Թուրքիա

Թուրքիայի Հանրապետությունը պետություն է Եվրասիայի հարավարեւմտյան հատվածում։ Սահմանակցում է Հունաստանին, Բուլղարիային, Վրաստանին, Իրաքին, Սիրիային, Հայաստանին, Իրանի Իսլամական Հանրապետությանը եւ Ադրբեջանի էքսկլավ Նախիջեւանի Ինքնավար Հանրապետությանը։ Բնակչությունը 2015թ. մարդահամարի տվյալներով 82.003.882 մարդ։ Տարածքը 783.562 կմ²։ Երկիրը ղեկավարում է նախագահ Ռեջեբ Թայիփ Էրդողանը։

Դատարանը որոշեց պատանդ պահել Օսման Քավալային. Կարո Փայլան |news.am|

Դատարանը որոշեց պատանդ պահել Օսման Քավալային. Կարո Փայլան |news.am|

news.am։ Թուրքիայի քրդական «Ժողովուրդների դեմոկրատական» կուսակցության հայ պատգամավոր Կարո Փայլանը անդրադարձել է «Անատոլիական մշակույթ» ՀԿ–ի նախագահ Օսման Քավալայի կալանքի հետ կապված դատարանի որոշմանը։Կարո Փայլանը Twitter–ի իր էջում գրել է. «Դատարանը որոշում կայացրեց շարունակել պատանդ պահել Օսման Քավալային։ Ստամբուլում հաղթանակով աշխարհը չի շրջվել, ընկերներ, պետք է շարունակենք պայքարը»։Նշենք, որ Օսման Քավալան Թուրքիայի հայտնի իրավապաշտպաններից է։ Նա հայ-թուրքական հարաբերությունների կարգավորման ջատագովներից է։ Նրա կողմից կազմակերպվել են հայ-թուրքական հաշտեցմանն ուղղված բազմաթիվ միջոցառումներ Թուրքիայում։ Քավալան բազմաթիվ անգամ եղել է Հայաստանում։Ստամբուլում նրան պատկանող հրատարակչությունում տպագրվել են Հայոց ցեղասպանության վերաբերյալ բազմաթիվ գրքեր, իսկ նրան պատկանող «Ջեզաիր» ռեստորանում կազմակերպվել են Հայոց ցեղասպանությանը նվիրված քննարկումներ ու սգո միջոցառումներ։Օսման Քավալան ձերբակալվել է ռազմական հեղաշրջամ փորձի մեջ մեղադրվողների հետ համագործակցության մեղադրանքով։
06:45 - 27 հունիսի, 2019
Ստամբուլի նորընտիր քաղաքապետը պատմել է, որ հայ ճարտարապետի շնորհիվ է իր ծննդավայրը նորովի բացահայտել |ermenihaber.am|

Ստամբուլի նորընտիր քաղաքապետը պատմել է, որ հայ ճարտարապետի շնորհիվ է իր ծննդավայրը նորովի բացահայտել |ermenihaber.am|

ermenihaber.am։ Ստամբուլի նորընտիր քաղաքապետ ընդդիմադիր «Ժողովրդահանրապետական կուսակցության» (CHP-ԺՀԿ) առանցքային գործիչներից Էքրեմ Իմամօղլուն նախընտրական քարոզարշավի ժամանակ խոսել է իր համար նշանակալի դեր ունեցած հայ ճարտարապետի մասին:Հեռուստաեթերից պատմելով այդ մասին՝ Իմամօղլուն մի դրվագ է ներկայացրել իր կյանքից։ Նշել է, որ 1990-ական թվականներին իր մերձավոր շրջապատում մի հայ ճարտարապետ կար, ով լիովին փոխել է քաղաքների ու շինությունների մասին իր պատկերացումները։ Խոսքը Թուրքիայում հայտնի հայզագի ճարտարապետ Զաքարիա Միլդանօղլուի մասին է։ Նորընտիր քաղաքապետը վերհիշել է, թե ինչպես է հայ ճարտարապետի հետ միասին շրջել իր ծննդավայր Տրապիզոն քաղաքում։ Իմամօղլուն առաջարկել է գնալ քաղաքից դուրս և բնության գրկում զբոսնել, բայց հայ ճարտարապետը առարկել է՝ ասելով որ Տրապիզոն քաղաքում դիտարժան շատ վայրեր կան։Իմամօղլուն զարմացել է, թե Տրապիզոնում բացի բետոնե շենքերից ուրիշ ինչ կա տեսնելու, բայց չի առարկել և իր խոսքերով Զաքարիա ճարտարապետի ուղեկցությամբ նորովի է բացահայտել իր իսկ ծննդավայրը և դրանից հետո սկսել է բոլորովին այլ աչքով նայել Տրապիզոնին։
11:04 - 26 հունիսի, 2019
Այս քաղաքում մենք հարգելու ենք հայերին և մնացած բոլոր ազգությունների ներկայացուցիչներին. Ստամբուլի նորընտիր քաղաքապետ |tert.am|

