Մխիթար Հայրապետյան

Մխիթար Հայրապետյանը ՀՀ ԱԺ «Իմ քայլը» խմբակցության պատգամավոր է, ԱԺ Գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահը, «Քաղաքացիական պանմանագիր» կուսակցության վարչության անդամ։ Եղել է Սփյուռքի նախարար (2018 մայիս 11- 2018 հունվար 13), 2019 թ․ հոկտեմբերից Երեւանի շախմատի ֆեդերացիայի նախագահն է։

Ծնվել է 1990թ. մայիսի 15-ին: 2011թ. ավարտել է ԵՊՀ արեւելագիտության ֆակուլտետը։ 2013թ.՝ նույն ֆակուլտետի մագիստրատուրան: 2010-2017թթ. եղել է հայաստանյան մի շարք թերթերի՝ Մերձավոր Արեւելքի, մասնավորապես, Թուրքիայի հարցերով փորձագետ: 2011թ. հիմնադրել է «Երիտասարդ քաղաքական գործիչների ասոցիացիա» կազմակերպությունը եւ մինչեւ 2015թ. եղել կազմակերպության փոխնախագահ: 2016թ․ «Քաղաքացիական կրթության եւ երիտասարդության զարգացման կենտրոնի» հիմնադիր նախագահն է: «Քաղաքացիական պայմանագիր» կուսակցության հիմնադիր անդամ է: 2016 թվականից՝ քաղաքական խորհրդի անդամ:

Բյուրականի աստղադիտարանն ընդգրկվել է ՀՀ պետբյուջեի կատարման նկատմամբ հսկողության 2020 թ. ծրագրում. Հայրապետյան

ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը գրառում է արել Ֆեյսբուքի իր էջում, որում հայտնել է՝ հիմք ընդունելով ՀՀ ԳԱԱ Վ. Համբարձումյանի անվան «Բյուրականի աստղադիտարան» ՊՈԱԿ-ում առկա խնդիրները, ՀՀ օրենսդրությամբ լիազորված նախաքննություն իրականացնող մի շարք մարմինների վարույթներում գտնվող առերևույթ խախտումների վերաբերյալ քրեական գործերը՝ ս․ թ․ սեպտեմբերի 16-ին ԱԺ-ում կայացել էր հանդիպում աստղադիտարանի նախկին աշխատակիցների հետ։ «Հանդիպման արդյունքում գործընկերոջս՝ ԱԺ պատգամավոր, գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի փոխնախագահ Հովհաննես Հովհաննիսյանի առաջարկով ՀՀ ԳԱԱ Վ. Համբարձումյանի անվան «Բյուրականի աստղադիտարան» ՊՈԱԿ-ն ընդգրկվել է ՀՀ պետական բյուջեի կատարման նկատմամբ հսկողության 2020 թվականի ծրագրում։ Հարկ եմ համարում տեղեկացնել, որ ՀՀ ֆինանսների նախարարի 2020թ. հոկտեմբերի 14-ի թիվ 20-Ա, նոյեմբերի 4-ի թիվ 21-Ա և նոյեմբերի 9-ի թիվ 22-Ա հանձնարարագրերի համաձայն՝ ՀՀ ԳԱԱ Վ. Համբարձումյանի անվան «Բյուրականի աստղադիտարան» ՊՈԱԿ-ում ՀՀ վարչապետի 2020 թվականի փետրվարի 10-ի «Հայաստանի Հանրապետության պետական բյուջեի կատարման նկատմամբ հսկողության 2020 թվականի ծրագրի շրջանակներում իրականացվել է 2016-2019թթ. և 2020թ հաշվետու ժամանակաշրջանի ֆինանսաբյուջետային գործունեության՝ ներառյալ ֆինանսական կառավարման, հսկողության, գնումների, հաշվապահական հաշվառման, ինչպես նաև ակտիվների կառավարման գործընթացների (գործարքների)՝ Հայաստանի Հանրապետության օրենսդրությանը համապատասխանության գնահատման ստուգում, որն ավարտվել է 2020թ. նոյեմբերի 24-ին։ Ստուգման արդյունքում արձանագրվել են տարաբնույթ առերևույթ խախտումներ, որոնց վերաբերյալ տեղեկատվությունը փոխանցվել է ՀՀ կրթության, գիտության, մշակույթի և սպորտի նախարարությանը և նախաքննություն իրականացնող մարմիններին։ Որպես ոլորտը կարգավորող հանձնաժողովի նախագահ՝ ցանկանում եմ վստահեցնել, որ Վ. Համբարձումյանի անվան Բյուրականի աստղադիտարանը և բոլոր գիտական և կրթական հաստատությունները շարունակ գտնվելու են մեր տեսադաշտում՝ ոլորտի բարեփոխումների, զարգացման, արդիականացման և հնարավոր խախտումներից խուսափելու նպատակով»,- Ֆեյսբուքի իր էջում գրել է Հայրապետյանը:

18:41 - 31 դեկտեմբերի, 2020

Լուրը, թե որոշ հայ զինծառայողներ գտնվում են Իրանի Իսլամական Հանրապետության տարածքում, չի հաստատվել․ Մխիթար Հայրապետյան

ՀՀ-Իրան բարեկամական խմբի ղեկավար Մխիթար Հայրապետյանը ֆեյսբուքյան իր էջում տեղեկացրել է, որ լուրը, թե որոշ հայ զինծառայողներ գտնվում են Իրանի Իսլամական Հանրապետության տարածքում, չի հաստատվել։ «Ինչպես գիտեք, վերջին օրերին սոցիալական ցանցերում լուրեր տարածվեցին, թե որոշ հայ զինծառայողներ գտնվում են Իրանի Իսլամական Հանրապետության տարածքում: Չնայած այն հանգամանքին, որ արդեն իսկ ՀՀ-ն և Իրանը պաշտոնական հայտարարություններում չեն հաստատել այդ տեղեկությունը, այնուամենայնիվ, շարունակում եմ նամակներ ստանալ մեր քաղաքացիներից՝ վերստին այդ լուրերի իսկությունը ճշգրտելու պահանջով: Որպես ՀՀ-Իրան բարեկամական խմբի ղեկավար՝ վերջին օրերին մի շարք հեռախոսազրույցներ եմ ունեցել տարբեր գործընկերների հետ, քիչ առաջ հանդիպել եմ նաև Իրանում ՀՀ դեսպան Արտաշես Թումանյանի հետ, որի խոսքով՝ այս պահի դրությամբ վերոնշյալ լուրերը չեն հաստատվել»,- գրել է Հայրապետյանը։

18:01 - 25 նոյեմբերի, 2020

Առաջարկվում է պահպանել պաշտոնային դրույքաչափը այն զինծառայողների համար, որոնք գտնվում են գերության մեջ․ նախագիծը առաջին ընթերցմամբ ընդունվեց 71 ձայնով |tert.am|

tert.am: Ազգային ժողովը առաջին ընթերցմամբ քննարկում է Զինվորական ծառայության և զինծառայողի կարգավիճակի մասին ՀՀ օրենքում լրացումներ կատարելու մասին նախագիծը: Նախագիծը ներկայացրեց «Իմ քայլը» խմբակցության պատգամավոր Մխիթար Հայրապետյանը: «Օրենսդրական բացի հետևանքով առաջանում է լրջագույն խնդիր իրենց ընտանիքների կենսագոյության հետ կապված և ըստ մեզ գործող օրենսդրությունը չի համապատասխանում զինվորական ծառայողի իրավական և սոցիալական երաշխիքների պահպանմանը միտված պետական քաղաքականությանը: Նախագծի նպատակն է պահպանել պաշտոնային դրույքաչափը այն զինծառայողների համար, որոնք գտնվում են գերեվարության մեջ»,-ասաց նա և նշեց, որ օրենքը հետադարձ ուժ ունենալու է և տարածվելու է այն զինծառայողների վրա, որոնք արդեն գերության մեջ են գտնվում: Նախագիծը առաջին ընթերցմամբ ընդունվեց միաձայն` 71 ձայնով:

12:44 - 19 նոյեմբերի, 2020

Մխիթար Հայրապետյանը Չինաստանի հավատարմարարին ներկայացրել է շփման գծում տիրող իրավիճակը

ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը այցելել է Հայաստանում Չինաստանի Ժողովրդական Հանրապետության դեսպանության նոր մասնաշենք և հանդիպում ունեցել ՀՀ-ում ՉԺՀ դեսպանության գործերի ժամանակավոր հավատարմատար Ճոու Հունյուի հետ: Այս մասին հայտնեցին Մխիթար Հայրապետյանի գրասենյակից: Մխիթար Հայրապետյանը պարոն Հունյուին, դեսպանության աշխատակիցներին և, ի դեմս նրանց՝ Չինաստանի ողջ ժողովրդին շնորհավորել է ազգային տոնի՝ Չինաստանի Ժողովրդական Հանրապետության հիմնադրման 71-րդ տարեդարձի առթիվ: ԱԺ պատգամավորը հանդիպման ընթացքում մանրամասն ներկայացրել է շփման գծի ողջ երկայնքով թուրք-ադրբեջանական ագրեսիայի հետևանքով ստեղծված իրավիճակը, խոսել է նաև Հայաստանի ու Արցախի խաղաղ բնակչության և քաղաքացիական ենթակառուցվածքների դիտավորյալ թիրախավորման վերաբերյալ՝ ուշադրություն հրավիրելով ռազմական գործողություններում Ադրբեջանի զինված ուժերում, ըստ հավաստի տեղեկությունների, հենց Թուրքիայի միջոցով վարձկան ահաբեկիչների ներգրավման հանգամանքի վրա։ Հայրապետյանը դեսպանության գործերի ժամանակավոր հավատարմատարին հայտնել է, որ այն ռազմական գործողությունները, որոնք վերջին օրերին իրականացվում են հայկական զինված ուժերի կողմից ի պատասխան թուրք-ադրբեջանական դաշինքի ագրեսիայի, ոչ միայն լուծում են մեր հարենակիցների ֆիզիկական անվտանգության խնդիրը, այլև միտված են տարածաշրջանում անվտանգության և կայունության ամրապնդմանը, ինչպես նաև Էրդողանի՝ պանթյուրքական ծրագրերի խափանմանը: Պարոն Հունյուն էլ, իր հերթին, վերահաստատել է Չինաստանի դիրքորոշումն Արցախյան հիմնախնդրի շուրջ՝ հույս հայտնելով, որ խնդիրը կհանգուցալուծվի խաղաղ բանակցությունների միջոցով:

15:59 - 02 հոկտեմբերի, 2020

Թուրքական գործոնի ակտիվացումը տարածաշրջանում իրական վտանգ է նաև Իրանի համար. Մխիթար Հայրապետյան |armenpress.am|

armenpress.am: Թուրքական գործոնի ակտիվացումը տարածաշրջանում և դրան համարժեք արձագանքի բացակայությունը կամ նույնիսկ արձագանքի ուշացումն իրական վտանգ է ոչ միայն Հայաստանի և Արցախի, այլ նաև տարածաշրջանային մյուս երկրների, մասնավորապես, Իրանի համար, որը միակն է, որ ունի սահման երեք պետությունների՝ Հայաստանի, Արցախի և Ադրբեջանի հետ: Այս մասին հետ հարցազրույցում ասաց ՀՀ ԱԺ պատգամավոր, Հայաստան-Իրան բարեկամական խմբի ղեկավար Մխիթար Հայրապետյանը: - Ստեղծված իրավիճակում և Թուրքիայի ակտիվ ներգրավվածության պարագայում ինչպիսի՞ն պետք է լինի հայ-իրանական հարաբերությունների օրակարգը: - Այն ռազմական գործողությունները, որոնք վերջին օրերին իրականացվում են հայկական զինված ուժերի կողմից ի պատասխան թուրք-ադրբեջանական դաշինքի ագրեսիայի, ոչ միայն լուծում են մեր հարենակիցների ֆիզիկական անվտանգության խնդիրը, այլև միտված են տարածաշրջանում անվտանգության և կայունության ամրապնդմանը, ինչպես նաև Էրդողանի՝ պանթյուրքական ծրագրերի խափանմանը: Թուրքական գործոնի ակտիվացումը տարածաշրջանում և դրան համարժեք արձագանքի բացակայությունը կամ նույնիսկ արձագանքի ուշացումն իրական վտանգ է ոչ միայն Հայաստանի և Արցախի, այլ նաև տարածաշրջանային մյուս երկրների, մասնավորապես, Իրանի համար, որը միակն է, որ ունի սահման երեք պետությունների՝ Հայաստանի, Արցախի և Ադրբեջանի հետ: Այս համատեքստում եղբայրական Իրանը և Հայաստանը, վստահ եմ, ունեն ընդհանուր շահեր, ինչի շուրջ ակտիվորեն պիտի ձևավորեն ընդհանուր օրակարգ: - Ադրբեջանի կողմից վարձկանների մասնակցությունը ռազմական գործողություններին ի՞նչ վտանգ են ներկայացնում տարածաշրջանի համար: - Դեռևս ադրբեջանական ագրեսիայից առաջ մենք տեղեկություններ էինք ստանում Թուրքիայի միջոցով վարձկան ահաբեկիչների՝ Ադրբեջան տեղափոխվելու վերաբերյալ: Այսօր արդեն իսկ ունենք հստակ ապացույցներ, որ հայկական զինված ուժերը դիմակայում են ոչ միայն թուրք-ադրբեջանական ալյանսին, այլև իրական իսլամի և հավատավոր մուսուլմանների հետ որևէ կապ չունեցող մի քանի հազար ահաբեկիչների: Մեզ հասած տեղեկությունների համաձայն՝ այս ահաբեկիչների առանձին խմբեր արդեն իսկ խնդիրներ են ստեղծում Ադրբեջանի տարածքում բնակվող շիա բնակչության համար: Էրդողանի ու Ալիևի ձեռքին խաղալիք դարձած սև դրոշակակիր այս ահաբեկիչները ոչ թե կրոնական, այլ փողի ու աշխարհը քաոսի վերածելու խնդիր են լուծում։

