Ինֆոթեգեր Մեր մասին
hy en ru
Նվիրաբերել

Չինաստան

Չինաստանը (ամբողջական անունը՝ Չինաստանի Ժողովրդական Հանրապետություն) սոցիալիստական պետություն է Ասիայի արեւելքում։ Տարածքով (9,6 մլն կմ2) ամենամեծ երկիրն է արեւելյան Ասիայում եւ, ըստ տարբեր հաշվարկների, երրորդը կամ չորրորդն աշխարհում։ Բնակչության թվով ամենախոշոր երկիրն է՝ 1.294,4 մլրդ մարդ։ Պետությունը ղեկավարվում է կոմունիստական կուսակցության կողմից։ Մայրաքաղաքը Պեկինն է։

Չինաստանը բաղկացած է 22 գավառներից, 5 ինքնավար շրջաններից, 4 ուղիղ-ղեկավարվող քաղաքներից, 2 գրեթե ինքնավար քաղաքներից (Հոնկոնգ եւ Մակաո) եւ իր սուվերենությունը պնդող Թայվանից։

ՉԺՀ-ի նախագահը համարվում է պետության գլխավորը եւ հանդես է գալիս Չինաստանի ազգային կոնգրեսի անունից: Երկրի գործող նախագահն է Սի Ցզինպինը, որը միեւնույն ժամանակ Չինաստանի կոմունիստական կուսակցության գլխավոր քարտուղարն է, եւ Չինաստանի կենտրոնական ռազմական խորհրդի նախագահն է, որոնցով նա հանդիսանում է Չինաստանի գլխավոր առաջնորդ։


Վահե Գևորգյանը նշանակվել է Չինաստանում Հայաստանի դեսպան

Վահե Գևորգյանը նշանակվել է Չինաստանում Հայաստանի դեսպան

Հայաստանի Հանրապետության նախագահ Վահագն Խաչատուրյանը հրամանագիր է ստորագրել Վահե Գևորգյանին Չինաստանի Ժողովրդական հանրապետությունում Հայաստանի Հանրապետության արտակարգ և լիազոր դեսպան նշանակելու մասին:   «Հիմք ընդունելով վարչապետի առաջարկությունը` համաձայն Սահմանադրության 132-րդ հոդվածի 1-ին մասի 2-րդ կետի և «Դիվանագիտական ծառայության մասին» օրենքի 13-րդ հոդվածի 3-րդ մասի և 14-րդ հոդվածի. Վահե Գևորգյանին նշանակել Չինաստանի Ժողովրդական Հանրապետությունում Հայաստանի Հանրապետության արտակարգ և լիազոր դեսպան (նստավայրը՝ Պեկին)»,- ասված է հրամանագրի մեջ։ Նախագահի մեկ այլ հրամանագրով Սերգեյ Մանասարյանը հետ է կանչվել Չինաստանի Ժողովրդական Հանրապետությունում, Թաիլանդի Թագավորությունում և Մոնղոլիայում Հայաստանի Հանրապետության արտակարգ և լիազոր դեսպանի պաշտոնից: «Հիմք ընդունելով վարչապետի առաջարկությունը` համաձայն Սահմանադրության 132-րդ հոդվածի 1-ին մասի 2-րդ կետի և «Դիվանագիտական ծառայության մասին» օրենքի 14-րդ հոդվածի. Սերգեյ Մանասարյանին հետ կանչել Չինաստանի Ժողովրդական Հանրապետությունում, Թաիլանդի Թագավորությունում և Մոնղոլիայում Հայաստանի Հանրապետության արտակարգ և լիազոր դեսպանի պաշտոնից»,- նշված է հրամանագրում: Հիշեցնենք, որ վարչապետ Նիկոլ Փաշինյանը հունվարի 10-ին որոշում էր ստորագրել, ըստ որի՝ Վահե Գևորգյանն ազատվել էր ԱԳ նախարարի տեղակալի պաշտոնից:
16:59 - 11 հունվարի, 2024
Լավրովը հեռախոսազրույց է ունեցել Չինաստանի ԱԳ նախարարի հետ |shantnews.am|

