Կադաստրի կոմիտե

Կադաստրի կոմիտեն ՀՀ կառավարությանը ենթակա մարմին է, որն ապահովում է ՀՀ կառավարության քաղաքականության՝ օրենքով իրեն վերապահված առանձին ուղղության իրականացումը:

Կադաստրի կոմիտեն վարում է անշարժ գույքի պետական ռեգիստրը, երկրատարածական տվյալների համակարգերը, աջակցում անշարժ գույքի շուկայի զարգացմանը, հողային պետական քաղաքականության մշակմանն ու իրականացմանը։

Կոմիտեի ղեկավարն է Սուրեն Թովմասյանը, տեղակալներն են Նարինե Ավագյանը, Դավիթ Սողոմոնյանը, Արման Պետրոսյանը։

Չհարկվող գույք չի մնալու․ ՀՀ-ում գույքահարկ վճարողներն ու վճարի չափերը՝ 2021թ․-ից |ampop.am|

ampop.am: Հայաստանում ներդրվում է անշարժ գույքի գնահատման և հարկման նոր համակարգ, որով գույքահարկը հաշվարկվելու է անշարժ գույքի ոչ թե կադաստրային, այլ շուկայական մոտարկված արժեքի հիման վրա։ 2021թ․ հունվարի 1-ից կիրառության մեջ մտնող նոր համակարգի արդյունքում գույքահարկի վճարները կավելանան։ Սակայն հարկային բեռի կտրուկ աճը կանխելու համար, ՀՀ կառավարությունն առաջարկում է նոր համակարգին անցում կատարել ատիճանաբար՝ առաջիկա չորս տարիների ընթացքում։ Այսինքն՝ 2021թ․-ին սեփականատերը կվճարի նոր մեթոդով հաշվարկված գույքահարկի 25%-ը, 2022թ-ին` 50%-ը, 2023թ-ին` 75%-ը, իսկ 2024թ․-ից՝ արդեն ամբողջ հարկը։ Սա դեռևս օրենքի ուժ չունի։ Սակայն հարկային օրենսգրքում առաջարկվող այս փոփոխությունները կառավարությունը համարել է անհետաձգելի․ արդեն քննարկել, ընդունել և ուղարկել է Ազգային ժողով: Հունիսի 24-ին ԱԺ-ում այս հարցով առաջին լսումներն էին։ «Հեղափոխական նշանակության փոփոխություններ» «Ընդհանուր առմամբ՝ այո՛, գույքահարկն ավելանալու է, և առավելապես ավելանալու է այն գույքերի վրա, որոնք մենք պայմանականորեն անվանում ենք դղյակներ, ապարանքներ և այլն»,- կառավարության մայիսի 27-ի նիստում հայտարարել էր վարչապետ Նիկոլ Փաշինյանը։ Վարչապետ Փաշինյանն այս փոփոխությունը ներկայացնում է իբրև «հեղափոխական նշանակության փոփոխություններ»` ուղղակի կապելով դրանք եկամտահարկի համահարթեցման հետ։ Ըստ վարչապետի՝ եթե ոմանք համարում են, որ համահարթ եկամտահարկ սահմանելով խախտվել է սոցիալական արդարության սկզբունքը, ապա գույքահարկի նոր համակարգի ներդրմամբ՝ կվերականգնվի այն։ Շքեղ առանձնատների գույքահարկը ներկայումս սիմվոլիկ բնույթ է կրում, ասում է Փաշինյանը։ «Դղյակներ կան, որոնք, օրինակ, տարեկան վճարում են 800 հազար դրամ, բայց օրենքի փոփոխությունից հետո պետք է վճարեն 15մլն դրամ: Ակնհայտ է, որ այդ սեփականատերերի համար այդ 15մլն դրամը ոչ մի բան է՝ ըստ էության: Համենայնդեպս, եթե մարդն էդ կարգի դղյակ է կառուցել, ուրեմն դա պետք է այդպես էլ լինի»։ Կառավարությունը չի թաքցնում, որ փոփոխությունները ոչ միայն տեսանելի հարստության [շքեղ տուն] կամ ունեցվածքի