Այս քաղաքում մենք հարգելու ենք հայերին և մնացած բոլոր ազգությունների ներկայացուցիչներին. Ստամբուլի նորընտիր քաղաքապետ |tert.am|

tert.am։ Թուրքիայի խոշորագույն քաղաքի՝ Ստամբուլի քաղաքապետի կրկնակի ընտրություններում հաղթած Էքրեմ Իմամօղլուն, որն ընդդիմադիր Ժողովրդահանրապետական կուսակցության թեկնածուն էր, խոստացել է հարգանքով վերաբերվել այնտեղ բնակվող ազգային փոքրամասնություններին, այդ թվում՝ հայերին, հայտնում է gazeteduvar.com.tr-ը: «Այս քաղաքում մենք ընդունելու ենք և հարգանքով ենք վերաբերվելու հայերին, հույներին, ասորիներին, հրեաներին և մնացած բոլոր ազգությունների ներկայացուցիչներին: Մենք ժողովրդավարություն կկառուցենք և այս քաղաքում արդարություն կհաստատենք»,- հայտարարել է քաղաքապետը, որն ընտրություններում հավաքել է ձայների ավելի քան 54%-ը: Իմամօղլուն շարունակել է իր խոսքը՝ նկատելով, որ քաղաքում չպետք է լինի «ազգային փոքրամասնություն» հասկացությունը, և որ Ստամբուլի բոլոր բնակիչները, անկախ էթնիկ պատկանելիությունից, պետք է հավասար իրավունքներ ունենան:  
12:51 - 24 հունիսի, 2019
Էրդողանի համար սկսված անկումն ավելի է խորանալու. The Guardian-ի անդրադարձը Ստամբուլի քաղաքապետի կրկնակի ընտրություններում ընդդիմադիր թեկնածուի հաղթանակին |tert.am|

Էրդողանի համար սկսված անկումն ավելի է խորանալու. The Guardian-ի անդրադարձը Ստամբուլի քաղաքապետի կրկնակի ընտրություններում ընդդիմադիր թեկնածուի հաղթանակին |tert.am|

