ՊԵԿ - infocom.am

2019-ի 6 ամիսներին տպված ՀԴՄ կտրոնների քանակով ունենք 40 տոկոսի աճ, իսկ շրջանառության առումով՝ 21 տոկոսի աճ.Դավիթ Անանյան

news.am: 2019 թվականի առաջին կիսամյակում մոտ 56,4 մլն հատ ՀԴՄ կտրոն ավել է տպվել 2018 թվականի համեմատ: Այս մասին, այսօր՝ հուլիսի 9-ին, լրագրողների հետ հանդիպման ժամանակ նշեց ՊԵԿ նախագահ Դավիթ Անանյանը: Նրա խոսքով, 2018 թվականի առաջին 6 ամիսներին տպվել է 139 մլն 774 հազար ՀԴՄ կտրոն, որն ապահովել է 685 մլրդ դրամի շրջանառություն, իսկ արդեն 2019-ին տպվել է 196 մլն 183 հազար հատ ՀԴՄ կտրոն, որն ապահովել է 831 մլրդ դրամի շրջանառություն. «56 մլն հատ ավել կտրոններն ապահովել են 145 մլրդ 950 մլն դրամի հարկվող շրջանառություն: Կտրոնների քանակով ունենք 40 տոկոսի աճ, իսկ շրջանառության առումով՝ ավելի քան 21 տոկոսի աճ»,-ասաց Անանյանը:

08:34 - 09 հուլիսի, 2019

Առաջին կիսամյակում պլանավորումները պետք է այլ կերպ արվեին. Դավիթ Անանյան |shantnews.am|

shantnews.am: Պետական եկամուտների կոմիտեի նախագահ Դավիթ Անանյանն այսօր լրագրողների հետ զրույցում ներկայացրել է ՊԵԿ-ի արդյունքները: ՊԵԿ նախագահը սլայդերի միջոցով լրագրողներին տվյալներ է ներկայացրել: Դավիթ Անանյանը նշել է, որ նախնական 645․5 միլիարդ է պլանավորված է եղել, ապա փոփոխվել է՝ դառնալով 650․7: Նրա խոսքերով՝ պետական բյուջեի մասին օրենքի համաձայն՝ հարկային օրենքի եկամուտները պլանավորված էին 1 տրիլիոն 402 հազար, իսկ հիմա փոփոխված տարբերակը 1 տրիլիոն 407 հազար է: «Ցուցանիշներն ուղենշային են, քանի որ Ֆինանսների նախարարությունը հիմք է ընդունում բյուջետային կատարողականները և հաշվի է առնում ընթացիկ տարվա ծախսային համամասնությունը: Առաջին կիսամյակում հարկային եկամուտները փաստացի կազմել են 713․4 միլիարդ, կամ կատարողականի առումով կա 63 միլիարդ գերակատարում, որը կազմում է 9․6%»: ՊԵԿ նախագահը նշեց, որ հարկային եկամտի շահութաբերության առումով երկրորդ եռամսյակն աչքի է ընկնում: Անանյանը նշեց, որ մարտը, հունիսը, սեպտեմբերը և դեկտեմբերն արդյունավետ ամիսներ են, սակայն հունիս ամսին կատարվում է կանխավճարների վերահաշվարկ, և մինչ նոր շահութահարակի ներկայացումը, կանխավճարները կատարվում են նախորդ եռամսյակի ցուցանիշին հավասար: Նրա խոսքերով՝ հունիս ամիսն աննախադեպ էր:

08:07 - 09 հուլիսի, 2019

ՊԵԿ փոխնախագահն ընդունել է բողոքի ակցիա իրականացնող մետաղի ջարդոն արտահանողներին. նրանք դադարեցրել են ակցիան |armtimes.com|

armtimes.com։ Մետաղի ջարդոնով բեռնված 2 ավտոմեքենա մոտ մեկուկես ժամ առաջ փակել էին Պետական եկամուտների կոմիտեի մուտքը: Նրանք բողոքում էին «Պետական տուրքի մասին» օրենքում փոփոխությունների նախագծից, որով մետաղական ջարդոնի արտահանման համար պետտուրք է սահմանվում։ ՊԵԿ փոխնախագահ Շուշանիկ Ներսիսյանն ընդունել է բողոքի ակցիա իրականացնողներին՝ լսել է նրանց բարձրացրած հարցը: Դեռեւս քննարկումներ պետք է տեղի ունենան: Ակցիայի մասնակիցները ՊԵԿ փոխնախագահի հետ հանդիպումից հետո դադարեցրել են իրենց բողոքը: Հիշեցնենք, որ «Հարկային օրենսգրքի» փոփոխությունների փաթեթում ներառված «Պետտուրքի մասին փոփոխություններ եւ լրացումներ կատարելու մասին օրենքի» նախագծով մետաղի թափոնների արտահանման համար պետտուրք սահմանելու օրենքի նախագիծը դեռեւս Ազգային ժողովում է, եւ այն չի հաստատվել։

