ԵՄ

Եվրոպական միությունը (ԵՄ) իրավունքի քաղաքական համայնք է, որի նպատակն է Եվրոպայի երկրների ու ժողովուրդների ինտեգրման ու կառավարման գործառույթի կազմակերպումը: Հիմնվել է 1993 թվականի նոյեմբերի 1-ին, բաղկացած է եվրոպական 27 երկրներից։ ԵՄ կառույցներն են Եվրոպական խորհրդարանը, Եվրամիության խորհուրդը, Եվրոպական խորհուրդ, Եվրոպական խորհուրդ, Եվրամիության Արդարադատության դատարանը, Հաշիվների դատարանը, Եվրոպական կենտրոնական բանկը։

Լիսաբոնյան համաձայնագրի ընդունմամբ՝ Եվրոպական արտաքին գործերի ծառայության պատասխանատվության տակ անցան Եվրոպական միությունը և իր քաղաքացիներին ներկայացնող 140 պատվիրակությունները և գրասենյակները:

Հայաստանում Եվրոպական միության դեսպանն ու ԵՄ պատվիրակության ղեկավարն է Ն.Գ. Անդրեա Վիկտորին։

Ռուսաստանը 10 օրով դադարեցրել է «Հյուսիսային հոսք» գազատարով Եվրոպայի գազի մատակարարումը |hetq.am|

hetq.am: Ռուսաստանը 10 օրով դադարեցրել է դեպի Եվրոպա գազի մատակարարումը արտահանման հիմնական երթուղով՝ «Հյուսիսային հոսքով» ։ Ըստ ռուսական կողմի՝ պատճառը գազատարի ամենամյա պլանային տեխսպասարկումն է։ Եվրոպայում մտահոգված են, քանի որ Ռուսաստանը կարող է չվերականգնել գազի մատակարարումները։ Այս պահի դրությամբ Ռուսաստանից Եվրոպա բնական գազը մատակարարվում է միայն մեկ տրանզիտային խողովակով, որն անցնում է Ուկրաինայի տարածքով։ Նախագծի օպերատոր ընկերությունը՝ Nord Stream AG-ն նշել է, որ «Հյուսիսային հոսքում» պրոֆիլակտիկ աշխատանքները հնարավորություն են տալիս ապահովելու գազատարի արդյունավետ, անվտանգ և հուսալի շահագործումը։ Ընդ որում, ռուսական կողմը նշում է, որ գազի մատակարարման դադարեցումը համաձայնեցված է եղել փոխադրմամբ զբաղվող գործընկերների հետ։ Նախորդ տարի գազատարի պլանային սպասարկումը ևս կայացել էր հուլիսի կեսերին։ 2021 թվականին «Հյուսիսային հոսքով» գազի մատակարարումը հասել էր 2020 թվականի պատմական ռեկորդային ցուցանիշին՝ 59.2 միլիարդ խորանարդ մետր։ Այս գազատարն անցնում է Բալթիկ ծովի հատակով՝ ռուսական Վիբորգ քաղաքից մինչև Գերմանիայի Գրայֆսվալդ քաղաք։ Օպերատորը Nord Stream AG ընկերությունն է, որի 51 %-ը պատկանում է Գազպրոմի դուստր ընկերությանը, 15,5-ական %՝ գերմանական Wintershall Dea և E.ON ընկերություններին, ևս 9-ական %՝ հոլանդական N. V. Nederlandse Gasunie-ին և ֆրանսիական Engie-ին։ Այդուհանդերձ, եվրոպացիները մտահոգություններ ունեն, որ Վլադիմիր Պուտինի անմիջական կարգադրությամբ կարող է չվերականգնվել այս գազատարով ռուսական գազի մատակարարումը Եվրոպային։ Գերմանիան արդեն նորմավորում է տաք ջուրը, իսկ ամբողջ Եվրոպան պատրաստվում է հայտարարել արտակարգ միջոցառումների մասին։ Նախագիծն ի հայտ կգա արդեն այս շաբաթ։ «Իրավիճակը շատ լուրջ է, և ճգնաժամը կարող է ավելի ուժեղանալ։ Չի բացառվում, որ Ռուսաստանը կշարունակի կրճատել գազի մատակարարումը»,- «Հյուսիսային հոսքի» պրոֆիլակտիկ անջատումից քիչ առաջ խոստովանել էր եվրոկոմիսար Կադրի Սիմսոնը։ Դեռ երեք տարի առաջ «Գազպրոմն» օրական մինչև 500 միլիոն խորանարդ մետր գազ էր մատակարարում Եվրոպային։ Այս տարվա մայիսի սկզբին այն կազմում էր օրական ընդամենը 250 միլիոն։ Հուլիսի սկզբին այն հասել էր 140 միլիոնի։ Ընդ որում, «Թուրքական հոսքի» պրոֆիլակտիկ անջատման ժամանակ այն ընկել էր՝ հասնելով ռեկորդային 100 միլիոն խորանարդ մետրի։ Առաջիկա 10 օրերին Եվրոպային օրական խոստանում են միայն 75 միլիոն խորանարդ մետր բնական գազ։ Նախորդ շաբաթ Եվրոպական հանձնաժողովի ղեկավար Ուրսուլա ֆոն դեր Լյայենը հայտարարել էր, որ անհրաժեշտ է պատրաստվել գազի մատակարարման հետագա խափանումներին և «նույնիսկ Ռուսաստանի կողմից ամբողջական անջատման»։

