Արցախ

Արցախի Հանրապետություն կամ Լեռնային Ղարաբաղ․ 1991թ․ սեպտեմբերի 2-ին անկախացած հանրապետություն։ 2020 թվականի նոյեմբերի 9-ի հայտարարությունից հետո Արցախում տեղակայվել են ՌԴ խաղաղապահ ուժերը։ Ներկայումս  Արցախի  վերահսկողության տակ է նախկին Խորհրդային Միության կազմի մեջ մտնող Լեռնային Ղարաբաղի ինքնավար մարզը՝ բացառությամբ Հադրութի շրջանի և Շուշիի շրջանի Շուշի և Քարին տակ բնակավայրերի։

Մայրաքաղաքը Ստեփանակերտն է։ Գործող նախագահը Արայիկ Հարությունյանն է։

Արցախի Հանրապետության անկախությունը դեռեւս չի ճանաչել ՄԱԿ անդամ որեւէ պետություն։

Հայկական երկու պետությունների միացումը պետք է լինի Արցախի անկախության միջոցով. Դավիթ Շահնազարյան |artsakhpress.am|

Հայկական երկու պետությունների միացումը պետք է լինի Արցախի անկախության միջոցով. Դավիթ Շահնազարյան |artsakhpress.am|

artsakhpress.am: «1994 թ.-ի մայիսի 12-ին կնքված եռակողմ համաձայնագիրն Ադրբեջանը ստորագրեց ռազմական գործողությունների ճնշման տակ»: Այս մասին Կրակի և ռազմական գործողությունների լիակատար դադարեցման մասին համաձայնագրի ուժի մեջ մտնելու 25-ամյակին նվիրված խորհրդաժողովին հայտարարել է քաղաքական գործիչ Դավիթ Շահնազարյանը: «Այդ տարիներին մեզ հաջողվեց ներդաշնակել ռազմական և դիվանագիտական գործունեությունները: Հնարավորություն կար, որպեսզի հրադադարի պայմանագիրը լինի երկկողմանի՝ Ստեփանակերտի և Բաքվի միջև: Սակայն առանց Հայաստանի մասնակցության այդ փաստաթղթում կար երկու վտանգ: Այն, որ փաստաթուղթը կարճատև կյանք կունենար և անհնար կլիներ դարձնել ԵԱՀԿ-ի փաստաթուղթ ու դրա հիման վրա Բուդապեշտյան գագաթաժողովում Ղարաբաղը միջազգայնորեն ճանաչված կողմ դարձնելը: Եվ մեր նպատակը հենց Լեռնային Ղարաբաղը հակամարտության ու կարգավորման կողմ ճանաչելն էր: Չափազանց կարևոր է եղել այն օրակարգը, որը մենք անվանում ենք Վիեննայի, Սանկտ-Պետերբուրգի և Ժնևի օրակարգ: Ըստ էության, 2011 թ.-ին Կազանի փաստաթղթի տապալումից հետո Մինսկի խմբի հիմնական գործառույթը եղավ հակամարտության կառավարումը և վերահսկումը, քանի որ ակնհայտ էր, որ բանակցություններում լուծում չկա: Իրականում խնդրի լուծումը ռազմաքաղաքական է, և մենք պետք է նախաձեռնությունը երբեք չզիջենք հակառակորդին: Մենք պետք է զարգանանք հենց այս պայմաններում՝ անընդհատ մեծացնելով մեր պոտենցիալը և ստեղծելով պայմաններ երբեմն փոփոխելով իրավիճակը: Ակնհայտ է, որ հայկական երկու պետությունների միացումը պետք է լինի Արցախի անկախության միջոցով»,- նշել է Դ. Շահնազարյանը:
10:51 - 11 մայիսի, 2019
Վստահ եմ, որ ԱՀ-ում ավելի բարձր տնտեսական ցուցանիշներ կունենանք. ՀՀ Կենտրոնական բանկի նախագահ

