Ազգային ժողով

ՀՀ Սահմանադրության համաձայն Ազգային ժողովը ժողովրդի ներկայացուցչական մարմինն է: Այն իրականացնում է օրենսդիր իշխանությունը: Ազգային ժողովը վերահսկողություն է իրականացնում գործադիր իշխանության նկատմամբ, ընդունում է պետական բյուջեն եւ իրականացնում է Սահմանադրությամբ սահմանված այլ գործառույթներ: Ազգային ժողովի լիազորությունները սահմանվում են Սահմանադրությամբ եւ այն գործում է իր կանոնակարգին համապատասխան: Խորհրդարանն ընտրվում է 5 տարի ժամկետով, կազմված է առնվազն 101 անդամից։

Այժմ գործում է 8-րդ գումարման ազգային ժողովը, որը բաղկացած է 106 պատգամավորից, որոնցից 71-ը՝ «Քաղաքացիական պայմանագիր» խմբակցությունից, 28-ը՝ «Հայաստան» խմբակցությունից, 7-ը՝ «Պատիվ ունեմ» խմբակցությունից։ ԱԺ գործող նախագահը Ալեն Սիմոնյանն է։

ԱԺ-ն քննարկեց ՀՀ-ի և Ասիական զարգացման բանկի միջև ստորագրված վարկային համաձայնագրի ժամկետը երկարաձգող նախագիծը |armenpress.am|

armenpress.am: ՀՀ ազգային ժողովը քննարկեց «Հայաստան-Վրաստան սահմանային տարածաշրջանային ճանապարհի (Մ 6 Վանաձոր-Բագրատաշեն) բարելավման ծրագիր» վարկային համաձայնագրի փոփոխությունը վավերացնելու մասին նախագիծը: Նախագիծն ԱԺ արտահերթ նիստում ներկայացրեց ՀՀ տարածքային կառավարման և ենթակառուցվածքների նախարարի տեղակալ Քրիստինե Ղալեչյանը: «Նախագծով առաջարկվում է վավերացնել 2021 թվականի ապրիլի 7-ին ստորագրված վարկային համաձայնագրի համապատասխան փոփոխությունը, որով նախատեսվում է վարկային համաձայնագրի ժամկետը երկարաձգել մինչև 2022 թվականի դեկտեմբերի 31-ը: Շինարարական աշխատանքների ավարտը նախատեսվում երկարաձգել մինչև 2021 թվականի օգոստոսի 31-ը և թերությունների համար պատասխանատվության ժամկետ սահմանել 2022 թվականի օգոստոսի 31-ը: Լրացուցիչ 4 ամիս անհրաժեշտ է նաև սահմանել ծրագրի ֆինանսական աուդիտի և վարկի փակման ժամանակահատվածի համար»,- ասաց Ղալեչյանը: Ակնկալվում է 2022 թվականին Վանաձորից Բագրատաշեն երթևեկության տևողության կրճատում, միջին օրական երթևեկության ինտենսիվության ավելացում՝ օրական մինչև 3 500 մեքենա ՝ 2014 թվականի 2 800 մեքենայի համեմատ: Ակնկալվում է նաև ունենալ բեռնափոխադրումների էական ավելացում, ճանապարհի երկայնքով կանխարգելել և կրճատել ճանապարհատրանսպորտային պատահարների թիվը՝ բարելավելով ճանապարհային անվտանգությունը: Անդրադառնալով համաձայնագրի ժամկետի երկարաձգմանը՝ նա ասաց, որ դա պայմանավորված է մի շարք հանգամանքներով: Շինարարական կապալի պայմանագրերը կնքվել են 2017 թվականի նոյեմբերի 30-ին, սակայն շինարարական աշխատանքների փաստացի մեկնարկը տրվել է 2018-ի մայիսի 29-ին: Նաև համավարակով պայմանավորված սահմանափակումներ են եղել, որոնք իրենց ազդեցությունն են ունեցել աշխատանքների կազմակերպման վրա: 2021 թվականի պետական բյուջեում ծրագրի շրջանակում մասհանումների ծրագրավորված գումարը նախատեսված էր 2 մլրդ 870 մլն, մինչդեռ Ղալեչյանը նշեց, որ իրենց կանխատեսումների և կատարողականի էական ավելացման արդյունքում իրականացնելու են շուրջ 7 մլրդ դրամից ավելի մասհանումներ:

