Արարատի մարզ

Արարատի մարզը մարզի կարգավիճակ ունեցող վարչատարածքային միավոր է Հայաստանի հարավ-արևմուտքում։

Մարզի ընդհանուր տարածությունը 2090.0 քառ. կմ, ՀՀ տարածքի 7 %-ը:

Բնակչությունը՝ 258.2 հազ.մարդ, ՀՀ բնակչության 8.7%-ը:

Մարզի գյուղական բնակչությունը` 91 համայնքներով, կազմում է 71.85 %:

Մարզի քաղաքային բնակչությունը՝ 4 քաղաքներով` 28.2%:

Բնակչության խտությունը՝ 124 մարդ 1 քառ. կմ-ի վրա:

Մարզում տնտեսությունների / ծխերի / թիվը՝ 76280:

Ավշարի մանկապարտեզը քանդում են․ մասնավոր նախակրթարանի վարձն էլ 40 հազար դրամ է |hetq.am|

hetq.am: Արարատի մարզի Ավշար համայնքի բնակիչ Գրիգոր Խուրշուդյանի մանկահասակ երեխան մանկապարտեզ չի հաճախում, քանի որ գյուղում համայնքային մանկապարտեզ չկա, իսկ մասնավոր նախակրթարանի վճարը մեկ ամսվա համար 40 հազար դրամ է։ Հարևան Արարատ քաղաքի մանկապարտեզներում էլ ոչ տեղացի երեխաների համար 22 հազար դրամ վարձավճար է սահմանված։ Գրիգորի 3 երեխաներից միայն ավագն է հաճախել Ավշարի մանկապարտեզ, նա այժմ սովորում է դպրոցում։ Գրիգորն ասում է, որ համայնքում գյուղատնտեսությամբ զբաղվող մարդու համար 22.000 դրամը շոշափելի գումար է, ոչ բոլորը կարող են իրենց թույլ տալ ամսական այդքան գումար վճարել ու երեխային տանել Արարատի մանկապարտեզներ։ «Այն հարկերն ու տուրքերը, որ վճարում ենք համայնքին, վճարում ենք, որ ինչ֊որ բանից օգտվենք, եթե չենք օգտվելու, չենք վճարի, էդ գումարով մեր երեխաներին ավելի լավ տեղ կտանենք, կամ ամեն մարդ էդ վճարած հարկի գումարով իր փողոցը կասֆալտապատի, դռան դիմաց լույս կանցկացնի, բա հարկեր տալու իմաստը ո՞րն է, տալիս ենք, որ ճանապարհները բարեկարգվի, լուսավորվի, որ պայմաններ ստեղծվի երեխաների համար, բայց մինչև էսօր դեռ էն մինիմալն էլ չկա։ Մեծ գյուղ է, բայց մանկապարտեզ չունի, դա նորմա՞լ է, եթե մենք մեր վճարած հարկերի դիմաց ոչինչ չենք ստանալու, գյուղապետարան կոչվող կառույցը ինչի՞ համար է գործում»,- ասում է Գրիգորը։ Նա նաև նշեց, որ համայնքում գործող մասնավոր նախակրթարանի ամսական վճարը 40.000 դրամ է, ինչը հասանելի չէ գյուղի բնակիչների մեծ մասին։ «Եթե գյուղացիներից շատերին հասանելի չէ ամսական 22.000 վճարել ու իրանց երեխաներին Արարատի մանկապարտեզներ տանել, պարզ չի՞, որ 40.000 վճարելու հնարավորություն շատ քչերը կունենան»,– նշեց Գրիգորը։ Ավշար գյուղում խորհրդային տարիներին կառուցվել և շահագործման է հանձնվել երեք մասնաշենք ունեցող մանկապարտեզի միայն մեկ մասնաշենքը։ Մյուս երկու մասնաշենքերը կիսակառույց էին մինչև նախորդ տարի։ Ավշարի ավագանին 2016 թ.