Արայիկ Վլադիմիրի Հարությունյան

Արայիկ Վլադիմիրի Հարությունյանը (դեկտեմբերի 14, 1973, Ստեփանակերտ) Արցախի Հանրապետության գործող նախագահն է։ Խոշոր գործարար է, պետական-քաղաքական գործիչ Արցախի Հանրապետությունում, Արցախի նախկին պետական նախարարն է, Ազատ Հայրենիք կուսակցության նախագահը, տեխնիկական գիտությունների թեկնածու։

1990թ․ ավարտել է Ստեփանակերտի ֆիզմաթ դպրոցը եւ նույն թվականին ընդունվել Երեւանի ժողտնտեսության ինստիտուտը։ 1994թ․ տեղափոխվել եւ 1995թ․ ավարտել է Արցախի պետական համալսարանի տնտեսագիտական ֆակուլտետը։ 1996թ․ ընդունվել եւ 1998թ․ ավարտել է ԱրՊՀ ասպիրանտուրան՝ տնտեսագիտություն մասնագիտությամբ։ 2013-ին պաշտպանել է ատենախոսությունը եւ դարձել տեխնիկական գիտությունների թեկնածու։

1995-1997 թվականներին աշխատել է ԼՂՀ էկոնոմիկայի եւ ֆինանսների նախարարությունում՝ որպես նախարարի օգնական։ 1997-1999 թվականներին աշխատել է Հայագրոբանկի Ասկերանի մասնաճյուղում՝ որպես կառավարիչ։

1999-2004 թվականներին զբաղեցրել է Հայագրոբանկի Ստեփանակերտի մասնաճյուղի կառավարչի պաշտոնը։

2005- թվականին ընտրվել է ԼՂՀ ԱԺ պատգամավոր, մոտ երկու տարի նախագահել խորհրդարանի ֆինանսաբյուջետային եւ տնտեսական կառավարման հարցերի մշտական հանձնաժողովում, միաժամանակ եղել է Հայրենիք խմբակցության ղեկավարը։

2005- 2007 թթ․ եղել է Ազատ Հայրենիք կուսակցության համանախագահը, ապա նախագահը:

2007- 2009թթ -Պատգամավորական գործունեությունը դադարեցրել եւ կուսակցապետի պաշտոնը թողել է ԼՂՀ վարչապետ նշանակվելու կապակցությամբ։

Արայիկ Հարությունյանը ԼՂՀ Նախագահի հրամանագրով վարչապետ է նշանակվել 2007 թվականի սեպտեմբերի 14-ին։ 2009 թ. հոկտեմբերից վերընտրվել է Ազատ Հայրենիք կուսակցության նախագահ։ ԱՀ Նախագահի հրամանագրով 2012 թվականին վերանշանակվել է ԱՀ վարչապետ։ 2017թ-ին որպես վարչապետ եւ իշխող կուսակցության ղեկավար աջակցել է Արցախում իրականացվող սահմանադրական փոփոխություններին, որի արդյունքում գործող նախագահը շարունակել է պաշտոնավարումը երրորդ ժամկետով առանց ընտրությունների անցկացման:

Նախագահի 2017թ․ սեպտեմբերի 25-ի հրամանագրով նշանակվել է Արցախի Հանրապետության պետական նախարար: 2018թ․ հունիսի 6-ին ազատվել է ԱՀ պետական նախարարի պաշտոնից՝ իր դիմումի համաձայն, ապա նշանակվել Բակո Սահակյանի հատուկ հանձնարարությունների գծով խորհրդատու:

2020 թվականից Արցախի Հանրապետության նախագահն է։

Մեր էներգետիկ անկախությունը այլընտրանք չունի, չփորձե՛ք, չփորձե՛ք. Արայիկ Հարությունյան |armtimes.com|

