ՌԴ

Ռուսաստանը (պաշտոնական անվանումը՝ Ռուսաստանի Դաշնություն) միջմայրցամաքային պետություն Եվրասիայի հյուսիսարևմտյան հատվածում։ Տարածքի հիմնական մասը գտնվում է Հյուսիսային Ասիայում, իսկ որոշակի հատված՝ նաև Արևելյան Եվրոպայում: ՌԴ-ն աշխարհի խոշորագույն պետությունն է և զբաղեցնում է երկրագնդի ցամաքային տարածքի 1/8-ը։ Բնակչության թվով 9-րդն է աշխարհում․ ըստ 2018-ի մարդահամարի տվյալների՝ ավելի քան 144 մլն մարդ։ Երկրի ազգաբնակչության 77%-ը կենտրոնացված է արևմուտքում՝ եվրոպական հատվածում։

Մայրաքաղաքն է Մոսկվան։ Վերջինս համարվում է Եվրոպայի խոշորագույն քաղաքը, ինչպես նաև խոշորագույններից մեկն ամբողջ աշխարհում։ ՌԴ նշանավոր քաղաքներից են նաև Սանկտ Պետերբուրգը, Նովոսիբիրսկը, Եկատերինբուրգը և Նիժնի Նովգորոդը։ Պետական լեզուն ռուսերենն է։ Խոշոր ազգային փոքրամասնություններն են թաթարները, ուկրաինացիները, բաշկիրները, հայերը, չուվաշները, չեչենները և այլն։

Ռուսաստանը նախագահական կառավարմամբ դաշնային հանրապետություն է, որտեղ նախագահը՝ պետության, իսկ վարչապետը՝ կառավարության ղեկավարն է։ ՌԴ գործող նախագահն է Վլադիմիր Պուտինը, վարչապետը՝ Միխայիլ Միշուստինը։

Գյումրիում ՌԴ հյուպատոս Ռուսլան Կանդաուրովը ընդունել է Շիրակի մարզի գերիների ծնողներին |armenpress.am|

armenpress.am: Խծաբերդում գերեվարվածների հարազատները մի քանի ժամ բողոքի ակցիա էին անցկացնում Գյումրիում՝ Ռուսաստանի Դաշնության հյուպատոսության մոտ։ Նրանք պահանջում են շտապ քայլեր ձեռնարկել՝ իրենց որդիներին գերությունից ազատելու ու տուն վերադարձնելու համար։ Գերիների ծնողների խնդրանքով հյուպատոսն ընդունեց 5 ծնողի։ Վերջինս խոստացել է ծնողների պահանջը փոխանցել Հայաստանում ՌԴ դեսպան Սերգեյ Կոպիրկինին։ Ծնողները հանդիպումից հետո հեռացել են հյուպատոսության մոտից։

14:25 - 28 հունիսի, 2022

Իրանը BRICS-ին միանալու հայտ է ներկայացրել |1lurer.am|

1lurer.am: Իրանը BRICS-ի խմբին (Բրազիլիա, Ռուսաստան, Հնդկաստան, Չինաստան, ՀԱՀ) միանալու հայտ է ներկայացրել, այդ հարցի շուրջ խորհրդակցություններ են անցկացվել՝ հայտնել է Իրանի արտգործնախարարության ներկայացուցիչ Սաիդ Խաթիբզադեն: Նա հույս է հայտնել, որ Իրանի անդամակցությունը BRICS-ին լրացուցիչ առավելություններ կբերի բոլոր կողմերին։ Օրերս նման հայտ էր ներկայացրել Արգենտինան։ Իրանի և Արգենտինայի կողմից հայտեր ներկայացնելու մասին տեղեկությունը հաստատել է ՌԴ ԱԳՆ պաշտոնական ներկայացուցիչ Մարիա Զախարովան:

13:02 - 28 հունիսի, 2022

Հաջողության բանալին մեր պետությունների առաջին դեմքերի արդյունավետ երկխոսությունն է. Ալեն Սիմոնյանը՝ Ալեքսեյ Գորդեեւին

