Հակոբ Կարապետյան

Հայկ Մարությանն ինքնամեկուսացել է․ նա ակտիվ շփում է ունեցել վարակակրի հետ |armenpress.am|

armenpress.am: Երևանի քաղաքապետ Հայկ Մարությանն ինքնամեկուսացել է։ Այս մասին ասաց քաղաքապետի մամուլի խոսնակ Հակոբ Կարապետյանը։ «Քաղաքապետարանի աշխատակիցներից մեկը վարակվել է նոր տիպի կորոնավիրուսով, ում հետ Հայկ Մարությանն ակտիվ շփում է ունեցել»,- նշեց Կարապետյանը։ Նա նաև ընդգծեց, որ բժիշկների ցուցումով քաղաքապետը կանցնի անհրաժեշտ պրոցեդուրաները, ինչի մասին կտեղեկացնեն։

19:15 - 09 հունիսի, 2020

Կապամոնտաժվեն Օղակաձև զբոսայգու ապօրինի կառույցները. գործընթացը մեկնարկել է

Երևանում մեկնարկել է Օղակաձև զբոսայգու` հանրությանը վերադարձի գործընթացը: Այս մասին ֆեյսբուքի իր էջում տեղեկացրել է Երեւանի քաղաքապետի մամուլի խոսնակ Հակոբ Կարապետյանը: Հաստատված հիմնանորոգման ծրագրով ներկա պահին անմխիթար վիճակում գտնվող այգին կբերվի նոր տեսքի: Կապամոնտաժվեն զբոսայգում գտնվող ապօրինի կառույցները, տարածքները կկանաչապատվեն, կանցկացվեն լուսավորության և ոռոգման նոր ցանցեր, կիրականացվեն ժամանակակից կահավորման աշխատանքներ: «Օղակաձև զբոսայգու այդ հատվածի հարևանությամբ արդեն ընթանում են հանրային սքեյթ-պարկի կառուցման աշխատանքները»,-տեղեկացրել է Կարապետյանը:

19:52 - 03 հունիսի, 2020

Թիվ 49 մանկապարտեզը, որի աշխատակցի մոտ կորոնավիրուս է հայտնաբերվել, մարտից փակ է․ երեխաների հետ շփումներ չեն եղել

Թիվ 49 մանկապարտեզը, որի աշխատակցի մոտ կորոնավիրուս է հայտնաբերվել, մարտ ամսից ի վեր փակ է՝ այս օրերին չի բացվել հենց վարակման կասկածի պատճառով: Այս մասին ֆեյսբուքյան իր էջում հայտնել է Երեւանի քաղաքապետարանի մամուլի խոսնակ Հակոբ Կարապետյանը՝ հավելելով, որ նշյալ մանկապարտեզ երեխաներ չեն հաճախել, երեխաների հետ շփումներ չեն եղել։

17:24 - 22 մայիսի, 2020

Մանկական երկաթուղու թունելը մաքրվել է, լուսավորությունը՝ թարմացվել․ Հակոբ Կարապետյան

Երեւանի քաղաքապետի մամուլի խոսնակ Հակոբ Կարապետյանը ֆեյսբուքյան իր տեսանյութ է հրապարակել եւ կից գրառում կատարել․ «Մանկական երկաթուղու թունելը մաքրվել է, թարմացվել է լուսավորությունը»։

13:16 - 17 մայիսի, 2020

Առանց ձեռնոցի, դիմակի ուղևոր ու վարորդ չի լինելու. Հակոբ Կարապետյան

Քաղաքապետի մամուլի խոսնակ Հակոբ Կարապետյանը Երևանի հանրային տրանսպորտի համար հատուկ կանոնների վերաբերյալ ֆեյսբուքյան իր էջում գրառում է կատարել:«Հանրային տրանսպորտի կայաններում ընթանում են նախապատրաստական աշխատանքներ, տրվում են վերջին ցուցումները։ Տրանսպորտն այլևս գործելու է նոր կանոններով՝ առանց ձեռնոցի, դիմակի ուղևոր ու վարորդ չի լինելու։ Ախտահանիչ միջոցներ և ախտահանում՝ տրանսպորտ նստելուց առաջ»,-նշել է նա։

