Մեծ յոթնյակ

G7 երկրները համատեղ պայքարում են համաշխարհային տնտեսությունում առկա ճգնաժամի դեմ․ Շոլց

«Մեծ յոթնյակի» (G7) երկրների առաջնորդները համատեղ պայքար են մղում համաշխարհային տնտեսությունում իրավիճակի վատթարացման դեմ, DW-ի փոխանցմամբ՝ հայտարարել է Գերմանիայի կանցլեր Օլաֆ Շոլցը գերմանական Էլմաու ամրոցում աշխատանքային նիստից հետո, որը նվիրված էր գլոբալ ֆինանսական հարցերին։ «G7-ի բոլոր անդամները մտահոգություն ունեն ճգնաժամերի առնչությամբ, որոնց հարկադրաբար բախվում ենք ներկա պահին», - ասել է նա՝ նշելով մի շարք երկրներում տնտեսական ճի տեմպերի նվազումը, գնաճի ավելացումը, հումքի պակասն ու մատակարարման շղթաներում խաթարումները։ Ըստ Շոլցի՝ խոսքը լուրջ խնդիրների մասին է։ «Այդ պատճառով էլ մենք նաև պետք է համատեղ պատասխանատվություն կրենք։ Սակայն ես մեծապես վստահ եմ, որ գագաթնաժողովի շրջանակում կհաջողվի միասնության և վճռականության շատ հստակ ազդակ հղել, - հավելել է քաղաքական գործիչը։ Նորա Վանյան

22:00 - 26 հունիսի, 2022

«Ավելի շատ պատժամիջոցներ և զենք է պետք»․ Ուկրաինայի ԱԳ նախարարը՝ G7 առաջնորդներին

Ուկրաինայի արտգործնախարար Դմիտրի Կուլեբան Կիևին հասցված հրթիռային հարվածներից հետո, որոնց հետևանքով, ուկրաինական կողմի տվյալներով, վնասվել է մեկ բնակելի շենք և մանկապարտեզ, «Մեծ յոթնյակի» (G7) երկրների առաջնորդներին կոչ է արել խստացնել ՌԴ դեմ պատժամիջոցները, հայտնում է «Ուկրաինսկայա պրավդա»-ն։ «Այս յոթնամյա երեխան հանգիստ քնած է եղել Կիևում, երբ ռուսական թևավոր հրթիռն ընկել է շենքի վրա»։ Դեռ հարվածի տակ են այսպիսի շատ երեխաներ ողջ Ուկրաինայի տարածքում։ G7 գագաթնաժողովը պետք է արձագանքի Ռուսաստանի դեմ նոր պատժամիջոցներով և ծանր սպառազինության մատակարարմամբ։ ՌԴ անառողջ իմպերիալիզմը պետք է պարտություն կրի», - գրել է նա Թվիթերում։ Նշենք, որ Բավարիայի (Գերմանիա) Էլմաու ամրոցում այսօր սկսվել է G7-ի առաջնորդների գագաթնաժողովը, այն անցկացվում է հունիսի 26-28-ը։ Հունիսի 29-30-ին Մադրիդում կայանալու է ՆԱՏՕ-ի գագաթնաժողովը։ Հետևե՛ք մեզ նաև Telegram -ում։ Նորա Վանյան

