Միացյալ Թագավորություն

Պետական կարգը՝ միապետություն
Մայրաքաղաքը՝ Լոնդոն
Տարածքը՝ 244 հզ. կմ
Բնակչությունը՝ 59,8 մլն
Պետական լեզուն՝ անգլերեն
Դրամական միավորը՝ ֆունտ ստեռլինգ

Միացյալ Թագավորությունն ունի մասամբ կարգավորվող շուկայական տնտեսություն։ Ըստ շուկայական փոխարժեքների՝ Միացյալ Թագավորությունը համարվում է աշխարհում 8-րդ և Եվրոպայում 2-րդ (Գերմանիայից հետո) ամենամեծ տնտեսություն ունեցող պետությունը։ Թագուհու գանձապետարանը, որը գլխավորում է կանցլերը, պատասխանատու է բրիտանական կառավարության կողմից հասարակական ֆինանսական և տնտեսական քաղաքականության մշակման և կիրառման համար։

Անգլիայի բանկը կամ Միացյալ Թագավորության կենտրոնական բանկը պատասխանատու է ազգային արտարժույթի՝ ֆունտ ստերլինգի թողարկման համար։ Տուրիզմը համարվում է բրիտանական տնտեսության ամենակարևոր մասը, և 2004թ․ 27 մլն զբոսաշրջիկներով պետությունը զբաղեցնում է 6-րդ տեղը համաշխարհային տուրիզմի շարքերում, իսկ Լոնդոնը համարվում է զբոսաշրջիկների կողմից ամենաշատ այցելվող քաղաքը աշխարհում։

Բրիտանիայի ԶՈւ փոխպետքարտուղարը Բաքվում հանդիպել է Ալիևին և Հասանովին |civilnet.am|

civilnet.am: Մեծ Բրիտանիայի զինված ուժերի փոխպետքարտուղար Ջեյմս Հիփին այսօր՝ մարտի 30-ին, այցելել է Ադրբեջան, հայտնում է Haqqin.az-ը: Բրիտանացի պաշտոնյան հանդիպումներ է ունեցել Ադրբեջանի նախագահ Իլհամ Ալիևի և պաշտպանության նախարար Զաքիր Հասանովի հետ։ Ադրբեջանի և Մեծ Բրիտանիայի զինված ուժերի ներկայացուցիչները քննարկել են երկկողմ համագործակցության հարցեր, ինչպես նաև անդրադարձել են Արցախում և հայ-ադրբեջանական սահմանին տիրող իրավիճակին։

18:32 - 30 մարտի, 2022

Մեծ Բրիտանիան դադարեցնում է պետականորեն ֆինանսավորվող գիտահետազոտական և ինովացիոն համագործակցությունները Ռուսաստանի հետ