ՀՀ ԱԺ նախագահ Ալեն Սիմոնյանը հունիսի 28-ին ընդունել է ՌԴ Դաշնային ժողովի Պետական դումայի նախագահի տեղակալ Ալեքսեյ Գորդեեւի գլխավորած պատվիրակությանը: ԱԺ-ից հայտնում են, որ Ազգային ժողովի նախագահը շեշտել է, որ համարժեք աշխատանքներ են տարվում տարբեր ոլորտներում հայ-ռուսական դաշնակցային հարաբերությունների հետագա զարգացման ուղղությամբ: Նա ընդգծել է, որ Հայաստանի եւ Ռուսաստանի միջեւ քաղաքական երկխոսությունը կայուն ռազմավարական բնույթ է կրում, եւ հաջողության բանալին մեր պետությունների առաջին դեմքերի արդյունավետ երկխոսությունն է: Այս համատեքստում Ալեն Սիմոնյանը կարեւորել է միջխորհրդարանական փոխգործակցությունը եւ չընդհատվող օրակարգերի առկայությունը: Կողմերը փաստել են, որ մտադիր են զարկ տալ երկրների փոխգործակցության դինամիկային` հաշվի առնելով տարածաշրջանի եւ միջազգային այլ հարթակների քաղաքական իրադարձությունները: Հանդիպմանը քննարկվել է գլոբալ ինտեգրացիոն գործընթացների պայմաններում հայ-ռուսական տնտեսական հարաբերությունների կարեւորությունը՝ առանձնակի անդրադառնալով Եվրասիական տնտեսական միության հեռանկարներին:

11:38 - 28 հունիսի, 2022

Ըստ ամերիկյան կողմի՝ Մինսկի խմբի ռուս համանախագահը չի ընդունել գործընկերների հրավերը՝ քննարկելու ԼՂ ապագան

ԵԱՀԿ Մինսկի խմբի ամերիկացի համանախագահն այսօր զրուցել է իր գործընկերների հետ՝ քննարկելու Լեռնային Ղարաբաղի ապագան։ Այս մասին նշված է ԱՄՆ պետդեպարտամենտի՝ Եվրոպայի և Եվրասիայի հարցերով Բյուրոյի թվիթերյան էջում: «Ցավոք, ռուսաստանցի համանախագահը չընդունեց հրավերը: Մենք անհամբեր սպասում ենք Մինսկի խմբի շարունակական աշխատանքին»,- նշված է հաղորդագրության մեջ: Հիշեցնենք, որ Ռուսաստանի ԱԳ նախարար Սերգեյ Լավրովը հունիսի 24-ին Բաքվում հայտարարել էր, որ Ադրբեջանի արտգործնախարարի հետ «չի քննարկել Մինսկի խմբի հարցը, որովհետև այն դադարեցրել է իր գործունեությունը՝ ԱՄՆ-ի և Ֆրանսիայի նախաձեռնությամբ»։

11:28 - 28 հունիսի, 2022

Բայդենն ու Մակրոնը դատապարտել են Ռուսաստանի կողմից Կրեմենչուգի առևտրի կենտրոնի հրթիռակոծումը, որում ավելի քան 1000 մարդ է եղել |tert.am|

tert.am: ԱՄՆ-ի և Ֆրանսիայի նախագահներ Ջո Բայդենը և Էմանուել Մակրոնը «սարսափելի» են որակել ռուսական զորքի հրթիռային հարվածն ուկրաինական Կրեմենչուգ քաղաքի առևտրի կենտրոնի վրա, որի հետևանքով տասնյակ խաղաղ բնակիչներ են զոհվել և վիրավորվել։Հունիսի 27-ին Ռուսաստանը հրթիռային հարված է հասցրել Կրեմենչուգի առևտրի կենտրոնին։ Հարվածի պահին առևտրի կենտրոնում ավելի քան 1000 այցելու է եղել: Վերջին տվյալներով՝ զոհվել է 16 մարդ, վիրավորվել՝ 59-ը, ավելի քան 40-ն անհետ կորել է։ Փրկարարները շարունակում են հետևանքների վերացումը և տուժածների որոնումը։