-ին մանկապարտեզի կապիտալ նորոգումը ներառել էր համայնքի զարգացման քառամյա ծրագրում։ 2017 թ.-ին Կառավարությունը գումար էր հատկացրել Ավշարի մանկապարտեզի նորոգման համար, սակայն նույն տարվա աշնանը 35 միլիոն դրամը վերադարձել է Կառավարություն։ Պաշտոնական պարզաբանմամբ, մանկապարտեզի շենքը վթարային է եղել, և նոր է այդ հանգամանքն ի հայտ եկել։ Ավշարի ավագանին էլ 2017 թ.-ի վերջում որոշել է մանկապարտեզի գործող և 2 չգործող վթարային մասնաշենքերը ապամոնտաժել։ Համայնքի երեխաներն այդ պահից սկսած զրկվել են նախադպրոցական կրթությունից։ Մանկապարտեզի գույքը հետագայում դրվել է աճուրդի։ Քանի որ որոշվել է մանկապարտեզն ապամոնտաժել, 2018 թ.-ին էլ ավագանին որոշել է շենքի պանելները աճուրդով վաճառել։ Ո´չ մանկապարտեզի գույքի, ո´չ էլ երկաթբետոնե կոնստրուկցիաների աճուրդների արդյունքների մասին տեղեկություններ չկան։ Մանկապարտեզի տարածքում մեր այցելության ժամանակ ապամոնտաժման աշխատանքներ էին ընթանում։ Բանվորները քանդում էին երբեմնի գործող մանկապարտեզի համեմատած բարվոք մասնաշենքը, իսկ մյուս երկու մասնաշենքերից մեկը հողին էր հավասարեցված։ Ավշարի բնակիչների մի մասը իրենց երեխաներին տանում է Արարատ քաղաքում գործող մանկապարտեզներ, որոշները` համայնքում վերջերս բացված մասնավոր նախակրթարան, մյուս և հիմնական մասի երեխաները պարզապես մանկապարտեզ չեն հաճախում։ 2020 հունվարի 14-ին Արարատ քաղաքի ավագանու արտահերթ նիստի ընթացքում որոշվել է համայնքի ենթակայության մանկապարտեզներից օգտվողների համար Արարատ քաղաքի երեխաների դեպքում սահմանել 5000 դրամ վճար, իսկ այլ համայնքների երեխաների համար՝ 22.000 դրամ: Ավշար համայնքի բնակիչներն ասում են, որ Արարատի մանկապարտեզների վարձավճարի թանկանալուց հետո, շատերը չունեն հնարավորություն իրենց երեխաներին մանկապարտեզ տանելու։ «Լապտերիկ» խնամքի կենտրոն Գյուղացիների շրջանում տարածված տեսակետ կա, որ Ավշարում բացված «Լապտերիկ» խնամքի կենտրոնի տնօրեն Ռուբինա Դավթյանը կապ ունի համայնքապետ Սուրիկ Գրիգորյանի ընտանիքի հետ, որոնք էլ Ռուբինա Դավթյանին օգնել են Ավշարում նման կենտրոն բացելու հարցում։ Համայնքի ղեկավար Սուրիկ Գրիգորյանը ԱԺ նախկին պատգամավոր Արայիկ Գրիգորյանի և Արարատի նախկին մարզպետ Արամայիս Գրիգորյանի եղբայրն է։ Շարունակությունը՝ hetq.am-ում

