Երևանի քաղաքապետարան

Երևանի քաղաքապետարանը համայնքային ծառայություններ իրականացնող պետական մարմին, որի նպատակն ու խնդիրն ավագանու և քաղաքապետի լիազորությունների լիարժեք և արդյունավետ իրականացման, ինչպես նաև քաղաքացիական իրավահարաբերություններին ավագանու և քաղաքապետի մասնակցության ապահովումն է։ Երևանի քաղաքապետը և ավագանին քաղաքապետարանի միջոցով համակարգում Երևանի ենթակայության հիմնարկների, առևտրային և ոչ առևտրային կազմակերպությունների գործունեությունը, կազմակերպում հանրապետական գործադիր մարմինների և դրանց՝ Երևանի տարածքային ծառայությունների հետ հարաբերությունները։

Քաղաքապետարանը ստեղծվում, վերակազմակերպվում և նրա գործունեությունը դադարեցվում է ավագանու որոշմամբ։

Նուրբ օրգանական քիմիայի ինստիտուտի մոտ բազմաֆունկցիոնալ համալիրի կառուցումը վնասելու է Կենտրոնի ապագա գոյությունը․ գիտնականները մտահոգ են

«Գրին Փրոփերթի Դիվելոփմենթ» ՓԲԸ-ն, որը Երեւանի Ազատության 26/1 հասցեի ՀՀ ԳԱԱ նուրբ օրգանական քիմիայի ինստիտուտի մոտ գտնվող ջրավազանի զբաղեցրած հողատարածքում նախատեսում է բազմաֆունկցիոնալ համալիր կառուցել, երեկ վաղ առավոտյան փորձել է կտրել կենտրոնի ճաղավանդակները՝ ներս անցնելու եւ որոշ աշխատանքներ իրականացնելու համար։ Սա առաջացրել է Ինստիտուտի աշխատակիցների բողոքը․ նրանց պնդմամբ՝ այդ տարածքում բազմաֆունկցիոնալ համալիրի կառուցումը խոչընդոտելու է Ինստիտուտի բնականոն աշխատանքին․ Կենտրոնի աշխատակիցներն անթույլատրելի են համարում քիմիական գիտատեխնոլոգիական գործունեությամբ զբաղվող կենտրոնի օտարված տարածքում ջրավազանի փոխարեն բարձրահարկ բնակելի համալիրի կառուցումը՝ շեշտելով, որ Գիտատեխնոլոգիական կենտրոնը եւ բնակելի շենքը պարզապես անհամատեղելի են։ «Գրին Փրոփերթի Դիվելոփմենթ» ընկերությունն Ինստիտուտի մոտ գտնվող գույքը ձեռք է բերել 2019 թվականի մայիսին, նույն թվականի սեպտեմբերի 29-ին ՓԲԸ-ն կառուցապատման համար դիմում է ներկայացրել քաղաքապետարան՝ հողատարածքում շինարարական թույլտվություն ստանալու համար։ Նախատեսում են խառը կառուցապատում իրականացնել՝ 50%-ը բիզնես կենտրոն, մյուս մասը՝ հյուրանոցային բնակելի համալիր։ Շինթույլտվություն Ընկերությունը դեռեւս չի ստացել, ինչպես Երեւանի քաղաքապետարանից հայտնել են Infocom-ին, բայց ստացել է նախագծման թույլտվություն․ ըստ ամենայնի հենց այդ հիմքով էլ երեկ նախաձեռնել են իրենց աշխատանքները։ «Ժամը 7-ին եկել են, պարիսպը, որը մեր գույքն է, փորձել են կտրել, մեր աշխատակիցները չեն թողել, հետո կարմիր բերետավորներ են եկել, իրենց օգնությամբ Ընկերությունը դոմիկ է տեղադրել, տեխնիկա են բերել տարածք»,- Infocom-ի հետ զրույցում մանրամասնում է Նուրբ օրգանական քիմիայի ինստիտուտի երիտասարդ գիտնականների խորհրդի նախագահ Ռոբերտ Հակոբյանը, որի խոսքով՝ իրենք Ընկերության կամ դրա սեփականտիրոջ հետ խնդիր եւ խոսելիք գործնականում չունեն, իրենց համակար այժմ շատ կարեւոր է կառավարության դիրքորոշումը․ «Այդ կառույցը վնասելու է մեր Ինստիտուտի ապագա գոյությունը։ Հիմա կառավարությունը պետք է հստակ դիրքորոշում ունենա՝ էդ կառո՞ւյցն է պետք, թե՞ Ինստիտուտը։ Թղթերով ամեն ինչ նորմալ է, բայց սա ապօրինությունների հետեւանք է։ Պետք է հաշվի առնել՝ սա ինչ հետեւանքներ է բերելու, վաղը-մյուս օրը շենքը կառուցվեց, բնակելի շենք է լինելու, բնակիչները բողոքեցին՝ հոտեր-բաներ․․․ Մեծ մասն անվտանգ է լինելու, բայց հոտեր լինելու են, կարո՞ղ ես բնակիչներին բացատրել, որ դա անվտանգ է, չես կարող։ Բողոքներ կլինեն, ինստիտուտը կփակեն»,- մտահոգություն ունի մեր զրուցակիցը։ Հակոբյանի համոզմամբ՝ ուժեղ գիտությունն առանց նման կենտրոնի անհնար է, քանի որ այն ոչ միայն գիտելիքի ու գիտության տեսանկյունից սեփական արտադրանքն ունի, այլ նաեւ դեղեր է արտադրում, որոնք ոչ միայն Հայաստանում են սպառվում, այլեւ արտերկրում․ «Մենք նաեւ հանդիսանում ենք որակյալ եւ մրցունակ կադրերի դարբնոց, մեզ մոտով անցած շատ մարդիկ հանրապետության տարբեր բուհերում ու գիտահետազոտական կենտրոններում են աշխատում՝ չհաշված մասնավոր ոլորտը։ Մեզ ոչ միայն պետությունն է գրանտային միջոցներ տրամադրում, այլ նաեւ համագործակցում ենք այլ երկրների հետ՝ Սաուդյան Արաբիա, Շվեյացարիա․ նրանց մեր կիրառական արդյունքը շատ է հետաքրքրում, ու մենք այդ ամենը տալիս ենք»,- նշում է Ինստիտուտի երիտասարդ գիտնականների խորհրդի նախագահը։ Ինստիտուտի աշխատակիցները նամակներ են գրել պատկան մարմիններին ոչ միայն այսօր, այլ նաեւ դեռ անցյալ ամռանը՝ բարձրաձայնելով իրենց մտահոգությունների մասին ու ակնկալելով խնդրին արդարացի լուծում, սակայն էական պատասխաններ չեն ստացել։ Հիմնավորելով, թե ինչու են Գիտատեխնոլոգիական կենտրոնն ու բնակելի համալիրն ուղղակի անհամատեղելի՝ Կենտրոնի աշխատակիցները նշել են, որ 30 մետր շառավղով գործող քիմիական լաբորատորիաների անմիջապես հարեւանությամբ շենք կառուցելն օրենքով արգելվում է։ Բացի դրանից՝ Կենտրոնում առկա սարքերից երկուսը, որոնց ընդհանուր արժեքը կազմում է մոտավորապես 1,000,000 ԱՄՆ դոլար, շատ զգայուն են եւ ցանկացած ցնցումից կարող են վնասվել եւ այլեւս չաշխատել։ Սարքերից ամենանորը՝ 600,000 եվրո արժողությամբ գերժամանակակից միջուկա-մագնիսական ռեզոնանսի (ՄՄՌ) սարքը, տարածաշրջանում նմանատիպ միակ հատուկ սարքն է, առանց որի Հայաստանի բոլոր քիմիկոսներն ուղղակի չեն կարող աշխատել։ Ֆիզիկոսները եւ կենսաբանները եւս օգտվում են այդ սարքից, քանի որ շատ փորձարարական աշխատանքներ անմիջապես դրա հետ են կապված: Ռոբերտ Հակոբյանը մեր զրույցում նկատեց՝ Ինստիտուտի աշխատանքները հիմա էլ խաթարվել են, եւ դա այն պարագայում, երբ Ընկերությունն ընդամենը հորատ անցում է անում․ «Պատկերացնո՞ւմ եք՝ փորեն, ինչ կլինի։ Էդ աղմուկն արդեն իսկ խանգարում է։ Գիտությունը մենակ ֆինանսը չի, մարդը չի, նաեւ տարածքն է, որովհետեւ մարդը տեղ պիտի ունենա աշխատելու, էդ ամենը մոռանում են՝ առանց հետոյի մասին մտածելու»։ Պատկան մարմիններին ուղղած իրենց գրություններում Կենտրոնի աշխատակիցները նշել են, որ դեռ 2007թ.