ՌԴ

Ռուսաստանը (պաշտոնական անվանումը՝ Ռուսաստանի Դաշնություն) միջմայրցամաքային պետություն Եվրասիայի հյուսիսարևմտյան հատվածում։ Տարածքի հիմնական մասը գտնվում է Հյուսիսային Ասիայում, իսկ որոշակի հատված՝ նաև Արևելյան Եվրոպայում: ՌԴ-ն աշխարհի խոշորագույն պետությունն է և զբաղեցնում է երկրագնդի ցամաքային տարածքի 1/8-ը։ Բնակչության թվով 9-րդն է աշխարհում․ ըստ 2018-ի մարդահամարի տվյալների՝ ավելի քան 144 մլն մարդ։ Երկրի ազգաբնակչության 77%-ը կենտրոնացված է արևմուտքում՝ եվրոպական հատվածում։

Մայրաքաղաքն է Մոսկվան։ Վերջինս համարվում է Եվրոպայի խոշորագույն քաղաքը, ինչպես նաև խոշորագույններից մեկն ամբողջ աշխարհում։ ՌԴ նշանավոր քաղաքներից են նաև Սանկտ Պետերբուրգը, Նովոսիբիրսկը, Եկատերինբուրգը և Նիժնի Նովգորոդը։ Պետական լեզուն ռուսերենն է։ Խոշոր ազգային փոքրամասնություններն են թաթարները, ուկրաինացիները, բաշկիրները, հայերը, չուվաշները, չեչենները և այլն։

Ռուսաստանը նախագահական կառավարմամբ դաշնային հանրապետություն է, որտեղ նախագահը՝ պետության, իսկ վարչապետը՝ կառավարության ղեկավարն է։ ՌԴ գործող նախագահն է Վլադիմիր Պուտինը, վարչապետը՝ Միխայիլ Միշուստինը։

Ռուսաստանի ՊՆ-ն միջմայրցամաքային բալիստիկ հրթիռի փորձնական արձակում է իրականացրել |1lurer.am|

1lurer.am: Ռուս զինվորականները Կապուստին Յար հրաձգարանից միջմայրցամաքային բալիստիկ հրթիռի փորձնական արձակում են իրականացրել, հայտնում է ՌԴ ՊՆ-ն: Մի շարք երկրներում, այդ թվում՝ Հայաստանի երկնքում, անհայտ օբյեկտ էր ի հայտ եկել: Լուսանկարը՝ սոցիալական ցանցից / Լոռի / 12․04․2024 «2024 թվականի ապրիլի 12-ին Աստրախանի շրջանի 4-րդ նահանգային կենտրոնական հրաձգարանից՝ Կապուստին Յարից, Ռազմավարական հրթիռային ուժերի մարտական անձնակազմը հաջողությամբ արձակել է շարժական ցամաքային հրթիռային համակարգի միջմայրցամաքային բալիստիկ հրթիռ»,- ընդգծել են գերատեսչությունում։ Արձակումն իրականացվել է հեռանկարային հրթիռային համակարգերի պետական փորձարկումների շրջանակներում։ Բացի այդ՝ նպատակ էր դրված վերահաստատել ռուսական բանակում կիրառվող հրթիռների կայունությունը։

10:33 - 13 ապրիլի, 2024

Արևմուտքը փորձում է խարխլել Հարավային Կովկասում իրավիճակի կայունացման պայմանավորվածությունները․ Լավրով |azatutyun.am|