Լավրովը հեռախոսազրույց է ունեցել Չինաստանի ԱԳ նախարարի հետ |shantnews.am|

shantnews.am: Ռուսաստանի Դաշնության և Չինաստանի Ժողովրդական Հանրապետության արտաքին գործերի նախարարներ Սերգեյ Լավրովը և Վան Ին հեռախոսով քննարկել են երկու երկրների միջև ամենաբարձր մակարդակներով առաջիկա շփումները։ «Նախարարները դիտարկել են ամենաբարձր մակարդակներով առաջիկա շփումների ժամանակացույցը»,- ասվում է ՌԴ ԱԳՆ հայտարարության մեջ։ Զրույցի ընթացքում կողմերն ամփոփել և բարձր են գնահատել 2023 թվականի երկկողմ համագործակցության հիմնական արդյունքները։ «Արտաքին գործերի գերատեսչությունների ղեկավարներն ամփոփել և բարձր են գնահատել 2023 թվականի փոխգործակցության հիմնական արդյունքները, գոհունակություն հայտնել երկկողմ քաղաքական երկխոսության և գործնական համագործակցության զարգացման բարձր տեմպերի կապակցությամբ, որոնք ցույց են տալիս կայունություն և դրական դինամիկա ընդհանուր աշխարհաքաղաքական անկայունության համատեքստում»,- ասվում է ՌԴ ԱԳՆ հաղորդագրության մեջ:
21:37 - 10 հունվարի, 2024
Թայվանի հետ վերամիավորումը անխուսափելի է. Սի Ծինփին |azatutyun.am|

Թայվանի հետ վերամիավորումը անխուսափելի է. Սի Ծինփին |azatutyun.am|

azatutyun.am: Թայվանի և Չինաստանի Ժողովրդական Հանրապետության վերամիավորումը անխուսափելի է։ Իր ամանորյա ուղերձում հայտարարել է Չինաստանի նախագահ Սի Ծինփինը։ «Հայրենիքի վերամիավորումը պատմականորեն անխուսափելի է։ Թայվանի նեղուցի երկու կողմերում ապրող հայրենակիցները պետք է նույն նպատակներն ունենան և կիսեն չինացի ժողովրդի վերածննդի փառքը»,- հայտարարել է Սի Ծինփինը։ Չինաստանի ղեկավարի հայտարարությունը հնչել է Թայվանում կայանալիք նախագահական ընտրություններից մոտ երկու շաբաթ առաջ: Հունվարի 13-ին կայանալիք ընտրություններում հիմնական պայքարը ծավալվելու է Պեկինի հետ կառուցողական հարաբերություններ հաստատելու և Թայվանը՝ անկախ պետություն հռչակելու կողմնակիցների միջև։
16:51 - 01 հունվարի, 2024
ՀՀ վարչապետը ցավակցական հեռագիր է հղել ՉԺՀ նախագահին

ՀՀ վարչապետը ցավակցական հեռագիր է հղել ՉԺՀ նախագահին

Վարչապետ Նիկոլ Փաշինյանը ցավակցական հեռագիր է հղել Չինաստանի Ժողովրդական Հանրապետության նախագահ Սի Ծինփինին՝ Չինաստանի հյուսիսարևմտյան Գանսու և Ցինհայ նահանգներում տեղի ունեցած ավերիչ երկրաշարժի կապակցությամբ: Ինչպես  տեղեկացրին ՀՀ վարչապետի աշխատակազմից, Նիկոլ Փաշինյանի հեռագրում նշված է. «Խոր ցավով տեղեկացա Չինաստանի հյուսիսարևմտյան Գանսու և Ցինհայ նահանգներում տեղի ունեցած ավերիչ երկրաշարժի մասին, որը դարձել է մեծաթիվ մարդկային զոհերի և ավերածությունների պատճառ: Հայաստանի Հանրապետության կառավարության և անձամբ իմ անունից անկեղծ ցավակցություն ու զորակցություն եմ հայտնում զոհվածների հարազատներին և մերձավորներին՝ մաղթելով համբերություն և ոգու տոկունություն, իսկ բոլոր վիրավորներին՝ շուտափույթ ապաքինում»:
18:54 - 19 դեկտեմբերի, 2023
Չինաստանում ուժգին երկրաշարժի հետևանքով զոհերի թիվը հասել է 118-ի |1lurer.am|