10:37 - 28 հունիսի, 2022

Ավտոճանապարհային կապը ՌԴ-ի հետ կվերականգնվի 2 ժամվա ընթացքում․ Վահան Քերոբյան

Ավտոճանապարհային կապը ՌԴ-ի հետ կվերականգնվի երկու ժամվա ընթացքում։ Այս մասին ֆեյսբուքյան իր էջում գրել է Էկոնոմիկայի նախարար Վահան Քերոբյանը։ «Հենց նոր զրուցեցի իմ վրացի գործընկեր, փոխվարչապետ եւ էկոնոմիկայի նախարար Լեւան Դավիթաշվիլիի հետ, ով հաղորդեց, որ ավտոճանապարհային կապը ՌԴ հետ կվերականգնվի երկու ժամվա ընթացքում»,- գրել է նա։ Հիշեցնենք, որ առատ տեղումների հետեւանքով վարարած գետերը վնասել են Վրաստանը Ռուսաստանին կապող ճանապարհի մի հատվածը ՌԴ հետ սահմանի մոտ, ինչի արդյունքում Վրաստանը ժամանակավորապես փակել է Ռուսաստանի հետ ցամաքային սահմանը։

22:12 - 27 հունիսի, 2022

G7-ը մտահոգ է Մինսկին միջուկային լիցք կրելու կարողությամբ հրթիռներ փոխանցելու ՌԴ որոշմամբ

Մեծ յոթնյակի (G7) երկրների առաջնորդները «լուրջ մտահոգություն» են հայտնել Ռուսաստանի այն հայտարարությունների առնչությամբ, որ նա կարող է Բելառուսին փոխանցել միջուկային լիցք կրելու կարողությամբ հրթիռներ, հայտնում է DW-ն։ G7-ը չարդարացված է անվանել Ռուսաստանի կողմից միջուկային հռետորաբանության կիրառումը և զգուշացրել է, որ քիմիական, կենսաբանական և միջուկային զենքի ցանկացած կիրառում լուրջ հետևանքներ է ունենալու։ Նշենք, որ հունիսի 25-ին Սանկտ Պետերբուրգում Բելառուսի նախագահ Ալեքսանդր Լուկաշենկոյի հետ հանդիպմանը ՌԴ նախագահ Վլադիմիր Պուտինը նշել էր, որ Մոսկվան մոտակա ամիսներին Մինսկ կուղարկի «Իսկանդեր-Մ» հրթիռային-մարտավարական համալիրներ, որոնք կարող են կրել ինչպես բալիստիկ, այնպես էլ թևավոր հրթիռներ՝ ինչպես սովորական, այնպես էլ միջուկային կոմպլեկտավորմամբ։ Հետևե՛ք մեզ նաև Telegram -ում։ Նորա Վանյան

19:44 - 27 հունիսի, 2022

ՌԴ ֆինանսների նախարարությունը պարզաբանել է, թե ինչու «դեֆոլտ» եզրը կիրառելի չէ Ռուսաստանի պարագայում

Ռուսաստանի ֆինանսների նախարարության կարծիքով՝ «դեֆոլտ» ձևակերպումը կիրառելի չէ ՌԴ տնտեսական դրության նկատմամբ, քանի որ միջազգային հաշվակային-քլիրինգային համակարգերը ստացել են միջոցները լիարժեք ծավալով, սակայն դրանք չեն հասցրել ստացողներին, գրում է «Կոմերսանտը»։ Ռուսաստանն ամբողջությամբ կատարել է 2026 և 2036 թթ-ին մարման ենթակա պետական արժեթղթերի սպասարկման իր պարտավորությունները՝ վճարելով €26,5 մլն, հայտարարել է գերատեսչությունը։ Այն նշել է, որ օտարերկրյա ֆինանսական միջնորդների գործողություններն իր վերահսկողությունից դուրս են, այդ պատճառով էլ նրանցից եվրոպարտատոմսերի համար վճարումներ չստանալը չի կարող ռուսական կողմի պատասխանատվության գոտի համարվել։ «Այս դեպքում ներդրողների կողմից գումար չստանալը տեղի է ունեցել ոչ թե վճարման բացակայության հետևանքով, այլ երրորդ անձանց գործողությունների, ինչն ուղղակիորեն նախատեսված չէ էմիսիոն թաստաթղթերում՝ որպես դեֆոլտի իրադարձություն և պետք է դիտարկվի իրավունքի ընդհանուր նորմերի շրջանակում», - ասված է ՌԴ ֆիննախի հաղորդագրությունում։ Նշենք, որ այսօր Bloomberg-ը, վկայակոչելով պարտքային պարտավորությունների պայմանները, գրել էր, որ լույս հունիսի 27-ը լրացել է Ռուսաստանի մոտ 100 մլն դոլարի եվրապարտատոմսերի տոկոսների վճարման արտոնյալ ժամկետը, ինչի հետևանքով գրանցվել է վերջին հարյուր տարում Ռուսաստանի համար արտաքին պարտքի դեֆոլտը։ Նորա Վանյան

