ԿԳՄՍՆ

ՀՀ կրթության, գիտության, մշակույթի եւ սպորտի նախարարությունը գործադիր իշխանության հանրապետական մարմին է, որը մշակում եւ իրականացնում է կրթության, գիտության, մշակույթի եւ սպորտի բնագավառներում ՀՀ կառավարության քաղաքականությունը:

Նախարարն է Վահրամ Դումանյանը։ 

2021 թ․-ին ԿԳՄՍՆ-ի համակարգմամբ իրականացվել են 21 բյուջետային ծրագրեր՝ 196 միջոցառումներով․ Դումանյան

2021 թ․-ին ԿԳՄՍՆ-ի համակարգմամբ իրականացվել են 21 բյուջետային ծրագրեր՝ 196 միջոցառումներով․ Դումանյան

Կրթության, գիտության, մշակույթի և սպորտի նախարարության համակարգմամբ 2021 թ․-ի ընթացքում իրականացվել են 21 բյուջետային ծրագրեր՝ 196 միջոցառումներով։ Այս մասին Ազգային ժողովում  2021 թվականի պետական բյուջեի կատարման տարեկան հաշվետվության ընթացքում հայտնեց ԿԳՄՍ նախարար Վահրամ Դումանյանը։ «Բազմաթիվ միջոցառումների պարագայում նախարարությունը հանդես է եկել որպես բյուջետային գլխավոր կարգադրիչ՝ շուրջ 30 այլ պետական գերատեսչությունների միջոցառումների մասով։ Ընդհանուր առմամբ ծախսվել է 174.8 միլիարդ դրամ՝ ապահովելով ծրագրված ցուցանիշի 97.7 %-ը։ 2020 թվականի 95%-ի դիմաց։ Չնայած պատերազմի և համավարակի հարուցած դժվարություններին՝ 2021 թ․-ին նախարարությունը շարունակել է բարեփոխումների ընթացքը նախարարության համակարագման բոլոր ոլորտներում, սկզբնավորել է նոր նախաձեռնություններ, որոնցից շատերը մասշտաբայնություն են ստացել այս տարի և կստանան հետագա տարիներին»։Դումանյանի խոսքով՝ կրթության ոլորտում շարունակվել են հետագա բարեփոխումները, որի նպատակն է որակյալ կրթության հասանելիության բարձրացումը, մասնավորապես ներառական կրթական միջավայրի ստեղծումը և բարելավումը, կրթության բովանդակության և կրթական ծրագրերի բարելավումը, անհրաժեշտ ենթակառուցվածքների արդիականացումն ու վերազինումը, կրթություն գիտություն աշխատաշուկայի ամրապնդումը։ Ըստ նախարարի՝ հանրակրթության ոլորտում կառավարության ծրագրով նախատեսված 2026 թ․-ի 3-5 տարեկան նախադպրոցահասակ երեխաների  85% ընդգրկվածության թիրախն ապահովելու համար 2021 թ․-ին իրականացվել են իրավական դաշտի բարելավմանն ուղղված աշխատանքներ։ Նա նաև նշեց՝ բարձրագույն կրթության ոլորտում շարունակվել է ուսանողական նպաստների տրամադրումը ըստ ուսումնական հաստատությունների և մասնագիտությունների։ «Սոցիալական տարբեր խմբերի համար բարձրագույն կրթության  մատչելիության տեսակետից կատարվել են փոփոխություններ իրավական ակտերում, հնարավորություն է ստեղծվել կառավարության որոշմամբ գործող կարգավորումներում ավելացնել պետական բուհերում սովորողների լրացուցիչ խմբեր, որոնք կարող են օգտվել պետության կողմից տրամադրվող լրիվ կամ մասնակի նպաստից։ 2021 թ․-ին պետության կողմից շուրջ 12 միլիարդ դրամ ուսման վարձի մասնակի կամ լրիվ փոխհատուցում է տրամադրվել բարձրագույն կրթության բոլոր աստիճաններում տարբեր խմբերի ավելի քան 14.000 ուսանողների։ 6 բուհերում ստեղծվել են շուրջ 1 միլիարդ 160 միլիոն դրամ ընդհանուր արժողությամբ գերժամանակակից լաբորատոր ենթակառուցվածքներ»։ Նախարարը ասաց՝ գիտության ոլորտում կառավարությունը ունի հստակ մշակված քաղաքականություն և իր ջանքներն է ուղղում առկա խնդիրների լուծմանը, ինչպես նաև տարեցտարի ֆինանսական հնարավորությունների մեծացմանը։ Մշակույթի ոլորտում 2021 թ․-ին իրականացված քաղաքականությունը նպատակաուղղված է կառավարության ծրագրով նախանշված խնդիրների լուծմանը։ Դումանյանի խոսքով՝ կառավարությունը իր ուշադրության ներքո է պահել ֆիզիկական կուլտուրայի և սպորտի ոլորտը՝ իրականացնելով մի շարք կարևորագույն միջոցառումներ։
11:51 - 15 հունիսի, 2022
Հրապարակվել են «Հայոց լեզու և հայ գրականություն» առարկայի միասնական քննության թեստերի պատասխանները

Հրապարակվել են «Հայոց լեզու և հայ գրականություն» առարկայի միասնական քննության թեստերի պատասխանները

Բուհերի դիմորդները հունիսի 14-ին ընդունելության միասնական քննություն են հանձնել «Հայոց լեզու և հայ գրականություն» առարկայից, որը հայտագրել է 5.253 դիմորդ (2021 թ.՝ 3.730). նրանցից 1.290-ը քննությունը հանձնել է մայրաքաղաքում, 451-ը՝ Լոռու մարզում, 488-ը՝ Կոտայքում, 454-ը՝ Շիրակում, 280-ը՝ Սյունիքում, 93-ը՝ Վայոց ձորում, 348-ը՝ Տավուշում, 255-ը՝ Արագածոտնում, 419-ը՝ Արարատում, 375-ը՝ Արմավիրում և 410-ը՝ Գեղարքունիքում: ՀՀ կրթության, գիտության, մշակույթի և սպորտի նախարարությունից տեղեկացնում են, որ  ընդհանուր առմամբ գործել են քննական 35 կենտրոններ, որոնցից 9-ը՝ Երևանում, 26-ը՝ մարզերում: ««Հայոց լեզու և հայ գրականություն» առարկայի քննությունը տևել է 3 ժամ, ճիշտ պատասխանները ԳԹԿ-ն արդեն հրապարակել է: Գնահատականները հայտնի կդառնան քննության 5-րդ օրը, այսինքն՝ հունիսի 19-ին: Դիմորդների ստացած միավորները փակցվելու են քննական կենտրոններում, ինչպես նաև ուղարկվելու են դիմորդների էլեկտրոնային հասցեներին: Արդյունքների բողոքարկումը տեղի կունենա հաջորդ օրը՝ ժամը 09:00-18:00-ն, այն քննական կենտրոնում, որտեղ հանձնվել է քննությունը»,- ասվում է հաղորդագրության մեջ: Ըստ նախարարության՝ միասնական հաջորդ քննությունը տեղի կունենա հունիսի 17-ին. դիմորդները քննություն կհանձնեն «Մաթեմատիկա» առարկայից։
18:31 - 14 հունիսի, 2022
Նախատեսվում է չեղարկել ժողովրդական և վաստակավոր արտիստի կոչումները
 |civilnet.am|