14:42 - 15 հուլիսի, 2021

ԱԺ-ն առաջին ընթեցմամբ ընդունեց պատգամավորական գործունեության ծախսերի գումարը 200 հազար դրամով ավելացնելու նախագիծը |armtimes.com|

13:57 - 15 հուլիսի, 2021

Պղնձի խտանյութի արտահանման լիցենզիայի տրամադրման համար տուրք սահմանելու նախագիծն առաջին ընթերցմամբ ընդունվեց |armtimes.com|

armtimes.com: ԱԺ-ն առաջին ընթերցմամբ ընդունեց Էկոնոմիկայի նախարարության ներկայացրած նախագիծը, որով ՀՀ կառավարությունը ցանկանում է պղնձի, մոլիբդենի խտանյութի, ֆեռոմոլիբդենի արտահանման լիցենզիայի տրամադրման համար տուրք սահմանել: Էկոնոմիկայի նախարարության ներկայացրած նախագծում նշվում է, որ նպատակ ունենալով համաշխարհային շուկայում ձևավորված բարձր գնային պահանջարկի պայմաններում Հայաստանի հանքարդյունաբերության և գունավոր մետալուրգիայի ոլորտում ստեղծել և զարգացնել առավել մաքուր և էկոլոգիապես անվտանգ տեխնոլոգիաների կիրառմամբ արտադրություններ՝ առաջարկվում է պղնձի և մոլիբդենի միջազգային բարձր գների պարագայում սահմանել պետական տուրք պղնձի, մոլիբդենի խտանյութի և ֆեռոմոլիբդենի՝ դեպի երրորդ երկրներ արտահանելու լիցենզիաներ կամ թույլտվություններ կամ հավաստագրեր (այսուհետ՝ լիցենզիա) տրամադրելու համար։ Ակնկալվում է, որ լիցենզիայի տրամադրման առաջարկվող դրույքաչափերը կգործեն միայն նշված մետաղների բարձր գնային միջակայքերում, իսկ հետագայում՝ կախված համաշխարհային շուկայում այդ մետաղների պահանջարկի փոփոխությունից (օրինակ՝ պղնձի բորսայական գնի 7.5 հազ. ԱՄՆ դոլարի շեմը, իսկ մոլիբդենի պարագայում՝ 20 հազ. ԱՄՆ դոլարի շեմը չգերազանցելու դեպքում կվերանայվեն առաջարկվող դրույքաչափերը դեպի նվազում)։ Երկրորդ ընթերցումը կլինի 24 ժամվա ընթացքում:

13:47 - 15 հուլիսի, 2021

Այս օրենսդրական փոփոխությունը միտված է ուժեղացնելու պատգամավորի ինստիտուտը. Վիկտոր Ենգիբարյան |1lurer.am|

13:40 - 15 հուլիսի, 2021

ՀՀ ԱԺ արտահերթ նստաշրջան. ուղիղ

11:04 - 15 հուլիսի, 2021

ԱԺ-ն վաղը արտահերթ նիստ կգումարի

ՀՀ ԱԺ-ն վաղն արտահերթ նիստ կգումարի: «Հայաստանի Հանրապետության Սահմանադրության 100-րդ և «Ազգային ժողովի կանոնակարգ» սահմանադրական օրենքի 44-րդ հոդվածների համաձայն` Կառավարության նախաձեռնությամբ 2021 թվականի հուլիսի 15-ին՝ ժամը 11:00-ին, ԱԺ նախագահ Արարատ Միրզոյանի որոշմամբ կգումարվի Ազգային ժողովի արտահերթ նստաշրջան՝ նախաձեռնողի սահմանած օրակարգով»,- տեղեկացնում է ՀՀ ԱԺ կայքը: Օրակարգում 4 հարց է՝ «Պետական տուրքի մասին», «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքներում, «Վարչական իրավախախտումների վերաբերյալ ՀՀ օրենսգրքում» փոփոխությունների նախագծերը, «Հայաստանի Հանրապետության և Ասիական զարգացման բանկի միջև «Հայաստան-Վրաստան սահմանային տարածաշրջանային ճանապարհի (Մ6 Վանաձոր-Բագրատաշեն) բարելավման ծրագիր» (վարկ թիվ 3449-ARM) վարկային համաձայնագրի փոփոխությունը վավերացնելու մասին» նախագիծը:

15:53 - 14 հուլիսի, 2021

«Հայաստան» դաշինքը պահանջում է, որ մեծամասնություն ունեցող քաղաքական ուժի մանդատները չգերազանցեն 3/5-ը |hetq.am|

hetq.am: «Հայաստան» դաշինքը պահանջում է, որ արտահերթ խորհրդարանական ընտրություններում մեծամասնություն ունեցող խմբակցությանը տրվող մանդատները սահմանափակվեն պատգամավորական ընդհանուր մանդատների թվի մինչև 3/5-ով (երեք հինգերորդ)։ Սահմանադրական դատարանում «Հայաստան» դաշինքի ներկայացրած պահանջներից մեկի՝ մանդատների բաշխման նոր կարգ սահմանելու հիմքում հենց այս պնդումն է դրված։ Սահմանադրական դատարանում արտահերթ խորհրդարանական ընտրությունների արդյունքների վիճարկման վերաբերյալ «Հայաստան», «Պատիվ ունեմ» դաշինքների, «Զարթոնք» և «Հայոց հայրենիք» կուսակցությունների դիմումների քննությանը դատավոր Վահե Գրիգորյանը հարց ուղղեց «Հայաստան» դաշինքի ներկայացուցիչ Արամ Վարդևանյանին, թե ինչու պետք է մինչ 3/5-ը դիտարկվի այն առավելագույն չափը, որ ժողովրդի ընտրությամբ ստացած որևէ քաղաքական ուժ զբաղեցնի հանրապետության բարձրագույն օրենսդիր մարմինը։ Արամ Վարդևանյանը հիշեցրեց, որ 2016 թվականի ընտրական օրենսգիրքը չէր ընդունվել միայն մեկ ուժի կամքով, այլ՝ լայն կոնսոլիդացիայի և համաձայնության արդյունքում։ Նրա խոսքով՝ սահմանադիրը ցանկացել էր, որ 2015 թվականից հետո սահմանադրական օրենքները ընդունվեն ոչ թե մեկ ուժի կամքի արտահայտմամբ, այլ կոնսոլիդացիայիբ ձևով, զսպումների և հակակշիռների իրացման ձևով։ Արամ Վարդևանյանը մի քանի օրինակ նշեց․ «2022թ․ նոր դատախազ պետք է ընտրվի․ սահմանադիրն ուզել է, որ գլխավոր դատախազը չլինի մեկ ուժի կողմից նշանակված, սահմանադիրն ուզել է, որ գլխավոր դատախազն ունենա նման անկախություն։ Սահմանադիրն ուզել է, որ ԿԸՀ անդամները չընտրվեն մեկ ուժի կողմից, այլ ընտրվեն կոնսոլիդացիայի արդյունքում։ Մարդու իրավունքները պաշտպանն ընտրվի կոնսոլիդացիայի արդյունքում, այլ ոչ թե մեկ ուժի կամքի արտահայտությամբ։ Սահմանադիրը ուզել է, որ հենց ՍԴ դատավորները ևս ընտրվեն ոչ թե մեկ ուժի որոշմամբ, այլ մի քանի ուժերի, որովհետև 3/5-ը ընդդիմադիրների ուժն ու դերը բարձրացնելու համար է եղել՝ դրանով իսկ երաշխավորելով ժողովրդավարության սկզբունքի դասական իրացումը»։ Շարունակությունը՝ hetq.am-ում

13:26 - 13 հուլիսի, 2021

Գորիս համայնքի Որոտան գյուղում առերևույթ ընտրակաշառք տալու և ստանալու դեպքի առթիվ քրգործ է հարուցվել

