ԱՄՆ

Ամերիկայի Միացյալ Նահանգները դաշնային սահմանադրական հանրապետություն է Հյուսիսային Ամերիկայում, որը բաղկացած է որոշակի ինքնավարություն ունեցող 50 նահանգներից և դաշնային նշանակության Կոլումբիա մարզից։ Ամերիկայի Միացյալ Նահանգները հյուսիսում սահմանակցում է Կանադային, հարավում՝ Մեքսիկային, ծովային սահման ունի Ռուսաստանի հետ։

Մայրաքաղաքը՝ Վաշինգտոն, տարածքը 9,826,675 կմ² է։ 2019 թվականին դրությամբ բնակչությունը կազմում է 328 239 523 մարդ։ Գործող նախագահը Ջոզեֆ Բայդենն է։

Ամերիկայի Միացյալ Նահանգները ներկայումս անդամակցում է ՄԱԿ-ի Անվտանգության Խորհրդին, Հյուսիսատլանտյան դաշինքին, Առևտրի համաշխարհային կազմակերպությանը, Տնտեսական համագործակցության և զարգացման կազմակերպությանը և այլ միջազգային կազմակերպությունների։

Լիլիթ Մակունցը նշանակվել է ԱՄՆ-ում ՀՀ դեսպան

ՀՀ նախագահ Արմեն Սարգսյանը հրամանագիր է ստորագրել Լիլիթ Մակունցին ԱՄՆ-ում Հայաստանի Հանրապետության արտակարգ և լիազոր դեսպան նշանակելու մասին: Այս մասին տեղեկանում ենք ՀՀ նախագահի պաշտոնական կայքից։ «Հիմք ընդունելով վարչապետի առաջարկությունը` համաձայն Սահմանադրության 132-րդ հոդվածի 1-ին մասի 2-րդ կետի.Լիլիթ Մակունցին նշանակել Ամերիկայի Միացյալ Նահանգներում Հայաստանի Հանրապետության արտակարգ և լիազոր դեսպան՝ չորս տարի ժամկետով (նստավայրը՝ Վաշինգտոն)»։ Հիշեցնենք, որ Մակունցը յոթերորդ գումարման Ազգային ժողովի «Իմ քայլը» խմբակցության ղեկավարն էր։

18:15 - 02 օգոստոսի, 2021

Իրանի ԱԳՆ-ն հերքել է Արաբական ծովում Mercer Street լցանավի դեմ հարձակման մեղադրանքները |tert.am|

tert.am: ԱՄՆ-ի և Մեծ Բրիտանիայի մեղադրանքներն Արաբական ծովում իսրայելական Mercer Street լցանավի վրա հարձակման մեջ հակասական և անհիմն են: «ՌԻԱ Նովոստի»-ի փոխանցմամբ` այս մասին ասել է Իրանի ԱԳՆ ներկաայացուցիչ Սաիդ Խաթիբզադեն:«Այդ մեղադրանքները բոլորավին անհիմն են: ԱՄՆ-ի և Բրիտանիայի այդ բոլոր հայտարարությունները հակասական արտահայտություններ են պարունակում: Նախ Իրանին մեղադրում են հարձակման մեջ` առանց որևէ փաստաթուղթ ներկայացնելու, այնուհետև խոսում են այն մասին, որ դա հնարավոր էր»,- ասվում է ԱԳՆ ներկայացուցչի թելեգրամյան ալիքում հրապարակված հաղորդագրության մեջ:Վերջինս հավելել է, որ Իրանն առանց հապաղելու կպաշտպանի իր ազգային շահերը, ինչպես նաև կարձագանքի ցանկացած հնարավոր արկածախնդրության, որն ուղղված կլինի իր դեմ:

17:17 - 02 օգոստոսի, 2021

Բաքվում ԱՄՆ դեսպանն այցելել է Արցախի գրավյալ տարածքներ |factor.am|

factor.am: Ադրբեջան ժամանած ԱՄՆ պատվիրակությունն այցելել է Արցախի գրավյալ տարածքներ։ Մասնավորապես, օրերս ամերիկյան Օկլահոմայի նահանգապետ Քևին Սթիթթի գլխավորած պատվիրակությունն այցելել է Արցախի գրավյալ Կովսական (Զանգելանի շրջան)։ Տեղական լրատվամիջոցների հաղորդմամբ՝ Ադրբեջանի գյուղատնտեսության նախարարության կողմից կազմակերպված այցի ընթացքում, ամերիկյան պատվիրակության անդամները ծանոթացել են «խելացի գյուղ» ծրագրի շրջանակում կատարված աշխատանքներին։ Ներկայացվել է, որ ծրագիրը ներառում է 3 գյուղ։ Նախագիծն իրականացվելու է 5 բաղադրիչով՝ բնակարանային սեկտոր, արտադրություն, սոցիալական ծառայություններ, «խելացի գյուղատնտեսություն» և այլընտրանքային էներգիա։ Տարածքում առաջին հերթին նախատեսվում է կառուցել 200 տուն՝ նորարական շինանյութերի օգտագործմամբ։ Նշենք, որ համացանցում տարածված լուսանկարներում երևում է, որ ամերիկյան պատվիրակության կազմում Արցախի գրավյալ տարածքներ է այցելել նաև Բաքվում ԱՄՆ դեսպան Լի Լիտցենբերգերը։ Հարկ է նկատել, որ Միացյալ Նահանգները ԵԱՀԿ Միսկի խմբի համանախագահ երկիր է և փոքր-ինչ տարօրինակ է դեսպանի նման քայլը՝ հաշվի առնելով նաև այն, որ ավելի վաղ Լիտցենբերգերը՝ Բաքվում ռուս և ֆրանսիացի իր գործընկերներ հետ չէր մասնակցել հայկական Շուշի Ադրբեջանի իշխանությունների կազմակերպած քարոզչական այցին։ Ի դեպ, Ադրբեջանում ԱՄՆ դեսպանատունը սոցիալական ցանցերի իր էջերում այս այցի մասին որևէ տեղեկություն և լուսանկար չի հրապարակել։ Հավելենք, որ Օկլահոմա նահանգի պատվիրակությունն Ադրբեջանում է այդ երկրի գյուղատնտեսության նախարարության հրավերով։ Նահանգապետ Քևին Սթիթթի գլխավորած պատվիրակության կազմում են ԱՄՆ ազգային գվարդիայի գեներալ-մայոր Մայքլ Թոմսոնը, բրիգանդի գեներալ Ջոն Հարիսոնը, պաշտոնատար այլ անձինք։

16:49 - 02 օգոստոսի, 2021

ԱՄՆ-ն վերսկսում է անօրինական միգրանտների արագացված արտաքսումն իրենց հայրենիք |armenpress.am|

armenpress.am: ԱՄՆ-ի կառավարությունը վերսկսել է արագացված ընթացակարգով Կենտրոնական Ամերիկայից անօրինական միգրանտներին հայրենիք արտաքսելու գործընթացը: «Deutsche Welle»-ն տեղեկացնում է, որ այս մասին հայտնել է ԱՄՆ ներքին անվտանգության նախարարությունը: Նշվում է, որ հուլիսի 30-ին Թեքսաս նահանգից իրականացվել է արտաքսման երկու թռիչք: Առաջին ինքնաթիռը մեկնել է Գվատեմալա, երկրորդը՝ Հոնդուրաս: Ընդհանուր առմամբ, այդ թռիչքներով ԱՄՆ-ից արտաքսվել է 73 մարդ: Հիմնականում նրանք ընտանիք չունեցող անձինք ենք: Ի սկզբանե, պլանավորվում էր արտաքսել 147 մարդու, սակայն որոշների դեպքում գործընթացը հետաձգվել է կորոնավիրուսի թեստի դրական պատասխանի պատճառով:

17:48 - 31 հուլիսի, 2021

ԱՄՆ կոնգրեսականը հորդորել է Ադրբեջանին անհապաղ դուրս գալ Հայաստանի տարածքից և դադարեցնել բռնությունը |armenpress.am|