Վստահ եմ, որ ԱՀ-ում ավելի բարձր տնտեսական ցուցանիշներ կունենանք. ՀՀ Կենտրոնական բանկի նախագահ

ԱՀ նախագահ Բակո Սահակյանի մոտ կառավարության անդամների և ՀՀ Կենտրոնական բանկի ներկայացուցիչների մասնակցությամբ տեղի ունեցած հանդիպումը նվիրված էր Արցախի տնտեսության մեջ բանկային համակարգի ներգրավվածությանը: Այս մասին «Արցախպրես»-ի թղթակցի հետ զրույցում ասել է Հայաստանի Հանրապետության Կենտրոնական բանկի նախագահ Արթուր Ջավադյանը:Նա մասնավորապես ասել է. «Խորհրդակցությանը ներկա էին ավելի քան 10 բանկերի ղեկավարներ, որոնք արդեն ներգրավված են ԱՀ տնտեսության մեջ: Մենք քննարկել ենք Արցախի տնտեսությունում նոր գործիքների և նոր տեխնոլոգիաների կիրառման հնարավորությունների, ինչպես նաև բանկային ծառայություններն օգտվողներին ավելի հասանելի դարձնելու վերաբերյալ հարցեր: Անդրադարձել ենք նաև մի շարք նոր ծրագրերի, մասնավորապես, ԱՀ իշխանությունների կողմից ներկայացվելեն բնակարանաշինության նոր ծրագրերը: Այս հանդիպումը նոր ակտիվություն է հաղորդել ոլորտի պատասխանատուների մոտ: Վստահ եմ, որ ավելի բարձր տնտեսական ցուցանիշներ կունենանք տարվա վերջին, և մեր ներգրավվածությունն ավելի շատ կլինի ԱՀ տնտեսությունում»:
17:37 - 04 մայիսի, 2019
Սամվել Բաբայանը դատի է տվել Արցախի ոստիկանությանն` իրեն հաշվառումից հանելու համար

Սամվել Բաբայանը դատի է տվել Արցախի ոստիկանությանն` իրեն հաշվառումից հանելու համար

azatutyun.am: Լեռնային Ղարաբաղի Պաշտպանության բանակի նախկին հրամանատար Սամվել Բաբայանը դատի է տվել Լեռնային Ղարաբաղի ոստիկանությանն` իրեն հաշվառումից հանելու համար: Նա «Ազատության»-ը տեղեկացրեց, որ առաջիկայում կսկսվի դատավարությունը։ Բաբայանը, ով փետրվարի սկզբին բարձրաձայնել էր 2020-ին Լեռնային Ղարաբաղում կայանալիք նախագահական ընտրություններում իր թեկնածությունն առաջադրելու մասին, 2019-ի փետրվարին է իմացել, որ դեռ տարիներ առաջ՝ 2006 թվականին, իրեն զրկել են Արցախի քաղաքացիությունից: Բաբայանը դիմել էր Արցախի ոստիկանություն՝ խնդրի վերաբերյալ պարզաբանում պահանջելով: ԼՂ ոստիկանությունն էլ հաղորդագրություն էր տարածել՝ պարզաբանելով, թե «քանի որ 2006-ի սեպտեմբերի 11-ին Սամվել Բաբայանը իր դիմումի համաձայն հանվել է Լեռնային Ղարաբաղի հաշվառումից՝ Հայաստանի Հանրապետության Երևան քաղաքում հաշվառվելու համար, ուստի վերջինս ընդգրկված չէ Արցախի ընտրողների ռեգիստրում, այլ ընդգրկված է Հայաստանի ընտրողների ռեգիստրում: Սամվել Բաբայանը, ցանկության դեպքում կարող է դիմել Արցախի ոստիկանության համապատասխան անձնագրային ծառայություն՝ Արցախի Հանրապետության որևէ համայնքում հաշվառվելու համար: Հաշվառվելու դեպքում նա վերոհիշյալ օրենսգրքի ուժով կընդգրկվի Արցախի Հանրապետության ընտրողների ռեգիստրում»:
13:15 - 03 մայիսի, 2019
Ադրբեջանական կողմից առաջարկվող գերիները փոխանակելու «բոլորը բոլորի դիմաց» սկզբունքը Բաքվի կողմից ստեղծված արհեստական օրակարգ է. Արցախի ԱԳՆ