18:34 - 27 հունիսի, 2022

Մոսկովյան բորսան սկսել է առևտուրը հայկական դրամով |armenpress.am|

armenpress.am: Մոսկովյան բորսայի արտարժույթի շուկայում սկսվել է առևտուրը հայկական դրամով: Այդ մասին հայտնում է ՏԱՍՍ-ը՝ վկայակոչելով բորսայի կայքում հրապարակված տվյալները: Առևտրի մասնակիցներին և նրանց հաճախորդներին հասանելի են սփոթ և սվոպ գործիքներ հետևյալ արժութային զույգերով՝ հայկական դրամ - ռուսական ռուբլի (AMD/RUB), ԱՄՆ դոլար - հայկական դրամ (USD/AMD), հարավաֆրիկյան ռենդ - ռուսական ռուբլի (ZAR/RUB), ԱՄՆ դոլար - հարավաֆրիկյան ռենդ (USD/ZAR): Նշվում է, որ Մոսկովյան բորսայի արտարժույթի շուկայում նախատեսվում է առևտուր սկսել նաև այնպիսի արժութային զույգերով, ինչպես օրինակ՝ ուզբեկական սում – ռուսական ռուբլի (UZS/RUB), ԱՄԷ դրհամ – ռուսական ռուբլի (AED/RUB) և ԱՄՆ դոլար – ԱՄէ դրհամ (USD/AED):

17:37 - 27 հունիսի, 2022

ՆԱՏՕ-ն արագ արձագանքման ուժերի թվաքանակը կհասցնի 300 հազարի․ Ստոլտենբերգ

ՆԱՏՕ-ն զգալիորեն կավելացնի իր արագ արձագանքման ուժերի թվաքանակը մինչև ավելի քան 300 հազար, Reuters-ի փոխանցմամբ՝ հայտարարել է կազմակերպության գլխավոր քարտուղար Յենս Ստոլտենբերգը։ Այդ թվաքանակն այժմ կազմում է շուրջ 40 հազար մարդ։ Մադրիդում այս շաբաթ կայանալու է Հյուսիսատլանտյան դաշինքի գագաթնաժողովը։ Ինչպես հայտնել է Ստոլտենբերգը, կազմակերպությունը փոփոխելու է նաև Ռուսաստանին վերաբերող ձևակերպումները, որը ՆԱՏՕ-ի 2010 թ-ի ռազմավարական հայեցակարգում դեռևս նշվում է՝ որպես ռազմավարական գործընկեր։ «Ռազմավարական հայեցակարգում, որը համաձայնեցնելու ենք Մադրիդում, այդպիսի բան չի լինելու», - ասել է նա։ «Ակնկալում եմ, որ դաշնակիցները հստակ հայտարարեն, որ Ռուսաստանն ուղղակի սպառնալիք է մեր անվտանգությանը, արժեքներին, կանոնների վրա հիմնված միջազգային կարգերին», - հավելել է ՆԱՏՕ-ի գլխավոր քարտուղարը։ Նորա Վանյան

