ՌԴ

Ռուսաստանը (պաշտոնական անվանումը՝ Ռուսաստանի Դաշնություն) միջմայրցամաքային պետություն Եվրասիայի հյուսիսարևմտյան հատվածում։ Տարածքի հիմնական մասը գտնվում է Հյուսիսային Ասիայում, իսկ որոշակի հատված՝ նաև Արևելյան Եվրոպայում: ՌԴ-ն աշխարհի խոշորագույն պետությունն է և զբաղեցնում է երկրագնդի ցամաքային տարածքի 1/8-ը։ Բնակչության թվով 9-րդն է աշխարհում․ ըստ 2018-ի մարդահամարի տվյալների՝ ավելի քան 144 մլն մարդ։ Երկրի ազգաբնակչության 77%-ը կենտրոնացված է արևմուտքում՝ եվրոպական հատվածում։

Մայրաքաղաքն է Մոսկվան։ Վերջինս համարվում է Եվրոպայի խոշորագույն քաղաքը, ինչպես նաև խոշորագույններից մեկն ամբողջ աշխարհում։ ՌԴ նշանավոր քաղաքներից են նաև Սանկտ Պետերբուրգը, Նովոսիբիրսկը, Եկատերինբուրգը և Նիժնի Նովգորոդը։ Պետական լեզուն ռուսերենն է։ Խոշոր ազգային փոքրամասնություններն են թաթարները, ուկրաինացիները, բաշկիրները, հայերը, չուվաշները, չեչենները և այլն։

Ռուսաստանը նախագահական կառավարմամբ դաշնային հանրապետություն է, որտեղ նախագահը՝ պետության, իսկ վարչապետը՝ կառավարության ղեկավարն է։ ՌԴ գործող նախագահն է Վլադիմիր Պուտինը, վարչապետը՝ Միխայիլ Միշուստինը։

Արարատ Միրզոյանը հեռախոսազրույցներ է ունեցել ՌԴ ԱԳ նախարար Սերգեյ Լավրովի, ԵԱՀԿ գործող նախագահ Անն Լինդեի և ԱՄՆ պետքարտուղարի տեղակալ Քերըն Դոնֆրիդի հետ․ԱԳՆ

Նոյեմբերի 16-ին ՀՀ ԱԳ նախարար Արարատ Միրզոյանը հեռախոսազրույցներ է ունեցել ՌԴ ԱԳ նախարար Սերգեյ Լավրովի, իսկ նոյեմբերի 17-ին՝ Շվեդիայի ԱԳ նախարար, ԵԱՀԿ գործող նախագահ Անն Լինդեի, ինչպես նաև ԱՄՆ պետքարտուղարի եվրոպական և եվրասիական հարցերով տեղակալ Քերըն Դոնֆրիդի հետ։ ՀՀ ԱԳ նախարար Միրզոյանը գործընկերներին մանրամասն ներկայացրել է նոյեմբերի 16-ին ադրբեջանական զինված ուժերի կողմից Հայաստանի ինքնիշխան տարածքի նկատմամբ սանձազերծված ռազմական գործողությունների հետևանքով ստեղծված իրավիճակը։ Արարատ Միրզոյանը նշել է, որ այս գործողություններին նախորդել են Ադրբեջանի բարձրագույն իշխանությունների կողմից ամիսներ շարունակ Հայաստանի տարածքային ամբողջականության և ինքնիշխանության դեմ ուժի կիրառման սպառնալիքները և ագրեսիվ հռետորաբանությունը, ինչպես նաև ընթացիկ տարվա մայիսի 12-ից ադրբեջանական զինված ուժերի ներթափանցումը ՀՀ ինքնիշխան տարածք՝ Սյունիքի և Գեղարքունիքի մարզերի ուղղությամբ: ՀՀ ԱԳ նախարարը շեշտել է, որ տարածաշրջանում իրավիճակի դեէսկալացիայի ու կայունության հաստատման ուղղությամբ Հայաստանի կողմից գործադրվող ջանքերին ի պատասխան Ադրբեջանի իշխանությունները հերթական ագրեսիա են ձեռնարկել ՀՀ ինքնիշխան տարածքի նկատմամբ։ Արարատ Միրզոյանն ընդգծել է միջազգային գործընկերների կողմից հասցեական արձագանքի և հետևողական գործողությունների իրականացման անհրաժեշտությունը՝ Ադրբեջանի կողմից Հայաստանի Հանրապետության ինքնիշխան տարածքների նկատմամբ բացահայտ ոտնձգություններն ու սադրիչ գործողությունները զսպելու համար։ Զրուցակիցներն անդրադարձ են կատարել նաև ԵԱՀԿ Մինսկի խմբի համանախագահության մանդատի ներքո Լեռնային Ղարաբաղի հակամարտության խաղաղ կարգավորման գործընթացին: Այս համատեքստում կարևորվել է ԵԱՀԿ Մինսկի խմբի համանախագահների՝ տարածաշրջան շուտափույթ այցելության իրականացումը: Կողմերը նաև մտքեր են փոխանակել հրատապ լուծում պահանջող հումանիտար խնդիրների վերաբերյալ: Այս առնչությամբ Արարատ Միրզոյանը շեշտել է հայ ռազմագերիների, պատանդների և այլ պահվող անձանց անվերապահ հայրենադարձման անհրաժեշտությունը։