Չինաստանում ուժգին երկրաշարժի հետևանքով զոհերի թիվը հասել է 118-ի |1lurer.am|

1lurer.am: Չինաստանի հյուսիս-արևմուտքում երկրաշարժի հետևանքով զոհերի թիվն ավելացել է՝ հասնելով 118-ի: Այդ մասին հայտնում է Չինաստանի կենտրոնական հեռուստատեսությունը: 6,2 մագնիտուդով երկրաշարժը տեղի է ունեցել երկուշաբթի օրը՝ ժամը 23.59-ին, Հանսյու նահանգի հյուսիսարևմտյան մասում և Ցինհայ նահանգում: Ավելի վաղ հաղորդվում էր 111 զոհի մասին: Նշվում է, որ աղետի շրջանում վնասվել են ջրամատակարարման, էլեկտրամատակարարման որոշ օբյեկտներ, տուժել են տրանսպորտի, կապի և այլ ենթակառուցվածքներ: Չինաստանի արտակարգ իրավիճակների նախարարության տվյալներով՝ երկրաշարժի տարածքում ներգրավված է 1440 հրշեջ և փրկարար։
10:22 - 19 դեկտեմբերի, 2023
Նարեկ Մկրտչյանը հանդիպում է ունեցել «Սուն Չին Լին» հիմնադրամի փոխնախագահ Շեն Բեյլիի հետ

Նարեկ Մկրտչյանը հանդիպում է ունեցել «Սուն Չին Լին» հիմնադրամի փոխնախագահ Շեն Բեյլիի հետ

ՉԺՀ կատարած աշխատանքային այցի ընթացքում Աշխատանքի և սոցիալական հարցերի նախարար Նարեկ Մկրտչյանը հանդիպում է ունեցել «Սուն Չին Լին» հիմնադրամի փոխնախագահ, կուսակցական խմբի քարտուղար Շեն Բեյլիի հետ։ Հանդիպմանը մասնակցել են նաև Չինաստանում ՀՀ դեսպան Սերգեյ Մանասարյանը և Միասնական սոցիալական ծառայության պետ Էդուարդ Պետրոսյանը։ Նախարար Մկրտչյանը ներկայացրել է Աշխատանքի և սոցիալական հարցերի նախարարության գործառույթներն ու ոլորտային առաջնահերթությունները՝ մանրամասնելով նաև նախատեսվող ծրագրերը։ Նախարարը բարձր է գնահատել հայ-չինական բարեկամական հարաբերությունների դերը և ընդգծել երկու երկրների միջև քաղաքակրթական կապի ու ընդհանրությունների կարևորությունը։ Շեն Բեյլին նշել է, որ թեև իրենց կառույցը Հայաստանի հետ ուղիղ համագործակցություն չունի, սակայն վստահ է, որ տվյալ հանդիպումը հայկական կողմի հետ համատեղ արդյունավետ ծրագրերի իրականացման նոր խթան կհանդիսանա։ Վերջինիս խոսքով՝ հիմնադրամի կողմից իրականացվող աշխատանքների առանցքում երեխաներին և երիտասարդներին ցերեկային ծառայությունների տրամադրումն է, ինչպես նաև տարբեր երկրների երիտասարդների միջև կապի ստեղծումը։ Շուրջ 90,000 քառ․ մ տարածք ունեցող կենտրոնը երեխաների դաստիարակման և զարգացման ամենամասշաբային համալիրն է․ այն սպասարկում է տարեկան միջինում 1 մլն երեխայի։ Կառույցը շուրջ 1000 աշխատակից ունի, տրամադրում է հարյուրավոր ծառայություններ՝ շաբաթական շուրջ 6000 երեխայի։ Նախարար Մկրտչյանի հետ զրույցում Շեն Բեյլին նշել է, որ հիմնադրամը պատրաստ է իր հարկի ներքո ընդունել նաև հայ երեխաներին, ինչպես նաև դիտարկել հաշմանդամություն ունեցող և սոցիալապես անապահով երեխաներին ուղղված ծրագրերի իրականացման հնարավորությունը։ Այս համատեքստում քննարկվել է նաև համատեղ հուշագիր կնքելու հնարավորությունը, որը թույլ կտա նախատեսվող համագործակցությունը դարձնել առավել համակարգված և կառուցողական։ Տիկին Բեյլին պատրաստակամություն է հայտնել դիտարկել Հայաստանում գործունեություն իրականացնելու հնարավորությունը, ինչպես նաև համագործակցել հայկական մասնավոր հիմնադրամների հետ։ Հանդիպման ավարտին նախարար Մկրտչյանը շրջել է կենտրոնի տարածքում, ծանոթացել երեխաներին մատուցվող ծառայությունների շրջանակին և առանձնահատկություններին, շփվել նրանց հետ։
11:21 - 01 դեկտեմբերի, 2023
Չինաստանը հետաքրքրված է ՀՀ դատախազության հետ համագործակցությամբ. գլխավոր դատախազն ընդունել է Հայաստանում Չինաստանի դեսպանին