համարժեք հարկման, այլև տեղական բյուջեի հավաքագրման նպատակով են։ Անշարժ գույքի հարկը համայնքային բյուջեների եկամտի կարևոր աղբյուր է, իսկ Հայաստանում, ըստ նախագծի հիմնավորման, գործնականում գրեթե չի օգտագործվում: Հայաստանում անշարժ գույքի հարկ/ՀՆԱ հարաբերակցությունը կազմում է 0.2%, իսկ, օրինակ, հարևան Վրաստանում այդ ցուցանիշը կազմում է 1.1%, Ռուսաստանում` 1.2%, ԱՄՆ-ում` 2.7%։ Ֆինանսների նախարար Ատոմ Ջանջուղազյանի հաշվարկներով՝ փոփոխությունների արդյունքում մինչև 4,3 անգամ կաճի գույքահարկերից գոյացող գումարը։ Միայն Երևանի բյուջեն կավելանա 45-50 մլրդ դրամով։ Այնուամենայնիվ, Հայկական տնտեսագիտական միության նախագահ Գուրգեն Ասլանյանը կարծում է, որ խնդիրներ կառաջանան «պալատների» իրական արժեքը գնահատելիս․ «Այդ պալատները հատուկենտ են մեր Հայաստանում ու դրանց շուկայական արժեքն անհայտ է: Նշանակում է՝ մենք չգիտենք, թե այդ տոկոսն ինչից են հաշվելու՝ միլիոնի՞ց, թե՞ հարյուր միլիոնից»: Ասլանյանը չի բացառում, որ ցանկության դեպքում մեծահարուստներն իրենց առանձնատները կամայական, բավականին ցածր գնով կվաճառեն իրենց բարեկամներին ու կասեն, որ դա է շուկայական գինը։ Սա է պատճառը, որ ըստ Ասլանյանի, գույքահարկի փոփոխությունները պետք է լինեն եկամուտների վերաբաշխման համատեքստում. որոշ չափով այն պետք է դառնա ճոխության հարկ: Վերացվում է չհարկվող շեմը Եթե ԱԺ-ն ընդունի օրինագիծը նույնությամբ, Հայաստանում այլևս չի լինի չհարկվող անշարժ գույք։ Նախագծով առաջարկվում է վերացնել բնակարանների և բնակելի տների մասով սահմանված չհարկվող շեմերը՝ մինչև 10մլն դրամ արժեքով բնակարանների և մինչև 7մլն դրամ արժողությամբ բնակելի տների համար սահմանելով 0․05% հարկման դրույքաչափ։ Հայաստանում այլևս չի լինի չհարկվող անշարժ գույք Սա, ըստ նախագծի հիմնավորման, «կնպաստի սեփականության իրավունքի վերաիմաստավորմանը և հարկերի վճարման մշակույթի ամրապնդմանը»։ ԱԺ տնտեսական հարցերի մշտական հանձնաժողովի նախագահ Բաբկեն Թունյանի կարծիքով ՝ այս փոփոխություններով շտկվելու է «կադաստրային արժեքների և գույքահարկի ներկայիս աղավաղված պատկերը»։ Ըստ նրա՝ Հայաստանում կա մոտ 432 հազար բնակարան, որոնց 64%-ի (275 հազար բնակարաններ) կադաստրային արժեքը 3 միլիոն դրամից ցածր է։ Այսինքն՝ այդ բնակարանների համար գույքահարկ չի վճարվում։ Միայն Երևանում 3 միլիոնից ցածր կադաստրային արժեք ունեցող և գույքահարկ չվճարող 107 հազար բնակարան կա։ Կադաստրի կոմիտեից հայտնել են, որ մինչև 3 մլն կադաստրային արժեքով Երևանում ամենամեծ թվով բնակարանները՝ շուրջ 22%, Նոր Նորք վարչական շրջանում են։ 3 մլն-ը չգերազանցող բնակելի տների քանակով էլ առաջին տեղում Շենգավիթ վարչական շրջանն է՝ 26%: Իսկ այդ արժեքային սանդղակում գտնվող բնակարանների և բնակելի տների ամենամեծ տեսակարար կշիռն