azatutyun.am: ԱՊՀ բոլոր պատվիրակությունները, որոնք մասնակցել են Մինսկում արտգործնախարարների ժողովին, գիտակցել են, որ Միացյալ Նահանգները և նրա արբանյակները փորձում են ներխուժել ԱՊՀ ընդհանուր տարածքի բոլոր շրջաններ, այսօր հավաքին հաջորդած մամլո ասուլիսում հայտարարել է Ռուսաստանի արտաքին գործերի նախարար Սերգեյ Լավրովը։ Նա անդրադարձել է նաև Հարավային Կովկասին, ասելով, թե Միացյալ Նահանգները և արևմտյան մյուս երկրները փորձում են խարխլել այնտեղ իրավիճակի կայունացման պայմանավորվածությունները: «Նրանք չեն ցանկանում թույլ տալ, որ իրականացվեն այն պայմանավորվածությունները, որոնք ձեռք են բերվել Հայաստանի և Ադրբեջանի միջև՝ Ռուսաստանի աջակցությամբ: Նրանք նաև շատ ակտիվ փորձում են ներթափանցել Կենտրոնական Ասիա, ստեղծում են տարբեր ձևաչափեր, որոնք բացահայտ ուղղված են Ռուսաստանի Դաշնության դեմ: Հրապարակավ ասում են, թե պետք է ապահովեն երկրների իրական ինքնիշխանությունը հետխորհրդային տարածքում, որպեսզի դրանք դուրս գան Ռուսաստանի Դաշնության ստվերից, նույն գործելակերպն է Մոլդովայի և շատ այլ շրջանների վերաբերյալ», - ասել է Լավրովը: Միաժամանակ, նա նշել է, թե Ռուսաստանի գործընկերները հավատարիմ են համագործակցության սկզբունքներին։ «Արևմուտքի հսկայական ճնշման ներքո մեր դաշնակիցները, մեր ռազմավարական գործընկերները հավատարիմ են մնում բոլոր առանցքային սկզբունքներին, որոնց վրա հիմնված է փոխգործակցությունն ԱՊՀ-ի, ՀԱՊԿ-ի և ԵԱՏՄ-ի, Համագործակցության շանհայան կազմակերպության շրջանակներում», - ասել է Ռուսաստանի արտաքին գերատեսչության ղեկավարը: Սերգեյ Լավրովը վստահություն է հայտնել, թե ռազմավարական առումով «այդ արևմտյան գիծը դատապարտված է ձախողման»: Հայաստանից Մինսկի հավաքին մասնակցում էր փոխարտգործնախարար Մնացական Սաֆարյանը:

17:54 - 12 ապրիլի, 2024

Ռուսաստանը չի մասնակցի Շվեյցարիայում նախատեսված՝ Ուկրաինայի խաղաղության կոնֆերանսին |1lurer.am|

1lurer.am: Հունիսի 15-16-ը Շվեյցարիայի Լյուցեռն քաղաքի մոտ տեղի կունենա Ուկրաինայի հարցով խաղաղության համաժողով։ Ռուսաստանը ներկա չի լինի: Բեռնում ՌԴ դեսպանատան մամուլի քարտուղար Վլադիմիր Խոխլովն ավելի վաղ ասել էր, որ Շվեյցարիան Ուկրաինային նվիրված գագաթնաժողովին մասնակցելու հրավեր չի ուղարկել ՌԴ-ին: Դիվանագետը միաժամանակ նշել էր, որ Մոսկվան ամեն դեպքում չի մասնակցի, քանի որ կազմակերպիչները ներկայացնելու են Ռուսաստանի համար անընդունելի «խաղաղության բանաձևը»: Ըստ Մոսկվայի՝ այն ոչ կենսունակ է և հաշվի չի առնում ռուսական շահերը։ ՌԴ նախագահի մամուլի քարտուղար Դմիտրի Պեսկովն իր հերթին ասել է, որ Ուկրաինայի հարցով բանակցային գործընթացն առանց Ռուսաստանի մասնակցության անիմաստ է: Եվրամիությունը, հակառակը, իր աջակցությունն է հայտնել Շվեյցարիայում Ուկրաինայի վերաբերյալ համաժողովի անցկացմանը և ակնկալում է մասնակցել դրան։

19:55 - 11 ապրիլի, 2024

ՀՀ-ում ձերբակալված և ռազմաբազայում պահվող ՌԴ քաղաքացին հայտարարել է, թե «ամեն ինչ գիտակցել է» և ուզում է վերադառնալ ՌԴ |panarmenian.net|

