Ֆելիքս Ցոլակյան

ՀՀ արտակարգ իրավիճակների նախկին նախարար։ Ունի գեներալ-լեյտենանտի զինվորական կոչում։ Անկուսակցական է։

Ծնվել է 1952 թ․ հունվարի 27-ին ՀԽՍՀ Անիի շրջանի Ներքին Ջրափի գյուղում։ 1969-1974 թթ․ սովորել է ԵՊՀ պատմության ֆակուլտետում։ Սովորել է ՊԱԿ-ի Մոսկվայի բարձրագույն դպրոցում, որակավորվել ՊԱԿ-ի Տաշքենդի հատուկ դասընթացներում։ 1974-1976 թթ. աշխատել է Արարատ քաղաքի Ինդուստրիալ-տեխնոլոգիական տեխնիկումում` որպես ուսուցիչ։

1976-1980 թթ. ընտրվել է ՀԼԿԵՄ Արարատի շրջկոմի քարտուղար, ապա` 2-րդ քարտուղար։ 1980-1985 թթ. տեղափոխվել է պետական անվտանգության կոմիտեի (ՊԱԿ) Գորիսի բաժանմունք՝ որպես օպեր-լիազոր, ապա 1985-1991 թթ. զբաղեցրել է Եղեգնաձորի ՊԱԿ բաժանմունքի պետի պաշտոնը։ 1993-1996 թթ. նշանակվել է ՀՀ Ազգային անվտանգության վարչության Մասիսի բաժանմունքի պետ,1996 թ. նշանակվել է Շիրակի մարզային վարչության պետ, 1997-1999 թթ. նշանակվել է ՀՀ Ազգային անվտանգության Երեւանի քաղաքային վարչության պետ։ 1999-2003 թթ. ղեկավարել է ՀՀ նախագահի վերահսկողական ծառայությունը, 2003-2007 թթ.՝ ՀՀ կառավարությանն առընթեր հարկային պետական ծառայությունը։

2007 թ․ նշանակվել է ՀՀ կառավարությանն առընթեր Ազգային անվտանգության ծառայության տնօրենի տեղակալ։ 2013 թվականի մարտի 7-ին նշանակվել է ՀՀ Շիրակի մարզպետ։ 2016-2017 թթ. կրկին զբաղեցրել է ՀՀ նախագահի վերահսկողական ծառայության ղեկավարի պաշտոնը։ 2017 թվականին ընտրվել է ԱԺ պատգամավոր ՀՀԿ ռեյտինգային ընտրացուցակով։ 2018թ․ մայիսի 1-ին Ցոլակյանը ՀՀԿ խմբակցությունից եղավ միակը, ով կողմ քվեարկեց վարչապետի պաշտոնում Նիկոլ Փաշինյանի թեկնածությանը՝ ասելով, որ քվեարկել է «իր խղճի թելադրանքով»։ 2018թ․ հունիսին Ցոլակյանը հայտարարեց, որ դուրս է գալիս ԱԺ ՀՀԿ խմբակցությունից։

ՀՀ Նախագահի հրամանագրով 2020 թվականի նոյեմբերի 20-ին ազատվել է ՀՀ ԱԻ նախարարի պաշտոնից։

Ռոճիկ ու պատիժ․ նախարարների աշխատավարձերը հեղափոխությունից առաջ և հետո |fip.am|

fip.am: Հեղափոխությունից հետո բավական հաճախ է շոշափվում բարձրաստիճան պաշտոնյաների պարգևավճարների և աշխատավարձերի բարձրացման թեման։ Նախորդ տարի մեծ աղմուկ առաջացավ, երբ «Հետքը» պարզեց, որ վարչապետի գաղտնի հանձնարարականով գրեթե կրկնապատկվել են նախարարների, փոխնախարարների և մարզպետների աշխատավարձերը։ Վարչապետ Նիկոլ Փաշինյանը, խոսելով բարձրաստիճան պաշտոնյաների աշխատավարձերի բարձրացման մասին, մշտապես նշում է, որ կառավարությունից դեպի մասնավոր հատված մեծ հոսք է նկատվում, որի պատճառը ցածր վարձատրությունն է։ «Մարդիկ գնում են մասնավոր հատվածում աշխատելու, որովհետև այն