Չինաստանը հետաքրքրված է ՀՀ դատախազության հետ համագործակցությամբ. գլխավոր դատախազն ընդունել է Հայաստանում Չինաստանի դեսպանին

Հայաստանի Հանրապետության գլխավոր դատախազ Աննա Վարդապետյանը նոյեմբերի 24-ին ընդունել է ՀՀ-ում Չինաստանի Ժողովրդական Հանրապետության դեսպան Ֆան Յունի գլխավորած պատվիրակությանը: ՀՀ գլխավոր դատախազությունից հայտնում են, որ Աննա Վարդապետյանը կարևորել է նման ձևաչափով աշխատանքային հանդիպումների կազմակերպումը՝ ի նպաստ երկու երկրների իրավապահ մարմինների արդյունավետ համագործակցության: Դեսպան Ֆան Յունն ընդգծել է, որ Չինաստանը հետաքրքրված է ՀՀ գլխավոր դատախազության հետ ուղիղ համագործակցությամբ, որը, ի թիվս այլնի, կընդգրկի երկու երկրների դատախազությունների միջև փորձի փոխանակման ծրագրերի իրականացումը: Դեսպանի հետ զրույցում Հանրապետության գլխավոր դատախազը ներկայացրել է Դատախազության առաջնահերթությունները՝ ուղղված կոռուպցիայի դեմ պայքարին, ապօրինի ծագում ունեցող գույքի բռնագանձմանն ու պետական շահերի պաշտպանությանը: Հանդիպման ընթացքում կողմերը քննարկել են իրավական փոխօգնության շրջանակում երկու երկրների դատախազությունների համագործակցությունը զարգացնելու հեռանկարները:
17:15 - 24 նոյեմբերի, 2023
Սի Ծինփինը և Էմանուել Մակրոնը հեռախոսազրույց են ունեցել |armenpress.am|

Սի Ծինփինը և Էմանուել Մակրոնը հեռախոսազրույց են ունեցել |armenpress.am|

armenpress.am: Չինաստանի ղեկավար Սի Ծինփինը և Ֆրանսիայի նախագահ Էմանուել Մակրոնը հեռախոսազրույցի ընթացքում քննարկել են երկկողմ համագործակցության մի շարք հարցեր, ինչպես նաև Գազայի հատվածում տիրող իրադրությունը։ Reuters գործակալությունը հաղորդում է, որ Ծինփինը Մակրոնին հայտնել է, որ ցանկանում է ֆրանսիական ընկերությունների կողմից ավելի շատ ներդրումներ Չինաստանում։ Նա նաև հույս է հայտնել, որ Ֆրանսիան արդար և ոչ խտրական միջավայր կստեղծի չինական ընկերությունների համար։ Բացի այդ, Սի Ծինփինը հայտնել է, որ Չինաստանը ցանկանում է ամրապնդել համագործակցությունը Ֆրանսիայի հետ ՄԱԿ-ում և այլ բազմակողմ կազմակերպություններում։ Ի դեպ, Չինաստանն այս ամիս ստանձնել է ՄԱԿ-ի անվտանգության խորհրդի նախագահությունը։ Չինաստանի ղեկավարը Ֆրանսիայի նախագահին նաև կոչ է արել ավելի կառուցողական դեր կատարել Չինաստան-ԵՄ հարաբերությունների դրական զարգացման հարցում։ Երկու ղեկավարները նաև տեսակետներ են փոխանակել Գազայի հատվածում ընթացող հակամարտության վերաբերյալ և համաձայնել են, որ չպետք է թույլ տալ իրավիճակի վատթարացում, հատկապես՝ հումանիտար ճգնաժամի խորացում։ Կողմերը նաև համակարծիք են այն հարցում, որ պաղեստինաիսրայելական հակամարտության լուծման ճանապարհը երկու պետությունների ստեղծումն է։
17:11 - 20 նոյեմբերի, 2023
30 նոր ավտոբուսների խմբաքանակն արդեն Չինաստանից ուղևորվել է Հայաստան |armenpress.am|