Նախատեսվում է չեղարկել ժողովրդական և վաստակավոր արտիստի կոչումները |civilnet.am|

civilnet.am: ՀՀ ժողովրդական արտիստի, ՀՀ ժողովրդական նկարչի, ՀՀ վաստա­կավոր արտիստի և ՀՀ վաստակավոր նկարչի պատվավոր կոչումները կարող են չեղարկվել։ Կրթության, գիտության, մշակույթի և սպորտի նախարարությունը «ՀՀ պետական պարգևների և պատվավոր կոչումների մասին» օրենքում փոփոխություններ կատարելու նախաձեռնությամբ է հանդես եկել, համաձայն որի՝ նախատեսվում է չեղարկել ժողովրդական և վաստակավոր արտիստի կոչումները։ Մշակույթի ու արվեստի բնագավառի համար որպես վաստակի գնահատման չափանիչ կպահպանվի ՀՀ արվեստի վաստակավոր գործչի և ՀՀ մշակույթի վաստակավոր գործչի պատվավոր կոչումները, «որոնք առավել ընդգրկուն եզրույթներ են և ներառում են դաշտ ամբողջապես»։ «Նշյալ պատվավոր կոչումների չեղարկումը պայմանավորված է մի շարք պատճառներով։ Մասնավորապես, որևէ արվեստագետի կամ մշակութային գործչի ժողովրդական լինելը չի կարող սահմանվել այս կամ այն փորձագիտական խմբի հայեցողությամբ: Չկան ժողովրդականության չափման օբյեկտիվ չափանիշներ և «ժողովրդական» կոչումն ունի զուտ բարոյական նշանակություն, արտացոլում է ստեղծագործողի ժողովրդականությունն ու հանրային ճանաչելիությունը, ինչը չի կարող վավերացվել որևէ մարմնի կողմից»,- ասված է հիմնավորման մեջ։ Ըստ նախարարության՝ անորոշ սկզբունքներով վաստակավոր և ժողովրդական արտիստների պատվավոր կոչումների շնորհումը ուղղակիորեն խոչընդոտում է կադրային քաղաքականության վերափոխմանը․ «Տիտղոսները վարկանիշային անձեռնմխելիության դեր են կատարում, որ կանխում է տվյալ կառույցի տնօրենի անկաշկանդ, կադրային քաղաքականության և ստեղծագործական սերնդափոխություն իրականացնելու իրավունքն ու հնարավորությունը»։ Օրենքի փոփոխության նախագիծը մշակվել է ԿԳՄՍՆ կողմից՝ ստեղծագործական-մշակութային հանրության ներկայացուցիչների ընդգրկմամբ: «Քաղաքակիրթ և առաջատար մշակույթ ունեցող երկրներում չեն գործում արվեստագետի արժևորման նման ձևաչափեր: Նշյալ պատվավոր կոչումները սովետական մշակութային համակարգի վերապրուկներ են»,- ասված է հիմնավորումներում։ Նշվում է նաև, որ ՀՀ ժողովրդական արտիստի, ՀՀ ժողովրդական նկարչի կոչման արժանացած արվեստագետները ստանում են 40 000 դրամ պարգևավճար:  
14:04 - 14 հունիսի, 2022
Կատարում կբացվի «Արաբերեն հաղորդագրություններ Հայաստանից. ժառանգություն՝ մշակութային երկխոսության համար» ցուցադրությունը

Կատարում կբացվի «Արաբերեն հաղորդագրություններ Հայաստանից. ժառանգություն՝ մշակութային երկխոսության համար» ցուցադրությունը

Վարչապետ Նիկոլ Փաշինյանի գլխավորած կառավարական պատվիրակության՝ Կատարի Պետություն այցի շրջանակում ՀՀ ԿԳՄՍ նախարարության աջակցությամբ հունիսի 14-ին Կատարի ազգային գրադարանում բացվելու է «Արաբերեն հաղորդագրություններ Հայաստանից. ժառանգություն՝ մշակութային երկխոսության համար» խորագրով ժամանակավոր ցուցադրությունը: Ցուցադրվելու են նաև Հայաստանի պատմության թանգարանի դրամագիտական և հնագիտական հավաքածուներից 9 կրկնօրինակ նմուշներ, որոնք ներկայացնում են «Դվին», «Արմինիա», «Հարունաբադ» և «Հալեպ» դրամահատարաններում թողարկված արծաթե ու պղնձե դիրհեմների, 752 թ. թողարկված ոսկե դինարի, «Բարդա» դրամահատարանում թողարկված պղնձե ֆելսի, ինչպես նաև 18-րդ դարով թվագրվող բրոնզե երկգլխանի կացնի նմուշներ՝ բուսական զարդանախշերով և կենդանակերպ պատկերներով։ Ցուցադրական պաստառներում կներկայացվեն հայ-արաբական երկարատև հարաբերություններին վերաբերող մշակութային արժեքներ և պատմական փաստեր։ Ցուցահանդեսը Կատարի ազգային գրադարանում գործելու է մեկ շաբաթ։ Հիշեցնենք, որ ՀՀ ԿԳՄՍ նախարար Վահրամ Դումանյանը կառավարության պաշտոնական պատվիրակության կազմում երկօրյա այցով գտնվում է Կատարում: Նախօրեին Հայաստանի և Կատարի վարչապետների ներկայությամբ երկու երկրների միջև ստորագրվել են մի շարք փաստաթղթեր: Մասնավորապես, ՀՀ ԿԳՄՍ նախարար Վահրամ Դումանյանը և Կատարի կրթության, բարձրագույն կրթության և դաստիարակության հարցերի նախարար Բուսեյնա բինթ Ալի Ալ-Նուայմինը ստորագրել են Հայաստանի և Կատարի միջև կրթության, բարձրագույն կրթության և գիտական հետազոտությունների բնագավառում համագործակցության համաձայնագիր: ԵՊՀ ռեկտոր Հովհաննես Հովհաննիսյանը և Կատարի համալսարանի ռեկտոր Հասան բն Ռաշիդ Ալ-Դարհամը ստորագրել են երկու համալսարանների միջև համագործակցության համաձայնագիր։  
12:05 - 14 հունիսի, 2022
ՅՈՒՆԵՍԿՕ-ն ականատես է լինում Ադրբեջանի կողմից Արցախի օկուպացված տարածքներում վանդալիզմի դեպքերին. ՀՀ մշտական ներկայացուցիչ |armenpress.am|