panarmenian.net: ՌԴ քաղաքացի Անատոլի Շչետինինը, որին ՌԴ ռազմական ոստիկանության աշխատակիցները ձերբակալել են Գյումրիում ՌԴ-ում զինծառայությունից խուսափելու համար և որին պահում են ՌԴ ռազմակայանում, հայ փաստաբանների հետ հանդիպմանը հայտարարել է թե «ամեն ինչ գիտակցել է», օգնության կարիք չունի և ցանկանում է վերադառնալ ՌԴ։ Այդ մասին հայտնել է «Հանրային դատավճիռ» իրավապաշտպան կազմակերպությունը, գրում է Meduza-ն։ Միջազգային պաշտպանության կենտրոնի իրավաբան Նարեկ Հակոբյանը և Հանրային դատավճիռների փորձագետ Հասմիկ Նովիկովան հանդիպել են Շչետինինի հետ ապրիլի 10-ի առավոտյան Գյումրիի 102-րդ ռուսական ռազմաբազայում։ Հանդիպումն անցել է Շչետինինի հետ առանձնազրույցի ձևաչափով։ Շչետինինը փաստաբանին ասել է, որ նրան 2 անգամ փորձել են տանել Ռուսաստան, սակայն դա տեղի չի ունեցել, քանի որ, ըստ նրա, իրեն, իբր, արգելել են մուտքը ՌԴ։ Հասմիկ Նովիկովան նշել է, որ ՌԴ քաղաքացիներին չի կարող արգելվել մուտքը Ռուսաստան, իսկ մերժումը կարող է կապված լինել Հայաստանի սահմանապահ ծառայության գործողությունների հետ։ Ավելի ուշ հայտնի դարձավ, որ նրան իրոք թույլ չի տվել երկրից մեկնել ՀՀ սահմանապահ ծառայությունը, քանի որ նախկին զինվորականը ՌԴ-ում հետախուզման մեջ է, և դրա համար անհրաժեշտ է ՀՀ արդարադատության նախարարի թույլտվությունը, գրել է «Վաժնիի իստորիին»։ Ավելի վաղ հայ իրավապաշտպանները կոչ էին արել ՀՀ իշխանություններին թույլ չտալ նրա արտահանձնումը ՌԴ-ին։ Դեպքի մասին ահազանգել էին ՀՔԱ Վանաձորի գրասենյակի իրավապաշտպանները։ 2023-ի դեկտեմբերին 102-րդ բազայի ռազմական ոստիկանությունը դասալքության մեղադրանքով ձերբակալել էր Դմիտրի Սետրակովին, որին տեղափոխել էին Ռուսաստան։ Թե որտեղ է հիմա Սետրակովը, որ մեկնել էր ՌԴ-ից, որպեսզի չմասնակցի պատերազմին, հայտնի չէ։ Այդ հարցին անդրադարձել էր նաև ՀՀ վարչապետ Նիկոլ Փաշինյանը՝ անօրինական անվանելով ռուս զինծառայողների գործողությունները։

13:41 - 11 ապրիլի, 2024

Որոշ գործընկերների կարող է դուր չգալ մեր շահերն առաջ տանելու ձգտումը. ԱԳՆ |news.am|

news.am: Ռուսաստանի եւ այլ երկրների հետ հարաբերություններում մենք առաջնորդվում ենք ՀՀ պետական շահերի առաջմղմամբ։ Այս մասին լրագրողների հետ զրույցում ապրիլի 11-ին ասել է փոխարտգորնախարար Վահան Կոստանյանը։ Նա ավելացրել է, որ որոշ գործընկերների դա կարող է դուր չգալ, ոմանց էլ՝ դուր գալ։ «Բայց դա է մեր կողմնորոշիչը»,- նշել է փոխնախարարը։ Կոստանյանը հիշեցրել է, որ Հայաստանը հանձնել է Հայաստանի եւ Ադրբեջանի միջեւ հարաբերությունների կարգավորման մասին համաձայնագրի ութերորդ խմբագրումը։ «Սպասում ենք Ադրբեջանի պատասխանին։ Նոր առաջարկներ ներկայացնելու խնդիրներ չկան։ Խնդիրն այն է, որպեսզի Ադրբեջանը փաստաթղթում արտացոլի ձեռք բերված պայմանավորվածությունները երեք սկզբունքների շրջանակում»,- ամփոփել է նա։

11:40 - 11 ապրիլի, 2024

ՌԴ ԱԳ փոխնախարարն ու Թուրքիայի դեսպանը քննարկել են «Հարավային Կովկասը ապակայունացնելու Արևմուտքի փորձերը» |factor.am|