ՀՀ գլխավոր դատախազության կողմից իրականացվող ՀՀ ԱԺ արտահերթ ընտրությունների նախընտրական շրջանում ԶԼՄ մշտադիտարկման արդյունքում վեր է հանվել և դատախազի ցուցումով փաստերն ստուգելու նպատակով ՀՀ ոստիկանության Գորիսի բաժին է ուղարկվել 2021թ. հունիսի 10-ին aravot.am լրատվական կայքում «Օրինական կաշա՞ռք, թե՞ ... Գորիսի համայնքի ղեկավարը համաձայն չէ» վերտառությամբ հրապարակումը: Վերջինիս առթիվ նախապատրաստված նյութերով փաստական տվյալներ են ձեռք բերվել այն մասին, որ Գորիսի համայնքապետարանի իրավասու պաշտոնատար անձը, պաշտոնական դիրքն օգտագործելով, համայնքի բյուջեից առերևույթ վատնել է առանձնապես խոշոր չափերով՝ ընդհանուր 6.130.000 ՀՀ դրամ: Մասնավորապես՝ խախտելով ՀՀ Սյունիքի մարզի Գորիս համայնքի ավագանու 2019թ. օգոստոսի 20-ի «ՀՀ Սյունիքի մարզի Գորիս համայնքի կամավոր խնդիրները, կամավոր խնդիրներին ուղղված սեփական լիազորությունները և դրանց լուծման նպատակով իրականացման կարգը սահմանելու մասին» թիվ 69-Ա որոշման հավելվածի 2-րդ կետի 1-ին ենթակետի պահանջները, ըստ որի՝ համայնքի կամավոր խնդիրներն են համայնքի սոցիալապես անապահով բնակչության սոցիալական օգնության տրամադրման կազմակերպումը, 2021թ. հունիսի 9-ի թիվ 369-Ա որոշմամբ սոցալապես անապահով ընտանիքներ չհամարվող, ինչպես նաև այլ համայնքների բնակիչներ հանդիսացող 115 անձանց, որպես դրամական աջակցություն, տրամադրել է ընդհանուր 6.130.000 ՀՀ դրամ: Դեպքի առթիվ հունիսի 22-ին ՀՀ քրեական օրենսգրքի 179-րդ հոդվածի 3-րդ մասի 1-ին կետի հատկանիշներով հարուցվել է քրեական գործ, որի նախաքննությունն իրականացվում է ՀՀ ՔԿ ՀԿԳ քննության գլխավոր վարչությունում: Նախաքննության ընթացքում փաստական տվյալներ են ձեռք բերվել այն մասին, որ Սյունիքի մարզի Գորիս համայնքի Որոտան գյուղի վարչական ներկայացուցիչ Ս. Օ.-ն 2021թ. հունիսի 20-ին անցկացված խորհրդարանական ընտրություններին ընդառաջ նույն գյուղի բնակիչների հետ կազմակերպել է հանդիպումներ, որոնց ներկա է գտնվել նաև Գորիս համայնքի ղեկավար Ա. Ա.-ն, և առաջարկել սոցիալական օգնություն ստանալու համար դիմումներ ներկայացնել Գորիս համայնքի ղեկավարին` երաշխավորելով, որ դրանք միանշանակ բավարարվելու են: Պարզվել է, որ Գորիս համայնքի ղեկավարի պաշտոնակատարի 09.06.2021թ. որոշմամբ Որոտան գյուղի թվով 31 բնակիչների սոցիալական աջակցվություն ստանալու վերաբերյալ դիմումները բավարվել են և տրամադրվել տարբեր չափի գումարներ: Նախաքննության ընթացքում իրականացված քննչական գործողությունների արդյունքում պարզվել է, որ նշված դիմումատուների մեծ մասը հանդիսանում են Ս. Օ.-ի ընտանիքի անդամները և հարազատները: Միևնույն ժամանակ, տվյալներ են ձեռք բերվել այն մասին, որ Ս. Օ.-ն որոշ քաղաքացիների հայտնել է, որ սոցիալական աջակցույթուն տրամադրելու դեպքում պետք է մասնակցեն արտահերթ խորհրդարանական ընտրություններին և քվեարկեն «Հայաստան» դաշինքի օգտին: Նկատի ունենալով, որ քրեական գործով ձեռք բերված բերված փաստական տվյալներն առերևույթ պարունակում են ընտրակաշառք ստանալու և տալու հատկանիշներ՝ ՀՀ ՔԿ-ում ՀՀ քրեական օրենսգրքի 1542-րդ հոդվածի 1-ին և 2-րդ մասերով հարուցվել է քրեական գործ: Նկատի ունենալով, որ նշված հոդվածներով հարուցված քրեական գործերով նախաքննությունն իրականացվում է ՀՀ հատուկ քննչական ծառայությունում՝ ՀՀ գլխավոր դատախազությունից քննչական ենթակայության կարգով քրեական գործն ուղարկվել է ՀՀ ՀՔԾ: Միաժամանակ, ՀՀ ՔԿ և ՀՀ ՀՔԾ-ի քննիչներից ձևավորվել է քննչական խումբ, որի շրջանակներում իրականացվում են անհրաժեշտ անհետաձգելի քննչական, դատավարական այլ, ինչպես նաև օպերատիվ-հետախուզական միջոցառումներ: Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