-ին Ինստիտուտն ապօրինի կերպով զրկվել է ջրավազանն օգտագործելու հնարավորությունից, սեփականատերը բետոնապատել է ջրավազանի ջրի մուտքն ու ելքը՝ զգալիորեն նվազեցնելով Ինստիտուտի անվտանգության մակարդակը․ «Ջրավազանը ոչ միայն անվտանգային ջրի պաշար է, այլեւ հանդիսանում է միկրոկլիմայի եւ միկրոէկոլոգիական համակարգի ամենակարեւոր մասը։ Ջրավազանի անվերադարձ կորուստը վերջնականապես կվտանգի ինստիտուտի բազմապրոֆիլ գործունեություն ծավալելու հեռանկարները»,- գրել են աշխատակիցները։ Խնդրո առարկա այդ հողամասի օտարման օրինականությունը Հայաստանի իրավապահներն ուսումնասիրության առարկա դարձրել են. 2016թ. ՀՀ գլխավոր դատախազության պետական շահերի պաշտպանության վարչության նախաձեռնությամբ գործարքը դարձվել ուսումնասիրության առարկա, որի ընթացքում պարզվել է, որ այդ անշարժ գույքի օտարման գործընթացում սահմանված կարգով գույքի գնահատում չի կատարվել, եւ հողը երրորդ անձի հանձնելու վերաբերյալ Երեւանի քաղաքապետի համաձայնության մասին որեւէ որոշում չի կայացվել: Այդ ուսումնասիրության արդյունքում է պարզվել, որ համայնքի սեփականությունը հանդիսացող՝ քաղաքացիներին եւ իրավաբանական անձանց սեփականության իրավունքով չփոխանցվող հողերի ցանկում գտնվող անշարժ գույքը օրենքի խախտմամբ է 2006թ. օտարվել կադաստրային արժեքից շուրջ 40 անգամ, իսկ շուկայական արժեքից շուրջ 220 անգամ պակաս արժեքով: Քանի որ ուսումնասիրությունների արդյունքում առերեւույթ հանցագործության մասին տվյալներ էին ստացվել, Դատախազությունը դրանք 2016թ. ուղարկել է ՀՀ ՔԿ Երեւան քաղաքի քննչական վարչություն, որտեղ ՀՀ քրեական օրենսգրքի 325-րդ հոդվածի հատկանիշներով հարուցվել է քրեական գործ եւ իրականացվել նախաքննություն: Նախաքննության արդյունքում հաստատված է համարվել, որ գործարքը կատարվել է կեղծ մասնագիտական եզրակացության, Երեւանի քաղաքապետարանի, Երեւանի Քանաքեռ-Զեյթուն վարչական շրջանի մի շարք պաշտոնատար անձանց կողմից ցուցաբերված պաշտոնական անփութության արդյունքում: Այսինքն՝ իրականացված նախաքննությամբ հանցագործության կատարման փաստը հաստատվել է: Բայց քրեական հետապնդում չիրականացնելու եւ քրեական գործի վարույթը կարճելու որոշումներ են կայացվել այդ գործով, քանի որ վերոնշյալ անձանց քրեական պատասխանատվության ենթարկելու օրենքով սահմանված ժամկետներն անցած են եղել: Երեւան քաղաքի դատախազությունը 2019 թվականին Երեւանի քաղաքապետին գրությամբ առաջարկել է ձեռնարկել ՀՀ օրենսդրությամբ նախատեսված համապատասխան միջոցներ՝ համայնքին պատճառված վնասը վերականգնելու, կնքված գործարքը, դրա կադաստրային գրանցումն ու սեփականության իրավունքի գրանցման վկայականն անվավեր ճանաչելու, դրանց անվավերության հետեւանքները կիրառելու եւ գույքը Երեւան համայնքին վերադարձնելու ուղղությամբ, ինչն այս պահի դրությամբ փաստացի տեղի չի ունեցել։ Ինստիտուտի աշխատակիցներն ակնկալում են հանդիպումներ իրավասու մարմինների հետ։ Նրանք հնարավոր բոլոր օրինական միջոցներով պայքարելու են՝ հարցին լուծում տալու համար․ «Էն մարդը, որն այս տարածում շինթույլտվություն կտրամադրի, կարելի է ասել՝ անհայրենիք մարդ կլինի, որովհետեւ սա նաեւ Հայաստանի անվտանգության հարցն է»,- եզրափակեց Նուրբ օրգանական քիմիայի ինստիտուտի երիտասարդ գիտնականների խորհրդի նախագահ Ռոբերտ Հակոբյանը։ Հայարփի Բաղդասարյան