factor.am: ՌԴ ԱԳ փոխնախարար Միխայիլ Գալուզինն ու Մոսկվայում Թուրքիայի դեսպան Թանջու Բիլգիչը քննարկել են «Հարավային Կովկասում իրավիճակը ապակայունացնելու Արևմուտքի փորձերը»։ Հանդիպման արդյունքների մասին հայտարարություն է տարածել ՌԴ ԱԳՆ-ն, փոխանցում է ՏԱՍՍ-ը։ «Քննարկվել են մի շարք արդիական հարցեր, որոնք առնչվում են առաջին հերթին Հարավային Կովկասում տիրող իրավիճակին։ Ընդգծվել է կողմերի քննադատական գնահատականը հավաքական Արևմուտքի՝ այս տարածաշրջան լարվածություն մտցնելու և այն ապակայունացնելու փորձերին՝ ելնելով իրենց պատեհապաշտական շահերից»,-ասվում է հայտարարության մեջ։ Նշվում է, որ կողմերը նաև փոխադարձ հետաքրքրություն են հայտնել «3+3» խորհրդատվական տարածաշրջանային պլատֆորմի (Ռուսաստան, Իրան, Թուրքիա, Ադրբեջան, Հայաստան) շրջանակներում աշխատանքը շարունակելու համար՝ որպես Անդրկովկասում կայունության և անվտանգության ամրապնդման առանցքային գործոն։ Նշվել է, որ «հարթակի դռները դեռ բաց են մնում Վրաստանի համար»։ ՌԴ ԱԳՆ-ն հայտնում է, որ հանդիպումը տեղի է ունեցել թուրքական կողմի նախաձեռնությամբ։

11:13 - 11 ապրիլի, 2024

Հայաստանում չպե՛տք է փակվեն կայքեր ՌԴ պատվերով. ՀՔԱՎ

2024թ․-ի ապրիլի 5-ին ՀՔԱՎ գրասենյակ է դիմել իրավապաշտպան Անտոն Շչերբակը։ Վերջինս երկար տարիներ Ռուսաստանում զբաղվել է մարդու իրավունքների, մասնավորապես զինվորականների և զորակոչիկների իրավունքների պաշտպանությամբ, համագործակցել «Զորակոչիկների դպրոց» կազմակերպության հետ (պաշտոնական կայքէջը՝ https://netprizyvu.ru/)։ Ա․Շչերբակը հայտնել է, որ օրերս Ռուսաստանում, ապա՝ Հայաստանում արգելափակվել է «Զորակոչիկների դպրոց»-ի կայքէջը։ Հայաստանում կայքէջի արգելափակմամբ ՀՀ-ն խախտել է Մարդու իրավունքների և հիմնարար ազատությունների պաշտպանության մասին Եվրոպական կոնվենցիայի 10-րդ՝ Արտահայտվելու ազատության իրավունքը, ըստ որի՝ Յուրաքանչյուր ոք ունի ազատորեն արտահայտվելու իրավունք։ Այս իրավունքը ներառում է սեփական կարծիք ունենալու, տեղեկություններ և գաղափարներ ստանալու և տարածելու ազատությունը՝ առանց պետական մարմինների միջամտության և անկախ սահմաններից։ (․․․) ՀՔԱ Վանաձորի գրասենյակը դիմել է ՀՀ վարչապետ Նիկոլ Փաշինյանին, պահանջել՝ տեղեկատվություն տրամադրել կայքէջի արգելափակման պատճառների և իրավական հիմքերի վերաբերյալ։ Միաժամանակ, կազմակերպությունը պահանջել է վերացնել կայքի արգելափակումը ՀՀ-ում և ապահովել դրա անխափան գործունեությունը։Կազմակերպությունն արձանագրում է, որ իրավաչափ չէ Ռուսաստանի Դաշնության տարածքում կայքէջի գործունեության սահմանափակման նույնական կիրառումը Հայաստանի տարածքում։

18:13 - 10 ապրիլի, 2024

Եթե մեր առաջարկները չընդունվեն, ՀՀ-ն կարող է միակողմանի խզել համաձայնագիրը. ԲՏԱ նախարարը՝ ռուսական հաղորդումների մասին |news.am|