աշխատանքը, որ իրենցից ակնկալվում է 400 հազար դրամ, իրենք ասում են՝ 1 մլն 200 հազար դրամով հենց հիմա մեզ առաջարկում են, ինչո՞ւ մնանք: Ասենք՝ ո՞վ է, որ կմնա այստեղ աշխատելու»: Վարչապետի խոսքից տպավորություն է ստեղծվում, որ բարձրաստիճան պաշտոնյաները «զոհողության են» գնացել՝ մասնավոր հատվածում բարձր վարձատրությամբ աշխատանքից հրաժարվելով և պետական համակարգ գալով։ Եվ քանի որ Կոռուպցիայի կանխարգելման հանձնաժողովի կայքում արդեն հրապարակվել են պաշտոնյաների 2019 թ․ եկամուտների հայտարարագրերը, «Փաստերի ստուգման հարթակը» որոշեց պարզել, թե որքան աշխատավարձ էին ստանում նախարարները մինչև այդ պաշտոնում նշանակվելը, և որքան են կազմել նրանց ստացած աշխատավարձերը և դրան հավասարեցված այլ վճարումները (այսուհետ՝ աշխատավարձ) 2019-ին՝ արդեն նախարարի պաշտոնում։ Քանի որ նախարարների աշխատավարձերը կրկնապատկելու վերաբերյալ վարչապետի գաղտնի հանձնարարագիրը ստորագրվել է նախորդ տարվա հուլիսին, վերջիններիս ամսական միջին աշխատավարձը պարզելու համար ամբողջ տարվա աշխատավարձը կբաժանենք 12 ամիսների։ «Հեղափոխական» նախարարները Հեղափոխությունից հետո առողջապահության նախարարի պաշտոնում նշանակված Արսեն Թորոսյանը նախարարների ցանկում միակն է, որի աշխատավարձը գրեթե չի փոխվել՝ մասնավոր հատվածից կառավարություն տեղափոխվելուց հետո։ Մինչ նախարար դառնալը Թորոսյանը «ՄԻԲՍ» բժշկա-ախտորոշիչ կենտրոնի տնօրենն էր, որտեղ, ըստ հայտարարագրի, ստացել է միջինում 1 մլն 516 հազար դրամ աշխատավարձ։ Նախորդ տարի նախարարի պաշտոնում Թորոսյանի միջին ամսական աշխատավարձը կազմել է 1 մլն 515 հազար դրամ։ Արդարադատության նախարար Ռուստամ Բադասյանը մինչ հեղափոխությունն աշխատում էր մասնավոր փաստաբանական գրասենյակում, որտեղ վերջինիս աշխատավարձը, ըստ ներկայացված հայտարարագրի, կազմում էր մոտ 430 հազար դրամ։ Բադասյանն արդարադատության նախարար է նշանակվել 2019-ի հունիսին, և ըստ վերջինիս կողմից ներկայացված հայտարարագրի՝ 2019-ին՝ նախարարի պաշտոնը զբաղեցնելուց հետո, նրա միջին ամսական աշխատավարձը կազմել է 1 մլն 372 հազար դրամ։ Տարածքային կառավարման և ենթակառուցվածքների նախարար Սուրեն Պապիկյանն այս պաշտոնում նշանակվել է 2018 թ. մայիսի 12-ին։ Պաշտոնը ստանձնելիս նա հայտարարագրել է երեք տեղից ստացած եկամուտ, որոնց ընդհանուր գումարը կազմել է 1 մլն 801 հազար դրամ, այսինքն՝ նրա միջին ամսական աշխատավարձը կազմել է 409 հազար դրամ։ Նախորդ տարի ներկայացրած հայտարարագրից պարզում ենք, որ նախարարի պաշտոնում Պապիկյանը միջինում ստացել է ամսական 1 մլն 591 հազար դրամ աշխատավարձ։ Տրանսպորտի, կապի և տեղեկատվական տեխնոլոգիաների