Ադրբեջանական կողմից առաջարկվող գերիները փոխանակելու «բոլորը բոլորի դիմաց» սկզբունքը Բաքվի կողմից ստեղծված արհեստական օրակարգ է. Արցախի ԱԳՆ

-ՌԴ արտգործնախարար Սերգեյ Լավրովը հայտարարել էր, որ Ռուսաստանը գերիների փոխանակման հարցում «բոլորը բոլորի դիմաց» սկզբունքի կողմնակից է, որը նպաստում է հակամարտության գոտիներում վստահության հաստատմանը: Նա իր այս հայտարարության մեջ հիշատակել էր նաև ադրբեջանա-ղարաբաղյան հակամարտությունը։ Հնարավո՞ր եք համարում «բոլորը բոլորի դիմաց» սկզբունքով փոխանակումը՝ հաշվի առնելով, որ Արցախում են գտնվում 2 ադրբեջանցի դիվերսանտներ, որոնք մեղադրված են ծանր հանցագործությունների մեջ, և Ադրբեջանում են գտնվում Հայաստանի և Արցախի գերեվարված քաղաքացիներ։ -Արցախի Հանրապետության և Ադրբեջանի միջև միջպետական հակամարտության ընթացքում պաշտոնական Ստեփանակերտի համաձայնությամբ եղել են «բոլորը բոլորի դիմաց» սկզբունքով ռազմագերիների և պատանդների փոխադարձ ազատ արձակելու դեպքեր։ Որպես օրինակ կարող ենք նշել, որ 1996 թ. մայիսին ռուսական կողմի նախաձեռնությամբ Արցախը, Հայաստանը և Ադրբեջանն իրականացրեցին ռազմագերիների և պատանդների փոխանակում՝ «բոլորը բոլորի դիմաց» սկզբունքով: Արցախը և Հայաստանը Ադրբեջանին հանձնեցին 71 անձանց, իսկ ադրբեջանական կողմը Հայաստանին՝ 39: Միևնույն ժամանակ, անհրաժեշտ է հատկապես ընդգծել, որ Ադրբեջանի կողմից հանձնված հայ պատանդների մեծամասնությունը որևէ առնչություն չունեին ադրբեջանա-ղարաբաղյան հակամարտության հետ: Նրանց շարքում կային անձինք, որոնք տարանցիկ կերպով էին հայտնվել Ադրբեջանի տարածքում և պատանդ վերցվել: Որպես օրինակ՝ Բաքվի օդանավակայանում Վրաստանի երկու քաղաքացիներ՝ հայկական ծագումով Վիլիկ Օգանեսովին և Արտավազ Միրզոյանին պատանդ վերցնելու դեպքն էր, որը քննվել է կամայական ձերբակալման հարցերով ՄԱԿ-ի աշխատանքային խմբի կողմից: 1993 թ. սեպտեմբերի 28-ին ընդունված 31/1993 որոշման մեջ ՄԱԿ-ի աշխատանքային խումբը նշեց, որ նրանց ձերբակալումը զուրկ է որևէ իրավական հիմքից և Մարդու իրավունքների համընդհանուր հռչակագրի և Քաղաքացիական և քաղաքական իրավունքների մասին միջազգային դաշնագրի խախտում է:
12:49 - 03 մայիսի, 2019
Հակառակորդի դիպուկահարները կրակել են Ակնայի զորամասերից մեկի հացի ավտոմեքենայի ուղղությամբ՝ վնասելով թափքը. Արցախի ՊՆ

Հակառակորդի դիպուկահարները կրակել են Ակնայի զորամասերից մեկի հացի ավտոմեքենայի ուղղությամբ՝ վնասելով թափքը. Արցախի ՊՆ