18:48 - 14 փետրվարի, 2022

Մխոյանի պնդմամբ՝ իրեն ավագանուց հեռացնելը կապ ունի Մարությանին անվստահություն չհայտնելու եւ քաղաքաշինության ոլորտում իր պատկերացումների հետ

Երեւանի ավագանին մտադիր է «Իմ քայլը» խմբակցության անդամ Լուսինե Մխոյանին զրկել մանդատից՝ ավագանու նիստերին նրա բացակայությունների հիմնավորմամբ։ Մասնավորապես, ավագանու այսօրվա նիստում քննարկվում է Մխոյանի՝ Երեւան քաղաքի ավագանու անդամի լիազորությունները դադարեցնելու որոշման նախագիծը, որում նշված է, որ Լուսինե Մխոյանը չի մասնակցել ավագանու 7-րդ նստաշրջանի՝ 14.09.2021, 26.10.2021, 30.11.2021 թվականների հերթական նիստերին․ ««Երեւան քաղաքում տեղական ինքնակառավարման մասին» օրենքի 19-րդ հոդվածի 1-ին մասի 1-ին կետի համաձայն՝ ավագանու անդամը պարտավոր է մասնակցել ավագանու նիստերին, մինչդեռ Երեւան քաղաքի ավագանու անդամ Լուսինե Մխոյանը անհարգելի պատճառով բացակայել է ավագանու նիստերից, իսկ օրենքի 20-րդ հոդվածի 2-րդ մասի համաձայն՝ ավագանու անդամի լիազորությունները կարող են վաղաժամկետ դադարեցվել ավագանու անդամների ընդհանուր թվի ձայների մեծամասնությամբ ընդունված որոշմամբ, եթե նա մեկ հերթական նստաշրջանի ընթացքում անհարգելի պատճառով բացակայել է ավագանու նիստերի կամ քվեարկությունների ավելի քան կեսից կամ հանձնաժողովի նիստերի կեսից»,- ասված է նախագծում։ Նման որոշման իրական պատճառը, սակայն, ըստ Լուսինե Մխոյանի, իրականում այլ է․ նախ՝ նա կողմ չի եղել Հայկ Մարությանին անվստահություն հայտնելու գործընթացին, բացի դրանից՝ կարծում է՝ մեկ այլ պատճառ է նաեւ քաղաքաշինության, ճարտարապետության ոլորտում իր եւ մնացյալի պատկերացումների տարբերությունը։ Մխոյանը չի հերքում, որ ունի բացակայություններ, բայց ասում է՝ դրանք պայմանավորված են եղել իր երեխայի ծննդի, հետագայում իր վատառողջ լինելու հանգամանքով, այսինքն՝ դրանք, ըստ էության, հարգելի բացակայություններ են եղել․ «Հոկտեմբեր-նոյեմբեր ամիսներին բալիկս վատառողջ է եղել, ինչի մասին խմբակցութան ղեկավարին տեղյակ եմ պահել՝ նշելով, որ ոչ ոքի մոտ չեմ կարող թողնել եւ ստիպված եմ բացակայել»։ Մեր զրուցակցի հավաստմամբ՝ կան նաեւ տեղեկանքները, որոնք փաստում են, որ բացակայությունները հիվանդության պատճառով են եղել, սակայն իրենից այդ տեղեկանքները նույնիսկ չեն էլ ուզել։ Միեւնույն ժամանակ, Մխոյանը մեր զրույցում ընդգծում է, որ ինքը մասնակցել է հանձնաժողովի նիստերին, քանի որ հենց հանձնաժողովի նիստերի ընթացքում են նախագծերի վերաբերյալ քննարկումներն իրականացվում։ «Այո, բացակայություններ եղել են, քանի որ մանդատս վերցնելը համընկավ բալիկիս ծննդի հետ։ Այս ընթացքի բացակայությունների պատճառը նաեւ իմ ու երեխայի հիվանդություններն էին։ Սակայն բացակայությունները սկսեցին շահարկել, երբ քաղաքապետին անվստահություն հայտնելու համար ստորագրություն էին հավաքում»,- մեր զրույցում պատմեց ավագանու անդամը՝ նշելով, որ իրեն հորդորել են կամ ստորագրել անվստահություն