ՅՈՒՆԵՍԿՕ-ն ականատես է լինում Ադրբեջանի կողմից Արցախի օկուպացված տարածքներում վանդալիզմի դեպքերին. ՀՀ մշտական ներկայացուցիչ |armenpress.am|

armenpress.am: Հունիսի 7-ին ՅՈՒՆԵՍԿՕ-ում ՀՀ մշտական ներկայացուցչության և ՀՀ կրթության, գիտության, մշակույթի և սպորտի նախարարության կողմից համատեղ կազմակերպվել է ՅՈՒՆԵՍԿՕ-ին Հայաստանի անդամակցության 30-ամյակի կապակցությամբ համերգ-երեկո, որին, ի թիվս հայ համայնքի ներկայացուցիչների և բազմաթիվ երաժշտասերների, ներկա էին դեսպաններ, սենատորներ, պատգամավորներ, կրոնական համայնքի ներկայացուցիչներ, հասարակական կազմակերպությունների ներկայացուցիչներ և բազմաթիվ անվանի անձինք։ ՅՈՒՆԵՍԿՕ-ի կենտրոնակայանում կայացած համերգ-երեկոյի սկզբում բացման ելույթներով հանդես են եկել ՅՈՒՆԵՍԿՕ-ում ՀՀ մշտական ներկայացուցիչ, դեսպան Քրիստիան Տեր-Ստեփանյանը, Աֆրիկայի հարցերով ՅՈՒՆԵՍԿՕ-ի գլխավոր տնօրենի տեղակալ Ֆիրմին Էդուարդ Մատոկոն, ՀՀ կրթության, գիտության, մշակույթի և սպորտի նախարար Վահրամ Դումանյանը։ «ՅՈՒՆԵՍԿՕ-ին անդամակցելով՝ Հայաստանն արտահայտել է իր մշակույթի ավանդը մարդկության ժառանգության մեջ։ Սակայն, այդ անդամակցությունը մենք պետք է նաև գնահատենք կազմակերպության գործունեությանը երկրի մասնակցությամբ։ Այս տարիների ընթացքում Հայաստանը լիովին ներգրավվել է ՅՈՒՆԵՍԿՕ-ի մանդատի իրագործման և այն համամարդկային արժեքների տարածման գործում, որոնց երաշխավորն է հանդիսանում։ Մենք մտահոգությամբ ենք հետևում հակամարտային տարածաշրջաններում մշակութային ժառանգությանը սպառնացող վտանգներին, 1998-2005թթ․ ընթացքում Նախիջևանի հայկական գերեզմանատան հազարավոր խաչքարերի ոչնչացման դեպքերին։ Նույնիսկ այսօր, հակառակ գլխավոր տնօրենի ջանքերին, ՅՈՒՆԵՍԿՕ-ն անզոր է և ականատես է լինում Ադրբեջանի կողմից Արցախի օկուպացված տարածքներում գտնվող հայկական մշակութային արժեքների նկատմամբ իրականացվող ավերածություններին և վանդալիզմի այլ դեպքերին։ Այո, պետք է ամեն ինչ անել վտանգված ժառանգությունը փրկելու համար»,- իր ելույթում նշել է ՅՈՒՆԵՍԿՕ-ում ՀՀ մշտական ներկայացուցիչ, դեսպան Քրիստիան Տեր-Ստեփանյանը: Աֆրիկայի հարցերով ՅՈՒՆԵՍԿՕ-ի գլխավոր տնօրենի տեղակալ Ֆիրմին Էդուարդ Մատոկոն էլ իր հերթին արձանագրեց․ «Հայաստանն ու ՅՈՒՆԵՍԿՕ-ն միավորող վստահության և համերաշխության կապերն արժեքավոր են, և անդադար ամրապնդվող համագործակցությունը դրա վկայությունն է։ Երեք տասնամյակ Հայաստանը մեր կողքին հաստատակամորեն ներգրավված է ի շահ համամարդկային արժեքների և այնպիսի համընդհանուր արժեքների պաշտպանության, ինչպիսիք են կրթությունը, մշակույթը, գիտությունը, հաղորդակցությունը և տեղեկատվությունը։ Հայաստանն ակտիվ է ՅՈՒՆԵՍԿՕ-ի իրավասության շրջանակի բոլոր բնագավառներում։ Այդ սերտ համագործակցությունը նաև արտահայտվում է առաջին անգամ ՅՈՒՆԵՍԿՕ-ի գործադիր խորհրդին Հայաստանի անդամակցությամբ՝ մինչև 2025թ․»։ ՀՀ կրթության, գիտության, մշակույթի և սպորտի նախարար Վահրամ Դումանյանը նշել է. «Հայ ժողովուրդը, ինչպես գիտեք, սեփական պատմական փորձից ծանոթ է հոգևոր և մշակութային արժեքները կորցնելու ողբերգական երևույթին։ Ցավոք, այսօր ևս մենք առերեսվում ենք այդ արժեքների շարունակական խեղաթյուրման, յուրացման և ոչնչացման դեպքերին, որոնք նույնիսկ տեսագրվում և սոցիալական ցանցերում հրապարակվում են իրագործողների կողմից: Լիահույս ենք, որ ՅՈՒՆԵՍԿՕ-ն՝ որպես մշակութային ժառանգության պաշտպանության առաջատար միջազգային մարմին, միջազգայնորեն իրեն վերապահված մանդատի շրջանակներում ջանք չի խնայի՝ ապահովելու Արցախի հայկական մշակութային ժառանգության անվտանգությունը»: Համերգի ընթացքում կատարումներով հանդես եկան ֆրանսահայ հանրահռչակ երաժիշտներ Անդրե Մանուկյանը և Պատրիկ Ֆիորին, ինչպես նաև՝ Հայաստանից ժամանած տաղանդաշատ երիտասարդ երաժիշտներ Անի Մելիքյանը, Արթուր Գրիգորյանը և Արմեն Պուչինյանը։ Ելույթներին զուգահեռ ցուցադրվեց հայկական պատմամշակութային ժառանգությունը ներկայացնող լուսանկարների շարք, մասնավորապես՝ ՅՈՒՆԵՍԿՕ-ի Համաշխարհային ժառանգության, Մարդկության ոչ նյութական մշակութային ժառանգության ներկայացուցչական և նախնական ցանկերում, ինչպես նաև՝ «Աշխարհի հիշողության» ՅՈՒՆԵՍԿՕ-ի միջազգային ռեգիստրում   ներառված մշակութային արժեքները և վայրերը։ Համերգ-երեկոն կայացավ ջերմ և անմիջական մթնոլորտում։
12:11 - 10 հունիսի, 2022
Երևանի դպրոցներից մեկի նախկին տնօրենը զրկվել է որոշակի պաշտոններ զբաղեցնելու և մանկավարժական գործունեություն ծավալելու իրավունքից. Անդրեասյան