tert.am։ Բրիտանական The Guardian պարբերականն անդրադարձել է Ստամբուլի քաղաքապետի կրկնակի ընտրություններում ընդդիմադիր Ժողովրդահանրապետական կուսակցության թեկնածու Էքրեմ Իմամօղլուի հաղթանակին՝ նկատելով, որ դա շատ լուրջ հարված էր նախագահ Ռեջեփ Թայիփ Էրդողանին, որի «Արդարություն և զարգացում» կուսակցության առաջադրած թեկնածուն պարտվել է: Հոդվածագիր Բեթան ՄքՔերնանը գրում է, որ Ստամբուլում ընդդիմադիր թեկնածուի հաղթանակը չափազանց նշանակալի իրադարձություն է մի երկրում, որտեղ ժողովրդավարությունն անկում է արձանագրում: Հայտնի է, որ Իմամօղլուն հաղթել էր մարտի 31-ին կայացած ընտրություններում, ինչից հետո իշխանությունները պահանջել էին անվավեր ճանաչել արդյունքներն ու նոր ընտրություններ անցկացնել՝ հույս ունենալով, որ Էրդողանի աջակցությունը վայելող թեկնածուն՝ Բինալի Յըլդըրըմը, կկարողանա հաղթել: «Փաստացի կրկնակի ընտրությունների նպատակն Իմամօղլուի անակնկալ հաղթանակը չեղարկելն էր: Դա աննախադեպ թեստ էր թե՛ Թուրքիայի անկայուն ժողովրդավարական ինստիտուտների, թե՛ Էրդողանի քաղաքական ապագայի համար... Այս պարտությունը, ըստ ամենայնի, կոալիցիոն կառավարության ներսում իշխանության շուրջ նոր լարված պայքարի հիմք կդնի»,- գրում է հեղինակը: Հատկանշական է, որ եթե մարտի 31-ին կայացած ընտրություններում Իմամօղլուի և Յըլդըրըմի հավաքած ձայների տարբերությունն ընդամենը 13 000 էր, ապա այս անգամ ընդդիմադիր թեկնածուն 777 000-ով ավելի քվե է ստացել: «Սա մարդկանց նոր հույս տվեց»,-նշել է Իմամօղլուի հաղթանակը փողոցում նշող ստամբուլցի Սեմրա Դենիզը: Այնուհետև հեղինակը մեջբերում է թուրք-ամերիկյան քաղաքական հարցերով փորձագետ Սոներ Չաղափթայի տեսակետը, ըստ որի՝ կրկնակի ընտրություն անցկացնելու վերաբերյալ «Արդարություն և զարգացում» կուսակցության որոշումը շատ մեծ մարտավարական սխալ էր: Շարունակությունը՝ tert.am
11:38 - 24 հունիսի, 2019
Իշխող կուսակցության համակիրները Ստամբուլում հարձակվել են ընդդիմադիրների վրա |ermenihaber.am|

Իշխող կուսակցության համակիրները Ստամբուլում հարձակվել են ընդդիմադիրների վրա |ermenihaber.am|

ermenihaber.am։ Թուրքիայի խոշորագույն Ստամբուլ քաղաքում տեղի ունեցող քաղաքապետի ընտրության ժամանակ բախում է տեղի ունեցել իշխող ու ընդդիմադիր կուսակցությունների ներկայացուցիչների միջև: Հաղորդվում է, որ Շիշլի թաղամասի տեղամասերից մեկում իշխող «Արդարություն և զարգացում կուսակցության» (AKP-ԱԶԿ) անդամ մի խումբ երիտասարդներ «հայրենիքի դավաճաններ» վանկարկումներով հարձակվել են ընդդիմադիր «Ժողովրդահանրապետական կուսակցությանը» (CHP-ԺՀԿ) ներկայացուցիչների վրա: Բախումը մեծ չափերի չի հասել, քանի որ ոստիկանները կարողացել են ժամանակին միջամտել ու դադարեցնել այն: Հարձակվողները բերման են ենթարկվել։ Այսօր՝ հունիսի 23-ին, Ստամբուլում տեղի ունեցող քաղաքապետի ընտրություններում գլխավոր մրցակիցներն են իշխող ԱԶԿ-ի առաջադրած Բինալի Յըլդըրըմը և ընդդիմադիր ԺՀԿ-ի թեկնածու Էքրեմ Իմամօղլուն:
06:48 - 24 հունիսի, 2019
«Թաքնված խաչ» ֆիլմի անձնակազմը դատի է տալու թուրքական ազգայնամոլական թերթին |ermenihaber.am|

«Թաքնված խաչ» ֆիլմի անձնակազմը դատի է տալու թուրքական ազգայնամոլական թերթին |ermenihaber.am|