հայտնելու նախագծի տակ, կամ վայր դնել մանդատը, այլապես բացակայությունների հիմքով կդադարեցնեն լիազորությունները։ «Ես ընթացքում ուզում էի դուրս գալ ավագանու կազմից, քանի որ բալիկիս հետ չէի հասցնում շատ ակտիվ լինել։ Ավագանու գործընկերներս համոզում էին, որ մնամ, քանի որ միակ ճարտարապետն եմ, Քաղաքաշինության եւ հողօգտագործման հարցերի մշտական հանձնաժողովում բացի ինձանից երեւի մեկն է մնացել ով գոնե մոտ մասնագիտություն ունի»,- ասաց մեր զրուցակիցը, որը մասնագիտությամբ ճարտարապետ է։ Infocom-ի հետ զրույցում Լուսինե Մխոյանն ասաց, որ անցած շաբաթ առաջարկի տեսքով հերթական սպառնալիքն է ստացել խմբակցության ղեկավար Արմեն Գալջյանից, թե՝ այլեւս անհնարին են համարում իր՝ ավագանու կազմում լինելը․ «Պարզաբանեցին, թե ես քաղաքական քայլեր եմ արել՝ բարձրաձայնելով ինձ ուղված սպառնալիքի մասին, եւ հիմա առաջարկում են մանդատը դնել կամ նախագիծ կբերեն եւ բացակաների հիմքով կհանեն, ինչն էլ անելու են այսօր»,- ասաց Մխոյանը։ Ինչ վերաբերում է քաղաքապետարանում եւ ավագանու կազմում իր գործունեությանը՝ Մխոյանը մեկնաբանեց, որ 2020թ․-ի դեկտեմբերին ինքը քաղաքապետի խորհրդական Դավիթ Ճգնավորյանից համագործակցելու հրավեր է ստացել՝ որպես ավագանու անդամ եւ ճարտարապետ, ով տասը տարուց ավել աշխատել է ՛՛Երեւանի 2005թ Գլխավոր Հատակագծի՛՛ համահեղինակ Գուրգեն Մուշեղյանի հետ, եւ անդամակցել է ճարտարապետներից եւ ուրբանիստներից կազմված խմբին, ակտիվ մասնակցել քննարկումներին եւ հնարավորինս աջակցել ռեֆորմների գործընթացին։ Ի հավելումն՝ մեր զրուցակիցը նշեց, որ կամավորական հիմքերով աշխատող խմբում էին այնպիսի մասնագետներ, ինչպիսիք են Տիգրան Պողոսյանը, Հայկ Մելիքյանը, Գառնիկ Ստեփանյանը, Մերուժան Մինասյանը, Արմեն Շատվորյանը, Հայկ Նիկոյանը, Զոհրաբ Զուրաբյանը, Մարիաննա Կարապետյան, Գեւորգ Եղիկյանը, Հեղինե Փիլոսյանը եւ այլք։ «Նաեւ արդեն նախկին փողքաղաքապետ Գայանե Մելքոմ Մելքոմյանի հրավերով ներգրավված եմ եղել մի քանի նախագծերում, որոնցից էր Էրեբունի թանգարանի հիմնանորոգման եւ արդիականացման նախագիծը»,- ասաց Մխոյանը։ Նա նշեց, որ իր գործունեության ընթացքում գլխավոր ճարտարապետի կողմից նախագծման թույլտվությունների եւ նախագծերի միանձնյա հաստատման գործառույթների փոխարեն կոլեգիալ որոշումների ձեւաչափի անցման նպատակով նախաձեռնվել էր ռոտացիոն ձեւաչափով գործող խորհրդի ստեղծման բազմափուլ գործընթացը։ Այն նախատեսվում էր իրականացնել ոլորտում հեղինակություն վայելող, փորձառու մասնագետների ներգրավմամբ, որոնք պետք է առաջադրվեին պրոֆեսիոնալ դաշտը ձեւավորող այնպիսի կառույցների կողմից, ինչպիսիք են Հայաստանի ճարտարապետաշինարարական համալսարանը, Հայաստանի ճարտարապետների պալատը, Միջազգային ճարտարապետների ակադեմիայի հայաստանյան մասնաճյուղը եւ այլն։ Նշենք նաեւ, որ այդ խորհրդի ստեղծման որոշումը հաստատվել էր ավագանու կողմից։ Մխոյանի փոխանցմամբ՝ ստեղծված աշխատանքային խմբի մասնակցությամբ «Քաղաքաշինություն» ՓԲԸ-ի հիման վրա ստեղծվել էր նոր բաժին, որը կոչված էր մշակել քաղաքի զարգացման ծրագիրն