ունի Նուբարաշեն վարչական շրջանը, որտեղ բնակարանների 99%-ի, իսկ բնակելի տների 54%-ի կադաստրային արժեքները փոքր են 3 մլն-ից։ Կադաստրային ցածր արժեքները պայմանավորված են շինության կառուցման տարեթվով և գտնվելու վայրի գոտիականությամբ։ Հարկման բազա և դրույքաչափեր Անշարժ գույքի շուկայական արժեքին մոտարկված կադաստրային գնահատման կարգն ընդունվել է դեռևս անցած տարվա նոյեմբերին և ուժի մեջ է մտնելու 2021 թ․-ի հունվարի 1-ից: Այս օրենքով սահմանվում են գույքահարկի հաշվարկման բանաձևերը, որոնք տարբեր են՝ կախված անշարժ գույքի տեսակից։ Կառավարության՝ մայիսի 27-ին ընդունած հարկային փոփոխություններով սահմանվում են հարկման բազայի նոր սանդղակներ, իսկ որոշ դեպքերում՝ նոր դրույքաչափեր։ Դրանք տարբեր են բնակարանների և անհատական բնակելի տների համար։ Այդ խմբերից յուրաքանչյուրն իր հերթին ունի վեց մակարդակ․ այսինքն՝ որքան բարձր է գույքի արժեքը, այնքան շատ է գույքահարկը։ Հարկման նվազագույն դրույքաչափը 0.05% է թե բնակարանների, թե բնակելի տների համար։ Բայց տարբեր է հարկման բազան․ բնակարանների դեպքում՝ 10մլն դրամը, իսկ տների դեպքում՝ 7մլն դրամը չգերազանցող արժեքը։ Գույքահարկն այս արժեքների դեպքում բնակարանների համար առավելագույնը կլինի 5000 դրամ, իսկ տների համար՝ 3500 դրամ։ Ամենաբարձր հարկման շեմում ընդգրկվել են 100 մլն դրամից ավելի արժեք ունեցող բնակարաններն ու 120 մլն-ը գերազանցող տները, որոնց դեպքում գույքահարկը կլինի համապատասխանաբար՝ 326 000 և 423 500 դրամից ավելի։ Շարունակությունը՝ ampop.am-ում

15:13 - 26 հունիսի, 2020

Բարձրաստիճան պաշտոնյաներից՝ մինչև քրեական դեմքեր․ ովքեր են «տիրացել» Օղակաձև զբոսայգուն (մաս 4) |hetq.am|

hetq.am: Երևանի քաղաքապետարանի և Կադաստրի կոմիտեի տրամադրած փաստաթղթերի ուսումնասիրության արդյունքում պարզել ենք, որ Օղակաձև զբոսայգու 4-րդ հատվածի տարբերի տարիների վարձակալների մեծ մասը նախկին բարձրաստիճան պաշտոնյաներ են և նրանց փոխկապակցված անձինք, որոնց թվում են՝ Ռուսաստանի Հարավային դաշնային տարածաշրջանում ՀՀ նախկին գլխավոր հյուպատոս Արարատ Գոմցյանը, ոստիկանության կազմակերպված հանցավորության դեմ պայքարի վարչության նախկին պետ Լյուդվիգ Սարգսյանը, Երևանի նախկին քաղաքապետ, ներքին գործերի նախկին նախարար Սուրեն Աբրահամյանի ընտանիքը, Երևանի քաղաքապետի նախկին գլխավոր խորհրդական Գրիգոր Մելքումյանը, ՊԵԿ մաքսանենգության դեմ պայքարի վարչության նախկին պետ Սամվել Սանամյանի որդին, ինչպես նաև Պզո մականունով հայտնի «օրենքով գող» Արմեն Ղազարյանի հետ ԱՄՆ-ում ձերբակալված անձինք: Նախկին հյուպատոսն ու բարձրաստիճան ոստիկանը Օղակաձև զբոսայգու 4-րդ հատվածում 1117 քմ մակերեսով հողամաս է վարձակալել «Արձակուրդ» ՍՊԸ-ն: Այս ընկերությունը Օղակաձևում է 2001 թվականից: Ընկերությանը և Երևանի