10:13 - 17 մայիսի, 2020

Սահմանափակումը լրացուցիչ ծանրաբեռնվածություն կլինի տրանսպորտի վրա |lragir.am|

lragir.am: Երևանի քաղաքապետի մամուլի խոսնակ Հակոբ Կարապետյանը մանարմասներ է ներկայացրել մայիսի 18-ից հասարակական տրանսպորտի աշխատանքի վերսկսման գործընթացից: Պարոն Կարապետյան, պարետի որոշմամբ անվտանգության խիստ չափանիշներ են սահմանվել, նաև սահմանվել է, որ կանգած ուղևորներ չպետք է լինեն տրանսպորտում, ինչպե՞ս է իրականացվելու վերահսկողությունը: Հասարակական տրանսպորտից օգտվելու կարգը մանրամասն ներկայացվել է պարետատան հայտարարությունում: Ներկայում քաղաքապետարանի համապատասխան պաշտոնյաները նախապատրաստական աշխատանքներ են տանում՝ նախ ձեռք բերելու այն անհրաժեշտ միջոցները, որոնք պետք են պարետատան որոշումը իրագործելու համար: Նաև քննարկում է ընթանում կառավարության գործընկերների հետ համատեղ: Իհարկե, հնարավոր է ապահովել վերահսկողությունը: Պետք է նախ ապավինել համապատասխան վերահսկող մարմինների աշխատանքին, ինչպես նաև մեր քաղաքացիների բարձր սոցիալական պատասխանատվությանը: Արդեն մտահոգություններ են հնչում, որ եթե սահմանվում է, որ հասարակական տրանսպորտում կանգնած ուղևորներ չպետք է լինեն, մարդիկ խնդրի առաջ կարող են կանգնել, կանգառներում մարդկային կուտակումներ կարող են լինել: Կարծում եմ՝ գաղտնիք բացահայտած չեմ լինի, եթե ասեմ, որ տրանսպորտի վիճակը, մեղմ ասած, բարվոք չէր նաև համավարակից առաջ: Այսինքն՝ մենք շատ լավ գիտենք, թե ինչ վիճակում էր մեր տրանսպորտը և գիտենք, որ քաղաքապետարանը նոր տրանպորտային ցանցի գործարկման աշխատանքի փուլում է: Եվ, այո, թաքցնելու կարիք էլ չկա, որ լրացուցիչ սահմանափակումը լրացուցիչ ծանրաբեռնվածություն կլինի տրանսպորտի վրա:

22:06 - 15 մայիսի, 2020

Պատմամշակութային արժեք ներկայացնող շենքի վրա սեփականատերը աշխատանքներ է իրականացրել առանց համապատասխան թույլտվության

Երևանի Տիգրան Մեծի պողոտայում՝ Հանրապետության հրապարակի հարեւանությամբ գտնվող պատմամշակութային արժեք ներկայացնող շենքի ճակատային հատվածում սեփականատերը աշխատանքներ է իրականացրել (շվաքարան է տեղադրել եւ փորձել ներկել ճակատը) առանց համապատասխան թույլտվության: Այս մասին ֆեյսբուքյան իր էջում գրել է Երևանի քաղաքապետի մամուլի խոսնակ Հակոբ Կարապետյանը։ «Քաղաքապետարանի քաղաքաշինության եւ հողի վերահսկողության վարչության աշխատակիցները տեղում վարչական ակտ են կազմել՝ պարտավորեցնելով դադարեցնել աշխատանքները եւ հանել շվաքարանը: Յուրաքանչյուր վերակառուցում, լինի պատուհանների փոխում, շվաքարանի տեղադրում, օդորակիչի տեղադրում և այլն, պետք է իրականացվի ԿԳՍՄ համապատասխան ստորաբաժանման եզրակացության հիման վրա եւ Երեւանի քաղաքապետարանի թույլտվությամբ: Օրենսդրության պահանջների հետագա անտեսումը կարող է քրեական պատասխանատվություն առաջացնել: Շնորհակալություն Տիգրան Գալստյանին՝ խնդրի վրա ուշադրություն հրավիրելու համար: Ի դեպ, լուսանկարում երեւացող պատշգամբը կառուցվել (վերանորոգվել) է տարիներ առաջ»,- գրել է նա:

18:50 - 08 մայիսի, 2020

Երևանի քաղաքապետրանի մամուլի խոսնակն անդրադարձել է հեղեղատար համակարգի խնդիրներին