armenpress.am: ԱՄՆ Ներկայացուցիչների պալատի անդամ Քեթրին Քլարկը կոչ է անում Ադրբեջանի զինված ուժերին անմիջապես հետ քաշվել Հայաստանի տարածքից: Այս մասին նա գրառում է կատարել «Թվիթեր»-ի իր էջում: «Ադրբեջանի զինված ուժերը պետք է անմիջապես հետ քաշվեն Հայաստանի տարածքից և դադարեցնեն բռնությունը, որն արդեն բազմաթիվ մարդկային կյանքեր է խլել»,- նշել է ԱՄՆ կոնգրեսականը: Նա հպարտությամբ է փաստել, որ կողմ է քվեարկել կոնգրեսական Ֆրենկ Փալոնի առաջարկած օրենսդրական փոփոխությանը, որը սահմանափակում է ԱՄՆ կողմից ռազմական օգնության տրամադրումը Ադրբեջանին: Փաստաթուղթը, որին միացել էին թե՛ դեմոկրատ, թե՛ հանրապետական օրենսդիրներ,արձանագրում է, որ Ադրբեջանին հաջորդ տարի չի կարող գումար հատկացվել Միջազգային ռազմական կրթության ու վերապատրաստման, Արտաքին ռազմական ֆինանսավորման ծրագրերով: Այս երկու հոդվածներով նախորդ տարի Ադրբեջանը Վաշինգտոնից 1 մլն 600 հազար դոլար էր ստացել:

12:47 - 31 հուլիսի, 2021

ԱՄՆ միջազգային զարգացման գործակալությունը մտադիր է Հայաստանում առավել ակտիվ աջակցել կոռուպցիայի կանխարգելմանը

ԱՄՆ միջազգային զարգացման գործակալության հայաստանյան առաքելության տնօրեն Ջոն Ալելոն, Ժողովրդավարության և կառավարման գրասենյակի տնօրեն Ադամ Ստեֆանը և ծրագրերի ղեկավար Անահիտ Խաչատրյանը 2021 թվականի հուլիսի 29-ին հյուրընկալվեցին ՀՀ կոռուպցիայի կանխարգելման հանձնաժողովի գրասենյակում: Ծանոթանալով հանձնաժողովի առաջիկա ծրագրերին՝ նրանք պատրաստակամություն հայտնեցին շարունակել և ընդլայնել հետագա համագործակցությունը, հանձնաժողովին ցուցաբերել անհրաժեշտ աջակցություն կոռուպցիայի կանխարգելման գործում՝ ավելացնելով համակարգային բարեփոխումներին ուղղվող օժանդակությունը: Այս մասին տեղեկացնում է Կոռուպցիայի կանխարգելման հանձնաժողովը: Հանձնաժողովի նախագահ Հայկուհի Հարությունյանը և հանձնաժողովի անդամ Լիլիթ Ալեքսանյանը կարևորել են Հայաստանում կոռուպցիայի դեմ պայքարի գործում ԱՄՆ Միջազգային զարգացման գործակալության դերը: Կողմերը մտքեր են փոխանակել հետագա գործակցության ուղղություններն ընդլայնելու վերաբերյալ՝ կարևորելով քաղաքական կուսակցությունների ֆինանսավորման վերահսկողության, հանրային ծառայողների շրջանում բարեվարքության համակարգի ներդրման, պաշտոնատար անձանց հայտարարագրման համակարգի կատարելագործման, քաղաքացիների շրջանում հանրային իրազեկվածության բարձրացման և կրթական ծրագրերի իրագործմանն առնչվող հարցերը: ԱՄՆ ՄԶԳ/Հայաստանի տնօրեն Ջոն Ալելոն նշեց, որ ներկայացված ուղղությունները կարևոր են և ԱՄՆ ՄԶԳ-ն գործակալությունն առաջիկայում կշարունակի գործուն աջակցություն ցուցաբերել՝ այդ ոլորտներում հաջողություններ արձանագրելու համար: ԱՄՆ ՄԶԳ/Հայաստանի Ժողովրդավարության և կառավարման գրասենյակի տնօրեն Ադամ Ստեֆանը կարևորեց հանձնաժողովի հետ շուրջ մեկուկես տարվա փոխգործակցությունը և հույս հայտնեց, որ վերոնշյալ ուղղություններով ևս կլինեն շոշափելի արդյունքներ: Կողմերը պայմանավորվել են այսպիսի աշխատանքային քննարկումները դարձնել պարբերական։ Հետագա հանդիպումներին կներկայացվեն ոչ միայն նպատակները, այլև կատարված աշխատանքներն ու արդյունքները:

16:44 - 30 հուլիսի, 2021

Բայդենը ողջունել Է հատուկ ծրագրով ԱՄՆ տեղափոխված աֆղանների առաջին խմբին |armenpress.am|

armenpress.am: ԱՄՆ-ի նախագահ Ջո Բայդենը ողջունել Է ավելի քան 200 աֆղաններից բաղկացած խմբին, որոնց Միացյալ Նահանգների իշխանությունները երկիր են տեղափոխում հատկ ներգաղթային ծրագրով՝ Աֆղանստանից իրենց զորքերի դուրսբերման ֆոնին: Հուլիսի 30-ին հայտնել Է Սպիտակ տան մամուլի ծառայությունը: «Ես ցանկանում եմ շնորհակալություն հայտնել այս խիզախ աֆղաններին այն բանի համար, որ նրանք աջակցություն են ցույց տալիս Միացյալ Նահանգներին: Այսօր ես հպարտությամբ եմ նրանց ասում. «Բարի գալուստ տուն»»,- հայտարարել Է ԱՄՆ-ի ղեկավարը: Նա նաեւ նշել Է, որ, չնայած զորքերի դուրսբերմանը ԱՄՆ-ը կաշարունակի Աֆղանստանին ցույց տալ օժանդակություն անվտանգության բնագավառում, մարդասիրական օգնություն եւ օգնություն հետագա զարգացման համար»: Ներքին անվտանգության հարցերով ԱՄՆ-ի նախագահի խորհրդականի օգնական Ռաս Թրեվերստի խոսքով՝ մոտ ժամանակներս Միացյալ Նահանգների իշխանությունները մտադիր են առաջնահերթ կարգով հատուկ ներգաղթային ծրագրով Աֆղանստանից ԱՄՆ վերաբնակեցնել շուրջ 700 մարդու, ովքեր հայտեր են տվել: Նրանց ընտանիքների անդամների հետ ընդհանուր թիվը կկազմի 2 500: Արեւմտյան զանգվածային լրատվամիջոցների տվյալների համաձայն՝ ընդամենը շուրջ 18 հազար աֆղաններ, ովքեր օգնել են ամերիկյան զորքերին, այդ թվում որպես թարգմանիչներ, եւ նրանց ընտանիքների եւս շուրջ 53 հազար անդամներ այս պահին հուսով են ստանալու հատուկ ներգաղթային այցագրեր, հաղորդել Է ՏԱՍՍ-ը:

15:38 - 30 հուլիսի, 2021

ՌԴ-ԱՄՆ հաջորդ բանակցությունները կկայանան սեպտեմբերի վերջին․ քննարկվելու է ռազմական կայունության հարցը |tert.am|

tert.am: Միացյալ Նահանգներն ու Ռուսաստանի Դաշնությունը ռազմական կայունության վերաբերյալ ռուս-ամերիկյան խորհրդակցությունների շրջանում պայմանավորվել են հանդիպել սեպտեմբերի վերջին, հայտնում է korrespondent.net-ը և հավելում, որ երկու երկրների ներկայացուցիչների միջև հանդիպումը տեղի է ունեցել հուլիսի 28-ին Ժնևում։ Միացյալ Նահանգների Պետդեպարտամենտը նշել է, որ բանակցությունները «պրոֆեսիոնալ և բովանդակալից» բնույթ են կրել։ Իր հերթին Ռուսաստանի Դաշնության արտաքին գործերի նախարար Սերգեյ Լավրովը նույնպես դրական է գնահատել Ժնևում կայացած հանդիպման արդյունքները։ «Երկու պետությունները համաձայնություն են ձեռք բերել սեպտեմբերի վերջին կրկին հանդիպել լիագումար նիստում, իսկ այդ ընթացքում ոչ պաշտոնական խորհրդակցություններ անցկացնել՝ 2-րդ լիագումար նիստի փորձագիտական աշխատանքային խմբերի թեմաները հստակեցնելու նպատակով», - ասված է հայտարարության մեջ։