Գիտությունը անհաղթահարելի ուժ է՝ խաղաղ համագործակցության համար։ Ազատ և բաց ակադեմիական դիսկուրսի միջոցով մենք կարող ենք օգուտներ բերել մարդկությանն ու աշխարհին, քանի որ ձգտում ենք լուծելու մեր ժամանակի ամենահրատապ մարտահրավերները: Այս մասին հայտարարություն է տարածել Մեծ Բրիտանիայի կառավարությունը։ «Սարսափելի ներխուժումը (ՌԴ-ի՝ Ուկրաինա ներխուժումը- խմբ․) պահանջում է, որ մենք բոլորս մեր դիրքորոշումն արտահայտենք և մեր համերաշխությունն ու աջակցությունը ցուցաբերենք Ուկրաինային։ Կառավարությունը որոշում է կայացրել դադարեցնելու պետականորեն ֆինանսավորվող գիտահետազոտական և ինովացիոն համագործակցությունները ռուսական համալսարանների և ռուսական այն ընկերությունների հետ, որոնք ռազմավարական նշանակություն, շահ ունեն ՌԴ-ի համար»,- նշված է հայտարարության մեջ։ Նշվում է, որ նպատակն է միջոցներ ձեռնարկել, որոնք բացասաբար կանդրադառնան ռուսական պետության և Կրեմլի հետ ամուր կապեր ունեցող անձանց ու կազմակերպությունների վրա, այլ ոչ թե սանկցիաներ կիրառել՝ ընդդեմ առանձին ռուս գիտնականների կամ նորարարների, որոնք բարենպաստ հետազոտական հետաքրքրություններ ունեն: «Հետևաբար մենք նախաձեռնում ենք հետևյալ գործողությունները․ 1․ Մեծ Բրիտանիայի հանրային հետազոտական ֆոնդերի միջոցով ռուսական նախագծերի բոլոր վճարումները դադարեցվել են: Ես հանձնարարել եմ մեկուսացնելլ և սառեցնել գործողությունները, որոնք օգուտ են բերում ռուսական ռեժիմին: 2․ Մենք չենք ֆինանսավորի որևէ նոր համագործակցային նախագիծ Ռուսաստանի հետ մեր հետազոտական և ինովացիոն կազմակերպությունների միջոցով։ 3․ Մենք կասեցրել ենք երկու երկրների կառավարությունների երկխոսությունը Ռուսաստանում մեր գիտության և ինովացիոն ցանցի թիմի միջոցով, ներառյալ համատեղ գիտական նախագծերը: 4․ Այնտեղ, որտեղ Միացյալ Թագավորությունը բազմակողմ կազմակերպությունների անդամ է, գործընկերների հետ համընթաց աշխատում է՝ համապատասխան արձագանքելու՝ Ռուսաստանին պատասխանատվության ենթարկելով իր գործողությունների համար՝ միաժամանակ նվազեցնելով և մեկուսացնելով նրա ազդեցությունը: 5․ Մենք 3 միլիոն ֆունտ ստեռլինգ աջակցության փաթեթ ենք ներկայացնում ուկրաինացի հետազոտողների համար, որոնք ռիսկի տակ են: Մենք կանգնած ենք Ուկրաինայի, նրա՝ ժողովրդավարական ճանապարհով ընտրված կառավարության և նրա խիզախ ժողովրդի կողքին այս սարսափելի պահին»,- նշված է Միացյալ Թագավորության կառավարության հայտարարության մեջ։

19:22 - 27 մարտի, 2022

Բորիս Ջոնսոնը հայտարարել է, որ «դժվար է» բավարարել Ուկրաինայի՝ ռազմական ինքնաթիռներ և տանկեր ուղարկելու խնդրանքը

ՆԱՏՕ, ԵՄ և «Մեծ յոթնյակի» (G7) առաջնորդները Բրյուսելում երեկ արտակարգ հանդիպումներ են անցկացրել՝ քննարկելու Ուկրաինայում իրավիճակը։ Հանդիպումներից հետո Մեծ Բրիտանիայի վարչապետ Բորիս Ջոնսոնը ասուլիս է տվել, որի ընթացքում նախազգուշացրել է, որ եթե ՌԴ նախագահ Պուտինը քիմիական զենք օգտագործի, ապա դրա հետևանքները «աղետալի կլինեն նրա համար»։ Այս մասին հայտնում է BBC-ն։ Բորիս Ջոնսոնը նաև ասել է, որ Մեծ Բրիտանիայի կառավարությունը նախատեսում է Ուկրաինա ուղարկել ևս 6000 հրթիռ, ինչպես նաև լրացուցիչ 25 միլիոն ֆունտ ստեռլինգ աջակցություն՝ օգնելու Ուկրաինային վճարել աշխատավարձերը զինված ուժերում։ Նա նաև խոստացել է բրիտանական նոր զորքեր տեղակայել Բուլղարիայում՝ ի հավելումն Լեհաստանում և Էստոնիայում զորքերի կրկնապատկմանը: Ջոնսոնը հավելել է, որ արևմտյան երկրները ձգտում են «անշեղորեն ավելացնել» ռազմական սարքավորումների քանակը, որոնք ուղարկում են Ուկրաինա, սակայն «դժվար է» բավարարել Ուկրաինայի խնդրանքը՝ ռազմական ինքնաթիռներ և տանկեր ուղարկելու մասով: Ավելի վաղ Ուկրաինայի նախագահ Վլադիմիր Զելենսկին ՆԱՏՕ-ին ասել էր, որ խնդրում է «Դաշինքի բոլոր ինքնաթիռների 1%-ը և բոլոր տանկերի 1%-ը»: Ջոնսոնն ասուլիսի ընթացքում ասել է. «Նախագահ Զելենսկին փորձում է ազատել Մարիուպոլը և օգնել քաղաքում գտնվող հազարավոր ուկրաինացի մարտիկներին: Այդ նպատակով նրան, ինչպես ինքն է ասում, զրահատեխնիկա է պետք։ Մենք փորձում ենք հասկանալ, թե ինչ կարող ենք անել օգնելու համար: Բայց լոգիստիկ առումով դա շատ դժվար է թվում և՛ զրահատեխնիկայի, և՛ ինքնաթիռների մասով»,- ասել է Մեծ Բրիտանիայի վարչապետը: Ջոնսոնը հավելել է, որ արևմտյան ոչ մի ուժ չի ձգտում «ոչ թռիչքային» գոտի սահմանել Ուկրաինայի երկնքում։