30 նոր ավտոբուսների խմբաքանակն արդեն Չինաստանից ուղևորվել է Հայաստան |armenpress.am|

armenpress.am: Երևան քաղաքի ավտոբուսների շարժակազմը շուտով կհամալրվի ևս 30-ով։ Այն ընկերությունը, որն արդեն մատակարարել է «Ժոնգ Թոնգ» մակնիշի 150 ավտոբուս, բանակցությունների արդյունքում համաձայնել է ևս 30 նոր ավտոբուս մատակարարել նույն պայմանագրի գնով։ Այսինքն՝ առանց գործող գնի փոփոխության, կմատակարարվի ևս 30 ավտոբուս։ «Արմենպրես»-ի հետ զրույցում Երևանի քաղաքապետարանի տրանսպորտի վարչության պետ Վազգեն Հարությունյանը նշեց, որ ավտոբուսների այդ խմբաքանակը Չինաստանից դուրս է եկել և ճանապարհին է։ Ակնկալվում է, որ մինչև փետրվար ավտոբուսները կլինեն Հայաստանում։   «Նախատեսվում է նաև նոր մրցույթ անցկացնել, որով ևս 171 հատ 8,5 մ երկարությամբ նոր շարժակազմ ձեռք կբերվի։ Ակնկալում ենք, որ մրցույթը կկայանա, կունենանք հաղթող մասնակից։ Այդ դեպքում մատակարարման ժամկետը սահմանված է 6 ամիս, և մինչև 2024 թվականի օգոստոս կունենանք ևս 171 ավտոբուս»,- ասաց Վազգեն Հարությունյանը։ Նշված շարժակազմը պլանավորվում է կիրառել գործող երթուղիներում։ Մասնավորապես, կփոխարինվեն շարժակազմում առկա մանուշակագույն ավտոբուսները, որոնք հին են։ Նոր ձեռք բերված շարժակազմի մի մասը կհամալրի տվյալ երթուղիները, որով կբարձրացվի սպասարկման որակը։ «Դրանի բացի, Երևանում ունենք տեղեր, որտեղ տրանսպորտի հասանելիությունը շատ ցածր մակարդակի վրա է։ Պլանավորվում է 1-2 երթուղի ևս կազմակերպել՝ ծածկույթն ավելացնելու մասով։ Ասեմ, որ ներկայում բանակցություններ են տարվում Վերակառուցման և զարգացման եվրոպական բանկի հետ ֆինանսական միջոցներ ներգրավելու նպատակով։ Դրական արդյունքի դեպքում, պլանավորվում է ձեռք բերել 259 հատ 18 մետր երկարությամբ նոր ավտոբուսներ։ Այս մասով ժամկետները հստակ չեն, սակայն ակտիվորեն աշխատանքները տարվում են»,- ասաց Վազգեն Հարությունյանը։ Տրանսպորտի վարչության պետը նշեց, որ կատարում են ամենօրյա մշտադիտարկում, վերհանում են խնդիրները, ուշադրություն են դարձնում քաղաքացիների բողոքներին։ Հիմնական բողոքները որոշ երթուղիների ուշ հաճախականության հետ է կապված։ Վազգեն Հարությունյանի խոսքով՝ դա պայմանավորված է երկու հիմնական խնդրով՝ չի շահագործվում պահանջվող խմբաքանակը, առկա են խցանումներ։ «Առաջին խնդրի դեպքում աշխատանքներ են տարվում շարժակազմը համալրելու ուղղությամբ, երկրորդ խնդրի դեպքում մշակվել է գործողությունների ծրագիր, որը միտված է քաղաքի կենտրոնը բեռնաթափելուն։ Այդ ուղղությամբ առաջին քայլը կատարվել է, արդեն արգելվում է բեռնատարների մուտքը կենտրոն։ Դրանից բացի, շարունակում ենք իրականացնել ավտոբուսների համար գծերի առանձնացման աշխատանքները, ինչպես գիտեք արդեն Հերացի փողոցը կահավորվել է, և այդ գործընթացը շարունակվելու է»,- ասաց Վազգեն Հարությունյանն՝ ավելացնելով, որ սա ուղիղ կապված է ավտոբուսի չվացուցակը ճշգրտորեն պահպանելու հետ։
10:08 - 20 նոյեմբերի, 2023
Կողմերին հաջողվել է հասնել «կարևոր առաջընթացի». հայտնի են՝ Բայդեն-Սի բանակցությունների արդյունքները |tert.am|