12:49 - 29 հուլիսի, 2021

Եկել է պատասխանատվության ժամանակը. ԱՄՆ կոնգրեսական Ադամ Շիֆը՝ Ադրբեջանի սադրանքների մասին |armtimes.com|

armtimes.com: Հայ-ադրբեջանական սահմանի իրավիճակի լարվածությանն է անդրադարձել ԱՄՆ կոնգրեսական Ադամ Շիֆը: «Մտահոգիչ են հայտարարություններն այն մասին, որ Ադրբեջանի զինված ուժերը խախտել են Հայաստանի հետ հրադադարի պայմանագիրը, որի հետևանքով սահմանին զոհվել է երեք հայ զինծառայող, ևս երկուսը ծանր վիրավորվել են: Եթե դա ճշմարիտ է, ապա այն կդառնա Ադրբեջանի կողմից իրականացվող ագրեսիայի հերթական մահացու գործողությունը: Եթե թույլ տրվի, որ այն ավելի սրվի, դա կարող է հանգեցնել հետագա բռնության, մահվան և ավերածությունների: Մենք պետք է ընդունենք այն փաստը, որ Միացյալ Նահանգների շարունակական օգնությունն Ալիևի ռեժիմին չի խոչընդոտում նրանց ագրեսիային, և այն անխուսափելի սպառնալիք է հայերի համար: Պետքարտուղարությանը և պետքարտուղար Բլինքենին կոչ եմ անում բարձրաձայնել վերջին 24 ժամվա իրադարձությունների մասին և ճնշում գործադրել Ադրբեջանի վրա՝ պահպանելու հրադադարը: Միացյալ Նահանգները երբեք չպետք է ռազմական միջոցներ կամ աջակցություն ցուցաբերի այն երկրին, որը պարբերաբար խախտում է մարդու իրավունքները և ոտնձգություն է կատարում իր հարևանի անկախության նկատմամբ: Եկել է պատասխանատվության ժամանակը»: Հիշեցնենք՝ հուլիսի 28-ին՝ ժամը 03:40-ի սահմաններում, ադրբեջանական ԶՈՒ ստորաբաժանումները հերթական անգամ դիմել են սադրանքի և խախտել հրադադարը հայ-ադրբեջանական սահմանի հյուսիս-արևելյան հատվածում: Ըստ պաշտպանության նախարարության՝ ընթացել են տեղային մարտեր: Ավելի ուշ հայտնի դարձավ, որ ՌԴ խաղաղապահ զորքերի հրամանատարության միջնորդությամբ ձեռք է բերվել պայմանավորվածություն հյուսիս-արեւելյան ուղղությամբ հայ-ադրբեջանական զորքերի շփման գծում հրադադարի ռեժիմը վերականգնելու վերաբերյալ։ Ադրբեջանական հարձակման հետևանքով հայկական կողմն ունի 3 զոհ, 4 վիրավոր:

12:33 - 29 հուլիսի, 2021

Ալյասկայում երկրաշարժ է տեղի ունեցել․ հայտարարվել է ցունամիի սպառնալիք |armenpress.am|

armenpress.am: Սեյսմոլոգները երկրաշարժ են գրանցել Ալյասկայի նահանգի տարածքում։ Այս մասին հայտնել է ԱՄՆ-ի Երկրաբանական ծառայությունը: Ծառայության տվյալներով՝ մագնիտուդը կազմել է 7,3, մինչդեռ ԱՄՆ-ի Նախազգուշացման կենտրոնը հայտնել է 8,1 մագնիտուդի մասին: Ստորգետնյա ցնցումների էպիկենտրոնը գտնվել է Անքորիջից, որի բնակչությունը շուրջ 298 հազար է, 801,6 կիլոմետր դեպի հյուսիս - արեւելք: Օջախն ընկած է եղել 3,4 կիլոմետր խորության վրա: Ավերածությունների եւ տուժածների մասին հաղորդումներ չեն ստացվել: Երկրաշարժից հետո ցունամիի սպառնալիք է հայտարարվել, հաղորդել է ՏԱՍՍ-ը:

12:09 - 29 հուլիսի, 2021

Խամենեին Իրանի նոր կառավարությանը խորհուրդ է տվել դասեր քաղել անցյալից և «չվստահել ԱՄՆ-ին» |tert.am|

tert.am: Իրանի Իսլամական Հանրապետության հոգևոր առաջնորդ Այաթոլլա Ալի Խամենեին Իրանի գործող նախագահ Հասան Ռոհանիի և նրա վարչակազմի հետ վերջին հանդիպման ընթացքում ասել է, որ Ռոհանիի նախագահության օրոք ակնհայտ է դարձել, որ Արևմուտքին վստահելն իմաստ չունի և նոր կառավարությունը դրանից դասեր է քաղելու, գրում է իրանական Tehran Times թերթը։ Ալի Խամենեին նշել է, որ «եթե Միացյալ Նահանգները հարվածներ չի հասցնում, ապա այդ պահին պարզապես միջոցներ չունի» և շեշտել, որ պատժամիջոցները չեղարկելու մասին ԱՄՆ-ի հայտարարությունները միայն թղթի վրա են, սակայն ո՛չ իրագործվել են, ո՛չ էլ իրագործվելու են։ Հանդիպման ավարտին Իրանի հոգևոր առաջնորդն ԱՄՆ-ի վարքը որակել է «դիտավորություն» և հաջորդ վարչակազմին խորհուրդ է տվել դասեր քաղել այս փորձից և այն հաշվի առնել։

10:56 - 29 հուլիսի, 2021

Ռիքերը Բայրամովի հետ հեռախոսազրույցում մտահոգություն է հայտնել սահմանին լարվածության կապակցությամբ |azatutyun.am|

azatutyun.am: Միացյալ Նահանգների պետքարտուղարի Եվրոպայի հարցերով տեղակալ Ֆիլիպ Ռիքերը մտահոգություն է հայտնել Հայաստանի և Ադրբեջանի սահմանին լարվածության կապակցությամբ: Ամերիկացի բարձրաստիճան դիվանագետն այդ մասին ասել է երեկ` Ադրբեջանի արտգործնախարարի հետ հեռախոսազրույցում, հաղորդում է պաշտոնական Բաքուն: Ըստ հաղորդագրության՝ կողմերը քննարկել են տարածաշրջանում ներկայումս տիրող իրավիճակը, ինչպես նաև եռակող ձևաչափով` Հայաստանի, Ադրբեջանի և Ռուսաստանի միջև ձեռք բերված պայմանավորվածությունների կատարման ընթացքը: Ջեյհուն Բայրամովը վերստին հայկական կողմին է մեղադրել ու պնդել, թե Բաքուն շահագրգռված չէ լարվածության աճով և հանձնառու է բոլոր հարցերը կարգավորել քաղաքական ու դիվանագիտական մեթոդներով: Ամերիկյան կողմը զրույցի մասին տեղեկություն դեռ չի հաղորդել, Բաքուն էլ չի հստակեցնում` ում նախաձեռնությամբ է այն կայացել:

09:43 - 29 հուլիսի, 2021

ԱՄՆ-ն Հայաստանին և Ադրբեջանին կոչ է անում կատարել հրադադարի պարտավորությունները և վերադառնալ ԵԱՀԿ ՄԽ համանախագահների հովանու ներքո առարկայական բանակցություններին |tert.am|

tert.am: Միացյալ Նահանգները Հայաստանին և Ադրբեջանին կոչ է անում սահմանին իրավիճակի ապաԷսկալացման ուղղությամբ անհապաղ քայլեր ձեռնարկել։ Այս մասին ասված է Պետդեպարտամենտի մամուլի ծառայության ղեկավար Նեդ Փրայսի տարածած հայտարարության մեջ։ «ԱՄՆ-ն դատապարտում է Հայաստանի և Ադրբեջանի միջև միջազգային սահմանի երկայնքով բռնության վերջին էսկալացիան։ Մենք Հայաստանին և Ադրբեջանին կոչ ենք անում կատարել հրադադարի վերաբերյալ իրենց պարտավորությունները՝ անհապաղ քայլեր ձեռնարկելով իրավիճակի ապաէսկալացման ուղղությամբ։ Սահմանին պահպանվող լարվածությունը փաստում է, որ միայն համապարփակ լուծումը, որը թույլ կտա լուծել առանցքային խնդիրները, կարող է կարգավորել երկու երկրների հարաբերությունները և տարածաշրջանի բնակիչներին թույլ կտա միասին խաղաղ ապրել»,- ասված է ԱՄՆ վարչակազմի ներկայացուցչի հայտարարության մեջ։ Բացի այդ, Փրայսը Երևանին և Բաքվին կոչ է արել հնարավորինս շուտ վերադառնալ ԵԱՀԿ Մինսկի խմբի համանախագահների (Ռուսաստան, ԱՄՆ և Ֆրանսիա) հովանու ներքո բանակցություններին:

09:28 - 29 հուլիսի, 2021

ԱՄՆ Ներկայացուցիչների պալատն ընդունեց Ադրբեջանին հատկացվող ռազմական օգնությունը դադարեցնելու մասին որոշում |amerikayidzayn.com|

amerikayidzayn.com: ԱՄՆ Ներկայացուցիչների պալատն ընդունեց կոնգրեսական Փալոնի ներկայացրած փոփոխությունը, որը դադարեցնում է ԱՄՆ-ի ռազմական ֆինանսական օգնությունը Ադրբեջանին: Փալոնի ներկայացրած փոփոխության մեջ ասված է, որ «Միջազգային ռազմական կրթություն և ուսուցում», ինչպես նաեւ «Արտաքին ռազմական ֆինանսավորման ծրագրի» միջոցով հատկացվող որեւէ ֆինանսավորում չի տրամադրվելու Ադրբեջանին: Դրույթը չի արգելափակում հայեցողական ռազմական տեխնիկայի տրամադրումը, որը կարող է փոխանցվել Պաշտպանության դեպարտամենտի կողմից՝ ԱՄՆ-ի օրենքների 333-րդ հոդվածի համաձայն: Ինչպես տեղեկացրին Ամերիկայի հայ դատի հանձնախմբի վաշինգտոնյան գրասենյակից, այժմ աշխատանքներ են տարվում նաեւ այդ ուղղությամբ: Կոնգրեսի՝ հայկական հարցերով հանձնախմբի համանախագահ Ֆրենկ Փալոնը ողջունել է փոփոխությունների մասին հուլիսի 28-ին Պալատի կայացրած որոշումը:

00:13 - 29 հուլիսի, 2021

Ռուսաստանն ու ԱՄՆ-ն Ժնևում քննարկել են միջուկային զենքի նկատմամբ վերահսկողությունը |tert.am|

tert.am: Չորեքշաբթի Ժնևում կայացած ռազմավարական կայունության հարցերով խորհրդակցությունների ընթացքում ԱՄՆ-ի և Ռուսաստանի պատվիրակությունները քննարկել են անվտանգության ներկա սպառնալիքները, ինչպես նաև միջուկային զենքի վերահսկման հեռանկարները: Այս մասին հայտարարել է ԱՄՆ պետդեպարտամենտի պաշտոնական ներկայացուցիչ Նեդ Փրայսը, գրել է «ՌԻԱ Նովոստի» գործակալությունը: «ԱՄՆ պատվիրակությունը քննարկել է ԱՄՆ քաղաքականության գերակայությունները և անվտանգության ոլորտում ներկայիս իրավիճակը, ռազմավարական կայունությանը սպառնացող մեր ազգային տեսլականը, նոր (ռեժիմի) միջուկային զենքի վերահսկման հեռանկարները, ինչպես նաև հետագա նստաշրջանների ձևաչափը»,-ասված է Փրայսի հայտարարության մեջ: ԱՄՆ Պետդեպարտամենտը, Ժնևում Ռուսաստանի հետ խորհրդակցություններից հետո հայտարարել է, որ Վաշինգտոնը հանձնառու է նվազեցնելու զինված հակամարտությունների և միջուկային պատերազմի վտանգը:

20:29 - 28 հուլիսի, 2021

ԱՄՆ-ը կարևորում է հայկական սփյուռքի դինամիկ ջանքերը. դեսպան Լին Թրեյսի

Օրերս Հայաստանում ԱՄՆ դեսպան Լին Թրեյսին հանդիպել է Սփյուռքի գործերի գլխավոր հանձնակատար Զարեհ Սինանյանին՝ քննարկելու համար ընթացիկ աշխատանքներն ու ծրագրերը։ Այդ մասին «Ֆեյսբուք»-ի իր էջում հաղորդել է Հայաստանում ԱՄՆ դեսպանությունը: «Միացյալ Նահանգները կարևորում է իր երկարամյա գործընկեր հայկական սփյուռքի դինամիկ ջանքերը»,- հանդիպմանն ասել է ՀՀ-ում ԱՄՆ դեսպանը:

20:22 - 27 հուլիսի, 2021