Վերջին շրջանում արցախա-ադրբեջանական հակամարտ զորքերի շփման գծի տարբեր հատվածներում նկատվում է հակառակորդի գործողությունների աճ, որոնք դրսևորվում են ինչպես ինժեներա-ամրաշինական մեծածավալ աշխատանքների, այնպես էլ հրադադարի պահպանման ռեժիմի խախտումների տեսքով: «Հատկանշական է, որ ադրբեջանական կողմը պարբերաբար կրակային խոցման թիրախ է ընտրում ոչ միայն ՊԲ առաջնային դիրքերը, այլև մարտական հերթապահություն իրականացնող հայկական անձնակազմի թիկունքային ապահովման շարժական օբյեկտները: Մասնավորապես՝ ադրբեջանական զինուժը բոլորովին վերջերս «ՍՎԴ» տիպի դիպուկահար հրացաններից կրակ է վարել ՊԲ արևելյան (Ակնա) հատվածում տեղակայված զորամասերից մեկի հացի ավտոմեքենայի ուղղությամբ՝ վնասելով թափքը, իսկ միայն մայիսի 2-ի լույս 3-ի գիշերը բանակի հյուսիս-արևելյան (Մատաղիսի) հատվածում գտնվող մարտական դիրքերի ուղղությամբ խոշոր տրամաչափի դիպուկահար զինատեսակներից, գնդացիրներից ու ինքնաձիգներից արձակել է շուրջ 330 կրակոց: Արցախի Հանրապետության պաշտպանության նախարարությունը ԵԱՀԿ Մինսկի խմբի համանախագահող երկրների ուշադրությունն է հրավիրում վերոնշյալ փաստի վերաբերյալ՝ միաժամանակ կոչ անելով ադրբեջանական կողմին ձեռնպահ մնալ իրադրությունը արհեստականորեն սրելու անհեռանկար մարտավարությունից»:
08:10 - 03 մայիսի, 2019
Բաքուն ամեն կերպ խախտում է թե՛ Ղարաբաղի, թե՛ Ադրբեջանի բնակիչների իրավունքները. օմբուդսմեն

Բաքուն ամեն կերպ խախտում է թե՛ Ղարաբաղի, թե՛ Ադրբեջանի բնակիչների իրավունքները. օմբուդսմեն

news.am։ Ադրբեջանը թույլ չի տալիս Ղարաբաղի բնակիչներին օգտվել ԼՂՀ-ում գործող օդանավակայանից՝ դրանով իսկ խախտելով հանրապետության բնակիչների ազատ տեղաշարժվելու իրավունքը։ Այս մասին ապրիլի 30-ին Հայաստանի խորհրդարանի մարդու իրավունքների եւ հանրային հարցերի մշտական հանձնաժողովի նիստում ասել է Լեռնային Ղարաբաղի Հանրապետության մարդու իրավունքների պաշտպան Արտակ Բեգլարյանը։ Նա նշել է, որ Բաքվի մեղքով Ղարաբաղի բնակիչները զրկված են Սարսանգի ջրամբարից օգտվելու հնարավորությունից։ «Թեեւ հենց ադրբեջանական կողմն է ավելի հաճախ ու ավելի բարձրաձայն բարձրացնում այս հարցը, բայց Ադրբեջանի մեղքը Սարսանգի շահագործման հարցում բավական մեծ է»,- ասել է օմբուդսմենը՝ պարզաբանելով, որ ջրամբարի վերահսկողությունը, ըստ էության, տեղի է ունենում միաժամանակ երկու կողմից, եւ ադրբեջանական կողմի մեղքով, որի վերահսկողության ներքո է գտնվում նրա առավել կարեւոր մասը, որը թույլ է տալիս ջրամբարից ջրառ կատարել նրա հետագա բաշխման համար հայկական եւ ադրբեջանական գյուղական վայրերին, դա տեղի չի ունենում։ Բեգլարյանը փաստել է, որ Բաքուն չի ցանկանում համագործակցել իրենց հետ այս հարցով, թեեւ հակառակ դեպքում ավելի շատ կշահեին իրենք՝ ադրբեջանցիները, քանի որ այդ ջրի մոտ 70-80 տոկոսը գնում է հենց ադրբեջանական գյուղեր։ «Նրանք, ըստ էության, խախտում են իրենց իսկ՝ Ադրբեջանի քաղաքացիների իրավունքները, էլ չեմ ասում մեր գյուղաբնակների իրավունքների մասին»,- ամփոփել է Արտակ Բեգլարյանը։  
12:37 - 30 ապրիլի, 2019
Արցախի ՊՆ-ն հերքում է Ադրբեջանին և կոչ անում չսրել իրադրությունը