քաղաքապետարանի միջև գործող պայմանագիրը կնքվել է 2016 թվականի հուլիսի 26-ին, որն ուժի մեջ է մինչև 2035 թվականի մայիսի 22-ը: Հողամասը տրամադրվել է սրճարանի, բարեկարգման և կանաչատպման նպատակով: Հողամասի վարձակալության տարեկան վարձավճարը կազմում է 3 միլիոն 225 հազար դրամ: «Արձակուրդ» ՍՊԸ-ի վարձակալած տարածքում այժմ ռեստորան է գործում: «Արձակուրդ» ՍՊԸ-ն հիմնադրել է Հրայր Գևորգյանը 1997 թվականին: 2001 թվականին ընկերության 25-ական տոկոսի բաժնետեր են դարձել և մինչև օրս շարունակում են մնալ ոստիկանությունում տարբեր բարձրաստիճան պաշտոններ զբաղեցրած Լյուդվիգ Սարգսյանի կինը՝ ԵՊՀ ռուս գրականության ամբիոնի դասախոս Ռուզան Տեր-Գրիգորյանը, ինչպես նաև այդ ժամանակ վարչապետի խորհրդատուի պաշտոնը զբաղեցնող Արարատ Գոմցյանի որդին՝ Դվին Գոմցյանը: 2010 թվականին էլ ընկերության 25-ական տոկոս բաժնետերեր են դառնում հենց Լյուդվիգ Սարգսյանը, որն արդեն թոշակի էր անցել, և Արարատ Գոմցյանը՝ այդ պահին զբաղեցննելով Ռուսաստանի Հարավային դաշնային տարածաշրջանում ՀՀ գլխավոր հյուպատոսի պաշտոնը (մինչև 2017թ.): Ինչ վերաբերում է ոստիկանության կազմակերպված հանցավորության դեմ պայքարի վարչության նախկին պետ Լյուդվիգ Սարգսյանին, ապա նա 2009 թվականից մինչև վերջերս «Հայինկասացիա» ՓԲԸ-ի գործադիր տնօրենն էր: ՊԵԿ նախկին բարձրաստիճան պաշտոնյայի որդու ղեկավարծ ընկերությունը Օղակաձև զբոսայգու ամենախոշոր վարձակալներից մեկն էլ «Գեյմ-Սերվիս» ՓԲԸ-ն է: Ընկերությանը 2013թ. մարտի 19-ին կնքված պայմանագրով՝ մինչև 2038 թվականը վարձակալության իրավունքով տրվել է 7887 քմ մակերեսով հողամաս: Այդ տարածքի համար «Գեյմ-Սերվիս» ՓԲԸ-ն տարեկան վճարում է 204 հազար դրամ կամ այլ կերպ ասած՝ ամսական 1 քառակուսի մետրի համար ընդամենը 2 դրամ: «Գեյմ-Սերվիս» ՓԲԸ-ի վարձակալած տարածքում թենիսի կորտեր են, որտեղ գործում է թենիսի «Արարատ» ակումբը: 2000-ականների սկզբին «Գեյմ-Սերվիս»-ի տարածքը վարձակալության իրավունքով, իսկ տարածքի վրայի անշարժ գույքը սեփականության իրավունքով պատկանել է «Թենիսի «Արարատ» մարզական ակումբ» հասարակական կազմակերպությանը, որի բաժնետերերից են եղել Լյուդվիգ Սարգսյանն ու Արարատ Գոմցյանը, որոնց մասին արդեն նշել ենք, ինչպես նաև Գրիգոր Մելքումյանը: Վերջինս զբաղեցրել է Երևանի քաղաքապետի գլխավոր խորհրդականի, քաղաքապետարանի աշխատակազմի քարտուղարի, ապա նաև տրանսպորտի և կապի նախարարի գլխավոր խորհրդականի պաշտոնները (Գագիկ Բեգլարյանի հետ քաղաքապետարանից տեղափոխվել է նախարարություն): 2016 թվականից սկսած վարձակալության տրված տարածքի վրայի անշարժ գույքը «Գեյմ-Սրեվիս»-ի սեփականությունն է: «Գեյմ-Սերվիս» ՓԲԸ-ն հիմնադրվել է 1999 թվականի սեպտեմբերի 24-ին, կանոնադրական կապիտալն այժմ կազմում է 55 միլիոն դրամ: Ընկերության կանոնադրությունից պարզ է