16:13 - 26 հունիսի, 2022

«Մեծ յոթնյակի» երկրները մտադիր են արգելել ռուսական ոսկու ներկրումը

«Մեծ յոթնյակի» (G7) երկրներն այսօր հայտարարել են ռուսական ոսկու ներկրումն արգելելու մտադրության մասին։ Մեծ Բրիտանիայի, ԱՄՆ, Ճապոնիայի և Կանադայի այս գործողությունները Մոսկվայի վրա պատժամիջոցների միջոցով ճնշում գործադրելու, Ուկրաինա ներխուժումը ֆինանսական միջոցներից զրկելուն ուղղված ջանքերի մի մասն են, գրում է Reuters-ը։ «Միջոցները, որոնց մասին հայտարարել ենք այսօր, ուղղակիորեն հարվածելու են ռուսաստանցի օլիգարխներին և խոցելու են Պուտինի ռազմական մեքենայի սիրտը։ Մենք պետք է Պուտինի ռեժիմին զրկենք ֆինանսավորումից», - ասել է Մեծ Բրիտանիայի վարչապետ Բորիս Ջոնսոնը։ ԱՄՆ վարչակազմի բարձրաստիճան ներկայացուցիչներից մեկի խոսքով՝ G7-ը ոսկու ներկրման արգելքի մասին պաշտոնական հայտարարություն կտարածի երեքշաբթի՝ հունիսի 28-ին։ «Սա Ռուսաստանի համար եկամտի առանցքային աղբյուր է համաշխարհային ֆինանսական համակարգի հետ գործարքների իրականացման հնարավորության առումով», - ասել է նա։ Մեծ Բրիտանիայի կառավարության տվյալներով՝ անցյալ տարի ռուսական ոսկու արտահանման արժեքը կազմել է 12,6 մլրդ ֆունտ ($15,45 մլրդ)։ Նորա Վանյան

15:22 - 26 հունիսի, 2022

«Մեծ յոթնյակի» 2023 թ-ի գագաթնաժողովը պլանավորվում է անցկացնել Ճապոնիայի Հիրոսիմա քաղաքում

Ճապոնիան, որն ընդունելու է «Մեծ յոթնյակի» (G7) 2023 թ-ի գագաթնաժողովը, մտադիր է այն անցկացնել Հիրոսիմա քաղաքում մայիսի երկրորդ կեսին, հայտնում է Kyodo պարբերականը՝ վկայակոչելով կառավարությունում իր աղբյուրները։ Ճապոնիայի կառավարությունը G7-ի երկրներին արդեն հայտնել է գագաթնաժողովը մայիսի վերջին անցկացնելու մտադրության մասին։ Երկիրը կներկայացնի դրա ժամանակացույցը այս տարի հունիսի 26-28-ը Գերմանիայի Էլմաու ամրոցում «Մեծ յոթնյակի» կայանալիք գագաթնաժողովին։ Ճապոնիայի վարչապետ Ֆումիո Կիսիդան ցանկանում է ցուցադրել ապամիջուկայնացման հարցերում G7-ի առաջնորդների հետ միասին ակտիվ մասնակցություն ունենալու իր վճռականությունը։ Հիրոսիմա քաղաքն աշխարհում առաջինն էր, որը միջուկային ռմբակոծման է ենթարկվել։ Այս քաղաքում գագաթնաժողովն անցկացնելու որոշումը կապված է Ուկրաինայում Ռուսաստանի տևական ներխուժման և վերջինիս կողմից միջուկային զենքի կիրառման սպառնալիքի հետ։ Նորա Վանյան

18:36 - 19 հունիսի, 2022

G7 երկրները որոշել են աստիճանաբար հրաժարվել ածխից՝ էլեկտրաէներգիայի արտադրման համար, բայց մանևրելու տեղ են թողել․ CNN