Արցախի ՊՆ-ն հերքում է Ադրբեջանին և կոչ անում չսրել իրադրությունը

Արցախի Հանրապետության պաշտպանության նախարարությունը հաղորդագրություն է տարածել՝ հերթական ապատեղեկատվությունը որակելով ադրբեջանական որոշ լրատվամիջոցների կողմից տարածված տեղեկությունները։ Հաղորդագրությունում ասված է․ «Ադրբեջանական որոշ լրատվամիջոցների կողմից տարածված տեղեկությունն առ այն, թե իբր ս.թ. ապրիլի 24-ի ժամը 17:30-ի և 25-ի ժամը 15:20-ի սահմաններում հայկական առաջապահ ուժերը կրակահերթեր են արձակել հակամարտ զորքերի շփման գծի արևելյան հատվածում տեղակայված մերձճակատային Չիրագլի գյուղի ուղղությամբ, որի ընթացքում գնդակոծության տակ են հայտնվել այդ ժամանակ տներից մեկի բակում գտնվող 4-ից 13 տարեկան մի քանի աղջիկ երեխաներ, ոչ այլ ինչ է, քան հերթական ապատեղեկատվություն: Արցախի Հանրապետության պաշտպանության նախարարությունը ոչ միայն կտրականապես հերքում է ադրբեջանական կողմի տարածած տվյալ տեղեկությունը, այլև այն որակելով սադրիչ, իր պատրաստակամությունն է հայտնում, անհրաժեշտության դեպքում, վերոնշյալ բնագծերում առկա իրավիճակը բնութագրող տեսագրությունները՝ ֆիքսված տեսադիտարկման համակարգերով, ըստ ժամանակագրության ներկայացնել հանրության առավել լայն շրջանակների ուշադրությանը: Միաժամանակ Արցախի զինված ուժերի հրամանատարությունը, հավատարիմ մնալով հրադադարի պահպանման ռեժիմի տառին ու ոգուն, կոչ է անում ադրբեջանական կողմին ձեռնպահ մնալ շփման գծում իրադրությունն արհեստականորեն սրելու անհեռանկար մարտավարությունից և շարունակել պահպանել կառուցողական կեցվածք»։
16:31 - 25 ապրիլի, 2019
Ուղիղ, առանց թակարդների խոսում, քննարկում ենք, և լավ կլինի, որ Ալիևի հետ մեր խոսակցությունը շարունակվի․ Նիկոլ Փաշինյան |tert.am|

Ուղիղ, առանց թակարդների խոսում, քննարկում ենք, և լավ կլինի, որ Ալիևի հետ մեր խոսակցությունը շարունակվի․ Նիկոլ Փաշինյան |tert.am|