ermenihaber.am։ Մուսուլմանացված հայերի մասին նկարահանված «Թաքնված խաչ» ֆիլմի ռեժիսորները դատի կտան ֆիլմը թիրախավորած թուրքական ազգայնամոլական «Yeni Akit» թերթին:Լրագրող-ուսումնասիրողներ Ալթան Սանջարի ու Սերհաթ Թեմելի նկարահանած ֆիլմը պատմում է Դիարբեքիրի Էղիլ շրջանի մուսուլմանացված հայերի մասին: «Թաքնված խաչի» շնորհանդեսը տեղի էր ունեցել հունիսի 16-ին Դիարբեքիրումի քաղաքապետարանում:Ազգայնամոլական թերթի հոդվածում ֆիլմը նկարահանողներին տրվել է «դավաճան» պիտակավորումը:«PKK ահաբեկչական կազմակերպության համակիրները Թուրքիայի ներսում աջակցում են հայերին ցեղասպանության ենթարկելու մասին Թուրքիային ուղղված Արևմուտքի մեղադրանքներին: Ռեժիսոր Ալթան Սանջարը, ով ասում է, թե հայի թոռ է, իր նկարահանած «Թաքնված խաչ» ֆիլմով աջակցում է հայկական պնդումներին»,- ասվում է «Yeni Akit» հրապարակման մեջ:Սանջարը Twitter-ում կատարած գրառմամբ հայտնել է, որ իրենք պատրաստվում են դատի տալ բացահայտ կերպով իրենց թիրախավորած ազգայնամոլական թերթին:«Ցանկանում ենք, որ բոլորը իմանան, որ մեզ պատահելիք հնարավոր բոլոր բացասական իրադարձությունների մեղավորը «Yeni akit»-ն է»,- գրել է ֆիլմի ռեժիսորը:
06:33 - 20 հունիսի, 2019
Թուրքիայի առաջին հայկական հեռուստաալիքն արդեն եթերում է |ermenihaber.am|

Թուրքիայի առաջին հայկական հեռուստաալիքն արդեն եթերում է |ermenihaber.am|

ermenihaber.am: Թուրքիայում արդեն եթեր է հեռարձակվում հայերեն առաջին հեռուստաալիքը՝ «Լույս TV»-ն։ Մինչ օրս «Լույս TV»-ն փորձնական եթեր էր դուրս գալիս միայն համացանցի միջոցով։ Առաջին համացանցային եթերը եղել էր 2019թ․ հունվարի 6-ին՝ Սուրբ Ծննդյան պատարագի հեռարձակմամբ։ Հեռուստաընկերության հիմնադիր Արամ Քուրանը պատմել է, որ «Լույս TV»-ի հիմնադրման ուղղությամբ աշխատանքները սկսվել են դեռևս 2 տարի առաջ։ Այդ ճանապարհին ստիպված են եղել հաղթահարել բազում դժվարություններ: Հիմա «Լույս TV»-ն ամեն ուրբաթ երեկոյան հրապարակում է շաբաթվա կարևոր լուրերի ամփոփ լրահոսը։ Նախատեսվում է առաջիկայում հանդես գալ ամենօրյա լրատվական հաղորդումներով։ Կլինեն նաև մշակութային, երաժշտական, մանկական հաղորդումներ, ֆիլմեր ու մուլտֆիլմեր։ Արամ Քուրանը նշել է, որ «TRT» հանրային հեռուստաընկերությունն իրենց է տրամադրել երկրում բնակվող ազգային փոքրամասնությունների վերաբերյալ փաստագրական ֆիլմերի արխիվը, իսկ լրատվությունը հիմնականում վերցնում են պետական «Anadolu» լրատվական գործակալությունից և թարգմանում արևմտահայերեն։ «Երբ սկսեցինք եթեր հեռարձակվել, ստացված արձագանքները ցույց տվեցին, որ անհավանական թվով հեռուստադիտող ունենք։ Հատկապես արտերկրից մեր եթերին հետևողները շատ են ոգևորվում»,- նշել է «Լույս TV»-ի հիմնադիրը՝ հավելելով, որ ընդհանուր առմամբ հեռուստաալիքի եթերի շուրջ 70 տոկոսը հայերեն կլինի, իսկ 30 տոկոսը՝ թուրքերեն։
12:32 - 14 հունիսի, 2019
«ՆԱՏՕ-ն ի վիճակի չէ ապահովել Թուրքիայի անվտանգությունը». Չավուշօղլուն հայտնել է С-400-ների ձեռքբերման պատճառը |tert.am|