news.am: Շուրջ 2 շաբաթ առաջ հայտարարվեց, որ Վլադիմիր Սոլովյովի մասնակցությամբ հեղինակային հաղորդումների հեռարձակումն արգելափակվում են այն բանից հետո, երբ ամիսներ շարունակ Հայաստանի եւ ՌԴ կառավարությունների միջեւ տեղի էին ունենում շփումներ, կոնսուլտացիաներ միջկառավարական համաձայնագրի վերաբերյալ: Այս մասին, այսօր՝ ապրիլի 10-ին, ԱԺ-ում կառավարության հետ հարցուպատասխանի ժամանակ նշեց ԲՏԱ նախարար Մխիթար Հայրապետյանը՝ անդրադառնալով ՔՊ-ական պատգամավոր Սոնա Ղազարյանի հարցին, թե ինչո՞վ է պայմանավորված միայն Սոլովյովի հաղորդումների արգելափակումը, քանի որ այլ հաղորդումների, մասնավորապես, Կիսիլյովի հաղորդման ժամանակ եւս Հայաստանի հասցեին ոչ պակաս վիրավորական հայտարարություններ են հնչել: «Կոնսուլտացիաների նպատակն է նախ արձանագրելու, որ համաձայնագրի 5-րդ եւ 6-րդ հոդվածները խախտվել են, որից հետո նաեւ նշել էի, որ ԲՏԱ նախարարության պատվիրակությունը պետք է մեկնի Մոսկվա՝ կոնսուլտացիաների: Այդ կոնսուլտացիաները կայացել են եւ ցավով պետք է ասեմ, որ չի հաջողվել արձանագրել խախտումների փաստը: Համենայնդեպս, դրա վերաբերյալ չի եղել կոնսենսուս, որի հետեւանքն է վերոհիշյալ հաղորդումների եթերազրկումը: Սա ամենեւին չի նշանակում, որ բանակցություններում փակուղու մեջ ենք: Մենք եթե ոչ այս շաբաթ, ապա հաջորդ շաբաթ նախատեսում ենք առաջարկների մեր փաթեթը ուղարկել ռուս գործընկերներին, թե ինչպես ենք պատկերացնում համաձայնագրի նոր խմբագրումները: Մենք կառուցողական ենք տրամադրված, մեր նպատակն է ոչ թե այս իրավիճակի սրումը, այլ կառուցողական միջավայրում, որակյալ բանավեճի արդյունքում ստանալ այնպիսի փաստաթուղթ, որը կաշխատի, որտեղ ամրագրված խախտումների դեպքում կհետեւեն սանկցիաներ: Այսօրվա գործող կարգավորումները նման հնարավորություն չեն տալիս: Մինչդեռ հանրային մուլտիպլեքսում գործող հայկական ալիքները գործում են այդ կանոններով: Մեր նպատակն է վերախմբագրել այդ համաձայնագիրը, որ հնարավորություն կտա նման խախտումների հայտնաբերման պարագայում ՀՌՀ-ին իրականացնել մոնիտորինգ եւ խախտումների դեպքում կիրառել վարչական վարույթ, ասել է թե՝ սանկցիաներ»,- ասաց նախարարը: Նա ընդգծեց, որ հենց Սոլովյովի երկու հաղորդումներն են եթերազարկվել, որովհետեւ վերջին ամիսներին արձանագրված են եղել թվով ամենամեծ խախտումները: Նրա խոսքով, հայ ժողովրդի հույզերը, արժանապատվությունը վիրավորող բովանդակությամբ հեռուստահաղորդումները կարող են նաեւ հակառուսական ալիքի պատճառ հանդիսանալ. «Մենք շահագրգռված ենք, որ աշխատանքը կազմակերպել այնպես, որ նման բովանդակությունը կանխվի, որը կարող է բերել նման հետեւանքների: Եթե մեր առաջարկները չընդունվեն, չեմ բացառում հավանականությունը, որ ՀՀ-ն կարող է դիտարկել նաեւ այդ համաձայնագիրը միակողմանի խզելու տարբերակը»,- ընդգծեց ԲՏԱ նախարարը: Հիշեցնենք, որ մարտի վերջից Հայաստանում արգելափակվել են հանրային մուլտիպլեքսով սփռվող «ՌՏՌ-ՊԼԱՆԵՏԱ» հեռուստաալիքով հեռարձակվող «Երեկոն Վլադիմիր Սոլովյովի հետ» և «Կիրակի երեկոն Վլադիմիր Սոլովյովի հետ» հեղինակային հաղորդումները։

17:11 - 10 ապրիլի, 2024

Մոսկվան Երևանին և Բաքվին հորդորում է նվազեցնել ռազմատենչ հռետորաբանությունը |civilnet.am|