Երևանի դպրոցներից մեկի նախկին տնօրենը զրկվել է որոշակի պաշտոններ զբաղեցնելու և մանկավարժական գործունեություն ծավալելու իրավունքից. Անդրեասյան

Նախորդ տարի աշնանը մեծ աղմուկ հանեց Երևանի դպրոցներից մեկում ուսուցչից աշխատանքի ընդունվելու համար գումար պահանջելու և այնուհետև պարբերաբար վճարումներ ստանալու հանգամանքները նշող ձայնագրությունը։ Ձայնագրության հիման վրա հիմա արդեն նախկին տնօրենը նախարարության կողմից զրկվեց հավաստագրից։ Այս մասին Ֆեյսբուքի իր էջում տեղեկացրել է ԿԳՄՍ նախարարի տեղակալ Ժաննա Անդրեասյանը:   «Արդեն ստացել ենք դատավճիռը, որով նախկին տնօրենը զրկվել է որոշակի պաշտոններ զբաղեցնելու և մանկավարժական գործունեություն ծավալելու իրավունքից։ Միջադեպի մյուս մասնակիցների մասով նույնպես կայացված են համապատասխան վճիռներ։   Գիտեմ, որ նման դեպքերի մասին ներքին խոսակցություններ լինում են, բայց շատերը խուսափում են բարձրաձայնել։ Կարծում եմ՝ այս դեպքը ցույց է տալիս, որ բարձրաձայնել պետք է, և որ դա կունենա հետևանք։   Որ ամենակարևորն է՝ հուսամ, այս նախադեպը կկանխի համակարգում նման երևույթները։ Կրթությունը չպիտի լինի կեղծիքի տեղ»,- գրել է Անդրեասյանը:  
12:15 - 08 հունիսի, 2022
Արցախ ՅՈՒՆԵՍԿՕ-ի շուտափույթ առաքելությունը կենսական է. ԿԳՄՍ նախարարը հանդիպել է ՅՈՒՆԵՍԿՕ-ի գլխավոր տնօրենի տեղակալին

Արցախ ՅՈՒՆԵՍԿՕ-ի շուտափույթ առաքելությունը կենսական է. ԿԳՄՍ նախարարը հանդիպել է ՅՈՒՆԵՍԿՕ-ի գլխավոր տնօրենի տեղակալին