«ՆԱՏՕ-ն ի վիճակի չէ ապահովել Թուրքիայի անվտանգությունը». Չավուշօղլուն հայտնել է С-400-ների ձեռքբերման պատճառը |tert.am|

tert.am։ ՆԱՏՕ-ն ի վիճակի չէ պաշտպանել Թուրքիային, դրա համար էլ Անկարան ռուսական С-400 զենիթահրթիռային համալիրներ է ձեռք բերում: Թուրքական լրատվամիջոցների փոխանցմամբ՝ այս մասին հայտարարել է Թուրքիայի արտգործնախարար Մևլութ Չավուշօղլուն: Նրա խոսքով՝ ռուսական համալիրները ՆԱՏՕ-ի համար վտանգ չեն ներկայացնում, և Թուրքիան այդ մասին բազմիցս հայտնել է Հյուսիսատլանտյան դաշինքի երկրներին: Նախարարն ընդգծել է, որ С-400-ների ձեռքբերումը կապված է երկրի օդային տարածքը պաշտպանելու խիստ անհրաժեշտության հետ: «Անկարան մտադիր չէ ենթարկվել ԱՄՆ-ի պահանջներին: Չնայած Միացյալ Նահանգները կոչ է անում մեզ հրաժարվել ռուսական համալիրի գնումից, սակայն միևնույն ժամանակ չի երաշխավորում, որ մեզ կվաճառի Patriot զենիթահրթիռային համակարգերը»,- ասել է Չավուշօղլուն: Ամերիկյան կողմն իր հերթին բազմիցս հայտնել է, որ С-400-ը և ամերիկյան արտադրության F-35 կործանիչները գործածության առումով համատեղելի չեն:
09:37 - 14 հունիսի, 2019
S-400-ը համալիր մեծ խնդրի մաս է կազմում, որն առկա է Թուրքիայի և ԱՄՆ-ի միջև․ Վարուժան Գեղամյան

S-400-ը համալիր մեծ խնդրի մաս է կազմում, որն առկա է Թուրքիայի և ԱՄՆ-ի միջև․ Վարուժան Գեղամյան