17:26 - 21 փետրվարի, 2020

Արարատի մարզում անչափահասների կատարած հանցագործություններն ավելացել են

Արարատի մարզի դատախազության կատարված ուսումնասիրությունները վկայում են, որ մարզի տարածքում անչափահասների կողմից կատարված հանցագործությունների քանակը դինամիկ աճում է: Այս մասին հայտնեցին ՀՀ գլխավոր դատախազության հանրային կապերի բաժնից: Մասնավորապես, եթե 2018թ. մարզում 19 անչափահասների կողմից կատարվել է հանցագործության 27 դեպք, ապա 2019թ.՝ 27 անչափահասների կողմից կատարվել է 34 հանցագործություն: Այսինքն առերևույթ հանցագործություն կատարած անչափահասների թիվն ավելացել է 42%-ով, իսկ հանցագործության դեպքերը՝ 26%-ով: Հանցանք կատարած 27 անչափահասներից 12-ը սովորում են հանրակրթական դպրոցներում: Ընդ որում՝ վերջիններիցս 5-ի կողմից 6 դրվագ հանցագործությունները կատարվել են դպրոցների տարածքում: Ավելին՝ այդ հանցագործություններից երեքը կատարվել են դասապրոցեսի ընթացքում, մեկը՝ դանակի գործադրմամբ։ Ըստ ծանրության աստիճանի՝ արձանագրված 34 հանցագործության դեպքերից 22-ը եղել է ոչ մեծ ծանրության, 8-ը միջին ծանրության, 3-ը ծանր և 1-ը առանձնապես ծանր հանցագործություններ։ Ընդ որում՝ 2018թ. առանձնապես ծանր հանցագործություն չէր գրանցվել: Նշված դեպքերով 6 քրեական գործ 9 անձի նկատմամբ՝ 12 դրվագ հանցագործության դեպքով, մեղադրական եզրակացությամբ ուղարկվել է դատարան: 26 դեպքով նախապատրաստված նյութերով քրեական գործ հարուցելը մերժվել է ոչ արդարացման հիմքով: Վիճակագրությունը փաստում է, որ մարզի տարածքում անչափահասների կողմից կատարված հանցագործությունների դեպքերի տարեց տարի արձանագրվող աճին զուգահեռ նվազման միտումով փոխվում է հանցավոր արարքներ կատարող անչափահասների տարիքային շեմը, ինչին հակառակ՝ հանցագործությունների ծանրության աստիճանը փոխվում է առավել ծանրության ուղղությամբ: Առավել վտանգավորն այն է, որ ըստ քրեական գործի նյութերի՝ հանցավոր արարքներ կատարման արմատներում քրեական ենթամշակույթին բնորոշ տարրերն ու մտածողությունն է։ Մարզի դատախազութունում կատարված վերլուծությունները թույլ են տալիս եզրակացնելու, որ մազում անչափահասների կողմից կատարված հանցագործությունների քանակն աճում է անչափահասների գործերով և ընտանեկան բռնության կանխարգելման բաժանմունքների աշխատակիցների կողմից հանցագործությունների նախականխման և կանխման գործառույթների ոչ պատշաճ իրականացման, դպրոցներում դասապրոցեսի ընթացքում շրջայցեր չկատարվելու, նշված բաժանմումնքների և դպրոցների միջև փոխգործակցության ցածր մակարդակի ֆոնին։ Աճին նպաստել է նաև անչափահասների կրթության, դաստիարակության և վարքի նկատմամբ դպրոցների ղեկավար կազմի, մանկավարժական կոլեկտիվների և Արարատի մարզպետարանի համապատասխան ստորաբաժանումների կողմից ոչ բավարար հսկողությունը և դպրոցում աշակերտների ազատ ժամանակի ոչ ճիշտ կազմակերպումն օգտագործումը: Բացի այդ՝ էական նշանակություն ունի նաև արդեն իսկ հանցանք կատարած անչափահասների կյանքի, դաստիարակության պայմանների, ընդհանուր զարգացման, կրթական մակարդակի, դրսևորած ուսման առաջադիմության և վարքի, ուսումնական հաստատությունում և դրանից դուրս անչափահասին շրջապատող սոցիալական միջավայրի և այդ միջավայրում վերջինիս դերի, այսինքն՝ հանցանքի կատարմանը նպաստող պատճառների և պայմանների պարզման ուղղությամբ անբավարար աշխատանքի իրականացումը։ Հաշվի առնելով ստեղծված իրավիճակից բխող հրատապ քայլեր ձեռնարկելու անհրաժեշտությունը՝ ՀՀ Արարատի մարզի դատախազը միջնորդագրեր է ներկայացրել ՀՀ Արարատի մարզպետ Գ․ Սարգսյանին, ՀՀ ոստիկանության անչափահասների գործերով և ընտանեկան բռնության դեմ պայքարի վարչության պետ Ն․ Դուրյանին, ՀՀ ՔԿ Արարատի մարզային քննչական վարչության պետ Ա․ Գրիգորյանին և ՀՀ ոստիկանության Արարատի մարզային վարչության պետի տեղակալ Ա․ Մաթևոսյանին: Առաջարկվել է յուրաքանչյուր գերատեսչության իրավասությունների սահմաններում ձեռնարկել միջոցներ մարզի տարածքում անչափահասների հանցավորության վիճակի հետագա վատթարացումը կանխելու, առավել ռիսկային անչափահասների վարքագծի նկատմամբ իրավասու մարմինների, ուսումնական հաստատությունների վերահսկողությունն ուժեղացնելու, նրանց առօրյայի կազմակերպման, նշված պետական օղակների միջև գործակցության առարկայական մեխանիզմներ գործադրելու, ինչպես նաև այլ գործողություններ իրականացնելու ուղղությամբ և ՀՀ քրեական դատավարության օրենսգրքի 200-րդ հոդվածով սահմանված կարգով դրանց արդյունքների մասին տեղեկացնել մարզի դատախազությանը:

11:57 - 18 փետրվարի, 2020