«Մեծ յոթնյակի» (G7) երկրներն այսօր համաձայնության են եկել մինչև 2035 թ-ը «մեծապես ապակարբոնացնել» էլեկտրաէներգիայի արտադրման ոլորտը։ Սա մի մեծ քայլ է, որն, ըստ փորձագետների, աշխարհին թույլ կտա կանխարգելել կլիմայի աղետալի փոփոխությունները, գրում է CNN-ը, որի հոդվածը ներկայացնում ենք կրճատումներով․ «G7 երկրների կլիմայի, էներգետիկայի և շրջակա միջավայրի նախարարները Բեռլինում կայացած հանդիպումն ամփոփող 40-էջանոց կոմյունիկեում նոր պարտավորություն են ստանձնել՝ վերջնականապես հրաժարվելու ածխի միջոցով էլեկտրաէներգիա արտադրելուց, սակայն վերջնաժամկետ չեն նշել։ Ապակարբոնացման մասին այս որոշումն, ամեն դեպքում, տեղ է թողնում, որ երկրները շարունակեն օգտագործել հանածո վառելիքը, եթե դրանցում ջերմոցային գազերի արտանետումը «նվազեցվում է»։ Սա նշանակում է, որ նրանք այրման հետևանքով ավելի քիչ արտանետումներ են ունենում։ Ժամանակակից տեխնոլոգիաները չեն կարող չեզոքացնել հանածո վառելիքի այրման հետևանքով արտանետվող ջերմոցային գազերի 100%-ը։ G7-ի երկրներն են ԱՄՆ-ն, Կանադան, Ֆրանսիան, Գերմանիան, Իտալիան, Ճապոնիան և Մեծ Բրտանիան: Էներգետիկ կամ կլիմայական հարցերով նրանց որոշումները հաճախ հետո ներկայացվում են ավելի լայն «Մեծ քսանյակի» (G20) երկրներին, որոնց բաժին է ընկնում ջերմոցային գազերի համաշխարհային արտանետումների 80%-ը։ G20 երկրները նոյեմբերին հանդիպելու են Բալիում։ Այս որոշումը կայացվել է ուկրաինական պատերազմի ֆոնին, որը սրել է էներգիայի՝ էկոլոգիապես ավելի մաքուր աղբյուրների անցնելու անհրաժեշտությունը, հատկապես՝ Եվրոպայում։ Կոմյունիկեում «Մեծ յոթնյակի» երկրները կոչ են արել չարգելափակել հանածո վառելիքի սուբսիդավորումը, որոնք նախատեսված են հակամարտության հետևանքների հաղթահարման համար։ «Այնուամենայնիվ, մենք ձգտում ենք նրան, որ աջակցության մեր միջոցները ժամանակավոր և թիրախային լինեն, և վերահաստատում ենք մեր որոշումը՝ չեղարկելու անարդյունավետ հանածո վառելիքի սուբսիդիաները մինչև 2025 թ-ը», - ասված է փաստաթղթում։ Կլիմայական և էներգետիկ հարցերի հետազոտական Ember խմբի գլխավոր գործառնական տնօրեն Ֆիլ Մակդոնալդն ասում է, որ այս որոշումը «փոխում է խաղի կանոնները»։ «Հետազոտությունները ցույց են տալիս, որ մինչև 2035 թ-ն էլեկտրաէներգիայի ապակարբոնացումը զրոյական մակարդակի հասնելու ամենաարագ և ամենաէժան ուղին է», - ասում է նա՝ նկատի ունենալով այն նպատակակետը, երբ աշխարհի երկրները հնարավորինս քիչ ջերմոցային գազեր արտանետեն և փոխհատուցեն այն արտանետումները, որոնցից հնարավոր չէ խուսափել։ Զարգացած երկրները ձգտում են զրոյական մակարդակի հասնել մինչև 2050 թ-ը։ ««Մեծ յոթնյակն» այսօր ճիշտ ուղղությամբ քայլ է կատարել՝ ժամկետ սահմանելով էլեկրաէներգիայի արտադրման ոլորտի զգալի ապակարբոնացման համար, - ասում է E3G վերլուծական կենտրոնի ավագ խորհրդական Մարիա Պաստուխովան։ - Սա կարևոր ազդակ է մնացած աշխարհի համար այն մասին, որ ներկայիս ճգնաժամն ու հանածո վառելիքի նոր մատակարարումների ապահովման ջանքերը ժամանակային սահմանափակում են ունենալու»»։ Նորա Վանյան