նախարար Հակոբ Արշակյանը մինչ հեղափոխությունը զբաղեցնում էր իր իսկ կողմից հիմնադրված «Արաքսիս Ինժեներինգ» ընկերության գործադիր տնօրենի պաշտոնը, և ըստ ներկայացրած հայտարարագրի՝ նրա միջին ամսական եկամուտը կազմել է 356 հազար դրամ։ Արդեն նախարարի պաշտոնում, ըստ 2019-ի հայտարարագրի, Արշակյանի միջին ամսական աշխատավարձը կազմել է 1 մլն 398 հազար դրամ։ Աշխատանքի և սոցիալական հարցերի նախարար Զարուհի Բաթոյանը մինչ հեղափոխությունն աշխատել է հաշմանդամների իրավունքների պաշտպանությամբ զբաղվող մի քանի կազմակերպություններում։ Հեղափոխությունից հետո Զարուհի Բաթոյանը նշանակվել էր աշխատանքի և սոցիալական հարցերի նախարարի տեղակալ։ Ըստ հայտարարագրի՝ մինչ պաշտոնի նշանակվելը Բաթոյանի միջին ամսական աշխատավարձը կազմել է 167 հազար դրամ։ 2019-ին, արդեն զբաղեցնելով նախարարի պաշտոնը, Բաթոյանի միջին ամսական աշխատավարձը կազմել է մոտ 1 մլն 500 հազար դրամ։ Կրթության, գիտության, մշակույթի և սպորտի նախարար Արայիկ Հարությունյանը մինչ հեղափոխությունն աշխատում էր Երևանի պետական համալսարանում և «Թրանսփարենսի ինթերնեյշնլ» հակակոռուպցիոն կենտրոնում։ Ըստ հայտարարագրի՝ Հարությունյանի միջին ամսական եկամուտը, մինչ նախարարի պաշտոնում նշանակվելը, կազմել է 156 հազար դրամ։ Իսկ արդեն նախարարի պաշտոնում Հարությունյանը, ըստ 2019թ․ հայտարարագրի, ստացել է 1 մլն 406 հազար դրամ աշխատավարձ։ Պետական համակարգի «հնաբնակները» Կառավարության ներկայիս կազմի 12 նախարարներից 6-ը մինչև հեղափոխությունը ևս աշխատում էին պետական համակարգում, և նրանց դեպքում կհաշվարկենք մինչև նախարար նշանակվելը վերջին զբաղեցրած պաշտոնում ստացած միջին աշխատավարձը։ Այսպես, ներկայիս նախարարներից ամենից բարձր աշխատավարձը, մինչ նախարար նշանակվելը, ստացել է արտաքին գործերի նախարար Զոհրաբ Մնացականյանը, որը մինչ այդ ՄԱԿ-ում Հայաստանի մշտական ներկայացուցիչն էր։ Մնացականյանն ԱԳ նախարարի պաշտոնը ստանձնեց հեղափոխությունից անմիջապես հետո՝ մայիսի 12-ին։ Վերջինիս ներկայացրած հայտարարագրից տեսնում ենք, որ 2018-ին՝ մինչև նախարարի պաշտոնը զբաղեցնելը, նա ստացել է 17,108 դոլար աշխատավարձ։ Սա նշանակում է, որ Մնացականյանի միջին ամսական աշխատավարձը կազմել է շուրջ 3890 դոլար կամ մոտ 1 մլն 890 հազար դրամ։ 2019-ին Մնացականյանը հայտարարագրել է 16,776,991 դրամ եկամուտ, այսինքն՝ միջին ամսական աշխատավարձը կազմել է մոտ 1 մլն 398 հազար դրամ։ Մնացականյանից հետո ամենից բարձր աշխատավարձ ստացել է Ֆինանսների նախարար Ատոմ Ջանջուղազյանը, որը մինչև հեղափոխությունը զբաղեցնում էր ֆինանսների նախարարի առաջին տեղակալի պաշտոնը։ Ջանջուղազյանը, 2018-ի