13:29 - 25 մարտի, 2022

Մեծ Բրիտանիան նոր պատժամիջոցներ է սահմանել Ռուսաստանի դեմ

Մարտի 24-ին՝ Ռուսաստանի՝ Ուկրաինա ներխուժման մեկնարկից ուղիղ մեկ ամիս անց, Մեծ Բրիտանիան նոր պատժամիջոցներ է սահմանել Ռուսաստանի դեմ։ Այս անգամ սառեցվել են «Ալֆա Բանկ»-ի, «Գազպրոմբանկ»-ի, «Ռոսսելխոզբանկ»-ի ակտիվները։ Այս մասին հայտնում է BBC-ն։ Բացի այդ՝ պատժամիջոցների տակ են հայտնվել «ԱԼՌՈՍԱ» ավիաընկերությունը, «Ռուսական երկաթուղիները» և այլք: Պատժամիջոցներն ուղղված են «ՌԴ իշխանությունների համար ռազմավարական նշանակություն ունեցող բանկերի, արդյունաբերության ոլորտների և անհատների» դեմ: Սև ցուցակում են նաև «Sberbank»-ի ղեկավար Գերման Գրեֆը, «Tinkoff Bank»-ի հիմնադիր Օլեգ Տինկովը, Ռոման Աբրամովիչի երկարամյա բիզնես գործընկեր և «Millhouse»-ի նախկին ղեկավար Եվգենի Շվիդլերը և շատ ուրիշներ (ընդհանուր՝ 33 մարդ):

14:04 - 24 մարտի, 2022

ՀՀ նախագահը հանդիպել է Միացյալ Թագավորության դեսպան Ջոն Գալագերի հետ

Հանրապետության նախագահ Վահագն Խաչատուրյանն այսօր հանդիպում է ունեցել Հայաստանի Հանրապետությունում Միացյալ Թագավորության արտակարգ և լիազոր դեսպան Ջոն Գալագերի հետ: Դեսպան Ջոն Գալագերը շնորհավորել է նախագահ Խաչատուրյանին պաշտոնը ստանձնելու կապակցությամբ և հաջողություններ մաղթել: Հանդիպմանը մտքեր են փոխանակվել հայ-բրիտանական երկկողմ հարաբերությունների, տարածաշրջանային անվտանգության հարցերի շուրջ:

18:28 - 23 մարտի, 2022

Բայդենը Ուկրաինայի իրավիճակը քննարկել է Ֆրանսիայի, Գերմանիայի, Բրիտանիայի և Իտալիայի ղեկավարների հետ

ԱՄՆ նախագահ Ջո Բայդենը հեռախոսազրույց է ունեցել Ֆրանսիայի նախագահ Էմանուել Մակրոնի, Գերմանիայի կանցլեր Օլաֆ Շոլցի, Իտալիայի վարչապետ Մարիո Դրագիի և Միացյալ Թագավորության վարչապետ Բորիս Ջոնսոնի հետ: Այս մասին հայտնում է Սպիտակ տան մամուլի ծառայությունը։ «Առաջնորդները քննարկել են իրենց լուրջ մտահոգությունները՝ Ուկրաինայում Ռուսաստանի դաժան գործողությունների, այդ թվում՝ խաղաղ բնակչության վրա հարձակումների վերաբերյալ: Նրանք ընդգծել են իրենց շարունակական աջակցությունը Ուկրաինային, այդ թվում՝ անվտանգության աջակցության ցուցաբերելումը խիզախ ուկրաինացիներին, որոնք պաշտպանում են իրենց երկիրը ռուսական ագրեսիայից, և մարդասիրական օգնություն տրամադրումը միլիոնավոր ուկրաինացիներին, որոնք փախել են բռնությունից: Ղեկավարները նաև դիտարկել են դիվանագիտական գործողությունները՝ աջակցելու Ուկրաինայի ջանքերին՝ հրադադարի հասնելու համար:

10:36 - 22 մարտի, 2022

Ռուսական զորքերի հիմնական մասը Կիևից 25 կմ հեռավորության վրա է մնում․ Մեծ Բրիտանիայի հետախուզություն |factor.am|

factor.am: Կիևը շարունակում է մնալ ռուսական զորքերի հիմնական թիրախը՝ չնայած հարձակողական գործողությունների ձախողմանը։ Առաջիկա շաբաթներին ՌԴ-ն կարող է փորձել շրջափակել Ուկրաինայի մայրաքաղաքը։ Այս մասին Twitter-ում հայտնել է Մեծ Բրիտանիայի հետախուզությունը։ Աղբյուրի փոխանցմամբ՝ Ռուսաստանի ուժերի 2/3-ը, հյուսիս-արևելքից առաջ շարժվելով դեպի քաղաք, կանգ է առել։ Գոստոմելից դեպի հյուսիս-արևմուտք առաջացող ռուսական զորքերը հետ են մղվել ուկրաինացիների համառ դիմադրությամբ։ Ռուսների հիմնական մասը մնում է Կիևի կենտրոնից ավելի քան 25 կիլոմետր հեռավորության վրա։

15:53 - 21 մարտի, 2022

Այս պատերազմի համար պատասխանատվություն է կրում միայն Պուտինի ռեժիմը․ դեսպան Ջոն Գալագեր |azatutyun.am|

azatutyun.am: Այս պատերազմի համար պատասխանատվություն է կրում միայն Վլադիմիր Պուտինի ռեժիմը, «Ազատության» «Կիրակնօրյա վերլուծական Հրայր Թամրազյանի հետ» հաղորդման ժամանակ ասաց Հայաստանում Մեծ Բրիտանիայի դեսպան Ջոն Գալագերը՝ շեշտելով՝ նրա ընտրությունն էր հարձակվել անկախ, ինքնիշխան պետության վրա և նրանք պետք է բացատրություններ տան իրենց դրդապատճառների վերաբերյալ: Ընդգծելով, որ այս հարձակումը չարդարացված ու չհրահրված էր՝ Գալագերը նկատեց՝ միջազգային հանրությունը դատապարտել է այն։ «Կարծում եմ, որ մենք աշխարհում տեսանք համերաշխության մեծ դրսևորում: Միահամուռ կերպով մշակվեց լայն պատժամիջոցների փաթեթը, որը, իմ կարծիքով, շատ արդյունավետ է՝ Վլադիմիր Պուտինի համակարգը և կառույցները թիրախավորելու առումով: Այն ցույց է տալիս, որ Ռուսաստանն իրական գին կվճարի այս պատերազմը սկսելու համար: Կարծում եմ, որ սա իսկապես ապացուցում է, որ միջազգային հանրությունը հանձնառու է պահպանել համամարդկային արժեքները՝ հարգել երկրների ինքնիշխանությունը և իրենց ապագան ընտրելու իրավունքը: Կարծում եմ, որ Ռուսաստանի գործողություններին նման պատասխանը աննախադեպ է: Այն արդյունավետ է այն առումով, որ շատ հստակ ուղերձ է հղում, որ նմանատիպ ագրեսիան արդարացված չէ ու որ մենք մի կողմ չենք քաշվում, երբ նման բան է տեղի ունենում», - ասաց դեսպանը։ Գալագերի խոսքով՝ Մեծ Բրիտանիան շատ հստակ նպատակաուղղված գործողություններ է ձեռնարկել այն ռուս օլիգարխների դեմ, ովքեր Միացյալ Թագավորությունում ունեն բիզնես շահեր, ֆինանսական միջոցներ կամ այլ ունեցվածք: «Եթե չեմ սխալվում, նրանցից մոտավորապես 300-ի նկատմամբ պատժամիջոցներ են կիրառվել: Սա նշանակում է, որ նրանք չեն կարողանալու օգտագործել Միացյալ Թագավորությունը որպես գումարները շարժելու կամ իրենց միջոցները թաքցնելու միջոց», - ասաց դեսպանը: Դեսպանի հետ հարցազրույցն ամբողջությամբ կարող եք դիտել այստեղ։