Կողմերին հաջողվել է հասնել «կարևոր առաջընթացի». հայտնի են՝ Բայդեն-Սի բանակցությունների արդյունքները |tert.am|

tert.am: ԱՄՆ նախագահ Ջո Բայդենը Չինաստանի ղեկավար Սի Ծինփինի հետ հանդիպումը համարել է ամենակառուցողականներից մեկը և ասել, որ կողմերին հաջողվել է հասնել «կարևոր առաջընթացի», գրում է ՏԱՍՍ-ը:«Կարծում եմ, որ սա մեր ամենակառուցողական և արդյունավետ քննարկումներից մեկն էր... Մեր հանդիպումները միշտ եղել են բավականին անկեղծ, մենք ամեն ինչի շուրջ համաձայնության չենք եկել, բայց դրանք եղել են անկեղծ քննարկումներ.... Բայց այսօր, կարծում եմ, մենք կարևոր առաջընթաց ենք գրանցել», - հայտարարել է Բայդենը Սան Ֆրանցիսկոյում APEC-ի գագաթնաժողովի շրջանակներում կայացած մամուլի ասուլիսում։Նա մանրամասնել է, որ ԱՄՆ-ն և Չինաստանը վերսկսում են համագործակցությունը թմրանյութերի դեմ պայքարում։«Նախևառաջ, ես ուրախ եմ հայտարարել, որ երկար տարիների ընդմիջումից հետո մենք վերականգնում ենք համագործակցությունը Միացյալ Նահանգների և Չինաստանի Ժողովրդական Հանրապետության միջև թմրանյութերի դեմ պայքարում: Մենք քայլեր ենք ձեռնարկում զգալիորեն նվազեցնելու թմրանյութերի, քիմիական նյութերի հոսքը Չինաստանից արևմտյան կիսագնդեր: Այս պայքարը կյանքեր կփրկի: Եվ ես բարձր եմ գնահատում Սի Ծինփինի հանձնառությունն այս հարցում», - ասել է Բայդենը:ԱՄՆ-ն և Չինաստանը նաև պայմանավորվել են վերսկսել ուղիղ ռազմական շփումները և բարձր մակարդակով երկխոսությունը երկու երկրների զինվորականների միջև։«Չափազանց կարևոր է, որ մենք վերսկսենք ուղիղ ռազմական շփումները», - ասել է Բայդենը:«Կողմերի թյուրըմբռնումները կարող են հանգեցնել իրական խնդիրների այնպիսի պետության հետ, ինչպիսին է Չինաստանն է կամ որևէ այլ մեծ երկիր, այնպես որ, ես կարծում եմ, որ մենք իրական առաջընթաց ենք գրանցել այս տիրույթում», - շարունակել է Բայդենը:Նշվում է, որ ղեկավարները պայմանավորվել են հավասարության և հարգանքի սկզբունքների հիման վրա վերականգնել բարձր մակարդակի հաղորդակցությունը երկու երկրի զինված ուժերի միջև, վերսկսել Չինաստանի Ժողովրդական Հանրապետության և Միացյալ Նահանգների պաշտպանության նախարարների աշխատանքային հանդիպումները:ՉԺՀ-ն և Միացյալ Նահանգները պայմանավորվել են փորձագիտական մակարդակով քննարկել արհեստական բանականության ոլորտում զարգացումներին առնչվող անվտանգային հարցեր։«Մենք նախատեսում ենք հավաքել մեր (ամերիկացի և չինացի) փորձագետներին՝ քննարկելու արհեստական բանականության ոլորտում ռիսկի և անվտանգության հետ կապված հարցեր... Գրեթե ամենուր, որտեղ ես գնում եմ ամբողջ աշխարհում, յուրաքանչյուր խոշոր առաջնորդ ցանկանում է քննարկել արհեստական բանականության ազդեցությունը»,- ասել է ԱՄՆ նախագահը։Ուկրաինայի, Գազայի և Թայվանի մասինԲացի այդ, Բայդենն ասել է, որ Սի Ծինփինի հետ քննարկել է Ուկրաինայի և Գազայի շուրջ ստեղծված իրավիճակը, սակայն մանրամասներ չի հայտնել։ Ավելի մանրամասն` tert.am-ում։ 
11:09 - 16 նոյեմբերի, 2023
ԱՄՆ-ն պատժամիջոցներ է սահմանել Թուրքիայի, Չինաստանի և ԱՄԷ 130 կազմակերպությունների ու անձանց նկատմամբ |azatutyun.am|