civilnet.am: v class="entry-content"> Մոսկվան Երևանին և Բաքվին կոչ է անում առավելագույն զսպվածություն ցուցաբերել և նվազեցնել ռազմատենչ հռետորաբանության ինտենսիվությունը։ Այս մասին ապրիլի 10-ին կայացած ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան՝ անդրադառնալով հայ-ադրբեջանական սահմանին տիրող իրավիճակին։ «Բաքվի և Երևանի միջև բոլոր տարածքային վեճերն ու փոխադարձ պահանջները պետք է կարգավորվեն քաղաքական-դիվանագիտական մեթոդներով»,- ասել նա։ Զախարովայի խոսքով՝ Ռուսաստանը պատրաստ է աջակցել կողմերին լուծումներ գտնելու, այդ թվում՝ հայ-ադրբեջանական սահմանազատման հարցում։ Ըստ նրա՝ տարածաշրջանում կայուն խաղաղություն հաստատելու համար անհրաժեշտ բոլոր մեխանիզմները կան: Այս համատեքստում Զախարովան հիշեցրեց Ռուսաստանի, Հայաստանի և Ադրբեջանի ղեկավարների եռակողմ պայմանավորվածությունների մասին: Ապրիլի 5-ից սկսած ադրբեջանական ստորաբաժանումները սահմանագոտու Տավուշի, Գեղարքունիքի, Սյունիքի մի շարք ուղղություններում տարբեր տրամաչափի հրաձգային զենքերից փոփոխական ինտենսիվությամբ կրակում են Հայաստանի զինված ուժերի դիրքերի ուղղությամբ։ Ըստ Հայաստանի պաշտպանության նախարարության՝ Ադրբեջանի կրակոցների գերակշիռ մասը ոչ նպատակային և անկանոն է: Ապրիլի 7-ին Սյունիքի Տեղ գյուղի հատվածում ադրբեջանական կրակի հետևանքով վնասվել է նույն գյուղի տներից մեկի պատուհանը։

16:36 - 10 ապրիլի, 2024

ԵԱՏՄ-ի մայիսի 8-ի նիստին Հայաստանի մասնակցության հարցը քննարկվում է․ վարչապետ |armenpress.am|

armenpress.am: Եվրասիական տնտեսական միության հոբելյանական գագաթնաժողովին Հայաստանի մասնակցության հարցը քննարկվում է։ Լրագրողների հետ ճեպազրույցում այս մասին ասաց վարչապետ Նիկոլ Փաշինյանը։ «ԵԱՏՄ-ի մայիսի 8-ի նիստին Հայաստանի մասնակցության հարցը քննարկվում է։ Երբ որոշում լինի, այդ որոշման վերաբերյալ լրացուցիչ կհայտարարենք»,-ասաց Փաշինյանը։ Ավելի վաղ ՌԴ նախագահ Վլադիմիր Պուտինը հայտարարել էր, որ 2024 թվականին Եվրասիական տնտեսական միությունը (ԵԱՏՄ) նշում է իր 10-ամյակը, և մայիսի 8-ին Մոսկվայում տեղի կունենա ԵԱՏՄ հոբելյանական գագաթնաժողովը։

15:41 - 10 ապրիլի, 2024

Երևանն ակնկալում է, որ Մոսկվան ներդրումներ կանի 2002-ին պարտքի դիմաց ՌԴ-ին փոխանցված ձեռնարկություններում |azatutyun.am|

azatutyun.am: Երևանն ակնկալում է, որ Մոսկվան ներդրումներ կանի այն ձեռնարկություններում, որոնք որպես գույք պարտքի դիմաց փոխանցվել են ռուսական կողմին, այսօր Ազգային ժողովում հայտարարեց վարչապետ Նիկոլ Փաշինյանը՝ պատասխանելով իշխանական պատգամավոր Սերգեյ Բագրատյանի հարցին, թե արդյո՞ք Հայաստանը չի պատրաստվում վճարել պարտքը և հետ ստանալ մոտ 93 մլն դոլարի դիմաց 2002-ին Ռուսաստանին փոխանցած ռազմավարական հզորությունները, այդ թվում՝ Հրազդանի ՋԷԿ-ը, «Մարս» գործարանը։ «Ուզում եմ հասկանալ, որ այսօր երբ մենք իսկապես տնտեսական զարգացման հայեցակարգ ենք համարում պետական շահը, ժամանակը չէ՞, որ մենք վճարենք այդ պարտքը և հետ ստանանք այդ ռազմավարական հզորությունները, կարողությունները, որոնց կարիքը մենք խիստ զգում ենք, որովհետև մեզ համար գերակա շահն իսկապես մեր տնտեսական զարգացումն է, որից բխում է նաև մեր անվտանգությունը։ Կարո՞ղ ենք մենք դիմել Ռուսաստանի Դաշնությանը, վճարել այդ պարտքը և հետ ստանալ այդ կարողությունները, մանավանդ, որ այս 20 տարվա ընթացքում այդ կարողությունները հսկայական շահույթ են բերել Ռուսաստանին», - վարչապետից հետաքրքրվեց պատգամավորը։ Փաշինյանը պատասխանեց՝ թեման ռուս գործընկերների հետ քննարկել են և կոչը ռուսական կողմին եղել է, ոչ թե օբյեկտները հետ վերցնելն, այլ ներդրումներ անելը։ «Այդ կարողությունների պոտենցիալն, ըստ էության, օգտագործված չէ։ Շատ բաներ կան, որ ուղղակի դռները փակված են, և այս հարցը մենք Ռուսաստանի կառավարության գործընկերների հետ քննարակել ենք», - հայտարարեց Փաշինյանը՝ նշելով, որ անձամբ քննարկել է նաև «Մարս» գործարանի հարցը։ «Ես անձամ Ռուսաստանի Դաշնության կառավարության ղեկավարի հետ եմ քննարկել այդ հարցը, և այդ շեշտադրումներով, որ ահռելի մեծ արտադրական նշանակության տարածքներ են և այսօր դրա չնչին տոկոսն է որևէ ձևով զբաղված, և հետևաբար պետք է աշխատի այդ հզորությունը, որպեսզի ծառայի տնտեսական զարգացմանը», - ասաց Փաշինյանը։