14:53 - 30 սեպտեմբերի, 2020

Հանրայինի գործադիր տնօրենի պաշտոնի 13 հավակնորդներից 4-ը կհրավիրվեն հարցազրույցի. այսօր կայացել է հանձնաժողովի նիստը

Այսօր՝ սեպտեմբերի 25-ին, կայացել է Հանրային հեռուստաընկերության գործադիր տնօրենի թափուր պաշտոնի համալրման նպատակով ստեղծված մրցութային հանձնաժողովի առաջին նիստը։ Այս մասին տեղեկացրել է ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը եւ նշել, որ հանձնաժողովի անդամները քննարկել են 13 թեկնածուների ներկայացրած ծրագրերը, և որոշում է ընդունվել թեկնածուներից չորսին հրավիրել հանձնաժողովի հաջորդ նիստին՝ հարցազրույցի։ Այդ թեկնածուներն են Հովհաննես Թովմասյանը, Հովհաննես Մովսիսյանը, Արմեն Սարգսյանը, Ռուդիկ Տեր–Գալստյանը։

17:51 - 25 սեպտեմբերի, 2020

Ուզում եմ մեր ԱԺ-ի անունից խստագույնս դատապարտել ազգային և կրոնական հողի վրա հիմնված բոլոր տեսակի հանցագործությունները. Մխիթար Հայրապետյան |shantnews.am|

shantnews.am: ՀՀ ԱԺ «Իմ քայլը» խմբակցության անդամ Մխիթար Հայրապետյանը խորհրդարանում հիշեցրել է, որ երեկ Սան Ֆրանցիսկոյի Սուրբ Գրիգոր Լուսավորիչ հայկական եկեղեցու տարածքում գտնվող հայկական կենտրոնը հրկիզվել է: «Ուզում եմ մեր խորհրդարանի անունից խստագույնս դատապարտել ազգային և կրոնական հողի վրա հիմնված բոլոր տեսակի հանցագործությունները՝ հույս ունենալով, որ առաջիկա ժամերի ընթացքում տեղական իշխանությունները բավարար չափով ջանք կգործադրեն՝ հայտնաբերելու բոլոր հանցագործներին ու պատասխանատվության ենթարկելու»,- ասաց Հայրապետյանը: Նա ավելացրեց, որ, թեպետ հանցագործները դեռ հայտնի չեն, սակայն կարելի է ենթադրել, թե ովքեր են կանգնած այդ ամենի հետևում: «Դժվար չէ կռահել, թե ովքեր են դրա հետևում՝ հաշվի առնելով Տավուշում ապրիլյան վերջին իրադարձություններից հետո նույն Սան Ֆրանցիսկոյում հայկական եկեղեցու նկատմամբ վանդալիստական գործողությունները, Փարիզում Կոմիտասի և այլ հուշարձանների նկատմամբ բռնի գործողությունները»,- ասաց Հայրապետյանը:

17:10 - 18 սեպտեմբերի, 2020

Արայիկ Հարությունյանն ունի մեր խմբակցության լիակատար աջակցությունը. բոլոր մեխանիզմները գործի ենք դնում, որ Կառավարության հետ երկխոսություն ստացվի. Մխիթար Հայրապետյան |tert.am|

tert.am: Կրթական բարեփոխումների շուրջ առաջացած քննադատությունների վերաբերյալ առաջարկել եմ ոչ միայն Գագիկ Ծառուկյանի, այլև ԲՀԿ-ի հետ ուղիղ եթերով բանավիճել՝ բացառության կուսակցության մեկ կամ երկու անդամի, սակայն արձագանք չի եղել։ Այս մասին լրագրողների հետ զրույցում ասաց ԱԺ գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը։«Բազմիցս ասել եմ, որ կրթական բարեփոխումները աշխարհի որևէ երկրում հեշտությամբ չեն տրվել, բնական է, որ լինում է աղմուկ, շատ ուժեր փորձում են օգտվել այս իրավիճակից: Մեր քաղաքական ուժը գնում է դժվարին ճանապարհով, այն է՝ ռեֆորմներ և թիրախավորել են գործընկերոջս և մոռացել են, որ մենք պետք է խոսենք բովանդակության շուրջ: Արայիկ Հարությունյանն ունի մեր ֆրակցիայի լիակատար աջակցությունը, այս իմաստով և ես կրկնում եմ, որ առավելագույնը անելու ենք, որ առողջ քննադատությունը լսելի լինի Կառավարության համար, և բոլոր մեխանիզմները գործի ենք դնում, որ ստեղծվի դիսկուրս»: Կարդալ ավելին՝ tert.am-ում։

16:45 - 14 սեպտեմբերի, 2020

Վստահ չեմ, որ ՊՆ-ի դիրքորոշումը դրական կլինի․ Հայրապետյանը՝ զինծառայության վերաբերյալ օրենքի նոր նախագծի մասին |armtimes.com|

armtimes.com: Արդեն տեւական ժամանակ է, ինչ սահմանված կարգի խախտմամբ պարտադիր զինվորական ծառայություն չանցած քաղաքացիների մասին օրենքը չի գործում։ Գործող օրենսդրության համաձայն՝ մեր բոլոր քաղաքացիները, որոնք գտնվում են արտերկրում եւ քրեական հետախուզման տակ են, կա միայն մեկ սցենար՝ ենթարկվել պատասխանատվության եւ հայտնվել բանտում։ Այս մասին այսօր ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր Մխիթար Հայրապետյանը։ Նրա փոխանցմամբ՝ հենց սա էլ իրենց ստիպեց գտնել նոր լուծումներ, տարբերակներ՝ սփյուռքում գտնվող մեր հայրենակիցներին օգնելու համար։ Նա փոխանցեց, որ այս ընթացքում հարյուրավոր դիմումներ են եղել՝ առաջարկվով, որ պատգամավորները գտնեն լուծում, եւ իրենք հեղինակել են օրենքի նախագիծ։ «Մեր նպատակը հետեւյալն է, որ մենք պետք է օգտագործենք սթյուռի ռեսուրսները՝ հնարավորություն առաջարկելով նրանց մի քանի տարբերակ։ Առաջինը՝ այն քաղաքացիները, որոնց 27 տարին լրացել է, կկարողանան հետ վերադառնալ Հայաստան, վճարել տարվա պայմանագրային զինծառայողի աշխատավարձ եւ հավելավճարներ, որը նախնական հաշվարկով կազմելու է 5-5,5 մլն դրամ»,- ասաց պատգամավորը՝ շեշտելով, որ այստեղ հիմքում դրված է ոչ թե ֆինանսական բաղադրիչը, այլ՝ պատասխանատվությունը, որ նրանք ունեն պետության առջեւ։ Բայց եթե քաղաքացին ցանկանա առաջիկա 3 տարում ներգրավվել ԶՈՒ-ում, ապա զինծառայության անցնելու պարագայում հետ կստանա այդ գումարը։ Կա նաեւ մեկ այլ փոփոխություն, ըստ որի այս հանցագործությունը մարդու վրա տարածվելու է 20 տարի՝ նախկին 10 տարվա փոխարեն։ Այսինքն՝ անձի 37 տարեկան դառնալուն պես քրեական գործը կարճվում էր, իսկ այս նախագծի ընդունման պարագայում այդ գործը կշարունակվի մինչեւ անձի 47 տարեկան դառնալը։ Հայրապետյանը փոխանցեց, որ Կառավարության դիրքորոշումն առայժմ հայտնի չէ, սակայն ՊՆ-ի դիրքորոշումն իրենք արդեն կռահում են։ «ՊՆ-ի դիրքորոշումը, վստահ չեմ, որ կլինի դրական»,- ասաց պատգամավորը՝ միեւնույն ժամանակ կոչ անելով սպասել քննարկումներին։