մայիսի 12-ին նշանակվելով ֆինանսների նախարար, պաշտոնը ստանձնելու հայտարարագիր չի ներկայացրել, սակայն 2017-ին, կրկին զբաղեցնելով ֆինանսների նախարարի առաջին տեղակալի պաշտոնը, հայտարարագրել էր 15 մլն 211 հազար դրամ եկամուտ, այսինքն՝ նրա միջին ամսական աշխատավարձը, մինչ նախարար նշանակվելը, կազմել է 1 մլն 268 հազար դրամ։ Այս տարի ներկայացրած հայտարարագրից տեղեկանում ենք, որ 2019-ին նախարար Ջանջուղազյանի միջին ամսական աշխատավարձը կազմել է 1 մլն 266 հազար դրամ։ Պաշտպանության նախարար Դավիթ Տոնոյանը մինչև այս պաշտոնը ստանձնելը արտակարգ իրավիճակների նախարարն էր։ Տոնոյանը ևս ՊՆ նախարարի պաշտոնը ստանձնելիս նոր հայտարարագիր չի ներկայացրել, սակայն 2017-ին, զբաղեցնելով ԱԻ նախարարի պաշտոնը, հայտարարագրել էր 7 մլն 933 հազ դրամ աշխատավարձ, այսինքն՝ նրա միջին ամսական աշխատավարձը կազմել է 661 հազար դրամ։ Պաշտպանության նախարարի պաշտոնում, ըստ 2019-ի հայտարարագրի, Տոնոյանի միջին ամսական աշխատավարձը կազմել է 1 մլն 666 հազար դրամ։ Էկոնոմիկայի նախարար Տիգրան Խաչատրյանը մինչ հեղափոխությունը զբաղեցնում էր նույն նախարարության (այն ժամանակ՝ Տնտեսական զարգացման և ներդրումների նախարարություն) նախարարի առաջին տեղակալի պաշտոնը։ Հեղափոխությունից հետո՝ մայիսի 16-ին, Խաչատրյանը դադարել է պաշտոնավարումը։ Պաշտոնի դադարեցման հայտարարագրում տեսնում ենք, որ Խաչատրյանի միջին ամսական աշխատավարձը կազմում էր 602 հազար դրամ։ Նույն տարվա սեպտեմբեր-հոկտեմբեր ամիսներին Խաչատրյանը զբաղեցնում էր «Հայ-Թեք» ընկերության տնօրենի պաշտոնը՝ այդ ընթացքում ստանալով 785 հազար դրամ աշխատավարձ։ 2018-ի հոկտեմբերի 15-ին Տիգրան Խաչատրյանը նշանակվեց տնտեսական զարգացման և ներդրումների նախարար։ Նախորդ տարվա հայտարարագրից տեղեկանում ենք, որ 2019-ին նախարարի պաշտոնում Խաչատրյանի միջին ամսական աշխատավարձը կազմել է 1 մլն 398 հազար դրամ։ Արտակարգ իրավիճակների նախարար Ֆելիքս Ցոլակյանն այս պաշտոնում նշանակվել է 2018-ի հոկտեմբերի 4-ին։ Մինչ այդ Ցոլակյանը ԱԺ պատգամավոր էր և ըստ 2018-ի հայտարարագրի՝ ստանում էր 525 հազար դրամ աշխատավարձ։ Նախորդ տարի արտակարգ իրավիճակների նախարարի պաշտոնում Ֆելիքս Ցոլակյանի միջին ամսական աշխատավարձը կազմել է 1 մլն 371 հազար դրամ։ Շրջակա միջավայրի արդեն նախկին նախարար Էրիկ Գրիգորյանը ևս այդ պաշտոնին էր նշանակվել 2018-ի մայիսի։ Մինչ այդ նա զբաղեցնում էր բնապահպանության նախարարի առաջին տեղակալի պաշտոնը և ըստ հայտարարագրի՝ ստանում էր 860 հազար դրամ աշխատավարձ։ 2019-ին Գրիգորյանի միջին ամսական աշխատավարձը կազմել է 1 մլն 536 հազար դրամ։ Այսպիսով, վերլուծելով