23:17 - 17 նոյեմբերի, 2021

Զախարովան կարևորել է Մինսկի խմբի համանախագահների տարածաշրջանային այցի շուտափույթ կազմակերպումը |armenpress.am|

armenpress.am: ԵԱՀԿ Մինսկի խմբի համանախագահներն այս պահին Վիեննայում են՝ քննարկելու ներկայիս իրադրությունը: Այս մասին լրագրողների հետ ճեպազրույցի ժամանակ հայտարարել է Ռուսաստանի ԱԳՆ ներկայացուցիչ Մարիա Զախարովան: Անդրադառնալով ԵԱՀԿ Մինսկի խմբի համանախագահների գործունեությանը՝ Զախարովան հիշեցրել է նոյեմբերի 15-ի նրանց հայտարարությունը՝ ընդգծելով, որ նրանք շարունակում են ակտիվ միջնորդական ջանքերը, ինչի շրջանակում օրերս Փարիզում տեղի էր ունեցել նրանց հանդիպումը Հայաստանի ու Ադրբեջանի արտգործնախարարների հետ: «Եվս մեկ անգամ կարևորում ենք տարածաշրջան համանախագահների այցի շուտափույթ կազմակերպումը»,- նշել է Ռուսաստանի ԱԳՆ ներկայացուցիչը: Անդրադառնալով Հայաստանի և Ռուսաստանի միջև 1997թ. երկկողմ համաձայնագրի մասին հարցին՝ հայտնել է, որ ՌԴ-ն լուրջ է վերաբերվում իր երկկողմ ու բազմակողմ պարտավորություններին: «Ռուսաստանը լրջորեն է վերաբերվում իր թե՛ երկկողմ, թե՛ բազմակողմ պարտավորություններին: Երկկողմ ուղղությամբ համապատասխան խորհրդակցություններ են անցկացվում: Ինչ վերաբերում է ՀԱՊԿ-ին, ապա, մեր տեղեկություններով, նրանք ուշադիր հետևում են հայ-ադրբեջանական սահմանին տիրող իրավիճակին»,- ասել է Զախարովան:

20:47 - 17 նոյեմբերի, 2021

Մոսկվան Հայաստանին և Ադրբեջանին զսպվածության կոչ է արել |factor.am|

factor.am: Մոսկվան Հայաստանին ու Ադրբեջանին կոչ է անում զսպվածություն ցուցաբերել, թույլ չտալ միջադեպերի կրկնություն և լուծել խնդիրները դիվանագիտական ճանապարհով։ Այս մասին հայտարարել է ՌԴ ԱԳՆ պաշտոնական ներկայացուցիչ Մարիա Զախարովան, գրում է ՌԻԱ Նովոստին։ «Մենք կոչ ենք անում երկու կողմերին զսպվածություն ցուցաբերել, կանխել նոր միջադեպերը և բոլոր վեճերը լուծել բացառապես քաղաքական, դիվանագիտական ճանապարհով»,- ասել է Զախարովան։ Նա նաև հավելել է, որ Մոսկվան պատրաստ է հետագայում էլ շարունակել աջակցել կողմերին՝ ի շահ տարածաշրջանում խաղաղության և կայունության պահպանման։