15:09 - 11 հուլիսի, 2022

ԵՄ-ն պետք է պատրաստ լինի ռուսական գազի մատակարարումների ամբողջական դադարեցմանը․ Ֆոն դեր Լայեն |azatutyun.am|

azatutyun.am: ԵՄ-ն պետք է արտակարգ իրավիճակների պլաններ մշակի՝ պատրաստվելու ուկրաինական պատերազմի ֆոնին ռուսական գազի մատակարարումների ամբողջական դադարեցմանը, հայտարարել է Եվրահանձնաժողովի նախագահ Ուրսուլա ֆոն դեր Լայենը։ ԵՄ-ն արդեն պատժամիջոցներ է սահմանել Ռուսաստանի դեմ, ներառյալ էներգակիրների որոշ մատակարարումներ: Այնուամենայնիվ, ԵՄ գործադիր մարմնի ղեկավարն ասել է, որ դաշինքը պետք է պատրաստվի Մոսկվայի կողմից ցնցումների: «Մենք նաև պետք է պատրաստվենք գազի մատակարարումների հետագա ընդհատումներին և նույնիսկ ռուսական գազի մատակարարումների ամբողջական դադարեցմանը», - ասել է Ուրսուլա ֆոն դեր Լայենը՝ ելույթ ունենալով Եվրախորհրդարանում: Նրա խոսքով՝ ԵՄ անդամ մոտ տասը երկրներ արդեն տուժել են գազի մատակարարումների կրճատումից կամ ամբողջական դադարեցումից։

14:03 - 07 հուլիսի, 2022

ԵՄ-ն Հյուսիսային Մակեդոնիային կոչ է արել ընդունել Բուլղարիայի հետ տարաձայնությունները կարգավորող գործարքը |1lurer.am|

1lurer.am: Եվրոպական խորհրդի նախագահ Շառլ Միշելը Հյուսիսային Մակեդոնիային հորդորել է աջակցել Ֆրանսիայի առաջարկած փոխզիջումային առաջարկին՝ հարևան Բուլղարիայի հետ վեճին վերջ տալու համար, որն արգելափակում է Եվրամիությանը Հյուսիսային Մակեդոնիայի անդամակցելու հայտը, գրում է AP-ն: Հյուսիսային Մակեդոնիայի նախագահ Սթևո Պենդարովսկին և կառավարությունը աջակցել են առաջարկվող գործարքին, որը կոչ է անում երկրին իր սահմանադրությամբ ճանաչել էթնիկ բուլղարական փոքրամասնության գոյությունը: Դա կարող է նպաստել երկկողմ վեճի կարգավորմանը, որը խոչընդոտում է Հյուսիսային Մակեդոնիայի անդամակցության գործընթացը: Ընդդիմության և ցուցարարների կարծիքով՝ փաստաթղթում առաջարկվող զիջումները խախտում են մակեդոնացիների ազգային, մշակութային և պատմական իրավունքներն ու շահերը: Մի քանի հարյուր մարդ Սկոպիեում մասնակցել է ֆրանսիական առաջարկի դեմ բողոքի ցույցին։ Ակցիայի մասնակիցները փորձել են գրոհել կառավարական շենքերը, խորհրդարանի մոտ էլ քարեր են նետել ոստիկանների ուղղությամբ: Ոստիկանության և ցուցարարների միջև բախման հետևանքով տուժել է 47 մարդ:

12:20 - 06 հուլիսի, 2022

ԵՄ-ն չի պատրաստվում պատերազմել Ռուսաստանի հետ. Բորել |shantnews.am|

shantnews.am: Եվրամիությունը չի պատրաստվում պատերազմել Ռուսաստանի հետ, հիմնական պատասխանն Ուկրաինայում անցկացվող ռազմական հատուկ օպերացիային կշարունակեն մնալ պատժամիջոցները, որոնց էֆեկտը գնալով միայն կաճի: Նման հայտարարությամբ է հանդես եկել ԵՄ արտաքին և անվտանգության քաղաքականության հարցերով բարձրագույն ներկայացուցիչ Ժոզեպ Բորելը Yomiuri թերթում հրապարակված հոդվածում: Նրա խոսքով՝ բախվելով Ուկրաինայում հատուկ գործողության հետ «մենք մտադրություններից սկսեցինք անցնել գործողությունների՝ ցույց տալով, որ երբ մեզ սադրում են, Եվրոպան կարող է պատասխանել: Քանի որ մենք չենք ցանկանում կռվել Ռուսաստանի հետ, պատասխանի հիմքում տնտեսական պատժամիջոցներն են: Դրանք արդեն սկսում են ազդեցություն ունենալ, որը առաջիկա ամիսներին միայն կավելանա»: Բորելը նաև ասել է, որ պատժամիջոցները, որոնք կիրառվում են Ռուսաստանի դեմ, ազդում են նրա ռազմարդյունաբերական համալիրի վրա և խոչընդոտում են նավթի արդյունահանմանը։ «Եթե խոսենք ռազմական ոլորտի մասին, ապա «Իսկանդերի» և «X-101»-ի նման ճշգրիտ կառավարվող հրթիռներ արտադրելու Ռուսաստանի կարողությունը սահմանափակ է», – ասել է Բորելը: «Նավթի արդյունահանման ոլորտում ոչ միայն օտարերկրյա ընկերությունները հեռանում են, այլև բարդ իրավիճակ է ստեղծվել այնպիսի առաջադեմ տեխնոլոգիաների կիրառման հարցում, ինչպիսին հորիզոնական հորատումն է»,- ասել է նա՝ հավելելով, որ ռուսական ընկերությունների հնարավորությունները նոր հանքավայրեր շահագործելու համար սահմանափակ են։ Ի թիվս այլ հարցերի, նա նշել է ավտոմոբիլային շուկայում և ավիացիայի ոլորտում առկա խնդիրները։

10:38 - 06 հուլիսի, 2022

Պատժամիջոցները Պուտինին կստիպեն ընտրել՝ նավթ կամ զենք. Բորել |factor.am|

factor.am: ԵՄ արտաքին գործերի և անվտանգության քաղաքականության հարցերով հանձնակատար Ժոզեպ Բորելը հոդված է հրապարակել՝ ներկայացնելով Ռուսաստանի դեմ պատժամիջոցների արդյունավետությունը և հավանականությունը, որ դրանք կկարողանան դադարեցնել պատերազմն Ուկրաինայում։ Եվրամիությունը պատժամիջոցների վեց փաթեթ է ընդունել, որոնք կոչված են պատժել Ռուսաստանին՝ Ուկրաինա ներխուժելով միջազգային իրավունքը խախտելու համար։ Ըստ Բորելի՝ պատժամիջոցներն աստիճանաբար ազատում են Եվրոպան կախվածությունից, որը վաղուց խոչընդոտում էր նրա քաղաքական ընտրություններին՝ Վլադիմիր Պուտինի ագրեսիվության դիմաց: Նա հիշեցրել է, որ մինչև 2022 թվականի վերջը ԵՄ-ն մտադիր է 90%-ով կրճատել ռուսական նավթի ներկրումը։