tert.am:  «Եթե ուզում ենք լուծել ԼՂ հիմնախնդիրը, մեզնից յուրաքանչյուրը պատրա՞ստ է վերցնել իր վրա պատասխանատվությունը»,- պատասխանելով հարցին, թե արդյոք ինքը ցանկանում է լուծել հիմնախնդիրը, այսպես արձագանքեց վարչապետ Նիկոլ Փաշինյանը՝ նշելով, որ ինքն էլ այդ հարցը հաճախ է տալիս: Նա նաև նշեց, որ բոլոր նրանց, ովքեր հարց են տալիս, թե արդյոք Հայաստանը պատրաստ է փոխզիջումների՝ ԼՂ հիմնախնդիրը լուծելու համար, ինքը միայն պատասխանում է․ «Հայաստանը չի կարող առանձին այդ հարցի հասցեատերը լինել, դա մի հարց է, որը պետք է ուղղվի հակամարտության 3 կողմերին, և նրանք սինքրոն պետք է պատասխանեն»: Վարչապետի խոսքով՝ ինքը հրաժարվում է այդ ռեժիմով աշխատելուց: «Բոլորին եմ ասում: Ես հարցնում եմ՝ այդ հարցը տալի՞ս եք Բաքվում: Ստացե՞լ եք պատասխան: Երբ որ այդ պատասխանը կունենաք ծրագրում գրած, ես էլ իմ պատասխանը կգրեմ, կդնեմ ծրարում, կփոխանցենք իրար, հետո կբացենք»,- ասաց նա:   Հարցին, թե ինչի մասին են խոսում բանակցություններին, Նիկոլ Փաշինյանը պատասխանեց․ «Իմ դիրքորոշումն այն է, որ Ղարաբաղի վերաբերյալ բոլորը պետք է տեղյակ լինեն, որովհետև դա միայն վարչապետի հարցը չէ»: Հետո նա ներկայացրեց վերջին հանդիպումից մի դրվագ: «Ես ասել եմ, որ ղեկավարները չեն կարող լուծել ԼՂ հարցը, որովհետև այդ հարցը լուծողը ժողովուրդն է: Որևէ լուծում հնարավոր չէ, եթե այն ընդունելի չէ ժողովուրդների համար»,- ասաց նա՝ նշելով, որ այլ մանրամասներ հանդիպումից չի պատմում, որովհետև կարծում է՝ դա կոռեկտ չէ:
06:35 - 24 ապրիլի, 2019
Նոր իրարանցում արցախյան խնդրի շուրջ |acnis.am|