16:47 - 27 հունիսի, 2022

Վրաստանը չի ընդունի ռուսական նավթը, որով բեռնված է Բաթումի նավահանգիստ մտած նավը

Վրաստանի կառավարությունը հաստատել է, որ Բաթումի նավահանգիստ է մտել պատժամիջոցների տակ գտնվող ռուսական նավթով բեռնված նավ, սակայն պնդում է, որ մաքսատունը չի ընդունելու այն, հայտնում է News Georgia-ն։ Այն մասին, որ նավը Բաթումի նավահանգստում է, ավելի վաղ հայտնել էր վրացական ընդդիմադիր «Մտավարի» հեռուստաընկերությունը։ Երկրի փոխվարչապետ, էկոնոմիկայի նախարար Լևան Դավիթաշվիլին այսօր կայացած ճեպազրույցի ժամանակ հայտարարել է, որ Վրաստանի միջոցով պատժամիջոցների շրջանցման փաստ «երբեք չի եղել և ապագայում էլ չի լինելու»։ Նա հաստատել է բեռնանավի՝ նավահանգիստ մտնելու մասին փաստը, սակայն հերքել է լուրերը, թե ռուսական նավթը, որով այն բեռնված էր, վերաաձևակերպվել է՝ պատժամիջոցները շրջանցելու համար։ Նախարարի խոսքով՝ Վրաստանի մաքսային մարմիններն ուսումնասիրում են փաստաթղթերն ու որոշումներ կայացնում՝ «ելնելով իրենց պատասխանատվության շրջանակից»։ Պատասխանելով այն հարցին, թե ինչու է ռուսական նավթով բեռնված նավը մտել հենց Բաթումի նավահանգիստ՝ Դավիթաշվիլին լրագրողներին առաջարկել է «շարժառիթների հարցով դիմել բեռի սեփականատիրոջը»։ «Վրաստանի պետական մարմինները գործում են առավելագույն պատասխանատվությամբ, և այսօրվա դրությամբ՝ մաքսային մարմինները համաձայնություն չեն տվել նման բեռ ստանալուն։ Այդ պատճառով էլ, ինչ էլ ցանկանա նավահանգիստը, անկախ մասնավոր անձանց ցանկությունից, այդ բեռն առանց մաքսատան համաձայնության, իհարկե, չի կարող Վրաստանում և Վրաստանի մաքսային տարածքում հայտնվել», - ասել է նախարարը։ Նորա Վանյան

16:09 - 27 հունիսի, 2022

Ճանապարհը, որի վնասվելու պատճառով փակ է Լարսը, կարող է վերականգնվել 7-10 օրից |armenpress.am|

armenpress.am: Ռուսաստանի հետ Վրաստանը միացնող ճանապարհի վնասված տեղամասի վերականգնման համար կարող է մոտավորապես 7-10 օր պահանջվել: Այդ մասին Sputnik Վրաստանին հաղորդել են Վրաստանի տարածաշրջանների զարգացման նախարարության ավտոմոբիլային ճանապարհների դեպարտամենտում: Նախօրյակին Թերեք գետը հորդառատ անձրեւների պատճառով դուրս էր եկել ափերից եւ ողողել մայրուղին, որը տանում էր վրաց-ռուսական սահման: Վնասվել է Մցխեթ-Ստեփանծմինդա-Լարս միջազգային նշանակության ավտոճանապարհի 136-րդ կիլոմետրի վրա գտնվող հատվածը (չեզոք գոտի): Գերատեսչության հաղորդագրության համաձայն՝ ընդամենը վնասվել է ճանապարհի մինչեւ 80 մետր հատվածը: Ավտոմոբիլային ճանապարհների դեպարտամենտն արդեն ձեռնամուխ է եղել վերականգնողական աշխատանքներին: «Վայրում գտնվում են ավտոմոբիլային ճանապարհների դեպարտամենտի համապատասխան ծառայությունների ներկայացուցիչները եւ ստուգում անհրաժեշտ բոլոր միջոցառումները կարճ ժամանակում երթեւեկությունը վերականգնելու համար, նշում են գերատեսչությունում: Ներկայում նշված տեղամասում արգելված է երթեւեկությունը բոլոր տեսակի փոխադրամիջոցների համար: Բացի այդ, աշխատանքն է դադարեցրել «Կազբեգի» հսկիչ անցակետը: Համապատասխանաբար, «Կազբեգի» հսկիչ անցակետում դադարեցվել են բոլոր ընթացակարգերը, այդ թվում՝ ապրանքների ներկրումը կամ արտահանումը, ինչպես նաեւ սահմանի հատումը ֆիզիկական անձանց կողմից: Անվտանգության նպատակներով «Կազբեգի» հսկիչ անցակետի բոլոր աշխատակիցները եւ այցելուները տեղափոխվել են այլ վայր: Մցխեթ-Ստեփանծմինդա-Լարս կենտրոնական ավտոմայրուղին, այսպես կոչված Ռազմավիրական ճանապարհն այսօրվա դրությամբ միակ ցամաքային ճանապարհն է, որը Վրաստանը եւ Հայաստանը կապում է Ռուսաստանի հետ: Իսկ «Կազբեգի»-«Վերին Լարս» մաքսակետն այսօրվա դրությամբ միակ գործող մաքսակետն է Վրաստանի եւ Ռուսաստանի ցամաքային սահմանի վրա, հաղորդել է Sputnik-ը:-