դառնում, որ ընկերությունը հիմնել են «Արարատ» մարզական ակումբը և «Հայաստան» մարզական միությունը: «Գեյմ-Սերվիս»-ի գործադիր մարմինը նույնպես պատահական մարդ չի ղեկավարում: Ընկերության տնօրենի պաշտոնը զբաղեցնում է Էդուարդ Սանամյանը՝ ՊԵԿ մաքսանենգության դեմ պայքարի վարչության նախկին պետ, վարչապետի նախկին խորհրդական (Կարեն Կարապետյանի օրոք) Սամվել Սանամյանի որդին: «Գեյմ-Սերվիսը» ներքաշված է եղել բազմաթիվ դատական գործերում: Դրանցից մեկը վերաբերվում է ընկերության բաժնետոսմերի բաշխմանը: Մասնավորապես 2018 թվականի հունիսին Լյուդվիգ Սարգսյանն ու Կարեն Գևորգյանը դատական հայց են ներկայացրել «Գեյմ-Սերվիս» ՓԲԸ-ի դեմ՝ բաժնեմասերի նկատմամբ սեփականության իրավունքը ճանաչելու պահանջով: Որպես երրորդ անձ ներգրավված են եղել «Գեյմ-Սերվիս»-ի 90 տոկոս բաժնեմասի սեփականատեր հանդիսացող «Արարատ» մարզական ակումբի մյուս մասնակիցները, այդ թվում՝ Գրիգոր Մելքումյանը և Արարատ Գոմցյանը: Երևանի ընդհանուր իրավասության դատարանը, սակայն, հայցադիմումը անհիմն է գնահատել և մերժել այն: «Գեյմ-Սերվիս» ՓԲԸ-ն 2011-2016թթ. Երևանի քաղաքապետարանի հետ 5 դատական վեճ է ունեցել, որոնցից 4-ը վերաբերում է Օղակաձև զբոսայգու 4-րդ հատվածում զբաղեցրած տարածքի վարձավճարի բռնագանձմանը։ Օրինակ՝ 2014թ. հայցադիմումը վերաբերում է 1200 քմ տարածքի վարձավճարին։ Ըստ հայցի՝ համայնքը պահանջում է ընկերությունից վճարել 1,56 մլն դրամ, որից 1 մլն 55 հազար դրամը չվճարած վարձն է, իսկ 506 հազար դրամը որպես տույժ։ Դատարանը բավարարել է Երևանի քաղաքապետարանի հայցը՝ պարտավորեցնելով ընկերությանը վճարելու պարտքը և տույժերը։ 2016թ. հայցով էլ քաղաքապետարանը պահանջել է վճարել մոտ 14,255 մլն դրամ վարձը և դրան գումարված 10 մլն դրամ տույժը։ Կողմերի միջև 2016թ․ նոյեմբերին կնքվել է հաշտություն, ըստ որի՝ նույն օրը պատասխանող կողմը պետք է վճարեր հիմնական վարձավճարի պարտքը, իսկ տույժերն ամբողջությամբ պետք է մարեր մինչև նույն թվականի դեկտեմբերի 30-ը։ Երևանի նախկին քաղաքապետ և ներքին գործերի նախկին նախարար Սուրեն Աբրահամյանի ընտանիքի ընկերությունը Օղակաձև զբոսայգու 4-րդ հատվածում 1999 թվականից հողամաս է վարձակելել նաև «Լուսին և Արամ» ՍՊԸ-ն, որը հետագայում դարձել է Երևանի նախկին քաղաքապետ և ներքին գործերի նախկին նախարար Սուրեն Աբրահամյանի ընտանիքի սեփականությունը: Երևանի քաղաքապետարանի և «Լուսին և Արամ» ՍՊԸ-ի միջև պայմանագիրը կնքվել է 1999 թվականի հուլիսի 8-ին, համաձայն որի՝ ընկերությանը վարձակալության իրավունքով տրվել է 380 քառակուսի մետր մակերեոսվ հողամաս: Հողամասը հատկացվել է սրճարանի շինարարություն իրականացնելու նպատակով: Այդ ժամանակ 1 հեկտար հողամասի կադաստրային արժեքը եղել է 19 մլն 815 հազար դրամ կամ 1քմ-ը՝ 1980 դրամ, իսկ «Լուսին և Արամ» ՍՊԸ-ի վարձակալած