18:18 - 17 նոյեմբերի, 2021

ԱԽ քարտուղար Արմեն Գրիգորյանը հանդիպել է ՌԴ ԱԽ քարտուղար Նիկոլայ Պատրուշևին

ՀՀ ԱԽ քարտուղար Արմեն Գրիգորյանը ԱՊՀ մասնակից պետությունների Անվտանգության խորհուրդների քարտուղարների 9-րդ հանդիպման ընթացքում հանդիպել է ՌԴ Անվտանգության խորհրդի քարտուղար Նիկոլայ Պատրուշևին: Այս մասին տեղեկացնում է ԱԽ գրասենյակը: Զրույցի ընթացքում Ա. Գրիգորյանը մանրամասն ներկայացրել է Ադրբեջանի կողմից նախաձեռնված ռազմական գործողությունների արդյունքում ստեղծված իրավիճակը: Մասնավորապես նշել է, որ ռազմական գործողությունները ընթանում են Հայաստանի սուվերեն տարածքում և ադրբեջանական զորքերը պետք է լքեն Հայաստանի սուվերեն տարածքը: Նիկոլայ Պատրուշևը հույս է հայտնել, որ հայ-ադրբեջանական սահմանային լարվածությունը շուտ կլիցքաթափվի և որ ռուսական կողմը պատրաստ է Հայաստանին և Ադրբեջանին տրամադրել համապատասխան աջակցություն հայ-ադրբեջանական սահմանի սահմանագծման և սահմանազատման համար:

17:23 - 17 նոյեմբերի, 2021

Պուտին-Ալիև-Փաշինյան եռակողմ հանդիպման համար անհրաժեշտ է բոլոր կողմերի համաձայնությունը, իրավիճակի կայունացման միակ ուղին եռակողմ պայմանավորվածությունների իրագործումն է. Պեսկով |tert.am|

tert.am: Ռուսաստանի նախագահ Վլադիմիր Պուտինի, Ադրբեջանի նախագահ Իլհամ Ալիևի և Հայաստանի վարչապետ Նիկոլ Փաշինյանի եռակողմ հանդիպման համար պետք է բոլոր կողմերի համաձայնությունը և բոլոր կողմերի պատրաստակամությունը: ՏԱՍՍ գործակալության փոխանցմամբ՝ այս մասին լրագրողներին հայտնել է ՌԴ ղեկավարի խոսնակ Դմիտրի Պեսկովը: «Անկասկած, ինչ-որ փուլում այդ շփումներն անհրաժեշտ կլինեն, սակայն որպեսզի դրանք հնարավոր դառնան, անհրաժեշտ է երեք կողմի համաձայնությունն ու պատրաստակամությունը»,- ասել է Կրեմլի ներկայացուցիչը: Վերջինս հավելել է, որ Մոսկվան հայ-ադրբեջանական սահմանին տիրող հակամարտության կողմերին զսպվածության կոչ է անում և հանդես է գալիս եռակողմ համաձայնության պահպանման օգտին: «Ռուսական կողմը հետագայում ևս կշարունակի անել դա: Մենք այնուամենայնիվ հույս ունենք, որ իրավիճակի կայունացման միակ ճանապարհը եռակողմ պայմանավորվածությունների իրագործումն է»,- ընդգծել է Պեսկովը:

14:25 - 17 նոյեմբերի, 2021

ՌԴ ԱԳ փոխնախարարը և Տոյվո Կլաարը քննարկել են հայ-ադրբեջանական սահմանին տիրող իրավիճակը