19:52 - 30 մայիսի, 2022

G7-ի բոլոր երկրները հավանություն են տվել հաջորդ գագաթնաժողովը Հիրոսիմայում անցկացնելու գաղափարին |armenpress.am|

armenpress.am: «Մեծ յոթնյակի» (G7) բոլոր երկրները հավանություն են տալիս հաջորդ գագաթնաժողովը Ճապոնիայի Հիրոսիմայում անցկացնելու գաղափարին: Մայիսի 23-ին այդ մասին լրագրողներին հայտնել է Ճապոնիայի նախարարների կաբինետի գլխավոր քարտուղար Հիրոկաձու Մացունոն: «Մենք նախապես ստացել ենք G7-ի բոլոր երկրների հավանությունը»,- նշել է նա: Ավելի վաղ եկող տարի «յոթնյակի» գագաթնաժողովը Հիրոսիմայում անցկացնելու մտադրության մասին հայտարարել է Ճապոնիայի վարչապետ Ֆումիո Կիսիդան: Նա ընդգծել է, որ առաջիկա գագաթնաժողովի կարեւոր թեմա կդառնա միջուկային զենքի կիրառման սպառնալիքների անթյուլատրելիությունը: «Չկա ավելի հարմար վայր նման քննարկման համար, քան Հիրոսիման»,- հայտարարել է վարչապետը ԱՄՆ-ի նախագահ Ջո Բայդենի հետ կայացած համատեղ մամուլի ասուլիսում, որը նույնպես հավանություն է տվել Կիսիդայի ընտրությանը: Հիրոսիմայի եւ Նագասակիի ատոմային ռմբակոծումներն իրականացվել են ԱՄՆ-ի զինված ուժերի կողմից Երկրորդ համաշխարհային պատերազմի ամենավերջում: Դրանց պաշտոնական նպատակն է հարապարակվել Ճապոնիայի կայսրության կապիտուլացման արագացումը: Այդ գրոհները դարձել են մարդկության պատմության մեջ միջուկային զենքի մարտական կիրառման միակ օրինակը: Միացյալ Նահանգնեը մինչեւ հիմա չի ընդունում իր բարոյական պատասխանատվությունը ատոմային ռմբակոծումների համար՝ դրանք արդարացնելով ռազմական անհրաժեշտությամբ: 2016 թվականին Հիրոսիմայում տեղի է ունեցել G7-ի ԱԳՆ ղեկավարների հանդիպումը: Նույն տարում քաղաք է ժամանել Բարաք Օբաման՝ դառնալով ԱՄՆ-ի առաջին գործող նախագահը, որն այցելել է Հիրոսիմա: Այնտեղ նա, մասնավորապես, եղել է Խաղաղության թանգարանում եւ հանդիպել ատոմային ռմբակոծումը տեսած ճապոնացիների հետ, հաղորդել է ՏԱՍՍ-ը:

15:26 - 23 մայիսի, 2022

Ճապոնիայի վարչապետը Բայդենին առաջարկել է G7-ի հաջորդ գագաթնաժողովն անցկացնել Հիրոսիմայում |tert.am|

tert.am: Ճապոնիայի վարչապետ Ֆումիո Կիսիդան ԱՄՆ նախագահ Ջո Բայդենին առաջարկել է G7-ի հաջորդ գագաթնաժողովն անցկացնել 1945 թվականին ԱՄՆ-ի ատոմային ռմբակոծությունից տուժած Հիրոսիմայում, գրում է ՏԱՍՍ գործակալությունը՝ Kyodo-ին հղումով։ Նշվում է, որ ԱՄՆ նախագահն իր աջակցությունն է հայտնել ճապոնական կառավարության ղեկավարի առաջարկին։

09:34 - 23 մայիսի, 2022

Գերմանիայի ԱԳ նախարարը խոսել է Ուկրաինայի ճգնաժամի պատճառով համաշխարհային սովի հնարավորության մասին |armenpress.am|

armenpress.am: Գերմանիայի արտաքին գործերի նախարար Աննալենա Բերբոկը կարծում է, որ Ուկրաինայում տիրող իրադրության պատճառով մոլորակի վրա կարող է համաշխարհային սով սկսվել: Այս մասին նա խոսել է Մեծ յոթնյակի երկրների ԱԳ նախարարների եռօրյա հանդիպման արդյունքներով հրավիրված ասուլիսի ժամանակ: «Ռուսաստանի գործողությունների պատճառով դադարեցվում են մատակարարումները, կտրուկ աճում են գները՝ ոչ միայն մեզ մոտ, այլև ողջ աշխարհում, և կա սաստիկ սովի վտանգ»,- հայտարարել է Բերբոկը: Նա նշել է, որ «Ռուսաստանը հող է նախապատրաստում նոր ճգնաժամերի համար»:

15:57 - 14 մայիսի, 2022

«Մեծ յոթնյակի» ԱԳ նախարարներն ընդգծել են, որ չեն ճանաչում Ուկրաինայի սահմանների փոփոխությունները |shantnews.am|

shantnews.am: Յոթնյակի (G7) երկրները (Մեծ Բրիտանիա, Գերմանիա, Իտալիա, Կանադա, ԱՄՆ, Ֆրանսիա և Ճապոնիա) ընդգծել են, որ չեն ճանաչում Ուկրաինայի սահմանների փոփոխությունները, փոխանցում է ՏԱՍՍ-ը: ««Մեծ յոթնյակի» երկրների արտգործնախարարները պնդում են, որ Ուկրաինային զենք կմատակարարեն «այնքան ժամանակ, քանի դեռ դա անհրաժեշտ է»,- այս մասին ասվում է Գերմանիայի հյուսիսում գտնվող Վանգելս կոմունայում եռօրյա հանդիպման արդյունքներով G7 երկրների արտգործնախարարների ընդունած համատեղ հայտարարության մեջ։ G7-ի արտգործնախարարները կարծում են, որ Ուկրաինայում իրավիճակը վատթարացրել է համաշխարհային տնտեսության զարգացման հեռանկարները։ Ուկրաինայում Ռուսաստանի գործողությունները, նրանց գնահատմամբ, «վատթարացրին համաշխարհային տնտեսության զարգացման հեռանկարները՝ հանգեցնելով պարենամթերքի, վառելիքի և էներգիայի գների աճին»։ Նախարարները Ռուսաստանին կոչ են արել վերջ տալ Ուկրաինայից «հացահատիկի արտահանման շրջափակմանը»։ «Սա կարող է լինել միայն առաջին քայլը»,- ասվում է հայտարարության մեջ։ Փաստաթղթում նշվում է, որ մոտ 43 միլիոն մարդ սովից մեկ քայլ է հեռու։ G7-ը Չինաստանին կոչ է անում նաև չօգնել Ռուսաստանին և չշրջանցել Մոսկվայի դեմ պատժամիջոցները։ Ռուսաստանի Դաշնության նախագահը ավելի վաղ ընդգծել էր, որ Ռուսաստանի դեմ արևմտյան պատժամիջոցները հարվածում են այն երկրների տնտեսություններին, որոնք դրանք պարտադրում են, ինչպես նաև հրահրում են համաշխարհային ճգնաժամ։

14:43 - 14 մայիսի, 2022

ԵՄ-ի՝ լրացուցիչ 500 մլն եվրոյի օգնությունն Ուկրաինային կհատկացվի տանկերի եւ հրետանու գնումների համար. Բորել |armenpress.am|