Թուրքիայի նախագահ Ռեջեփ Թայիփ Էրդողանը հաստատել է, որ ռուսական S-400 զենիթահրթիռային համակարգերի՝ Թուրքիա մատակարարելու հարցը փակված է: «Ես չեմ ասում, որ Թուրքիան ձեռք է բերելու S-400 համակարգեր, ես ասում եմ, որ Թուրքիան արդեն գնել է դրանք, սա ավարտված գործարք է»,- մասնավորապես նշել է նա: Հիշեցնենք, որ օրերս ԱՄՆ-ի կոնգրեսի ներկայացուցիչների պալատը քվեարկությամբ ընդունել է Թուրքիայի դեմ պատժամիջոցներ սահմանող օրինագիծ։ Պատժամիջոցներին անցնելու պատճառը Թուրքիայի կողմից ռուսական S-400 զենիթահրթիռային ՀՕՊ համակարգերի գնման գործարքն է։ Թուրք-ամերիկյան լարված հարաբերությունների շուրջ զրուցել ենք թուրքագետ Վարուժան Գեղամյանի  հետ։ Պրն Գեղամյան, փաստորեն Թուրքիայի նախագահ Ռեջեփ Թայիփ Էրդողանը հաստատում է, որ գնել է ռուսական արտադրության հակաօդային համակարգի զինատեսակները։ Ի՞նչ հետևանքների կհանգեցնի սա Թուրքիայի համար։ Ես հակված եմ կարծել, որ պետք չէ շտապել և եզրակացնել, որ գործարքը իրականություն է դարձել։ Դա բխում է Էրդողանի երեկվա հայտարարությունից, որտեղ նա ասում է՝ մենք չենք գնելու, մենք արդեն գնել ենք։ Սակայն, ինչպես հայտնի է, այդ տեսակ հայտարարություն արվել է արդեն մի քանի անգամ՝ այլ ձևակերպումներով։ Այս պարագայում մենք գործ ունենք ավելի շատ ներքին լսարանին ուղղված ուղերձի հետ։ Որովհետև որևէ կերպ, որևէ կողմ չի հաստատել այն, ինչպես նաև չկա նշված հստակ ժամկետ, թե երբ են այդ զինատեսակները մատակարարվելու Թուրքիային։ Առավել ևս՝ նշված չէ՝ դիցուք գնվեն այդ համակարգերը, դրանք կտեղադրվեն Թուրքիայում, թե՞ մինչև լարվածության անցնելը կտեղակայվեն Կատարի թուրքական ռազմաբազայում, ինչի մասին ևս տարբեր առիթներով խոսվել է։ Այնպես որ, ես չեմ հակված մտածելու, թե գործարքն արդեն կայացել է։ Ինչ վերաբերում է դրա աշխարհաքաղաքական կոնտեքստին՝ մենք գործ ունենք ոչ միայն զինատեսակի գնման հետ, այլև այն մաս է կազմում համալիր մեծ խնդրի, որն առկա է Թուքիայի և ԱՄՆ-ի միջև։ Այդ հարաբերությունները բնավ միայն բաղկացած չեն S-400 ՀՕՊ զինատեսակներով։ Դա պարզապես այս պահին դարձել է շատ արդիական, և շատ հեշտ է դրա մասին խոսել։ Սակայն դրա ֆոնին կա շատ ավելի բարդ խնդիր, օրինակ՝ Սիրիայում քրդերի և ԱՄՆ համագործակցությունը և այլ թեմաներ։ Իսկ ի՞նչ կարող ենք ենթադրել ԱՄՆ-ի և Թուրքիայի կողմից միմյաց ուղղված խիստ հայտարարություններից։ Արդյոք այս երկու երկրների միջև բանակցային մթնոլորտն այլևս կառուցաղական չէ։ Մենք հիմա ականատես ենք լինում ոչ թե բուն բանակցություններին, այլ բանակցություններից բխող կուլիսներում տեղի ունեցող բարդ բանակցային գործընթացի միայն այն հատվածներին, որոնք հասանելի կլինեն հանրությանը և կստեղծեն որոշակի միջավայր բանակցային գործընթացի համար։ Թե ինչ է տեղի ունեցել երկու երկրների միջև, չենք կարող ասել։ Նմանատիպ հայտարարություններն ավելի շատ հանրության լայն շրջանակի մոտ ինչ-որ տրամադրություն ստեղծելու փորձ են։ Ինչպե՞ս են անդրադառնում թուրք-ամերիկյան լարված հարաբերությունները ընդհանուր տարածաշրջանի վրա։ Մենք իրականում այս պահին ապրում ենք այն ժամանակահատվածում, որը համընկնում է աշխարհում տեղի ունեցող շատ կարևոր փոփոխությունների