ՅՈՒՆԵՍԿՕ-ին Հայաստանի Հանրապետության անդամակցության 30-ամյակի միջոցառմանը մասնակցելու նպատակով Փարիզ կատարած պաշտոնական այցի շրջանակում ՀՀ կրթության, գիտության, մշակույթի և սպորտի նախարար Վահրամ Դումանյանը հանդիպել է ՅՈՒՆԵՍԿՕ-ի գլխավոր տնօրենի մշակույթի հարցերով տեղակալ Էռնեստո Օտտոնեի հետ: Այս մասին հայտնում են ՀՀ ԿԳՄՍ նախարարությունից։    Հանդիպմանը ներկա է եղել նաև նախարարի տեղակալ Արա Խզմալյանը:   Վահրամ Դումանյանը շնորհակալություն է հայտնել Էռնեստո Օտտոնեին հանդիպման, ինչպես նաև ՅՈՒՆԵՍԿՕ-ի հետ մշտական և շարունակական արդյունավետ համագործակցության համար: Նախարարը վստահություն է հայտնել, որ ՅՈՒՆԵՍԿՕ-ի հետ մշակույթի ոլորտում առկա փոխշահավետ համագործակցությունը կշարունակվի ընդլայնվել և կնպաստի նոր նախաձեռնությունների և գաղափարների իրականացմանը։     «Հայաստանը՝ որպես ՅՈՒՆԵՍԿՕ-ի Գործադիր խորհրդի անդամ, կշարունակի նպաստել Կազմակերպության ռազմա­վարության ձևավորմանը և դրա արդյունավետ կյանքի կոչմանը: Մենք հավատարիմ ենք ՅՈՒՆԵՍԿՕ-ի մանդատին՝ առաջ մղելու համամարդկային արժեքները՝ խրախուսելով խաղաղության մշակույթը և ամրապնդելով հանդուրժողականությունն ու համերաշխությունը»,- նշել է Վահրամ Դումանյանը:   Հանդիպման ընթացքում նախարար Վահրամ Դումանյանն Արցախի Հանրապետության մշակութային ժառանգության պահպանության ոլորտում առկա համագործակցության համատեքստում անդրադարձել է Արցախի՝ Ադրբեջանի վերահսկողության ներքո գտնվող հայկական պատմամշակութային ժառանգության պաշտպանության հարցին:   «Հայաստանն ի սկզբանե իր աջակցությունն է հայտնել ՅՈՒՆԵՍԿՕ-ի գլխավոր տնօրենի նախա­ձեռնությանը՝ Լեռնային Ղարաբաղ և հարակից տարածքներ փորձագիտական ​​առաքելություն ուղարկե­լու առնչությամբ և այս ընթացքում կառուցողական կերպով ներգրավված է եղել այդ առաքելության հնարավորինս արագ գործուղման գործընթացում։ Մենք լիահույս ենք, որ Լեռնային Ղարաբաղ և հարակից տարածքներ ՅՈՒՆԵՍԿՕ-ի տեխնիկական առաքելությունը կիրականացվի 1954 թվականի Հաագայի կոնվենցիայի շրջանակում և շա­հագրգիռ կողմերի մասնակցությամբ, ինչ­պես նաև այ­ցելության ընթացքում հավասար թվաքանակով հայ­կական և ադրբեջանական մշակութային հուշար­ձաններ այցելելու պայմանի պահպանմամբ։ Ցավոք սրտի, մինչ օրս մենք ականատես ենք լինում Ադրբեջանի կողմից շարունակաբար իրականացվող վայրագություններին և հայկական մշակութային ժառանգության դիտավորյալ ոչնչացմանը, վանդալիզմի, բարեկարգման կամ այլ ձևակերպումների անվան տակ կոթողների այլափոխման նորանոր դեպքերին: Նման իրավիճակում առաքելության շուտափույթ իրականացումը դառնում է առավել կենսական»,- ասել  է Վահրամ Դումանյանը:   Ի պատասխան՝ Էռնեստո Օտտոնեն նշել է, որ այդ ուղղությամբ համապատասխան աշխատանքներ են իրականացվում:   Նախարար Վահրամ Դումանյանը շեշտել է նաև, որ հայկական կողմը մեծ ակնկալիքներ ունի սեպտեմբերին Մեքսիկայում կայանալիք ՅՈՒՆԵՍԿՕ-ի մշակութային քաղաքականության և կայուն զար­գացման համաշխարհային համաժողովից (MONDIACULT), որին վստահաբար հայկական կողմն իր մասնակցությունը կունենա։   «Հիրավի խորհրդանշական է, որ 40 տարվա ընդմիջումից հետո MONDIACULT-ը կրկին տեղի կունենա Մեխիկոյում։ Հավատացած ենք, որ այդ համաժողովը կընձեռի ոլորտում համագործակցության նոր հնարավորություններ»,- ընդգծել է նախարարը:   Հանդիպման ընթացքում կողմերն անդրադարձել են նաև ՅՈՒՆԵՍԿՕ-ի հետ իրականացվող համատեղ ծրագրերին, ինչի վերաբերյալ նախարարը հույս է հայտնել, որ արդյունավետ համագործակցությունը կլինի շարունակական՝ միասին հասնելով նոր արդյունքների:   Հանդիպման ավարտին ՀՀ ԿԳՄՍ նախարար Վահրամ Դումանյանը Էռնեստո Օտտոնեին է նվիրել Ա. Սպենդիարյանի տուն-թանգարանի հրատարակությամբ «Ալեքսանդր Սպենդիարյան» երկլեզու պատկերագիրքը՝ ՅՈՒՆԵՍԿՕ-ի աջակցությամբ հրատարակված, և Մեսրոպ Մաշտոցի անվան Մատենադարանի հրատարակած «Արցախի ձեռագրական ժառանգությունը» անգլերեն պատկերագիրքը: Նախարարն այդ գրքերից մեկական օրինակ էլ խնդրել է փոխանցել ՅՈՒՆԵՍԿՕ-ի գլխավոր տնօրեն Օդրի Ազուլեին:   Նշենք, որ հոբելյանական միջոցառման կապակցությամբ հունիսի 7-ին ՅՈՒՆԵՍԿՕ-ի փարիզյան կենտրոնակայանում տեղի կունենա հոբելյանական համերգ։ Համերգային ծրագրում հանդես կգան ֆրանսահայ հանրահայտ կատարողներ Պատրիկ Ֆիորին և Անդրե Մանուկյանը, ինչպես նաև հայաստանյան երաժիշտներ Արթուր Գրիգորյանը, Արմեն Պուչինյանը, Անի Մելիքյանը։
20:14 - 07 հունիսի, 2022
Համայնքային բյուջեները չեն բավարարում, որ որոշ մանկապարտեզներ գործեն ամբողջ տարի. փոխնախարար |armenpress.am|

Համայնքային բյուջեները չեն բավարարում, որ որոշ մանկապարտեզներ գործեն ամբողջ տարի. փոխնախարար |armenpress.am|

armenpress.am: Հայաստանում կան մանկապարտեզներ, որոնք կարող են գործել ամբողջ տարին, սակայն գործում են ընդամենը մի քանի ամիս, քանի որ համայնքային բյուջեն չի բավարարում: Այս մասին ասաց ՀՀ ԿԳՄՍ փոխնախարար Ժաննա Անդրեասյանն ԱԺ մշտական հանձնաժողովների համատեղ նիստում ՀՀ 2021 թ. պետական բյուջեի կատարման մասին տարեկան հաշվետվության քննարկմանը՝ անդրադառնալով պատգամավորների հարցերին: Կառավարության՝ 500 մանկապարտեզի կառուցման, վերանորոգման կամ հիմնանորոգման ծրագրի համատեքստում փոխնախարարն ասաց. «Մենք չենք ուզում ունենալ իրավիճակ, որ մենք սարքում ենք մանկապարտեզը, ունենում ենք ամբողջական արդիական ենթակառուցվածք, սակայն դա փաստացի չի գործում: Մենք սեպտեմբերին արեցինք ուսումնասիրություն, և հանրապետությունում ունեինք շուրջ 50 մանկապարտեզ, որոնք կարող էին գործել, սակայն չեն գործում, որովհետև համայնքային բյուջեն չի բավարարում, որ մանկապարտեզը գործի»,- ասաց փոխնախարարը: Կան մանկապարտեզներ, որոնք գործում են տարվա մեջ մի քանի ամիս, պատճառը կրկին համայնքային բյուջեն է, այն չի բավարարում, որ մանկապարտեզը գործի ամբողջ տարին: Անդրեասյանը վստահեցնում է, որ այս խնդիրը նախարարության ուշադրության կենտրոնում է: «Մենք ուզում ենք իրապես լուծում գտնել, որը թույլ կտա երեխաներին ամբողջ տարին նախադպրոցական կրթության մեջ ընդգրկված լինել և դա անել որակյալ ու արդիական պայմաններում»,-նշեց փոխնախարարը:
15:46 - 07 հունիսի, 2022
Հաջորդ մրցաշարերին նոր երիտասարդների ենք տեսնելու. ծանրամարտի հավաքականի մարզիչն ամփոփեց ԵԱ-ն |armenpress.am|