տարածքի մակերեսը հաշվարկվել է հողամասի կադասատրային արժեքի 30 տոկոսի չափով: Այսինքն՝ ընկերությունը 380 քմ-ի համար տարեկան վճարել է 226 հազար դրամ, ամսական 1 քմ-ի համար 50 դրամ: Ընկերության և քաղաքապետարանի միջև պայամանգիրը կնքվել է 15 տարի ժամկետով, այսինքն՝ մինչև 2014 թվականը: Երևանի քաղաքապետի 2013թ. փետրվարի 5-ի որոշմամբ՝ 1999թ. կնքված պայմանագրում մի շարք փոփոխություններ են սահմանվել, որից հետո կնքվել է նոր համաձայնագիր՝ երկարացված ժամկետով: Փոփոխության է ենթարկվել նաև վարձավճարի չափը: Մասնավորապես հողամասի 1 քմ-ի կադաստրային արժեքը դարձել է 60 հազար դրամ (տարածվում է ամբողջ Օղակաձև զբոսայգու վրա)՝ նախկին 1980 դրամի փոխարեն: Քաղաքապետի այդ որոշումից և կնքված համաձայնագրից հետո «Լուսին և Արամ» ՍՊԸ-ի տարեկան վարձավճարը սահմանվեց 1 մլն 262 հազար դրամ, որից 826 հազարը՝ սրճարանի, իսկ 436 հազարը բարեկարգման և կանաչապաման համար: «Լուսին և Արամ» ՍՊԸ-ն հիմնադրել են Մանվել և Գայանե Սարգսյանները 1998 թվականի ապրիլի 12-ին: 2008 թվականին ընկերությունը դարձել է Սուրեն Աբրահամյանի որդու՝ Արման Աբրահմյանի սեփականությունը, իսկ 2018 թվականից ընկերության 100 տոկոս բաժենմասի սեփականատերը դարձել է նախկին քաղաքապետի հարսը՝ Մարինա Աբրահամյանը: Օղակաձև զբոսայգում ընկերության զբաղեցրած տարածքում կարաոկե ակումբ է: «Երևանի վատագույն օբյեկտ-2011» 2011 թվականին Երևանի քաղաքապետարանը որպես անբարեխիղճ տնտեսվարող յուրահատուկ մրցանակ է հանձնել Օղակաձև զբոսայգու 4-րդ հատվածում գործող «Դալիլա» ՍՊԸ-ին, որն արժանացել է «Երևանի վատագույն օբյեկտ» մրցանակին: «Դալիլա ՍՊԸ»-ն Օղակաձև զբոսայգում տարածք է վարձակալել 2002 թվականից: Ընկերության և քաղաքապետարանի միջև գործող պայմանագիրը կնքվել է 2016 թվականի հունիսի 29-ին: Սրճարանի, հասարակական շինության, բարեկարգման և կանաչապատման նպատակով Ալեք Մանուկյան 2/1 հասցեում ընկերությանը վարձակալության իրավունքով տրվել է 879 քառակուսի մետր մակերեսով հողամաս: Պայմանագրի ժամկետը լրանում է 2033 թվականի հունիսի 5-ին: «Դալիլա» ՍՊԸ-ն իր վարձակալած տարածքի համար տարեկան վճարում է 2 մլն 913 հազար դրամ: Անշարժ գույքի կադաստրային գործից պարզ է դառնում, որ ընկերությունը իր վարձակալած 879 քառակուսի տարածքում 343 քմ-ի վրա ունի ինքնակամ շինություններ: Ընկերության վարձակալած տարածքում գործունեություն է ծավալում «Նովելլա» ռեստորանը, որի տնօրենը «Դալիլա» ՍՊԸ-ի սեփականատեր Կարեն Մկրտչյանն է: Քրեական դեմքերը՝ Օղակաձևի վարձակալներ 2002 թվականից Շախմատի տան հարևանությամբ տարածք է վարձակալել «Հապար» ՍՊԸ-ն: Ընկերության և քաղաքապատերանի միջև վերջին գործարքը կատարվել է 2018 թվականի մարտին, համաձայն որի՝ Սայաթ-Նովայի 33/3 հասցեում ընկերությանը վարձակալության իրավունքով տրվել է 1333 