armenpress.am: Եվրամիության լրացուցիչ 500 միլին եվոյի օգնությունն Ուկրաինային Եվրոպայի Խաղաղության հիմնադրամից կհատկացվի ծանր սպառազինությունների՝ տանկերի եւ հրետանու գնման համար: Այդ մասին հայտարարել Է ԵՄ-ի արտաքին քաղաքական ծառայության ղեկավար Ժոզեպ Բորելը Յոթի խմբի (G7) ԱԳՆ ղեկավարների հանդիպմանը ժամանելուց հետո: «Սա G7-ի (ԱԳՆ ղեկավարների) արդեն յոթերորդ հանդիպումն Է ուկրաինական ճգնաժամն սկսվելուց ի վեր: Հանձնագիրը մնում Է նախկինը, ավելի շատ աջակցություն Ուկրաինային, ներառյալ ռազմականը: Ես հայտարարում եմ Ուկրաինայի համար 500 միլիոն եվոյի ռազմական օգնության տրամադրման մասին, ինչը մեր օգնությունը կհասցնի ընդհանուր առմամբ 2 միլիարդ եվրոյի»,- ասել Է Բորելը: Նա ճշտել Է, որ այդ միջոցներով «կգնվի ծանր սպառազինություն, այս պահին մենք արդեն ուղարկել ենք զրահամեքենաներ, տանկեր, հրետանի եւ ակեր»: Պատասխանելով այն հարցին, թե ԵՄ-ի երկրները կարո՞ղ են արդյոք ֆինանսավորել Ուկրաինային ռազմական ինքնաթիռների մատակարարումները, Բորելը հայտարարել Է. «Ո՛չ, 500 միլիոն եվորոյով չի կարելի շատ ինքնաթիռներ մատակարարել, այդ միջոցները կուղղորդվեն ծանր սպառազինությունների գնումներին, որոնք անհրաժեշտ են այդ տիպի պատերազմի համար»: Բորելը նաեւ G7-ի երկրներին կոչ Է արել ուժեղացնելու ճնշումը Ռուսաստանի վրա, սահմանելու նոր պատժամիջոցներ, փորձելու մեկուսացնել ՌԴ-ն համաշխարհային ասպարեզում եւ «ստեղծելու միասնական ճակատ Ուկրաինայի աջակցության համար»: Ապրիլին Բորելը հնչեցրել Է ԵՄ-ի դիրքորոշման արմատական փոփոխումն Ուկրաինայի ճգնաժամի նկատմամբ: Միության պատմության մեջ առաջին անգամ նա պաշտոնապես ոչ թե հակամարտության խաղաղ կարգավորման, այլ ռազմական լուծման, «մարտի դաշտում» Ռուսաստանի նկատմամբ հաղթանակի կոչ Է արել», հաղորդել Է ՏԱՍՍ-ը:

14:41 - 13 մայիսի, 2022

ՄԱԿ-ի Պարենի համաշխարհային ծրագրի ղեկավարը կոչով դիմել է Պուտինին |azatutyun.am|

azatutyun.am: ՄԱԿ-ի Պարենի համաշխարհային ծրագրի ղեկավար Դեյվիդ Բիզլին կոչ է արել Ռուսաստանի նախագահ Վլադիմիր Պուտինին՝ ապաշրջափակել Օդեսան և Ուկրաինայի այլ նավահանգիստներ՝ միլիոնավոր մարդկանց սովից փրկելու համար: «Միլիոնավոր մարդիկ ամբողջ աշխարհում կմահանան, քանի որ այս նավահանգիստները արգելափակված են», - CNN-ին ասել է Բիսլին: CNN-ը հիշեցնում է, հղում անելով ԱՄՆ գյուղատնտեսության նախարարությանը, որ Ուկրաինան եգիպտացորենի, ցորենի, վարսակի, արևածաղկի ձեթի և սերմերի աշխարհի առաջատար արտահանողներից մեկն է։ Պատերազմի սկզբից ռուսական նավատորմը գրավել է ուկրաինական նավահանգիստները Ազովի ծովում և փակել նավերի անցումը երկրի սևծովյան նավահանգիստներից։ Գերմանիայում այսօր սկսվում է երկօրյա հանդիպում, որտեղ G7-ի, Ուկրաինայի, Մոլդովայի և Ինդոնեզիայի արտգործնախարարները կքննարկեն պատերազմի պատճառով աշխարհում հացահատիկի պակասի դեմ պայքարի ուղիները, ինչպես նաև օգնությունն Ուկրաինային և Մոլդովային:

11:15 - 13 մայիսի, 2022

Մեծ յոթնյակի երկրներն աստիճանաբար կհրաժարվեն ռուսական նավթից, ԱՄՆ-ն պատժամիջոցներ է կիրառում «Գազպրոմբանկի» ղեկավարության դեմ