Հաջորդ մրցաշարերին նոր երիտասարդների ենք տեսնելու. ծանրամարտի հավաքականի մարզիչն ամփոփեց ԵԱ-ն |armenpress.am|

armenpress.am: Հայաստանի ծանրամարտի հավաքականում հաջորդ մրցաշարերին նոր երիտասարդ ծանրորդների անուններ են լինելու: Նման կարծիք հայտնեց Հայաստանի ծանրամարտի տղամարդկանց հավաքականի մարզիչ Վիգեն Խաչատրյանը: «Ծանրամարտի Եվրոպայի այս առաջնությունում մեր գրանցած արդյունքը նորմալ եմ համարում: Մեկ-երկու բացթողում կար, բայց դրանք կշտկենք»,-ասաց Խաչատրյանը: Վերջինս շեշտեց, որ նախորդ տարի Եվրոպայի նախորդ առաջնության ոսկե մեդալներն այս տարի փոխեցին գույնը, քանի որ օլիմպիական քաշային կարգերում մեծացել է մրցակցությունը: «Հաջորդ մրցաշարերին նոր երիտասարդների ենք տեսնելու»,-առանձնացրեց նա: Հայաստանի ծանրամարտի հավաքականը Եվրոպայի առաջնության թիմային հաշվարկում երրորդն է: Ալբանիայի մայրաքաղաք Տիրանայում ավարտված Եվրոպայի առաջնության երկամարտի մեդալների ոչ պաշտոնական հաշվարկում Հայաստանի ընտրանին երրորդն է (7 մեդալ): Առաջին տեղում Բուլղարիան է (8 մեդալ), երկրորդը` Ուկրաինան (7 մեդալ): Ուկրաինայի հավաքականը երկրորդն է, քանի որ ուկրաինացի մարզիկներն ավելի շատ ոսկե մեդալներ են նվաճել: Հայաստանի ծանրամարտի հավաքականը Եվրոպայի առաջնության մասնակցեց 10 մարզիկով: Եվրոպայի առաջնության չեմպիոններ դարձան Ռաֆայել Հարությունյանը (81 կգ) և Դավիթ Հովհաննիսյանը (96 կգ): Հին աշխարհամասի փոխչեմպիոնի կոչումը նվաճեցին Արա Աղանյանը (96 կգ), Սամվել Գասպարյանը (102 կգ) և Վարազդատ Լալայանը (109 + կգ): Այս առաջնության բրոնզե մեդալներին արժանացան Գոռ Մինասյանը (109 + կգ) և Արսեն Մարտիրոսյանը (109  կգ): «Փոքր» արծաթե մեդալ նվաճեց Անդրանիկ Կարապետյանը:
12:24 - 06 հունիսի, 2022
Հաղթանակ՝ 1։0 հաշվով․ Հայաստանը Իռլանդիայի դեմ խաղում առաջին երեք միավորը վաստակեց Ազգերի լիգայի մեկնարկային տուրում |tert.am|

Հաղթանակ՝ 1։0 հաշվով․ Հայաստանը Իռլանդիայի դեմ խաղում առաջին երեք միավորը վաստակեց Ազգերի լիգայի մեկնարկային տուրում |tert.am|

tert.am: ՈՒԵՖԱ Ազգերի լիգայի խմբային փուլի մեկնարկային տուրում Հայաստանի ազգային հավաքականը Երևանում մրցում էր Իռլանդիայի ընտրանու հետ և 1։0 հաշվով հաղթանակ տարավ։ Առաջին կեսը մեր ընտրանու ֆուտբոլիստներն ակտիվ էին սկսել, նույնիսկ երկու անգամ սպառնացին մրցակցի դարպասին, բայց հաշիվն այդպես էլ չբացվեց։ Իռլանդացիները ևս հայտնվում էին մեր կիսադաշտում ու փորձում Յուրչենկոյի նյարդերը, բայց ավելի քիչ։ Այսպիսով, առաջին կեսից հետո լուսատախտակին զրոներ մնացին։ Մրցավարի սուլիչից հետո երկրպագուներից մեկը ներխուժեց մարզադաշտ և գրկեց Վարազդատ Հարոյանին․ վերջինս հանեց մարզաշապիկը՝ նվիրելով այն նրան։ Երկրորդ կեսի սկզբնամասում՝ 49-րդ րոպեին Վարազդատ Հարոյանը Հովհաննես Համբարձումյանի փոխանցումից հետո գրավեց մրցակցի դարպասը, բայց մրցավարը խաից դուրս վիճակ արձանագրեց։ 5 րոպե անց կրկին Համբարձումյանի փոխանցումից հետո Տիգրան Բարսեղյանը վտանգավոր պահ ունեցավ, բայց հեռվից կատարած հարվածը մի փոքր շեղ ստացվեց։ Լուսանկարը՝ ՀՖՖ ֆեյսբուքյան էջից Ի վերջո, 74-րդ րոպեին Էդուարդ Սպերցյանը հեռահար ֆանտաստիկ հարվածով գրավեց իռլանդացիների դարպասը՝ հաղթանակ պարգևելով մեր թիմին։
19:17 - 04 հունիսի, 2022
Վերջին դասի ղողանջները նոր ձեռքբերումների, հաջողությունների և մարտահրավերների շրջան են ազդարարում. Վահրամ Դումանյան

Վերջին դասի ղողանջները նոր ձեռքբերումների, հաջողությունների և մարտահրավերների շրջան են ազդարարում. Վահրամ Դումանյան

ԿԳՄՍ նախարար Վահրամ Դումանյանը շնորհավորել է հանրակրթական դպրոցների շրջանավարտներին:   Շնորհավորական ուղերձում ասված է.   «Սիրելի՛ շրջանավարտներ,   Շնորհավորում եմ ձեզ ձեր կյանքի արժանահիշատակ իրադարձություններից մեկի կապակցությամբ: Այսօր վերջին դասի ղողանջները նոր ձեռքբերումների, հաջողությունների և մարտահրավերների շրջան են ազդարարում ձեր կյանքում:   Դուք եք մեր պետության գալիք հենասյուները և անկյունաքարերը, ձեզ է վստահվելու մեր երկրի զարգացման հետագա ապահովումը, դուք եք լինելու Հայաստանի բարօրության երաշխիքը, ձեզնով են հպարտանալու ձեր ծնողները և ուսուցիչները, դուք եք նոր ավյուն և ուժ հաղորդելու մեր հազարամյա պատմության ընթացքին:   Զինվե՛ք համբերությամբ, ջանասիրությամբ և հավատով ձեր ուժերի նկատմամբ, որպեսզի արդարացնեք ձեր ծնողների և ուսուցիչների հույսերը, արժանի լինեք Հայաստանի Հանրապետության քաղաքացու կոչմանը:   Դու՛ք եք մեր ապագան:   Սիրելի՛ շրջանավարտներ,   Ի սրտե շնորհավորում եմ ձեզ, ձեր ծնողներին և ուսուցիչներին: Մաղթում եմ ձեզ կանաչ ճանապարհ ձեր ապագա ուսանողական և աշխատանքային կյանքում:   Թո՛ղ իրականանան ձեր բոլոր նպատակները, թո՛ղ հաջողությունն ուղեկցի ձեզ ձեր ողջ կյանքի ընթացքում: Աստվա՛ծ պահապան բոլորիդ»:
11:52 - 03 հունիսի, 2022
Կարևորում ենք համագործակցությունը. Ժաննա Անդրեասյանը և Սոֆիա Զախարակին այցելել են հայ-հունական պետական քոլեջ