Երևանի քաղաքապետարանի մամուլի խոսնակ Հակոբ Կարապետյանը ֆեյսբուքյան իր էջում գրել է, որ երեկվա անձրևառատ եղանակը մեմաշատ երեկո է ապահովել սոցցանցերում. «Քաղաքի հեղեղատար համակարգի խնդիրը բացվեց հերթական անգամ: Հեղեղատար համակարգերի գլոբալ խնդրի մասին կխոսեմ վերջում, բայց նախ ասեմ, որ Երևան քաղաքի հեղեղատար համակարգերի շահագործումը, պահպանումը և սպասարկումը, դեռ 2006-ից, պայմանագրով իրագործում է «Վեոլիա գրուպ» ընկերությունը: Երևանի քաղաքապետարանը պայմանագրի կողմ չէ. պայմանագրի կատարման վերահսկողությունն իրականացնում է ՀՀ ՏԿԵՆ Ջրային կոմիտեն: Այնուհանդերձ, քանի որ սա քաղաքային ենթակառույց է և սրա անխափանության հարցը անմիջականորեն վերաբերում է քաղաքի բնակիչներին, Երևանի քաղաքապետարանը որոշակի գործառույթ իրականացնում է. մասնավորապես, կոմունալ ծառայության աշխատակիցները պարբերաբար իրենց ուսումնասիրությունների արդյունքում առաջարկներ են ներկայացնում Վեոլիային, խնդիրների դեպքում օգնում են դրանց հետևանքների վերացման գործում: Ինչպես, օրինակ, երեկ, երբ մեր կոմունալի աշխատակիցների օգնությամբ խցանումից մաքրվել են նախագահական նստավայրի տարածքի անձրևատար ուղիները: Քաղաքապետարանի առաջարկությամբ նաև նոր հեղեղատարներ են կառուցվում, և եթե նկատել եք, մի քանի թունելներում, որտեղ տարիներ առաջ պարբերաբար ջուր էր կուտակվում, երեկվա անձրևը խնդիր չի առաջացրել: Ինչ վերաբերում է հեղեղատար համակարգի անկատարության խնդրին ընդհանրապես, պետք է նշել, որ անցած տասնամյակների ինտենսիվ ու հաճախ չնորմավորված կառուցապատումը ևս իր զգալի ազդեցությունը թողել է: Օրինակ, Պռոշյան փողոցի անձրևային հոսքերը, որոնք ժամանակին լցվում էին Հրազդանի ձորն ու խառնվում գետի ջրերին, այժմ «բախվում են» ձորի երկայնքով կառուցված օբյեկտների պարիսպներին ու շարունակում են իրենց ճանապարհը Պռոշյանն ի վար՝ դեպի Լուսավորիչ ու Արշակունյաց պողոտա: Կամ, հենց երեկվա ամենադիտարժան դեպքը՝ Բաղրամյան 26-ի գարաժների հեղեղը, թերևս չէր լինի, եթե վերևում գտնվող Անտառային փողոցի կառուցապատման ընթացքում մանրամասն հաշվի առնվեին կառուցապատման ազդեցությունները, նախագծվեին անհրաժեշտ ենթակառույցները և այլն: Ամեն դեպքում, կրկնեմ, թեև խնդիրը քաղաքապետարանի ուղիղ լիազորությունների շրջանակում չէ, հեղեղատար համակարգերի հարցով մեր մասնագետները պարբերաբար զբաղվում են», – ասված է գրառման մեջ:

14:37 - 07 մայիսի, 2020

Եթե օրենսդրությունը չի արգելում, դա արդեն անողի պատասխանատվության դաշտում է. Կարապետյանը՝ Թադևոսյանի նշանակումների մասին |armtimes.com|