Նոր իրարանցում արցախյան խնդրի շուրջ |acnis.am|

acnis.am։ Այն բանից հետո, երբ Նիկոլ Փաշինյանը Ադրբեջանի նախագահի հետ Վիեննայում տեղի ունեցած հանդիպման արդյունքներն ամփոփելիս հայտարարեց, որ Մինսկի խմբի համանախագահները քննարկման են ընդունել իր առաջարկած օրակարգը, եւ որ նա իր հարցերի պատասխանները չի ստացել ո՛չ համանախագահներից, ո՛չ էլ Ադրբեջանից՝ ղարաբաղյան խնդրի կարգավորման դիվանագիտության շուրջ նկատելի իրարանցում սկսվեց: Դժվար չէր կանխատեսել, որ Բաքուն կփորձի բանակցային գործընթացը տեղափոխել Մոսկվայի հովանավորության ներքո: Չի մոռացվել, թե ինչպես 2016թ. Վիեննայի հանդիպումից հետո՝ հայտնվելով զորքերի շփման գծում վերահսկողության սարքեր տեղադրելու՝ իր համար անընդունելի առաջարկների դեմհանդիման, Ադրբեջանը համառորեն ձգտում էր Ռուսաստանի նախագահի միջնորդությամբ հասնելու երկու երկրների նախագահների նոր հանդիպման: Հունիսին Սանկտ Պետերբուրգում կայացած հենց այդ հանդիպման ժամանակ էր, որ զրոյացվեց Վիեննայի համաձայնագրերի հրատապությունը: Հայաստանի ղեկավարությունը դադարել էր պնդել այդ համաձայնագրերի իրականացման անհրաժեշտության մասին, ինչը տարակուսանք էր առաջացրել ոչ միայն Հայաստանում, այլեւ արտասահմանյան դիտորդների շրջանում: Ադրբեջանն այդ ժամանակ հասավ իր նպատակին: Այժմ հայտնվելով նմանատիպ իրավիճակում, Ադրբեջանը կրկին հույսերը կապել է Ռուսաստանի հետ: Ադրբեջանի արտգործնախարար Էլմար Մամեդյարովի խոսքով՝ «Ռուսաստանի հետ համատեղ ջանքերի կրկնակի-եռակի ավելացման դեպքում կարելի է առաջընթաց ակնկալել ղարաբաղյան հակամարտության կարգավորման գործում»: Ռուսաստանը, որ բավական երկար ժամանակ հեռավորություն էր պահպանում կարգավորման դիվանագիտության մեջ ակտիվ միջամտությունից, բնականաբար, պետք է օգտվեր այս հանգամանքից: Արտգործնախարարների հանդիպումը կազմակերպվեց շատ արագ: Սակայն՝ դատելով հանդիպումից հետո ադրբեջանցի նախարարի արած հայտարարություններից, այս անգամ չհաջողվեց խուսափել հայկական օրակարգից: Նույն տպավորությունն են թողնում նաեւ Ռուսաստանի արտաքին գործերի նախարար Լավրովի՝ որեւէ կոնկրետություն չպարունակող եւ միայն Մինսկի խմբի համանախագահ երկրների ղեկավարների նախորդ հայտարարություններին հղում կատարող հաղորդումները: Նույնիսկ տպավորություն է ստեղծվում, թե Լավրովն ակնարկում է, որ հարցականի տակ են դրված կարգավորման հիմնարար սկզբունքները (ինչո՞ւ անհրաժեշտ եղավ հիշեցնել, որ այդ սկզբունքները մնում են ուժի մեջ եւ քննարկվել են): Բայց սրանով ամեն ինչ չի ավարտվում: Այն, որ ղարաբաղյան հակամարտության կարգավորման դիվանագիտությունը ծանր օրեր է ապրում, տեսանելի է Ադրբեջանի եւ Հայաստանի արտգործնախարարների հերթական հանդիպումն ԱՄՆ-ում անցկացնելու՝ Միացյալ Նահանգների պետքարտուղար Մայք Պոմպեոյի առաջարկից: Այս մասին Վարշավայում հայտարարել է Ադրբեջանի արտգործնախարար Էլմար Մամեդյարովը: Կան խոսակցություններ, որ նման հանդիպում կարող է լինել նաեւ Փարիզում: Թե ինչու Մինսկի խմբի համանախագահ երկրները նմանօրինակ «անջատողական» ակտիվության կարիք ունեցան՝ առայժմ այնքան էլ հասկանալի չէ: Բայց մի բան պարզ է. հակամարտության կողմերի հետ հանդիպումների ժամանակ համանախագահները չեն կարողանում պատասխանել հայկական կողմի հարցերին, մասնավորապես՝ այն հարցին, թե ինչու 1994թ. Բուդապեշտի գագաթաժողովի որոշումների խախտմամբ Լեռնային Ղարաբաղը դուրս բերվեց բանակցություններից: Պատասխան ստանալ չի հաջողվում նաեւ Ադրբեջանից, թե որն է Լեռնային Ղարաբաղը բանակցային գործընթացին վերադարձնելու նրա չկամության պատճառը: Իսկ առանց այդպիսի պատասխանների, հնարավոր չէ վերսկսել բանակցային գործընթացը. Հայաստանը պնդում է ստանալ այդ պատասխանները: Ադրբեջանում նույնպես լավ են հասկանում, որ Լեռնային Ղարաբաղը բանակցային գործընթացին վերադարձնելու Հայաստանի պահանջը, ինչպես նաեւ նման որոշում կայացնելուց Ադրբեջանի հրաժարվելը անհնար են դարձնում տարածքային հարցերի քննարկումը: Այդ մասին, մասնավորապես, հայտարարել է ղարաբաղյան հիմնախնդրի գիտակներից մեկը՝ Ադրբեջանի նախկին արտգործնախարար Թոֆիգ Զուլֆուգարովը՝ նշելով, որ բանակցություններն անիմաստ են դառնում Ադրբեջանի համար: Այնպես որ, քննարկելու բան կա բանակցությունների տարբեր մակարդակներում եւ տարբեր հովանավորությունների ներքո: Պարզապես ինչ-որ մոտեցումներ ստիպված պետք է փոխվեն:
06:21 - 24 ապրիլի, 2019
Արցախի Պետական նախարարն ընդունել է փայտամշակման արտադրությամբ զբաղվող մի խումբ ձեռներեցների