13:41 - 21 մարտի, 2022

Մեծ Բրիտանիայի վարչապետ Բորիս Ջոնսոնը Պուտինի հետ նորմալ հարաբերություններին վերադարձ չի տեսնում

Մեծ Բրիտանիայի վարչապետ Բորիս Ջոնսոնը շաբաթ օրը` մարտի 19-ին, հայտարարել է, որ սխալ կլինի կարգավորել հարաբերությունները ՌԴ նախագահ Վլադիմիր Պուտինի հետ՝ Ռուսաստանի՝ Ուկրաինա ներխուժումից հետո։ Այս մասին հայտնում է «Reuters»-ը։ «Սրանից հետո Պուտինի հետ հարաբերությունները վերականգնելու փորձը, ինչպես մենք արեցինք 2014 թվականին, կնշանակի նորից նույն սխալը թույլ տալ»,- ասել է Ջոնսոնը Պահպանողական կուսակցության համաժողովում։

21:27 - 19 մարտի, 2022

Արևմուտքը պետք է ապահովի, որ «այլևս երբեք խոցելի չի լինի Պուտինի շանտաժների առաջ». Բորիս Ջոնսոն

Ուկրաինան «վճարում է այն բանի գինը», որ Արևմուտքը չի կարողացել հասկանալ Վլադիմիր Պուտինից եկող սպառնալիքը։ Այս մասին BBC-ին տված հարցազրույցում հայտարարել է Մեծ Բրիտանիայի վարչապետ Բորիս Ջոնսոնը։ Բորիս Ջոնսոնն ասել է, որ Ռուսաստանի նախագահի «ներխուժումն արդեն ձախողվել է», քանի որ նա թերագնահատել է Ուկրաինայում «դիմադրության ուժը»: Խոսելով Ուկրաինայում տեղի ունեցողից՝ Ջոնսոնն ասել է, որ ՌԴ նախագահ Պուտինն այնտեղ «ռազմական հանցագործություններ է կատարում»։ Ջոնսոնը նաև մեղադրել է եվրոպական երկրներին, որոնք «սկսել են կրկին Պուտինին վերաբերվել որպես իրենց համայնքի մի մասի»՝ 2014 թվականին «Ղրիմի բռնակցումից հետո»։ Բորիս Ջոնսոնը, որն այցելել էր Սաուդյան Արաբիա՝ քննարկելու էներգետիկ անվտանգություն, BBC-ին ասել է՝ Արևմուտքը պետք է ապահովի, որ «այլևս երբեք խոցելի չի լինի Պուտինի շանտաժների առաջ», հատկապես երբ խոսքը վերաբերում է ռուսական նավթին և գազին ապավինելուն: Իր ուղևորության ընթացքում Ջոնսոնը հանդիպել էր Սաուդյան Արաբիայի գահաժառանգ արքայազն Մուհամեդ բին Սալմանին՝ ռուսական նավթից և գազից կախվածությունը դադարեցնելու շուրջ բանակցությունների նպատակով։ Դրանից հետո վարչապետի աշխատակազմը հայտնել էր, որ Մեծ Բրիտանիան և Սաուդյան Արաբիան համաձայնել են համագործակցել էներգիայի շուկայում կայունությունը պահպանելու և վերականգնվող էներգիայի աղբյուրները խթանելու ուղղությամբ: Ջոնսոնը հարցազրույցի ընթացքում ասել է, որ նախատեսում է ուշադրություն դարձնել արևային, քամու և միջուկային էներգիային՝ «մի քանի մեծ խաղադրույքներ կատարելու նպատալով», սակայն կարճաժամկետ լուծումներ նույնպես անհրաժեշտ են: «Մեծ Բրիտանիան Սաուդյան Արաբիայի հետ պատմական և երկարատև հարաբերություններ ունի,- ասել է Բորիս Ջոնսոնն ու հավելել,- Դա ոչ մի կերպ չպետք է խանգարի մեզ բարձրացնել մարդու իրավունքների հարցերը [Սաուդյան Արաբիայում]»։