15:37 - 10 ապրիլի, 2024

Կրեմլը հուսով է, որ Փաշինյանն ու Պուտինը տեսանելի հեռանկարում կքննարկեն առկա բոլոր խնդիրները |civilnet.am|

civilnet.am: Կրեմլը հուսով է, որ տեսանելի հեռանկարում ՌԴ նախագահ Վլադիմիր Պուտինը և ՀՀ վարչապետ Նիկոլ Փաշինյանը անձամբ կկարողանան քննարկել երկու երկրների հարաբերություններում առկա բոլոր հարցերը: Այս մասին ապրիլի 10-ին լրագրողներին հայտնել է Ռուսաստանի նախագահի մամուլի քարտուղար Դմիտրի Պեսկովը, փոխանցում է ՏԱՍՍ-ը։ «Մենք հույս ունենք, որ տեսանելի ապագայում ղեկավարները անձամբ հնարավորություն կունենան քննարկել նման հարցերը, եթե դրանք օրակարգում են»,- ասել է Պեսկովը։ Ավելի վաղ Նիկոլ Փաշինյանը հայտարարել էր, որ Հայաստանը Ռուսաստանի հետ հարաբերություններում «ոչ մի սխալ քայլ» չի արել, սակայն «հակառակ դեպքերը բազմաթիվ են»:

14:26 - 10 ապրիլի, 2024

Հայաստանը Ռուսաստանի հետ հարաբերություններում ոչ մի սխալ քայլ չի արել. Փաշինյան |armenpress.am|

13:40 - 10 ապրիլի, 2024

Օրենբուրգում Ուրալ գետի ջրի մակարդակը գերազանցել է վտանգավոր նշագիծը |factor.am|

factor.am: Օրենբուրգում Ուրալ գետի ջրի մակարդակը բարձրացել է 81 սմ-ով՝ հասնելով 978 սմ-ի: Այս մասին հայտնել են քաղաքային իշխանությունները՝ հղում անելով հիդրոօդերևութաբանական կենտրոնին, գրում է Meduza-ն։ Ապրիլի 9-ին տեղական ժամանակով 22:00-ին Ուրալում ջրի մակարդակը գերազանցել է վտանգավոր նշագիծը՝ 930 սանտիմետրը։ Ըստ փորձագետների՝ ապրիլի 10-ին ջրի մակարդակը կբարձրանա ևս 30-ից 70 սանտիմետրով: Իշխանությունները հեղեղումների գոտում բնակիչներին կոչ են արել շտապ լքել տները: Նշվում է նաև, որ Սաքմարա գետի ջրի մակարդակը վերջին 24 ժամվա ընթացքում բարձրացել է ութ սանտիմետրով և այժմ կազմում է 813 սանտիմետր․ վտանգավոր սահմանը 870 սանտիմետրն է։ Առավոտյան ժամը 9-ի դրությամբ՝ Օրենբուրգում ջրի տակ է անցել 2392 հողատարածք և 1910 տնային տնտեսություն։ Գիշերը ջրի տակ է անցել մոտ 300 տուն։ Ժամանակավոր տեղավորման կենտրոններում 58 մարդ կա, այդ թվում՝ 22 երեխա։ Շրջանի չորս գյուղերում որոշել են անջատել ջուրը տրանսֆորմատորային ենթակայանի հեղեղման պատճառով։