16:07 - 05 հուլիսի, 2022

Շառլ Միշելն ու Իլհամ Ալիևը քննարկել են Հայաստանի և Ադրբեջանի երկխոսության՝ Բրյուսելի օրակարգի բոլոր հարցերը |factor.am|

factor.am: ԵՄ Խորհրդի նախագահ Շառլ Միշելը հեռախոսազրույց է ունեցել Ադրբեջանի նախագահ Իլհամ Ալիևի հետ։ Այս մասին Միշելը տեղեկացրել է թվիթերյան գրառմամբ։ «Քննարկել ենք Հայաստանի և Ադրբեջանի երկխոսության՝ Բրյուսելի օրակարգի բոլոր հարցերը։ Ընդգծվել է ԵՄ-ի համար կայուն, անվտանգ և խաղաղ Հարավային Կովկասի կարևորությունը։ Մենք կշարունակենք աջակցել հումանիտար, կապի և սահմանային խնդիրների լուծմանը, ինչպես նաև ապագա խաղաղության համաձայնագրին»,- գրել է Միշելը։

14:56 - 04 հուլիսի, 2022

«Դիմադրություն» շարժումը Ազգային ժողովից երթով կշարժվի ԵՄ գրասենյակ

«Դիմադրություն» շարժման մասնակիցները ակցիա են կազմակերպել Ազգային ժողովի մոտ: Շարժման անդամ, «Հայաստան» խմբակցության պատգամավոր Արամ Վարդևանյանը լրագրողների հետ ճեպազրույցում ասաց, որ ակցիայից հետո մասնակիցները շարժվելու են Եվրամիության գրասենյակ: «Հուլիսի 5-ի համար ևս որոշակի գործողություն է մշակված»,-ասաց նա՝ հավելելով, որ այսօրվա հավաքը ևս պահանջված էր գաղափարակիցների շրջանում: Արամ Վարդևանյանի խոսքով՝ վերջին օրերին դատական համակարգում տեղի ունեցած փոփոխությունները` մասնավորապես Ջհանգիրյանի հեռացումը չի նշանակում Ջհանգիրյանի թողած ժառանգության վերացում, իսկ ԵՄ-ն այդտեղ խնդիր չի տեսնում: «Մենք մինչև հիմա ռազմագերիներ ունենք Ադրբեջանում, ԵՄ-ն չունի՞ այդտեղ անելիքներ: Ես չեմ տեսել, որ ԵՄ-ն ասի Ադրբեջանը ժողովրդավարական երկիր չէ: Ցանկացած գործողություն, խոսք, որը հնչեցվում է հանրայնորեն, ոչ միայն արձանագրվում է Երևանում, այլև Բրյուսելում»,-ասաց Վարդևանյանը: Անդրադառնալով խմբակցության ներսում մանդատներ վայր դնելու հարցին՝ Վարդևանյանն ասաց, որ մանդատը պետք է ծառայեցվի կորևորագույն օրակարգերին` օրինակ վարչապետի ընտրությանը: «Մենք խնդիր չունենք մանդատ վայր դնելու, եթե իմանանք, որ դրանով ինչ որ հավելյալ արժեք կստեղծվի»,-ասաց նա: Նշենք, որ հուլիսի 5-ին՝ Սահմանադրության օրը շարժումը երթ է նախատեսում ի պաշտպանություն ՀՀ Սահմանադրության և պետական խորհրդանիշների։ Հուլիսի 8-ին` ժամը 19:30-ին, Ֆրանսիայի հրապարակում կրկին հանրահավաք է լինելու։