Նոյեմբերի 17-ին Ռուսաստանի Դաշնության արտաքին գործերի փոխնախարար Անդրեյ Ռուդենկոն հեռախոսազրույց է ունեցել Հարավային Կովկասում ԵՄ հատուկ ներկայացուցիչ Տոյվո Կլաարի հետ։ Այս մասին հայտնում են ՌԴ ԱԳՆ-ից։ «Քննարկվել է սրումը հայ-ադրբեջանական սահմանի առանձին հատվածներում։ Կողմերը անհանգստություն են հայտնել տեղի ունեցած զինված բախումների կապակցությամբ։ Ընդգծվել է Երևանի և Բաքվի զսպվածության, բոլոր խնդիրները բացառապես քաղաքական և դիվանագիտական մեթոդներով լուծելու հրամայական»,- նշված է ՌԴ ԱԳՆ հաղորդագրության մեջ։ Հիշեցնենք, որ երեկ՝ նոյեմբերի 16-ին՝ ժամը 13։00-ից, Ադրբեջանի ԶՈՒ ստորաբաժանումները հարձակում են գործել Հայաստանի արևելյան սահմանագծի ուղղությամբ։ Մի քանի ժամ շարունակ ՀՀ ՊՆ-ն հայտնում էր, որ իրավիճակը լարված է։ Օրվա վերջին Պաշտպանության նախարարությունը հաղորդագրություն տարածեց, որ ռուսական կողմի միջնորդությամբ ձեռք բերված պայմանավորվածության համաձայն՝ ժամը 18։30-ից ՀՀ արևելյան սահմանագոտում կրակը դադարեցվել է, իրադրությունը հարաբերականորեն կայունացել է։ Այս պահին, ըստ ՊՆ-ի, հայկական կողմն ունի մեկ զոհ, 13 գերեվարված անձ։ 24 զինծառայողի հետ կապը կորել է մարտական գործողությունների ընթացքում։

13:52 - 17 նոյեմբերի, 2021

Երևանը շարունակում է շփումները Մոսկվայի հետ, այդ թվում՝ գերիների վերադարձի հարցով. ՌԴ-ում ՀՀ դեսպան |tert.am|

tert.am: Երևանը շարունակում է շփումները Մոսկվայի հետ Ադրբեջանի հետ սահմանին ստեղծված իրվաիճակի հարցով, այդ թվում՝ գերիների վերադարձին ուղղված ջանքերի: Այս մասին «ՌԻԱ Նովոստի»-ն հայտնել է ՌԴ-ում ՀՀ դեսպան Վարդան Տողանյանը «Բանակցություններն ընթանում են: Այդ հարցը դրված է, և մենք այդ մասին խոսում ենք»,- ասել է դեսպանը՝ պատասխանելով հարցին, թե արդյոք Երևանը Մոսկվայի հետ շփումներում բարձրացնում է Հայաստանի քաղաքացիներին վերադարձնելու հարցը, որոնք գերի են ընկել վերջին սահմանային միջադեպի ժամանակ:

13:07 - 17 նոյեմբերի, 2021

Հայաստանի ու Ադրբեջանի մասնակցությամբ Մոսկվայում մեկնարկել է ԱՊՀ Անվտանգության խորհուրդների քարտուղարների հանդիպումը |armenpress.am|

11:40 - 17 նոյեմբերի, 2021

Pfizer-ը COVID-19-ի դեմ իր փորձարարական դեղահաբերը թողարկելու համաձայնագիր է ստորագրել |azatutyun.am|

azatutyun.am: Ամերիկյան Pfizer դեղագործական ընկերությունը ՄԱԿ-ի աջակցությամբ համաձայնագիր է ստորագրել Ժնևի դեղերի արտոնագրային կառույցի հետ՝ թողարկելու COVID-19-ի դեմ իր փորձարարական դեղահաբերը: Երեքշաբթի օրը տարածված հայտարարությունում պարզաբանվում է, որ այս դեղամիջոցի արտադրության համար լիցենզիայի տրամադրումը թույլ կտա այն թողարկել 95 երկրներում, որտեղ ապրում է աշխարհի բնակչության մինչև 53 տոկոսը։ Ռուսաստանը Pfizer-ին թույլ է տվել կլինիկական փորձարկումներ անցկացնել 90 կամավորների վրա, ասվում է Դեղերի պետական ռեգիստրում: «Մենք կարծում ենք, որ սկզբնական շրջանում այս դեղը պետք է օգտագործվի միայն ռիսկային խմբի համար: Նպատակը հոսպիտալացումից և հիվանդության ծանր ընթացքից խուսափելն է: Հետևաբար, դեղը պետք է ընդունվի առաջին ախտանիշների ի հայտ գալուց անմիջապես հետո», - ասել է արտոնագրային կառույցի ներկայացուցիչ Հերվե Վերհուսելը:

11:37 - 17 նոյեմբերի, 2021

ԱԳՆ-ն ստեղծված իրավիճակի մասին արդեն իսկ տեղեկացրել է ՄԱԿ-ի Անվտանգության խորհրդի նախագահին

ՀՀ ԱԳՆ մամուլի քարտուղարը ֆեյսբուքյան իր էջում հրապարակել է լրատվամիջոցների հարցերին տրված պատասխանները․ Ռուսաստանի Դաշնությանը դիմելու վերաբերյալ - Հայաստանի Հանրապետությունն անմիջական ու բազմամակարդակ կապի մեջ է դաշնակից Ռուսաստանի հետ: Ինչպես գիտեք, տեղի է ունեցել ՀՀ վարչապետի ու ՌԴ նախագահի հեռախոսազրույցը, որի ընթացքում Նիկոլ Փաշինյանը Վլադիմիր Պուտինին է ներկայացրել իրավիճակը: Այս համատեքստում, երկու երկրների ղեկավարները քննարկել են հնարավոր համատեղ քայլերը, որոնց իրականացումն ամրագրված է երկկողմ իրավապայմանագրային հենքով և համահունչ է դաշնակցային հարաբերություններին: ՄԱԿ-ի Անվտանգության խորհրդին դիմելու վերաբերյալ - ՀՀ ԱԳՆ-ն արդեն իսկ տեղեկացրել է ՄԱԿ-ի Անվտանգության խորհրդի նախագահին ստեղծված իրավիճակի մասին: Ցանկանում ենք նշել, որ Հայաստանի Հանրապետության տարածքային ամբողջականությունը և ինքնիշխանությունը պաշտպանելու համար դիտարկվում է միջազգային իրավունքի և դիվանագիտական պրակտիկայի բոլոր գործիքների կիրառումը:

11:05 - 17 նոյեմբերի, 2021

Փաշինյանը Պուտինի հետ հեռախոսազրույցում հույժ կարևորել է հայ-ռուսական ռազմավարական գործընկերությունը ստեղծված իրավիճակում

Վարչապետ Նիկոլ Փաշինյանը հեռախոսազրույց է ունեցել Ռուսաստանի Դաշնության նախագահ Վլադիմիր Պուտինի հետ: Այս մասին հայտնում են ՀՀ վարչապետի աշխատակազմից։ Վարչապետը հանգամանալից կերպով ներկայացրել է հայ-ադրբեջանական սահմանին տեղի ունեցող վերջին զարգացումները: Նիկոլ Փաշինյանն ընդգծել է, որ ադրբեջանական զինված ուժերի գործողությունները ոչ այլ ինչ են, քան ագրեսիա Հայաստանի Հանրապետության ինքնիշխան տարածքի նկատմամբ: Ստեղծված իրավիճակում վարչապետը հույժ կարևորել է հայ-ռուսական ռազմավարական գործընկերությունը: Վերահաստատվել է նաև 2020 թվականի նոյեմբերի 9-ի և 2021 թվականի հունվարի 11-ի եռակողմ հայտարարությունների նկատմամբ հայկական կողմի հավատարմությունը:

23:23 - 16 նոյեմբերի, 2021

Հուսով եմ՝ մեր ռազմավարական դաշնակիցը այսօր և վաղը իր՝ երաշխավորի կարգավիճակը կվերականգնի․ Անդրանիկ Քոչարյան