15:48 - 27 հունիսի, 2022

Կրեմլը մեկնաբանել է Bloomberg-ի այն պնդումը, որ Ռուսաստանը դեֆոլտի է բախվել |tert.am|

tert.am: Կրեմլը համաձայն չէ, որ Ռուսաստանը դեֆոլտի է բախվել: Այս մասին հայտնել է ՌԴ նախագահի մամուլի քարտուղար Դմիտրի Պեսկովը, փոխանցում է РБК-ն:Նախագահի խոսնակին հարցրել են, թե արդյոք Կրեմլը համաձայն է, որ Ռուսաստանը 1918 թվականից ի վեր առաջին անգամ դեֆոլտի է բախվել, ինչպես որ պնդում է Bloomberg-ը:«Ոչ, մենք համաձայն չենք», - պատասխանել է Պեսկովը:Դեֆոլտը պարտապանի կողմից պարտքը վճարելու պարտավորության չկատարումն է: Կառավարության դեֆոլտը նվազեցնում է նրա վարկային վարկանիշը, որից հետո երկրի համար դժվար կամ անհնար է դառնում նոր վարկեր ստանալը:Հիշեցնենք, որ լույս հունիսի 27-ը լրացել է Ռուսաստանի մոտ 100 մլն դոլարի եվրապարտատոմսերի տոկոսների վճարման արտոնյալ ժամկետը, ինչի հետևանքով գրանցվել է վերջին հարյուր տարում Ռուսաստանի համար արտաքին պարտքի դեֆոլտը, գրել էր Bloomberg-ը՝ վկայակոչելով պարտքային պարտավորությունների պայմանները։ Դրանց համաձայն՝ հունիսի 26-ին ավարտվել է մոտ 100 մլն դոլարի եվրապարտատոմսերի տոկոսների վճարման արտոնյալ ժամկետը։Նախօրեին հաղորդվել էր, որ եթե ներդրողները գումարը չստանան մինչև վերջնաժամկետը, ապա երկուշաբթի առավոտյան տեղի կունենա «դեֆոլտ»։ Bloomberg-ի տվյալներով՝ Ռուսաստանի համար սա արտաքին պարտքի առաջին դեֆոլտն է վերջին հարյուր տարվա ընթացքում՝ սկսած այն պահից, երբ 1918 թվականին իշխանության եկած բոլշևիկները հրաժարվեցին վճարել Ռուսական կայսրության պարտքերը։Գործակալության տվյալներով՝ «սա երկրի՝ տնտեսական, ֆինանսական և քաղաքական վտարանդիի արագ վերածման նշան է», քանի որ «Կենտրոնական բանկի արժութային պահուստները սառեցված են, իսկ խոշորագույն բանկերը կտրված են համաշխարհային ֆինանսական համակարգից»։Bloomberg-ը, սակայն, ընդունում է, որ «հաշվի առնելով արդեն հասցված վնասը տնտեսությանը և շուկաներին (Ռուսաստան), դեֆոլտը առայժմ հիմնականում խորհրդանշական բնույթ է կրում և քիչ նշանակություն ունի ռուսների համար»:Մոսկվան դեֆոլտին մոտեցել է Ուկրաինա զորքեր մտցնելուց անմիջապես հետո, բայց կարողացել է խուսափել դրանից՝ անցնելով վճարման այլ եղանակի, սակայն արդեն մայիսին ԱՄՆ իշխանությունները փակել են Մոսկվային մանևրելու հնարավորություն տվող սողանցքը, գրում է Bloomberg-ը։Այժմ համաշխարհային շուկաները բախվում են «եզակի իրավիճակի», երբ վարկառուն պատրաստ է և ունի ռեսուրսներ վճարելու վարկատուներին, բայց չի կարողանում դա անել պատժամիջոցների պատճառով, նշում է գործակալությունը: Շարունակությունը՝ tert.am-ում