հետ, որոնք որոշ մասնագիտական շրջանակների կողմից բնորոշվում են որպես նոր աշխարհակարգի ձևավորում։ Այդ աշխարհակարգի ձևավորման մի զգալի հատվածը Մերձավոր Արևելքն է, որտեղ ԱՄՆ-ն և Թուքիան ունեին երկարատև համագործակցության պատմություն, որը, իհարկե, զուրկ չէր խնդիրներից։ Հիմա մենք ականատես ենք լինում ուժի ցուցադրության և նոր դիրքավորման։ Չեմ կարծում, թե որևէ մեկը կարող է պնդել կամ վստահորեն ասել, թե ինչպիսին կլինի Մերձավոր Արևելքի նոր քարտեզը կամ ինչպիսի դիրքավորում կունենան այս տարածաշրջանում հետաքրքրվածություն ունեցող խոշոր ուժերը։ Հետևաբար ցանկացած կարծիք, որ այս թեմայով կհնչի, նման կլինի քաղաքական սպեկուլացիայի։ Ի՞նչ կասեք ռուս-թուրքական հարաբերությունների մասին։ Կարո՞ղ ենք արդյոք արձանագրել, որ երկու երկրների միջև հարաբերություններն օր օրի բարելավվում են։ Ինչպե՞ս սա կանդրադառնա Հայաստանի վրա։ Թուրքիա-Ռուսաստան հարաբերությունները գործընկերային բնույթ են կրում, ոչ թե ռազմավարական բնույթ։ Դրանք ավելի շատ ունեն տակտիկական և մարտավարական բնույթ։ Չեմ կարծում, թե դրանք երկարաժամկետ են։ Շատ հարցերում Ռուսաստանի և Թուրքիայի շահերը բնավ չեն համընկնում, այդ թվում՝ նաև Սիրիայում։ Կան խիստ տարաձայնություններ։ Չմոռանանք նաև, որ ընդամենը երեք կամ չորս տարի է անցել ռուս-թուրքական հարաբերությունների ամենացածր մակարդակում գտնվելու փուլից։ Ինչ վերաբերում է Հայաստանին՝ կարծում եմ, որ Հայաստանը պետք է շարունակի խորացնել իր ռազմավարական համագործակցությունը իր ռազմավարական դաշնակցի՝ Ռուսաստանի հետ։ Դրա առաջին լավ օրինակը ունենք՝ Սիրիայում հումանիտար առաքելությունը, որն իրականացվում է ռուսական կողմի միջոցով։ Ասեմ ավելին՝ Հայաստանը պետք է լինի պրոակտիվ տարածաշրջանային քաղաքականության մեջ, որպեսզի չտուժի տարբեր կողմերի կոնֆիգուրացիաներից։ Այլ ընդհակառակը՝ պետք է ակտիվորեն ներգրավվի տարածաշրջանային քաղաքականության մեջ՝ կանխելով այնպիսի դաշինքների ձեւավորումը, որը կարող է վնասել Հայաստանին։ Եվ վերջում, եթե ի վերջո Թուրքիան, ԱՄՆ-ի հորդորներն ու զգուշացումներն անտեսելով, ձեռք բերի ռուսական S-400 համակարգերը, ինչ հետևանք դա կթողնի Թուրքիայի վրա։ Շատ վատ իրավիճակում կհայտնվի Թուրքիան, որովհետև երկրի տնտեսությունը այնպիսի վիճակում է վերջին մի քանի տարիներին, որ լրացուցիչ պատժամիջոցների կիրառումը կարող է խանգարել երկրի տնտեսական համակարգի կայունացմանը։ Այդ պատճառով ԱՄՆ-ը հիմնականում սեղմում է այդ օղակը։ Կարծում եմ, որ դա շատ լավ հասկանում են նաև Թուրքիայում։ Թուրքական տնտեսությունը շատ է կապված արտաքին շուկայի հետ և պատժամիջոցների կիրառման պարագայում կարող է հայտնվել շատ ծանր իրավիճակում, ինչպես որ եղավ նախորդ տարվա հուլիսի վերջին։ Այդ ժամանակ ընդամենը մեկ ոլորտի վրա շատ փոքր հարկ սահմանվեց, և պատժամիջոցների պատճառով տնտեսական համակարգը հայտնվեց շատ խորը ճգնաժամի եզրին։ Այս պատճառով Թուրքիան չափազանց զգուշավոր է լինելու ցանկացած քայլի դեպքում, որը կհանգեցնի պատժամիջոցների կիրառման։ Աստղիկ Գաուդյան
06:20 - 14 հունիսի, 2019
Ոչ ոք չի կարող Թուրքիային վերջնագիր ներկայացնել․ Չավուշօղլուի պատասխանը ԱՄՆ-ին |ermenihaber.am|