Կարևորում ենք համագործակցությունը. Ժաննա Անդրեասյանը և Սոֆիա Զախարակին այցելել են հայ-հունական պետական քոլեջ

ՀՀ կրթության, գիտության, մշակույթի և սպորտի նախարարի տեղակալ Ժաննա Անդրեասյանը և Հունաստանի Հանրապետության զբոսաշրջության փոխնախարար Սոֆիա Զախարակին հունիսի 2-ին այցելել են Երևանի զբոսաշրջության, սպասարկման և սննդի արդյունաբերության հայ-հունական պետական քոլեջ: Ինչպես հայտնում են ԿԳՄՍ նախարարությունից, հյուրընկալելով բարձրաստիճան պաշտոնյաներին՝ քոլեջի սաները ներկայացրել են մշակութային ծրագիր՝ արժանանալով բարձր գնահատանքի: Այնուհետև ողջույնի խոսքով հանդես է եկել քոլեջի տնօրեն Արթուր Ղազարյանը, ով անդրադարձել է ուսումնական հաստատության հաջողություններին, համավարակից հետո ծառացած մարտահրավերներին և դրանք հաղթահարելու ուղիներին, ինչպես նաև ՀՀ կրթության, գիտության, մշակույթի և սպորտի նախարարության, Հունաստանի զբոսաշրջության նախարարության և Հայաստանի Հանրապետությունում Հունաստանի Հանրապետության դեսպանության կողմից ցուցաբերված աջակցությանը:  ՀՀ ԿԳՄՍ նախարարի տեղակալ Ժաննա Անդրեասյանը նշել է, որ քոլեջում երեխաները ոչ միայն սովորում են հունարեն, այլև հաղորդակից են դառնում հունական մշակույթին: Նա նաև շեշտադրել է «Էրազմուս պլյուս» ձևաչափով հունական ուսումնական հաստատությունների հետ համագործակցության առանցքային նշանակությունը: «ՀՀ ԿԳՄՍ նախարարության անունից մենք պատրաստ ենք ամեն կերպ աջակցել այդ գործընթացին և շատ ենք կարևորում համագործակցությունը մեր և Հունաստանի ուսումնական հաստատությունների միջև»,-ասել է փոխնախարարը: Հունաստանի Հանրապետության զբոսաշրջության փոխնախարար Սոֆիա Զախարակին էլ անդրադարձել է ՀՀ ԿԳՄՍ նախարարության և Երևանի զբոսաշրջության, սպասարկման և սննդի արդյունաբերության հայ-հունական պետական քոլեջի գործունեության կարևորությանը, փոխանակման ծրագրեր իրականացնելու առաջնակարգությանը, երկու ժողովուրդների՝ պատմականորեն ձևավորված բարեկամական կապերի նշանակությանը: Այնուհետև բարձրաստիճան հյուրերն ունկնդրել են քոլեջի սաների ասմունքը. նրանք հատվածներ են արտասանել հույն գրող Ն. Կազանձակիսի, Նոբելյան մրցանակի դափնեկիրներ, բանաստեղծներ Յ. Սեֆերիսի և Օ. Էլիտիսի երկերից: Հաջորդիվ տեղի է ունեցել գործնական քննարկում, որի ընթացքում ՀՀ ԿԳՄՍ նախարարի տեղակալ Ժաննա Անդրեասյանն անդրադարձել է հունարենի ուսուցման զարգացման հնարավորություններին: «Լեզվի իմացությունը դառնում է մասնագիտությունը սովորելու նոր հնարավորություն՝ աշխատանքային պրակտիկան անցնելու համար»,- ասել է նախարարի տեղակալը: Քննարկման ընթացքում կարծիքներ են փոխանակվել նաև միջին մասնագիտական կրթության ոլորտում հունական ուսումնական հաստատությունների հետ համագործակցության և  համատեղ կրթական ծրագրերին առնչվող հարցերի վերաբերյալ: Հանդիպումն անցել է կառուցողական և փոխադարձ վստահության ջերմ մթնոլորտում:  
11:02 - 03 հունիսի, 2022
Վարչապետ Նիկոլ Փաշինյանը շնորհավորական ուղերձ է հղել  շրջանավարտներին