11:18 - 04 հուլիսի, 2022

Ցույց Թբիլիսիում՝ կառավարության հրաժարականի պահանջով |azatutyun.am|

azatutyun.am: Քաղաքացիական հասարակության, ընդդիմադիր կուսակցությունների ներկայացուցիչներ, ինչպես նաև շարքային քաղաքացիներ երեկ Թբիլիսիում խորհրդարանի շենքի մոտ էին՝ կառավարության հրաժարականի պահանջով։ Տասնյակ հազարավոր ցուցարարներ պահանջում էին ձևավորել ազգային համաձայնության նախարարների կաբինետ, որը կկարողանա երկրում բարեփոխումներ իրականացնել և հասնել ԵՄ անդամակցության թեկնածուի կարգավիճակի։ Հանրահավաքի մասնակիցները փակել էին Ռուսթավելի պողոտան, որտեղ գտնվում է հանրապետության խորհրդարանի շենքը։ Եվրամիության ղեկավարները հունիսի 23-ին ԵՄ գագաթնաժողովում Ուկրաինային և Մոլդովային թեկնածուների կարգավիճակ տրամադրեցին։ Նրանք ընդունեցին Վրաստանի եվրոպական հեռանկարը, ինչպես նաև մի շարք պայմանների կատարման դեպքում նրան թեկնածուի կարգավիճակ տալու պատրաստակամությունը։ Վրաստանը 2009 թվականից անդամակցում է «Արևելյան գործընկերության» ծրագրին, որն ուղղված է ԵՄ-ի և նախկին խորհրդային հանրապետությունների միջև համագործակցության զարգացմանը։ 2014 թվականին երկիրը ԵՄ-ի հետ ասոցացման համաձայնագիր է ստորագրել, որի անբաժանելի մասն է խորը և համապարփակ առևտրի մասին դրույթը։ 2017 թվականին Վրաստանի քաղաքացիները իրավունք են ստացել զբոսաշրջային ուղևորություններ կատարել Շենգենյան գոտու երկրներ՝ առանց վիզայի։

09:49 - 04 հուլիսի, 2022

ԵՄ-ին անդամակցելու ճանապարհին Եվրոպան կլինի Կիևի կողքին․ Եվրահանձնաժողովի նախագահ |azatutyun.am|

azatutyun.am: Եվրահանձնաժողվի նախագահ Ուրսուլա ֆոն դեր Լայենը Կիևին հավաստիացրել է, որ Եվրամիությունը կկանգնի Ուկրաինայի կողքին Եվրամությանը անդամակցելու ամբողջ գործընթացում։ Վերջերս Ուկրաինան Եվրամիությանը անդամակցելու թեկնածու երկրի կարգավիճակ ստացավ, բայց անդամակցությունը կարող է երկար տարիներ տևել։ Բրյուսելից այսօր դիմելով Ուկրաինայի խորհրդարանին՝ Ուրսուլա ֆոն դեր Լայենը բարձր է գնահատել Եվրամիությանը անդամակցելու Ուկրաինայի վճռականությունը։ «Առջևում երկար ճանապարհ է, բայց Եվրոպան ձեր կողքին կլինի ճանապարհի յուրաքանչյուր քայլափոխին, այնքան ժամանակ, որքան կպահանջվի, պատերազմի այս մութ օրերից մինչև այն պահը, երբ դուք կանցնեք Եվրոպական միություն տանող դուռը։ Ես հավատում եմ Ուկրաինայի եվրոպական ապագային», - ասել է Եվրամիության գործադիր մարմնի ղեկավարը։

15:48 - 01 հուլիսի, 2022

Տոյվո Կլաարը ողջունել է Վրաստանում անցկացված հայ և ադրբեջանցի փորձագետների հանդիպումը |factor.am|

factor.am: ԵՄ աջակցությամբ ավելի քան 40 հայ ու ադրբեջանցի փորձագետներ են հանդիպել կլոր սեղանի շուրջ Վրաստանի Կախեթի քաղաքում՝ հունիսի 29-30-ը։ ԵՄ-ի, ՄԱԿ-ի և Եվրոպայում անվտանգության և համագործակցության կազմակերպության գործընկերների հետ նրանք քննարկել են ապագա խաղաղ Հարավային Կովկասի հնարավոր սցենարները: Քննարկումները վերաբերվել են տնտեսության և կապի, անվտանգության, կառավարման և մշակութային քաղաքականության ոլորտներում սցենարներին, գնահատվել են ազգային կառավարությունների, քաղաքացիական հասարակության և արտաքին դերակատարների կողմից հնարավոր քայլերը՝ բարելավել հայերի և ադրբեջանցիների միջև երկարատև խաղաղության առջև ծառացած բազմաթիվ մարտահրավերների կենսունակ լուծումների հեռանկարները: Շարունակությունը՝ factor.am-ում