15:39 - 14 սեպտեմբերի, 2020

Զինծառայությունից խուսափելու համար հետախուզման մեջ գտնվողները 2 տարվա աշխատավարձ վճարելու դեպքում կազատվեն հետապնդումից․ նոր նախագիծ

Ազգային ժողովում շրջանառության մեջ է դրել նախագիծ, որով 27 տարին լրացած ՀՀ քաղաքացիները, որոնք չեն անցել պարտադիր զինվորական ծառայություն և գտնվում են քրեական հետախուզման մեջ, պայմանագրային զինվորական ծառայողի երկու տարվա աշխատավարձ վճարելու դեպքում կազատվեն քրեական հետապնդումից։ Այս մասին Ֆեյսբուքի իր էջում հայտնում է ԱԺ կրթության, գիտության, մշակույթի, երիտասարդրության, սպորտի և սփյուռքի հարցերով մշտական հանձնաժողովի նախագահ Մխիթար Հայրապետյանը։ Նա Ֆեյսբուքի իր էջում գրել է․ «Երեկ շրջանառության մեջ է դրվել օրենքի նոր նախագիծ, համաձայն որի՝ 27 տարին լրացած ՀՀ քաղաքացիները, որոնք չեն անցել պարտադիր զինվորական ծառայություն և գտնվում են քրեական հետախուզման մեջ, պայմանագրային զինվորական ծառայողի երկու տարվա աշխատավարձ վճարելու դեպքում կազատվեն քրեական հետապնդումից։ Բացի այդ, վերոնշյալ գումարը վճարելուց և քրեական հետապնդումից արդեն իսկ ազատվելուց հետո առաջիկա երեք տարվա ընթացքում երկու տարի ժամկետով պայմանագրային զինվորական ծառայություն անցնելու դեպքում վճարված գումարն ամբողջությամբ հետ կստանան, ինչպես նաև հանրային ծառայության անցնելու հնարավորություն կստանան»։

12:18 - 11 սեպտեմբերի, 2020

Մեր նպատակն է դպրոցներին ապահովել ոլորտի լավագույն մասնագետներով. Մխիթար Հայրապետյան