Եթե օրվա մեջ ինքը (հակառակորդը-խմբ․) ունեցել է առավելություններ, օրվա վերջում այդ առավելությունները կորցրեց։ Այս մասին Հանրային ՀԸ-ին տված հարցազրույցի ժամանակ ասաց ՀՀ ազգային ժողովի պաշտպանության և անվտանգության հարցերի մշտական հանձնաժողովի նախագահ, «Քաղաքացիական պայմանագիր» խմբակցության պատգամավոր Անդրանիկ Քոչարյանը։ «Մենք շատ դիրքեր հետ ենք բերել։ Մարդկային կորուստներ ունեցել ենք թե՛ մենք, թե՛ իրենք։ Իրենք ունեցել են նաև զրահատեխնիկայի կորուստ բավականին շոշափելի, իսկ դա նշանակում է, որ ունեցել են նաև շոշափելի մարդկային կորուստ։ Այն, ինչ որ երեկ մատուցեցին՝ մեր հասարակությանը գցելով շոկային վիճակի մեջ, այսօր շատ հեռու էր երեկվա իրականությունից, և մեր ԶՈՒ-ն մտավ մարտական գործողությունների մեջ և օրվա վերջում պարտադրեց այս պահի դրությամբ հրադադար (հարցազրույցի պահին- խմբ․)։ Ստատուս քվոն (վերականգնելը- խմբ․), եթե ամբողջական դիրքային կորուստների բալանսի մասին է, մենք այդ արդյունքը կարձանագրենք շատ կարճ ժամանակում»,- նշել է նա։ Անդրադառնալով Հավաքական անվտանգության պայմանագրի կազմակերպությանը՝ Քոչարյանն ասաց, որ իր կարծքով՝ դեռ ՀԱՊԿ-ի հետ երկար ճանապարհ պետք է անցնենք, մինչև ՀԱՊԿ-ը կայանա․ «Բայց ՀԱՊԿ-ը մենակ Ղազախստան, Ղրղզստանը կամ մեկ ուրիշ երկիրը չէ։ Մենք ՀԱՊԿ-ի հիմնադիր անդամ ենք, և այնտեղ կա Ռուսաստանը։ Բայց մենք առանձին Ռուսաստանի հետ ունենք ռազմավարական համագործակցության շատ լուրջ պայմանագիր, և Ռուսաստանը հրադադարի պահպանման երաշխավորն է, և երեկ հրադադարը խախտվել է․․․էսօր ես էլ իմ ելույթներում (ԱԺ-ում- խմբ․) երկու անգամ հնչեցրի՝ ՀԱՊԿ-ը կա՞, թե՞ չկա»։ Խոսելով Ռուսաստանի մասին՝ պատգամավոն ընդգծեց, որ մեր դաշնակիցը այնուամենայնիվ, մինչև երեկ հրադադարի ռեժիմի պահպանման հարցով երաշխավորի իր պարտավորությունները կարողանում էր իրականացնել։ «Էսօր ինչ-որ բան խախտվեց, երեկ և էսօր ինչ-որ բան խախտվեց։ Բայց ես հուսով եմ, որ մեր ռազմավարական դաշնակիցը այսօր և վաղն ամբողջությամբ իր երաշխավորի կարգավիճակը կվերականգնի»,- հավելեց Քոչարյանը։ Հարցին, թե ինչն է իրեն նման հույս տալիս, նա պատասխանեց․ «Մեր Զինված ուժերն այսօր կռվեցին։ Դա ամենակարևոր հույսն է։ Դա նշանակում է, որ եթե այլ տրամաբանություն կար էս ամենի մեջ էս քանի օրվա, և դիտվում էր, որ մենք 44-օրյա պատերազմից հետո դեռ ի վիճակի չենք մեր ինքնիշխանության համար կռիվ տալու, այսօր մենք տվեցինք, և մենք ամեն ինչ պետք ա նենք, որ եթե պետք լինի, վաղն էլ տանք»։ Լուսանկարը՝ panorama.am-ի

22:41 - 16 նոյեմբերի, 2021

Ժամը 18։30-ից ՀՀ արևելյան սահմանագոտում կրակը դադարեցվել է․ ճշտված տվյալներ կան մեկ զոհի մասին․ ՊՆ