armtimes.com: Ապրիլի 26-ին «Փաստերի ստուգման հարթակը» (fip.am) հրապարակել էր մի հոդված, որտեղ նշված է, որ Երեւանի Աջափնյակ վարչական շրջանի ղեկավար Թելման Թադեւոսյանը թաղապետարանի տարբեր հաստիքներում է նշանակել կոռուպցիայի համար նախկինում դատապարտված, խաղաղ ցուցարարների ծեծուջարդին մասնակցած ՀՀԿ-ական մի շարք կադրերի: Կայքը նաեւ մատնանշել էր, որ Թադեւոսյանի հետ սեփական բիզնեսում փոխկապակցված անձինք թաղապետարանում տարբեր ստորաբաժանումներում են աշխատում: Օրինակ՝ 2020 թվականին Թադեւոսյանն իր տեղակալ է նշանակել Գեւորգ Բադեյանին, իսկ վերջինիս տղան՝ Երեմ Բադեյանը, եւս աշխատում է նույն թաղապետարանի բաժիններից մեկում՝ որպես առաջատար մասնագետ։ Թադեւոսյանի մյուս տեղակալը՝ Կարեն Մկրտչյանը, որը նշանակվել է այս պաշտոնին 2020 մարտին, նույնպես նախկին հանրապետական է, որը 2017-2019 թվականներին եղել է Վարդենիսի քաղաքապետի տեղակալը, իսկ 2017-ի ընտրությունների ժամանակ ակտիվ աշխատել է ՀՀԿ-ի համար: Թաղապետարանում վերջին նշանակումներից է նաեւ Արամայիս Ավետիսյանը, որը, ըստ fip.am-ի, 2016 թվականի հուլիսի 29-ին՝ «Սասնա ծռերի» դեպքերի ժամանակ, մասնակցել է ցուցարարների վրա հարձակումներին: Նա հենց այն քաղաքացիական հագուստով անձանցից է եղել, որոնք ծեծ ու ջարդի են ենթարկել խաղաղ ցուցարարներին: Այդ ժամանակ Արամայիս Ավետիսյանը քաղաքապետարանում որպես բաժնի պետ է աշխատել եւ 2016 թվականի դեկտեմբերին կաշառք ստանալիս բռնվել: Երեւանի քաղաքապետի խոսնակ Հակոբ Կարապետյանը, «Հայկական ժամանակի» հետ զրույցում անդրադառնալով կայքի հրապարակած տեղեկություններին, նկատեց, որ Աջափնյակ վարչական շրջանի ներկայիս ղեկավար Թելման Թադեւոսյանը մինչեւ այդ նշանակումը ղեկավարել է Նուբարաշեն վարչական շրջանը, եւ այդ պաշտոնում իր ցուցադրած արդյունքները հիմք են հանդիսացել, որպեսզի քաղաքապետը նրան առաջարկի ավելի ընդարձակ ու բազմամարդ վարչական շրջանի ղեկավարումը: «Պարոն Թադեւոսյանը պատվով կատարել է իր պարտականությունները Նուբարաշենում եւ շարունակում է կատարել Աջափնյակում: Ինչ վերաբերում է Թադեւոսյանի վարած կադրային քաղաքականությանը, կամ ներկայումս նրա հետ Աջափնյակում աշխատող այս կամ այն պաշտոնյային, կարծում եմ՝ ավելի տեղին է լսել հենց նրա մեկնաբանությունը: Համենայն դեպս ներկայումս կամ նախկինում այս կամ այն կուսակցության անդամ լինելը բացարձակ հիմք չէ՝ անձի կատարած աշխատանքի արդյունավետությունը գնահատելու համար»,- ասաց Կարապետյանը: Կարդալ ավելին՝ armtimes.com-ում։

17:18 - 27 ապրիլի, 2020

Երևանի քաղաքապետարանը 500 նոր վերելակ ձեռք բերելու մրցույթ է հայտարարում․ Հակոբ Կարապետյան

Երևանի քաղաքապետարանը 500 նոր վերելակ ձեռք բերելու մրցույթ է հայտարարում։ Այս մասին ֆեյսբուքի իր էջում գրել է քաղաքապետի մամուլի քարտուղար Հակոբ Կարապետյանը։«Երևանի քաղաքապետարանը հայտարարում է մայրաքաղաքի 10 վարչական շրջաններում 500 նոր վերելակ ձեռք բերելու, տեղադրելու և սպասարկման ծառայությունների գնման բաց մրցույթ:Ըստ մրցույթի տեխնիկական բնութագրի՝ վերելակի չափսերը եւ այլ պարամետրեր պետք է հարմարեցված լինեն սահմանափակ շարժունակությամբ մարդկանց համար, նույն նպատակով վերելակի հրահանգի վահանակի կոճակները կլինեն համապատասխան բարձրության վրա (900-1200մմ):Վերելակի խցիկում կլինի նաև հայերեն ձայնային ազդանշան, ինչպես նաև՝ վերելակից օգտվելու կանոնները և այլ ցուցումներ խցիկում կլինեն պարտադիր հայերեն գրություններով:Մրցույթին մասնակցելու հայտեր կարող են ներկայացնել համակարգում գրանցված բոլոր անձիք, անկախ օտարերկրյա ֆիզիկական անձ, կազմակերպություն, քաղաքացիություն չունեցող անձ լինելու հանգամանքից։Մրցույթի մանրամասները՝ https://bit.ly/39DZGyC»

18:47 - 02 ապրիլի, 2020

Գյումրիում բռնության ենթարկված 13-ամյա աղջիկը կարողանում է քայլել, առայժմ՝ բժիշկների օգնությամբ

