվրո արժողությամբ, 10 նախասրահի կահույք՝ 1 մլն 511 հազար եվրո արժողությամբ, 4 ճաշասենյակների կահույք՝ 787 հազար 800 եվրո արժողությամբ, 1 խոհանոցի կահույք՝ 110 հազար եվրո արժողությամբ, 1 փայտյա կահույք՝ 118 հազար 458 եվրո արժողությամբ, 1 վարագույր՝ 251 հազար 799 եվրո արժողությամբ, 1 ադամանդե քարով ձեռքի ժամացույց՝ 300 հազար ԱՄՆ դոլար արժողությամբ, 2 ոսկե շղթայով և ադամանդե քարերով ձեռքի ժամացույց՝ 1 մլն ԱՄՆ դոլար արժողությամբ, 3 ոսկե մատանի ադամանդե քարերով՝ 4 մլն 700 հազար ԱՄՆ դոլար արժողությամբ, 3 ոսկե ձեռքի ժամացույց՝ 500 հազար ԱՄՆ դոլար արժողությամբ, 1 ոսկե շղթա՝ 100 հազար ԱՄՆ դոլար արժողությամբ և 20 ջահ՝ 1 մլն 587 հազար 300 եվրո արժողությամբ։ Ընդհանուր առմամբ բոլոր թանկարժեք գույքերի գումարը դրամի վերածած կազմում է 7 մլրդ 451 մլն 897 հազար ՀՀ դրամ։ Ծառուկյանն արժեթղթեր և ներդրումներ ունի «Ալլեր Աքվա Էյ Եմ», «Ռանեբ», «Արբեն», «Գլոբալ Մոթորս», «Կլեոպատրա», «Մուլտի Ֆարմ», «Մուլտի Ակվամարին», ««Շուստով» Առևտրի Տուն», «Արսիլիցիում», «Մուլտի Մոթորս», «Բելլեզզա», «Օնիրա Քլաբ», «Պրեվելոն Քոնսալթինգ Լիմիթեդ», «Օլիմպավան», «Մուլտի Գրուպ Ինվեստբել», «Ֆիրմա Նյու», «Տեխնալյումին», «Մուլտի Ավտոտրանս», «ՄԳ Եվրոպա», «Մուլտի Գրուպ Եվրոպա», «Բալկան Պետ Քոմպանի», «Մուլտի Ինտերտրանս», «Մուլտի Դայմոնդ», «Մուլտի Սոլար», «Մուլտի Քարս», «Մուլտի Ուլենես Կենտրոն», «Մուլտի Տաբակ», «Մուլտի Պրոպան Գազ», «Մուլտի Թրաք», «Մուլտի Թրեյդ Հաուս», «Գոլդ Սիլվեր Չէյն Քամփնի», «Մուլտի Գրուպ Կոնցերն», «Մուլտի Սիսի», «Մագաս Ինվեստ», «Մուլտի Գրուպ Սթոուն», «Մուլտի Ռեստ Հաուս», «Երևանի Քիմիա-Դեղագործական Ֆիրմա», «Բիզնես Տեխնոպլազա», «Ֆիրմա Տիխվիզ», «Զվարթնոց Հենդլինգ», «Գորնա Բանյան», ««Կոտայք» Գարեջրի Գործարան», «Միրա-Ջի», «Էկոֆիշ-Թրեյդ», «Ա․Ա․Դ․ Հոթել», «Եուրոմոթորս», «Մուլտի Արմս», «Մխչյան Ֆիշֆուդ», «Արմօյլ», «Չերամիզիա ինթերնեյշնլ», «Ժ Ինվեստ», «Երևանի Արարատ Կոնյակի Գինու-Օղու Կոմբինատ», «Մուլտիգրուպ Թրեյդ» և «Ավիա-Սերվիս» ընկերություններում։ Ընդհանուր՝ 54 ընկերությունում։ Ծառուկյանը 2018 թվականի խորհրդարանական ընտրություններից առաջ ներկայացրած հայտարարագրում արժեթղթեր և ներդրումներ է ունեցել 45 ընկերությունում։ Այս 2,5 տարիների պատգամավորական գործունեության ընթացքում նա բաժնեմասեր է ձեռք բերել «Մուլտի Տաբակ», «Մուլտի Պրոպան Գազ», «Մուլտի Թրաք», «Մուլտի Թրեյդ Հաուս», «Գոլդ Սիլվեր Չէյն Քամփնի», «Չերամիզիա ինթերնեյշնլ», «Ժ Ինվեստ», «Մուլտիգրուպ Թրեյդ» և «Ավիա-Սերվիս» ընկերություններում։ «Բարգավաճ Հայաստան» կուսակցության նախընտրական ցուցակով առաջադրված Կարապետ Գուլոյանը հայտարարագրման պահին ունեցել է 1 մլրդ 920 մլն ՀՀ դրամ և 407 հազար 205 