armtimes.com: «Երեւի մոլորակի ամենաապահով երկիրն ենք համարվում կամ երկրներից մեկը. ընդամենը ունեցել ենք 8 վարակվածության դեպք, մնացել են 2-ը». «Զրույց քաղաքացու հետ» ձեւաչափով ֆեյսբուքյան եթերում քիչ առաջ այս մասին հայտարարեց Արցախի նորընտիր նախագահ Արայիկ Հարությունյանը: Այդ առումով նա շնորհակալություն հայտնեց բոլոր բուժաշխատողներին, պատասխանատուներին, գործող իշխանություններին: «Մեղադրանք չլինի, բայց շատերը անհամբեր սպասում էին վատ լուրերի (անհամբերը չակրտավոր կամ բաց)՝ ամեն քայլափոխի կասկածի տակ դնելով ընտրությունները կամ ընտրություների կազմակերպումը: Ու չէին թաքցնում ոգեւորությունը, երբ որեւէ հիվանդի մասին խոսվում էր: Անհամբեր սպասում էին, որ այդ հիվանդից պետք է տարածվեր: Աստված մեզ հետ էր եւ Ղարաբաղում այսօր ունենք նորմալ իրավիճակ»,- հայտարարեց Հարությունյանը: Չնայած սրան, նա ունի մտավախություն, որ կարող է տարածվել վիրուսը: Ասաց, որ երեկ քայլել է Ստեփանակերտի հրապարակում եւ տեսել հարյուրավոր, միգուցե նաեւ հազարավոր մարդկանց, որոնք քայլելիս են եղել առանց սոցիալական հեռավորությունը եւ մյուս կանոնները պահելու: Նորընտիր նախագահը զգուշացնում է, որ այսօրվանից սկսած ամեն մեկից է կախված վարակի տարածման ռիսկը, յուրաքանչյուր բնակիչ պետք է գիտակցի, որ եթե չգիտակցի դա՝ կարող է վարակել իր հարազատներին, բացի այդ վնաս հասցնել պետությանը: «Վստահ եմ, որ Արցախը ապահովագրված է պարենային առումով: Գործող կառավարության կողմից բավականին մեծ աշխատանք է կատարվել առաջիկա ժամանակահատվածում մեր պարենային խնդրի լուծման ուղղությամբ. գարնանացան աշխատանքները արդեն ավարտվում են, աշնանացանի կատարած ծավալները թույլ են տալիս ոչ միայն ապահովագրել մեզ պարենային անվտանգության առումով, այլեւ լուրջ ներդրում ունենալ Հայաստանի պարենային անվտանգության խնդրում: Բայց Հայաստանն ունի այդ խնդիրը: մեր քույր ու եղբայրներն ունեն այդ խնդիրը եւ մեր առաջիկա աշխատանքները հենց ուղղված են լինելու ընդհանուր՝ Հայաստանի Հանրապետության եւ Արցախի պարենային անվտանգության խնդրի լուծման ուղղությամբ: Այն չօգտագործված ռեսուրսները, չօգտագործվող տարածքները, չօգտագործվող վարելահողերը, գյուղատնտեսական նշանակության հողերը պետք է ամբողջությամբ օգտագործել եւ, ինձ թվում է, Հայաստանի իշխանությունների հետ միասին հաջողվելու է իրականացնել այդ ամենակարեւոր խնդիրը»,- քաղաքացիներին ուղղված իր խոսքում ասաց Արցախի նորընտիր նախագահը: Խոսելով էներգետիկ անվտանգության մասին՝ Հարությունյանը շատ կարեւորեց անկախության խնդիրը: Ըստ նրա, քանի որ Հայաստանի եւ Արցախի էներգետիկ ռեսուրսները հիմնականում ներկրվում են, ուստի դրանք ցանկացած պահի կարող են վտանգված լինել թե՛ աշխարհաքաղաքական, թե՛ ֆինանսական խնդիրներով պայմանավորված: Իսկ անկախության համար, ըստ Հարությունյանի, շատ կարեւոր են հիդրոէլեկտրակայանները: «Նորից ուզում եմ կրկնել․ այն մարդիկ, որոնք դեմ են այդ ծրագրին, մեր երկրի թշնամիներն են։ Ուզում եմ նորից բարձրաձայնել․ էներգետիկ անկախությունը, անվտանգությունն այլընտրանք չունեն, չփորձե՛ք, չփորձե՛ք։ Եվ մենք շարունակելու ենք անկախության ծրագիրը»,- ընդգծեց Արայիկ Հարությունյանը։ Հիշեցնենք, որ Արցախում մեծ դժգոհություն է առաջացնում հէկերի շինարարությունը: Քաղաքագետ Ալեքսանդր Քանանյանն անգամ հացադուլ էր ստեղծել դրանցից մեկի շինարարությունը կասեցնելու պահանջով: Մյուս խնդիրը, որ Հարությունյանը առանձնացրել էր մայիսմեկյան տոնի առիթով անդրադառնալու համար՝ համերաշխությունն է. «Վերջին օրերին ես իրականացրել եմ խորհրդատվական, համագործակցության հանդիպումներ 3 քաղաքական ուժերի, քաղաքական գործիչների հետ: Հանդիմում եմ ունեցել ՀՅԴ-ի, Արցախի ժողովրդավարական կուսակցության ներկայացուցիչների, Սամվել Բաբայանի, Մասիս Մայիլյանի հետ, շարունակելու եմ հանդիպումներս արտախորհրդարանական ուժերի հետ, որոնք ցանություն ունեն եւ այն դեմքերի հետ, որոնք մասնակցել են ընտրություններին, որպեսզի ունենանք համերաշխ հասարակություն: Իրականում շատ կառուցողական հանդիպումներ էին: Մենք շարունակելու ենք խորհրդակցելու այդ հնարավորությունը, ստեզծելու ենք շատ արդյունավետ քաղաքական համակարգ՝ իմ գլխավորությամբ որպես երկրի նախագահ, բայց բոլորին տալով հնարավորություն մասնակցելու մեր երկրի ոչ միայն կառավարմանը, այլեւ այս պատվաբեր առաքելության իրականացմանը»,- մանրամասնեց Արցախի նորընտիր նախագահը: Հիշեցնելով, որ ինքը պաշտոնը ստանձնելու է մայիսի 21-ին՝ նա ընդգծեց, որ դեռեւս որեւէ պաշտոնում որեւէ մեկի նշանակման մասով որոշում չունի. «Շատ տարածված լուրեր կան, անհամբեր կամ համբերատար սպասում են կադրային նշանակումներին: Նշեմ, որ դեռ որեւէ որոշում չեմ կայացրել, կադրերի նշանակման առումով որոշումը կայացնելու եմ մայիսի 21-ից հետո՝ ստանձնելով երկրի ղեկավարի պաշտոնը: Իհարկե հանդիպումների ժամանակ կարող է կարծիքներ են հնչում տարբեր քաղաքական գործիչների կամ տարբեր պաշտոնյաների հետագա դերակատարության առումով, բայց դրանք ընդամենը խորհրդակցելու կամ քննարկելու համար են, եւ այդ առումով այն խոսակցությունները, որ կան՝ չեն համապատասխանում իրականությանը»,- ասաց Հարությունյանը՝ հավելելով, որ երբ որ որոշումներ կայացնի՝ կհրապարակի դրանք եւ կհիմնավորի: Պայմանները հետեւյալն են. բոլոր նշանակված պաշտոնյաները պետք է հարգանք վայելեն կամ իրենց աշխատանքի ընթացքում պահպանեն այդ հարգանքի մթնոլորտը, լինեն թափանցիկ, բաց, շփվող եւ իհարկե արհեստավարժ:

21:27 - 01 մայիսի, 2020

Բացառվում են Արցախի իշխանությունների կողմից միակողմանի զիջումներ կամ անհամարժեք փոխզիջումներ․ Արայիկ Հարությունյան

Արցախի Հանրապետության նախագահ Արայիկ Հարությունյանը հայտարարություն է տարածել ադրբեջանա-արցախյան հիմնախնդրի շուրջ վերջին օրերին տեղի ունեցող քննարկումների վերաբերյալ։ Ներկայացնում ենք ստորև․ «Հարգելի՛ հայրենակիցներ, Խորապես հասկանալով մեր հասարակության անհանգստությունները՝ պայմանավորված ադրբեջանա-արցախյան հիմնախնդրի շուրջ ԵԱՀԿ Մինսկի խմբի համանախագահների և Հայաստանի ու Ադրբեջանի իշխանությունների մասնակցությամբ պարբերաբար տեղի ունեցող քննարկումներով՝ մեկ անգամ ևս ցանկանում եմ վերահաստատել այդ հարցում մեր սկզբունքային դիրքորոշումը, որ առանց պաշտոնական Ստեփանակերտի լիարժեք ու լիիրավ ընդգրկվածության, որևէ արդյունավետ հանգրվանի հնարավոր չէ հասնել: Մենք շահագրգռված ենք հիմնախնդրի խաղաղ ու վերջնական կարգավորմամբ և գերազանցապես գիտակցում ենք, որ այն իր վճռական ազդեցությունն է ունենալու տարածաշրջանում կայուն եւ երկարատև խաղաղություն հաստատելու վրա, սակայն ակնկալում ենք նույն գիտակցումը ու պատասխանատվությունը նաև Ադրբեջանի կողմից: Իհարկե, մենք բարձր ենք գնահատում Հայաստանի Հանրապետության իշխանությունների բացառիկ դերակատարումն այս հարցում, բայց պետք է ընդունել, որ բանակցային սեղանին ներկայացված ցանկացած առաջարկի կամ փաստաթղթի շուրջ Արցախի ժողովրդի անունից բանակցելու համար առաջնային մանդատը ստացել են Արցախի Հանրապետության իշխանությունները: Կարևորելով ԵԱՀԿ Մինսկի խմբի գործադրած ջանքերը հակամարտության խաղաղ կարգավորման գործում և ուշադիր հետևելով ապրիլի 20-ին և 21-ին համանախագահների և արտգործնախարարների հետ առանձին, ապա՝ բոլոր կողմերի մասնակցությամբ տեղի ունեցած տեսակոնֆերանսներին՝ ցավոք, հերթական անգամ արձանագրում ենք, որ Ադրբեջանի իշխանությունները շարունակում են խուսափել հակամարտության իրական կողմի հետ ուղիղ բանակցությունների վարումից: Դա, առաջնագծում պարբերաբար կրկնվող սադրանքների և հայատյաց քաղաքականության հետ համատեղ, մեծապես նվազեցնում է պաշտոնական Բաքվի ցուցադրած ձգտումների ազնվության ու վստահելիության մակարդակը: Որպես Արցախի Հանրապետության ընտրված նախագահ՝ ես հայտարարում եմ՝ 1. Արցախի Հանրապետության իշխանությունները պետք է լիիրավ ու լիարժեք հիմունքներով մասնակցեն հակամարտության խաղաղ և վերջնական կարգավորմանն ուղղված գործընթացի բոլոր փուլերին. 2. Արցախի ժողովրդի անվտանգությունը որևէ պարագայում չի կարող վտանգի տակ դրվել կամ սակարկության ենթարկվել. 3. Առանց Արցախի ժողովրդի ինքնորոշման իրավունքի առաջնահերթ ճանաչման հակամարտության կարգավորման որևէ տարբերակ չի կարող կողմերի միջև բովանդակային քննարկման առարկա դառնալ. 4. Պետք է հստակ երաշխիքներով բացառվեն հակամարտության կարգավորման գործընթացում ուժի ու դրա սպառնալիքի կիրառման փորձերը, քանի որ հայ և ադրբեջանցի ժողովուրդներն արժանի են խաղաղության մեջ ապրելու. այլապես Արցախի Հանրապետությունը պատրաստ է անհամաչափ հակահարված տալու նախահարձակ Ադրբեջանին՝ ռազմական գործողությունները նաև տեղափոխելով նրա տարածք. 5. Հակամարտության կարգավորման ցանկացած տարբերակում բացառվում են Արցախի իշխանությունների կողմից միակողմանի զիջումներ կամ անհամաչափ ու անհամարժեք փոխզիջումներ. 6. Հակամարտության կարգավորման և դրա հարակից գործընթացներում հայ փախստականներն ու ներքին տեղահանված անձինք պետք է իրավահավասար ներգրավվածություն ունենան ադրբեջանցի փախստականների ու ներքին տեղահանված անձանց հետ միասին, իսկ նրանց հիմնախնդիրները՝ միանման ու միաժամանակյա լուծումներ ստանան. 7. Միջազգային հանրությունը (առաջնահերթորեն՝ ԵԱՀԿ-ն և համանախագահ երկրները) պետք է բացառեն Արցախի բնակիչների իրավունքների՝ հակամարտությամբ ու ԱՀ միջազգային կարգավիճակով պայմանավորված խախտումներն ու սահմանափակումները, ներառյալ՝ մարդու իրավունքներին առնչվող ու մարդասիրական միջազգային ծրագրերից փաստացի մեկուսացումը, որոնք Ադրբեջանը փորձում է կիրառել առնվազն որպես ճնշման միջոց՝ ի հեճուկս միջազգային իրավունքի հանրահայտ սկզբունքների: Արցախի իշխանություններն ինչպես նախկինում, այնպես էլ ապագայում պատրաստակամ են գործադրելու առավելագույն ջանքեր փոխադարձ հարգանքի մթնոլորտում կողմերի միջև վստահության ամրապնդման և հակամարտության խաղաղ ու վերջնական կարգավորման հարցում անհրաժեշտ կամք դրսևորելու և առաջընթաց արձանագրելու համար»:

12:02 - 22 ապրիլի, 2020