Գյումրիում շաբաթներ առաջ բռնության ենթարկված, ծայրահեղ ծանր վիճակում հիվանդանոց տեղափոխված 13-ամյա աղջիկը արդեն կարողանում է քայլել, առայժմ՝ բժիշկների օգնությամբ: Այս մասին ֆեյսբուքի իր էջում գրել է Երևանի քաղաքապետի մամուլի քարտուղար Հակոբ Կարապետյանը։ «Նա շարունակում է մնալ «Սուրբ Աստվածամայր» ԲԿ-ի բժիշկների հոսկողության տակ ու ստանալ դեռ անհրաժեշտ բուժումը»,- գրել է Կարապետյանը:

18:48 - 30 մարտի, 2020

Երևանի քաղաքապետարանը ԱԻՆ-ի հետ համատեղ ամենօրյա ռեժիմով կատարում է ախտահանիչ միջոցառումներ

Երևանի քաղաքապետարանը, համագործակցելով ՀՀ արտակարգ իրավիճակների նախարարության հետ, նոր տիպի կորոնավիրուսի տարածումը կանխելու նպատակով ամենօրյա ռեժիմով ախտահանում է Երեւանի կանգառները, աղբամանները եւ տրանսպորտային միջոցները եւ այլ հանրային վայրեր: Այս մասին «Ֆեյսբուք»-ի իր էջում գրել է Երևանի քաղաքապետի մամուլի խոսնակ Հակոբ Կարապետյանը: Նրա խոսքով` «Երևանի աղբահանություն և սանիտարական մաքրում» (ԵԱՍՄ) համայնքային հիմնարկը նաև ջրցան մեքենաներով ախտահանում է փողոցները: «Ախտահանման աշխատանքները աջակցություն են ստանում նաև հասարակական սեկտորից: Շնորհակալություն հայտնելով համայնքի աջակիցներին՝ այնուհանդերձ, հորդորում ենք բոլորին՝ նման կարգի աջակցության դեպքում անպայման համաձայնեցնել աշխատանքները քաղաքային իշխանության մարմինների հետ՝ առնվազն աշխատանքը համակարգելու և անվտանգության նկատառումներով: Հատկապես արտակարգ դրության պայմաններում աշխատանքները պետք է համակարգված լինեն»,- գրել է Կարապետյանը:

11:20 - 29 մարտի, 2020

Այդ ավտոբուսները պահվում են հենց կոլապսային իրավիճակներից խուսափելու համար. Հակոբ Կարապետյան |lragir.am|

lragir.am: Երևանի քաղաքապետի մամուլի քարտուղար Հակոբ Կարապետյանն այսօր կառավարությունում հրավիրած ասուլիսում անդրադարձավ հարցին, թե Երևանի իշխանությունը որքանո՞վ է պատրաստ տրանսպորտի հնարավոր կոլապսին՝ հաշվի առնալով, որ շատ մասնավոր ընկերություններ այս օրերին հայտարարում են, որ վնասով են աշխատում և այսպես շարունակվելու դեպքում կդադարեցնեն աշխատանքը: «Կոլապսի հետ կապված՝ Աստված ոչ անի, եթե այդպիսի իրավիճակի հասնենք: Երևան քաղաքային համայնքի ենթակայությամբ գործող Երևանի ավտոբուս ՓԲԸ-ն ունի ռեզերվային թվով ավտոբուսներ: Ինձ երբեմն հարց են տալիս՝ ինչո՞ւ այդ ավտոբուսները չեն գործարկվում, այդ ավտոբուսները պահվում են հենց կոլապսային իրավիճակներից խուսափելու համար: Մենք կարող ենք համարել, որ հիմա ունենք տրանսպորտի հետ կապված լարված վիճակ, բայց կոլապսից հեռու ենք»,- ասաց Հակոբ Կարապետյանը: Նա հավելեց՝ երբ մասնավոր փոխադրողները դադարեցնում են իրենց գործունեությունը, այդ ռեզերվի միջոցով իրավիճակը վերականգնվում է: Նա ասաց, որ տեղյակ է՝ շահագործող ընկերությունները նվազեցրել են օրվա հարկերը: «Նաև տեղյակ եմ, որ քաղաքապետարանը և կառավարական մարմինները քննարկումներ են անցկացնում՝ որոշակի այլ տուրքերի վերանայման հետ կապված»,- հավելեց Հակոբ Կարապետյանը:

15:27 - 21 մարտի, 2020

Կարևոր է` կարծիք հայտնող հանրային գործիչները ուշադիր լինեն խնդրին վերաբերող փաստաթղթերը ընթերցելու և մեկնաբանելու հարցում. Հակոբ Կարապետյանը` Թեհմինա Վարդանյանին

Շատ կարևոր է, որ հանրային հարթակում այս կամ այն հարցի վերաբերյալ կարծիք հայտնող հանրային գործիչները ուշադիր լինեն խնդրին վերաբերող փաստաթղթերը ընթերցելու և մեկնաբանելու հարցում: Այս մասին իր ֆեյսբուքյան էջում գրել է քաղաքապետի մամուլի խոսնակ Հակոբ Կարապետյանը: «Ավագանու անդամ, հարգարժան Թեհմինա Վարդանյանը գրառում է արել, որտեղ նշել է, թե քաղաքապետարանից գրություն է ստացել, որով առաջարկվել է հետաձգել մարտի 19-ի նիստը մինչև մարտի 31-ը: Խոսքը քաղաքապետ Հայկ Մարությանի անունից երեք խմբակցությունների ղեկավարներին հասցեագրված գրության մասին է, որով քաղաքապետն առաջարկել է, մեջբերում եմ բառացի, «մինչև մարտի 18-ի ժամը 14.00-ը, խորհրդակցելով Ձեր խմբակցության անդամների հետ, ներկայացնել դիրքորոշում Երևանի ավագանու 19.03.2020թ. նիստը հետաձգելու հնարավորության վերաբերյալ: Եթե ունեք այլ առաջարկ՝ խնդրում եմ ներկայացնել դրանց հիմնավորումները…»: «Լույս» խմբակցությունից նշված ժամկետում քաղաքապետը պատասխան, այսինքն, դիրքորոշում չի ստացել: Հաշվի առնելով մյուս խմբակցությունների և հատկապես ավագանու մեծամասնության՝ «Իմ քայլը» խմբակցության դիրքորոշումները, կայացվել է այն որոշումը, որի մասին տեղեկացրել ենք նախօրեին՝ նիստը կանցկացվի ամսի 19-ին, Երևանի քաղաքապետարանի ճեմասրահում»,- գրել է Կարապետյանը:

17:39 - 18 մարտի, 2020

Ախտահանվում են քաղաքապետարանի ենթակայության հանրային տրանսպորտի միջոցները. Հակոբ Կարապետյան

Երևանի քաղաքապետի մամուլի խոսնակ Հակոբ Կարապետյանը ֆեյսբուքի իր էջում լուսանկարներ է հրապարակել, որոնցում երեւում է, թե ինչպես են ախտահանվում քաղաքի փոխադրամիջոցները: Լուսանկարներին կից Կարապետյանը գրել է. «Ախտահանվող տրանսպորտային միջոցները յուրաքանչյուր հաջորդ օրը առավոտյան արդեն պատրաստ կլինեն շահագործման։ Հիշեցնեմ, որ Երեւանի քաղաքապետի հանձնարարությամբ, ԱՆ ցուցումով, համապատասխան մասնագիտական միջոցներով ախտահանվում են քաղաքապետարանի ենթակայության հանրային տրանսպորտի միջոցները։ Ախտահանումը կիրականացվի ամեն օր, հերթափոխից հետո»։

10:25 - 15 մարտի, 2020

Քաղաքապետարանի ենթակայությամբ գործող մի շարք հաստատություններ փակվեցին. Հակոբ Կարապետյան

Երևանի քաղաքապետարանի մամուլի խոսնակ Հակոբ Կարապետյանը իր ֆեյսբուքյան էջում գրել է․ «Հաշվի առնելով նոր կորոնավիրուսի տարածման կանխարգելման միջոցառումների անհրաժեշտությունը՝ առնվազն մինչև մարտի 23-ը փակ կլինեն նաև Երևանի քաղաքապետարանի ենթակայությամբ գործող թատրոնները, թանգարանները, գրադարանները, մանկապատանեկան ստեծագործության կենտրոնները, մարզադպրոցները, արվեստի և երաժշտական դպրոցները։ Հետագա կանխարգելիչ միջոցառումների և կազմակերպությունների գործունեության վերաբերյալ կտեղեկացնենք լրացուցիչ: Հիշեցնենք, որ առնվազն մինչև մարտի 23-ը փակ կլինեն նաև դպրոցները և մանկապարտեզները»։

19:57 - 14 մարտի, 2020