ԱՄՆ դոլար գումար, որը դրամի վերածած կազմում է 2 մլրդ 129 մլն 734 հազար։ Բացի դրամական միջոցներից Գուլոյանը հայտարարագրել է 1 բնակարան և 1 բնակելի տուն։ Պատգամավորի թեկնածուն բաժնեմասեր ունի «Դակավա Քոնսթրաքշն» և «Էլեկտրամոնտաժ» ընկերություններում։ Հայտարարագրած դրամական միջոցներով երրորդը Կառլեն Մինասյանն է։ Վերջինս որպես դրամական միջոց հայտարարագրել է 200 մլն ՀՀ դրամ, 170 հազար ԱՄՆ դոլար և 60 հազար եվրո գումար, որը դրամի վերածած կազմում է 324 մլն 870 հազար։ Բացի դրամական միջոցներից Մինասյանը հայտարարագրել է 1 շենք շինություն և 1 «BMW 745» ավտոմոբիլ։ Մինասյանը բաժնեմասեր ունի «ԷԴՄ Սոլար», «Արմ Սոլար», «Դուստր Սոլար», «Լայմ Սթոն», «Մալիշկա Ռեսուրսիս» և «Վայք Ռեսուրսիս» ընկերություններում։ Միքայել Մելքումյանը որպես դրամական միջոց հայտարարագրել է 5 մլն ՀՀ դրամ և 331 հազար ԱՄՆ դոլար գումար, որը դրամի վերածած կազմում է 175 մլն 765 հազար։ Բացի դրամական միջոցներից Մելքումյանը հայտարարագրել է 3 շենք-շինություն։ Հրանտ Մադաթյանը հայտարարագրման պահին ունեցել է 88 մլն ՀՀ դրամ և 24 հազար ԱՄՆ դոլար գումար, որը դրամի վերածած կազմում է 100 մլն 360 հազար։ Բացի դրամական միջոցներից Մադաթյանը հայտարարգրել է 1 սեփական տուն և 4 հողամաս։ Պատգամավորի թեկնածու և ներկայիս պատգամավոր Քաջիկ Գևորգյանը հայտարարագրել է 1 հողամաս, 1 բնակարան, 1 բնակելի տուն, 1 գյուղական նշանակության հողամաս և 1 ավտոմոբիլ՝ «BMW M5» մակնիշի։ Գևորգյանը հայտարարագրել է 8 մլն դրամը գերազանցող 2 թանկարժեք զարդ՝ ժամացույց՝ ընդհանուր 69 հազար ԱՄՆ դոլար արժողությամբ։ Պատգամավորի թեկնածուն բաժնեմասեր ունի «Տուֆ-ստոն» և «Քաջ-տանս» ընկերություններում։ Վերջինս որպես դրամական միջոց հայտարարագրել է 31 մլն 430 հազար ՀՀ դրամ։ Հրանտ Դավթյանը բաժնեմասեր ունի «Խճաքար-Մուսա», «Ղարիբ», «Այոս», «Արմարկ», «Մանիգրանտ» և «Ապտես» ընկերություններում։ Վերջինս հայտարարագրել է 2 բնակարան, 1 տուն, 4 շենք և շինություն, 7 հողամաս և 2 ավտոմոբիլ՝ «Mercedes Benz S500L» և «Toyota Camry 2.5Gas» մակնիշների։ Դավթյանը որպես դրամական միջոց հայտարարգրել է 1 մլն 266 հազար ՀՀ դրամ։ Ընդհանուր առմամբ «Բարգավաճ Հայաստան» կուսակցության նախընտրական ցուցակով առաջադրված պատգամավորի բոլոր թեկնածուների դրամական միջոցները միասին կազմում են 3 մլրդ 391 մլն 920 հազար ՀՀ դրամ, 54 մլն 320 հազար 450 ԱՄՆ դոլար, 5 մլն 152 հազար 100 եվրո և 900 հազար ռուբլի։ Բոլոր գումարային միջոցները դրամի վերածած կազմում է 34 մլրդ 572 մլն 257 հազար ՀՀ դրամ։ Միայն Գագիկ Ծառուկյանի հայտարարագրած դրամական միջոցները կազմում են կուսակցության բոլոր թեկնածուների դրամական միջոցների 90,3%-ը։ Նարեկ Մարտիրոսյան

20:50 - 14 հունիսի, 2021