վերոնշյալ տվյալները, ստացվում է, որ նախարարների բարձր աշխատավարձերի վերաբերյալ վարչապետի պարզաբանումը, թե այդ մասնագետները կարող էին ավելի բարձր վարձատրվել մասնավոր սեկտորում, տեղին չէ։ Ավելին, Նիկոլ Փաշինյանի այդ հիմնավորումը վերաբերելի է, թերևս, միայն առողջապահության նախարար Արսեն Թորոսյանին, որի՝ մասնավոր սեկտորում ստացած աշխատավարձը կարելի է համեմատել նախարարական վարձատրության հետ։ Սևադա Ղազարյան

11:41 - 09 հուլիսի, 2020

Կորոնավիրուսով վարակված ԱԻՆ աշխատակիցներից 5-ն արդեն բուժվել են. Ֆելիքս Ցոլակյան |armenpress.am|

armenpress.am: ՀՀ արտակարգ իրավիճակների նախարարության աշխատակիցների շրջանում ընդհանուր առմամբ գրանցվել է կորոնավիրուսային հիվանդության վարակման 13 դեպք: Ներկայում կորոնավիրուսի համավարակով հիվանդ է 8 աշխատակից, բուժվել է՝ 5-ը: Վերջին տվյալները ներկայացրեց ՀՀ արտակարգ իրավիճակների նախարար Ֆելիքս Ցոլակյանը: Նա անդրադարձավ արտակարգ դրության պայմաններում նախարարության ստորաբաժանումների աշխատանքին, վարակազերծման կանխարգելիչ միջոցառումներին: -Պարոն Ցոլակյան, նախարարության ստորաբաժանումներն արտակարգ դրության պայմաններում տարբեր ուղղություններով աշխատանք են կատարում՝ պաշտպանական միջոցների կիրառումից մինչև ախտահանման կազմակերպում: Այս ընթացքում իրականացված աշխատանքներն ինչպե՞ս կգնահատեք: - ԱԻՆ համակարգն առաջին իսկ օրվանից ամբողջովին ներգրավված է կորոնավիրուսային համավարակի տարածման կանխարգելման և արձագանքման միջոցառումներում և, ամենօրյա ծանրաբեռնված աշխատանքներին զուգահեռ, լիարժեք իրականացրել է իր առջև դրված խնդիրները: 2020 թ. մարտի 16-ից մինչև մայիսի 6-ը Արտակարգ իրավիճակների նախարարության Փրկարար ծառայության Ճգնաժամային կառավարման ազգային կենտրոնի «911» ահազանգման կենտրոնում ստացվել է 193 հազար 889 ահազանգ: Նույն ժամանակահատվածում ԱԻՆ ճգնաժամային կառավարման ազգային կենտրոնի «911» ահազանգման կենտրոնում և մարզային փրկարարական վարչությունների ՃԿԿ-ներում ստացվել է՝ 1153 ահազանգ, որից կորոնավիրուսի վարակի վերաբերյալ՝ 646, իսկ քաղաքացիների բարձր ջերմության առկայության վերաբերյալ 507 ահազանգ։ Մարտի 16-ից մինչև մայիսի 6-ը ԱԻՆ բժշկական ապահովման վարչության աշխատակիցները շուրջօրյա խորհրդատվական ծառայություններ են մատուցել 906 քաղաքացու։ Մարտի 24-ից ԱԻՆ ՓԾ 12 ծառայող գործուղվել է ՀՀ կառավարություն՝ «Թեժ գծի» և տեղեկատվական կենտրոնի աշխատանքներին մասնակցելու համար, այնուհետև ապրիլի 2-ին ևս 12 ծառայող է գործուղվել, աշխատանքները հերթափոխով կազմակերպելու համար: Ապրիլի 22-ից իրավիճակի վերահսկողության խմբի աշխատանքներն