ու ռազմավարությունը, որն էլ իր հերթին պետք է ձեւավորեր գլխավոր հատակագծի համար տեխնիկական առաջադրանքը։ «Իրականացվեց նաեւ նախապատրաստական միջոցառումների եւ հանդիպումների մի մեծ գործընթաց՝ միտված քաղաքի կառավարման թվային համակարգի ներդրման ու ողջ ոլորտի գործառույթների, ինչպես նաեւ փաստաթղթաշրջանառության ամբողջական թվայնացմանը։ Մշակվեց, բայց չհասցրեց հաստատվել ճարտարապետահատակագծային առաջադրանքի տրամադրման նոր, պարզեցված ու ավելի տրամաբանական ձեւաչափ, որը կոչված էր կառուցապատող ընկերությունների եւ ճարտարապետների համար շատ ավելի հստակ եւ կանխատեսելի նախապայմաններ հաստատել՝ հիմնվելով գործող քաղաքաշինական նորմերի ու տարածական պլանավորման փաստաթղթերի վրա»,- ներկայացրեց մեր զրուցակիցը՝ հավելելով նաեւ, որ կամավորության սկզբունքների հիման վրա ստեղծվել էր խորհրդատվական մի հանձնաժողով, որի կազմում ընդգրկված էինք քաղաքաշինության ու ճարտարապետության ոլորտներում տարիների ընթացքում իրենց լավագույնս դրսեւորած մի քանի տասնյակ երիտասարդ մասնագետներ, վաստակաշատ ու փորձառու մասնագետներ (Հրաչիկ Պողոսյան, Սաշուր Քալաշյան, Ալեքսանդր Բադալյան, Ալբերտ Զուրաբյան, Մհեր Չերկեզյան, Միքայել Հասրաթյան, Միսաք Խոստիկյան, Զառա Մամյան եւ այլք)։ Խորհրդի մի քանի ամսվա աշխատանքի ընթացքում, մեր զրուցակցի վստահեցմամբ, քաղաքապետարանի աշխատակազմի մասնագետների հետ համատեղ նախաձեռնվել են բազում քննարկումներ ոլորտում ձեւավորված խնդիրների եւ դրանց իրատեսական կամ հեռանկարային լուծումների, նոր համագործակցության ձեւաչափերի վերաբերյալ»։ Ի հավելումն՝ Լուսինե Մխոյանը հայտնեց նաեւ, որ սկզբունքային վերաարժեվորման ենթարկվեց գլխավոր ճարտարապետի պաշտոնը՝ իբրեւ քաղաքի ուրբանիստական զարգացման համար պատասխանատուի, որը կոչված է ոչ թե ձեւավորել կամ թելադրել կառուցվող շենքերի ճարտարապետական ոճը, այլ համակարգել քաղաքաշինության ոլորտի կառավարման ու զարգացման մեջ ներգրավված բոլոր վարչական ու մասնագիտական միավորները։ «Ցավով պետք է նշեմ՝ ակնհայտ է, որ հիմա միտված են ղեկը լրիվ այլ ուղությամբ պտտել»,- եզրափակելով՝ ասաց ավագանու «Իմ քայլը» խմբակցության անդամ Լուսինե Մխոյանը։ Խխմբակցության ղեկավար Արմեն Գալջյանն ավագանու նիստի ժամանակ նշեց, որ տիկին Մխոյանի հետ ունեցել են քաղաքական զրույց՝ քաղաքակիրթ եւ օրենքի շրջանակներում, բայց իրենց տեսակետները չեն հատվել․ «Ինչ վերաբերում է սպառնալիքներին, շանտաժին, ամենեւին դա այդպես չէ։ Մենք տիկին Մխոյանին ասել ենք, որ կա բացակայությունների շեմ, որը հատվել է, եւ բացի քաղաքական հարցերից՝ կա նաեւ աշխատանքի մասով խնդիր»,- ասաց Գալջյանը՝ նշելով, որ խմբակցությունում կան անդամներ, որոնք չեն պաշտպանել իրենց որոշումը՝ Մարությանին հեռացնելու վերաբերյալ, բայց շարունակում ներկայացնել խմբակցությունը։ Հավելենք, որ Infocom-ը գրավոր հարցմամբ դիմել է Երեւանի քաղաքապետարանին՝ խնդրելով տեղեկություններ այն մասին, թե ավագանու բոլոր անդամները որքան բացակայություններ ունեն ավագանու նիստերից։ Հայարփի Բաղդասարյան

11:56 - 08 փետրվարի, 2022