14:47 - 17 մարտի, 2022

Ռուսական ներխուժումն Ուկրաինա դանդաղել է բոլոր ուղղություններով․ Մեծ Բրիտանիայի ՊՆ

Լուսանկարը՝ AP Ռուսական ներխուժումն Ուկրաինա զգալիորեն դանդաղել է բոլոր ուղղություններով, հայտնում է Մեծ Բրիտանիայի պաշտպանության նախարարությունը թվիթերյան իր էջում։ «Վերջին օրերին ռուսական զորքերը նվազագույն առաջընթաց են գրանցել ցամաքում, ծովում և օդում և շարունակում են մեծ կորուստներ կրել։ Ուկրաինայի դիմադրությունը կայուն է և լավ համակարգված։ Ուկրաինայի տարածքի մեծ մասն, այդ թվում՝ խոշոր քաղաքներն, ուկրաինացիների ձեռքում են»։ Նորա Վանյան

13:16 - 17 մարտի, 2022

ՌԴ ՊՆ-ն կհրապարակի ուկրաինական կենսալաբորատորիաների մշակումների վերաբերյալ նոր փաթեթ

Ռուսաստանի Դաշնության պաշտպանության նախարարությունը կհրապարակի ուկրաինական կենսալաբորատորիաների մշակումների վերաբերյալ նոր փաթեթ, որը ստացել է լաբորատորիաների աշխատակիցներից, և կներկայացնի փորձաքննության արդյունքները։ Այս մասին այսօր մամուլի ասուլիսի ընթացքում հայտարարել է ՌԴ ՊՆ պաշտոնական ներկայացուցիչ Իգոր Կոնաշենկովը, հաղորդում է «ՏԱՍՍ»-ը։ «Նոր փաստաթղթեր կներկայացվեն այն մասին, որ Ուկրաինայի տարածքից մարդու կենսանյութերի մեծ քանակ է տեղափոխվել Մեծ Բրիտանիա և եվրոպական այլ երկրներ։ Առաջիկայում մենք կհրապարակենք կենսալաբորատորիաների ուկրաինացի աշխատակիցներից ստացած փաստաթղթերի նոր փաթեթը և կներկայացնենք դրանց փորձաքննության արդյունքները»,- ասել է նա։ Կոնաշենկովի խոսքով ՌԴ պաշտպանության նախարարությունը շարունակում է ուկրաինական լաբորատորիաների աշխատակիցներից ստացաած փաստաթղթերի ուսումնասիրությունը՝ Վաշինգտոնի և ՆԱՏՕ-ի նրա դաշնակիցների կողմից երկրում ռազմակենսաբանական ծրագրերի իրականացման վերաբերյալ։ Հիշեցնենք, որ ավելի վաղ ՌԴ ՊՆ պաշտոնական ներկայացուցիչ Իգոր Կոնաշենկովի հայտարարությունը լրագրողների հետ հանդիպմանը հայտնել էր, որ Ռուսաստանի Զինված ուժերը փաստեր են բացահայտել Ուկրաինայում իրականացվող ռազմակենսաբանական ծրագրի իրականացման մասին, որը ֆինանսավորում է ԱՄՆ-ն։ Սպիտակ տան մամուլի քարտուղար Ջեն Փսակին էլ հայտնել էր, որ ԱՄՆ-ն ամբողջությամբ կատարում է իր պարտավորությունները «Քիմիական զենքի» կոնվենցիայի և «Կենսաբանական զենքի» կոնվենցիայի շրջանակներում, որևէ վայրում չի մշակում կենսաբանական զենք կամ չի տիրապետում դրան։

12:39 - 17 մարտի, 2022

ՀՀ ԱԻ նախարարը և ՄԹ դեսպանը քննարկել են արտակարգ իրավիճակների բնագավառում հայ-բրիտանական համագործակցությանն առնչվող հարցեր