ԱՄՆ-ն պատժամիջոցներ է սահմանել Թուրքիայի, Չինաստանի և ԱՄԷ 130 կազմակերպությունների ու անձանց նկատմամբ |azatutyun.am|

azatutyun.am: Միացյալ Նահանգների ֆինանսների նախարարությունն այսօր պատժամիջոցներ է սահմանել Թուրքիայի, Չինաստանի և Արաբական Միացյալ Էմիրությունների 130 կազմակերպությունների ու անձանց նկատմամբ, որոնք, ըստ Վաշինգտոնի, Ռուսաստանին տրամադրում են Ուկրաինայի դեմ պատերազմի համար անհրաժեշտ տեխնոլոգիաներ և սարքավորումներ երրորդ երկրներից: Պատժամիջոցները թիրախավորում են նաև Ռուսաստանի ներքին արդյունաբերական բազան, որը, ըստ ԱՄՆ ֆինանսների նախարարության արտաքին ակտիվների վերահսկման գրասենյակի մամուլի հաղորդագրության, ձգտում է վերափոխվել «որպես Ռուսաստանի ռազմական մեքենայի պահպանող»: Նախարարությունը հայտարարել է, որ պատժամիջոցների սահմանումը շարունակում է ջանքերը՝ «խաթարելու այն ցանցերը և ուղիները, որոնց միջոցով Ռուսաստանը փորձում է պահպանել իր շրջափակված բանակը»: Բացի այդ, Պետդեպարտամենտը դիվանագիտական պատժամիջոցներ է սահմանել Ռուսաստանի էներգիայի արտադրության և մետաղների ու հանքարդյունաբերության ոլորտների նկատմամբ:
22:10 - 02 նոյեմբերի, 2023
Սուրեն Պապիկյանը և ՉԺՀ ռազմական խորհրդի նախագահի տեղակալը քննարկել են պաշտպանության բնագավառում համագործակցության հարցեր

Սուրեն Պապիկյանը և ՉԺՀ ռազմական խորհրդի նախագահի տեղակալը քննարկել են պաշտպանության բնագավառում համագործակցության հարցեր

Չինաստանի Ժողովրդական Հանրապետություն այցի շրջանակում Հայաստանի Հանրապետության պաշտպանության նախարար Սուրեն Պապիկյանը հանդիպել է ՉԺՀ կենտրոնական ռազմական խորհրդի նախագահի տեղակալ, ՉԺՀ կոմունիստական կուսակցության քաղաքական բյուրոյի անդամ, գեներալ-գնդապետ Խը Ուեյդոնի հետ:   Քննարկվել են պաշտպանության բնագավառում համագործակցությանը և դրա զարգացման հնարավորություններին առնչվող մի շարք հարցեր։   Երկուստեք ընդգծվել է մի շարք ոլորտներում  համագործակցության ընդլայնման մեծ ներուժը։
19:02 - 30 հոկտեմբերի, 2023
Պապիկյանը Պեկինում մասնակցել է Սյանշանի 10-րդ համաժողովի բացման հանդիսավոր արարողությանը և լիագումար նիստին