Մեծ Յոթնյակի երկրները կիրակի օրն անցկացված տեսակոնֆերանսի ժամանակ համաձայնության են եկել արգելել կամ աստիճանաբար հրաժարվել ռուսական նավթի ներկրումից, իսկ Միացյալ Նահանգները հայտարարել է ռուսական «Գազպրոմբանկի» ղեկավարության դեմ պատժամիջոցների սահմանման մասին՝ Ուկրաինայի դեմ պատերազմի համար Մոսկվային պատժելու նպատակով, գրում է Reuters-ը։ «Մենք համաձայնության ենք եկել աստիճանաբար չեղարկել ռուսական էներգակիրներից մեր կախվածությունն, այդ թվում՝ արգելել կամ աստիճանաբար հրաժարվել ռուսական նավթի ներկրումից»։ «Մենք հոգ կտանենք, որ դա արվի ժամանակին և կանոնակարգված ձևով։ Մենք կաշխատենք միասին, ինչպես նաև մեր գործընկերների հետ՝ երաշխավորելու կայուն և շարունակական գլոբալ էներգամատակարարումներն ու հասանելի գները սպառողների համար», - ասված է G7-ի երկրների առաջնորդների համատեղ հայտարարությունում։ Իսկ ԱՄՆ-ն հայտարարել է ռուսական երեք հեռուստաալիքների դեմ պատժամիջոցների սահմանման մասին, երկիրը նաև արգելել է իր քաղաքացիներին հաշվապահական և խորհրդատվական ծառայություններ մատուցել ռուսաստանցիներին և վիզաների շուրջ 2600 սահմանափակում մտցրել ռուսաստանցի և բելառուս պաշտոնյաների համար։ «Գազպրոմբանկի» ղեկավարության դեմ ուղղված միջոցներն առաջինն էին, քանի որ մինչ այս ԱՄՆ-ն ու նրա դաշնակիցները խուսափում էին այնպիսի քայլերից, որոնք կհանգեցնեին Եվրոպային մատակարարվող գազի խաթարումների։ ԱՄՆ ֆինանսների նախարարության տվյալներով՝ «Գազպրոմբանկի» ղեկավարությանը վերաբերող պատժամիջոցները տարածվում են նաև «Գազպրոմբանկի» ղեկավար Ալեքսեյ Միլլերի և կառավարման նախագահ Անդրեյ Ակիմովի վրա։ Նորա Վանյան

14:10 - 09 մայիսի, 2022

Ճապոնիայի վարչապետը հայտարարել է, որ Տոկիոն աստիճանաբար կդադարեցնի ռուսական նավթի ներկրումը |armenpress.am|

armenpress.am: Ճապոնիան աստիճանաբար կդադարեցնի նավթի ներկրումը Ռուսաստանից՝ միաժամանակ պահպանելով իր շահերը Ռուսաստանի Հեռավոր Արևելքի նավթագազային նախագծերում։ Այս մասին հայտնում է «Ինտերֆաքս»-ը՝ վկայակոչելով Ճապոնիայի վարչապետ Ֆումիո Կիսիդանի հայտարարությանը։ «Սա շատ դժվար որոշում է (հրաժարվել ռուսական նավթի ներկրումից), սակայն G7-ի միասնությունն այժմ ամենակարևորն է», - ասել է նա։ Միաժամանակ նա նշել է, որ Սախալինի վերաբերյալ նախագծերը կենսական նշանակություն ունեն Ճապոնիայի էներգետիկ անվտանգության համար։ «Մենք աստիճանաբար քայլեր կձեռնարկենք այնպես, որ նվազագույնի հասցնենք բացասական հետևանքները ճապոնացիների կյանքի և բիզնեսի վրա, սակայն մեր շահերը պահպանելու մեր ծրագիրը մնում է անփոփոխ»,- ասել է վարչապետը։ Կառավարությունը և ճապոնական ընկերությունները բաժնետոմսեր ունեն «Սախալին-1» և «Սախալին-2» բնական գազի և նավթի նախագծերում: Բրիտանական Shell PLC-ն դուրս է եկել «Սախալին-2» նախագծից Ուկրաինայում ստեղծված իրավիճակի մեկնարկից ընդամենը մի քանի օր անց։ Ամերիկյան Exxon Mobil Corp. հայտարարել է նաև «Սախալին-1» նախագծից դուրս գալու մասին։ G7-ի ղեկավարները հայտարարել են ռուսական նավթի ներկրումը աստիճանաբար դադարեցնելու իրենց հանձնառության մասին:

13:20 - 09 մայիսի, 2022

«Մեծ 7-ը» վճռական է Ուկրաինայում Ռուսաստանի հաղթանակը թույլ չտալու հարցում |azatutyun.am|

10:39 - 09 մայիսի, 2022

Ռուսաստանը պատրաստվելու է G20-ի գագաթնաժողովին․ Պեսկով

Ռուսաստանը պատրաստվելու է G20-ի գագաթնաժողովին, սակայն մանրամասների մասին խոսելը դեռ վաղ է, ՌԻԱ Նովոստիի փոխանցմամբ, ասել է ՌԴ նախագահի մամուլի քարտուղար Դմիտրի Պեսկովը։ Պեսկովը հիշեցրել է, որ նախօրեին հեռախոսազրույց է կայացել ՌԴ նախագահ Վլադիմիր Պուտինի և G20-ում նախագահող Ինդոնեզիայի առաջնորդ Ջոկո Վիդոդոյի միջև։ «Պուտինը հաջողություններ է մաղթել [Մեծ] քսանյակի խմբում ինդոնեզական նախագահությանն ու հավաստիացրել, որ Ռուսաստանը կանի հնարավոր և անհրաժեշտ ամեն ինչ, որպեսզի նպաստի այդ հաջող նախագահությանը։ Ռուսաստանը նաև պատրաստվելու է այդ գագաթնաժողովին։ Դեռևս վաղ է խոսել մեր մասնակցության մյուս մանրամասների մասին։ Ժամանակին ձեզ կտեղեկացնենք», - ասել է Պեսկովը։ Լրագրողները հետաքրքրվել են, թե արդյոք Պուտինն Ինդոնեզիա կմեկնի G20-ի՝ գագաթնաժողովին մասնակցելու, թե տեսակապով կմիանա։ Պեսկովը պատասխանել է, որ այդ հարցով դեռ որոշում չի կայացվել։ Նորա Վանյան

16:54 - 29 ապրիլի, 2022

G7-ի երկրները կուժեղացնեն տնտեսական ճնշումը Ռուսաստանի նկատմամբ |azatutyun.am|

azatutyun.am: Մեծ յոթնյակի երկրները կուժեղացնեն տնտեսական ճնշումը Ռուսաստանի վրա՝ կապված ուկրաինական պատերազմի հետ։ Այս մասին ասվում է G7-ի ֆինանսական գերատեսչությունների և կենտրոնական բանկերի ղեկավարների հանդիպման արդյունքներով տարածված հայտարարությունում։ Երեկ Վաշինգտոնում կայացած նիստի մասնակիցները նաև ընդգծել են, որ G7-ը գործընկերների հետ միասին կշարունակի քայլեր ձեռնարկել՝ ուղղված «Ռուսաստանի համար այս պատերազմի արժեքը բարձրացնելուն»։ Համատեղ հայտարարությունում նշվում է նաև, որ Մեծ յոթնյակի երկրները կշարունակեն սերտ համագործակցությունը՝ ուղղված Ռուսաստանի դեմ սահմանված պատժամիջոցների իրականացմանը և դրանք շրջանցելու ցանկացած փորձի կանխմանը։ Մեծ յոթնյակի երկրները նաև ափսոսանք են հայտնել Մեծ քսանյակի ֆինանսների նախարարների և կենտրոնական բանկերի ղեկավարների հանդիպմանը Ռուսաստանի մասնակցության համար։ Ի դեպ, աշխարհի առաջատար երկրների, այդ թվում՝ ԱՄՆ-ի և Եվրամիության ֆինանսների նախարարները, ինչպես նաև Ուկրաինայի ներկայացուցիչները, լքել են G20-ի փակ հանդիպումը Վաշինգտոնում ՌԴ ֆինանսների նախարար Անտոն Սիլուանովի՝ տեսակապի միջոցով ելույթի ընթացքում։

10:17 - 21 ապրիլի, 2022