ՀՀ ԱԻ նախարար Անդրանիկ Փիլոյանը երեկ ընդունել է Հայաստանում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ջոն Գալագերին: Հանդիպմանը մասնակցել է նաև դեսպանատան պաշտպանության ոլորտում համագործակցության հարցերով պատասխանատու Անդրանիկ Իսրայելյանը: Նախարար Փիլոյանն անդրադարձել է արտակարգ իրավիճակների բնագավառում հայ-բրիտանական համագործակցությանը: Բարձր գնահատելով հանատեղ իրականացված ուսումնական ծրագրերը՝ Ա. Փիլոյանը մասնավորապես նշել է Բրիտանական խորհրդի հետ համատեղ 2014 թ. մինչ օրս ՀՀ ԱԻՆ INSARAG չափանիշներին համապատասխան հիմնական և պահեստային թիմերի և ԱԻՆ աշխատակիցների համար իրականացվող անգլերեն լեզվի ուսուցման դասընթացների արդյունավետությունը: Հաջողված փորձից ելնելով նախարարն առաջարկել է ընդլայնել անգլերենի ուսուցման ծրագրի շրջանակը: 2020-2022 թթ. Միացյալ Թագավորության կառավարության «Հակամարտային կայունության և անվտանգության հիմնադրամ»ի (UK CSSF) ֆինանսավորմամբ, ՄԱԿ-ի Մանկական հիմնադրամի (Յունիսեֆ), «Աղետների ռիսկի նվազեցման ազգային պլատֆորմ» (ԱՌՆԱՊ) հիմնադրամի և Արտակարգ իրավիժակների նախարարության հետ համատեղ, «Երեխաների անվտանգության և դիմակայունության հզորացումը՝ Վայոց ձորի, Գեղարքունիքի և Սյունիքի մարզերի սահմանամերձ համայնքների դպրոցներում» ծրագրի շրջանակներում 55 հանրակրթական դպրոցների համար մշակվել են աղետների ռիսկի կառավարման պլաններ։ 55 հանրակրթական դպրոցներից 29-ում անցկացվել են աղետների ռիսկի կառավարման տարաբնույթ թեմաներով դասընթացներ: Նախարարի խոսքով՝ հաջորդ փուլում նախատեսվում է վերոնշյալ դպրոցներում անցկացնել ուսումնավարժություններ՝ երկրաշարժի և հրդեհի սցենարներով։ Անդրանիկ Փիլոյանն առաջարկել է դիտարկել նաև ԱԻՆ «Սեյսմիկ պաշտպանության տարածքային ծառայության» և Բրիտանական երկրաբանական ծառայության միջև համագործակցության ծավալման և համատեղ աշխատանքների իրականացման հնարավորությունը: Դեսպան Ջոն Գալագերին իր հերթին երախտագիտություն է հայտնել ընդունելության համար և պատրաստակամություն հայտնել՝ քննարկման դնել ոչ միայն գործող ծրագրերի շարունակականության, այլև համագործակցության նոր ուղղությունների հնարավորությունները:

11:40 - 16 մարտի, 2022

Մեծ Բրիտանիան տնտեսական նոր պատժամիջոցներ է սահմանել Ռուսաստանի դեմ

Մեծ Բրիտանիայի կառավարությունն այսօր Ռուսաստանի դեմ պատժամիջոցների նոր փաթեթ է հաստատել։ Արգելվել է բարձր դասի ճոխության ապրանքների արտահանումը Ռուսաստան, ներկրման նոր տուրքեր են սահմանվել մի շարք ապրանքների համար։ Ռուսաստանի և Բելառուսի համար հասանելի չեն լինի առավելագույն բարենպաստման ռեժիմի սակագներն արտահանման հարյուրավոր տեսակների համար, նրանք կզրկվեն Առևտրի համաշխարհային կազմակերպությանն անդամակցության առանցքային առավելություններից։ Մեծ Բրիտանիայի կառավարությունը հրապարակել է 900 մլն ֆունտ ստերլինգ արժողությամբ ապրանքների նախնական ցանկը, որոնց ներկրման համար կգործի 35% հավելյալ սակագին՝ ի հավելումն գործող սակագների։ Այս ցանկում ներառվել է նաև ռուսական օղին։ Մեծ յոթնյակի իր դաշնակիցների հետ մեկտեղ Լոնդոնը կարգելի նաև ճոխության ապրանքների արտահանումը Ռուսաստան։ «Արտահանման արգելքն ուժի մեջ կմտնի կարճ ժամկետներում և կնպաստի նրան, որ Պուտինի նախագահության ժամանակ հարստացած և նրա ապօրինի ներխուժումը սատարող օլիգարխներն ու էլիտայի մյուս ներկայացուցիչները զրկվեն ճոխության ապրանքներից»։, - ասված է կառավարության հայտարարությունում։ Նշվում է նաև, որ այս միջոցներն «առավելագույն վնաս կհասցնեն Պուտինի ռազմական մեքենային և նվազագույն ազդեցություն կունենան բրիտանական բիզնեսի վրա»։ Նորա Վանյան