15:42 - 09 հուլիսի, 2021

ԱԺ խորհուրդը ուժը կորցրած է ճանաչել Հերիքնազ Տիգրանյանի նշանակման մասին որոշումը

Ազգային Ժողովի խորհուրդը ուժը կորցրած է ճանաչել «Իմ քայլը» խմբակցության պատգամավոր Հերիքնազ Տիգրանյանի` Հակակոռուպցիոն կոմիտեի նախագահի թեկնածուների ընտրության համար ձեւավորվող մրցութային խորհրդի անդամ նշանակման մասին որոշումը: «Հիմք ընդունելով «Ազգային ժողովի կանոնակարգ» սահմանադրական օրենքի 28-րդ հոդվածի 1-ին մասի 20-րդ կետը, առաջնորդվելով «Նորմատիվ իրավական ակտերի մասին» օրենքի 37-րդ հոդվածի 1-ին մասով՝ Ազգային ժողովի խորհուրդը որոշում է. Ազգային ժողովի խորհրդի 2021 թվականի հունիսի 29-ի «Հակակոռուպցիոն կոմիտեի նախագահի թեկնածուների ընտրության համար ձեւավորվող մրցութային խորհրդի անդամ նշանակելու մասին» ԱԺԽՈ-041-Ա որոշումն ուժը կորցրած ճանաչել»,- ասված է որոշման մեջ: Այդ որոշմամբ Հակակոռուպցիոն կոմիտեի նախագահի թեկնածուների ընտրության համար ձեւավորվող մրցութային խորհրդի անդամ էր նշանակվել ԱԺ «Իմ քայլը» խմբակցության պատգամավոր Հերիքնազ Տիգրանյանը:

18:05 - 06 հուլիսի, 2021

ԱԺ նախագահը ստորագրել է Լուսինե Եգանյանի՝ պատգամավորի լիազորությունները դադարած համարելու մասին արձանագրությունը

ԱԺ նախագահը ստորագրել է Լուսինե Եգանյանի՝ պատգամավորի լիազորությունները դադարած համարելու մասին արձանագրությունը: «Հիմք ընդունելով պատգամավորի հրաժարականի մասին դիմումը և առաջնորդվելով «Ազգային ժողովի կանոնակարգ» սահմանադրական օրենքի 154-րդ հոդվածի 1-ին մասի 6-րդ կետի պահանջով՝ դադարած համարել «Իմ քայլը» կուսակցությունների դաշինքի համապետական ընտրական ցուցակով ընտրված պատգամավոր Լուսինե Եգանյանի՝ պատգամավորի լիազորությունները»,- ասված է հրապարակման մեջ:

15:23 - 06 հուլիսի, 2021

Կայացել է ԱԺ խորհրդի արտահերթ նիստ

ՀՀ ԱԺ նախագահ Արարատ Միրզոյանի նախագահությամբ հուլիսի 6-ին տեղի է ունեցել ՀՀ ԱԺ խորհրդի արտահերթ նիստ, տեղեկանում ենք ԱԺ կայքից: Խորհուրդը որոշել է ուժը կորցրած ճանաչել Ազգային ժողովի խորհրդի 2021 թվականի հունիսի 29-ի «Հակակոռուպցիոն կոմիտեի նախագահի թեկնածուների ընտրության համար ձևավորվող մրցութային խորհրդի անդամ նշանակելու մասին» ԱԺԽՈ-041-Ա որոշումը:

15:07 - 06 հուլիսի, 2021

«Իմ քայլը» չի արձագանքել Արցախի օկուպացված տարածքների վերաբերյալ հայտարարության նախագիծը արտահերթ նստաշրջան ներառելու առաջարկին |hetq.am|

hetq.am: «Իմ քայլը» խմբակցությունը չի արձագանքել անկախ պատգամավորներ Սոֆիա Հովսեփյանի, Աննա Գրիգորյանի և Թագուհի Թովմասյանի խնդրանքին` արտահերթ նիստի օրակարգում ներառել նաև «Ադրբեջանի Հանրապետության կողմից Արցախի Հանրապետության դեմ ուժի կիրառման և ղարաբաղյան հակամարտության ներկա փուլի մասին» հայտարարության նախագիծը: Նախագծի հեղինակներն այսօր հրավիրված ճեպազրույցին ասացին, որ գրավոր նամակով դիմել են ԱԺ նախագահ Արարատ Միրզոյանին` խնդրելով այդ հարցը ևս ներառել արտահերթ նստաշրջանի օրակարգում, սակայն Միրզոյանը պատասխան նամակով տեղեկացրել է, որ վերջիններս պետք է դիմեն ԱԺ արտահերթ նստաշրջան նախաձեռնող պատգամավորների խմբին և «Իմ քայլը» խմբակցությանը: Պատգամավորներն այդպես էլ վարվել են, սակայն այդպես էլ որևէ արձագանք չեն ստացել, ինչի հետևանքով հայտարարությունը չի ներառվել նստաշրջանի օրակարգում: Սոֆիա Հովսեփյանի գնահատմամբ` խորհրդարանական մեծամասնությունն այդ քայլով հերթական անգամ անտեսում է Արցախի կարգավիճակի հարցը: Նա ընդգծեց, որ հայտարարության տեքստը համաձայնեցվել է Արցախի խորհրդարանի հետ, ինքնանպատակ չի եղել,եղել է նաև Հայաստանի ԱԳՆ-ի և ՊՆ-ի համաձայնությունը: Թագուհի Թովմասյանն էլ հավելեց, որ Հայաստանը որպես պետություն պետք է որևէ փաստաթղթով արձանագրի, որ Արցախն օկուպացված է, նրա համար անհասկանալի է, թե ինչու է գործող իշխանությունը խուսափում այդ փաստն արձանագրել: «Եթե չենք ընդունում, որ Շուշին, Հադրութը օկուպացված են, աշխարհից ինչ ենք ակնկալում»,-ասաց Թովմասյանը: Նշենք, որ ըստ այդ հայտարարության` 2020թ. նոյեմբերի 9-ի եռակողմ հայտարարությունը Արցախյան հիմնահարցի լուծում չէ, այլ՝ զինադադարի ռեժիմի պահպանման և Ղարաբաղյան հակամարտության խաղաղ կարգավորման վերաբերյալ Ադրբեջանի ստանձնած պարտավորությունների խախտմամբ Արցախին պարտադրված հերթական պատերազմի արդյունքում ստորագրված հրադադարի հայտարարություն։ Շարունակությունը՝ hetq.am-ում։

16:50 - 01 հուլիսի, 2021

Մարզպետների հաշվետվողականության մակարդակը կբարձրանա. ԱԺ-ն ընդունեց նախագիծը |armenpress.am|

armenpress.am: ՀՀ ազգային ժողովը երկրորդ ընթերցմամբ և ամբողջությամբ ընդունեց «Իմ քայլը» խմբակցության պատգամավորների կողմից ներկայացված օրենսդրական նախաձեռնությունը, որի արդյունքում մարզպետները հաշվետու կդառնան նաև ոլորտը համակարգող փոխվարչապետին: «Տարածքային կառավարման մասին» օրենքում լրացումներ եւ փոփոխություններ կատարելու մասին և կից ներկայացված օրենքների նախագծերի փաթեթն ԱԺ նիստում քվեարկությամբ ստացավ 75 կողմ, 2 ձեռնպահ ձայներ: Նախագծի համահեղինակ Գևորգ Պապոյանը շեշտեց, որ այս նախագծով ցանկանում են ավելի բարձրացնել մարզպետների հաշվետվողականության մակարդակը, ավելի արդյունավետ կառավարման համակարգ ներդնել: Այսպիսով մարզպետները հաշվետու են լինելու նաև վարչապետի հանձնարարությամբ ոլորտը համակարգող փոխվարչապետին: Կտարանջատվեն տարածքային կառավարման ոլորտում կառավարության ոլորտը համակարգող փոխվարչապետի լիազորությունները: Մասնավորապես, փոխվարչապետը մարզպետների գործունեության արդյունավետության բարձրացման նպատակով համակարգելու է մարզպետների ընթացիկ գործունեությունը, ինչպես նաև պետական կառավարման համակարգի այլ մարմինների հետ՝ մարզպետների աշխատանքը: Փոխվարչապետը քննարկելու և համադրելու է տարածքների համաչափ զարգացումն ապահովելու նպատակով Հայաստանի պետական բյուջեով և այլ միջոցներով նախատեսվող ծրագրերը, իրավական վերահսկողություն է իրականացնելու մարզպետների ընդունած որոշումների նկատմամբ, այս ոլորտի հետ կապված վարչապետին ներկայացնելու է համապատասխան առաջարկներ: Նա իրականացնելու է մարզպետի աշխատակազմի գործունեության վերահսկողություն: Առաջինից երկրորդ ընթերցմամբ քննարկման ընթացքում նախագծի վերաբերյալ առաջարկներ չէին եղել, ըստ այդմ՝ նախագծում փոփոխություն չէր արվել:

12:34 - 01 հուլիսի, 2021

ԱԺ արտահերթ նիստ․ ուղիղ

11:05 - 01 հուլիսի, 2021

ԱԺ-ն քննարկեց 2020-ի պետբյուջեի կատարման տարեկան հաշվետվությունը |armenpress.am|

armenpress.am: Կառավարությունը կարծում է, որ առաջիկա 5 տարում տնտեսական ծրագրերը հնարավորություն կտան տնտեսական աճի պոտենցիալը մեծացնել այն չափով, որ պարտքի բեռը նվազի և պարտք-ՀՆԱ հարաբերակցությունը վերադառնա 60 տոկոսից ցածր միջակայք: Այս մասին ասաց ՀՀ ֆինանսների նախարարի պաշտոնակատար Ատոմ Ջանջուղազյանն ԱԺ արտահերթ նիստում Հայաստանի Հանրապետության 2020 թվականի պետական բյուջեի կատարման տարեկան հաշվետվությունը հաստատելու մասին նախագծի քննարկմանը: Ջանջուղազյանը հիշեցրեց, որ 2020-ին պետբյուջեն հաստատվել էր՝ հիմք ընդունելով 2019-ի լավատեսական արձանագրումները, սակայն համավարակը և պատերազմը փոխել են տնտեսական զարգացումների նկատմամբ սպասումները: Տարվա ընթացքում ինչպես աշխարհի բոլոր պետությունները, այնպես էլ Հայաստանը վերանայել են հարկաբյուջետային քաղաքականությունը՝ այն համապատասխանեցնելով տնտեսական անկման ժամանակահատվածին: Մոտ 215 մլրդ դրամ գումարի չափով հակաճգնաժամային միջոցառումների բյուջե է նախանշվել: Սակայն ամբողջը չի օգտագործվել: «Հարկ է նկատել, որ մենք այդուհանդերձ չենք շեղվել ոլորտային քաղաքականությունների՝ կառավարության ծրագրից բխող տրամաբանությունից»,-ասաց նախարարի պաշտոնակատարը: Տնտեսական անկման մեծությունը ներկայացված փաստաթղթով եղել է 7.6 տոկոս, որից հետո վիճակագրության վերանայմամբ պայմանավորված՝ թարմացված տեղեկության համաձայն այն կազմել է 7.4 տոկոս: Ջանջուղազյանը հիշեցրեց՝ անցյալ տարի բյուջեն վերանայելիս տեսակետներ էին հնչում, որ երկնիշ անկումն անխուսափելի է: «Սա ընդամենը հիշեցում էր, որ մեր երկրում այդ պայմաններում անկումը եղել է 7.4 տոկոս»,-ասաց նա: Միջին գնաճը գտնվել է կառավարելի միջակայքում, կազմել 1.2 տոկոս: Անդրադառնալով ծրագրային ցուցանիշներին՝ նա ասաց, որ եկամուտների մակարդակը փոփոխությունների արդյունքում ճշտվել է շուրջ 141 մլրդ դրամով՝ կազմելով 1 տրլն 563 մլրդ դրամ՝ ի սկզբանե ծրագրված 1 տրլն 695 մլրդ դրամի փոխարեն: Ծախսերը ոչ միայն չեն նվազել, այլ նաև աճել են՝ 1 տրլն 989 մլրդ դրամ, դեֆիցիտը նույնպես աճել է: «Մենք փաստացի արձանագրել ենք 1 տրլն 561 մլրդ դրամ եկամուտներ, 1 տրլն 895 մլրդ դրամ ծախսեր և 334 մլրդ դրամ դեֆիցիտ»,-ասաց Ջանջուղազյանը: Պետական պարտքը կազմել է շուրջ 7 մլրդ 969 մլն դոլար, որի շրջանակում կառավարության պարտքը եղել է 7 մլրդ 509 մլն դոլար: «Պարտքը իր հավանական մեծությամբ, հարաբերական մեծությամբ հատել է այն շեմը, որը գնահատվում է որպես կառավարելի միջակայք: Այդուհանդերձ մենք շատ չենք խորացրել խնդիրները պարտքի բնագավառում և կարծում ենք, որ առաջիկա 5 տարում մեր տնտեսական ծրագրերը հնարավորություն կտան տնտեսական աճի պոտենցիալը մեծացնել այն չափով, որ մեր պարտքի բեռը նվազի և պարտք-ՀՆԱ հարաբերակցությունը վերադառնա 60 տոկոսից ցածր միջակայք»,-ասաց նախարարի պաշտոնակատարը: Կառավարության պարտքի մեջ արտաքին պարտքը ունի նշանակալի կշիռ՝ 5 մլրդ 593 մլն դոլար:

18:51 - 30 հունիսի, 2021

ԱԺ-ն քննարկեց ՊՈԱԿ-ների մասին օրենքում փոփոխությունների նախագիծը |1lurer.am|

1lurer.am: Խորհրդարանն առաջին ընթերցմամբ քննարկեց ԱԺ պատգամավորներ Մխիթար Հայրապետյանի, Հովհաննես Հովհաննիսյանի հեղինակած ««Պետական ոչ առևտրային կազմակերպությունների մասին» ՀՀ օրենքում լրացում կատարելու մասին» օրենքի նախագիծը: Նախագծով առաջարկվում է վերոնշյալ օրենքը լրացնել նոր մասով, համաձայն որի՝ օրենքով կարող են սահմանվել իրավասու մարմնի որոշմամբ գործադիր մարմնի պաշտոնում նշանակված կամ ընտրության արդյունքում գործադիր մարմնի պաշտոնում նշանակված անձի լիազորությունների դադարեցման այլ հիմքեր: Առաջարկվող փոփոխությամբ հնարավորություն կստեղծվի համապատասխան ոլորտները կարգավորող օրենքներով ՊՈԱԿ-ի տնօրենների գործունեության արդյունավետության և հաշվետվողականության բարձրացման տեսանելի չափանիշներ սահմանել: Ըստ գործող օրենքի՝ հնարավորություն չի տրվում լիազոր մարմիններին, կախված ոլորտի առանձնահատկություններից, սահմանել տնօրենի լիազորությունների դադարեցման այլ հիմքեր: Նշված հանգամանքը նվազեցնում է լիազոր մարմինների դերակատարումը՝ տնօրենների աշխատանքի արդյունավետությունը չափելու և այն բարձրացնելու տեսանկյունից: Հիմնական զեկուցող Հովհաննես Հովհաննիսյանը, ներկայացնելով օրենքում լրացում կատարելու հրատապությունը, նշեց, որ դատական վեճեր կան, որոնք առաջացել են օրենքի բաց լինելու պատճառով: ԱԺ առողջապահության և սոցիալական հարցերի մշտական հանձնաժողովի դրական եզրակացությունը հարակից զեկուցմամբ ներկայացրեց Հերիքնազ Տիգրանյանը: Նշվեց, որ հանձնաժողովում ներկայացվել են խմբագրական բնույթի առաջարկներ, որոնք ընդունվել են: Արդարադատության նախարարի տեղակալ Սուրեն Գրիգորյանը ներկայացրեց Կառավարության դրական եզրակացությունը: Նշվեց, որ գործադիրի առաջարկի հիման վրա օրինագիծը լրամշակվել է, ուստի Կառավարությունն առարկություն չունի:

16:00 - 30 հունիսի, 2021