12:18 - 01 հուլիսի, 2022

Վաղը նորություններ կլինեն. Ուկրաինայի եվրաինտեգրումը հնարավոր չէ կանգնեցնել. Զելենսկի |tert.am|

tert.am: Առաջիկայում պետք է «նորություններ» սպասել Եվրամիությանը Ուկրաինայի անդամակցության բանակցությունների թեմայով։ Այս մասին հինգշաբթի՝ հունիսի 30-ին, իր տեսաուղերձում հայտնել է Ուկրաինայի նախագահ Վլադիմիր Զելենսկին։«Մեր առաջնահերթությունը, սա կլինի մեր պետության բոլոր ներկայացուցիչների առաջադրանքը. ամեն ինչ պետք է արվի որքան հնարավոր է շուտ, որպեսզի նախապատրաստվի անդամակցության շուրջ բանակցությունների մեկնարկը: Պաշտոնյաները, պատգամավորները, դիվանագետները պետք է աշխատեն այդ հարցի շուրջ օրը 24 ժամ, յոթ օր: Ի դեպ, վաղը նորություններ կլինեն այս թեմայով, ուկրաինական եվրաինտեգրումը հնարավոր չէ կանգնեցնել»,- ասել է նա։

10:20 - 01 հուլիսի, 2022

ԱՄՆ-ի և ԵՄ-ի ներկայացուցիչները քննարկել են տիեզերքում համագործակցության հարցերը |armenpress.am|

armenpress.am: ԱՄՆ-ի և Եվրամիության ներկայացուցիչները հունիսի 29-ին Վաշինգտոնում անցկացրել են տիեզերքի շուրջ երկխոսության (Space Dialogue) հերթական հանդիպումը, որի ընթացքում քննարկել են այդ թվում տիեզերական տարածությունում գործունեության անվտանգության ապահովումը: Այդ մասին ասված է ԱՄՆ-ի Պետդեպարտամենտի՝ հունիսի 29-ին տարածած հայտարարության մեջ: «Պաշտոնատար անձինք քննարկել են համագործակցությունը Երկրի մակերևույթի դիտարկման և տարերային աղետների արձագանքման, գլոբալ արբանյակային նավիգացիոն համակարգերի, տիեզերական թռիչքների անվտանգության, տիեզերքի իրադրության դիտարկման, ինչպես նաև անդրատլանտյան համագործակցության համար հնարավորությունների բնագավառում՝ տիեզերական տարածությունում անվտանգության և երկարաժամկետ կայուն գործունեության ապահովման նպատակով»,- նշված է տեքստում, հաղորդել է ՏԱՍՍ-ը:

12:37 - 30 հունիսի, 2022

Թուրքիայի ԱԳՆ-ն Անկարայի դեմ ԵՄ կայացրած որոշումները կողմնակալ է համարում |1lurer.am|

1lurer.am: Հունիսի 23-24-ը Բրյուսելում կայացած ԵՄ գագաթնաժողովին Անկարայի դեմ կայացված որոշումները կողմնակալ են: Նման հայտարարությամբ է հանդես եկել Թուրքիայի ԱԳՆ-ն։ «Միջերկրական ծովի արևելյան հատվածի և Էգեյան ծովի վերաբերյալ ծայրահեղական և անօրինական թեզերը օրինականացնելու Եվրամիության փորձերն անընդունելի են»,- ընդգծել են գերատեսչությունում՝ նկատի ունենալով, որ Կիպրոսի, Էգեյան ծովի ավազանի կղզիների և դրանց ռազմականացման շուրջ խնդիրների կարգավորման հարցում Բրյուսելը Հունաստանի կողմից է։ Հայտարարության մեջ ընդգծվում է, որ «այդ որոշումները ոչ միայն չեն նպաստում խնդրի լուծմանը, այլև խաթարում են տարածաշրջանային կայունությունը»։ Միևնույն ժամանակ, Անկարան ողջունել է Ուկրաինային և Մոլդովային ԵՄ անդամակցության թեկնածուի կարգավիճակի տրամադրումը, սակայն տարօրինակ է որակել այն փաստը, որ Միությունն այդ հարցով բանակցություններ չի սկսել Ալբանիայի, Մակեդոնիայի ու Բոսնիա և Հերցեգովինայի հետ։ Հետևե՛ք մեզ նաև Telegram-ում

12:09 - 25 հունիսի, 2022

Ուկրաինային և Մոլդովային ԵՄ անդամի թեկնածուի կարգավիճակ տրամադրելը Եվրոպայի ներքին գործն է․ Պեսկով