08:36 - 08 հուլիսի, 2019

Մաքսային ձևակերպումների ավարտից հետո տրամադրել մեքենայի ժամանակավոր համարանիշ․ նոր նախագիծ |hetq.am|

hetq.am։ Պետական եկամուտների կոմիտեն առաջարկում է տրանսպորտային միջոցի մաքսային ձևակերպումից հետո տրամադրել մեքենայի ժամանակավոր համարանիշ, մինչ ոստիկանությունից կստացվի հիմնականը։ Կոմիտեն նման առաջարկությամբ նախագիծ է քննարկման ներկայացրել իրավական ակտերի նախագծերի հրապարակման միասնական կայքում։ Պետական եկամուտների կոմիտեի փոխանցմամբ՝ «Ժամանակավոր» տեսակի համարանիշներ կարող են հատկացնել նաև տրանսպորտային միջոցների առևտրային գործունեություն իրականացնող տնտեսվարող և տրանսպորտային միջոցների մաքսային ձևակերպում իրականացնող մաքսային մարմինները։ Կոմիտեն ակնկալում է այս կերպ կարգավորել առանց համարանիշների մաքսատներից բաց թողնվող տրանսպորտային միջոցների սեփականատերերի համար առաջացող խնդիրները:ՊԵԿ-ն ընդգծել է, որ մաքսային ձևակերպումների ավարտից հետո մինչև համապատասխան համարանիշ ստանալը վարորդները տրանսպորտային միջոցները վարում են առանց հաշվառման համարանիշների, ինչը հակասում է «Հայաստանի Հանրապետության ճանապարհային երթևեկության անվտանգության ապահովման մասին» օրենքին։

13:40 - 04 հուլիսի, 2019

Էդվարդ Հովհաննիսյանը նշանակվել է ՊԵԿ նախագահի տեղակալ

Էդվարդ Հովհաննիսյանը նշանակվել է պետական եկամուտների կոմիտեի նախագահի տեղակալ: Նշանակման որոշումը վարչապետ Նիկոլ Փաշինյանը ստորագրել է երեկ:Էդվարդ Հովհաննիսյանը փետրվարի 14-ից ղեկավարել է ՊԵԿ հետաքննության և օպերատիվ հետախուզության վարչությունը: Կոմիտեում աշխատում է 2009թ-ից:

08:03 - 02 հուլիսի, 2019

Հայտնաբերվել է մաքսային հսկողությունից թաքցված 43 կգ դեղորայք

Բագրատաշենի մաքսակետում Պետական եկամուտների կոմիտեի մաքսանենգության դեմ պայքարի վարչության Գուգարքի տարածաշրջանային բաժնի և Բագրատաշենի մաքսային կետ-բաժնի աշխատակիցները մաքսային հսկողության շրջանակում զննման են ենթարկել Վրաստանից Հայաստան ժամանած Հայաստանի քաղաքացի Ա.Ս.-ի տրանսպորտային միջոցը: Արդյունքում ավտոմեքենայի հետնամասի նստատեղերի և բեռնախցիկի միջև ընկած հատվածից հայտնաբերվել են մաքսային հսկողությունից թաքցված 43կգ ընդհանուր քաշով տարբեր տեսակի դեղամիջոցներ։ ՊԵԿ-ը տեղեկացնում է, որ փաստի առթիվ կազմվել է արձանագրություն` մաքսային օրենսգրքի 201-րդ հոդվածով նախատեսված մաքսային կանոնների խախտման հատկանիշներով։

12:37 - 01 հուլիսի, 2019

Եթե Երևանում չի լինելու ավտոմեքենայի մաքսատուն, լինելու են հյուսիսային ու հարավային արտաքին տնտեսական գործունեության սպասարկման կենտրոններ. ՊԵԿ նախագահ |tert.am|

tert.am։ Ժամանակի ընթացքում Երևանից մաքսային ձևակերպումները դուրս են գալու, ունենալու ենք հյուսային ու հարավային արտաքին տնտեսական գործունեության սպասարկման կենտրոններ: Այս մասին լրագրողների հետ զրույցում ասաց ՊԵԿ նախագահ Դավիթ Անանյանը՝ խոսելով Գյումրիում մաքսատուն կառուցելու ծրագրի մասին: «Մեկնարկը տրվել է, պրոցես է գնալու, մի քանի ամիսների ընթացքում չի լինելու, դա կլինի տարիների ընթացքում: Ժամանակի ընթացքում Երևանից մաքսային ձևակերպումները դուրս են գալու, ունենալու ենք հյուսային ու հարավային արտաքին տնտեսական գործունեության սպասարկման կենտրոններ: Պետական գործառույթները կենտրոնանալու են մեկ տանիքի ներքո»,- ասաց Դավիթ Անանյանը:Նա նշեց, որ հյուսիսային կենտրոնի՝ Շիրակի, վայրն ընտրվել է: «Եթե Երևանում չի լինելու ավտոմեքենայի մաքսատուն, լինելու է Գյումրիում՝ ավելի մեծ գործառույթներով: Սրանով չի՞ կատարվում վարչապետի հանձնարարականը: Ֆինանսական միջոցները, հավանաբար, կլինեն դոնորների, գրանտային միջոցների հաշվին: Կա նախնական հաշվարկ, որ 15-ից 21 միլիոն դոլարի շրջանակներում կլինեն միջոցները»,- նշեց Անանյանը:

09:09 - 01 հուլիսի, 2019