իրականցվում են ԱԻՆ ՓԾ ճգնաժամային կառավարման ազգային կենտրոնից։ ԱԻՆ ՓԾ բժշկական ապահովման վարչության 6 բժիշկ 8 բուժակ ապրիլի 3-ից գործուղվել է առողջապահության նախարարության «Հիվանդությունների վերահսկման և կանխարգելման ազգային կենտրոն»՝ կազմակերպված «Թեժ գծի» աշխատանքներին մասնակցելու նպատակով։ -Փրկարար ծառայության ստորաբաժանումներն ամենօրյա վարակազերծման կանխարգելիչ միջոցառումներ են իրականացնում ՀՀ բոլոր մարզերում և Երևանում: Տարածքների ընտրությունն ինչպե՞ս է կատարվում և արդյո՞ք աշխատակիցները բավարար չափով ապահովվում են անհրաժեշտ պաշտպանիչ պարագաներով: -Տարածքների ընտրությունը կապված է հանրային նշանակության, մարդկանց բարձր կուտակումների և ամենօրյա բարձր հաճախելիության հետ, օրինակ՝ շուկաներ, սուպերմարկետներ, բանկեր (ինչպես նաև բանկոմատներ) և այլն, իսկ մինչև պարետի կողմից երկրի մակարդակով տրանսպորտի տեղաշարժի սահմանափակումների կիրառումը, իրականացվել է նաև հասարակական տրանսպորտի և կանգառների վարակազերծում: Վարակազերծման աշխատանքներ իրականացնող աշխատակիցները ապահովվել են անհրաժեշտ քանակի բարձրակարգ անհատական պաշտպանիչ միջոցներով, սարքավորումներով և ախտահանիչ նյութերով: Ստեղծված իրավիճակով պայմանավորված վարակազերծման աշխատանքներ են իրականացվել նաև Ազգային Ժողովի շենքում, կադաստրի պետական կոմիտեի գրասենյակներում, գլխավոր դատախազության վարչական շենքում, ՀՀ-ում Արցախի մշտական ներկայացուցչության շենքում։ Վարակազերծման աշխատանքներ են իրականացվել Բագրատաշենի մաքսային անցակետում․ ախտահանվել են մաքսատանը գտնվող բեռնատար ավտոմեքենաները։ Վարակազերծման աշխատանքներ են կատարվել նաև «Կոնվերսբանկի», «Հայբիզնեսբանկի», «Յունիբանկի», «ԱԿԲԱ-ԿՐԵԴԻՏ ԱԳՐԻԿՈԼ» բանկի, «Արդշինինվեստբանկի», «ՍԵՖ Ինտերնեյշնլ» և «Ֆինկա» Ունիվերսալ վարկային կազմակերպությունների՝ հանրապետության տարբեր քաղաքներում գտնվող մասնաճյուղերում, «Դալմա գարդեն մոլ» զվարճաառևտրային համալիրում։ Հարկ եմ համարում նշել, որ Գեղարքունիքի մարզի Վարդենիս քաղաքի հիվանդանոցի և պոլիկլինիկայի աշխատողների, այդ թվում նաև մի շարք բնակիչների շրջանում, կորոնավիրուսի վարակի հաստատված դեպքերի պատճառով, քաղաքի հիվանդանոցի և պոլիկլինիկայի հետագա անվտանգ աշխատանքների ապահովման նպատակով կազմակերպվել և իրականացվել է վարակազերծում։ Մինչև օրս վերը նշված վայրերում 16250 անգամ իրականացվել են վարակազերծման աշխատանքներ: Տեղեկացնեմ, որ մարտի 24-ից մինչև այսօր ԱԻՆ աշխատակիցներին բախշվել է ընդհանուր թվով՝ պաշտպանիչ կոստյում՝ 564 լրակազմ, նատրիումի հիպոքլորիդ՝ 1910 լիտր, ախտահանող նյութ «Բիօքսիլ»՝ 