12:59 - 10 ապրիլի, 2024

Մոսկվան հետախուզում է հայտարարել լրագրող Միխայիլ Զիգարի նկատմամբ |azatutyun.am|

azatutyun.am: Ռուսաստանի ներքին գործերի նախարարությունը հետախուզում է հայտարարել «Դոժդ» հեռուստաալիքի նախկին գլխավոր խմբագիր, լրագրող, գրող Միխայիլ Զիգարի նկատմամբ։ "Медиазона"-ն, վկայակոչելով ՆԳՆ բազայի տվյալները, նշում է, որ Զիգարը հետախուզվում է «Քրեական օրենսգրքի հոդվածով», սակայն, թե ինչ հոդվածի մասին է խոսքը, բազայում չի նշվում։ Զուգարը 2022 թվականից բնակվում է Գերմանիայում։ Ռուսաստանում նա աշխատել է նաև «Կոմերսանտ» թերթում և ռուսական "Русский Newsweek" ամսագրում։ Դեռ մարտին Կրեմլին մոտ կանգնած «Նովոստի» և Shot տելեգրամյան ալիքըները գրել էին, որ Զիգարի դեմ քրեական գործ է հարուցվել Ռուսաստանի զինված ուժերի մասին գիտակցաբար կեղծ տեղեկություններ տարածելու հոդվածով։ Տեղեկությունը հաստատել էր նաև «Դոժդ»-ի գլխավոր խմբագիր Տիխոն Ձյադկոն։ Զիգարի նկատմամբ քրեական հետապնդման պատճառ է դարձել 2022-ի ապրիլին նրա ինստագրամյան գրառումը Բուչայում ռուսական բանակի հանցագործությունների մասին։ Astra-ն գրում է, որ գործն այս տարվա մարտի 12-ին է հարուցվել։

10:09 - 10 ապրիլի, 2024

Ավելի քան 300 մեծ բեռնատարներ են կուտակվել Ռուսաստանից դեպի Վրաստան ճանապարհին |armenpress.am|

armenpress.am: Ռազմավիրական ճանապարհին՝ Վրաստանի հետ Ռուսաստանի սահմանին 300 մեծ բեռնատարների հերթ է գոյացել: Այդ մասին ՏԱՍՍ-ին հաղորդել են Հյուսիսային Օսիայի ներքին գործերի նախարարության մամուլի ծառայությունում։ Հյուսիսային Օսիայի Ճանապարհային երթևեկության կազմակերպման կենտրոնի տվյալներով՝ էլեկտրոնային հերթում կա ավելի քան 2200 ավտոմեքենա։ «Վերին Լարսում» կայանված է 140 միավոր մեծաբեռնատար փոխադրամիջոց, ճանապարհին՝ 160», - հայտնել են Հյուսիսային Օսիայի ներքին գործերի նախարարության մամուլի ծառայությունում։ Հյուսիսային Օսիայի Ճանապարհային երթևեկության կազմակերպման կենտրոնի կայքի տվյալների համաձայն՝ «Վերին Լարս» բազմակողմ ավտոմոբիլային անցակետում այս պահին էլեկտրոնային հերթում կա 2 233 ավտոմեքենա, որոնցից 150-ը գտնվում է կանաչ գոտում։ Հյուսիսային Օսիայի արտակարգ իրավիճակների նախարարության տվյալներով՝ ավելի վաղ Վրաստանի տարածքում եղանակային պայմանների վատթարացման պատճառով Վլադիկավկազ–Լարս հատվածում ապրիլի 5-ից 6-ն արգելվել է մեծաբեռնատար փոխադրամիջոցների երթևեկությունը Ռուսաստանի Դաշնությունից ելքի ուղղությամբ: Ռազմավիրական ճանապարհը տանում է Վլադիկավկազից Թբիլիսի Գլխավոր Կովկասյան լեռնաշղթայով՝ Ռուսաստանը կապելով Վրաստանի և Անդրկովկասի մնացած երկրների հետ։ Ռուսաստանի հատվածում մայրուղին անցնում է Հյուսիսային Օսիայի տարածքով։

16:29 - 09 ապրիլի, 2024