Եվրամիության անդամի թեկնածուի կարգավիճակի տրամադրումն Ուկրաինային և Մոլդովային, եվրոպական ներքին գործ է, գլխավորը, որ այդ գործընթացները մեծ խնդիրներ չառաջացնեն Ռուսաստանի հետ նշված երկրների հարաբերություններում, «Ինտերֆաքսի» փոխանցմամբ՝ հայտարարել է ՌԴ նախագահի մամուլի քարտուղար Դմիտրի Պեսկովը։ «Նախ, դրանք, իհարկե, եվրոպական ներքին գործեր են։ Մեզ համար շատ կարևոր է, որ այդ գործընթացներն ավելի շատ խնդիրներ չբերեն մեզ և մեզ հետ նշված երկրների հարաբերություններում։ Այդ խնդիրներն, առանց այն էլ, քիչ չեն», - ասել է Պեսկովը։ Գլխավորն այն է, որ այդ ամենը չհանգեցնի Ռուսաստանի և ԵՄ հարաբերությունների հետագա վատթարացման, հավելել է Պեսկովը։ Նորա Վանյան

16:47 - 24 հունիսի, 2022

ՍԴ նախագահը Դունյա Միյատովիչի հետ զրույցում շեշտել է հայ ռազմագերիների հայրենադարձման հարցի հրատապությունը

2022 թվականի հունիսի 23-ին աշխատանքային այցով Ստրասբուրգում գտնվող Սահմանադրական դատարանի նախագահ Արման Դիլանյանը հանդիպել է Եվրոպայի խորհրդի՝ Մարդու իրավունքների հանձնակատար Դունյա Միյատովիչի հետ։ Շնորհակալություն հայտնելով ջերմ ընդունելության համար՝ Արման Դիլանյանն առանձնահատուկ կարևորել է Եվրոպայի խորհրդի՝ Մարդու իրավունքների հանձնակատարի դերը եվրոպական տարածաշրջանում հասարակության տարբեր խմբերի իրավունքների պաշտպանության գործում: Դունյա Միյատովիչը, շնորհակալություն հայտնելով Սահմանադրական դատարանի պատվիրակությանը Ստրասբուրգ աշխատանքային այց կատարելու համար, նշել է, որ մշտապես հետևում է Հայաստանի Հանրապետությունում մարդու իրավունքների և իրավունքի գերակայության ոլորտներում տեղի ունեցող զարգացումներին և ողջունել է մեր երկրում իրականացվող ժողովրդավարական, այդ թվում՝ դատաիրավական բարեփոխումները: Անդրադառնալով Արցախում հետպատերազմյան իրավիճակին՝ Սահմանադրական դատարանի նախագահը շեշտել է հայ ռազմագերիների անհապաղ հայրենադարձման հարցի հրատապությունն ու արժևորել է ԵԽ մարդու իրավունքների հանձնակատարի դերակատարումն այս հարցում։ Զրուցակիցները մտքեր են փոխանակել Սահմանադրական դատարանի և ԵԽ Մարդու իրավունքների հանձնակատարի գրասենյակի միջև հետագա համագործակցության ակտիվացման շուրջ:

15:03 - 24 հունիսի, 2022

Եվրամիության խորհուրդը որոշել է ճանաչել Վրաստանի եվրոպական հեռանկարը․ Շառլ Միշել |factor.am|

factor.am: Եվրամիության խորհուրդը որոշել է ճանաչել Վրաստանի եվրոպական հեռանկարը։ Այս մասին հայտնել է Եվրոպական խորհրդի նախագահ Շառլ Միշելը, գրում է Գրուզիա օնլայնը։ «Եվրամիության խորհուրդը որոշել է ճանաչել Վրաստանի եվրոպական հեռանկարը և պատրաստ է թեկնածուի կարգավիճակ տալ, հենց որ առաջնահերթությունները կատարվեն»,- թվիթերում գրել է Շառլ Միշելը։ «Շնորհավորում եմ վրաց ժողովրդին։ Սա պատմական պահ է Եվրամիության ու Վրաստանի հարաբերություններում, Վրաստանի ապագան՝ ԵՄ-ում է»,- Թվիթերում վրացերեն գրառում է արել եվրոպացի պաշտոնյան։

13:23 - 24 հունիսի, 2022