14:44 - 27 հունիսի, 2022

Արցախի ԱԳ նախարարը Ռուսաստանում մի շարք հանդիպումներ է ունեցել

Հունիսի 21-27-ը Արցախի Հանրապետության արտաքին գործերի նախարար Դավիթ Բաբայանն աշխատանքային այցով գտնվում էր Ռուսաստանի Դաշնությունում։ Մոսկվայում և մի շարք այլ քաղաքներում Արցախի արտաքին գերատեսչության ղեկավարը հանդիպումներ է ունեցել քաղաքական, տեղեկատվական, հասարակական, գիտակրթական շրջանակների, Ռուսաստանի հայ համայնքի և Հայ Առաքելական եկեղեցու ներկայացուցիչների հետ։ Քննարկվել են տարածաշրջանում ստեղծված իրավիճակին, հնարավոր զարգացումներին, տարածաշրջանային աշխարհաքաղաքական գործընթացներում Արցախի դերին, ադրբեջանա-ղարաբաղյան հակամարտության կարգավորման հեռանկարներին, Արցախ-Սփյուռք կապերի հետագա խորացմանն առնչվող հարցեր։

14:35 - 27 հունիսի, 2022

Թուրքիայի նախագահի խոսնակը պարզաբանել է, թե իր երկիրն ինչու չի միանում ՌԴ-ի դեմ պատժամիջոցներին |armenpress.am|

armenpress.am: Թուրքիայի նախագահ Ռեջեփ Թայիփ էրդողանի խոսնակ Իբրահիմ Քալընը պարզաբանել է, թե Թուրքիան ինչու չի միանում Ռուսաստանի Դաշնության դեմ պատժամիջոցներին: Այս մասին հայտնում է թուրքական Haberturk-ը: Նրա խոսքով՝ Թուրքիան չի միանա պատժամիջոցներին, քանի որ դա բխում է Թուրքիայի տնտեսական շահերից և ռուսական էներգակիրներից կախվածությունից։ «Մենք բացահայտորեն մեր դիրքորոշումն ենք հայտնել Արևմուտքին, և կա ըմբռնում։ Ռուսաստանի դեմ պատժամիջոցները կհարվածեն առաջին հերթին թուրքական տնտեսությանը, մենք, իհարկե, դա չենք ուզում»,- ասել է Քալընը:

13:59 - 27 հունիսի, 2022

ԵՀ-ի ղեկավարը չի պաշտպանել G20-ի գագաթնաժողովի բոյկոտի գաղափարը դրան Պուտինի մասնակցության դեպքում |armenpress.am|

armenpress.am: Եվրահանձնաժողովի նախագահ Ուրսուլա ֆոն դեր Լյայենը հայտարարել է, որ դեմ է հանդես գալիս G20-ի գագաթնաժողովը բոյկոտելու գաղափարին այն պատճառով, որ դրան մասնակցելու է Ռուսաստանի նախագահ Վլադիմիր Պուտինը: «Հարկավոր է, որ մենք շատ ուշադիր մտածենք այն մասին, որպեսզի կաթվածահար չանենք ողջ G20-ը: Ես չեմ պաշտպանում դա (G20-ի գագաթնաժողովի բոյկոտը)»,-ասել է ֆոն դեր Լյայենը ZDF հեռուստաալիքին տված հարցազրույցում: «Իմ կարծիքով, G20-ը չափազանց կարեւոր է, նույնիսկ զարգացող երկրների, զարգացող շուկաների համար»,-նշել է նա: Նա այն կարծիքին է, որ աշխարհում ստեղծված իրադրությունն արժե քննարկել միմյանց հետ: Ինչպես սպասվում է, «մեծ քսանյակի» պետությունների ղեկավարների գագաթնաժողովը նոյեմբերի 15-16-ին տեղի կունենա Բալիում: Դրան հրավիրված են G20-ի բոլոր երկրների ղեկավարները, այդ թվում՝ ՌԴ նախագահ Վլադիմիր Պուտինը: Նաեւ գագաթնաժողովին հրավիրված է Ուկրաինայի նախագահ Վլադիմիր Զելենսկին, հաղորդել է «Ինտերֆաքս»-ը:

11:23 - 27 հունիսի, 2022