19:01 - 15 մարտի, 2022

Մեծ Բրիտանիան հայտնել է ՌԴ-ի դեմ պատժամիջոցների նոր փաթեթի մասին

Մեծ Բրիտանիան երեքշբաթի հայտարարել է ՌԴ-ի դեմ պատժամիջոցների նոր փաթեթի մասին՝ ի պատասխան Ուկրաինայում ռուսական ռազմական գործողության։ Պատժամիջոցների փաթեթում ներառվել են կառավարության ավելի քան 370 անդամներ եւ տարածքային իշխանության մարմիններ, խոշոր գործարարներ՝ իրենց ընտանիքի անդամների հետ, նաեւ խորհրդարանականներ։ Ինչպես ասվում է պատժամիջոցների թարմացված ցանկում, որ տեղ է գտել կառավարության կայքում, նշված անձանց մուտքը Միացյալ Թագավորություն արգելված է, Մեծ Բրիտանիայի տարածքում նրանց ակտիվները կսառեցվեն, եթե նրանք հայտնաբերվեն։ Այսպես, սահմանափակումների տակ են հայտնվել կառավարության ղեկավար Միխայիլ Միշուստինը, Անվտանգության խորհրդի փոխնախագահ Դմիտրի Մեդվեդեւը, պաշտպանության նախարար Սերգեյ Շոյգուն, տնտեսական զարգացման նախարար Մաքսիմ Ռեշետնիկովը, փոխվարչապետ Մարատ Խուսնուլինը, նախագահի աշխատակազմի ղեկավար Անտոն Վայնոն, փոխվարչապետ Դմիտրի Չերնիշենկոն, գյուղատնտեսության նախարար Դմիտրի Պատրուշեւը, ներքին գործերի նախարար Վլադիմիր Կոլոկոլցեւը, տրանսպորտի նախարար Վիտալի Սավելեւը, Մոսկվայի քաղաքապետ Սերգեյ Սոբյանինը, Սանկտ-Պետերբուրգի նահանգապետ Ալեքսանդր Բեգլովը, եւ այլ պաշտոնատար անձինք։ Պատժամիջոցներ են սահմանվել ՌԴ արտգործնախարարության պաշտոնական ներկայացուցիչ Մարիա Զախարովայի, ՌԴ նախագահի մամուլի քարտուղար Դմիտրի Պեսկովի, նրա երեխաների ու կնոջ նկատմամբ։ Բացի դրանից՝ Մեծ Բրիտանիայում կսառեցվեն «Согаз» ապահովագրական ընկերության, «Геополитика.ru» կայքի, այլ ընկերությունների ու հարթակների ակտիվները։

18:54 - 15 մարտի, 2022

Մեծ Բրիտանիայում հայտարարել են, թե ռուսական զորքերը արգելափակել են Սև ծովի ուկրաինական ափը

Մեծ Բրիտանիայի պաշտպանության նախարարությունը հայտնել է, որ ռուսական զորքերը արգելափակել են Սև ծովի ուկրաինական ափը՝ երկիրը կտրելով միջազգային ծովային առևտրից։ Այս մասին, ինչպես փոխանցում է Unian-ը, ասվում է կիրակի նախարարության թվիթերյան միկրոբլոգում հրապարակված հաղորդագրության մեջ։ «Ռուսական ռազմածովային ուժերը հեռավոր շրջափակում են սահմանել Սև ծովի ուկրաինական ափում՝ փաստացի մեկուսացնելով երկիրը միջազգային ծովային առևտրից»,- ասվում է հաղորդագրության մեջ։ Ասվում է նաև, որ ռուսական նավատորմը «շարունակում է հրթիռային հարվածներ հասցնել թիրախներին Ուկրաինայի ողջ տարածքում», և որ Մոսկվան «մեկ դեսանտի վայրէջք է իրականացրել Ազովի ծովում ու կարող է «նման գործողություններ կազմակերպել առաջիկա շաբաթներին»: Լուսանկարը՝ Unian-ի

09:49 - 14 մարտի, 2022