քմ մակերեսով տարածք: Հողամասը վարձակալության է տրվել սրճարանի, բարեկարգման և կանաչապատման համար: Այդ տարածքում տարվա տաք եղանակներին բացօթյա սրճարան է գործում: Այժմ այնտեղ սրճարանի տաղավարն է, և մեկ շինություն: Թեև քաղաքապետարանի և «Հապար» ՍՊԸ-ի միջև կնքված պայմանագրի ժամկետը 2019թ. դեկտեմբերի 31-ին լրացել է, այնուամենայնիվ շինության ներսում փակցված թղթի վրա «Հապար» ՍՊԸ-ի անվամբ նշում կա, իսկ տարածքը տեսահսկվում է ոստիկանների կողմից: Ըստ պայմանագրի՝ տարածքի տարեկան վարձավճարը կազմել է 4 մլն 272 հազար դրամ: Ընկերությունը տարբեր դատական վեճեր է ունեցել Երևանի քաղաքապետարանի հետ, որոնք բոլորն էլ գումարի բռնագանձան պահանջով են եղել, և ի վերջո հասել են ընկերության սնանկացման գործընթացին: 2017 թվականի մայիսին Պետական եկամուտների կոմիտեն դիմել է դատարան՝ «Հապար» ՍՊԸ-ին սնանկ ճանաչելու պահանջով, ըստ ՊԵԿ-ի հաշվարկների՝ ընկերության պարտքը կազմել է 4 մլն 837 հազար դրամ: Դատարանի 26.06.2017թ. վճռով ընկերությունը ճանաչվել է սնանկ: «Հապար» ՍՊԸ-ի սնանկության գործով կառավարիչ Հովհաննես Սողոմոնյանը մեզ հետ զրույցում ասաց, որ սնանկության գործընթացը դեռևս ընթացքի մեջ է: «Հապար» ՍՊԸ-ն հիմնադրվել է 2001 թվականին: 50 հազար դրամ կանոնադրական կապիտալով ընկերությում 2008 թվականից 33-ական տոկոս բաժնեմաս ունեն Արթուր Եպիսկոպոսյանն ու Արտաշես Մելքոնյանը, մնացած 34 տոկոս բաժենմասը պատկանում է Դավիթ Միրզոյանին: Արթուր Եպիսկոպոսյանը՝ Նոր Նորքի նախկին ոստիկանապետ, ոստիկանության արտագերատեսչական պահպանության վարչության պետի նախկին տեղակալ, գնդապետ Զարմեն Եպիսկոպոսյանի որդին է, ազգային անվտանգության ծառայության տնօրենի նախկին առաջին տեղակալ, գեներալ Հրանտ Եպիսկոպոսյանի եղբորորդին: Արթուր Եպիսկոպոսյանը նաև հայտնի «օրենքով գող», Պզո Մականունով հայտնի Արմենի Ղազարյանի ղեկավարած հանցավոր խմբի անդամ է եղել: Հիշեցնենք, որ այդ խումբը բացահայտվել էր 2010 թվականին ԱՄՆ-ում, որն այնտեղ բժշկական ապահովագրության ոլորտում խարդախությունների միջոցով տիրացել էր 163 միլիոն դոլարի: Այդ խմբի անդամներից և պարագլուխներից է եղել նաև «Հապար» ՍՊԸ-ի մյուս բաժնետեր Դավիթ Միրզոյանը, որն իրեն մեղավոր էր ճանաչել մարդկանց առեւանգման, մեքենայությունների, փողերի լվացման եւ մարդկանց անձնական տեղեկատվության գողության մեջ: Ոստիկանության և Հանրայինի ծաղկի մատակարարը 2016 թվականին Օղակաձև զբոսայգու 4-րդ հատվածում փոքրիկ տարածք է վարձակալել Վարդ Միսակյանը: Քաղաքապետարանի և նրա միջև կնքված պայմանագրի համաձայն՝ նրան վարձակալության իրավունքով տրվել է 15,4 քմ մակերեսով հողամաս, որտեղ ծաղկի կրպակ է գործում: Վարդ Միսակյանը իր վարձակած տարածքի համար տարեկան վճարում է 46 հազար դրամ: Շարունակությունը՝ hetq.am-ում

14:55 - 09 մարտի, 2020