Վարչապետ Նիկոլ Փաշինյանը շնորհավորական ուղերձ է հղել շրջանավարտներին

Նիկոլ Փաշինյանը շնորհավորական ուղերձ է հղել Վերջին զանգի առթիվ. «Հանրակրթական դպրոցների սիրելի՛ շրջանավարտներ, շնորհավորում եմ բոլորիդ Վերջին դասի առիթով:  Այսօր հատում եք ձեր կյանքի ամենակարեւոր սահմանագծերից մեկը. մանկությունից անցում եք կատարում դեպի հասուն կյանք, որի առաջին քայլերը ձեզ սպասում են արդեն շաբաթներ անց, երբ պիտի որոշումներ կայացնեք, որոնք ուղիղ ազդելու են ձեր հետագա ողջ կյանքի էության ու որակի վրա:  Խոսքը, իհարկե, առաջին հերթին մասնագիտության ընտրության մասին է, եւ հույս ունեմ, որ մեր սիրելի ուսուցիչները դպրոցական տարիներին ձեզ կարողացել են օժտել այնպիսի հմտություններով, որ կկարողանաք ճիշտ որոշում կայացնել:  Իսկ ո՞րն է ճիշտ որոշումը. ընտրել մասնագիտություն, զբաղմունք, որ սիրում եք ինքներդ եւ ոչ թե ուրիշները: Ընտրել մասնագիտություն, որը անելիք կդառնա ձեզ համար, ամեն օր հնարավորինս վաղ արթնանալու եւ հաճույքով աշխատանքի գնալու մոտիվացիա կհաղորդի ձեզ եւ օգուտ կբերի ուրիշներին:  Ես հավատում եմ, որ յուրաքանչյուր մարդ առաքելություն ունի այս կյանքում: Ձեզնից յուրաքանչյուրը առաքելություն ունի այս կյանքում եւ մասնագիտության ճիշտ ընտրությունը, հոգով եւ սրտով ընտրությունը առաքելությունը գտնելու գործընթաց է, որը թերեւս ամենակարեւոր որոշումն է, որ պիտի կայացնեք առաջիկայում:  Չեմ ուզում, որ գնաք երբեմն ոչինչ չտվող դիպլոմների ետեւից, ուզում եմ գնաք առաքելության ետեւից, լինի դա ուսուցչի, գիտնականի, բժշկի, զինվորականի, գործարարի, արվեստագետի, ինժեների, ոստիկանի, դատավորի, խոհարարի, շինարարի, փականագործի, զոդողի, մատուցողի, ֆերմերի, հյուսնի առաքելություն:  Ուզում եմ հավատաք աշխարհը դեպի լավը փոխելու, մեր հայրենիքը դեպի լավը փոխելու ձեր առաքելությանը, ուզում եմ հավատաք նաեւ քաղաքացիական ձեր առաքելությանը, որովհետեւ շատ շուտով արդեն երկրի ապագայի մասին որոշումներ կայացնելու հնարավորություն եք ունենալու՝ որպես ընտրող: Ես հավատում եմ ձեզ եւ ուզում եմ, որ դուք էլ լիարժեք հավատաք ձեզ ու ձեր ապագային: Ցանկացած պարագայում այդ ապագայի երաշխիքը իմացությունն է, գիտելիքը, հմտությունը:  Հարգարժա՛ն ուսուցիչներ, Շնորհավորում եմ նաեւ ձեզ, եւ գիտեմ, որ այսօր ձեզնից եւ ձեր աշակերտներից շատերի աչքերին արցունքներ են հայտնվելու: Այդ զգացմունքներից անդին պատասխանատվությունն է, մեր ու ձեր համատեղ պատասխանատվությունը այսօր դպրոցից հեռացող աշակերտների հետագա ճակատագրի համար:  Մեր հայրենիքը անցնում է դժվար ժամանակներով, եւ ուզում եմ վերահաստատել, որ բոլոր այն խնդիրները, որ մենք ունենք, դրանց լուծումը նախ կրթության ոլորտում պիտի փնտրենք եւ գտնենք, որովհետեւ այդ բոլոր, առանց բացառության բոլոր պրոբլեմները սաղմնավորվել են հենց նախնական դպրոցական կամ հանրակրթության մակարդակում, երբեմն ու հաճախ բառիս բուն իմաստով դրանց բացակայության կամ կիսակատարության հետեւանքով:  Այսօր մեր կառավարությունը լայնամասշտաբ բարեփոխումներ է իրականացնում հանրակրթության ոլորտում: Այդ բարեփոխումների առանցքում որակյալ կրթության հասանելիությունն է եւ ուսուցչի դերի բացառիկության ընդգծումը՝ սրանից բխող բոլոր հետեւանքներով եւ արդյունքներով: Կառավարության երեկվա նիստում հայտարարեցի, որ կրթության ոլորտի որակյալ բարեփոխումը մեր ամենակարեւոր անելիքն է, եւ մենք ավելի կարեւոր ոչինչ չունենք անելու: Սրանում ոչ մի չափազանցություն չկա:   Սիրելի՛ ուսուցիչներ, սիրելի շրջանավարտներ, Այսօր վերջին դասն է դպրոցում, բայց կյանքը ամեն օր մեզ դասեր է տալիս, եւ մեզ բոլորիս բարձր առաջադիմություն եմ մաղթում այդ ցկյանս ուսումնառության ընթացքում: Հանուն մեր հայրենիքի, հանուն մեր սերունդների, հանուն մեր նահատակների»։
09:19 - 03 հունիսի, 2022
Բռնցքամարտի ֆեդերացիայի նախագահն ամփոփեց Երևանում կայացած Եվրոպայի առաջնությունը   |armenpress.am|

Բռնցքամարտի ֆեդերացիայի նախագահն ամփոփեց Երևանում կայացած Եվրոպայի առաջնությունը |armenpress.am|

armenpress.am: Հայաստանի բռնցքամարտի ֆեդերացիայի նախագահ Հովհաննես Հովսեփյանը գոհ չէ Եվրոպայի առաջնությունում մեր մարզիկների գրանցած արդյունքներից: «Առաջին հերթին շնորհակալ եմ հավաքական թիմին` գլխավոր մարզիչ Կարեն Աղամալյանին: Մեր հավաքականը լուրջ պայքար է մղել, մեր տղաներից յուրաքանչյուրի համար գլուխներս չենք կախել: Այն մենամարտերում, որոնցում պարտվել ենք, շատ մոտ ենք եղել հաղթանակին: Սակայն գրանցած արդյունքից գոհ չենք: Գոնե երկու ոսկե մեդալի հույս ունեինք: Լիահույս եմ, որ ապագայում թե մրցավարական սխալները, թե մեր թույլ տված սխալները շտկելու ենք: Մեր մարզիկների 7 պարտության ժամանակ ես համաձայն չէի մրցավարների որոշման հետ»,- լրագրողների հետ հանդիպման ժամանակ ասաց  բռնցքամարտի ֆեդերացիայի նախագահը: Վերջինս անդրադարձավ նաև մրցավարական սխալներին ուղղված բողոքներին՝ շեշտելով, որ հունիսի 25-ի համաժողովի ժամանակ կքննարկվի նաև այս հարցը: Ֆեդերացիայի նախագահն առանձնացրեց, որ մրցավարական և երկրպագուների ոչ սպորտային պահվածքը երևանյան մրցաշարում բացասական հետևանք չի թողնի մեր երկրի հեղինակության վրա: «Միջազգային գործընկերներից բարձր գնահատական ենք ստացել որակապես այլ մակարդակի մրցաշար կազմակերպելու համար: Հիմա արդեն քննարկում են հետագայում Հայաստանում աշխարհի առաջնություն անցկացնելու գաղափարը»,- ասաց նա: Ասուլիսի ընթացքում ֆեդերացիայի նախագահը Եվրոպայի առաջնության ոսկե մեդալի և գոտու կրկնօրինակը նվիրեց Արթուր Բազեյանին ի նշան աջակցության:
13:59 - 02 հունիսի, 2022