Պապիկյանը Պեկինում մասնակցել է Սյանշանի 10-րդ համաժողովի բացման հանդիսավոր արարողությանը և լիագումար նիստին

Չինաստան այցի շրջանակում ՀՀ պաշտպանության նախարար Սուրեն Պապիկյանը հոկտեմբերի 30-ին մասնակցել է Պեկինի Սյանշանի 10-րդ համաժողովի բացման հանդիսավոր արարողությանը և լիագումար նիստին: Այս մասին հայտնում են ՀՀ ՊՆ-ից։ 
10:37 - 30 հոկտեմբերի, 2023
Ադրբեջանի պաշտպանության նախարարը ևս մեկնել է Չինաստան |azatutyun.am|

Ադրբեջանի պաշտպանության նախարարը ևս մեկնել է Չինաստան |azatutyun.am|

azatutyun.am: Ադրբեջանի պաշտպանության նախարար Զաքիր Հասանովը աշխատանքային այցով գտնվում է Չինաստանում՝ մասնակցելու Պեկինի Սյանշանի 10-րդ համաժողովին, հայտնում է Ադրբեջանի ՊՆ-ն։ Այցի շրջանակներում նախատեսված են նախարարի հանդիպումները Չինաստանի ռազմական ղեկավարության հետ, հանդիպումներում նախատեսվում է քննարկել ռազմական, ռազմատեխնիկական և այլ ոլորտներում երկկողմ համագործակցության զարգացման հեռանկարները, ասված է հաղորդագրության մեջ։ Չինաստան է մեկնել նաև Հայաստանի պաշտպանության նախարար Սուրեն Պապիկյանը։
19:36 - 29 հոկտեմբերի, 2023
Սուրեն Պապիկյանն աշխատանքային այցով մեկնել է Չինաստան

Սուրեն Պապիկյանն աշխատանքային այցով մեկնել է Չինաստան

Հոկտեմբերի 29-ին ՀՀ պաշտպանության նախարար Սուրեն Պապիկյանի գլխավորած պատվիրակությունն աշխատանքային այցով մեկնել է Չինաստանի Ժողովրդական Հանրապետություն: Այդ մասին հայտնում են ՀՀ ՊՆ-ից։
14:50 - 29 հոկտեմբերի, 2023
Վարչապետ Փաշինյանը ցավակցական հեռագիր է հղել Լի Քեցյանի մահվան կապակցությամբ

Վարչապետ Փաշինյանը ցավակցական հեռագիր է հղել Լի Քեցյանի մահվան կապակցությամբ

Վարչապետ Նիկոլ Փաշինյանը ցավակցական հեռագիր է հղել Չինաստանի Ժողովրդական Հանրապետության Պետական Խորհրդի վարչապետ Լի Ցյանին՝ Չինաստանի 7-րդ վարչապետ Լի Քեցյանի մահվան կապակցությամբ: Այս մասին հաղորդագրություն է տարածել ՀՀ վարչապետի աշխատակազմը։ Հեռագրում ասված է. «Ձերդ Գերազանցություն, խորը կսկիծով տեղեկացա Չինաստանի Ժողովրդական Հանրապետության Պետական Խորհրդի 7-րդ վարչապետ Լի Քեցյանի մահվան մասին։  Պարոն Լի Քեցյանի օրոք Չինաստանի Ժողովրդական Հանրապետությունն ու չին ժողովուրդն ականատես են եղել աննախադեպ տնտեսական վերելքների և ձեռքբերումների։ Վստահ եմ, որ նրա բարի անունն ու հիշատակը վառ կմնան բոլորի սրտերում։  Հայ ժողովրդի և ՀՀ կառավարության անունից մեր խորին ցավակցություններն ու զորակցություն ենք հղում Ձեզ և Չինաստանի բարեկամ ժողովրդին՝ տոկունություն և ոգու ամրություն մաղթելով պարոն Լի Քեցյանի ընտանիքին և մերձավորներին»: 
15:12 - 27 հոկտեմբերի, 2023