Արցախի Պետական նախարարն ընդունել է փայտամշակման արտադրությամբ զբաղվող մի խումբ ձեռներեցների

Արցախի Հանրապետության պետական նախարար Գրիգորի Մարտիրոսյանն ապրիլի 22-ին ընդունել է Արցախում փայտամշակման արտադրությամբ զբաղվող մի խումբ ձեռներեցների: Այս մասին տեղեկացնում է ԱՀ պետական նախարարի աշխատակազմի տեղեկատվության և հասարակայնության հետ կապերի բաժինը: Ողջունելով ներկաներին՝ պետական նախարարը նշել է, որ հանդիպման նպատակն է կառուցողական քննարկման միջոցով վեր հանել ոլորտում առկա խնդիրները՝ կապված ինչպես արտադրանքի արտահանման, այնպես էլ տեղական պահանջարկի բարելավման հետ: Փայտամշակող ընկերությունների ներկայացուցիչները պետական նախարարին են ներկայացրել ոլորտում առկա խնդիրները և հանդես եկել դրանց լուծման հնարավոր առաջարկություններով: Հանդիպմանը արծարծվել են նաև բնավճարների, հարկային օրենսդրությանը վերաբերող հարցեր: «Մենք հնարավորինս սեղմ ժամկետում կքննարկենք ձեր կողմից բարձրացված խնդիրներն ու առաջարկությունները, որից հետո փոխադարձ ընդունելի տարբերակները կներկայացնենք ձեզ: Սակայն, մինչ այդ, հորդորում եմ՝ այսուհետ ևս ձեր աշխատանքներում առաջնորդվեք գործող կարգերի համաձայն», - իր խոսքում նշել է պետական նախարարը: Հանդիպմանը մասնակցում էին ԱՀ ֆինանսների նախարար Արթուր Հարությունյանը, ԱՀ Բնապահպանության եւ բնական ռեսուրսների նախարար Ֆելիքս Գաբրիելյանը և պատասխանատու այլ անձիք:
12:36 - 22 ապրիլի, 2019
Արցախի ԱԳ նախարարն այս ամիս կայցելի Հարավային Ամերիկա |azatutyun.am|

Արցախի ԱԳ նախարարն այս ամիս կայցելի Հարավային Ամերիկա |azatutyun.am|

azatutyun.am։ Արցախի արտգործնախարարն այս ամիս այցելելու է Հարավային Ամերիկա:Մասիս Մայիլյանն Արգենտինայում և Ուրուգվայում քաղաքական հանդիպումներ է ունենալու տարբեր շրջանակներում, դասախոսություններ է կարդալու ու շփվելու է մամուլի ներկայացուցիչների հետ: Հաստատվել է, որ Մասիս Մայիլյանը ապրիլի 23-ին և 24-ին Ուրուգվայի մայրաքաղաք Մոնտեվիդեոյում մասնակցելու է և ելույթ է ունենալու Հայոց ցեղասպանության 104-րդ տարելիցին նվիրված գլխավոր միջոցառումներին: Ինչպես փոխանցել են Հայ դատի հանձնախմբից, Արցախի արտգործնախարարի գլխավորած պատվիրակության կազմում են Միացյալ Նահանգներում Լեռնային Ղարաբաղի մշտական ներկայացուցիչ Ռոբերտ Ավետիսյանը և ՀՅ Դաշնակցության Արցախի կենտրոնական կոմիտեի ներկայացուցիչ Դավիթ Իշխանյանը: Արցախի արտգործնախարարը երկրորդ անգամ է այցելում Հարավային Ամերիկա: Առաջին այցը 1996 թվականին էր, երբ նախարարն էր Արկադի Ղուկասյանը:
07:20 - 16 ապրիլի, 2019