1000լ, շնչադիմակ՝ 26650 հատ, ձեռնոց՝ 23 հազար 150 զույգ, ախտահանող նյութ «Դիմաքս քլոր»՝ 12կգ , բժշկական սպիրտ, ալկոգել՝ 820 լիտր, ախտահանող նյութ «Դիաբակ»՝ 10 լիտր: - Փրկարար ծառայությունում կորոնավիրուսով վարակվածության դեպքեր էին գրանցվել: Ի՞նչ տեղեկություններ կհաղորոդեք վարկվածների ու մեկուսացած կոնտակտավորների առողջական վիճակի մասին: -ԱԻՆ աշխատակիցների շրջանում գրանցվել է կորոնավիրուսային հիվանդության վարակման 13 դեպք: Մայիսի 6-ի դրությամբ, ընդհանուր առմամբ, ունեցել ենք 110 ինքնամեկուսացված, որոնցից 103-ը, կարանտինային ժամանակահատվածի ավարտից հետո, վերադարձել է բնականոն աշխատանքի: Հատուկ նախատեսված վայրերում ունեցել ենք 51 մեկուսացված, որոնցից 45-ը նույնպես դուրս եկել մեկուսացված վայրերից։ Ներկայում կորոնավիրուսի համավարակով հիվանդ է 8 աշխատակից, բուժվել է՝ 5-ը, ինքնամեկուսացած է՝ 7-ը, մեկուսացած է՝ 6-ը։ -Ծառայողների շրջանում վարակի հնարավոր դեպքերի, հետևաբար մեկուսացածների թվի ավելացման պարագայում արդյո՞ք ունեք ռեսուրսներ փոխարինումն ապահովելու համար: -Համաճարակային իրադրությամբ պայմանավորված՝ նախարարությունում մեծ ծավալի աշխատանքներ են իրականացվում հատկապես հրշեջ-փրկարարական ջոկատներում վարակի տարածումը կանխարգելելու նպատակով մասնավորապես՝ ԱԻ նախարարության բոլոր կառուցվածքային և տարածքային ստորաբաժանումներում oրական 3 անգամ վարակազերծման են ենթարկվում շենքերն ու շինությունները, բակերն ու բոլոր տեսակի տրանսպորտային միջոցները, գույքը, տեխնիկան և մարտական համազգեստը: Իրականացվում է փրկարարական ստորաբաժանումների անձնակազմի առողջական վիճակի և հիգիենայի կանոնների պահպանման հսկողություն՝ 3-անգամյա ջերմաչափում, հանգստացող հերթափոխի, նախարարության աշխատակիցների և նրանց ընտանիքի անդամների ինքնազգացողության ամենօրյա մշտադիտարկում, արձագանքում իրականացնող անձնակազմի կողմից բնակչության հետ շփման ժամանակ անհատական անվտանգության նորմերի պահպանման հսկողություն: Վարակի տարածման պարագայում կան պլանավորված միջոցառումներ հրշեջ-փրկարարական ջոկատների անխափան աշխատանքները կազմակերպելու ուղղությամբ՝ այլ հերթափոխերի անձնակազմից ձևավորվել են դասակներ ամենօրյա շուրջօրյա ծառայությունը կազմակերպելու նպատակով, Փրկարար ծառայության կենտրոնական ապարատի անձնակազմից ձևավորվել են համահավաք խմբեր (ընդհանուր թվով 105 ծառայող), որոնց ուժերով նախատեսվում է լրացնել այն ստորաբաժանումները, որոնց շուրջօրյա հերթապահությունը հնարավոր չի լինի կազմակերպել նույն ստորաբաժանման անձնակազմի միջոցով: Կարդալ ավելին՝ armenpress.am-ում։

09:47 - 08 մայիսի, 2020