Ոչ ոք չի կարող Թուրքիային վերջնագիր ներկայացնել․ Չավուշօղլուի պատասխանը ԱՄՆ-ին |ermenihaber.am|

ermenihaber.am: Թուրքիայի արտգործնախարար Մևլութ Չավուշօղլուն արձագանքել է ռուսական S-400 ՀՕՊ համակարգերի գնման վերաբերյալ ԱՄՆ-ի նամակին։ Թուրք նախարարը նշել է, որ իրենք արդեն իսկ ձեռք են բերել այդ համակարգերը և որևէ նամակ ի զորու չէ հարկադրել Թուրքիային՝ հետ կանգնել իր ընդունած որոշումից։Ավելի վաղ ԱՄՆ-ի պաշտպանության նախարարի պաշտոնակատար Փաթրիք Շանահան նամակ էր հղել Թուրքիայի պաշտպանության նախարար Հուլուսի Աքարին՝ տեղեկացնելով, որ ռուսական S-400 համակարգերից չհրաժարվելու դեպքում ԱՄՆ-ը Թուրքիային կհեռացնի F-35 ռազմական ինքնաթիռների արտադրության նախագծից։ Ավելին, նամակում նկարագրվել էին նաև ԱՄՆ –ի այն հիմնական քայլերը, որոնց շնորհիվ այդ սպառնալիքը պետք է կյանքի կոչվի։Թուրքիայում գտնվող Ֆրանսիայի արտգործնախարար Ժան Իվ Լը Դրիանի հետ համատեղ մամուլի ասուլիսի ժամանակ պատասխանելով նամակի մասին հարցին՝ Չավուշօղլուն հայտարարել է․ «Ոչ ոք չի կարող Թուրքիային վերջնագիր ներկայացնել։ Նման նամակներով Թուրքիան իր ընդունած որոշումներից հետ չի կանգնի։ Թուրքիան արդեն գնել է S-400-ները, դրանք կվբերվեն ու կտեղակայվեն այստեղ»։
05:38 - 14 հունիսի, 2019
Թուրքիայում քննարկել են հայաստանցի միգրանտների հարցը |ermenihaber.am|

Թուրքիայում քննարկել են հայաստանցի միգրանտների հարցը |ermenihaber.am|

ermenihaber.am: Ստամբուլի Բիլգի համալսարանում տեղի ունեցած միջոցառման շրջանակներում ներկայացվել է «Հրանտ Դինք» հիմնադրամի և Բիլգի համալսարանի Միգրացիայի ուսումնասիրության կենտրոնի կողմից համատեղ կազմված զեկույց՝ Թուրքիայում հայաստանցի միգրանտների խնդիրների առնչությամբ։ Ուշադրության կենտրոնում հատկապես եղել են երեխաները։ Ուսումնասիրության շրջանակներում նաև հարցումներ են իրականացվել։ Հարցումներին ներգրավված են եղել 8-ից 11 տարեկան 102 և 12-ից 18 տարեկան 58 երեխա։ 8-ից 11 տարեկան երեխաների 73, իսկ 12-ից 18 տարեկան երեխաների 90%-ը նշել է, որ լավ կամ շատ լավ է հասկանում թուրքերեն։ 8-ից 11 տարեկան երեխաների 75, 12-ից 18 տարեկան երեխաների 81%-ը Հայաստանում է ծնվել։ Երկու տարիքային խմբի երեխաներն էլ հիմնականում բացի տնային գործերից ընտանիքին օգնելու նպատակով այլ տեղ էլ են աշխատում։ Ընդհանուր առմամբ նրանք հայտնել են, որ գոհ են կյանքի պայմաններից և իրենց անվտանգ են զգում։ Երեխաների համար կարևորագույն խնդիրներից է ուսումը։ Նրանց մի մասը մասնավոր կրթական հաստատությունների կառավարման ոլորտում 2012 թվականին իրականացված փոփոխությունների շնորհիվ կարողանում են որպես հյուր-աշակերտ մասնակցել Ստամբուլի հայկական դպրոցների դասերին, սակայն պաշտոնապես գրանցված չեն այդ դպրոցներում և դիպլոմ չեն ստանում։ Զեկույցի մեջ նշվում է նաև, որ Թուրքիայում բնակվող հայաստանցի միգրանտների թվի վերաբերյալ հստակ տվյալներ չկան։ Տարբեր պնդումներ կան թվաքանակի վերաբերյալ՝ 10 հազարից մինչև 70 հազար, սակայն իրական թիվը, ըստ զեկույցի, 15-20 հազարի սահմաններում է։ 1990-ականներից սկիզբ առած արտագաղթի հետևանքով Թուրքիայում հաստատված հայաստանցիները որպես այդտեղ հաստատվելու հիմնական պատճառ նշել են Հայաստանում եղած գործազրկությունն ու աշխատանք գտնելու մտադրությունը։ Զեկույցում շեշտվում է նաև այն հանգամանքը, որ Հայաստանի և Թուրքիայի միջև դիվանագիտական հարաբերությունների բացակայությունն էլ ավելի է դժվարեցնում հայաստանցի միգրանտների առանց այն էլ բարդ կացությունը։
13:52 - 13 հունիսի, 2019