Ուսումնասիրելով 2021թ. պետական բյուջեի նախագծի նախնական տարբերակի՝ ՀՀ կրթության, գիտության, մշակույթի և սպորտի նախարարության բյուջետային ծրագրերի վերաբերյալ իր կողմից ներկայացված առաջարկությունների մասին կարծիքները, մեկնաբանությունները և վերլուծելով առողջ դիտողությունները, հետաքրքիր ու բովանդակալից նկատառումները՝ ՀՀ ԱԺ գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանը հայտնում է. «Իմ առաջարկած լուծումների վերաբերյալ հասարակությունում ստեղծվել է դիսկուրս, որի միջոցով, վստահաբար, կարող են ծնվել է՛լ ավելի հետաքրքիր և արդյունավետ լուծումներ ու գաղափարներ: Համարձակ բարեփոխումներ կյանքի կոչելու համար նախընտրում եմ այնպիսի ճանապարհ, որտեղ առկա է մտքերի փոխանակում, առողջ քննադատություն ու կառուցողական երկխոսություն: Հաշվի առնելով հանրության անհանգստությունն առաջարկներից մեկի վերաբերյալ՝ որոշեցի առավել մանրամասն ներկայացնել այն ստեղծելու հիմքն ու հիմնավորումը: Հիշեցնեմ, որ առաջարկել եմ բարձրագույն մասնագիտական կրթություն ունեցող անձանց մանկավարժի որակավորում տրամադրել՝ անցկացնելով հատուկ կարճաժամկետ դասընթաց՝ մանկավարժական գիտելիքներ և հմտություններ ձեռք բերելու նպատակով: Կրթության ոլորտի որոշ ներկայացուցիչներ և լրագրողներ փոքր-ինչ այլ կերպ են ընկալել առաջարկս՝ կարծելով, թե այսուհետ դպրոցում ուսուցիչ կկարողանա աշխատել ոչ բավականաչափ կոմպետենտ, կրթական լուրջ ճանապարհ չանցած անձ: Մինչդեռ մեր ներկայացրած լուծումների նպատակն այն է, որ դպրոցականներին կրթեն լավագույն մասնագետները: Այսօր այնպիսի իրավիճակ է, երբ առարկայական, ոլորտային լավագույն մասնագետները, բացի մի շարք բացառություններից, մանկավարժի որակավորում չունեն: Մենք ունենք պրոֆեսորներ, գիտությունների թեկնածուներ և դոկտորներ, որոնք կրթում են հարյուրավոր ապագա մանկավարժների, սակայն, իրենց համար դպրոցների դռներն օրենքով փակ են: Մենք գնահատում ենք Խաչատուր Աբովյանի անվան հայկական պետական մանկավարժական համալսարանի ջանքերը դպրոցների համար մասնագետներ պատրաստելու գործում, սակայն, տեսնում ենք, որ այսօր ոլորտի, առարկայի բովանդակության տեսանկյունից ավելի բարձր որակի կրթություն տալիս են այն բուհերը, որոնք չունեն հատուկ մանկավարժական ուղղվածություն: Որոշ բուհերում սկսվել է առաջարկվել մանկավարժական գիտելիք և հմտություն տրամադրող կրթաբլոկ՝ լրացուցիչ կրեդիտների տեսքով, որը նույնպես արդյունավետ լուծում է իրենից ենթադրում: Մենք ողջունում ենք տարբեր առաջարկներ՝ միտված կրթության համակարգի ճկունությանն ու պարզեցմանը: Բարձր գնահատելով այն անձանց, ովքեր գիտակցաբար ընտրել են մանկավարժական կրթությունը՝ հետևելով ուսուցիչ դառնալու իրենց երազանքին, պետք է փաստել, որ կա մասնագետների մի ստվար զանգված, որն ընտրել է մասնագիտական այլ ուղի, դարձել է իր ոլորտում որակյալ մասնագետ և ունի ցանկություն աշխատել դպրոցում և կիսվել իր գիտելիքներով երեխաների հետ: Մենք ցանկանում ենք, որ այդպիսի մասնագետների առջև դպրոցների դռները այսուհետ բաց լինեն: Հաշվի առնելով մանկավարժական հմտություններին, երեխաների և պատանիների հետ աշխատելիս հոգեբանական մոտեցումներին, առարկայական գիտելիքների փոխանցման գործիքներին տիրապետելու անհրաժեշտությունը՝ մեծ կարևորություն ենք տալիս հանրակրթական ուսումնական հաստատություններում աշխատանքը սկսելուց առաջ սովորել տիրապետել այդ մեթոդներին: Ամփոփելով՝ կրկին ցանկանում եմ շեշտել, որ մեր նպատակն է դպրոցներին ապահովել ոլորտի լավագույն մասնագետներով, հանելով օրենքով ամրագրված այն սահմանափակումները, որոնք խոչընդոտում են այդպիսի մասնագետների մուտքը հանրակրթական ուսումնական հաստատություններ»:

14:17 - 03 սեպտեմբերի, 2020

ԱՀ նախագահ Արայիկ Հարությունյանն ընդունել է ՀՀ Ազգային ժողովի պատգամավոր Մխիթար Հայրապետյանին

Արցախի Հանրապետության նախագահ Արայիկ Հարությունյանն օգոստոսի 30-ին ընդունել է ՀՀ Ազգային ժողովի պատգամավոր, գիտության, կրթության, մշակույթի, սփյուռքի, երիտասարդության և սպորտի հարցերի մշտական հանձնաժողովի նախագահ Մխիթար Հայրապետյանին: Հանդիպմանը քննարկվել են հայկական երկու պետությունների խորհրդարանների միջեւ կապերի զարգացմանն ու ընդլայնմանը վերաբերող հարցեր: Երկրի ղեկավարը նշել է, որ օրենսդրական դաշտի կատարելագործումը շարունակական գործընթաց է, և այդ ուղղությամբ պետք է անընդհատ նոր ջանքեր գործադրել: Հանդիպմանը, որին մասնակցում էր ԱՀ Աժ պատգամավոր, գիտության, կրթության, մշակույթի, երիտասարդության և սպորտի հարցերի մշտական հանձնաժողովի նախագահ Արամ Հարությունյանը, անդրադարձ է եղել նաև ոլորտային մի շարք խնդիրների:

19:38 - 30 օգոստոսի, 2020

Երևանի և Արցախի շախմատի ֆեդերացիաների միջև համագործակցության հուշագիր է ստորագրվել

Քիչ առաջ Ստեփանակերտում հպարտությամբ ստորագրեցի Երևանի և Արցախի շախմատի ֆեդերացիաների միջև համագործակցության հուշագիրը: Այս մասին ֆեյսբուքյան իր էջում գրել է ՀՀ ԱԺ գիտության, կրթության, մշակույթի, սպորտի և երիտասարդության հարցերի մշտական հանձնաժողովի նախագահ, Երևանի շախմատի ֆեդերացիայի նախագահ Մխիթար Հայրապետյանը։ «Այն համատեղ աշխատանքի լայն ու բազմակողմանի գործակցություն է ենթադրում՝ փորձի փոխանակումից մինչև ուսումնամարզական հավաքներ, փոխայցեր, շախմատի մասսայականացմանը նպաստելու միջոցառումներ, տեղեկատվական հարթակներում աջակցություն և այլն: Երևանում և Արցախում շախմատը նոր տարածվածության, որակի ու սերնդափոխության հասցնելու գործում մենք միակամ ենք: Շնորհակալություն եմ հայտնում Արցախի ֆեդերացիայի նախագահ Ջիվան Հայրապետյանի պատրաստակամության համար: Հիշեցնեմ նաև, որ սեպտեմբերի 2-ին՝ Արցախի հռչակման օրը, Երևանի և Արցախի ֆեդերացիաների միջև տեղի կունենա հատուկ մրցաշար, որի ընթացքում կխաղամ նաև ես»,- նշել է նա:

19:00 - 30 օգոստոսի, 2020

Հանձնաժողովում քննարկվել են հայագիտական առարկաների նոր չափորոշիչները

09:36 - 28 օգոստոսի, 2020

Մխիթար Հայրապետյանը ԿԳՄՍՆ բյուջետային ծրագրերի վերաբերյալ մի քանի առաջարկ է ներկայացրել

19:46 - 19 օգոստոսի, 2020

Մխիթար Հայրապետյանը հանդիպել է ՀՀ-ում Իրանի դեսպանի հետ

Օգոստոսի 5-ին ՀՀ ԱԺ գիտության, կրթության, մշակույթի, սպորտի և երիտասարդության հարցերի մշտական հանձնաժողովի նախագահ, Հայաստան-Իրան բարեկամական խմբի ղեկավար Մխիթար Հայրապետյանը հանդիպել է ՀՀ-ում Իրանի Իսլամական Հանրապետության արտակարգ և լիազոր դեսպան Աբբաս Բադախշան Զոհուրիի հետ: «Հայաստան-Իրան միջխորհրդարանական հարաբերությունների զարգացման տեսանկյունից, ըստ իս, հարկավոր է շեշտը դնել ՀՀ և ԻԻՀ խորհրդարանների ղեկավարների մշտական երկխոսության իրականացման, խորհրդարանական մշտական հանձնաժողովների միջև կապերի խորացման, միջխորհրդարանական բարեկամական խմբերի համագործակցության, միջխորհրդարանական միությունների և միջազգային հարթակների շրջանակներում կապերի հաստատման վրա»,-նշել է Մխիթար Հայրապետյանը: Հանդիպման ընթացքում քննարկվել են նաև հայ-իրանական օրակարգի մի շարք հարցեր, ինչպես նաև տարբեր ոլորտներում փոխգործակցությունն առավել ընդլայնելու հնարավորությունները: Հանդիպումը կայացել է խորհրդանշական վայրում` Պատմական հուշարձանների պահպանման հայկական դաշնության շենքում, որը 1873-1920թթ. եղել է պարսիկ հյուպատոսի նստավայրը:

09:13 - 06 օգոստոսի, 2020