Ռուսական կողմի միջնորդությամբ ձեռք բերված պայմանավորվածության համաձայն՝ ժամը 18։30-ից ՀՀ արևելյան սահմանագոտում կրակը դադարեցվել է, իրադրությունը հարաբերականորեն կայունացել է։ Այս մասին հայտնում են ՀՀ պաշտպանության նախարարությունից։ Հիշեցնենք, որ նոյեմբերի 16-ին՝ ժամը 13։00-ի սահմաններում, Ադրբեջանի ԶՈՒ ստորաբաժանումները հարձակում են գործել սահմանի տվյալ ուղղությամբ տեղակայված հայկական դիրքերի վրա։ Հակառակորդը կիրառել է նաև հրետանային միջոցներ, զրահատեխնիկա և տարբեր տրամաչափի հրաձգային զինատեսակներ։ «Հայկական կողմի պատասխան գործողությունների արդյունքում հակառակորդն ունի կենդանի ուժի մեծաթիվ կորուստ, մի քանի միավոր զինտեխնիկա ոչնչացվել կամ շարքից դուրս է բերվել։ Հայկական կողմը նույնպես կորուստներ ունի։ Այս պահին ճշտված տվյալներ կան մեկ զոհի մասին՝ 1991թ. ծնված, պայմանագրային զինծառայող, շարքային Մերուժան Արթուրի Հարությունյան։ Վիրավորների թիվը նույնպես ճշտվում է։ Եվս 12 զինծառայող գերեվարվել է։ Նոր տեղեկությունների դեպքում պաշտպանության նախարարությունը հանդես կգա համապատասխան հաղորդագրությամբ»,- նշված է ՊՆ հաղորդագրության մեջ։

21:52 - 16 նոյեմբերի, 2021

Նիկոլ Փաշինյանը հեռախոսազրույց է ունեցել Վլադիմիր Պուտինի հետ

Հայկական կողմի նախաձեռնությամբ տեղի է ունեցել ՀՀ վարչապետ Նիկոլ Փաշինյանի և ՌԴ նախագահ Վլադիմիր Պուտինի հեռախոսազրույցը։ Այս մասին հայտնում է Կրեմլի մամուլի ծառայությունը։ Երկու երկրների ղեկավարները քննարկել են իրավիճակը հայ-ադրբեջանական սահմանին։ «Պայմանավորվածություն է ձեռք բերվել շարունակել շփումներն այդ կապակցությամբ»,- նշված է հաղորդագրությունում։

21:33 - 16 նոյեմբերի, 2021

Ռուսաստանը կապի մեջ է Ադրբեջանի և Հայաստանի հետ՝ սահմանին սրման հետ կապված իրավիճակը խաղաղ ճանապարհ տեղափոխելու համար․ՌԴ ԱԳՆ

Ռուսաստանը կապի մեջ է Ադրբեջանի և Հայաստանի հետ՝ սահմանին սրման հետ կապված իրավիճակը խաղաղ ճանապարհ տեղափոխելու համար։ Այս մասին, ինչպես փոխանցում է Ռիա Նովոստի-ն, լրագրողներին հայտնել են ՌԴ ԱԳՆ-ից։ «Մենք կապի մեջ ենք կողմերի հետ՝ իրավիճակը շուտափույթ խաղաղ ճանապարհ տեղափոխելու համար», - ասել են նախարարությունից։

21:18 - 16 նոյեմբերի, 2021

ՌԴ և Ադրբեջանի պաշտպանության նախարարները հեռախոսազրույց են ունեցել

ՌԴ և Ադրբեջանի պաշտպանության նախարարները հեռախոսազրույց են ունեցել Ռուսաստանի Դաշնության պաշտպանության նախարար, բանակի գեներալ Սերգեյ Շոյգուն և Ադրբեջանի պաշտպանության նախարար, գեներալ-գնդապետ Զաքիր Հասանովը հեռախոսազրույց են ունեցել՝ հայ-ադրբեջանական սահմանին տիրող իրավիճակի ֆոնին։ Այս մասին հայտնում են Ադրբեջանի ՊՆ-ից։ «Հեռախոսազրույցի ընթացքում Հասանովը ասել է, որ Հայաստանի կողմից երկու երկրների պետական սահմանին իրականացված սադրանքները վճռականորեն կանխվել են»,- նշված է Ադրբեջանի ՊՆ հաղորդագրության մեջ։ Նաև ասվում է, որ Սերգեյ Շոյգուն պատրաստակամություն է հայտնել ջանքեր գործադրել ռազմական գործողությունները դադարեցնելու և իրավիճակը կայունացնելու համար։

20:18 - 16 նոյեմբերի, 2021